თბილისი. 27 სექტემბერს, აზერბაიჯანელმა ჟურნალისტმა აფგან მუხთარლიმ თბილისში პრესკონფერენცია გამართა და ხუთი წლის წინ საქართველოს დედაქალაქიდან თავისი გატაცების საქმეზე მიმდინარე გამოძიებაზე ისაუბრა. „მუხთარლიმ მისი გატაცების ორგანიზებისათვის პასუხისმგებლობა საქართველოსა და აზერბაიჯანის უმაღლესი ხელისუფლების წარმომადგენლებს დააკისრა. მანვე მოითხოვა, რომ საქართველოს პრემიერ-მინისტრმა ირაკლი ღარიბაშვილმა უფლებამოსილება შეუჩეროს შინაგან საქმეთა მინისტრს ვახტანგ გომელაურს, ვიდრე ჟურნალისტის გატაცების საქმის გამოძიება არ დასრულდება. მუხთარლის ინტერესებს 2017 წლიდან დღემდე თბილისის ადამიანის უფლებათა სახლი და ორგანიზაცია „უფლებები საქართველო“ იცავენ არა მხოლოდ ადგილობრივ დონეზე, არამედ ევროსასამართლოშიც“. ვრცლად... წყარო: rights.ge

თბილისი. 2022 წელს, სახალხო დამცველის აპარატმა საქართველოში მცხოვრები სამუშაო ასაკის შშმ პირების მიერ შრომისა და დასაქმების უფლების დაცვის მდგომარეობა შეისწავლა. „კვლევის შედეგებმა ცხადყო, რომ სახალხო დამცველის აპარატის მიერ 2017 წელს ჩატარებული  მონიტორინიგის შემდეგ, შეზღუდული შესაძლებლობის მქონე პირთა დასაქმების ხელშემწყობი სახელმწიფო პროგრამების განხორციელების  კუთხით მდგომარეობა ფაქტობრივად არ გაუმჯობესებულა და 5 წლის წინანდელ ანგარიშში ასახული რეკომენდაციების დიდი ნაწილი კვლავ შეუსრულებელია. ის ნაბიჯები, რაც დღემდე ტარდება დასაქმების კუთხით სახელმწიფოსა და კერძო სექტორის მხრიდან, არ არის საკმარისი. მეტიც, ისინი არასისტემური და დროებითია“. სრულად... წყარო: ombudsman.ge

თბილისი. სოციალური სამართლიანობის ცენტრი გთავაზობთ თამთა მიქელაძის ინტერვიუს, რომელიც ჩაწერილია მშვიდობის, ისტორიის, სოციალური მეცნიერებების სფეროში მოღვაწე მკვლევრებთან და ექსპერტებთან თემაზე: კონფლიქტები, გაბატონებული ინტერპრეტაციები და პოლიტიკური ინტერესები მათ უკან. ინტერვიუ ვრცლად შეგიძლიათ ნახოთ... წყარო: socialjustice.org.ge

თბილისი. 26 სექტემბერს დაიწყო ინფორმაციის თავისუფლების განვითარების ინსტიტუტის (IDFI) და საქართველოს უნივერსიტეტის (UG) ერთობლივი სასწავლო პროგრამა „დეზინფორმაციისა და პროპაგანდის კვლევა: ისტორია, თეორიები და გაბათილების საშუალებები“. სასერტიფიკატო და საუნივერსიტეტო პროგრამა ორი სემესტრის განმავლობაში მსმენელებს შესთავაზებს მოკლე სასწავლო სემინარს, დეზინფორმაციისა და პროპაგანდის კვლევის, ისტორიის, მისი საზოგადოებრივი გავლენებისა და გაბათილების საშუალებებზე.  სრულად... წყარო: idfi.ge

28 სექტემბერს, 10:00 საათზე, სახალხო უნივერსიტეტთა გერმანული ასოციაციის საერთაშორისო თანამშრომლობის ინსტიტუტის (DVV International) ორგანიზებით საერთაშორისო კონფერენცია „ზრდასრულთა სწავლა და განათლება სამხრეთ კავკასიაში: მთავარი ეტაპები“ გაიმართება. მისამართი: თბილისი, სასტუმრო „რედისონ ბლუ ივერია"

თბილისი. 27 სექტემბერს სასტუმრო “რუმსში” სამოქალაქო საზოგადოების ინსტიტუტის (CSI) ორგანიზებით გაიმართა ფორუმი „ადგილობრივ დონეზე მოქალაქეთა მონაწილეობის გაძლიერება“. ფორუმის მიზანი იყო მოქალაქეთა ჩართულობის კუთხით არსებული გამოცდილებისა და საუკეთესო პრაქტიკების გაზიარება, გამოწვევებისა და შესაძლებლობების გაანალიზება, ამ კუთხით მნიშვნელოვან საკითხებზე დიალოგისა და დისკუსიის სივრცის შექმნა, რაც ხელს შეუწყობს სამოქალაქო მონაწილეობის საკითხით დაინტერესებული აქტორების შესაძლებლობების გაძლიერებას და მათ შორის თანამშრომლობის სტიმულირებას. შეხვედრის დასაწყისში, სამოქალაქო საზოგადოების ინსტიტუტის, საქართველოს რეგიონული განვითარებისა და ინფრასტრუქტურის სამინისტროს და საქართველოს ადგილობრივ თვითმმართველობათა ეროვნული ასოციაციის წარმომადგენლებმა ისაუბრეს გადაწყვეტილების მიღების პროცესში მოქალაქეთა მონაწილეობის მნიშვნელობაზე. შეხვედრის მეორე პანელი დაეთმო მუნიციპალიტეტების შეფასების შიდა და გარე ინსტრუმენტებსა და ამ კუთხით რუსთავისა და გორის მუნიციპალიტეტების გამოცდილების გაზიარებას.  ამასთანავე, შეხვედრაზე როგორც მუნიციპალიტეტების, ასევე საზოგადოებრივი ორგანიზაციების წარმომადგენლებმა ისაუბრეს ადგილობრივ დონეზე არსებულ მოქალაქეთა ჩართულობის მექანიზმებსა და საუკეთესო გამოცდილებაზე, საერთაშორისო ორგანიზაციების წარმომადგენლებმა კი წარადგინეს ის პროგრამები და შესაძლებლობები, რომლებიც ხელს უწყობს პოლიტიკის შექმნის პროცესში მოქალაქეთა ჩართულობას. ფორუმის ბოლოს მონაწილეებმა დისკუსიის რეჟიმში იმსჯელეს აღნიშნული კუთხით არსებულ გამოწვევებზე და მათი გადაჭრის შესაძლებლობებზე.  ფორუმი ორგანიზებულია სამოქალაქო საზოგადოების ინსტიტუტის (CSI) მიერ, პროექტის „ადგილობრივი განვითარების აქტორების მდგრადი კავშირის შექმნა საქართველოში“ – ფარგლებში, რომელიც დაფინანსებულია გერმანული საერთაშორისო ფონდის “პური მსოფლიოსთვის” (Bread for the World) – მიერ. ინიციატივა მიზნად ისახავს ადგილობრივი თვითმმართველობის დონეზე განვითარების სფეროში ჩართული აქტორების გაძლიერებას, რათა მათ ეფექტურად შეძლონ ადგილობრივი საჭიროებებისა და განვითარების პრიორიტეტების განსაზღვრა და პოლიტიკური გადაწყვეტილებების მიღების პროცესში აქტიური მონაწილეობა.

თბილისი. 22 სექტემბერს საქართველოს სასამართლოს გუშაგმა წარმოადგინა კვლევა: „ნეპოტიზმისა და კრონიზმის ხელშემწყობი ფაქტორები სასამართლო სისტემაში“. ის ეფუძნება სასამართლოს გუშაგის მიერ ჩატარებულ 30 სიღრმისეული ინტერვიუს მოქმედ და ყოფილ მოსამართლეებთან, ადვოკატებთან, ექსპერტებთან და აკადემიური წრეების წარმომადგენლებთან. ამასთან, ორგანიზაციამ გაანალიზდა კანონმდებლობა და იუსტიციის უმაღლესი საბჭოს გადაწყვეტილებები. კვლევაში ნათქვამია, რომ საქართველოში ჩატარებულმა სასამართლო რეფორმებმა შექმნა პროგრესის ილუზია; ინსტიტუციური და პროცედურული გარანტიები ფასადად იქნა გამოყენებული, რამაც მოსამართლეთა გავლენიან ჯგუფს სასურველი საკადრო პოლიტიკის გატარების შესაძლებლობა მისცა. სრულად... წყარო: osgf.ge

შიდა ქართლი. კასპის მუნიციპალიტეტის სოფელ ახალციხეში თანაშექმნის სივრცე გაიხსნა, რომელიც ისრაელის საელჩოს მიერ, მაშავის პროგრამით დაფინანსდა. ადგილობრივ მოსახლეობას ექნება სივრცე მუშაობისთვის, სხვადასხვა ონლაინ თუ პირისპირი შეხვედრის ორგანიზებისთვის და ნებისმიერი სხვა ტიპის იდეის განხორციელებისთვის. პროექტის მხარდამჭერები არიან კასპის მუნიციპალიტეტის მერია და სათემო ორგანიზაცია „კომლის თემი“. სრულად... წყარო: ორგანიზაციის გვერდი სოციალურ ქსელში

თბილისი. ტრადიციულად, საზოგადოებრივი ორგანიზაციები ყოველთვის მონაწილეობდნენ იმ დისკუსიებსა თუ განხილვებში, რომელსაც სახალხო დამცველის არჩევის პროცესი ითვალისწინებს. აღნიშნულის გათვალისწინებით, არასამთავრობო ორგანიზაციებმა ფართო, წარმომადგენლობითი და დემოკრატიული პროცესისა და კონსულტაციების შედეგად, ერთობლივად შეიმუშავეს ომბუდსმენობის კანდიდატობის ნომინირების წესი და ის კრიტერიუმები, რასაც უნდა აკმაყოფილებდეს მომავალი სახალხო დამცველი. „სახალხო დამცველის პოსტზე მხარს ვუჭერთ ანა აბაშიძის, გიორგი ბურჯანაძისა და ნაზი ჯანეზაშვილის კანდიდატურებს და მოვუწოდებთ პოლიტიკურ პარტიებს, რომ წარუდგინონ ისინი საქართველოს პარლამენტს“, ნათქვამია ერთობლივ განცხადებაში. სრულად... წყარო: sapari.ge

თბილისი. ორგანიზაცია „უფლებები საქართველოს“ ინფორმაციით, დღეს, 15:30 საათზე, აზერბაიჯანელი ჟურნალისტი აფგან მუხთარლი საგანგებო პრესკონფერენციას გამართავს. ის მისი გატაცების საქმეზე მიმდინარე სიახლეებზე ისაუბრებს. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი განაგრძობს ძალადობის მსხვერპლი ბავშვების ფსიქოლოგიურ-სოციალური ცენტრის მხარდაჭერას. ცენტრი 2022 წლის მარტში ამოქმედდა ესტონეთის მთავრობის მხარდაჭერით და მისი მიზანია ბავშვზე მორგებულ სივრცეში საგამოძიებო მოქმედებების განხორციელება და სექსუალური ძალადობის მსხვერპლი ბავშვებისთვის  სარეაბილიტაციო მომსახურებების მიწოდება. 26 სექტემბერს, ბავშვთა უფლებების საკითხებზე მომუშავე უწყებათაშორისი კომისიის კოორდინირებით და საქართველოს სასამართლო ხელისუფლებასთან თანამშრომლობით, გაიმართა საკონსულტაციო შეხვედრა, რომლის მიზანი იყო არსებული პრაქტიკის მიმოხილვა, გამოწვევებზე და მათი გადაჭრის გზებზე მსჯელობა. სრულად... წყარო: ორგანიზაციის გვერდი სოციალურ ქსელში

თბილისი. 24-26 სექტემბერს ძალადობისგან დაცვის ეროვნული ქსელის თანამშრომლებისთვის სტრესის მართვის ტრენინგი ჩატარდა. არაფორმალურ და მეგობრულ გარემოში გატარებული დრო ტრენინგის მონაწილეებს დაეხმარა დადებითი ემოციების შეძენაში, დასვენებაში და შესაბამისი ცოდნით აღჭურვაში. „ეს თითოეულ მათგანს შესაძლებლობას მისცემს ახალი ენერგიით გააგრძელოს ისეთი მნიშვნელოვანი საქმე, რასაც ქალთა მიმართ ძალადობასთან ბრძოლა ჰქვია“. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. „საერთაშორისო გამჭვირვალობა - საქართველოს“ სამოქალაქო საბჭოებმა და ახალციხის ოფისმა ახალციხეში, იაძის N12-ში, N4 სკოლამდელი აღზრდის დაწესებულების დემონტაჟისა და ამავე მისამართზე ახალი საბავშვო ბაღის აშენების მოთხოვნით პეტიცია 2022 წლის 13 აპრილს დაარეგისტრირა, თუმცა იგი დღემდე არ განუხილავთ. დოკუმენტს ხელს 360 ადგილობრივი მცხოვრები აწერს. „სამოქალაქო საბჭოებისა და ჩვენი ორგანიზაციის არაერთგზის მოთხოვნის მიუხედავად, მუნიციპალიტეტის საკრებულომ მოქალაქეთა პეტიცია დღემდე არ განიხილა, რითაც დაარღვია ადგილობრივი თვითმმართველობის კოდექსის მოთხოვნები. რჩება შთაბეჭდილება, რომ საკრებულო პროცესს ხელოვნურად აჭიანურებს“. ორგანიზაცია მოუწოდებს ახალციხის საკრებულოს, რომ უახლოეს სხდომაზე განიხილოს ეს პეტიცია და კენჭი უყაროს ახალი ბაღის მშენებლობის საკითხს. წინააღმდეგ შემთხვევაში, ქალაქის ორი დიდი უბანი - მარდისა და აბის დასახლებები საბავშვო ბაღის გარეშე დარჩება. სრულად... წყარო: ორგანიზაციის გვერდი სოციალურ ქსელში

იმერეთი. „ადგილობრივი დემოკრატიის სააგენტო საქართველომ” შეხვედრა გამართა ბაღდათის ახალგაზრდული საბჭოს წევრებთან. შეხვედრის მიზანია ბაღდათის მუნიციპალიტეტისთვის შემუშავებული ახალგაზრდული ინიციატივების მხარდაჭერი პროგრამის განხილვა და მომდევნო წლის ბიუჯეტის პროექტში ასახვა. საბჭოს წევრებთან ერთად შეხვედრას ესწრებოდნენ მერიის განათლების, კულტურისა და სპორტის სამსახურის წარმომადგენლები. ბაღდათის ახალგაზრდული საბჭოს გაძლიერება ხდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

რაჭა-ლეჩხუმი. „უფლებები საქართველოს“ ინფორმაციით, ამბროლაურში გენდერული ნიშნით ძალადობის მსხვერპლი ქალის დაცვის მიზნით შემაკავებელი ორდერი გამოიცა. „მოძალადეს შემაკავებელი ორდერით აეკრძალა მსხვერპლთან მიახლოება, ნებისმიერი სახის კომუნიკაცია, იარაღით სარგებლობა. ამასთან, მოძალადეს აეკრძალა იარაღის შეძენის ნებართვის ან ლიცენზიის მოპოვება“. სამართლებრივი დახმარების ცენტრები გაიხსნა პროექტის „გენდერული და ოჯახში ძალადობის მსხვერპლთა მხარდაჭერა“ ფარგლებში, რომელიც ხორციელდება ევროკავშირისა და ASB საქართველოს მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, კანონმდებლობით დადგენილი ვადის ამოწურვის მიუხედავად, ამ დრომდე არ ხდება ცესკოს თავმჯდომარისა და პროფესიული წევრების არჩევა. ორგანიზაცია მოუწოდებს საქართველოს პარლამენტს, შეასრულოს კანონის მოთხოვნები და დროულად შეავსოს ცესკოში არსებული ვაკანსიები. სრულად… წყარო: isfed.ge

თბილისი. რონდელის ფონდის ინფორმაციით, უკრაინელები წინ მიიწევენ მდინარე ოსკილთან და ქალაქ ლიმანთან. იხილეთ ინფორმაცია მიმდინარე რუსეთ-უკრაინის ომის შესახებ „რუსეთის სამხედრო ძალების მიმოხილვის“ 72 -ე სპეციალურ გამოშვებაში. სრულად... წყარო: gfsis.org.ge

თბილისი. სოციალური სამართლიანობის ცენტრმა რუსეთის ფედერაციის მოქალაქის, ალექსანდრ ბანდიუკოვის სახელით თბილისის საქალაქო სასამართლოს მიმართა შსს მიგრაციის დეპარტამენტის წინააღმდეგ. ორგანიზაცია ითხოვს: ბათილობას მიგრაციის დეპარტამენტის იმ გადაწყვეტილებისა, რომლითაც ბანდიუკოვს საქართველოში საერთაშორისო დაცვის სტატუსის გაგრძელებაზე უარი ეთქვა. მისი ჯანმრთელობის კიდევ უფრო გაუარესებული მდგომარეობის გათვალისწინებით, გაუგრძელდეს საქართველოში ჰუმანიტარული სტატუსი. ორგანიზაციის ცნობით, ალექსანდრ ბანდიუკოვი არის რუსეთის ფედერაციის მოქალაქე, რომლიც მისი განმარტებით რუსეთის ფედერაციაში უკანონო და თვითნებური სისხლისსამართლებრივი დევნის ქვეშ იმყოფება. სრულად... წყარო: socialjustice.org.ge

განათლების დარგის ტრენერისა და ორგანიზაცია „მშობლები განათლებისთვის" დამფუძნებლის მანანა ჯინჭარაძის ვიდეო ბლოგპოსტში გაეცნობით ყველაფერს, რაც მშობელმა სასკოლო შეფასების შესახებ უნდა იცოდეს. წყარო: ორგანიზაციის გვერდი სოციალურ ქსელში

აჭარა. „საერთაშორისო გამჭვირვალობა - საქართველოს“ ინფორმაციით, სოციალურ ქსელ Facebook-ში ბათუმის მერის, არჩილ ჩიქოვანის საჯარო გვერდის მასალების რეკლამირებაში ჩართულია აჭარის მთავრობის საერთაშორისო ურთიერთობათა და პროტოკოლის დეპარტამენტის უფროსი, გოგი ფუტკარაძე. ფუტკარაძე მონაწილეობს Facebook-ში აჭარის მთავრობის თავმჯდომარის, თორნიკე რიჟვაძის პოსტების რეკლამირების პროცესშიც. ორგანიზაციის შეფასებით, პრობლემურია აჭარის მთავრობის ადმინისტრაციის წარმომადგენლის ჩართვა თვითმმართველობის საკითხებში. გაუმჭვირვალეა თავად ასეთი საქმიანობის დაფინანსების მექანიზმი და წყაროები. „რატომ იხარჯება მათ გვერდებზე გამოქვეყნებული ცნობების ინტერნეტ აუდიტორიის გაზრდისთვის თანხა არა დაწესებულებათა ბიუჯეტიდან, არამედ, სავარაუდოდ, მთავრობის ადმინისტრაციის წარმომადგენლის მხრიდან. დაუდგენელია ამ თანხის წარმომავლობაც. ორგანიზაცია მოუწოდებს ბათუმის მერს, ბათუმის მერიას და აჭარის მთავრობის აპარატს, დროულად და ამომწურავად უპასუხონ საზოგადოებას ჩვენს მიერ გამოვლენილ გარემოებებზე“. სრულად... წყარო: ორგანიზაციის გვერდი სოციალურ ქსელში

26 სექტემბერს 13:00 საათზე, სასტუმრო „თბილისი მარიოტში“ პოლიტიკის ინსტიტუტის ორგანიზებით, საჯარო დისკუსია გაიმართება. თემა: „უკრაინაში რუსეთის შემოჭრის გავლენა შავი ზღვის ფართო უსაფრთხოებაზე: საქართველო, უკრაინა და აზერბაიჯანი“. ღონისძიებას მისასალმებელი სიტყვით გახსნის ევროკავშირის ახალი ელჩი საქართველოში, პაველ ჰერჩინსკი. საჯარო დისკუსიაში მონაწილეობას მიიღებენ პოლიტიკის ანალიტიკოსები საქართველოდან, უკრაინიდან და სომხეთიდან. ღონისძიებას დაესწრებიან ადგილობრივი სამოქალაქო სექტორისა და დიპლომატიური კორპუსის წარმომადგენლები. მისამართი: თბილისი, შოთა რუსთაველის გამზ. 13

26 სექტემბერს, 11:00 საათზე, „სოციალური სამართლიანობის ცენტრი“ ალექსანდრ ბანდიუკოვის საქმეზე პრესკონფერენციას გამართავს. თემა: სოციალური სამართლიანობის ცენტრმა რუსეთის ფედერაციის მოქალაქის, ალექსანდრ ბანდიუკოვის სახელით თბილისის საქალაქო სასამართლოს მიმართა შსს მიგრაციის დეპარტამენტის წინააღმდეგ. მისამართი: თბილისი, ი. აბაშიძის 12 ბ