იმერეთი. „ადგილობრივი დემოკრატიის სააგენტო საქართველომ” შეხვედრა გამართა ბაღდათის ახალგაზრდული საბჭოს წევრებთან. „შეხვედრაზე საბჭოს წევრებს ინფორმაცია მიეწოდათ ადგილობრივი თვითმმართველობის მნიშვნელობისა და როლის, უფლებამოსილების სახეების, მოქალაქეთა მონაწილეობის ფორმების შესახებ.“ ბაღდათის ახალგაზრდული საბჭოს გაძლიერება ხდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

აჭარა. 24 მარტს, პროექტის „სამოქალაქო საზოგადოების ინიციატივა“ ფარგლებში, აჭარის ჰაბმა შუახევის მუნიციპალიტეტის მერთან და მერიის სხვა წარმომადგენლებთან შეხვედრა გამართა. შეხვედრაზე ორგანიზაციის წარმომადგენლებმა მუნიციპალიტეტის მერსა და სხვა მონაწილეებს თავიანთი საქმიანობა გააცნეს. ახალგაზრდულ შესაძლებლობებზე ისაუბრა „თავისუფალ ჟურნალისტთა სახლის“ კოორდინატორმა სალომე ფუტკარაძემ. ამ მიმართულებით კი მუნიციპალიტეტის საჭიროებები და სამომავლო თანამშრომლობის საკითხები გამოიკვეთა. მსგავსი ღონისძიებები აჭარის სხვა მუნიციპალიტეტებშიც იმართება და მისი მიზანია ადგილობრივი თვითმმართველობის წარმომადგენლების ინფორმირება „სამოქალაქო საზოგადოებია ინიციატივის“ პროექტის მიზნებისა და საქმიანობის შესახებ, აგრეთვე აჭარაში მოქმედი სსო-ების საქმიანობისა და შესაძლებლობების გაცნობა. რეგიონული ჰაბი პროექტის „სამოქალაქო საზოგადოების ინიციატივა“ ფარგლებში შეიქმნა, რომელიც ევროკავშირისა და კონრად ადენაუერის ფონდის მხარდაჭერით ხორციელდება. სრულად... წყარო: ორგანიზაციის გვერდი სოციალურ ქსელში

20-27 მარტის კვირაში გორში, კასპში, ამბროლაურში, აფენში, თეთრიწყაროსა და ბოლნისში, დმანისთან ერთად, სიმონ ვილმონტის ფილმის "ძაღლების შორეული ყეფა" ჩვენება გაიმართება. სრულად...

25 მარტს, 12:00 საათზე „საერთაშორისო გამჭვირვალობა – საქართველოს" ოფისში პრესკონფერენცია გაიმართება, სადაც საზოგადოებრივი მაუწყებლის ჟურნალისტები იმედა დარსალია, სოფო ზედელაშვილი და თამთა ჯანაძე სახალხო დამცველს შესაძლო დისკრიმინაციის დადგენის განაცხადით მიმართავენ. მისამართი: თბილისი, დ.აღმაშენებლის #61

25 მარტს, 11:30 საათზე, „პრევენცია პროგრესისთვის“ (PFP) (ყოფილი „ინიციატივა მოწყვლადი ჯგუფების რეაბილიტაციისათვის“) და „დემოკრატიისა და უსაფრთხოების განვითარების ინსტიტუტის“ (IDSD) კვლევის პრეზენტაციას - „არაფორმალური ჯგუფების/კრიმინალური ავტორიტეტების ჩართულოვა საარჩევნო პროცესში“ გამართავს. მისამართი: თბილისი, სასტუმრო „რუმს თბილისი“, კოსტავას 14

25 მარტს, 10:30 საათზე, საქართველოს პარლამენტში სამოქალაქო საზოგადოების წარმომადგენლებთან პოლიტიკური პარტია „ლელოს“ ლიდერების სამუშაო შეხვედრა გაიმართება. თემა: „ათი ნაბიჯი ევროკავშირში გაწევრიანების გზაზე“. მისამართი: თბილისი, პარლამენტი, ჟიული შარტავას სახელობის დარბაზი (A კორპუსი, III სართული, ოთახი N307)

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: საქართველოს ეკონომიკის გამოწვევები რუსეთზე დაწესებული საერთაშორისო სანქციების ფონზე. „საქართველოს ეკონომიკის მოსალოდნელი დანაკარგები რუსეთისათვის დაწესებული დამატებითი შეზღუდვების გარეშე 114 მლნ. აშშ დოლარს აღწევს. ეკონომიკურ დანაკარგებს საქართველო თავიდან ვერ აიცილებს. დანაკარგები შესაძლებელია ანაზღაურდეს დასავლეთის პარტნიორებთან უფრო მჭიდრო თანამშრომლობით. მიღებული ეკონომიკური დანაკარგები საქართველოს ეკონომიკური თავისუფლებისათვის გადახდილი ფასი იქნება“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს სახალხო დამცველმა გამოქვეყნა კვლევა: შეზღუდული შესაძლებლობის მქონე ქალებისა და გოგოების საჭიროებებისა და მათი უფლებების დაცვის მდგომარეობის შეფასება საქართველოში. „კვლევის შედეგები ცხადყოფს, რომ შშმ ქალებისა და გოგოების უფლებების დაცვა, პოლიტიკის დონეზე, არ არის პრიორიტეტული მიმართულება. გარკვეული პოზიტიური ცვლილებები, რაც შშმ პირთა უფლებების დაცვის სტანდარტების გაუმჯობესების მიმართულებით შესაბამისი რეგულაციებისა თუ პროგრამების შექმნაში გამოიხატება, შშმ ქალებისა და გოგოების უფლებების დასაცავად ეფექტიან გზად ვერ ჩაითვლება. ეს მიდგომები და პროგრამები ვერ ხედავენ შშმ ქალებისა და გოგოების საჭიროებებს, რომელიც უმეტესად, შესაძლოა, განსხვავდებოდეს შშმ კაცების საჭიროებებისგან“. ანგარიში მომზადდა ომბუდსმენის აპარატის მიერ, გაეროს ქალთა ორგანიზაციასთან თანამშრომლობით „კარგი მმართველობა გენდერული თანასწორობისთვის“ პროექტის ფარგლებში, რომელიც ნორვეგიის საგარეო საქმეთა სამინისტროს მხარდაჭერით ხორციელდება. სრულად... წყარო: ombudsman.ge

თბილისი. სოციალური სამართლიანობის ცენტრის ინფორმაციით, ეკონომიკის სამინისტრომ არ დააკმაყოფილა ორგანიზაციის მოთხოვნა ნამახვანჰესის მშენებლობის ნებართვის ბათილად ცნობის შესახებ. „შეგახსენებთ, რომ მშენებლობის ნებართვა ტექნიკური და სამშენებლო ზედამხედველობის სააგენტომ 2020 წლის აპრილში, სავალდებულო დოკუმენტაციისა და დასაბუთების გარეშე უკანონოდ გასცა. ნამახვანჰესზე გაცემული ნებართვის შესწავლა ცხადყოფს, რომ დასაბუთებისა და დოკუმენტაციის კანონში გათვალისწინებული პროცედურა კომპანიას დაცული არ აქვს“. ეკონომიკის სამინისტროს გადაწყვეტილება სასამართლოში გასაჩივრდება. სრულად... წყარო: socialjustice.org.ge

იმერეთი. საერთაშორისო გამჭვირვალობა - საქართველო აქვეყნებს ბლოგპოსტს: წყალტუბოს საკრებულოს წევრის კომპანიებმა 63 მილიონი ლარის სახელმწიფო შესყიდვები მიიღეს. ორგანიზაციამ დაადგინა, რომ წყალტუბოს საკრებულოს წევრის, ჯეირან ომანაძის კომპანიებმა 100 ტენდერისა და 11 გამარტივებული შესყიდვის მეშვეობით 2013 წლიდან დღემდე ჯამურად 63 039 857 ლარი მიიღეს. „ჯეირან ომანაძე პოლიტიკური შემწირველიცაა, მან და მისმა კომპანიამ „როსტვერკმა” პარტია „ქართულ ოცნებას” 2017-2021 წლებში 135 000 ლარი შესწირეს. ჯეირან ომანაძე, რომელიც გვიშტიბის თემის მაჟორიტარია და ფრაქცია „ქართული ოცნების” თავმჯდომარის მოადგილის პოზიციას იკავებს, არღვევს საჯარო სამსახურში ინტერესთა შეუთავსებლობისა და კორუფციის შესახებ კანონის მოთხოვნებსაც“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. სოციალურ საწარმოთა ალიანსის ინფორმაციით, სოციალურმა საწარმო Mirabaldebi • მირაბალდები-მ უკრაინელ მოსახლეობას მათ მიერ შექმნილი ექსკლუზიური წინდები გაუგზავნა. „ჩვენი დროის ყველაზე მამაცი ქალები პირველი პარლამენტარი ქალის მინადორა ორჯონიკიძე-ტოროშესლიძის ილუსტრირებულ წინდებს ატარებენ“. საქართველოში უკრაინის საელჩოს ინფორმაციით, წინდები მოსახლეობისთვის ერთ-ერთი მოთხოვნადი ნივთია. სრულად... წყარო: ალიანსის გვერდი სოციალურ ქსელში

აჭარა. 21 მარტს, თავისუფალ ჟურნალისტთა სახლმა ხელვაჩაურის მუნიციპალიტეტში, სოფელ ჭარნალის საჯარო სკოლაში, მოსწავლეებსა და მასწავლებლებთან შეხვედრა გამართა. „მონაწილეებს გავაცანით „სამოქალაქო საზოგადოების ინიციატივის“ პროექტის მიზნები და დაგეგმილი აქტივობები. შეხვედრის პროცესში მონაწილეებმა სოფელში არსებული პრობლემები ჩამოთვალეს. აღნიშნეს, რომ აწუხებთ ინტერნეტის დაბალი ხარისხი, რაც სასწავლო პროცესში უშლით ხელს. გამოთქვეს სურვილი, შეხვდნენ საერთაშორისო ორგანიზაციებს, რომლებიც ახალგაზრდული მიმართულებით მუშაობენ და მათ სხვადასხვა შესაძლებლობებს სთავაზობენ“. აჭარის რეგიონული ჰაბი ევროკავშირისა და კონრად ადენაუერის ფონდის დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში შეიქმნა. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია გიზიარებთ ტერმინ პირგასამტეხლოს მნიშვნელობას. ის მხარეთა შეთანხმებით განსაზღვრული ფულადი თანხაა, რომელიც მოვალემ ვალდებულებების შეუსრულებლობის ან არაჯეროვნად შესრულებისთვის უნდა გადაიხადოს. ორგანიზაციის ცნობით, პირგასამტეხლოს შესახებ შეთანხმება აუცილებლად წერილობითი ფორმით უნდა დაიდოს. სრულად... წყარო: ორგანიზაციის გვერდი სოციალურ ქსელში

თბილისი. 19 მარტს რონდელის ფონდმა ამერიკული ფონდის National Endowment for Democracy (NED) მხარდაჭერით, დაიწყო სასწავლო პროგრამა საქართველოს პოლიტიკური პარტიების ახალგაზრდა წარმომადგენლებისათვის, რომლის მიზანიცაა ქართული პოლიტიკური ინსტიტუტების განვითარების ხელშეწყობა. რონდელის ფონდი სხვადასხვა დონორების ხელშეწყობით პოლიტიკური პარტიების სკოლას ახორციელებს 2008 წლიდან. აღნიშნული ჯგუფი კი პოლიტიკური პარტიების სკოლის მეთერთმეტე ნაკადს წარმოადგენს. სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

24 მარტს, 19:00 საათზე, პროფესიული პრაქტიკის პროგრამის კოორდინატორი და კურსდამთავრებულები უპასუხებენ თქვენს კითხვებს PFP პროგრამასთან და აპლიკაციასთან დაკავშირებით. სრულად...

24 მარტს, 17:00 საათზე, გაიმართება პანელური დისკუსია: რუსეთ-უკრაინის ომის შედეგები საქართველოსთვის და აღმოსავლეთ პარტნიორობის ქვეყნებისთვის. სრულად...

თბილისი. „სხვა კუთხის“ მორიგი ეპიზოდი ეხება საქართველოს აზერბაიჯანელებს, მათ კულტურას, უახლეს ისტორიას და მათი პოლიტიკური, ეკონომიკური და კულტურული პერიფერიალიზაციის საკითხს. „რა ვიცით საქართველოს აზერბაიჯანელების შესახებ და რა არის პრობლემური ჩვენს ამ ცოდნასა და წარმოდგენებში? რა არ ვიცით ამ თემის შესახებ და როგორ ცდილობენ ახალგაზრდა მკვლევრები და აქტივისტები ცოდნის ამ სიცარიელის გარღვევას, ამოვსებას თვითორგანიზებისა და ფიქრის უნიკალური პროცესებით? რა ისტორიულმა ფაქტორებმა, იმპერიულმა და ნაციონალისტურმა პოლიტიკამ განაპირობა ეთნიკური უმცირესობების არაღიარების ამ გარემოს შექმნა და რა შეგვიძლია და რა უნდა მოვითხოვოთ დღეს?! სწორედ ესაა ის მთავარი კითხვები, რომელზეც ინტერვიუში სოციალური სამართლიანობის ცენტრის თანასწორობის პოლიტიკის პროგრამის დირექტორი თამთა მიქელაძე კავკასიოლოგთან, კულტურის მკვლევართან ელნურ ალისოისთან ერთად საუბრობს“. სრულად... წყარო: socialjustice.org.ge

აჭარა. „საერთაშორისო გამჭვირვალობა - საქართველოს” ინფორმაციით, ორგანიზაციის სამოქალაქო საბჭოების მიერ აჭარის რეგიონის 6 მუნიციპალიტეტში 2021 წლისთვის დაყენებული 58 პრობლემიდან გასულ წელს 31 გადაიჭრა/მომზადდა შესაბამისი ხარჯთაღრიცხვის დოკუმენტები. სამოქალაქო საბჭოები „საერთაშორისო გამჭვირვალობა-საქართველოს” ინიციატივით შექმნილი მოქალაქეთა არაფორმალური გაერთიანებებია, რომელთა მიზანია უშუალოდ ადგილობრივი მოსახლეობის ჩართულობითა და ჩვენი ორგანიზაციის შუამდგომლობით მოგვარდეს მუნიციპალიტეტებში არსებული პრობლემები. სრულად... წყარო: transparency.ge

თბილისი. სამოქალაქო საზოგადოების ინსტიტუტი (CSI) აგრძელებს მუნიციპალიტეტებში მოქალაქეთა მონაწილეობის ხელშეწყობას და ამ მიმართულებით სამოქმედო გეგმების შემუშავებას. CSI-მ მოქალაქეთა მონაწილეობის ხარისხის კვლევა ბენჩმარკინგის მეთოდოლოგიის საშუალებით ხუთ მუნიციპალიტეტში განახორციელა: გორში, ბათუმში, ხელვაჩაურში, ჩოხატაურსა და ოზურგეთში. აღნიშნული მეთოდოლოგიის ფარგლებში, როგორც მუნიციპალიტეტის თვითშეფასების, ისე დაინტერესებულ მხარეებთან ფოკუს ჯგუფების საფუძველზე გამოვლინდა მოქალაქეთა მონაწილეობის კუთხით არსებული ტენდენციები. კვლევის შედეგად გამოიკვეთა მუნიციპალიტეტებში დანერგილი კარგი პრაქტიკები, ასევე გამოწვევები, რომლებიც აფერხებს გადაწყვეტილების მიღების პროცესში მოქალაქეთა ჩართულობას. მუნიციპალიტეტებთან თანამშრომლობის მომდევნო ეტაპზე აქტიურად მიმდინარეობს შეხვედრები სამუშაო ჯგუფებთან, რომლებიც შედგება როგორც საკრებულოს, ისე მერიის წარმომადგენლებისგან. სამოქალაქო საზოგადოების ინსტიტუტი თითოეულ მუნიციპალიტეტს მხარს უჭერს კვლევის შედეგად გამოვლენილი საკითხების გაანალიზებასა და მათ გადასაჭრელად სამოქმედო გეგმების შემუშავებაში, რაც მათ დაეხმარება მოქალაქეთა მონაწილეობის ხარისხის გაუმჯობესებასა და ადგილობრივ თუ საერთაშორისო სტანდარტებთან დაახლოებაში. აღნიშნული პროცესი მიმდინარეობს პროექტის „ადგილობრივი განვითარების აქტორებს შორის მყარი კავშირების დამყარება“ ფარგლებში, რომელიც ხორციელდება სამოქალაქო საზოგადოების ინსტიტუტისა და ოზურგეთის პროგრესის სახლის თანამშრომლობით და მას აფინანსებს გერმანული ფონდი Bread For The World (პური მსოფლიოსთვის).

თბილისი. სამოქალაქო საზოგადოების ორგანიზაციები ერთობლივ განცხადებას ავრცელებენ და მიიჩნევენ, რომ საქართველოს მთავრობამ დასავლეთის მხარდამჭერი მკაფიო პოზიცია უნდა დაიკავოს. ორგანიზაციები საჭიროდ თვლიან, რომ მთავრობამ კონკრეტული ნაბიჯები უნდა გადადგას იმისთვის, რომ საქართველოს სტრატეგიული ინტერესები სრულად და მკაფიოდ იყოს გაცხადებული და გატარებული ცხოვრებაში. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, კოსოვო გამჭვირვალე სახელმწიფო შესყიდვების რეიტინგს შეუერთდა. კოსოვო 42-ე ქვეყანაა, რომელიც IDFI-ის საერთაშორისო ინიციატივის ფარგლებში შეფასდა.  სრულად... წყარო: idfi.ge