მუნიციპალიტეტებში მონაწილეობითი პროცესების თვითშეფასების ფოკუს ჯგუფის მონაწილე, სამოქალაქო აქტივისტი, აზა გაბუნია, გვიზიარებს თავის შეხედულებას ადგილობრივი თვითმმართველობის საქმიანობაში მოქალაქეთა მონაწილეობის მნიშვნელობის შესახებ და ამ პროცესებში მუნიციპალიტეტის როლზე. „მუნიციპალიტეტის საქმიანობაში მოქალაქეთა მონაწილეობისთვის მნიშვნელოვანია ისეთი ფოკუს–ჯგუფები და შეხვედრები, რომლებიც მუნიციპალიტეტის წარმომადგენლებს საშუალებას მისცემს მოისმინონ მოქალაქეთა განსხვავებული მოსაზრებები, საჭიროებები და რეკომენდაციები. ყოველივე მუნიციპალიტეტის და საკრებულოს წარმომადგენლებს დაეხმარებათ დამკვირვებლის თვალით შეაფასონ საქმიანობა. მეორე მხრივ კი, დაფიქრდნენ, როგორ აღასრულონ უფრო ეფექტურად თვითმმართველობის კოდექსი. რომელიც მუნიციპალიტეტს ავალდებულებს შექმნას მოქალაქეთა მონაწილეობის პირობები და ასევე, შეიმუშაოს მონაწილეობის ახალი და ეფექტური მექანიზმები, რათა სამომავლოდ უზრუნველყონ მოქალაქეთა ჩართულობა გადაწყვეტილების მიღების პროცესში“.  სამოქალაქო საზოგადოების ინსტიტუტი USAID–ის ადგილობრივი თვითმმართველობის პროგრამის მხარდაჭერით ოთხ მუნიციპალიტეტში: მარნეულში, დმანისში, ბათუმსა და ჩოხატაურში ახორციელებს მოქალაქეთა მონაწილეობის თვითშეფასების ინსტრუმენტის დანერგვას სწორედ ამ მიზნით ჩატარდა აღნიშნული ფოკუს ჯგუფები, რომელშიც მონაწილეობდნენ საზოგადოებრივი ორგანიზაციების, ადგილობრივი თვითმმართველობის წარმომადგენლები, აქტივისტები, მოქალაქეები.

კახეთი. სოციალური სამართლიანობის ცენტრი ვიდეოს ავრცელებს, რომელშიც უდიური თემის წარმომადგენლების ცხოვრებაა აღწერილი.  „უდიური თემი ერთ-ერთი ყველაზე მცირერიცხოვანი თემია დღეს საქართველოში. მით უმეტეს ნაწილი, ყვარელის სოფელ ზინობიანში ცხოვრობს.ვიდეოში მოისმენთ, როგორ ცხოვრობენ თემის წარმომაგდენლები;  რა რეალობის წინაშე უწევთ გამკლავება და როგორია მათი საზოგადოებაში ინტეგრაციის პროცესი.“ სრულად... წყარო:  სოციალური სამართლიანობის ცენტრი

თბილისი. ახალი სასწავლო წლის დაწყება ბავშვებისთვის განსაკუთრებით მნიშვნელოვანია.  სკოლაში დაბრუნება გამოწვევებით არის სავსე როგორც ბავშვებისთვის, ასევე მშობლებისთვის.  გაეროს ბავშვთა ფონდი მშობლებისთვის რჩევებს აქვეყნებს. როგორ შევამსუბუქოთ სკოლაში დაბრუნებისგან მომატებული შფოთვა. სრულად... წყარო: გაეროს ბავშვთა ფონდი 

თბილისი.სოციალური მედიის მონიტორინგის ფარგლებში „სამართლიანი არჩევნები” ყოველკვირეულ მიმოხილვას აცნობს საზოგადოებას.  ორგანიზაცია ყურადღებას ამახვილებს იმ გზავნილებზე, რომლებიც ეხმიანება პოლიტიკურ საკითხებს, კვირის განმავლობაში სოციალურ ქსელში (მეტნაკლებად) ვირუსულად ცირკულირებს და მის გავრცელებაში ერთზე მეტი აქტორი, ანგარიში თუ გვერდია ჩართული. რიგ შემთხვევებში წარმოდგენილია კვირის განმავლობაში ყველაზე მაღალინტერაქციული პოსტები.  მონაცემთა დამუშავებისთვის ორგანიზაცია იყენებს ფეისბუქის მონიტორინგის ინსტრუმენტ Crowdtangle-ს და ეყრდნობა დისკრედიტაციულ კამპანიებში ჩართული გვერდების/ანგარიშების არსებულ განახლებად ბაზას. გვერდები ხელმისაწვდომია პლატფორმაზე www.disinfoobserver.ge  კვირის მონიტორინგის შედეგი – https://bit.ly/48418tI  სრულად...  წყარო: სამართლიანი არჩევნები

მასწავლებელთა პროფესიული განვითარების ეროვნული ცენტრის, ინკლუზიური განათლების ხელშეწყობის პროგრამის ფარგლებში 4 სექტემბერს, 19:00 საათზე მშობლებისთვის, სააღმზრდელო და საგანმანათლებლო დაწესებულების სპეციალისტებისთვის გაიმართება ონლაინ ვებინარი – „თანამშროლობა სკოლასა და ოჯახს შორის". სრულად...  წყარო: მშობელთა სკივრი

აჭარა.სოციალური სამართლიანობის ცენტრმა საკონსტიტუციო სასამართლოს სარჩელით მიმართა.  „არაკონსტიტუციურად მივიჩნევთ სისხლის სამართლის საპროცესო კოდექსის იმ ნორმებს, რომელიც გამორიცხავს საკონსტიტუციო სასამართლოს მიერ არაკონსტიტუციურად ცნობილი საპროცესო ნორმის საფუძველზე გამამტყუნებელი განაჩენის გადასინჯვას“, ნათქვამია ინფორმაციაში .  სრულად...  წყარო: სოციალური სამართლიანობის ცენტრი

თბილისი. საერთაშორისო გამჭვირვალობა – საქართველო აგრძელებს დეკლარაციების მონიტორინგის შედეგების გამოქვეყნებას.  ამჯერად აქვეყნებს დეპუტატის შოთა ხაბარელის დეკლარაციის შესახებ. „საქართველოს პარლამენტის წევრმა ქართული ოცნებიდან, შოთა ხაბარელმა 2022 წელს შევსებულ დეკლარაციაში არ მიუთითა მისი და მისი მეუღლის სახელზე არსებული უძრავი ქონება და სამეწარმეო საქმიანობა“, ნათქვამია საერთაშორისო გამჭვირვალობის პუბლიკაციაში.  სრულად... წყარო: საერთაშორისო გამჭვირვალობა – საქართველო

თბილისი. პლატფორმა „კომენტარმა“ სამართლიანი მართლმსაჯულების ციკლის ფარგლებში მოამზადა საინფორმაციო მასალები.  გაეცანით მათ:  1.რა იწვევს გაუცხოებას სასამართლოს მიმართ? 2.რას გვთავაზობს ხალხზე ორიენტირებული მართლმსაჯულება?  3.რას გულისხმობს მართლმსაჯულებაზე ხელმისაწვდომობის კონცეფცია? 4.რატომ გვჭირდება ხელმისაწვდომი და ხარისხიანი იურიდიული დახმარება?  5.ანალიტიკური – როგორი მართლმსაჯულებისთვის ღირს ბრძოლა?  ციკლი მომზადდა კომენტარის მიერ USAID სამართლის უზენაესობის პროგრამის მხარდაჭერით.  სრულად...  წყარო: პლატფორმა „კომენტარი“

8 და 11 სექტემბერს დმანისსა და მარნეულში გაიმართა ტრენინგები. იგი მუნიციპალიტეტის საქმიანობაში მოქალაქეთა გაძლიერების ტრენინგ–პროგრამის მეორე მოდულის ფარგლებში ჩატარდა. რითაც დასრულდა მეორე მოდულის ფარგლებში გათვალისწინებული ღონისძიებები.  შეგახსენებთ, რომ 1 და 5 სექტემბერს აღნიშნული ტრენინგები გაიმართა ჩოხატაურსა და ბათუმში.  ოთხი მუნიციპალიტეტის 78 წარმომადგენელმა, ტრენინგის ფარგლებში, გაიარეს ისეთი საკითხები, როგორიცაა: საკრებულოს ძირითადი უფლებამოსილებები, საკრებულოს წევრების ანგარიშვალდებულება და ამომრჩეველთან კომუნიკაცია, საკრებულოს წევრის ანგარიშვალდებულების ინოვაციური მექანიზმები.  ტრენინგებს უძღვებოდა კოკა კიღურაძე.  ტრენინგებს ორგანიზებას უწევდა სამოქალაქო საზოგადოების ინსტიტუტი (CSI), USAID-ის ადგილობრივი თვითმმართველობის პროგრამის ფარგლებში.

თბილისი. 6 სექტემბერს საპარლამენტო უმრავლესობის ხუთმა დეპუტატმა პარლამენტში წარადგინა კანონპროექტები, „საქართველოს საარჩევნო კოდექსსა” და „საქართველოს პარლამენტის რეგლამენტში” შესატან ცვლილებებთან დაკავშირებით, რომელთა მიღების შემთხვევაშიც, კიდევ ერთხელ შეიცვლება საქართველოს ცენტრალური საარჩევნო კომისიის (ცესკო) დაკომპლექტების წესი.  სამართლიანი არჩევნები ინიცირებული ცვლილებების შესახებ განცხადებას ავრცელებს:  „ინიციირებული ცვლილებები არსებითად არ აგვარებს ცესკოს თავმჯდომარისა და პროფესიული წევრების არჩევის წესში არსებულ მთავარ პრობლემებს, კერძოდ, ცესკოს წევრობის/თავმჯდომარეობის კანდიდატებს, წინა ცვლილებებით მიღებული წესის მსგავსად, კვლავ საქართველოს პარლამენტის თავმჯდომარე შეარჩევს და წარუდგენს პარლამენტს, რომელსაც, თავის მხრივ, უბრალო უმრავლესობითაც შეეძლება კანდიდატების სრული ვადით, 5 წლით არჩევა.  (...) შესაბამისად, კიდევ ერთხელ მოვუწოდებთ საქართველოს პარლამენტს, გაითვალისწინოს ეუთო/ოდირისა და ევროპის საბჭოს/ვენეციის კომისიის დასკვნები, ასევე, სამეზობლო პოლიტიკისა და გაფართოების საკითხებში ევროკომისრის რეკომენდაცია და ცესკოს თავმჯდომარისა და პროფესიული წევრების არჩევის წესი შეუსაბამოს 2021 წლის 19 აპრილის პოლიტიკური შეთანხმებით გათვალისწინებულ პრინციპებს“.  სრულად... წყარო: სამართლიანი არჩევნები

თბილისი.ასოციაცია „ევროპის დროით“ ფრიდრიხ ებერტის ფონდის მხარდაჭერით გთავაზობთ ყოველთვიურ „შრომის ბიულეტენს“. სადაც განიხილება ყველაზე აქტუალური საკითხები შრომის სამართლის სფეროდან. სრულად...  წყარო: ფრიდრიხ ებერტის ფონდი

აჭარა. საქართველოს ახალგაზრდა იურისტთა ასოციაცია ეხმიანება ტელეკომპანია „მთავარი არხის“ ეთერში გასულ სიუჟეტს, რომელიც ეხება შუახევჰესის მდგომარეობას.  „სიუჟეტში აღნიშნულია, რომ ჰესი არის დაზიანებული და მისი ფუნქციონირება საფრთხისშემცველია. ჰესის გახსნიდან დღემდე რამდენჯერმე უკვე დაზიანდა ჰესის სხვადასხვა ნაწილები და ამის მიუხედავად, ჰესი კვლავ ფუნქციონირებს“. საია უკვე წლებია იცავს იმ ადგილობრივების ინტერესებს სასამართლოში, რომლებმაც დაიწყეს სასამართლოში დავა შუახევ ჰესის მშენებლობის ნებართვის კანონიერებასთან დაკავშირებით. დავის დაწყებიდან დღემდე გასულია 9 წელი და ჯერ კიდევ არ არის დასრულებული საქმის განხილვა სასამართლოში.  „საია მოუწოდებს საქართველოს გარემოს დაცვისა და სოფლის მეურნეობის სამინისტროს, სსიპ ტექნიკური და სამშენებლო ზედამხედველობის სააგენტოსა და სსიპ გარემოს ეროვნულ სააგენტოს კომპეტენციის ფარგლებში შეისწავლოს ჰესის ამჟამინდელი მდგომარეობა და მიიღოს ყველა ზომა, რათა თავიდან იქნეს აცილებული ის მძიმე შედეგები, რომლებიც შეიძლება მოჰყვეს ჰესის ამ პირობებში ფუნქციონირებას“.  სრულად...  წყარო: საქართველოს ახალგაზრდა იურისტთა ასოციაცია

იმერეთი.იმერეთის რეგიონში სოციალური მეწარმეობის პროგრამა იწყება. პროექტი ითვალისწინებს ხანგრძლივი აქტივობებს, რომლებიც დაეფუძნება არაფორმალური განათლებისა და ახალგაზრდული საქმიანობის პრინციპებსა და მიდგომებს.  პროგრამის მიზანია ხელი შეუწყოს ახალგაზრდებში სოციალური მეწარმეობის მნიშვნელობის გააზრების პროცესს და მოახდინოს სოციალური მეწარმეობის პოპულარიზება.  „იმერეთის რეგიონში სოციალური მეწარმეობის პოპულარიზების პროგრამა" მიმდინარეობს სოციალური მეწარმეობის ახალგაზრდა ელჩების პროექტის მხარდაჭერით, რომელსაც საქართველოს სტრატეგიული კვლევებისა და განვითარების ცენტრი (CSRDG) „სოციალური მეწარმეობის განვითარება მდგრადი და ინკლუზიური საზოგადოებისთვის“ ფარგლებში, ევროკავშირისა და პური მსოფლიოსთვის დაფინანსებით ახორციელებს.  პროგრამის პარტნიორია სამეცნიერო- ინტელექტუალური კლუბი "თაობათა დიალოგი". სრულად... წყარო: თაობათა დიალოგი

სამცხე-ჯავახეთი. დემოკრატ–მესხთა კავშირის ინციატივით, ახალციხის ახალგაზრდული ცენტრის წევრებისთვის გაიმართა პრეზენტაცია – როლის თეორია.  ღონისძიება გაიმართა USAID-ის პროგრამა, ერთიანობა მრავალფეროვნებაშია ფარგლებში, რომელსაც ახორციელებს საქართველოს გაეროს ასოციაცია, USAID-ის ფინანსური მხარდაჭერით. სრულად... წყარი: დემოკრატ მესხთა კავშირი

თბილისი.ორგანიზაცია „ახალგაზრდა მწვანეები“ ინფორმაციას ავრცელებს საქართველოში მეწყერული პროცესების შესახებ.  „საქართველოს მრავალფეროვანი ლანდშაფტი, რომელიც მოიცავს მთიან რეგიონებს და შავი ზღვის სანაპირო ზონას, მას განსაკუთრებით მგრძნობიარეს ხდის სხვადასხვა მეწყრული საფრთხის მიმართ. შეცვლილი კლიმატი პირდაპირ კავშირშია გახშირებულ მეწყერებთან რამდენიმე ფაქტორის გამო:  გაზრდილი ნალექების რაოდენობა - ნალექის მატებამ შეიძლება გააჯეროს ნიადაგი, რაც მას უფრო მგრძნობიარეს გახდის მეწყრული პროცესების მიმართ. საქართველოში ამ კუთხით განსაკუთრებით საყურადღებოა ციცაბო ფერდობების მთიანი ადგილები. ექსტრემალური ამინდები: ქარიშხალი, ძლიერი წვიმა და ა.შ. მსგავსი ექსტრემალური ამინდები ზრდის მეწყრის საშიშროებას, განსაკუთრებით მთაგორიან ადგილებში. მყინვარების დნობა - გლობალური დათბობის პირობებში ინტენსიურად მიმდინარეობს მყინვარების დნობა და შემცირება, რაც იწვევს წყალმოვარდნებს, მეწყრულ პროცესებს, ღვარცოფებს და ა.შ.  მეწყრულ პროცესებს ასევე ააქტიურებს ტყის ჩეხვა და მცენარეული საფარის ტრანსფორმაცია, ურბანიზაციის პროცესები, არასწორად დაგეგმილი ინფრასტრუქტურული პროექტები და ა.შ. სრულად... წყარო: ახალგაზრდა მწვანეები  

თბილისი. მედიაწიგნიერების სკოლაში აქტიური შაბათები კვლავ იწყება. მითლაბის მე–13 ნაკადს წინ ტრენინგები და ფაქტების გადამოწმების პრაქტიკული გამოცდილება ელის. მედიის განვითარების ფონდის (MDF) და დოიჩე ველე აკადემიის მედიაწიგნიერების პროგრამა - ”მითების დეტექტორის ლაბორატორია” - 2017 წელს დაარსდა და უკვე 251 კურსდამთავრებული ჰყავს. პროგრამით გათვალისწინებული სტაჟირების ფარგლებში კურსის მონაწილეებმა ფაქტების გადამოწმების პლატფორმა მითების დეტექტორი-ზე ჯამში 500-ზე მეტი სტატია გამოაქვეყნეს.  სრულად... წყარო: მედიის განვითარების ფონდი

აჭარა.მუნიციპალიტეტებში მონაწილეობითი პროცესების თვითშეფასების ფოკუს ჯგუფის მონაწილე, ბათუმის მერიის ახალგაზრდული მრჩეველთა საბჭოს წევრი, პროექტის – „ბათუმის ურბანული დღის წესრიგის“ ავტორი, მარიამ მორჩაძე გვიზიარებს თავის შეხედულებას ადგილობრივ თვითმმართველობის საქმიანობაში მოქალაქეთა მონაწილეობის მნიშვნელობის შესახებ და ამ პროცესებში მუნიციპალიტეტის როლზე.  „გადაწყვეტილების მიღების პროცესში მოქალაქეთა მონაწილეობის უზრუნველყოფა ერთი მხრივ, ადგილობრივი მთავრობისთვის მოქალაქეების ნდობის მოპოვებისა და მისი შენარჩუნებისთვის, მეორე მხრივ კი, თავად მოქალაქეებისთვის ქალაქის მიმართ კუთვნილების განცდისთვის მნიშვნელოვანია.  ამისთვის მუნიციპალიტეტი, მაქსიმალურად უნდა ცდილობდეს, სხვადასხვა მონაწილეობითი მიდგომის დანერგვას, მით უმეტეს, როცა ჩვენს გარშემო სწრაფად ვითარდება და იცვლება ყველაფერი, მართვის ფორმა ხდება უფრო ინოვაციური და თანამედროვე.  მუნიციპალიტეტი პერიოდულად უნდა აფასებდეს თუ როგორ ხორციელდება მოქალაქეთა მონაწილეობის პროცესი თემში, რათა შეინარჩუნოს განვითარების სწორი ხედვა და სტრატეგია. დაინტერესებული მხარეებისგან უკუკავშირი კი, დაეხმარება მუნიციპალიტეტს, რომ შეფასების პროცესი ინკლუზიური და დემოკრატიული გახადოს, რაც მართვის ეფექტურობის ხარისხზე გავლენას ახდენს“.  სამოქალაქო საზოგადოების ინსტიტუტმა USAID–ის ადგილობრივი თვითმმართველობის პროგრამის მხარდაჭერით ოთხ მუნიციპალიტეტში: მარნეულში, დმანისში, ბათუმსა და ჩოხატაურში დაიწყო მოქალაქეთა მონაწილეობის თვითშეფასების ინსტრუმენტის დანერგვა სწორედ ამ მიზნით ჩატარდა აღნიშნული ფოკუს ჯგუფები, რომელშიც მონაწილეობდნენ საზოგადოებრივი ორგანიზაციების, ადგილობრივი თვითმმართველობის წარმომადგენლები, აქტივისტები, მოქალაქეები. წყარო: სამოქალაქო საზოგადოების ინსტიტუტი

თბილისი. არასამთავრობო ორგანიზაციები ტელეკომპანია „პირველის“ ეთერში გასულ სიუჟეტს ეხმაურებიან და ერთობლივ განცხადებას ავრცელებენ – „პრემიერ–მინისტრის მიერ პირადი მიზნებისთვის სახელმწიფო რესურსების შესაძლო გამოყენების ფაქტზე გამოძიება უნდა დაიწყოს“. „მოვუწოდებთ საქართველოს გენერალურ პროკურატურას ტელეკომპანია პირველის გადაცემა - “ნოდარ მელაძის შაბათში” 2023 წლის 9 სექტემბერს გასულ სიუჟეტში გადმოცემული შესაძლო დანაშაულის ნიშნების შემცველი ინფორმაციის საფუძველზე დაუყოვნებლივ დაიწყოს გამოძიება. ამის პარალელურად, არსებითია შემთხვევაზე მაღალი საზოგადოებრივი ინტერესის დაკმაყოფილების მიზნით, სახელმწიფო დაცვის სპეციალური სამსახურის საჯარო სამართლის იურიდიულმა პირმა,სახელმწიფო უზრუნველყოფის სააგენტომ, გაასაჯაროოს რეისთან დაკავშირებული ინფორმაცია, მათ შორის, ხელშეკრულება მხარეების მითითებით, ასევე, ხარჯთაღრიცხვასა და ანგარიშსწორებასთან დაკავშირებული დოკუმენტები“.  სრულად...  წყარო: საქართველოს ახალგაზრდა იურისტთა ასოციაცია

თბილისი. გოგონებისა და ქალების რეპროდუქციული ჯანმრთელობის საკითხებზე, საქართველოს დაუნის სინდრომის ასოციაციამ, საინფორმაციო შეხვედრა გამართა მშობლებთან. საკითხი აქტუალურია და იგი მშობლების ინტერესის საგანს წარმოადგენს.  ონლაინ შეხვედრაზე მშობლებმა დეტალური ინფორმაცია მიიღეს საკითხის ირგლივ დაგეგმილი აქტივობების შესახებ. სრულად... წყარო: საქართველოს დაუნის სინდრომის ასოციაცია

იმერეთი.ორგანიზაცია „თაობათა დიალოგი“ ონლაინ გამოკითხვას ატარებს, რათა საზოგადოების მოსაზრება გაიგოს თუ ვინ არის აქტიური მოქალაქე.  1.ის, ვინც გეგმავს სამოქალაქო ღონისძიებებს?  2.ის, ვინც ერთვება ახალგაზრდულ აქტივობებში?  3.ის, ვინც ახორციელებს პოლიტიკურ საქმიანობას? მიიღე მონაწილეობა ონლაინ გამოკითხვაში.  სრულად...  წყარო: თაობათა დიალოგი

თბილისი.ეროვნული არქივის კინოსაცავში გაჩენილ ხანძარს გამოეხმაურა ორგანიზაცია „საბჭოთა წარსულის კვლევის ლაბორატორია“.  "მიუხედავად იმისა, რომ ჯერ დაზუსტებით არაა დადგენილი რა პერიოდის და რა მოცულობის მასალა დაიღუპა აუნაზღაურებლად, მომხდარი ტრაგედია კიდევ ერთხელ წარმოაჩენს მეხსიერებისადმი სახელმწიფოს ზერელე, ხშირად კი დესტრუქციულ მიდგომას, რომელიც მაქსიმალურად ზღუდავს არქივებზე წვდომას. წლების განმავლობაში, არქივებზე წვდომის ხელოვნური შეზღუდვების ზრდისა და მკვლევართათვის სისტემატიური ხელის შეშლის ფონზე, ძნელია ნდობით მოვეკიდოთ მტკიცებას იმის შესახებ, რომ ყველა განადგურებული ფირი გაციფრულებულია. სწორედ ამიტომ, მოვითხოვთ: კატასტროფის შედეგების შემსწავლელი ღია ფორმატის კომისიის შექმნას, რაც უზრუნველყოფს საზოგადოების მაქსიმალურ კონტროლს, გამჭვირვალეობას და მოქალაქეთა ინფორმირებულობას;   კატასტროფაზე როგორც ინდივიდუალური, ასევე სისტემური პასუხისმგებლობის დაკისრებას“.  სრულად...  წყარო:საბჭოთა წარსულის კვლევის ლაბორატორია

თბილისი. სოციალური სამართლიანობის ცენტრი ზურაბ ჯაშის სტატიას ავრცელებს.  „რწმენა, ამ სიტყვის ფართოდ გავრცელებული მნიშვნელობით, გულისხმობს წინარემეცნიერულ, ანუ გარკვეულ შეხედულებებსა და წარმოდგენებს ლოგიკასა და ემპირიულ გამოცდილებაზე დაუყრდნობლად. როდესაც ადამიანს ვთხოვთ დაგვისაბუთოს საკუთარი წარმოდგენები, ის ან უარს ამბობს ამაზე, ან მისი დასაბუთება არც ისე დამაჯერებლად გამოიყურება. ამგვარი რწმენა-წარმოდგენების საბოლოო წყაროდ ისევ მისი საზოგადოებისგან ათვისებული იდეოლოგია წარმოჩნდება.„  სრულად... წყარო: სოციალური სამართლიანობის ცენტრი