თბილისი. ღია საზოგადოების ფონდის ლიდერობით, 9 საზოგადოებრივმა ორგანიზაციამ მოამზადა ანგარიში ქვეყნისთვის ევროკავშირის კანდიდატის სტატუსის მისანიჭებლად განსაზღვრული 12 პირობის შესრულების მდგომარეობის შესახებ. „საზოგადოებრივი ორგანიზაციების შეფასებით, 16 იანვრიდან 1 აგვისტოს ჩათვლით, სრულად არის შესრულებული 1 პირობა, მეტწილად შესრულებულია 2 პირობა, ნაწილობრივ შესრულებულია 7 პირობა და ჯერ კიდევ შესასრულებელია ევროკავშირის 2 პირობა (დეოლიგარქიზაცია და დეპოლარიზაცია).  მცირე პროგრესი შეიმჩნევა დამოუკიდებელი მედიისა და გადაწყვეტილების მიღების პროცესში სამოქალაქო საზოგადოების ჩართულობის მიმართულებებით. სტატუსმესტრის წინა ანგარიშებმაც ცხადყო, რომ სამოქალაქო საზოგადოების შეფასებები დიდწილად თანხვედრაშია ევროკავშირის მიერ 2023 წლის 22 ივნისს წარმოდგენილ ზეპირ შუალედურ შეფასებასთან“. იხ. სტატუსმეტრი სრულად... წყარო: osgf.ge

რეგიონები. სამოქალაქო საზოგადოების ინსტიტუტმა, USAID-ის ადგილობრივი თვითმმართველობის პროგრამის ფარგლებში, შეიმუშავა ტრენინგ–პროგრამა – „მუნიციპალიტეტის საქმიანობაში მოქალაქეთა მონაწილეობის გაძლიერება“. პროგრამა შედგენილია მუნიციპალიტეტის საკრებულოს წევრებისა და საკრებულოს აპარატის მოხელეებისთვის. მისი მიზანია მუნიციპალიტეტის საკრებულოს შესაძლებლობების გაძლიერება მის მიერ კანონმდებლობით მინიჭებული მანდატის შესრულების, მისი ანგარიშვალდებულების გაზრდისა და მუნიციპალიტეტების საქმიანობაში მოქალაქეთა მონაწილეობის ხელშეწყობის გაძლიერების კუთხით. ტრენინგ–მოდული შემუშავდა, სამიზნე მუნიციპალიტეტებში (ბათუმი, ჩოხატაური, მარნეული, დმანისი), მოქალაქეთა მონაწილეობის შესახებ ტრენინგების საჭიროებების შეფასების საფუძველზე. პროგრამა მოიცავს ორ მოდულს: 1. მუნიციპალიტეტის საქმიანობაში მოქალაქეთა მონაწილეობის გაძლიერება – ძირითადი სტანდარტები და გარანტიები; 2. საკრებულოს წევრების ანგარიშვალდებულება. ტრენინგის პირველი ციკლი ჩატარდება 1-7 აგვისტოს – ჩოხატაურის, ბათუმის, მარნეულის დმანისის მუნიციპალიტეტებში. ტრენინგებს გაუძღვებიან ლევან ფანიაშვილი, ნათია აფხაზავა. ტრენინგის მეორე ციკლი ჩატარდება სექტემბრის დასაწყისში და გაუძღვება კოკა კიღურაძე. USAID-ის ადგილობრივი თვითმმართველობის პროგრამა წარმოადგენს ხუთწლიან ინიციატივას, რომელიც აშშ-ის საერთაშორისო განვითარების სააგენტოს (USAID) დაფინანსებით ხორციელდება საქართველოში. პროგრამა მიზნად ისახავს საქართველოში მიმდინარე დეცენტრალიზაციის და საჯარო მმართველობის რეფორმის მხარდაჭერას და ადგილობრივ თვითმმართველობებში ეფექტიანობის, ანგარიშვალდებულებისა და მოქალაქეთა ჩართულობის გაზრდას. პროგრამა მუშაობს ადგილობრივ თვითმმართველობის დონეზე ანგარიშვალდებულების გაძლიერების, ინკლუზიური და მომხმარებელზე ორიენტირებული საჯარო სერვისების მიწოდების გაუმჯობესების კუთხით და დახმარებას უწევს, ცენტრალურ ინსტიტუტებს დეცენტრალიზაციის და საჯარო მმართველობის რეფორმის განხორციელებაში. პროგრამის გვერდი სოციალურ მედიაში: ადგილობრივი თვითმმართველობის პროგრამა. წყარო: civilin.org

თბილისი. პარტნიორობა ადამიანის უფლებებისთვის (PHR) დახმარებით, თბილისის საქალაქო სასამართლომ დააკმაყოფილა PHR-ის ადვოკატების მოთხოვნა და განათლების სამინისტროს სსიპ „შეფასებისა და გამოცდების ეროვნულ ცენტრს“ დაავალა, აბიტურიენტის დამატებით ეროვნულ გამოცდაზე დაშვება. „სასამართლოსთვის მიმართვამდე, აბიტურიენტის წერილობითი მოთხოვნის მიუხედავად, გამოცდების ეროვნულმა ცენტრმა არ გაითვალისწინა ის ფაქტი, რომ აბიტურიენტი ერთიან ეროვნულ გამოცდაზე ჯანმრთელობის პრობლემის გამო (ჰქონდა კბილის მწვავე ტკივილი და ჩაუტარდა რთული ოპერაცია, რამაც გამოიწვია გართულება) ვერ გამოცხადდა. რომ არა სასამართლოს ეს გადაწყვეტილება, აბიტურიენტი დაკარგავდა ერთ სასწავლო წელს. მოსამართლემ გადაწყვეტილება 24 საათში მიიღო“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ ინტერვიუს ჰელსინკის უნივერსიტეტის პროფესორთან და ჯანმრთელობისა და სოციალური პოლიტიკის მკვლევართან, ჰეიკი ჰიილამოსთან. „სოციალური დაცვის სისტემის მისამართით უნდა დავსვათ შემდეგი კითხვები: ვიცხოვრებთ კი ამ შემწეობით? გვყოფნის ეს მხარდაჭერა? ადამიანის უფლება ნამდვილად არის, რომ შემწეობა და სოციალური დაცვა მიიღოს, მაგრამ უფლების ნაწილია ისიც, რომ ამ შემწეობით და დახმარებით ადამიანმა ღირსეული ცხოვრება შეძლოს. ყველა სოციალური რისკის საპასუხოდ უნდა არსებობდეს შესაბამისი სერვისი. როცა უმუშევარი ხდები, ამ დროს უნდა გააქტიურდეს პროგრამები, რომლებიც ადამიანებს გადაამზადებს, ან სამსახურის მოძიებაში დაეხმარება. როცა ავად ხდები, ჯანდაცვის პროგრამა და რეაბილიტაციის პროგრამა უნდა ამუშავდეს. შვილის გაჩენის შემთხვევაში, მშობლების მხარდაჭერის, პრენატალური ზრუნვის პროგრამები უნდა გააქტიურდეს; დღის ცენტრები კი განსაკუთრებით მნიშვნელოვანია დედებისთვის, რომ სამუშაო რეჟიმს დაუბრუნდნენ; ხანდაზმულობის ეტაპზე უნდა ამუშავდეს როგორც ჯანდაცვის, ასევე ზრუნვის სხვა სერვისები. ასე რომ, ეს არის სხვადასხვა მომსახურების მთელი სისტემა და მათზე წვდომა ადამიანს უნდა ჰქონდეს მყისიერად, როგორც კი პრობლემის წინაშე აღმოჩნდება“. ინტერვიუ სრულად... პროექტი ხორციელდება USAID-ის სამოქალაქო საზოგადოების ჩართულობის პროგრამის მხარდაჭერით. წყარო: socialjustice.org.ge

აჭარა. 26-27 ივლისს, სამოქალაქო საზოგადოების ინსტიტუტის (CSI) ინიციატივით, ქალაქ ბათუმის მერიამ მუნიციპალიტეტის ბიუჯეტის 2024-27 წლების პრიორიტეტების საჯარო განხილვა გამართა. განათლების, კულტურის, სპორტისა და ახალგაზრდობის, ასევე ჯანმრთელობისა და სოციალური დაცვის მიმართულებების განხილვაში 25–მდე მოქალაქე ჩაერთო. ადგილობრივი მოქალაქეების აზრით, მნიშვნელოვანია ახალგაზრდული პროგრამების, ახალგაზრდული ორგანიზაციების მხარდაჭერა და განვითარება. შეხვედრებზე, ასევე, ყურადღება გამახვილა ძალადობის მსხვერპლი ქალების დაცვისა და სარეაბილიტაციო ღონისძიებების დაფინანსების სიმცირესა და გაზრდის აუცილებლობაზე, ჯანდაცვის მიმართულებით მიმდინარე პროგრამების შესახებ ინფორმაციის ხელმისაწვდომობის გაზრდაზე და ა.შ. შეხვედრა გაიმართა USAID-ის ადგილობრივი თვითმმართველობის პროგრამის ფარგლებში. სრულად...

თბილისი. საქათველოს ახალგაზრდა იურისტთა ასოციაცია (საია) ეხმიანება მედიით გავრცელებულ ინფორმაციას, რომლის თანახმად 26 ივლისს, ბათუმის ნავსადგურში რუსეთის ფედერაციიდან საკრუიზო გემით შემოსული არიან ის პირები, რომლებსაც შესაძლოა, დარღვეული ჰქონდეთ „ოკუპირებული ტერიტორიების შესახებ“ საქართველოს კანონი. „რუსეთის სამხედრო აგრესიის შედეგად ოკუპირებულ საქართველოს ტერიტორიებზე მოქმედებს განსაკუთრებული სამართლებრივი რეჟიმი, რომელიც განსაზღვრავს უცხო ქვეყნის მოქალაქეების ან მოქალქეობის არმქონე პირთათვის ოკუპირებულ ტერიტორიაზე შესვლის წესს და ადგენს შეზღუდვებს.  ოკუპირებულ ტერიტორიებზე შესვლა დაშვებულია მხოლოდ ზუგდიდისა და გორის მუნიციპალიტეტების მიმართულებიდან. ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და წარმოადგენს საქართველოს სისხლის სამართლის კოდექსის 322 (პრიმა) მუხლით გათვალისწინებულ დანაშაულს“. საია მოუწოდებს შინაგან საქმეთა სამინისტროს მოახდინოს რეაგირება კანონმდებლობის დადგენილი მოთხოვნების დამრღვევ პირთა გამოსავლენად და მათ მიმართ გამოიყენოს სისხლის სამართლის კოდექსით გათვალისწინებული მექანიზმები. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი გიზიარებთ 5 რჩევას, როგორ ვიზრუნოთ ფსიქიკურ ჯანმრთელობაზე ონლაინ სივრცეში. „თუ სოციალურმა მედიამ ან ინტერნეტში ყოფნამ მოგიმატათ სტრესი, გაგრძნობინათ შური ან მარტოობა, განგაცდევინათ დაბალი თვითშეფასება ან სოციალური შფოთვა, იცოდეთ, თქვენ მარტო არ ხართ. გთავაზობთ ხუთ რჩევას, როგორ იზრუნოთ თქვენს ფსიქიკურ ჯანმრთელობაზე ონლაინ”. მოერიდეთ უმიზნო სქროლვას; იყავით ყურადღებიანი; დაიცავით თავი და იზრუნეთ სხვებზეც; აირჩიეთ სიკეთე; იცხოვრეთ რეალური ცხოვრებით. სრულად... წყარო: www.unicef.org

28 ივლისს, 19:00 საათზე, კაფე მზიურში ამერიკის შეერთებული შტატების საელჩოს ატაშეს, მარიო მონტოიას ახალი ფოტოგამოფენის პრეზენტაცია „ამერიკელი დიპლომატის თვალით დანახული საქართველო“ გაიმართება. გამოფენა ასახავს 20 ამბავს საქართველოს სხვადასხვა რეგიონიდან. სრულად...

გაეროს განვითარების პროგრამა (UNDP) ევროკავშირთან ერთად აგრძელებს დისკუსიათა ციკლს ადამიანის უფლებებსა და თავისუფლებებზე. 28 ივლისს, 16:00 საათზე, რუსუდან გოცირიძე ისაუბრებს თემაზე: „ყველა ადამიანი თანასწორია“. სრულად...

28 ივლისს ჰეპატიტის მსოფლიო დღეა! ამ დღესთან დაკავშირებით, 28 ივლისს, 14:00 საათზე, ორგანიზაცია ჰეპა პლიუსის სერვის ცენტრში გაიმართება პაციენტთა სკოლა თემაზე: ჰეპატიტები. სრულად...

თბილისი. არასამთავრობო ორგანიზაციამ „მშობლები განათლებისთვის“ USAID-ის სამოქალაქო საზოგადოების ჩართულობის პროგრამის მხარდაჭერით მოამზადა პუბლიკაცია: მოსწავლეებისა და მათი მშობლების გამოწვევები სკოლაში. ძირითადი მიგნებების თანახმად, სკოლა ვერ ამკვიდრებს ჯანსაღი ცხოვრების წესს, რაც ზოგადი განათლების ეროვნული მიზნებით, განათლების სისტემის დანიშნულებაა; სკოლებში ხშირად ირღვევა ბავშვთა უფლებები; სკოლებში სერიოზული ინფრასტრუქტურული პრობლემებია; სკოლებს აქვთ საგანმანათლებლო რესურსების დეფიციტი; შშმ და სსსმ მოსწავლეთა მიმართ სტიგმა ჯერ კიდევ ძლიერია სკოლებში; სკოლებში არ არის დამკვიდრებული მშობელთა ორგანიზებული ჩართულობის კულტურა; სკოლებში არ ფუნქციონირებს არაფორმალური განათლების თემატური კლუბები; სკოლებთან მისასვლელი გზები არ არის უსაფრთხო. სრულად... წყარო: parents.ge

იმერეთი. ქალთა საინფორმაციო ცენტრი ისრაელის ელჩთან, ჰადას მეიცადთან ერთად ხაშურის მუნიციპალიტეტის სოფელ ჩორჩანას ესტუმრა. ჩორჩანა ე.წ. ადმინისტრაციულ სასაზღვრო ზოლთან მდებარე სოფელია. სტუმრებს ადგილობრივმა ქალებმა უმასპინძლეს. „დიპლომატსა და ქალებს შორის საინტერესო და გულახდილი საუბარი შედგა, რის შემდეგაც შეხვედრა არაფორმალურ გარემოში გაგრძელდა. ჩორჩანელმა ქალებმა ჰადას მეიცადი  ქართულ ტრადიციებს აზიარეს. მას შესაძლებლობა ჰქონდა გაცნობოდა ყოველდღიურ სასოფლო-სამეურნეო საქმიანობას, დაეგემოვნებინა ადგილობრივი პროდუქტი და მონაწილეობა მიეღო თონეში პურის ცხობის პროცესში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი მსობლებს და აღმზრდელებს გიზიარებთ გზამკვლევს ძალიან ცხელი ზაფხულისთვის. „ზაფხულის დადგომასთან ერთად სითბური დარტყმის საფრთხე მნიშვნელოვნად მატულობს. მიუხედავად იმისა, რომ მშობელმა შეიძლება თავი ნორმალურად იგრძნოს გარკვეულ ტემპერატურაზე, ეს სულაც არ ნიშნავს, რომ ბავშვიც იმავეს გრძნობს. პატარა ასაკში ადამიანს ჯერ კიდევ არ აქვს სრულად ჩამოყალიბებული თერმორეგულაცია. გაეცანით რჩევებს, თუ როგორ დავიცვათ ბავშვები სითბური დარტყმისგან: ზაფხულში ახალშობილები, ჩვილები და 3 წლამდე ბავშვები  გარეთ გავიყვანოთ მხოლოდ ადრე დილით და ნაშუადღევს. არ არის მიზანშეწონილი მცირეწლოვანი ბავშვების გარეთ გაყვანა დღის ყველაზე ცხელ პერიოდში, დილის 11-დან საღამოს 5 საათამდე. ბავშვს ჩავაცვათ ნატურალური მასალისგან (ბამბა, ტილო) დამზადებული, თავისუფალი სტილის ტანსაცმელი. თავზე კი კეპი ან ქუდი დავახუროთ. ყოველთვის თან იქონიეთ ბოთლით წყალი, რომელიც ხშირად შესთავაზებთ ბავშვს, სულ მცირე, ერთი-ორი ყლუპი მაინც რომ დალიოს. არასოდეს დატოვოთ ბავშვები მანქანაში ან სხვა ტიპის ტრანსპორტში სიცხეში - თუნდაც რამდენიმე წუთით!“ სრულად... https://uni.cf/475v1JK  წყარო: www.unicef.org 

თბილისი. ადამიანის უფლებათა ცენტრი (HRC) აქვეყნებს კვლევას: „არასრულწლოვანთა უფლებების დაცვასთან დაკავშირებული გამოწვევები“. ორგანიზაციის მიერ მომზადებული ანალიტიკური დოკუმენტი მიზნად ისახავს არასრულწლოვანთა უფლებებთან დაკავშირებით, ცენტრის საქმეების ანალიზის საფუძველზე გამოკვეთილი სისტემური პრობლემების და გამოწვევების შეჯამებას, საერთაშორისო სამართლის წყაროებთან შედარებას და შესაბამისი დასკვნებისა თუ რეკომენდაციების შემუშავებას. კვლევის ერთ-ერთი ძირითადი მიგნების თანახმად, „ქვეყანაში ბავშვის მიმართ ძალადობას მსხვილი მასშტაბები აქვს და უმეტესად ხორციელდება ისეთ წრეებში, სადაც ბავშვი თავს უსაფრთხოდ უნდა გრძნობდეს. ამდენად, ბავშვები ხშირად ხდებიან ფიზიკური, ფსიქოლოგიური და სექსუალური ძალადობის მსხვერპლნი ოჯახში, საზოგადოებაში და სკოლაში. ამ ყოველივეს თან ერთვის ქვეყანაში არსებული სოციალური და ეკონომიკური მდგომარეობა. შედეგად, არასრულწლოვნებს უვითარდებათ პოსტ-ტრავმული სტრესი და სხვა ფსიქოლოგიური პრობლემები, რასაც ხელისუფლება და საზოგადოება მოუმზადებელი ხვდება“. სრულად... წყარო: hrc.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. პარტნიორობა ადამიანის უფლებებისთვის (PHR) ინფორმაციით, შრომით მიგრაციაში არალეგალურად ყოფნის გამო, ხშირად ირღვევა ქალების შრომითი უფლებები. ამ ძალადობას ისინი ჩუმად იტანენ. „აქ ქალების ნაწილს, ვინც მოხუცებს უვლიან ან ოჯახებს უვლიან, სცემენ ფიზიკურად, უზღუდავენ თავისუფლებას. იმიტომ რომ დღეში,  24/7-ზე 6 დღის განმავლობაში გარეთ ვერ გადიან. მარტო, კვირას დილით 12 საათით შეუძლია გავიდეს, 8-ზე გავა და 8-ზე შემოვა. როცა ვეუბნები, რომ ეს არცერთ შრომის კოდექსში არ ჯდება, დღეში 2 საათი უნდა გაისეირნო. მპასუხობენ: არა, მერე მე გამომიშვებენ და სხვას შეიყვანენ და მე უხელფასოდ დავრჩებიო.“ PHR-ის გუნდი აქტიურად მუშაობს შრომით მიგრაციაში მყოფი ქალების უფლებების დაცვაზე. იურიდიული კონსულტაციისთვის დაუკავშირდით ორგანიზაციას ნომერზე: 0322331356 ან მისწერეთ Facebook გვერდზე. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ ლელა ჯობავას ბლოგპოსტს მეგრული და სვანური ენების შესახებ. „საქართველო, როგორც მთელი კავკასია, ენების ოდისეაა. აქაც ბევრმა სხვადასხვა კულტურამ ერთად მოიყარა თავი, საუკუნეების განმავლობაში სხვადასხვა იმპერიისა და მმართველობის ქვეშ. ეს გამოიხატება ყველა რეგიონში და კუთხეში ლინგვისტურ, კონფესიურ და ეთნიკურ სიჭრელეში, რაც საბოლოო ჯამში ფერად სოციალურ-კულტურულ მოზაიკას ქმნის, რომლის კარგად შესწავლა და კვლევა აუცილებელია. სადღეისოდ საქართველოს ეთნიკურ, ლინგვისტურ, რელიგიურ და კულტურულ მრავალფეროვნებაზე საუბარი და ყურადღების გამახვილება საჭიროა როგორც არასდროს. ბოლო წლებში, ქვეყანაში და სამეზობლოში მიმდინარე მოვლენებმა, ქვეყნის საგარეო და საშინაო პოლიტიკის მომატებულმა ჰომოგენურმა ხასიათმა, ეკლესიის თავისებურმა ჩარევამ პოლიტიკაში და ბევრმა სხვა ფაქტორმა, მემარჯვენე ჯგუფების მატება და გაძლიერება განაპირობა, რამაც მათი, არადომინანტური ჯგუფების მიმართ დამოკიდებულება გაამძაფრა და მეტად სტიგმატიზირებული გახადა. ასევე სტიგმატიზირებულია ქართველური ენები - მეგრული და სვანური, რომელთა არსებობის შესახებ ყველამ იცის, თუმცა მათი შენარჩუნების მნიშვნელობაზე დისკუსიები ჯერ არ გამხდარა აქტუალური“, ნათქვამია ნაშრომში. სრულად... წყარო: socialjustice.org.ge

აჭარა. „საერთაშორისო გამჭვირვალობა - საქართველოს“ სამოქალაქო საბჭოების ინიციატივით, ქობულეთის საკრებულოში „შინაური ცხოველების სტერილიზაცია-კასტრაციის მუნიციპალური პროგრამის“ დანერგვის მოთხოვნით, ელექტრონულ პეტიციაზე ხელმოწერების შეგროვება დაიწყო. „პეტიციის მიზანია ქობულეთში 2024 საბიუჯეტო წლიდან შეიქმნას შინაური ცხოველების სტერილიზაცია-კასტრაციის პროგრამა, რომლითაც მოქალაქეები პირველი ორი წელი უფასოდ ისარგებლებენ, 2025 წლიდან კი ამოქმედდეს მიუსაფარი ცხოველების თავშესაფარი. პეტიციაზე ელექტრონული ხელმოწერა შეგიძლიათ ბმულზე გადასვლით... სრულად... წყარო: ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრი გიზიარებთ პოსტერების კონკურსის გამარჯვებულ ნამუშევარს: მორჩილება ქალის სამკაული არ არის. პოსტერი მარიამ ხუჭუას ეკუთვნის. სრულად... წყარო: ორგანიზაციის გვერდი სოციალურ ქსელში

თბილისი. 28 ივლისი ჰეპატიტების მსოფლიო დღეა (WHD). ამ თარიღის მიზანია ამაღლდეს მოსახლეობის ცნობიერება და შემცირდეს ვირუსული ჰეპატიტების გლობალური ტვირთი. ასოციაცია „ქსენონი“ C ჰეპატიტის ელიმინაციის სახელმწიფო პროგრამის შესახებ საინფორმაციო პოსტს აქვეყნებს. ელიმინაციის პროგრამა ითვალისწინებს: დაავადების დიაგნოსტიკას, მკურნალობას, პრევენციას. „პროგრამაში ჩასართავად საჭირო დიაგნოსტიკური და შემდგომი კვლევები 100%-ით ფინანსდება. C ჰეპატიტით დაავადებულ ნებისმიერ საქართველოს მოქალაქეს, დამატებითი კრიტერიუმის გარეშე შეუძლია ისარგებლოს C ჰეპატიტის ელიმინაციის სახელმწიფო პროგრამით და ღვიძლის დაზიანების ხარისხის სიმძიმის მიუხედავად, მიიღოს C ჰეპატიტის სამკურნალო უახლესი თაობის მედიკამენტები უსასყიდლოდ. ვირუსული ჰეპატიტები არის პრევენცირებადი, მკურნალობას დაქვემდებარებული და C ჰეპატიტის შემთხვევაში, აბსოლუტურად განკურნებადი დაავადება“. სრულად... წყარო: ორგანიზაციის გვერდი სოციალურ ქსელში

თბილისი. ტოლერანტობისა და მრავალფეროვნების ინსტიტუტი (TDI) აქვეყნებს ყოველწლიურ ანგარიშს: რელიგიისა და რწმენის თავისუფლება საქართველოში 2022. „ანგარიშის მიზანია, საქართველოში რელიგიისა და რწმენის თავისუფლებასთან დაკავშირებული მდგომარეობის სამართლებრივი და პოლიტიკური ასპექტების მიმოხილვა და ანალიზი. ანგარიში მოიცავს 2022 წლის პერიოდს. გაანალიზებულია ის სისტემური პრობლემები, რომლებსაც არადომინანტური რელიგიური ორგანიზაციები უკვე მრავალი წელია აწყდებიან და ისინი საანგარიშო პერიოდშიც გადაუჭრელი რჩება. გარდა ამისა, მიმოხილულია ახალი სამართლებრივი და პოლიტიკური საკითხები, რომლებიც რელიგიისა და რწმენის თავისუფლებას უკავშირდება“. TDI-ის ანგარიში რელიგიისა და რწმენის თავისუფლება საქართველოში 2022... წყარო: tdi.ge

გურია. 20 ივლისს, ევროკავშირის მხარდაჭერით, „ცოდნისა და უნარების განვითარების ქსელებისა და პლატფორმების გაძლიერების (LINKS)“ პროექტის ფარგლებში, გურიაში სხვადასხვა სფეროს წარმომადგენელს შორის სამუშაო შეხვედრა გაიმართა.  შეხვედრის მიზანი იყო ადგილობრივ შრომის ბაზარზე არსებული ვითარების მიმოხილვა წარმოადგენდა. სრულად... წყარო: ორგანიზაციის გვერდი სოციალურ ქსელში