თბილისი. თათული ჭუბაბრია, „სოციალური სამართლიანობის ცენტრის“ სოციალური პოლიტიკის პროგრამის დირექტორი რადიო თავისუფლების ეთერში საუბრობს თემაზე: ვის ეკუთვნის უკრაინელ ლტოლვილებზე ზრუნვის პასუხისმგებლობა და რა როლის შესრულება შეუძლია საქართველოს? სრულად... წყარო: socialjustice.org.ge

თბილისი. საქართველოში გაეროს ქალთა ორგანიზაციის წარმომადგენელმა კაორი იშიკავა შერიგებისა და სამოქალაქო თანასწორობის საკითხებში საქართველოს სახელმწიფო მინისტრ თეა ახვლედიანს შეხვდა. „შეხვედრაზე მხარეებმა საქართველოში ქალების, მშვიდობისა და უსაფრთხოების დღის წესრიგის განხორციელებაზე იმსჯელეს და კონფლიქტის პრევენციისა და მშვიდობიანი მოგვარების პროცესებში ქალების ეფექტიანი მონაწილეობის ხელშეწყობის მნიშვნელობას გაუსვეს ხაზი“. სრულად... წყარო: ორგანიზაციის გვერდი სოციალურ ქსელში

შიდა ქართლი. 14 მარტს, საზოგადოება „ბილიკში“ - შიდა ქართლის რეგიონული ჰაბში ახალგაზრდებისათვის ჩატარდა ტრენინგი თემაზე „კვლევის ჩატარების ტექნიკები“. ტრენინგის მიზანი იყო მსმენელებს შეეძინათ საბაზისო ცოდნა კვლევის, მისი სტრატეგიის, მეთოდოლოგიის, მეთოდიკის და ტექნიკის შესახებ. შეხვედრაზე განიხილეს შემდეგი საკითხები: კვლევის მნიშვნელობა, კვლევასთან დაკავშირებული ტერმინები, კვლევის მეთოდები და ტიპები, რა მეთოდებით შეიძლება მონაცემების მოპოვება, მონაცემთა ანალიზი. ტრენინგის შემდეგ ახალგაზრდებს ექნებათ შესაძლებლობა სხვადასხვა მეთოდებით ჩაატარონ საბაზისო დონის კვლევები და გამოავლინონ საჭიროებები. ტრენინგი ჩატარდა პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“. პროექტი ხორციელდება ევროკავშირისა და კონრად-ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

აჭარა. 14 მარტს, შუახევის მუნიციპალიტეტში მცხოვრები ახალგაზრდებისთვის სამოქალაქო საზოგადოების კურსის მესამე შეხვედრა გაიმართა. აქტივობა ხორციელდება პროექტის „თავისუფალ ჟურნალისტთა სახლის ინსტიტუციური გაძლიერება“ ფარგლებში. პროექტის ფინანსური მხარდამჭერია „საქართველოს ახალგაზრდა იურისტთა ასოციაცია“. სრულად... წყარო: ორგანიზაციის გვერდი სოციალურ ქსელში

სამეგრელო. „ფონდი ტასო“ „ქალთა ეკონომიკური გაძლიერების“ პროექტის ფარგლებში, სამიზნე სოფლებს სტუმრობს. 14 მარტს, ფონდმა სამუშაო შეხვედრა ჩხოროწყუს მუნიციპალიტეტის სოფელ ხაბუმეში გამართა. აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით, შიდა ქართლის, სამეგრელოს, გურიის, იმერეთისა და რაჭა-ლეჩხუმის რეგიონებში ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის დემოკრატიული ინსტიტუტების მხარდაჭერის პროგრამას ახალი დირექტორი ჰყავს. ნანუკა ყრუაშვილმა ამ პოზიციაზე საიას გამგეობის გადაწყვეტილებით, ვახუშტი მენაბდე ჩაანაცვლა. „ნანუკა გეგმავს დემოკრატიული ინსტიტუტების მხარდაჭერის პროგრამის გუნდთან ერთად აქტიურად გააგრძელოს მუშაობა საარჩევნო, მართლმსაჯულების, საჯარო მმართველობის, ადგილობრივი თვითმმართველობისა და საპარლამენტო კონტროლის საკითხებზე. ამასთან, მისი ამოცანაა ევროინტეგრაციის საკითხების წინ წამოწევა და ადვოკატირების გაძლიერება ადგილობრივ და საერთაშორისო პარტნიორებთან“.  სრულად... წყარო: ორგანიზაციის გვერდი სოციალურ ქსელში

15 მარტს, 15:00 საათზე, USAID/საქართველოს მისიის დირექტორი პიტერ ვიბლერი, ეკონომიკის პრიორიტეტული დარგების ბიზნეს-ლიდერებთან ერთად, ბიზნეს-ლიდერთა საბჭოს ოფიციალურად გახსნის. მისამართი: თბილისი, ჭოველიძის #7, მესამე სართული.

თბილისი. 7-8 მარტს საქართველოს სახალხო დამცველის წარმომადგენლები იტალიის თავისუფლებააღკვეთილ პირთა უფლებების ეროვნული გარანტორის მოწვევით ქალაქ რომში იმყოფებოდნენ, სადაც შედგა ორმხრივი სამუშაო შეხვედრა იტალიის პრევენციის ეროვნულ მექანიზმთან და გაფორმდა შეთანხმება თანამშრომლობის თაობაზე. სრულად... წყარო: ombudsman.ge

თბილისი. სამოქალაქო საზოგადოების ორგანიზაციები საქართველოს ხელისუფლებას მოუწოდებენ უკრაინიდან ლტოლვილების ორგანიზებული მიღებისა და უკვე საქართველოში მყოფი ლტოლვილების რეალურ მხარდაჭერაზე მიმართული სისტემური პოლიტიკის ამუშავებისკენ. „უკრაინიდან ლტოლვილების შემოსვლის ტენდენცია ჩანს საქართველოშიც. ჩვენი დაკვირვებით, ომის დაწყების შემდეგ საქართველოში თავშესაფრის მოძიებას ძირითადად ის უკრაინელები ცდილობენ, ვისაც საქართველოსთან ნათესაური, საოჯახო ან სხვა მყარი კავშირები აქვთ. ამ რეალობის მიუხედავად, აშკარაა, რომ საქართველოს ხელისუფლებას არ მიუღია პროაქტიური ნაბიჯები ლტოლვილების უკრაინიდან ორგანიზებული გამოყვანისა და შემდგომში უკვე საქართველოში მათი სათანადო და რეალური მხარდაჭერის მიზნით. უფრო მეტიც, საქართველოში რჩება ათასობით უკრაინელი ტურისტი, რომელმაც უკრაინაში 2022 წლის 24 თებერვალს დაწყებული ომის გამო დაბრუნება ვერ მოახერხა და ისინი ასევე გადაუდებელი სოციალური მხარდაჭერის წინაშე დგანან“.  სრულად... წყარო: socialjustice.org.ge

იმერეთი. ადგილობრივი დემოკრატიის სააგენტო საქართველომ, პროექტის „სამოქალაქო საზოგადოების ინიციატივა“ ფარგლებში, შეხვედრა გამართა ხარაგაულის მუნიციპალიტეტის მერიაში სამოქალაქო საზოგადოებრივ ორგანიზაციებთან ურთიერთობაზე პასუხისმგებელ პირებთან. აქტივობის მიზანია სამოქალაქო საზოგადოების როლის ზრდის ხელშეწყობა საჯარო პოლიტიკაში. მსგავსი შეხვედრები გაიმართება იმერეთის მხარის ყველა მუნიციპალიტეტში. შეხვედრები ტარდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. გენდერული თანასწორობის მუდმივმოქმედი საპარლამენტო საბჭოს ინიციატივითა და გაეროს ქალთა ორგანიზაციის ტექნიკური მხარდაჭერით, საქართველოს საზოგადოებრივ მაუწყებელში სექსუალური შევიწროების პრევენციისა და რეაგირების მექანიზმი დაინერგა. „საზოგადოებრივ მაუწყებელში სექსუალური შევიწროების პრევენციისა და რეაგირების მექანიზმის ეფექტიანი მუშაობისათვის, დაგეგმილია ტრენინგების სერია სექსუალური შევიწროების საკითხებზე, მაუწყებლის თანამშრომლებისთვის. ინიციატივა გაეროს ქალთა ორგანიზაციის პროექტის „კარგი მმართველობა გენდერული თანასწორობისთვის საქართველოში“ ფარგლებში ხორციელდება, რომელიც ნორვეგიის საგარეო საქმეთა სამინისტროს მიერაა მხარდაჭერილი“. სრულად... წყარო: ორგანიზაციის გვერდი სოციალურ ქსელში

UNCAC კოალიცია არის ანტიკორუფციული ორგანიზაციების გლობალური ქსელი, რომელიც ერთგულია ადამიანის უფლებებისა და დემოკრატიის მიმართ. „ჩვენ ვგმობთ რუსეთის შეჭრას უკრაინაში, როგორც საერთაშორისო სამართლისა და ადამიანის უფლებების უხეშ დარღვევას. ეს არის გაერთიანებული ერების ორგანიზაციის ქარტიის სუვერენული თანასწორობის, ტერიტორიული მთლიანობისა და სხვა სახელმწიფოების საშინაო საქმეებში ჩაურევლობის პრინციპების მძიმე დარღვევა - პრინციპები, რომლებსაც გაერო-ს კორუფციის წინააღმდეგ კონვენციაც იმეორებს. მოვუწოდებთ ყველა ქვეყანას, განსაკუთრებით კი მათ, სადაც მოქმედებს ძირითადი ფინანსური ცენტრები, გადადგან სწრაფი და კონკრეტული ნაბიჯები მოპარული ფინანსების შესაჩერებლად და უკანონოდ შეძენილი აქტივების მოძიებისა და გაყინვის მიზნით. მათ შორის, მნიშვნელოვანია ბენეფიციარი მესაკუთრეების და კომპანიების ცენტრალური საჯარო რეესტრის შექმნა, ასევე გამჭვირვალობის ზომების მიღება, განსაკუთრებით, კორუფციისადმი მოწყვლად სექტორებში“. სრულად... წყარო: transparency.ge

თბილისი. ღია საზოგადოების ფონდის ინფორმაციით, ფალიაშვილის N60 თბილისში, უკრაინის მოქალაქეებისთვის ჰუმანიტარული დახმარების შეგროვების ერთ-ერთი ადგილია, რომელსაც საქართველოში მცხოვრები უკრაინის მოქალაქეები უძღვებიან. „დღის მანძილზე შემომწირველთა ნაკადი არ წყდება. ბავშვთა საკვები და ჰიგიენური საშუალებები უპირველესი საჭიროება იყო, რომლის ნაწილი ღია საზოგადოების ფონდის საქართველოს ოფისმა უზრუნველყო. ამ ეტაპზე პრიორიტეტულია მედიკამენტების შეგროვება, რომელთა ჩამონათვალიც ამ ბმულზე შეგიძლიათ ნახოთ“. სრულად... წყარო: ორგანიზაციის გვერდი სოციალურ ქსელში

გურია. „ფონდი ტასო“ „ქალთა ეკონომიკური გაძლიერების“ პროექტის ფარგლებში, სამიზნე სოფლებს სტუმრობს. 11 მარტს, ფონდმა სამუშაო შეხვედრა ჩოხატაურის მუნიციპალიტეტის ორ სოფელში - ერკეთსა და ჯვარცხმაში გამართა. „აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით, შიდა ქართლის, სამეგრელოს, გურიის, იმერეთისა და რაჭა-ლეჩხუმის რეგიონებში ახორციელებს“. სრულად... წყარო: ორგანიზაციის გვერდი სოციალურ ქსელში

14 მარტს, 12:00 საათზე, რადიო მარნეულის პირდაპირ ეთერში გაიმართება დისკუსია - „მედიაწიგნიერება ეთნიკური უმცირესობების კონტექსტში“. სრულად...

თბილისი. 10 მარტს ინფორმაციის თავისუფლების განვითარების ინსტიტუტმა (IDFI) ათასწლეულის სკოლაში საინფორმაციო ხასიათის შეხვედრა გამართა თემაზე - „საბჭოთა ეპოქა და ინფორმაციული ომი, როგორც მისი მემკვიდრეობა“. „საუბარი შეეხო რუსულ მასობრივ დეზინფორმაციას, გაყალბებული ისტორიულ ნარატივების გამოყენებას რუსეთის იმპერიალისტური მიზნების გასამართლებლად და დეზინფორმაციის გავრცელების ტენდენციებს რუსეთ-უკრაინის ომთან მიმართებაში“. სრულად... წყარო: idfi.ge

თბილისი. საქართველოს სახალხო დამცველი და სახალხო დამცველთან არსებული ეროვნულ უმცირესობათა საბჭო განცხადებას ავცელებს. „რუსეთის ფედერაციის მხრიდან უკრაინის ტერიტორიაზე მიმდინარე მასშტაბური სამხედრო აგრესიის ფონზე საქართველოს მოსახლეობაში გარკვეული შიშები და კითხვები გაჩნდა რუსეთის ფედერაციის მოქალაქეების საქართველოში შემოსვლის მიზნობრიობასთან დაკავშირებით. მნიშვნელოვანია, რომ დისკუსია იყოს საზოგადოების ინფორმირებულობაზე და არა მხოლოდ ემოციებსა თუ შიშებზე დაფუძნებული, რადგან იგი მარტივად შეიძლება გადაიზარდოს სიძულვილის ენის ფართოდ გამოყენებასა და პირთა ეროვნული ნიშნით შევიწროებაში, რაც კატეგორიულად მიუღებელი და სახიფათო მოვლენაა. შესაბამისად, მივმართავთ საქართველოს ხელისუფლებისა და ოპოზიციის წარმომადგენლებს, პოლიტიკურ პარტიებს, მედიასაშუალებებს და ჩვენს თანამოქალაქეებს, სოციალური ქსელების მომხმარებლებს, ხელი შევუწყოთ საზოგადოებაში ინფორმირებული დისკურსის შექმნას და არ დავუშვათ ეთნიკური ნიშნით დისკრიმინაციის შემთხვევები“. სრულად... წყარო: ombudsman.ge

თბილისი. ბავშვთა ჰოსპისი „ციცინათელა“ ორშაბათიდან დღის ცენტრის მუშაობას ანახლებს. მომსახურება უფასოა. „რა ფუნქცია აქვს დღის ცენტრს და ვის შეუძლია სარგებლობა? - დღის ცენტრი მუშაობს ყოველ დღე და მასპინძლობს პალიატიური მზრუნველობის საჭიროების მქონე ბავშვებს; - ბავშვის ტარება შეგვიძლია ჩვენივე ადაპტირებული ავტომობილით; - დღის ცენტრში ხდება ბავშვის გართობა მისი ინტერესების შესაბამისად. ასევე, შეუძლია მიიღოს ფსიქოლოგის და სპეც პედაგოგის მომსახურება“.  სრულად... წყარო: ჰოსპისის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) კვლევის მიხედვით, 2021 წელს სულ დარეგისტრირდა 56,343 დანაშაული, რაც 0.45%-ით ნაკლებია 2020 წლის მაჩვენებელზე.  „მიუხედავად დანაშაულის საერთო რაოდენობის მცირედით შემცირებისა, ცალკეული დანაშაულის შემთხვევებმა იმატა. მაგალითად: საფინანსო საქმიანობის სფეროს დანაშაულები (+275%); გაუპატიურება (+56%); 2020-2021 წლებში, დანაშაულის რიცხვის შემცირებაზე მნიშვნელოვანი გავლენა იქონია პანდემიასთან ბრძოლის ფარგლებში ქვეყანაში გამოცხადებულმა საგანგებო მდგომარეობამ და კომენდანტის საათმა“. სრულად... წყარო: idfi.ge

თბილისი. სახალხო დამცველი მოუწოდებს სპეციალურ პენიტენციურ სამსახურს დაუყოვნებლივ გადაიყვანონ მიხეილ სააკაშვილი აუცილებელი სამედიცინო გამოკვლევების ჩასატარებლად. „2022 წლის 9 მარტს სახალხო დამცველის რწმუნებულებმა განახორციელეს ვიზიტი N12 პენიტენციურ დაწესებულებაში, სადაც შეხვდნენ პატიმარ მიხეილ სააკაშვილს და გაესაუბრნენ სამედიცინო პერსონალს. ვიზიტმა ცხადყო, რომ აუცილებელია მიხეილ სააკაშვილისთვის რელევანტური გამოკვლევების შესაბამისი პროფილის კლინიკაში დაუყოვნებლივი ჩატარება და შემდგომი სამედიცინო მომსახურების მიწოდება“. სრულად... წყარო: ombudsman.ge

თბილისი. ჰააგის სისხლის სამართლის საერთაშორისო სასამართლოს პროკურორმა 2008 წლის ომის საქმეზე ოსი მაღალჩინოსნების დაპატიმრება მოითხოვა. „საქართველოს კოალიცია სისხლის სამართლის საერთაშორისო სასამართლოსათვის“ მიესალმება პროკურორი ხანის გადაწყვეტილებას 3 პირის მიმართ დაკავების განჩინებების გამოცემის მოთხოვნის წარდგენის თაობაზე. კოალიცია მოუწოდებს: „სისხლის სამართლის საერთაშორისო სასამართლოს წინასასამართლო პალატას - გონივრულ ვადაში განიხილოს პროკურორის მოთხოვნა განჩინებების გამოცემასთან დაკავშირებით; სისხლის სამართლის საერთაშორისო სასამართლოს პროკურორის ოფისს და რომის სტატუტის წევრ სახელმწიფოებს - განჩინებების დაკმაყოფილების შემთხვევაში, ეფექტიანად იმოქმედონ მათ აღსასრულებლად. სრულად... აღსანიშნავია, რომ „უფლებები საქართველო“ აქტიურად იყო ჩართული ჰააგის საერთაშორისო სასამართლოსთვის რუსეთის აგრესიის დამადასტურებელი ფაქტებისა და მტკიცებულებების მიწოდების პროცესში“. წყარო: rights.ge

გურია. ციფრული სივრცე - მეტი შესაძლებლობისთვის ინფორმაციით, დაიწყო პროექტის „თანასწორობა ძლიერი თემისთვის“ განხორციელება, რომელიც ასკანის და მზიანის თემში მაცხოვრებლებს შესაძლებლობას მისცემს განავითარონ პიროვნული უნარ-ჩვევები, მიიღონ ახალი ცოდნა და მნიშვნელოვანი გამოცდილება. „პროექტის ფარგლებში არაერთი საინტერესო აქტივობა იგეგმება, როგორიცაა: ტრენინგები, კურსები, ლექციები, სამეწარმეო-შემეცნებითი ტურები, ფლეშმობები, საინფორმაციო კამპანიები, ფილმის ჩვენება-განხილვები, მასტერკლასები. თითოეული აქტივობა კოვიდ რეგულაციების გათვალისწინებით განხორციელდება. პროექტში ჩართვის შესაძლებლობა აქვთ სოფელ ასკანის და მზიანის თემში მცხოვრებ პირებს, რომლებსაც უკვე შეუსრულდათ 13 წელი. თუ აკმაყოფილებ მონაწილეთა შერჩევის კრიტერიუმებს, მოდი ასკანის საჯარო სკოლაში, ან გააკეთე განაცხადი სატელეფონო კომუნიკაციით. პროექტს „თანასწორობა ძლიერი თემისთვის“ ახორციელებს „ნასაკირალის საინიციატივო ჯგუფი - ნასა“ და ასკანის საჯარო სკოლის „ციფრული სივრცე - მეტი შესაძლებლობა“, ქალთა ფონდი საქართველოში და ქალები საერთო მომავლისთვის (WECF) საქართველოს ოფისთან პარტნიორობით, პროექტის „ქალების ძალაუფლება ინკლუზიისთვის“ ფარგლებში, რომელიც ხორციელდება ადგილობრივ ორგანიზაციებთან „ახალგაზრდა პედაგოგთა კავშირი“, „რაჭის სათემო ორგანიზაცია“, „ქალი და რეალობა“ და „უხუცეს ქალთა საბჭო“ თანამშრომლობით. პროექტის ფინანსური მხარდამჭერია ევროკავშირი“. კითხვების ან რეგისტრაციის სურვილის შემთხვევაში, დარეკეთ: 555 53 78 19 ან 557 93 63 11. სრულად... წყარო: ციფრული სივრცე - მეტი შესაძლებლობა