თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: საქართველოს მიერ ფულის გათეთრებისა და ტერორიზმის დაფინანსების წინააღმდეგ ბრძოლასთან დაკავშირებული რეკომენდაციების შესრულების მიმოხილვა.  „უკრაინის წინაღმდეგ რუსეთის მიერ წარმოებულ სამხედრო აგრესიას ცივილიზებულმა სამყარომ ეკონომიკური და ფინანსური სანქციები დაუპირისპირა. სანქციების პოლიტიკის ეფექტიანი აღსრულებისთვის მაქსიმალური გამჭვირვალობაა საჭირო იმისთვის, რომ გამოაშკარავდეს დამალული ფინანსები და ვერ მოხდეს ბენეფიციარი საკუთრების ბოროტად გამოყენებით სანქციებისთვის თავი არიდება. წინამდებარე მიმოხილვა სწორედ ფულის გათეთრებასა და ბენეფიციარ საკუთრებასთან დაკავშირებით საქართველოში არსებულ პრობლემურ საკითხებს მიმოიხილავს და ამ მიმართულებით მსოფლიოში განვითარებული საუკეთესო პრაქტიკის მაგალითებს წარმოაჩენს“. სრულად... წყარო: idfi.ge

თბილისი. „საერთაშორისო გამჭირვალობა-საქართველომ“ აშშ-ის ელჩს, კელი დეგნანისა და საელჩოს წარმომადგენლების შეხვედრას უმასპინძლა სამოქალაქო საზოგადოებრივი ორგანიზაციების ლიდერებთან. შეხვედრაზე საუბარი შეეხო რუსეთ-უკრაინის ომის ფონზე საქართველოში არსებულ ვითარებას და ევროინტეგრაციის საკითხებს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი საკონსტიტუციო სასამართლოში ასაჩივრებს „სახელმწიფო ქონების შესახებ“ კანონის იმ ნორმას, რომელიც ითვალისწინებს საქართველოს მართლმადიდებელი ეკლესიისათვის ტყის ფართობების საკუთრებაში გადაცემის შესაძლებლობას. კონსტიტუციური სარჩელის მიზანია დაიცვას ტყე, როგორც უმნიშვნელოვანესი ბუნებრივი რესურსი განკერძოებისგან, რადგან ამით ირღვევა თანასწორობის კონსტიტუციური პრინციპი და საზოგადოების ტყის რესურსზე წვდომის უფლება. სრულად... წყარო: socialjustice.org.ge

თბილისი. გაეროს ბავშვთა ფონდი მიესალმება გრუშევსკის სახელობის თბილისის #41-ე საჯარო სკოლაში უკრაინულენოვანი სექტორი დაფუძნებას. „უკრაინული სექტორის მოსწავლეები გაეროს ბავშვთა ფონდის წარმომადგენელმა, ღასან ხალილმა და საქართველოს განათლებისა და მეცნიერების მინისტრმა, მიხეილ ჩხენკელმა მოინახულეს, გაესაუბრნენ უკრაინელ ბავშვებს და მიიღეს ინფორმაცია სექტორის ფუნქციონირებისა და სასწავლო პროცესის შესახებ“. სრულად... წყარო: ორგანიზაციის გვერდი სოციალურ ქსელში

თბილისი. ღია საზოგადოების ფონდის მხარდაჭერით, საქართველოს დემოკრატიული ინიციატივა, საქართველოს ახალგაზრდა იურისტთა ასოციაცია, სოციალური სამართლიანობის ცენტრი, უფლებები საქართველო და ადამიანის უფლებათა ცენტრი/Human Rights Center ახორციელებენ ერთობლივ პროექტს „იურიდიული დახმარების ქსელი აქტივისტებისათვის“. პროექტის მოკლევადიანი მიზანია სამოქალაქო აქტივისტების დაცვა უკანონო დევნისგან, რაც, თავის მხრივ, უზრუნველყოფს სამოქალაქო აქტივიზმისა და შეკრებისა და გამოხატვის თავისუფლების რეალიზებისთვის უფრო ხელსაყრელ გარემოს.  ბლოგპოსტში წარმოდგენილია ორგანიზაციების მიერ წარმოებული საქმეების სტატისტიკა და საქმიანობის ძირითადი შედეგები. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევით დოკუმენტს: საცხოვრებლის მოლოდინში მყოფი დევნილი ოჯახები: 2017-2021 წლების სახელმწიფო პოლიტიკა. ორგანიზაციის ინფორმაციით, დევნილი ოჯახების დაახლოებით 50% (45 903 ოჯახი) კვლავ არ არის უზრუნველყოფილი გრძელვადიანი საცხოვრებელი ფართით. არსებული ტემპის შენარჩუნების პირობებში, სახელმწიფოს მინიმუმ 20 წელი დაჭირდება ყველა დევნილი ოჯახის მუდმივი საცხოვრებლით უზრუნველყოფისათვის. IDFI მიიჩნევს, რომ დევნილი მოსახლეობის საცხოვრებლით უზრუნველყოფის დაჩქარებისთვის აუცილებელია: სახელმწიფო ბიუჯეტის ზრდის პროპორციულად, გაიზარდოს დევნილი ოჯახების განსახლებისთვის არსებული დაფინანსება. გაიზარდოს სახელმწიფო პროგრამების დაგეგმვის და განხორციელების ეფექტიანობა, რაც გამორიცხავს ამ მიზნით გამოყოფილი ფინანსური რესურსების ათვისების პრობლემას. საქართველოს ხელისუფლებამ გააქტიუროს დევნილთა განსახლების დაფინანსებისთვის დონორი ორგანიზაციების მოძიება. სრულად... წყარო: idfi.ge

თბილისი. არასამთავრობო ორგანიზაციების მიმართვა საქართველოს პრემიერმინისტრს და ევროკომისარს ევროპული სამეზობლო პოლიტიკისა და გაფართოების საკითხებში ოლივერ ვარჰეის განცხადებით მიმართავენ. ორგანიზაციები მიიჩნევენ, რომ ევროკავშირში გაწევრიანების პროცესი უნდა იყოს ღია, გამჭვირვალე და ინკლუზიური. „მნიშვნელოვანია სამოქალაქო საზოგადოების ჩართულობა პროცესში. ხაზს ვუსვამთ, რომ სამოქალაქო საზოგადოებას გააჩნია ღირებული გამოცდილება, რაც ჩვენს მიერ, კითხვარის გამოყენებით, საქართველოში მართლმსაჯულების, კორუფციის წინააღმდეგ ბრძოლისა და ადამიანის უფლებების სფეროში არსებული მდგომარეობის შეფასებას უკავშირდება. მოგმართავთ თხოვნით, მოხდეს საქართველოსთვის გადაცემული კითხვარის და პასუხების გასაჯაროება, რაც ყველა დაინტერესებულ აქტორს პროცესში ჩართვისა და ევროინტეგრაციის გზაზე საკუთარი წვლილის შეტანის შესაძლებლობას მისცემს“, ნათქვამია განცხადებაში. სრულად... წყარო: osgf.ge

კახეთი. სამართლიანი არჩევნებისა და დემოკრატიის საერთაშორისო საზოგადოების (ISFED) პროექტის ფარგლებში თელავში, ახალგაზრდებისთვის საგანმანათლებლო შეხვედრების სერია გაიმართება. შეხვედრებზე მონაწილეები აქტიური მოქალაქეობის შესახებ ისაუბრებენ და მასში მონაწილეობა 15-21წლამდე პირებს შეეძლებათ. მსურველებმა აპლიკაცია 17 აპრილამდე შემდეგ ბმულზე უნდა შეავსონ... სრულად... წყარო: ორგანიზაციის გვერდი სოციალურ ქსელში

13 აპრილს, 14:00 საათზე, Საქართველოს სტრატეგიის და განვითარების ცენტრი (GCSD) გიწვევთ ონლაინ დისკუსიაზე - „რუსეთის ქიმიური/ბიოლოგიური თავდასხმის რისკები უკრაინის წინააღმდეგ“. სრულად...

თბილისი. 9-10 აპრილს, სოციალური სამართლიანობის ცენტრის ორგანიზებით, ჟურნალისტებთან სამუშაო შეხვედრა გაიმართა. შეხვედრაზე ორგანიზაციამ წარმოადგინა კვლევა, რომელშიც მიმოხილულია სისტემური მრავალფეროვნების პრაქტიკა საერთაშორისო მედიაში. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას, რომელშიც ჯანდაცვის სექტორია მიმოხილული. „ბოლო ხუთი წლის განმავლობაში ჯანდაცვის სექტორში ფასები მკვეთრად გაიზარდა. 2016 წელთან შედარებით 2021 წელს, მედიკამენტების ფასები +64%-ით გაიზარდა, ამბულატორიული მომსახურება +35%-ით, ხოლო ჯანმრთელობის დაზღვევა +31%-ით. ამ დროს კი კერძო დაზღვევით მოსახლეობის მხოლოდ 17% სარგებლობს. ბაზარზე კონკურენციის გაზრდისთვის მნიშვნელოვანია, სახელმწიფომ ახალი პრეპარატების რეგისტრაცია გახადოს უფრო მოქნილი და წაახალისოს კერძო დაზღვევა“. სრულად... წყარო: idfi.ge

თბილისი. მართლმსაჯულების საკითხების მკვლევარმა, სოფო ვერძეულმა იკვლია სამი სხვადასხვა თაობის მოსამართლის გამოცდილებები და თავი მოუყარა სასამართლოს წარსულსა და დღევანდელობაზე, სისტემის შიგნით დაგროვილ ისტორიებს, გამოცდილებებსა და ემოციებს. „ეს დოკუმენტი ერთგვარი მცდელობაა წარმოადგინოს მცირე რეფლექსია მოსამართლეთა მონათხრობზე და მათი პირადი გამოცდილებები სასამართლოს ინსტიტუციური და ორგანიზაციული გარდაქმნების ისტორიას დაუკავშიროს“. სასამართლოს საკადრო და ორგანიზაციული განახლების ისტორია... სასამართლო 90-იანი წლებიდან დღემდე - სამი მოსამართლის პერსპექტივა... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტის (IDFI) შეფასებით, კულტურის, სპორტისა და ახალგაზრდობის სამინისტროს ცალკე გამოყოფის შემდეგ, მნიშვნელოვნად შესუსტებულია სპორტული ფედერაციების ფინანსებისა და კორუფციული რისკების მონიტორინგის შესაძლებლობა. „ზოგიერთი სპორტული ფედერაციის შესწავლის შედეგად, შეიძლება დავასკვნათ, რომ ზოგადად სექტორი გამოირჩევა გამჭვირვალობისა და ანგარიშვალდებულების დაბალი ხარისხით, გარე და შიდა კონტროლის სუსტი მექანიზმებით, ხშირად პოლიტიკურად მოტივირებული და სხვა ისეთი პროცესებით, რომელიც ეწინააღმდეგება კარგი მმართველობის პრინციპებს“, ნათქვამია ორგანიზაციის კვლევაში. სრულად... წყარო: idfi.ge

აჭარა. სოციალური სამართლიანობის ცენტრი გთავაზობთ ნესტან ანანიძის ბლოგპოსტს: „ქალები აჭარაში ქონებრივი უფლების გარეშე“. „აჭარაში არსებულ კულტურულ-სოციალური ტრადიციების მიხედვით ქალები ქონებრივ საკითხებში პრაქტიკულად უუფლებონი არიან. საინტერესოა იმის ხაზგასმა, რომ ადგილობრივი ტრადიციები იმაზე ნაკლებ უფლებას აძლევს ქალებს, ვიდრე ისლამი, ამიტომ რელიგიური ეთიკის ჩართვას ქალთა უფლებებისთვის ბრძოლაში ჩვენს თემში შეიძლება საინტერესო პოტენციალი ჰქონდეს. ამის მიღმა არსებითია, საზოგადოების ინფორმირება ქალთა თანასწორ ქონებრივ და მემკვიდრეობით უფლებებზე და მუშაობა ქალებისთვის უფრო სამართლიანი და თანასწორი გადანაწილებისა და ღირსეული ცხოვრების რეალური პირობების შექმნაზე. ჩვენ მუსლიმი ქალები აჭარიდან ამ ცვლილებებისთვის უკვე ვორგანიზდით“, ნათქვამია ბლოგპოსტში. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის ინფორმაციით, საქართველოს ევროკავშირის კითხვარი გადაეცა. „კითხვარის შევსება, როგორც წესი ხანგრძლივი პროცესია. სხვა ქვეყნებს, მის შესავსებად წლებიც კი დასჭირდათ. განსხვავებული რეალობის წინაშეა საქართველო, უკრაინა და მოლდოვა. რუსეთის მიერ უკრაინაზე განხორციელებულმა უპრეცედენტო, გაუმართლებელმა, სამხედრო აგრესიამ დააჩქარა აღმოსავლეთ პარტნიორობის ტრიოს ევროკავშირში ინტეგრაციის პროცესი“. გაიგეთ, რა არის კითხვარი და რა როლი აქვს მას საქართველოს ევროკავშირში შესვლის გზაზე? სრულად... წყარო: gyla.ge

თბილისი. კავკასიის გარემოსდაცვითი არასამთავრობო ორგანიზაციების ქსელი გთავაზობთ ერთკვირიან გამოწვევას: „7 გზა, თუ როგორ ვიზრუნოთ ჩვენს პლანეტაზე“. დედამიწაზე ზრუნვის ერთ-ერთი გზა საკვების ნარჩენებისგან ახალი კერძის შექმნაა. პოსტის კომენტარებში გაუზიარეთ ორგანიზაციას თქვენი გადაღებული საკვები ნარჩენისგან შექმნილი კერძის ფოტო და მოიგეთ თემატური პრიზები CENN-ისგან.  სრულად... წყარო: ორგანიზაციის გვერდი სოციალურ ქსელში

თბილისი. კავკასიური სახლი წარმოგიდგენთ პოლიტოლოგ ლევან ლორთქიფანიძის ლექციას: უკრაინის შიდა პოლიტიკა (სოც.ჯგუფები, კონფლიქტები, პარტიები). წყარო: ორგანიზაციის გვერდი სოციალურ ქსელში

სამცხე-ჯავახეთი. საგანგებო სიტუაციების მართვის სამსახური-ს და საქართველოს წითელი ჯვრის, ბორჯომისა და ახალციხის ერთობლივი მოხალისეთა გუნდებისათვის პრაქტიკული ტრენინგ-კურსი/სწავლება ჩატარდა. „საველე სამუშაოები პრაქტიკულ სავარჯიშოებს მოიცავდა და მას სახანძრო-სამაშველო ძალების დეპარტამენტის ინსტრუქტორები უძღვებოდნენ. აღნიშნული საქმიანობა ხორციელდება პროექტის „სამოქალაქო დაცვის სისტემის გაძლიერება მოხალისეთა შესაძლებლობების გაძლიერების გზით“ ფარგლებში, რომელიც მხარდაჭერილია, ევროკომისიის, ავსტრიის წითელი ჯვრის და ავსტრიის განვითარების კოოპერაციის მიერ“. სრულად... წყარო: ორგანიზაციის გვერდი სოციალურ ქსელში

თბილისი. გავრცელებული შეფასებით, თუ რამდენად დაზარალდება საქართველოს ეკონომიკა რუსეთის უკრაინაში აგრესიის გამო, საქართველოს მთავრობის შემხვედრ ნაბიჯებზეც არის დამოკიდებული. „ამავე დროს, მყარდება სტრატეგიული შესაძლებლობები, კერძოდ კი - საქართველოს რუსეთზე ეკონომიკური დამოკიდებულების შემცირება, ქვეყნის სატრანზიტო ფუნქციის უფრო ეფექტიანი გამოყენება და საქართველოს ეკონომიკის დასავლეთის ქვეყნებთან ინტეგრაციის დაჩქარება“. გაეცანით 10 რეკომენდაციას ეკონომიკის საკითხებზე. სრულად... წყარო: transparency.ge

12 აპრილს, 18:00 საათზე, რონდელის ფონდის ორგანიზებით გაიმართება ვებინარი: რუსული დეზინფორმაცია ომის მიმდინარეობისას: რამდენად დიდია საფრთხე და როგორ უნდა გავუმკლავდეთ მას? სრულად...

12 აპრილს, 16:00 საათზე გაიმართება მოუსაფარ ბავშვთა საერთაშორისო დღესთან დაკავშირებით გაიმართება აქცია: ბავშვები ბავშვებისთვის. სრულად...

აჭარა. 2022 წლის ივნისის თვეში საქართველოს ეკონომიკური განვითარების პლატფორმის ორგანიზებით გაიმართება სამეცნიერო კონფერენცია „თანამედროვე ეკონომიკის გამოწვევები 2022“.  კონფერენციაში მონაწილეობის მიღება შეუძლიათ საქართველოში რეგისტრირებული უმაღლესი საგანმანათლებლო დაწესებულებების ბაკალავრისა და მაგისტრატურის საფეხურის სტუდენტებს.  კონფერენციაში მონაწილეობის მსურველებმა 2022 წლის 30 აპრილის ჩათვლით უნდა შეავსონ  სააპლიკაციო ფორმა... სრულად... წყარო: ორგანიზაციის გვერდი სოციალურ ქსელში