წინადადება საქართველოს განათლების, მეცნიერების, კულტურისა და სპორტის სამინისტროს
თბილისი. სახალხო დამცველმა ერთიანი ეროვნული გამოცდების ორგანიზების პროცესში რელიგიური საჭიროებების გათვალისწინებასთან დაკავშირებით საქართველოს განათლების, მეცნიერების, კულტურისა და სპორტის სამინისტროს წინადადებით მიმართა.
სახალხო დამცველის აპარატმა საკითხი რელიგიის თავისუფლებისა და თანასწორობის უფლების ჭრილში შეისწავლა და დაადგინა რომ ერთიანი ეროვნული გამოცდების მარეგულირებელი კანონმდებლობა რეგისტრაციის პროცესში აბიტურიენტებს არ აძლევს შესაძლებლობას საკუთარი რელიგიური საჭიროებების შესახებ განაცხადონ. ასევე, არ არსებობს გამოცდების ორგანიზების პროცესში აღნიშნული მხედველობაში მიღების მექანიზმიც. სახალხო დამცველის შეფასებით, აბიტურიენტები, რომლებიც საკუთარი რელიგიური მრწამსიდან გამომდინარე იძულებულები იყვნენ უარი ეთქვათ კონკრეტულ დღეს გამოცდაში მონაწილეობაზე, არათანაბარ მდგომარეობაში იყვნენ იმ აბიტურიენტებთან მიმართებით, რომელთა რელიგიაც განსხვავებული შეხედულების არის მსგავს საკითხებზე.
წყარო: ორგანიზაციის ვებგვერდი
