თბილისი. კავკასიის გარემოსდაცვითი არასამთავრობო ორგანიზაციების ქსელის (CENN) ინფორმაციით, 2022 წელს „დედამიწის საათი“ 26 მარტს, ადგილობრივი დროით 20:30 აღინიშნება. „ერთი საათით სინათლის გამორთვით შეგიძლიათ შეუერთდეთ „დედამიწის საათს“ და მილიონობით ადამიანს მსოფლიოს გარშემო. „დედამიწის საათის“ ისტორია 2007 წლიდან იწყება, როდესაც მოძრაობის ფარგლებში, სიდნეიში სინათლე ჩააქრეს. დროთა განმავლობაში, დედამიწის საათი ერთ-ერთ უდიდეს გლობალურ სამოქალაქო მოძრაობად ჩამოყალიბდა, რომელსაც უკვე 190-ზე მეტი ქვეყანა უერთდება. დღეისათვის, მისი მნიშვნელობა სცდება სიმბოლურად ერთი საათით სინათლის ჩაქრობას და უფრო მეტად გარემოსდაცვითი გამოწვევების შესახებ ცნობიერების ამაღლების დატვირთვას იძენს და ჩვენი პლანეტის დასაცავად გვაერთიანებს“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია ეხმიანება რადიკალური და პრორუსული ჯგუფის მხრიდან მუქარისა და ძალადობის ბოლოდროინდელ შემთხვევებს. ორგანიზაცია მოუწოდებს საგამოძიებო ორგანოებს: დროული და ეფექტიანი რეაგირება მოახდინონ აგრესიული ჯგუფის მხრიდან მუქარისა და ძალადობის შემთხვევებზე; სათანადო ზომები გაატარონ მუქარისა და ძალადობის ადრესატი პირების უსაფრთხოების დასაცავად; გააკეთონ მკაფიო განცხადება, რომ ძალადობრივი ჯგუფების ქმედებები არ დარჩება დაუსჯელი. სრულად... წყარო: gyla.ge

თბილისი. გავრცელებული ინფორმაციით, 19 მარტს „TV პირველის“ ჟურნალისტი, ნატალია ქაჯაია, საქართველოს პარლამენტის შენობაში არ შეუშვეს. „ჟურნალისტის პარლამენტში არშეშვება დროში ემთხვევა მის მიერ მომზადებულ სიუჟეტს, სადაც ჟურნალისტმა, პარლამენტის თავმჯდომარეს, შალვა პაპუაშვილს, კრიტიკული კითხვები დაუსვა. ეს არ არის პირველი ფაქტი, როცა კრიტიკულად განწყობილ ჟურნალისტებს საჯარო უწყებებში არ უშვებენ. კოალიცია „მედიის ადვოკატირებისთვის“ მოუწოდებს საქართველოს პარლამენტს დაუშვას ნატალია ქაჯაია პარლამენტში. მნიშვნელოვანია, სახელმწიფო უწყებებმა იგრძნონ თავი ანგარიშვალდებულად მათი ამომრჩევლის წინაშე, უპასუხონ არსებულ კითხვებს და გაიაზრონ მათი საქმიანობის შესახებ მოსახლეობის ინფორმირებულობის მნიშვნელობა დემოკრატიულ საზოგადოებაში“, ნათქვამია განცხადებაში. სრულად... წყარო: idfi.ge

თბილისი. სოციალური სამართლიანობის ცენტრი აქვეყნებს 19 მარტს გამართული დისკუსიის პირველ ჩანაწერს, რომელიც ეხება ომს უკრაინაში და მის გავლენებს საქართველოზე. დისკუსიის მიზანი იყო ჩეჩნეთში, საქართველოსა და უკრაინაში რუსეთის უახლესი ომებისა და მათი ისტორიული, პოლიტიკური და სოციალური კონტექსტების შესახებ საზოგადოებრივი განხილვების წახალისება. სრულად... წყარო: ორგანიზაციის გვერდი სოციალურ ქსელში

23 მარტს, 14:00 საათზე, გაიმართება დისკუსია: საქართველოს განაცხადი ევროკავშირის წევრობაზე. მოლოდინები და რეალობა. სრულად...

თბილისი. სოციალური სამართლიანობის ცენტრის განცხადებით, საქართველო სასამართლოსთან დაკავშირებით ევროასოცირების დღის წესრიგით ნაკისრ ვალდებულებებს არ ასრულებს. „3 მარტს, თბილისში მრავალრიცხოვანი საპროტესტო აქციების ფონზე, საქართველოს ხელისუფლებამ, უკრაინის მსგავსად, ევროკავშირს გაწევრიანების თაობაზე ოფიციალური განაცხადით მიმართა. თუმცა, ცხადია, რომ მხოლოდ განაცხადის გაკეთება წარმატების გარანტია ვერ იქნება. ასოცირების შეთანხმებით გათვალისწინებულ ვალდებულებებში სამართლის უზენაესობის თემატური მიმართულება, კერძოდ, კი სასამართლო სისტემის რეფორმირება უმნიშვნელოვანეს ადგილს იკავებს. წლების განმავლობაში საქართველოში განხორციელებული სასამართლო რეფორმა შეიძლება დახასიათდეს, როგორც სისტემის ინსტიტუციური მოდერნიზაციის ილუზორული და არასრული მცდელობა, რომელმაც გარდამტეხი ცვლილების ნაცვლად, პოზიტიური ტრანსფორმაციის იმიტაცია შექმნა“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. საქართველოს დემოკრატიულმა ინიციატივამ (GDI) შეისწავლა შპს „ალტ-ინფოს“ ეთერში განთავსებული პროგრამები და მედიის საშუალებით გავრცელებული განცხადებები. „მიგვაჩნია, რომ ტელეკომპანია „ალტ-ინფოს“ მიერ გაკეთებული განცხადებების მიზანია რუსეთის ფედერაციის მიერ ომის დანაშაულების, მათ შორის, ადამიანურობის წინააღმდეგ ჩადენილი დანაშაულების გამართლება, რაც აკრძაულია საქართველოს კანონმდებლობით“. სრულად... წყარო: ორგანიზაციის გვერდი სოციალურ ქსელში

შიდა ქართლი და გურია. შეზღუდული შესაძლებლობის მქონე პირთა სექსუალური და რეპროდუქციული უფლებების შესახებ ცნობიერების ამაღლებისა და სტერეოტიპული დამოკიდებულების აღმოფხვრის მიზნით, PHR-ის იურისტები გორსა და ოზურგეთში შშმ ქალების მშობლებს შეხვდნენ. „შშმ ქალები, ისევე როგორც მათი მშობლები განიცდიან ინფორმაციის ნაკლებობას, როგორც ზოგადად, ასევე სექსუალური საჭიროებებისა და სრჯ უფლებების შესახებ“. შეხვედრა შესაძლებელი გახდა პროექტ „Supporting women with disabilities in being, doing and becoming independent” ფარგლებში, რომელსაც ახორციელებს ორგანიზაცია „პარტნიორობა ადამიანის უფლებებისთვის - PHR”, RFSU-ს (Swedish Association for Sexuality Education) ფინანსური მხარდაჭერით. სრულად... წყარო: phr.ge

თბილისი. რასობრივი დისკრიმინაციის აღმოფხვრის საერთაშორისო დღესთან, 21 მარტთან დაკავშირებით, ტოლერანტობისა და მრავალფეროვნების ცენტრი (TDI)  კვლევას აქვეყნებს.  „რასობრივი გამორჩევა საქართველოში - საპოლიციო სისტემაში ეთნიკური უმცირესობებისა და მიგრანტების მიმართ არსებული პოლიტიკა და პრაქტიკა“ - ასე ეწოდება კვლევას. სრულად... „რასობრივი გამორჩევა (racial profiling) გულისხმობს სამართალდამცველების დისკრიმინაციულ და სტერეოტიპულ ქმედებებს, როდესაც პირის მიმართ ეჭვი უჩნდებათ მისი კულტურული, ეთნიკური, ეროვნული, რელიგიური კუთვნილების ან კანის ფერის გამო“. წყარო: ორგანიზაციის გვერდი სოციალურ ქსელში

თბილისი. შინაგან საქმეთა სამინისტროს მომსახურების სააგენტოს და საპატრულო პოლიციის ერთიანი მომსახურების ცენტრის 45 თანამშრომელი შეზღუდული შესაძლებლობის მქონე პირებთან კომუნიკაციის ეტიკეტის ტრენინგს დაესწრება. 17 მარტს თბილისში გამართულ შეხვედრაზე მონაწილეებმა ფიზიკური, სმენის და მხედველობის დარღვევის მქონე პირებთან ქცევისა და ურთიერთობის უნარები შეიძინეს. ინიციატივა ხორციელდება ინოვაციებისა და რეფორმების ცენტრის მიერ გაეროს განვითარების პროგრამისა (UNDP) და ბრიტანეთის მთავრობის ფართომასშტაბიანი პროგრამის ფარგლებში, რომელიც საქართველოში საჯარო მმართველობის რეფორმას ემსახურება. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციამ, საჯარო სამსახურის ბიუროსთან თანამშრომლობით, ტრენინგი გამართა. ტრენინგის მიზანი იყო საჯარო სამსახურის ბიუროს თანამშრომელთა შესაძლებლობების გაძლიერება სექსუალური შევიწროების საკითხებზე. ინიციატივა ხორციელდება გაეროს ქალთა ორგანიზაციის პროექტის „კარგი მმართველობა გენდერული თანასწორობისთვის საქართველოში“ ფარგლებში, რომელიც ნორვეგიის საგარეო საქმეთა სამინისტროს მიერაა მხარდაჭერილი. სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია გიზიარებთ ბროშურას დაუნის სინდრომის შესახებ. ელექტრონულ საძიებო სისტემაში „შეაღე“ თქვენ შეგიძლიათ მოიძიოთ სხვადასხვა საინტერესო რესურსები. სრულად... წყარო: ორგანიზაციის გვერდი სოციალურ ქსელში

ქვემო ქართლი. სამართლიანი არჩევნებისა და დემოკრატიის საერთაშორისო საზოგადოების (ISFED) აღმასრულებელი დირექტორი ნინო დოლიძე, სამოქალაქო საზოგადოების წარმომადგენლებთან და ქალ პარლამენტარებთან ერთად, მარნეულში, სამოქალაქო აქტივისტ სამირა ბაირამოვას მხარდასაჭერად ჩავიდა და ნოვრუზ ბაირამი მიულოცა. სრულად... წყარო: ორგანიზაციის გვერდი სოციალურ ქსელში

აჭარა. საერთაშორისო გამჭვირვალობა - საქართველო აქვეყნებს ბლოგპოსტს: მმართველ პარტიასთან დაკავშირებული „აჭარგანათებისა” და „განათების“ მონოპოლიური მდგომარეობა აჭარის მუნიციპალიტეტების შესყიდვებში. „„ბათუმის მერიის ა(ა)იპ-მა თითქმის 29 მლნ ლარიან უკონკურენტო და სავარაუდოდ მორგებულ ტენდერში გამარჯვებულად „აჭარგანათება“ გამოაცხადა, რომელიც „ქართული ოცნების” ბათუმის საკრებულოს ყოფილი წევრის, ირაკლი თოფურიძის ოჯახის საკუთრებაა. „აჭარგანათებამ” და თოფურიძის ოჯახის კიდევ ერთმა კომპანიამ, „განათებამ“ 2011-2022 წლებში ჯამში 66 844 339 ლარი მიიღეს, აქედან 91% უკონკურენტო, გამარტივებული და კონკურენტების დისკვალიფიკაციის ხარჯზე მოგებული ტენდერებიდან“.  ორგანიზაცია მიმართავს სახელმწიფო უსაფრთხოების სამსახურის ანტიკორუფციულ სააგენტოს, დაიწყოს მოკვლევა იმ შესყიდვების შესასწავლად, რომელიც ამ კომპანიებმა უკონკურენტოდ და კონკურენტების დისკვალიფიკაციის ხარჯზე მოიგეს და მოკვლევის შედეგები საზოგადოებას დროულად გააცნოს. სრულად... წყარო: transparency.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი სოლიდარობას უცხადებს ორგანიზაციის კურსდამთავრებულებს, პარტნიორებს, რომლებიც საქართველოში კრემლის არადემოკრატიული პოლიტიკის გავლენის გაძლიერებას ეწინააღმდეგებიან. „ჩვენი სასწავლო პროგრამის მონაწილეები სხვადასხვა რეგიონში ალტ-ინფოს ოფისების გახსნას აპროტესტებენ. ახალგაზრდები ევროინტეგრაციას, მშვიდობასა და უსაფრთხოებას ირჩევენ“. სრულად... წყარო: ორგანიზაციის გვერდი სოციალურ ქსელში

22 მარტს, 13:00 საათზე, მედიაჰოლდინგ „კვირას“ პრესკლუბში ორგანიზაცია „ახალგაზრდა ადვოკატების“ იურისტი ლიზა ზუხბაია სპეციალურ პრესკონფერენციას გამართავს. თემა: „რა სამართლებრივი ბერკეტები არსებობს საქართველოში უკრაინელი ბავშვების შვილად აყვანაზე, რა როლის შესრულება შეუძლიათ საქართველოს მთავრობას და ეკლესიას უკრაინელი ობოლი, ნაპოვნი, ან მიტოვებული ბავშვების მიღებისთვის - ორგანიზაციის წინადადებები ხელისუფლებას და სამართლებრივი ხედვა პრობლემაზე“. მისამართი: თბილისი, მერაბ კოსტავას ქუჩა 47/57

თბილისი. საქართველოს სახალხო დამცველი საქართველოს მოქალაქეებს ნოვრუზ ბაირამის დღესასწაულს ულოცავს. „ვულოცავ ნოვრუზ ბაირამის დღესასწაულს ჩვენს მოქალაქეებს და მათთან ერთად ვიზიარებ ამ ახალი დღის დადგომის სიხარულს. გისურვებთ სიცივეზე სითბოს, სიბნელეზე სინათლის, სიკვდილზე სიცოცხლის გამარჯვებას, როგორც პირად ცხოვრებაში, ასევე მთელ სამყაროში. ეს გამარჯვება დღეს ყველას მეტისმეტად გვჭირდება“, ნათქვამია ომბუდსმენის განცხადებაში. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია თვლის, რომ მმართველი პარტიის საკანონმდებლო ინიციატივა კომპეტენციის შესახებ დავის თაობაზე პრეზიდენტის წინააღმდეგ მიმართული ანგარიშსწორებაა. ორგანიზაცია მოუწოდებს საქართველოს პარლამენტს, არ დაუჭიროს მხარი ინიცირებული კანონპროექტის მიღებას და არ დაუშვას კანონმდებლობის პარტიულ ინტერესებზე მორგება. საია მიმართავს მმართველ პარტიასაც, შეწყვიტოს კანონმდებლობაში ცვლილებების შეტანის მექანიზმის თვითნებური, ვიწრო პოლიტიკური მიზნებიდან გამომდინარე გამოყენება, რომელიც საქართველოს პრეზიდენტის წინააღმდეგ პირად ანგარიშსწორებას ემსახურება. სრულად... წყარო: gyla.ge

თბილისი. ადამიანის უფლებათა ცენტრი შეშფოთებულია ეთნიკური შეუწყნარებლობის მოტივით მოკლული უფლებადამცველის, ვიტალი საფაროვის ოჯახის წევრების მიმართ სოციალურ ქსელ ფეისბუკში გახშირებული თავდასხმის ფაქტების გამო. „ბოლო პერიოდში ვიტალი საფაროვის ოჯახის წევრების მისამართით სოციალურ ქსელ ფეისბუკში სხვადასხვა ყალბი ან რეალური პროფილის მფლობელი პირები ინტენსიურად პოსტავენ ფაშისტური და ქსენოფობიური შინაარსის, სიძულვილის ენის, მუქარის შემცველ ტექსტებს... სასიცოცხლოდ მნიშვნელოვანია, სამართალდამცავმა ორგანოებმა დაუყოვნებლივ, მიუკერძოებლად და ობიექტურად გამოიძიონ როგორც საფაროვის ოჯახის წევრების მიმართ განხორციელებული თავდასხმის ფაქტები, ისე ყველა სხვა მსგავსი შემთხვევა, რათა მოხდეს მსგავსი შემთხვევების პრევენცია სამომავლოდ. მნიშვნელოვანია, ხელისუფლებამ მსგავს კანონსაწინააღმდეგო და ძალადობრივ ქმედებებზე, გაამკაცროს სისხლის სამართლის პოლიტიკა და ჩამოაყალიბოს კატეგორიული მიდგომა ამ დანაშაულებისადმი, რადგან დღეს არსებულმა სუსტმა პოლიტიკამ თავისი წვლილი შეიტანა ქსენოფობიური, ფაშისტური ჯგუფების გააქტიურებაში და სიძულვილის გაღვივებაში, რაც ამ და მსგავსი დანაშაულების პრევენციულ აღკვეთას არ/ვერ უზრუნველყოფს“, ნათქვამია მიმართვაში. სრულად... წყარო: www.hrc.ge

აჭარა. აჭარის რეგიონული ჰაბი „სამოქალაქო საზოგადოების ინიციატივის“ პროექტის ფარგლებში, საჯარო სკოლებში შეხვედრებს აგრძელებს. „17 მარტს, ქედის მუნიციპალიტეტის სოფელ წონიარისის საჯარო სკოლის მოსწავლეებსა და პედაგოგებს შევხვდით. მონაწილეებს გავაცანით „სამოქალაქო საზოგადოების ინიციატივის“ პროექტის მიზნები და დაგეგმილი აქტივობები. ვისაუბრეთ აჭარაში მომუშავე სამოქალაქო საზოგადოების ორგანიზაციების საქმიანობის შესახებ და გადავეცით საინფორმაციო ცნობარი, რომელიც ამავე პროექტის ფარგლებში მოვამზადეთ. აჭარის რეგიონული ჰაბი ევროკავშირისა და კონრად ადენაუერის ფონდის დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში შეიქმნა. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP)“. სრულად... წყარო: ორგანიზაციის გვერდი სოციალურ ქსელში

იმერეთი. ადგილობრივი დემოკრატიის სააგენტო საქართველომ ბაღდათის მუნიციპალიტეტში მორიგი სემინარი გამართა ახალგაზრდული კლუბის წევრებისათვის. „მოწვეულმა სპიკერმა ქეთევან კუხიანიძემ სემინარი ჩაატარა ელექტრონული მონაწილეობისა და დემოკრატიის, გადაწყვეტილების მიღების პროცესში მოქალაქეთა ჩართულობის შესაძლებლობების შესახებ. ახალგაზრდული კლუბი შეიქმნა პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი საქართველოს აზერბაიჯანელ თემს ნოვრუზ ბაირამს ულოცავს და უფრო სამართლიან, თანასწორ და ღირსეულ გარემოში ცხოვრებას უსურვებს. „დღეს საქართველოს აზერბაიჯანელები აღნიშნავენ ნოვრუზ ბარაიმს. ეს უძველესი სახალხო დღესასწაულია და გაზაფხულის შემოსვლას, გამოღვიძებას და სიცოცხლის განახლებას უკავშირდება. უკვე რამდენიმე წელია საქართველოს აზერბაიჯანელები ნოვრუზ ბაირამს ეროვნულ დღესასწაულად და უქმე დღედ გამოცხადებას ითხოვენ. ადგილობრივი თემისთვის ეს მოთხოვნა საკუთარი კულტურის, იდენტობის და ზოგადად საქართველოს ეთნიკური და კულტურული მრავალფეროვნების აღიარების მნიშვნელობას ატარებს და რა თქმა უნდა. პოლიტიკური შინაარსი აქვს. სამწუხაროდ, თემის ეს მოთხოვნა ხელისუფლების მიერ ამ დრომდე არ არის გაზიარებული. სწორედ ამიტომ ჩვენ მივიჩნევთ, რომ დღეს საქართველოს აზერბაიჯანელის თემის მოთხოვნა ნოვრუზ ბაირამის ეროვნულ დღესასწაულად და უქმედ გამოცხადების შესახებ სამართლიანია და ის გათავისუფლებისთვის და აღიარებისთვის ამ თემის უფრო დიდ ბრძოლას აჩვენებს“, ნათქვამია ორგანიზაციის გვერდზე. სრულად... წყარო: ორგანიზაციის გვერდი სოციალურ ქსელში