თბილისი. საერთაშორისო გამჭვირვალობა - საქართველოს ინფორმაციით, პარტია „ქართული ოცნება-დემოკრატიული საქართველოს” თავმჯდომარის ბიძინა ივანიშვილის ნათესავმა მურმან ტოგონიძემ 2014 წლიდან დღემდე იმერეთის ცალკეული მუნიციპალიტეტების ბიუჯეტიდან ტენდერებისა და გამარტივებული შესყიდვების მეშვეობით 16,395,501 ლარი მიიღო. ბლოგპოსტის თანახმად, მურმან ტოგონიძე ბიძინა ივანიშვილის დის - მაგული ივანაშვილის მულის ქმარია. ორგანიზაცია მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას: „შეისწავლონ ინდივიდუალური მეწარმე მურმან ტოგონიძისა და შპს „მშენინვესტის” მიერ მოგებული ტენდერები და დაადგინონ, ხომ არ იყო ისინი ტოგონიძისა და მისი კომპანიისათვის სასურველ პირობებში გამოცხადებული და შეიცავდა თუ არა კორუფციის შესაძლო ნიშნებს“. სრულად... წყარო: transparency.ge

თბილისი. პროექტის „სამოქალაქო საზოგადოების განვითარების ინიციატივა“ ფარგლებში, შეიქმნა პუბლიკაციები: რამდენად ასრულებს საქართველო ევროკავშირთან ასოცირების შეთანხმების შედეგად აღებულ ვალდებულებებს. დოკუმენტები საქართველოს მიერ სხვადასხვა სფეროში აღებული ვალდებულებების შესრულების მონიტორინგის შედეგებს შეეხება... ყველაფერს ევროკავშირთან ასოცირების შესახებ შეგიძლიათ გაეცნოთ ერთ საიტზე... პუბლიკაციები შეიქმნა პროექტის „სამოქალაქო საზოგადოების განვითარების ინიციატივა“ ფარგლებში, ევროკავშირისა და კონრად ადენაუერის ფონდის (KAS) მხარდაჭერით. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საგანგებო ბიუჯეტის ბიუროკრატიული ხარჯების ანალიზი. „2020 წლის ბიუჯეტის ცვლილების პროექტში გათვალისწინებული ადმინისტრაციული ხარჯების ანალიზი აჩვენებს, რომ პანდემიით გამოწვეული კრიზისული მდგომარეობის ფონზე საქართველოს ხელისუფლება გეგმავს ბიუროკრატიული ხარჯების გარკვეულ შემცირებას. თუმცა, IDFI მიიჩნევს, რომ დაგეგმილი შემცირება არ არის შესაბამისობაში ქვეყნაში არსებულ ეკონომიკურ გამოწვევებთან. კერძოდ, ადმინისტრაციული ხარჯების მუხლით დაგეგმილი ზოგიერთო ცვლილება (სამივლინებო ხარჯები, წარმომადგენლობითი ხარჯები) განპირობებულია პანდემიის შედეგად ბუნებრივ შემცირებასთან და ნაკლებად კავშირშია ე.წ. ქამრების შემოჭერის პოლიტიკასთან“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი ამერიკის შეერთებული შტაბების სახელმწიფო დეპარტამენტის მიერ 10 ივნისს გამოქვეყნებული ანგარიშის მიმოხილვას გთავაზობთ, რომელიც საქართველოში რელიგიის თავისუფლების თვალსაზრისით არსებულ ვითარებას შეეხება. „ზოგადი საკანონმდებლო მდგომარეობის აღწერისას ანგარიშში ხაზგასმულია, რომ საქართველოში კონსტიტუციით გარანტირებულია რელიგიის თავისუფლება და აკრძალულია რელიგიური ნიშნით დევნა. აქვე პარალელურად აღნიშნულია, რომ საქართველოს კონსტიტუცია აღიარებს საქართველოს მართლმადიდებელი ეკლესიის განსაკუთრებულ როლს და სახელმწიფოსა და ეკლესიას შორის ურთიერთობა რეგულირდება კონკორდატის საფუძველზე. ანგარიშში აღნიშნულია, რომ კონკორდატი იმგვარ პრივილეგიებს აძლევს დომინანტ რელიგიურ ორგანიზაციას, რომელიც სხვა ორგანიზაციებს არ აქვთ“, ნათქვამია ორგანიზაციის ვებგვერდზე. სრულად... წყარო: emc.org.ge

ევროკომისიის 10 ივნისის ანგარიშის თანახმად, კოვიდ 19-ის პანდემია ცრუ და შეცდომაში შემყვანი ინფორმაციების მასობრივი ტალღის თანხლებით მიმდინარეობს. ჯანდაცვის საკითხებთან დაკავშირებით შეცდომაში შემყვანმა ინფორმაციებმა, სახიფათო, ცრუ მტკიცებებმა, კონსპირაციის თეორიებმა და სამომხმარებლო თაღლითობამ მნიშვნელოვანი საფრთხე შეუქმნა საზოგადოებრივ ჯანმრთელობას. ყალბი ან შეცდომაში შემყვანი ინფორმაციები კორონა ვირუსის შესახებ, აზიანებს სოციეტალურ ერთობას, თუმცა უპირველესად ჯანდაცვას. ცრუ და შეცდომაში შემყვანი ნარატივები სხვადასხვა ფორმით შეიძლება გავცელდეს, ისინი ვარირებს მიზანმიმართული, წინასწარ განზრახული დეზინფორმაციიდან არასწორ ინფორმაციამდე და განსხვავებულ საპასუხო ქმედებებს მოითხოვს. ევროკომისიის განცხადებით, გარეშე აქტორები, კონკრეტულად, რუსეთი და ჩინეთი მონაწილეობენ მიზანმიმართულ, გავლენის გამავრცელებელ ქმედებებში და დეზინფორმაციის კამპანიებში ევროკავშირში, მის სამეზობლოში და მთელ მსოფლიოში. დეზინფორმაციების მაგალითებად ევროკომისიას მოჰყავს ისეთი მცდარი მტკიცებები, როგორიცაა „ძლიერი ქიმიური საყოფაცხოვრებო ხსნარების და სამედიცინო (ეთილის) სპირტის დალევა კურნავს კორონავირუსს“, რა თქმა უნდა, ეს მტკიცება არასწორია და საზიანოა ჯანმრთელობისთვის. Belgium’s Poison Control Centre-ზე დაყრდნობით, ამ პერიოდში, ქიმიურ საყოფაცხოვრებო ხსნარებთან დაკავშირებული ინციდენტები 15%-ით გაიზარდა. კონსპირაციის ერთ-ერთი თეორიის მტკიცებით: კორონავირუსი „არის ინფექცია, რომელიც მსოფლიო ელიტების მიერ მოსახლეობის ზრდის შესამცირებლად გავრცელდა“. სამეცნიერო მტკიცებულება კი ცხადყოფს, რომ კოვიდ 19 მიეკუთვნება ცხოველური წარმოშობის ვირუსების ოჯახს, რომელიც მოიცავს SARS და MERS ვირუსებსაც. მტკიცება, რომ თითქოს „5G ინსტალაციები ავრცელებს ვირუსს“ შორსაა მეცნიერული დასაბუთებებისგან და ანძებზე თავდასხმისთვის გამოიყენეს. ევროკავშირი გააგრძელებს დეზინფორმაციასთან ბრძოლას, ხელს შეუწყობს მოქალაქეების გაძლიერებას, ცნობიერების ამაღლებას და სოციეტალური მედეგობის ზრდას. ევროკომისია მხარს დაუჭერს მედია-წიგნიერების პროექტებს, კრიტიკული აზროვნების, ციფრული უნარების განვითარების შესაძლებლობების გაზრდას. კომისია ასევე, ყურადღებას გაამახვილებს ისეთ ჯგუფებზე (ბავშვები, ახალგაზრდები), რომლებიც უფრო მოწყვლადები არიან ცრუ, შეცდომაში შემყვანი ინფორმაციების მიმართ. სრულად... წყარო: ec.europa.eu

თბილისი. ინფრომაციის თავისუფლების განვითარების ინსტიტუტის ინფორმაციით, 8 ივნისს კორუფციასთან ბრძოლის სასერტიფიკატო პროგრამის მეშვიდე მოდული დაიწყო, რომელიც მიზნად ისახავს კორუფციასთან ბრძოლის საერთაშორისო პრაქტიკის ანალიზს. „მეშვიდე მოდულის განმავლობაში კურსის მსმენელები შეისწავლიან კორუფციასთან წარმატებული ბრძოლის თვალსაზრისით სხვადასხვა ქვეყნების გამოცდილებას; ქვეყნის წარმატების/ წარუმატებლობის განმაპირობებელ თეორიებს; კაპიტალიზმს, როგორც დომინანტი პოლიტ-ეკონომიკური მოწყობის მოდელს და მის ვარიაციებს; ეკონომიკური ტრანსფორმაციისა და განვითარების ძირითად გამოწვევებს. მათ შესაძლებლობა ექნებათ შეადარონ საქართველოს გამოცდილება და განხორციელებული რეფორმები სხვა ქვეყნების მიერ განხორციელებულ რეფორმებს“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: რატომ არის მნიშვნელოვანი არქივების ღიაობა. „ღიაობა და ანგარიშვალდებულება დემოკრატიული პრინციპებია, რომლის გარეშეც წარმოუდგენელია თავისუფალი საზოგადოების განვითარება. საბჭოთა კავშირის რღვევის შემდგომ, ინფორმაციაზე წვდომა, არქივების გახსნილობა და საარქივო დოკუმენტების გასაჯაროვება რიგი ქვეყნების უმნიშვნელოვანესი მონაპოვარია, რაც საშუალებას აძლევს საზოგადოებას გაეცნოს და გაიაზროს ისტორია და ტოტალიტარული წარსული. საარქივო დოკუმენტების ფოტოგადაღების დაშვება უმნიშვნელოვანესი წინ გადადგმული ნაბიჯი იქნება არა მხოლოდ ხელმისაწვდომობის და გამჭვირვალობის ზრდის, არამედ ასევე მეცნიერების განვითარების ხელშეწყობის მიმართულებით. ამ გზით ხელისუფლება დაადასტურებს, რომ მას სრულად აქვს გათვითცნობიერებული არქივების ღიაობის მნიშვნელობა და დაამკვიდრებს თავისუფალი, დემოკრატიული ქვეყნების მსგავს პრაქტიკას საქართველოში“. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, თბილისის მერიის საახალწლო შესყიდვები კორუფციის შესაძლო ნიშნებს შეიცავს. „საქართველოში საახალწლო ღონისძიებებთან დაკავშირებული სახელმწიფო შესყიდვები, როგორც წესი, გამოირჩევა იმით, რომ მაღალია გამარტივებული (პირდაპირი) შესყიდვების წილი. პირდაპირი შესყიდვის საფუძვლად კი გადაუდებელი აუცილებლობა ან სახელმწიფოებრივი და საზოგადოებრივი მნიშვნელობის ღონისძიება სახელდება. მიუხედავად იმისა, რომ ახალი წელი ყოველთვის 1 იანვარს არის, მუნიციპალიტეტები ვერ ახერხებენ დროულად დაიწყონ ახალი წლის ღონისძიებებისთვის მზადება და წლის ბოლოს დაჩქარებულად და მითუმეტეს, პირდაპირი შესყიდვებით არ დახარჯონ ბიუჯეტის ფული. არაეკონომიურობასთან ერთად, პირდაპირი შესყიდვები კორუფციის ეჭვებს აჩენს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა” (CRRC) 2020 წლის 27 თებერვლიდან 18 მარტამდე პერიოდში საზოგადოებრივი აზრის კვლევა ჩაატარა. „კვლევის ფარგლებში მთელი ქვეყნის მასშტაბით 1763 ადამიანი გამოიკითხა. კვლევის საშუალო ცდომილება 2.2%-ია. საქართველოში კვლავ იშვიათია წვრილმანი კორუფცია, თუმცა გამოწვევად რჩება კორუფციის უფრო კომპლექსური ფორმები და კორუფციის ისეთი შემთხვევების გამოძიება, სადაც მაღალი თანამდებობის პირები ფიგურირებენ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) ინფორმაციის თავისუფლების განვითარების ინსტიტუტთან (IDFI) ერთად აქვეყნებს ჩრდილოვან ანგარიშს „სასამართლო სისტემის სტრატეგიისა და სამოქმედო გეგმის შესრულების მდგომარეობა“. „მონიტორინგის ანგარიშმა გამოკვეთა, რომ იუსტიციის უმაღლესი საბჭო სათანადო ყურადღებას არ უთმობს სტრატეგიის და სამოქმედო გეგმის სრულყოფილად იმპლემენტაციას და ხშირ შემთხვევაში, მხოლოდ ტექნიკურად სრულდება კონკრეტული აქტივობები, ხოლო მათი შინაარსობრივი შედეგი, მართლმსაჯულების ხარისხობრივი გაუმჯობესება, სამოქმედო გეგმის შესრულებაზე პასუხისმგებელი უწყებების ინტერესს მიღმა რჩება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო თვლის, რომ პარლამენტის რეგლამენტის ცვლილებები ოპოზიციის უფლებრივ მდგომარეობას აუარესებს. „უმრავლესობის წევრებმა პარლამენტში 1 ივნისს რეგლამენტში ცვლილებების პროექტი წარადგინეს. ანალიზი მოიცავს პროექტით გათვალისწინებულ მნიშვნელოვან სიახლეებს, რომლითაც უარესდება ოპოზიციის უფლებრივი მდგომარეობა, მათ შორის: სხვადასხვა პოლიტიკური პარტიის ან/და საარჩევნო ბლოკის წარდგენით არჩეული დეპუტატები საერთო ფრაქციას ვეღარ შექმნიან; პოლიტიკური დებატების დროს უმრავლესობის ფრაქციას გამოსვლის დრო ეზრდება, პატარა ფრაქციებს და დამოუკიდებელ დეპუტატებს კი უმცირდებათ; საპროკურორო საბჭოს წევრს ოპოზიცია მისი კვოტის შესავსებად დამოუკიდებლად, უმრავლესობის მხარდაჭერის გარეშე ვეღარ დაამტკიცებს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის განმარტებით, თბილისის სააპელაციო სასამართლომ საზოგადოებრივი მაუწყებლის მიერ საჯარო ინფორმაციის გაცემასთან დაკავშირებით მნიშვნელოვანი გამარტება გააკეთა. „თბილისის სააპელაციო სასამართლომ ნაწილობრივ დააკმაყოფილა საიას სააპელაციო საჩივარი და საზოგადოებრივ მაუწყებელს დაევალა სახელმწიფო შესყიდვის ფარგლებში 10 არარეზიდენტ პირთან გაფორმებული ხელშეკრულების (თითოეულზე თანხის მითითებით) გადმოცემა. თბილისის სააპელაციო სასამართლომ განმარტა, რომ „სახელმწიფო შესყიდვების შესახებ“ და „მაუწყებლობის შესახებ“ კანონები გამორიცხავენ საზოგადოებრივი მაუწყებლის მიერ ტელე-, რადიო-, ასევე ვებგვერდებისა და სოციალური ქსელისთვის განკუთვნილი პროდუქციის ან/და მის შესაქმნელად საჭირო მომსახურების შესყიდვაზე სახელმწიფო შესყიდვების კანონმდებლობის გავრცელებას, მაგრამ ეს არ გულისხმობს სახელმწიფო დაფინანსების ფარგლებში განხორციელებული შესყიდვების ამსახველი ხელშეკრულებების საჯაროობის გამორიცხვას და საჯარო ინფორმაციის გაცემის ვალდებულება მაინც არსებობს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDF) აქვეყნებს კვლევას, რომელიც მიმოიხილავს საქართველოს ლობისტურ საქმიანობას 2015-2020 წლებში, რაც მოიცავს დადებული ხელშეკრულებების ანალიზსა და საქართველოდან განხორციელებული ფაქტობრივი გადარიცხვების შესახებ ინფორმაციას. სრულად... წყარო: idfi.ge

თბილისი. „საერთაშორისო გამჭვირვალობა - საქართველო“ საგანგებო მდგომარეობის განმავლობაში განხორციელებულ ტენდერებს და პირდაპირ შესყიდვებს აკვირდება, მათ შორის სასტუმროებთან დადებული ხელშეკრულებების გარემოებებს სწავლობს. „მომატებული კორუფციული რისკებიდან გამომდინარე, ყურადღება მიიქცია შპს „ყვარლის ედემთან“ გაფორმებულმა ხელშეკრულებამ, რომლის მიხედვითაც, სასტუმროში მაღალი რისკის ზონად გამოცხადებული რეგიონებიდან შემოსული საქართველოს მოქალაქეები უნდა განთავსდნენ. ხელშეკრულების მიხედვით, სასტუმრომ 45 ნომერი უნდა გამოყოს 2 თვის ვადით. შპს „ყვარლის ედემის“ მფლობელებმა და დირექტორმა 2020 წლის 20 და 23 მარტს „ქართულ ოცნებას” ჯამში 65,000 ლარი შესწირეს და რამდენიმე დღეში საქართველოს ტურიზმის ეროვნული ადმინისტრაციისგან გამარტივებული შესყიდვის გზით 277,300 ლარიანი კონტრაქტი მიიღეს“. სრულად… წყარო: transparency.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, ევროკომისიის პროექტის “Global Facility on Anti-Money Laundering and Countering the Financing of Terrorism (GF-AML/CFT)” ფარგლებში არასამთავრობო ორგანიზაციების წარმომადგენლებისათვის იმართება საქართველოში ტრენინგი სახელწოდებით: FATF-ის მე-8 რეკომენდაცია არაკომერციული იურიდიული პირებისთვის. „ტრენინგის შედეგად მსმენელები შეიძენენ ცოდნას არასამთავრობო ორგანიზაციების საქმიანობაში ფულის გათეთრებისა და ტერორიზმის დაფინანსების აღკვეთის ზომების პრევენციული გამოყენების შესახებ. ტრენინგში მონაწილეობის მიღების სურვილი გამოთქვეს შემდეგმა არასამთავრობო ორგანიზაციებმა: სამოქალაქო საზოგადოების ინსტიტუტი; მედიის განვითარების ფონდი; ევროპის ფონდი; საქართველოს სტრატეგიისა და საერთაშორისო ურთიერთობების კვლევის ფონდი; კონსულტაციისა და ტრენინგის ცენტრი (CTC); საერთაშორისო გამჭვირვალობა - საქართველო; ეკონომიკური პოლიტიკის კვლევის ცენტრი (EPRC); სამოქალაქო განვითარების სააგენტო (სიდა); სამართლიანი არჩევნებისა და დემოკრატიის საერთაშორისო საზოგადოება (ISFED); საქართველოს ახალგაზრდა იურისტთა ასოციაცია(GYLA). ტრენინგი ჩატარდება ინგლისურ ენაზე 1 ივნისიდან 5 ივნისის ჩათვლით, 19:00-დან 20:00 საათამდე პროგრამა Zoom-ის მეშვეობით. საქართველოში ტრენინგის ორგანიზების მხარდამჭერია „ინფორმაციის თავისუფლების განვითარების ინსტიტუტი“ (IDFI)“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციამ პარლამენტის წევრების მიერ ინიცირებულ შრომის კოდექსში ცვლილებების პაკეტის თაობაზე საქართველოს პარლამენტის ჯანმრთელობის დაცვისა და ადამიანის უფლებების დაცვის კომიტეტებს მოსაზრებები წარუდგინა. „იმის მიუხედავად, რომ „შრომის კოდექსში“ ცვლილებები და „შრომის ინსპექციის შესახებ“ საქართველოს კანონის პროექტი ზრდის დასაქმებულის სამართლებრივი დაცვის გარანტიებს, საია-მ საჭიროდ მიიჩნია საქართველოს პარლამენტისათვის დამატებითი შენიშვნების წარდგენა, რათა ხელი შეუწყოს პროექტის გაუმჯობესებას და არსებული ხარვეზების დახვეწას“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC), ინფორმაციის თავისუფლების განვითარების ინსტიტუტი (IDFI) და მედიის განვითარების ფონდი (MDF) მიიჩნევს, რომ პარლამენტმა მხარი არ უნდა დაუჭიროს კანონპროექტს ინფორმაციული უსაფრთხოების შესახებ. „კანონპროექტი, თავისი არსით და შემოტანილი რეგულაციებით, ეწინააღმდეგება ევროკავშირის რეგულაციებს, ასოცირების ხელშეკრულებით ნაკისრ ვალდებულებებსა და GDPR-ის მოთხოვნებს პერსონალური მონაცემების დამუშავებასთან დაკავშირებით გათვალისწინებული პროცედურების ჭრილში. კანონპროექტის შემუშავების პროცესში არ ყოფილა გათვალისწინებული ხსენებულ რეგულაციებთან შესაბამისობის უზრუნველყოფა და ამ მიზნით დღემდე არანაირი ღონისძიება არ გატარებულა. შესაბამისად „ინფორმაციული უსაფრთხოების შესახებ“ საქართველოს კანონი საჭიროებს გადახედვას და ცვლილებებს, განსაკუთრებით აღსრულების მექანიზმების დახვეწის მიმართულებით“, ნათქვამია ერთობლივ განცხადებაში. სრულად... წყარო: emc.org.ge

თბილისი. საერთაშორისო გამჭვირვალობა - საქართველოს განცხადებით, სოფლის მხარდაჭერის პროგრამიდან 40 მილიონი ლარი ტენდერების გარეშე იხარჯება. „სოფლის პროგრამის შემთხვევამ შექმნა სახიფათო პრეცედენტი, როდესაც მრავალ შესყიდვაზე შეიძლება გაიცეს გამარტივებული შესყიდვის ერთიანი ნებართვა. გარდა იმისა, რომ ეს ეწინააღმდეგება კანონის მოთხოვნებს, ის პირდაპირ ეწინააღმდეგება შესყიდვების სააგენტოს გაცხადებულ მიზანს, შემცირდეს გამარტივებული შესყიდვების წილი სახელმწიფო შესყიდვებში. ბოლო წლების განმავლობაში ამ მიმართულებით გადადგმულმა ნაბიჯებმა შთამბეჭდავი შედეგი გამოიღო – 2016-2018 წლებში გამარტივებული შესყიდვის წილი სახელმწიფო შესყიდვებში 37%-დან 19%-მდე შემცირდა. ამ ფონზე, გაუგებარია, რატომ გასცემს შესყიდვების სააგენტო კანონთან შეუსაბამო ერთიან თანხმობას სოფლის პროგრამის მთლიანად გამარტივებული შესყიდვით გახარჯვაზე“. სრულად... წყარო: transparency.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: გიორგი ზედელაშვილის ოჯახის წევრების ბიზნეს ინტერესები ჰესებსა და გზების მშენებლობაში. „ორგანიზაციამ 2020 წლის 17 თებერვალს გამოქვეყნებულ სტატიაში მიმოიხილა სახელმწიფო უსაფრთხოებისა და კრიზისების მართვის საბჭოს მდივნის ყოფილი პირველი მოადგილის - გიორგი ზედელაშვილის დედის კომპანიის - „სერპანტინის” საქმიანობა, რომელმაც 2013-2019 წლებში სახელმწიფო ბიუჯეტიდან 105 მილიონ ლარზე მეტი მიიღო. გიორგი ზედელაშვილის დედის კომპანია კვლავ აგრძელებს სახელმწიფო ტენდერებში უკონკურენტოდ გამარჯვებას. მხოლოდ ოთხი თვის განმავლობაში, 2020 წლის იანვარ-აპრილში, “სერპანტინმა” 7,249,170.06 ლარის ოდენობის ტენდერები მოიგო. წინამდებარე ბლოგში ასევე მიმოვიხილავთ გიორგი ზედელაშვილის ოჯახის წევრებისა და მათი ბიზნესპარტიორების საქმიანობას, რომელიც, შესაძლებელია, კავშირში იყოს სავარაუდო კორუფციულ გარიგებებთან. კვლევის პროცესში გამოიკვეთა გიორგი ზედელაშვილისა და თბილისის საკრებულოს ყოფილი თავმჯდომარის, ირაკლი შიხიაშვილის საერთო ინტერესები ჰიდროელექტროსადგურებთან დაკავშირებით“, ნათქვამია ბლოგპოსტზე. სრულად... წყარო: transparency.ge

თბილისი. საერთაშორისო გამჭვირვალობა - საქართველო შესყიდვების შესახებ კანონში დაგეგმილი ცვლილებების შეფასებას აქვეყნებს. „საქართველოს პარლამენტში 2 მარტს დარეგისტრირდა მთავრობის ინიციატივა (N07-2/452) „სახელმწიფო შესყიდვების შესახებ” კანონში ცვლილებების შეტანის თაობაზე. „საერთაშორისო გამჭვირვალობა - საქართველომ” შეისწავლა წარმოდგენილი კანონპროექტი. ჩვენი აზრით, წარმოდგენილი ცვლილებები დიდწილად დადებითია, ვინაიდან, მათი მიღების შემთხვევაში, მნიშვნელოვნად გაუმჯობესდება სახელმწიფო შესყიდვებში გასაჩივრებისა და დავების გადაწყვეტის მექანიზმები. თუმცა, ამავე დროს გვაქვს რამდენიმე შენიშვნა შემდეგ საკითხებთან დაკავშირებით...“ სრულად... წყარო: transparency.ge

თბილისი. საერთაშორისო გამჭვირვალობა - საქართველო აქვეყნებს თიბისი ბანკის და ანაკლიის პორტის დამფუძნებლების წინააღმდეგ დაწყებული გამოძიების განახლებულ ისტორიას. ბლოგპოსტსში ნათქვამია, რომ ორგანიზაცია მომავალშიც აქტიურად დააკვირდება „თიბისი ბანკთან“ და მის დამფუძნებლებთან დაკავშრებული მოვლენების განვითარებას და ახალი გარემოებების გამჟღავნების ან აღმოჩენის შემთხვევაში, წარმოდგენილ ინფორმაციას განაახლებს. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2018 წლის 2 აგვისტოს საქართველოს კომუნიკაციების ეროვნულმა კომისიამ ა(ა)იპ „მედიააკადემია“ დააფუძნა, რომლის საქმიანობის მიზანს საქართველოში მედიაწიგნიერების განვითარების ხელშეწყობა წარმოადგენს. ბლოგპოსტის თანახმად, ორგანიზაციამ „მედია აკადემიისგან“ სხვადასხვა ტიპის ინფრომაცია გამოითხოვა, თუმცა IDFI-ს უარი ეთქვა ინფორმაციის მიღებაზე. ეს გადაწყვეტილება გასაჩივრდა კომუნიკაციების ეროვნულ კომისიაში, თუმცა კომისიამ საჩივრის საფუძვლიან განხილვაზე უარი განაცხადა. „საკუთარი უფლებების დაცვისა და საზოგადოების ინფორმირების მიზნით IDFI-იმ სარჩელით მიმართა თბილისის საქალაქო სასამართლოს. IDFI იმედოვნებს, რომ სასამართლო მიიღებს კანონის შესაბამის გადაწყვტილებას, დაადასტურებს რომ „მედიააკადემია“ წარმოადგენს ადმინისტრაციულ ორგანოს და დააკისრებს მას საჯარო ინფორმაციის გაცემის ვალდებულებას“, ნათქვამია ორგანიზაციის ვებგვერდზე. სრულად... წყარო: idfi.ge