სამეგრელო. გაეროს ბავშვთა ფონდის „ბავშვზე მორგებული ქალაქების ინიციატივას“ ქალაქი ფოთიც შეუერთდა. გაეროს ბავშვთა ფონდსა და ფოთის მერიას შორის ურთიერთთანამშრომლობის მემორანდუმს მოეწერა ხელი. Მომდევნო ეტაპზე სამოქმედო გეგმა შემუშავდება, რომლის შესრულების შემდეგაც ფოთი „ბავშვზე მორგებული ქალაქის“ სტატუსს მოიპოვებს. ორგანიზაციის ცნობით, ბავშვზე მორგებული ქალაქი ადგილობრივი თვითმმართველობის ისეთი სისტემაა, სადაც ბავშვის საჭიროებები და უფლებები ადგილობრივი პოლიტიკის და პროგრამების მნიშვნელოვანი ნაწილია. გაიგეთ მეტი... წყარო: ორგანიზაციის გვერდი სოციალურ ქსელში

თბილისი. 10 ოქტომბერს ინფორმაციის თავისუფლების განვითარების ინსტიტუტმა (IDFI) erasmus + -ის ფარგლებში დაფინანსებული სასწავლო ვიზიტის მონაწილეებს IDFI-ის მეხსიერებისა და დეზინფორმაციის კვლევების მიმართულების საქმიანობა და მიღწეული შედეგები გააცნო. აღნიშნული ღონისძიების ორგანიზატორი იყო არასამთავრობო ორგანიზაცია „გერგარტი“. „სასწავლო ვიზიტის ფარგლებში, მონაწილეები შეხვდნენ იმ ორგანიზაციებსა და მკვლევრებს, რომლებიც საბჭოთა წარსულის გადააზრებაზე მუშაობენ. შეხვედრების ფარგლებში, გაეცნენ მათ საქმიანობას და სურვილი აქვთ, მიღებული ცოდნა/გამოცდილება შემდგომ საქმიანობაში გადაიტანონ“. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ორგანიზებით და კონრად ადენაუერის ფონდის მხარდაჭერით, 7-9 ოქტომბერს ჩატარდა სემინარი: „დეზინფორმაციული კამპანია ევროკავშირის კანდიდატის სტატუსთან დაკავშირებით“. სემინარი განიხილეს შემდეგი საკითხები: რა კონკრეტული ნაბიჯებია გადასადგმელი ევროკავშირის მიერ მოთხოვნილი 12 პუნქტის შესასრულებლად? როგორ უნდა გავუმკლავდეთ ევროკავშირის წევრობის სტატუსის მიღების პროცესის პარალელურად გააქტიურებულ ანტიდასავლურ პროპაგანდას?  რა როლი აქვს ამ პროცესში სამოქალაქო საზოგადოებას, მედიას მოქალაქეების სწორად ინფორმირების მიზნით? სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრმა პრესკონფერენცია გამართა სასულიერო პირების მოსმენების საქმეზე. ორგანიზაციის ცნობით, გამოძიების დაწყებიდან 1 წლის შემდეგ, პროკურატურამ სოციალური სამართლიანობის ცენტრის დაცვის ქვეშ მყოფი პირები დაზარალებულად ცნო, თუმცა სრულიად დაუსაბუთებლად, უარი განაცხადა საქმის მასალების ორგანიზაციისთვის გადაცემაზე და მათ მხოლოდ მასალების არასაიდუმლო ნაწილის გაცნობის შესაძლებლობა მისცა. „სუსმა თითქმის სრულად დაშტრიხა უსაფრთხოების სამსახურების თანამშრომლების გამოკითხვის ოქმები, რაც ჩვენთვის შინაარსის სრულყოფილად გაცნობას შეუძლებელს ხდის. საქმის მასალების გაცნობის შემდეგ ჩვენთვის ნათელი გახდა, რომ: ჩვენ მიერ მოთხოვნილი მნიშვნელოვანი საგამოძიებო მოქმედებები ჩატარებული არ არის; გამოძიების ფარგლებში არ არიან გამოკითხულები სახელმწიფო უსაფრთხოების სამსახურის მაღალჩინოსნები და ოპერატიულ-ტექნიკური სააგენტოს თანამშრომლები; სუს-ის დანარჩენი თანამშრომლების გამოკითხვაც ხარვეზიანი და ფორმალურია, ისინი ხშირად, სახელმწიფო საიდუმლოების დაცვის სახელით, გამოძიების ფუნდამენტურ კითხვებს პასუხს არ სცემდნენ. გამოძიების ფარგლებში ამ დრომდე არ არის შემოწმებული ის სამართლებრივი საფუძვლები, რომლის საფუძველზეც ჩვენი დაცვის ქვეშ მყოფი პირების მოსმენა ხორციელდებოდა. მთელი რიგი საგამოძიებო მოქმედებები მაგალითად, ტელეფონებისა და სამსახურეობრივი კომპიუტერების ჩხრეკა და ამოღება დაგვიანებით ჩატარდა, როცა მტკიცებულებებზე გარეშე ზემოქმედება უკვე შესაძლებელი იყო“. განცხადება სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველო“-მ საპარლამენტო მონიტორინგის პროექტის ფარგლებში გენდერული თანასწორობის საბჭოს საქმიანობა შეისწავლა 2020 წლის 11 დეკემბრიდან 2022 წლის 1 ივნისის პერიოდში. ორგანიზაციის შეფასებით: პარლამენტის გენდერული თანასწორობის საბჭოს  წევრების მიერ შემუშავებული საკანონმდებლო ინიციატივები დადებითად უნდა შეფასდეს ქალთა უფლებების დაცვის თვალსაზრისით, ასევე საბჭო აქტიურად იყო ჩართული თემატური მოკვლევის ჯგუფების მუშაობის პროცესში. საბჭოს სრულად ფორმირება დაგვიანებით განხორციელდა, რაც ორგანიზაციის აზრით, სრულფასოვანი ფუნქციონირებისთვის ხელშემშლელ გარემოებას წარმოადგენდა. სამოქმედო გეგმით გათვალისწინებული მნიშვნელოვანი ვალდებულებების შესრულება ასევე ვერ განხორციელდა, მთავრობის მხრიდან კი არ ხდებოდა საბჭოსთვის ანგარიშების დადგენილ ვადაში წარდგენა. კვლევის მიგნებები და რეკომენდაციები წაიკითხეთ სრულად... წყარო: transparency.ge

თბილისი. ორგანიზაცია „საფარის“ ინფორმაციით, ხანუმ ჯეირანოვას ორ შვილს სახელმწიფო, კომპენსაციის სახით, ჯამში 100 000 ლარს გადაუხდის.  მათ ინტერესებს სასამართლოში ორგანიზაციის იურისტი, ნინო ანდრიაშვილი წარმოადგენს, რომელიც განმარტავს, რომ კომპენსაცია იმ მორალური ტრავმისთვის მიიღეს, რისი მომსწრეებიც მცირეწლოვან ასაკში გახდნენ. საუბარია 2014 წელს 16 სექტემბერს, საგარეჯოს მუნიციპალიტეტის სოფელ ლამბალოში განვითარებულ მოვლენებზე – 30 წლის ხანუმ ჯეირანოვას თანასოფლელი კაცები თავს დაესხნენ და საჯაროდ, მთელი სოფლის თვალწინ სასტიკად სცემეს. მომხდარიდან 2 დღის შემდეგ, 18 სექტემბერს, ხანუმ ჯეირანოვა გარდაიცვალა. პროკურატურის ვერსიით, მან თავი მოიკლა. სრულად... წყარო: sapari.ge

11 ოქტომბერს, 19:00 საათზე, ილიას სახელმწიფო უნივერსიტეტის სამართლის სკოლის ადამიანის უფლებათა მიმართულება USAID-ის სამართლის უზენაესობის პროგრამის მხარდაჭერით გიწვევთ სოკრატეს კლუბის მიერ ორგანიზებულ დისკუსიაზე, რომელიც დაეთმობა ხანუმ ჯეირანოვას საქმის განხილვას. სრულად...

11 ოქტომბერი, 18:00 საათზე, გაეროს მოსახლეობის ფონდის (UNFPA) საქართველოს ოფისის ინიციატივით, საქართველოს თოჯინების პროფესიული სახელმწიფო თეატრების გაერთიანებასთან, ახალციხის თოჯინებისა პროფესიულ სახელმწიფო თეატრთან თანამშრომლობით და ევროკავშირის მხარდაჭერით, სპექტაკლის ჩვენება „ესმამ დაქოქა მანქანა“ გაიმართება. მისამართი: თბილისი, თბილისის თოჯინების სახელმწიფო თეატრი, აღმაშენებლის გამზირი #136.

11 ოქტომბერს, 13:00 საათზე, არასამთავრობო ორგანიზაცია „საფარი“ გოგონების საერთაშორისო დღის აღსანიშნავ ღონისძიებას გამართავს. სრულად... მისამართი: თბილისი, ჭოველიძის #7, კაფე „ლოლიტას“ მე-3 სართული, საკონფერენციო სივრცე.

11 ოქტომბერს, 12:30 საათზე, სოციალური სამართლიანობის ცენტრი გამართავს პრესკონფერენციას სასულიერო პირების მოსმენების საქმეზე. მისამართი: თბილისი, ი. აბაშიძის 12ბ (სოციალური სამართლიანობის ცენტრის ოფისი)

2022 წლის ნობელის პრემია მშვიდობის დარგში გადაეცათ უკრაინელ, ბელარუსს და რუს უფლებადამცველებს, ისინი მრავალი წელია იცავენ ადამიანის უფლებებს თავიანთ ქვეყნებში: •უკრაინულ საზოგადოებრივ ორგანიზაციას „სამოქალაქო თავისუფლების ცენტრს“ •საბჭოთა რეპრესიების შემსწავლელ ორგანიზაციას „მემორიალს“, რომელიც რუსეთის სასამართლომ 2002 წელს გააუქმა •ბელარუს უფლებადამცველს ალეს ბიალიატსკის, რომელიც თანამოაზრეებთან ერთად პატიმრობაშია სრულად... 

თბილისი. 4-7 ოქტომბერს, ინფორმაციის თავისუფლების განვითარების ინსტიტუტმა (IDFI) და ელექტრონული მმართველობის აკადემიამ (ესტონეთი) სამოქალაქო საზოგადოებრივი ორგანიზაციებისა და საჯარო დაწესებულებების წარმომადგენლებისთვის 1.5-დღიანი ინტერაქტიული მასტერკლასი/ტრენინგი გამართეს. ტრენინგის მიზანი იყო საქართველოში ციფრულად მოწყვლადი მოქალაქეების წინაშე არსებულ გამოწვევებზე საპასუხო საერთო ინიციატივების დაგეგმვა წარმოადგენდა. ორი 1.5-დღიანი მასტერკლასი მოიცავდა პროექტის/სერვისის/ინიციატივის/პოლიტიკის იდეის შექმნის შესავალს, ასევე მეთოდოლოგიის შემუშავების თეორიას. მასტერკლასის სტრუქტურა ეფუძნება მიდგომას - „სწავლა კეთებით”, სადაც თითოეული მონაწილე გუნდი მათ წინაშე არსებულ გამოწვევებზე საპასუხოდ სხვადასხვა სახის ინსტრუმენტს და მეთოდს იყენებს. სრულად... წყარო: idfi.ge

თბილისი. სოციალური სამართლიანობის ცენტრის შეფასებით, ფსიქიკური ჯანმრთელობის საერთაშორისო დღეს საქართველო კვლავ ასობით ინსტიტუციონალიზებული ადამიანით ხვდება, რომლებიც საერთოდ მოკლებულნი არიან უფლებებითა და თავისუფლებებით სარგებლობის შესაძლებლობას და ყოველდღიურად იზოლაციაში, ღირსების შემლახველ და არასათანადო პირობებში ცხოვრობენ. მიუხედავად ამისა, სახელმწიფოს ჯერ კიდევ არ დაუმტკიცებია დეინსტიტუციონალიზაციის სტრატეგია და სამოქმედო გეგმა, რომელიც მოიცავდა ფსიქიატრიული დაწესებულებების, თავშესაფრებისა და პანსიონატების დაშლისა და მასში მცხოვრები ადამიანების საზოგადოებაში დაბრუნების ხედვას. სრულად... წყარო: socialjustice.org.ge

გურია. 8-9 ოქტომბერს, გურიაში, ჩოხატაურის მუნიციპალიტეტის სოფელ ერკეთში, „ფონდი ტასოს“ ორგანიზებით, „სოფლად მცხოვრები ქალების ფესტივალი“ გაიმართა. ღონისძიებას სხვადასხვა კუთხიდან 100-ზე მეტი ქალი შეუერთდა, რომლებმაც საკუთარი კუთხის ტრადიციული სამზარეულო და კულტურული აქტივობები წარმოადგინეს. ფესტივალზე ორგანიზებული იყო კულინარიული მასტერ-კლასები, შემეცნებითი სივრცე ფოტოებისა და ვიდეოების გასაზიარებლად, კვების პუნქტები, სიმღერის, ცეკვისა და სხვა კულტური აქტივობების სივრცე. სრულად... წყარო: ორგანიზაციის გვერდი სოციალურ ქსელში

რეგიონები. „საერთაშორისო გამჭვირვალობა - საქართველოს“ იურისტები იმერეთის, სამეგრელოსა და აჭარის რეგიონებს ესტუმრნენ და მოსახლეობას მიწის სისტემური რეგისტრაციის საკითხებზე ესაუბრნენ. თუ რა დოკუმენტებია საჭირო საკუთრების უფლების რეგისტრაციისთვის და სხვა დამატებითი ინფორმაციისთვის ეწვიეთ ორგანიზაციის ვებ-გვერდს... სრულად... წყარო: ორგანიზაციის გვერდი სოციალურ ქსელში

დანია. ორგანიზაცია საფარის ინფორმაციით, კოპენჰაგენში, სასწავლო ტურის ფარგლებში, საქართველოდან და უკრაინიდან ორგანიზაციებმა, „3F მშრომელთა უფლებებისთვის“ ოფისი მოინახულეს და დანიური ორგანიზაციის წევრებს შეხვდნენ. გაცნობითი შეხვედრის ფარგლებში, სხვადასხვა ორგანიზაციის წარმომადგენლებმა შრომით უფლებებზე იმსჯელეს და საკუთარი ქვეყნების პრაქტიკა და გამოცდილება გააზიარეს. სრულად... წყარო: ორგანიზაციის გვერდი სოციალურ ქსელში

10 ოქტომბერს, 11:00 საათზე, „ინფორმაციის თავისუფლების განვითარების ინსტიტუტი“ (IDFI) კვლევის „განათლების სექტორის მიმოხილვა, ეთნიკური უმცირესობების და სოციალურად მოწყვლადი ჯგუფების გამოწვევების იდენტიფიცირება“ პრეზენტაციას გამართავს. სრულად... მისამართი: თბილისი, სასტუმრო Rooms Tbilisi (მერაბ კოსტავას ქუჩა #14)

10 ოქტომბერს, 11:00 საათზე, გაიმართება ონლაინ საკონსულტაციო შეხვედრა ინოვაციებისა და განმოწვევების საგრანტო კონკურსზე. შეხვედრის ბმული... ინფორმაცია გრანტის შესახებ...

თბილისი. „თავდასხმა ქალზე, აბორტის სერვისსა და დემოკრატიაზე“ - კინოთეატრ „ამირანში“ არასამთავრობო ორგანიზაცია ასოციაცია „ჰერა ოცდაერთის“ დაკვეთით გადაღებული დოკუმენტური ფილმის პრემიერა გაიმართა. საგამომძიებლო-დოკუმენტური ჟანრის #ფილმი ასახავს ქვეყანაში არსებულ რეალობას - თუ რა პრობლემებს აწყდებიან ქალები აბორტის ხელმისაწვდომობის კუთხით, როგორც სისტემურ დონეზე, ასევე საზოგადოებრივი სტიგმების გამო. ფილმი მიზნად ისახავს საქართველოში ორსულობის ხელოვნური შეწყვეტის, როგორც სამედიცინო სერვისის ხარისხიანი მომსახურეობის და ამ სერვისზე ხელმისაწვდომობასთან დაკავშირებული პრობლემებისა და გამოწვევების გამოვლენას. სრულად... წყარო: ორგანიზაციის გვერდი სოციალურ ქსელში

თბილისი. კომპანია ACT - Analysis and Consulting Team - ორგანიზაცია საფარი/Sapari-ს დონაციის პლატფორმის საკომუნიკაციო სტრატეგიის შექმნაში უწევს კონსულტაციას. გაიგეთ მეტი... პრო ბონო მედიაცია ხორციელდება პროექტის „სამოქალაქო საზოგადოების ინიციატივის“ ფარგლებში, ევროკავშირისა (EU) და კონრად ადენაუერის ფონდის (KAS) მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, არჩევნებზე დამკვირვებელ ორგანიზაციათა ევროპული ქსელი (ENEMO) გმობს რუსეთის მიერ უკრაინის ოკუპირებულ ტერიტორიებზე გამართულ ყალბ „რეფერენდუმს“. „ეს „რეფერენდუმები“ უკანონოა და აგრესიის და პოლიტიკური მანიპულაციის აქტია რუსეთის ფედერაციის ანტიდემოკრატიული დღის წესრიგის ლეგიტიმაციის მცდელობის მიზნით. საბოლოო ჯამში, ამ ფსევდო-საარჩევნო პროცესების ჩატარების მიზანია აიძულოს უკრაინის ხელისუფლება დათმოს თავისი ტერიტორიების ნაწილები და კიდევ უფრო დააზიანოს მისი ტერიტორიული მთლიანობა, საერთაშორისო სამართლისა და ფუნდამენტური უფლებების დარღვევით“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 3 ოქტომბერს დაიწყო 2022-2023 წლების სასწავლო წელი კორუფციასთან ბრძოლის სასერტიფიკატო პროგრამის სამაგისტრო კურსის მონაწილეებისთვის. სამაგისტრო საფეხურზე შერჩეული 25 მონაწილე ილიას სახელმწიფო უნივერსიტეტის 13 სტუდენტთან ერთად, ერთი წლის განმავლობაში, გაივლის ისეთ საგნებს, როგორიცაა „ანტიკორუფციული პოლიტიკის მართვა საჯარო და კერძო დაწესებულებებში“ და „კორუფციასთან ბრძოლა - საერთაშორისო აქტორები, ანტიკორუფციული პლატფორმები“. პირველი სამაგისტრო კურსი, რომელსაც სტუდენტები პროგრამის ფარგლებში გაივლიან არის ანტიკორუფციული პოლიტიკის მართვა საჯარო და კერძო დაწესებულებებში. სასწავლო კურსს კითხულობს თინათინ ხიდაშელი. ამჟამად, ქალბატონი თინა გახლავთ არასამთავრობო ორგანიზაცია სამოქალაქო იდეის თავმჯდომარე. სრულად...  წყარო: idfi.ge