თბილისი. საქართველოს სახალხო დამცველმა წარმოადგინა კვლევა - „ქალები და მობილობა - ქალთა ყოველდღიური გადაადგილების ასპექტები“.  კვლევა შეისწავლის ქალთა ყოველდღიური გადაადგილების გენდერულ ასპექტებს და ასევე განიხილავს ყოველდღიური გადაადგილების თავისებურებებს, გადაადგილების საშუალებებს, ამ გადაადგილების საშუალებასთან დაკავშირებულ გენდერულ ბარიერებსა და ქვეყანაში არსებულ სატრანსპორტო პოლიტიკას. სრულად...  წყარო: ორგანიზაციის ვებგვერდი

თბილისი. საქართველოს ტყეების მდგრადი მართვის ხელშეწყობის მიზნით, ევროკავშირი (EU) და გაეროს განვითარების პროგრამა (UNDP) გარემოს დაცვისა და სოფლის მეურნეობის სამინისტროს დაცული ტერიტორიების სააგენტოსთან თანამშრომლობენ.  ახალი პროექტი, რომლის ბიუჯეტი 248,000 აშშ დოლარს (211,000 ევროს) შეადგენს, ალგეთის, ლაგოდეხისა და ჯავახეთის დაცულ ტერიტორიებზე გავრცელდება და 34,000 ჰექტარი ტყის დაცვასა და შენარჩუნებას შეუწყობს ხელს.  ევროკავშირისა (EU) და UNDP-ის მხარდაჭერით, დაცული ტერიტორიების სააგენტო ტყის მართვის გეგმებს შეიმუშავებს და ახალ ტურისტულ სერვისებს დანერგავს. პროექტის ფარგლებში ასევე შეიქმნება მრავალენოვანი მობილური აპლიკაცია, რომელიც ქართველ და საერთაშორისო ვიზიტორებს მიაწვდის ტურისტულ ინფორმაციას საქართველოს ყველა დაცული ტერიტორიის შესახებ. პროექტის განხორციელება 2022 წლის ბოლომდე გაგრძელდება.  სრულად...   წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტმა (IDFI) საქართველოს განათლების, მეცნიერების, კულტურისა და სპორტის სამინისტროდან გამოითხოვა ინფორმაცია ეროვნული ფედერაციების მიერ სახელმწიფო დაფინანსების ფარგლებში მიღებული თანხების განკარგვის შესახებ.  მიღებული ინფორმაციის საფუძველზე, ორგანიზაციამ მოამზადა კვლევა, რომელშიც წარმოდგენილია 70-მდე სპორტული ორგანიზაციის (ფედერაციები, რამდენიმე სპორტული კლუბი და სპორტული ასოციაცია) ხარჯების ანალიზი. მიღებული მონაცემებიდან გამომდინარე IDFI-მ დამატებით გამოითხოვა ათობით კონკრეტული აქტივობისა და ღონისძიების დეტალური ფინანსური ანგარიში, ხელშეკრულებები და სამინისტროსათვის წარდგენილი სხვადასხვა სამართლებრივი თუ ფინანსური აქტი.  „აღნიშნული მოთხოვნა დაემთხვა კულტურის, სპორტისა და ახალგაზრდობის სამინისტროს ხელახალ გამოყოფას განათლებისა და მეცნიერების სამინისტროს სისტემიდან, შესაბამისად, სპორტის სამინისტროს ხელმძღვანელობა შეიცვალა. აღნიშნული ცვლილებების პარალელურად, ახალმა სამინისტრომ არ მოგვაწოდა ინფორმაცია მოთხოვნილ საკითხებზე. დეტალური ინფორმაციის ხელმისაწვდომობის შეზღუდვის ფონზე, აღნიშნული კვლევა უმეტესწილად ემყარება სტატისტიკურ მონაცემებს, IDFI-ის მიერ წარსულში მომზადებულ მსგავს კვლევებს, სახელმწიფო აუდიტის დასკვნებსა და საჯაროდ ხელმისაწვდომ სხვა წყაროებს“, - წერია დოკუმენტის შესავალ ნაწილში.  სრულად...   წყარო: ორგანიზაციის ვებგვერდი

თბილისი. ჟურნალისტ ვახო სანაიას მიმართ თავდასხმის საქმეზე GDI პროკურატურას მიმართავს და სასჯელის ნაწილში, სასამართლოს განაჩენის გასაჩივრებას მოითხოვს. „ვახო სანაიას თავდამსხმელებს 2021 წლის 25 აგვისტოს განაჩენით, ძირითადი სასჯელის სახით, განესაზღვრათ თავისუფლების აღკვეთა 6 თვის ვადით. GDI-ს პოზიციით სასამართლოს განაჩენი სასჯელის ნაწილში არის დაუსაბუთებელი. სასამართლომ დანაშაულის ჩამდენ პირებს არაპროპორციულად დაბალი სასჯელები შეუფარდა და სასჯელის დანიშვნის დროს არ გაითვალისწინა სასჯელის დამამძიმებელი გარემოებები. სასამართლომ სასჯელის ზომის დასაბუთებისას დამამძიმებელ გარემოებად არ მიიჩნია ის ფაქტი რომ ძალადობრივი დანაშაული მცირეწლოვანი ბავშვის თანდასწრებით მოხდა. სასამართლომ არც იმ ფაქტზე გაამახვილა ყურადღება, რომ მოძალადეები მოქმედებდნენ ჯგუფურად. ამასთან, სასამართლოს მიერ მიღებული გადაწყვეტილება არ ითვალისწინებს სიძულვილის მოტივით ჩადენილ დანაშაულებზე, სისხლის სამართლის კოდექსით გათვალისწინებულ მკაცრ მიდგომებს“, - ვკითხულობთ განცხადებაში. სრულად...  წყარო: ორგანიზაციის ვებგვერდი

თბილისი. „ღია საზოგადოება - საქართველომ“ ინფოგრაფიკაში ასახა მოვლენები, რომელიც საქართველოსა და ევროკავშირის ურთიერთობის დინამიკას აჩვენებს.  „ბოლო პერიოდში საქართველოსა და ევროკავშირის ურთიერთობები არცთუ სასურველი სცენარით ვითარდება. ევროკავშირის მხრიდან გახშირდა მწვავე შეფასებები და უკმაყოფილება საქართველოში სასამართლო რეფორმის შედეგების, მაღალი დონის კორუფციის არსებობისა თუ მის წინააღმდეგ ბრძოლის არაეფექტიანობის შესახებ“, - აღნიშნულია ორგანიზაციის ვებგვერდზე გავრცელებულ ინფორმაციაში, - „მოვლენათა ეს ჩამონათვალი საქართველო-ევროკავშირის ურთიერთობის დინამიკას გვიჩვენებს, იმისათვის, რომ წარმოდგენილი ინფორმაციის საფუძველზე, თავად განვსაჯოთ, რამდენად ერთგულად აგრძელებს სვლას საქართველო და მისი ხელისუფლება ევროკავშირში ინტეგრაციის გაცხადებული მიზნისკენ“.  სრულად...  წყარო: ორგანიზაციის ვებგვერდი

თბილისი. „სოციალური სამართლიანობის ცენტრი“ კომპანია „ენკას“ მიერ ნამახვანის ჰესის ხელშეკრულების შეწყვეტას განცხადებით ეხმაურება. „ენკას“ მიერ ნამახვანი ჰესის ხელშეკრულების შეწყვეტის შესახებ გავრცელებული ინფორმაცია დაუყოვნებლივ საჭიროებს სამთავრობო უწყებების განმარტებას მისი შინაარსის, პირობებისა და ვადების შესახებ. იმ შემთხვევაში თუ ნამახვანის ჰესის პროექტის კაბალური ხელშეკრულება შეწყდება, ეს იქნება მყარი სახალხო პროტესტისა და წინააღმდეგობის წარმატება, რაც უმნიშვნელოვანეს პრეცედენტს შექმნის მომავალში ამ ტიპის მოლაპარაკებების დახურულ კარს მიღმა წარმოების პრაქტიკის შესაცვლელად“, - ვკითხულობთ განცხადებაში. სრულად...  წყარო: ორგანიზაციის ვებგვერდი

თბილისი. დღეს, „სამართლიანო არჩევნებისა და დემოკრატიის საერთაშორისო საზოგადოებამ”(ISFED) 2021 წლის ადგილობრივი თვითმმართველობის არჩევნების ოფიციალური წინასაარჩევნო პერიოდის მეორე შუალედური ანგარიში წარმოადგინა.  ანგარიში მოიცავს 2021 წლის 31 აგვისტოდან 21 სექტემბრის ჩათვლით პერიოდს, ასევე, ისეთ ცალკეულ მოვლენებს, რომლის განვითარება 31 აგვისტომდე დაიწყო, მონიტორინგის პერიოდშიც მიმდინარეობდა ან მის შესახებ მონიტორინგის პერიოდში გახდა ცნობილი.  სრულად...   წყარო: ორგანიზაციის ვებგვერდი

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

23 სექტემბერს, 11:00 საათზე, სამართლიანი არჩევნებისა და დემოკრატიის საერთაშორისო საზოგადოების (ISFED) ცენტრალურ ოფისში, პრესკონფერენცია გაიმართება, სადაც ISFED-ის 2021 წლის ადგილობრივი თვითმმართველობის არჩევნების წინასაარჩევნო მონიტორინგის მეორე შუალედურ ანგარიშს წარადგენენ. მისამართი: თბილისი, რ. თაბუკაშვილის 5

23 სექტემბერს, 11:00 საათზე,ბათუმში „შერატონ მეტეხი პალასში“ გაეროს მოსახლეობის ფონდის (UNFPA) საქართველოს ოფისი, ჯანდაცვის სამინისტროსთან და დაავადებათა კონტროლის ცენტრთან (NCDC) ერთად ორსულობისა და ვაქცინაციის თემაზე რეპროდუქციული ჯანმრთელობის სერვისების მიმწოდებლებთან საინფორმაციო შეხვედრას გამართავს. მისამართი: ბათუმი, სასტუმრო "შერატონი", რუსთაველის #28

თბილისი. „საერთაშორისო გამჭვირვალობა - საქართველომ“ საარჩევნო დარღვევებისა და მათზე რეაგირების ბლოგი განაახლა.  მონაცემები 22 სექტემბრამდე პერიოდს მოიცავს.  სრულად...   წყარო: ორგანიზაციის ვებგვერდი

თბილისი. „საქართველოს დემოკრატიულმა ინიციატივამ“ (GDI) შუამდგომლობით მიმართა საქართველოს საკონსტიტუციო სასამართლოს და საქმეზე „ანი გაჩეჩილაძე საქართველოს პარლამენტის წინააღმდეგ“ მოსამართლე მანანა კობახიძის აცილება და მის მიმართ დისციპლუნური წარმოების დაწყება მოითხოვა.  „შუამდგომლობის საფუძველია 2020 წლის 12 სექტემბერს ინტერნეტ სივრცეში გავრცელებული საქართველოს სახელმწიფო უსაფრთხოების სამსახურის მიერ გაკეთებული ფარული ჩანაწერების შესახებ ინფორმაცია, რომელთა შორის წარმოდგენილია პროტოპრესვიტერ გიორგი ზვიადაძესა და საქართველოს საკონსტიტუციო სასამართლოს მოსამართლე მანანა კობახიძეს შორის გამართული საუბრის ჩანაწერის კრებსი. გავრცელებული ინფორმაციის თანახმად მათი საუბრის თემა იყო საკონსტიტუციო სასამართლოში მიმდინარე საქმე - „ანი გაჩეჩილაძე საქართველოს პარლამენტის წინააღმდეგ.“ აღსანიშნავია, რომ კომუნიკაციის ფაქტს ადასტურებს პროტოპრესვიტერი, გიორგი ზვიადაძე, თუმცა უარყოფს კონსულტაციის გაწევას მოსამართლის მხრიდან“, - ნათქვამია ორგანიზაციის ვებგვერდზე გამოქვეყნებულ ინფორმაციაში.  სრულად...   წყარო: ორგანიზაციის ვებგვერდი

თბილისი. USAID-მა, ICNL-მა და FHI 360-მა „სამოქალაქო საზოგადოების ორგანიზაციათა მდგრადობის ინდექსი 2020“ გამოაქვეყნეს.  დოკუმენტი მოიცავს ისეთ საკითხებს, როგორიცაა: სსო-ების საერთო მდგრადობა, სამართლებრივი გარემო, ორგანიზაციული შესაძლებლობები, ფინანსური სიცოცხლისუნარიანობა, ადვოკატირება, სერვისების ნაწილი, სექტორული ინფრასტრუქტურა, საჯარო იმიჯი.  სრულად...   წყარო: გვერდი სოციალურ ქსელში

თბილისი. „ინფორმაციის თავისუფლების განვითარების ინსტიტუტმა“ გაავრცელა ესეების კრებული - „პერსონალურ მონაცემთა დაცვის აქტუალური საკითხები“.  კრებული პერსონალურ მონაცემთა დაცვის აქტუალურ საკითხებზე სტუდენტების მიერ მომზადებულ ესეებს აერთიანებს. ესეების კონკურსი 2021 წლის 14 მაისს გამოცხადდა და მასში სხვადასხვა უმაღლესი საგანმანათლებლო დაწესებულების ათეულობით სტუდენტი მონაწილეობდა. მათ შორის „ინფორმაციის თავისუფლების განვითარების ინსტიტუტმა“ და სახელმწიფო ინსპექტორის სამსახურმა 15 გამარჯვებული ესეს ავტორი გამოავლინა.  სრულად...   წყარო: ორგანიზაციის ვებგვერდი

თბილისი. UN Women საქართველო აქვეყნებს კვლევას - „სექსუალური შევიწროება სამუშაო ადგილზე საქართველოს საჯარო სამსახურში“.   დოკუმენტი გაეროს ქალთა ორგანიზაციისა და საქართველოს საჯარო სამსახურის ბიუროს ერთობლივ ინიციატივას წარმოადგენს და იგი CRRC-საქართველომ გაეროს ქალთა ორგანიზაციისთვის ნორვეგიის საგარეო საქმეთა სამინისტროს მხარდაჭერით მიმდინარე პროექტის, „კარგი მმართველობა გენდერული თანასწორობისთვის საქართველოში“ ფარგლებში მოამზადა.  სრულად...   წყარო: ორგანიზაციის ვებგვერდი

თბილისი. „მედიის განვითარების ფონდმა“ საზოგადოებას წარუდგინა ანტიდასავლური პროპაგანდის რიგით მეექვსე ყოველწლიური ანგარიში, რომელიც 2020 წლის მედიამონიტორინგის შედეგებს ასახავს.   მედიის განვითარების ფონდმა კვლევა, UNAG-თან პარტნიორობით, USAID/Georgia-ს პროგრამის - „ტოლერანტობის, სამოქალაქო ცნობიერებისა და ინტეგრაციის მხარდაჭერა" - ფარგლებში მოამზადა.  სრულად...   წყარო: ორგანიზაციის ვებგვერდი

თბილისი. „ტოლერანტობის და მრავალფეროვნების ინსტიტუტი“ აქვეყნებს კვლევას - „რასობრივი გამორჩევა საქართველოში საპოლიციო სისტემაში ეთნიკური უმცირესობებისა და მიგრანტების მიმართ არსებული პოლიტიკა და პრაქტიკა“.  „რასობრივი გამორჩევის პრობლემა აქტუალურია სხვადასხვა ქვეყნის საპოლიციო ინსტიტუტების ყოველდღიურ საქმიანობაში. პოლიცია რუტინული პროცედურების განხორციელებისას ხშირად იყენებს ადამიანის ვიზუალურ მახასიათებლებს და სხვა პირად მონაცემებს. ასეთ შემთხვევაში ჩნდება იმის რისკი, რომ ეს მონაცემები საზოგადოების მოცემულ ჯგუფს პოლიციისთვის უფრო აქტუალურს გახდის, ანუ პოლიციელები გარკვეული ვიზუალური მახასიათებლების მქონე პირებს უფრო მეტ ყურადღებას მიაქცევენ, უპირობოდ ჩათვლიან მათ მომეტებული რისკის მქონეთ“, - ვკითხულობთ კვლევის შესავალ ნაწილში, - „წინამდებარე კვლევა პირველია, რომელიც მიზნად ისახავს შეისწავლოს საქართველოში რასობრივი გამორჩევის არსებული პრაქტიკა პოლიციელების, მიგრანტებისა და ეთნიკური უმცირესობების გამოცდილების საფუძველზე. ვიმედოვნებთ, რომ მოცემული კვლევა განსაკუთრებულ წვლილს შეიტანს რასობრივი გამორჩევის პრობლემაზე საჯარო დისკუსიის დაწყებაში, ხოლო სახელმწიფოს დაეხმარება შესაბამისი პოლიტიკის გატარებაში“.  სრულად...   წყარო: ორგანიზაციის ვებგვერდი

თბილისი. 2021 წლის 16 სექტემბერს, 20-21 ივნისის საქმეებზე ევროპულ სასამართლოში დავის პროცედურა დაიწყო - ევროპულმა სასამართლომ საქართველოს მთავრობას 20-21 ივნისის საქმეებზე პოზიციის წარმოდგენის ვადა განუსაზღვრა.  საია-მ და EHRAC-მა 20-21 ივნისის მოვლენების შედეგად დაზარალებული 22 პირის სახელით ევროპულ სასამართლოში საჩივრები 2021 წლის 07 აპრილს წარადგინეს, ხოლო, სასამართლომ საჩივართა თაობაზე საქართველოს მთავრობას 2021 წლის 07 ივნისს აცნობა. არსებული პროცედურების შესაბამისად, საქართველოს მთავრობა ვალდებულია, გაგზავნილ საჩივრებთან დაკავშირებით სასამართლოს მიერ დასმულ შეკითხვებს 2021 წლის 09 დეკემბრამდე უპასუხოს. სახელმწიფოს, ასევე, ევალება წარმოადგინოს 2019 წლის 20-21 ივნისს აქციის დაშლასთან დაკავშირებით პროკურატურის მიერ წარმოებული სისხლის სამართლის საქმის მასალები.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრი საკონსტიტუციო სასამართლოში კიდევ ერთხელ დავობს ჩხრეკის შედეგად მტკიცებულებათა მოპოვების სტანდარტის კონსტიტუციურობის გამო. „საქართველოს პარლამენტმა 2021 წლის 28 ივნისს მიიღო ნორმა, რომელიც ვერ უზრუნველყოფს ჩხრეკის შედეგად მტკიცებულებათა მოპოვების სისტემის დახვეწას და კვლავ შეიცავს პოლიციელთა მხრიდან თვითნებობის რისკებს. ახალი წესის თანახმად, ოპერატიული ინფორმაციის საფუძველზე ჩატარებული ჩხრეკის შედეგად ამოღებული უკანონო ნივთის პირის მფლობელობაში ყოფნა, ჩხრეკაში მონაწილე პოლიციელთა ჩვენებების გარდა, შესაძლოა დადასტურდეს ნებისმიერი სხვა მტკიცებულებით. ამასთან, სხვა მტკიცებულების მოპოვება საჭირო არ არის, თუ ეს ობიექტურად შეუძლებელია. კანონი არ ითვალისწინებს არანაირ ვალდებულებას პოლიციელთა მიერ ნეიტრალური მტკიცებულების მოპოვებასთან დაკავშირებით“, - აღნიშნულია ცენტრის მიერ გავრცელებულ განცხადებაში. სრულად...  წყარო: ორგანიზაციის ვებგვერდი

თბილისი. „ფაქტ-მეტრმა“ სამედიცინო ნიღბების ეფექტურობასთან დაკავშირებით სოციალურ ქსელში გავრცელებული ინფორმაცია გადაამოწმა.  13 სექტემბერს Facebook-მომხმარებელმა გამოაქვეყნა პოსტი, რომლის მიხედვითაც ქირურგიული სახის ნიღბები მხოლოდ 10%-ით ეფექტურია კორონავირუსის პრევენციისას. „ვატერლოოს უნივერსიტეტის მკვლევრებმა დაადგინეს, რომ ქსოვილის ნიღბების უმეტესობა მხოლოდ 10%-ით არის ეფექტური“, - აცხადებს ავტორი.  პოსტს თანდართული აქვს ფოტომასალა, სადაც ერთმანეთთან არის დაპირისპირებული ზემოთაღნიშნული კვლევის შედეგები და ამირან გამყრელიძის განცხადება, სადაც იგი ამბობს, რომ პირბადე გვიცავს.  „ფაქტ-მეტრის“ დასკვნით, მასალა ქმნის შთაბეჭდილებას, თითქოს პირბადეები პანდემიის მართვის დროს არაეფექტური იარაღია, რაც ხსენებული კვლევის შედეგებს არ შეესაბამება.  სრულად...   წყარო: ორგანიზაციის ვებგვერდი

თბილისი. „უფლებები საქართველო“ აქვეყნებს ორგანიზაციის მკვლევრის, გური ბალიაშვილის ბლოგს - „რატომ უნდა ითვალისწინებდეს კანონმდებლობა შეკრებების მიმართ დაწესებული შეზღუდვების გასაჩივრების ეფექტიან მექანიზმს“.  „შეკრების თავისუფლების ბუნებიდან გამომდინარე, მშვიდობიანი შეკრების მიმართ შეზღუდვების დაწესების პრაქტიკა არაერთი იურისდიქციაში შეინიშნება და ამ კუთხით გამონაკლისი არც საქართველოა“, - წერს ავტორი“, - „თუმცა, საქართველოს უახლოეს წარსულში განვითარებული მოვლენების გათვალისწინებით, არსებობს მომეტებული რისკი იმისა, რომ შეკრების დროის, ადგილის ან ფორმის კუთხით დაწესებულმა თვითნებურმა ანდა დაუსაბუთებელმა შეზღუდვებმა არაპროპორციულად შეზღუდოს შეკრების მონაწილეების თავისუფლება და მნიშვნელოვნად შეაფერხოს შეკრების თავისუფლებით სათანადოდ სარგებლობა. შესაბამისად, მნიშვნელოვანია, ეროვნული კანონმდებლობა შეზღუდვების გასაჩივრების თვალსაზრისით, ეფექტიანი სასამართლო კონტროლის მექანიზმს ითვალისწინებდეს“.  სრულად...   წყარო: ორგანიზაციის ვებგვერდი

იმერეთი. ა(ა)იპ „ადგილობრივი დემოკრატიის სააგენტო საქართველომ“ იმერეთის მხარის მუნიციპალიტეტების საკრებულოებს ინიციატივით მიმართა.  ინიციატივა მოქალაქეთა მონაწილეობის ერთ-ერთი ფორმის, პეტიციის წარდგენის უფლების მქონე რეგისტრირებულ ამომრჩეველთა მინიმალური 1%-იანი ზღვრის შემცირებას (გონივრულ ფარგლებში) ითვალისწინებს. ორგანიზაციის განმარტებით, ეს მნიშვნელოვანია, ვინაიდან, პეტიციის წარდგენის პროცესში, მოქალაქეთა უმეტესობა კანონით განსაზღვრული რაოდენობის მობილიზაციის პრობლემას აწყდება.  ინიციატივა დადებითად შეაფასეს სამტრედიის, ბაღდათის, ხონის, წყალტუბოს, ჭიათურისა და საჩხერის მუნიციპალიტეტებმა. შედეგად, რეგისტრირებულ ამომრჩეველთა სტანდარტული 1%-იანი ზღვარი 0,5%-მდე შემცირდა.  „ადგილობრივი დემოკრატიის სააგენტო საქართველომ“ ინიციატივა წარადგინა პროექტის, „მოქალაქეთა ჩართულობის ხარისხის ზრდა ადგილობრივ თვითმმართველობაში “ფარგლებში, რომელსაც გაეროს განვითარების პროგრამის (UNDP), დანიის საგარეო საქმეთა სამინისტროსა და საქართველოს მთავრობის მხარდაჭერით ახორციელებს.  სრულად...   წყარო: ორგანიზაციის ვებგვერდი