თბილისი. „მითების დეტექტორი“ აქვეყნებს მარიამ დანგაძის ბლოგპოსტს: ვინ არის ნათია ქოლუსი და რა კავშირი აქვს მას Cancel Cancel Mafia საქართველოსთან. ნაშრომიდან გაიგებთ თუ რა კონსპირაციულ თეორიებზე საუბრობს ქოლუსი, რა გზავნილებს, შეცდომაში შემყვან ვლოგპოსტებს ავრცელებს და რა კავშირი აქვს მას ჯგუფთან “Cancel Cancel Mafia საქართველო”, რომელიც ქოლუსის ინფორმაციით, ფეისბუქმა პოსტების ორგანიზებული დარეპორტებისთვის დაბლოკა და რომელიც ამ ეტაპზე, ნამდვილად აღარ ფუნქციონირებს. სრულად... წყარო: mythdetector.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, ორგანიზაციას Facebook-მა ოფიციალურად დაუდასტურა, რომ ალტ-ინფოს Facebook გვერდი „სამართლიანი არჩევნების“ შეტყობინების საფუძველზე წაიშალა. ISFED-მა Facebook-ს მიმართა და ალტ-ინფოს მიერ მის პლატფორმაზე გაკეთებული სიძულვილის ენის შემცველი განცხადებებისა და ძალადობრივი ჯგუფების მობილიზების შესახებ აცნობა. „Facebook-ის შესაბამისი განყოფილების გადაწყვეტილებით, ალტ-ინფომ Facebook-ის გამოყენების წესები და პოლიტიკა დაარღვია“. სრულად... წყარო: ორგანიზაციის გვერდი სოციალურ ქსელში

თბილისი. 16 ივლისს, ინფორმაციის თავისუფლების განვითარების ინსტიტუტმა (IDFI) ევროკავშირის მხარდაჭერით, Covid-19 პანდემიის განმავლობაში სახელმწიფო ხარჯებისა და ადამიანის უფლებების დაცვის მონიტორინგის საბოლოო შედეგების პრეზენტაცია გამართა. „პრეზენტაციის ფარგლებში განიხილეს Covid-19-თან დაკავშირებული საჯარო ფინანსების, საჯარო შესყიდვების, მთავრობის ანტიკრიზისული გეგმის შესრულების, StopCov ფონდის ხარჯვისა და დონორთა დახმარების განაწილების მონიტორინგის შედეგები. ასევე, განიხილეს პანდემიისას ადამიანის ძირითადი უფლებებისა და კანონის უზენაესობის დაცვის თვალსაზრისით გამოვლენილ ძირითად გამოწვევები“.                                             წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) და სოციალური სამართლიანობის ცენტრი აქვეყნებენ ერთობლივ კვლევას: „დამოუკიდებელი საგამოძიებო მექანიზმი საქართველოში - მიღწევები და არსებული გამოწვევები“. „კვლევაში ასახულია სახელმწიფო ინსპექტორის სამსახურის საგამოძიებო ფუნქციასთან დაკავშირებული ინსტიტუციური და სამართლებრივი ჩარჩოს ანალიზი, იდენტიფიცირებულია არსებული გამოწვევები და ხარვეზები, გამოვლენილია გამოძიების პროცესში არსებული დაბრკოლებები, ასევე, წარმოდგენილია კონკრეტული რეკომენდაციები, რომელთა გათვალისწინება ხელს შეუწყობს ინსპექტორის სამსახურის საქმიანობის გაუმჯობესებას“. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED) გამოიკვლია ღირსების მარშთან დაკავშირებული მთავარი მადისკრედიტირებელი გზავნილები Facebook-ზე 29 ივნისიდან 7 ივლისამდე პერიოდში. „გზავნილები შეგროვებულია იმ გვერდებიდან, რომლებიც Facebook-ზე როგორც მმართველი პარტიისა და მთავრობის, ასევე ოპოზიციური პარტიების პოლიტიკურ დისკრედიტაციას ეწევიან“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს კომუნიკაციების ეროვნული კომისიის ბიუჯეტის ანალიზის შესახებ. „კომისიის ბიუჯეტის ანალიზის შედეგად, ჩანს რომ კომისიის შემოსავლები და შესაბამისად ბიუჯეტი ყოველწლიურად იზრდება. ხარჯვით ნაწილში კი კომისია სრულად ვერ ითვისებს თანხებს. მიუხედავად ამისა, შემოსავლის ის ნაწილი, რომელიც სახელმწიფო ბიუჯეტში მიემართებოდა, კომისიამ საკუთარ ბიუჯეტში მიმართა. გაუმჭვირვალეა ინფორმაცია კომისიაში დასაქმებული თანამშრომლების რაოდენობის შესახებ. შესაბამისად, გაურკვეველი რჩება სახელფასო ხარჯის ზრდა უკავშირდება თუ არა თანამშრომელთა რაოდენობის ზრდას. ამასთან, კომისია პერსონალური მონაცემების დაცვის მოტივით არ ასაჯაროებს საშტატო ნუსხას“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) 2020 წლის საპარლამენტო არჩევნების სადამკვირვებლო მისიის წინასაარჩევნო გარემოს, არჩევნების დღისა და არჩევნების შემდგომი პერიოდის მონიტორინგის ანგარიშს აქვეყნებს. ორგანიზაციამ მიგნებებზე დაყრდნობით, შეიმუშავა რეკომენდაციები, რომელთა ნაწილი 2021 წლის საარჩევნო რეფორმის ფარგლებში დამტკიცდა. თუმცა, საიას შეფასებით კვლავ რჩება საკითხები, რომელთა გათვალისწინებაც, ეფექტურ აღსრულებასთან ერთად, კრიტიკულად მნიშვნელოვანია საარჩევნო პროცესების გასაუმჯობესებლად. სრულად... წყარო: gyla.ge

სამცხე-ჯავახეთი. საერთაშორისო გამჭვირვალობა - საქართველოს ინფორმაციით, ნინოწმინდის ცენტრალურ პარკში მიწები ხელისუფლებასთან კავშირში მყოფმა პირებმა საკუთრებაში გაიფორმეს  „ნინოწმინდის ცენტრში არსებული პარკი, რომელიც საჯარო სივრცეს წარმოადგენდა, ნაბიჯ-ნაბიჯ კერძო საკუთრებად დარეგისტრირდა. საგულისხმოა, რომ 2,840 კვ.მ. მიწის მფლობელები გახდნენ ადგილობრივი თვითმმართველობის მოქმედი და ყოფილი მაღალჩინოსნები, ასევე, მათი ოჯახის წევრები, მათთან დაახლოებული პირები და იმ კომპანიების წარმომადგენლები, რომლებთანაც პირდაპირ შესყიდვებს, მრავალი წლის განმავლობაში, მხოლოდ ნინოწმინდის მერია და მისი იურიდიული პირები აფორმებენ“.  ორგანიზაცია მოუწოდებს საქართველოს მთავარ პროკურატურას და სახელმწიფო უსაფრთხოების ანტიკორუფციულ დეპარტამენტს, შეისწავლოს ნინოწმინდის პარკში პრივატიზებული მიწების საკითხი და დარღვევების დაფიქსირების შემთხვევაში იმოქმედოს კანონის შესაბამისად. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას „ფარული მეთვალყურეობა საქართველოში - 2018-2020 წლების პრაქტიკა“. „სერიოზულ გამოწვევად რჩება ფარული ჩანაწერების გავრცელებისა და უკანონო მოსმენის ფაქტები, ასევე დამნაშავეთა დაუსჯელობა. უკანონო ფარული მეთვალყურეობისა და პირად ცხოვრებასთან დაკავშირებული ინფორმაციით შანტაჟის ყველა შემთხვევა დროულ და ეფექტიან რეაგირებას მოითხოვს. უნდა აღინიშნოს ისიც, რომ საქართველოში ფარული მეთვალყურეობის მარეგულირებელი საკანონმდებლო და ინსტიტუციური ჩარჩო არაერთხელ გამხდარა კრიტიკის საგანი, რადგან ის ვერ უზრუნველყოფს პირადი ცხოვრების ხელშეუხებლობის დაცვის მყარ გარანტიებს“. სრულად... წყარო: idfi.ge

თბილისი. მითების დეტექტორის ლაბორატორიის სტუდენტმა, თამარ გიორგობიანმა გადაამოწმა თუ რას წერს ავსტრიული გამოცემა თბილისი პრაიდის მოვლენებზე და როგორ გავრცელდა Zeit im Bild-ის პუბლიკაციის გაყალბებული თარგმანი ქართულ სოციალურ ქსელში. „ტელეკომპანია ახალის“ ფეისბუქ გვერდზე გამოქვეყნებული პოსტი „ავსტრიული მედია ქართულ ჯოჯოხეთზე - ავსტრიელები ითხოვენ, რომ ევროკავშირმა საქართველოს დაფინანსება შეუჩეროს” სიმართლეს არ შეესაბამება. სინამდვილეში ავსტრიული გამოცემა Zeit im Bild (ZIB) 5 ივლისს განვითარებულ ძალადობრივ მოვლენებს აღწერს და აღნიშნავს, რომ „საქართველოში ჰომოფობია ფართოდაა გავრცელებული“. ZIB-ის პოსტში არც ფეისბუქზე და არც ინსტაგრამზე ევროკავშირი მიერ საქართველოსთვის დაფინანსების შეწყვეტის მოთხოვნაზე არაფერია აღნიშნული. ფეისბუქ პოსტის ქვეშ დაწერილი 738 კომენტარიდან მხოლოდ ერთ-ერთი მომხმარებელი წერს ევროკავშირის მიერ საქართველოსთვის დახმარების შეჩერების მოთხოვნაზე. სრულად... წყარო: mythdetector.ge

თბილისი. 1 ივნისიდან 3 ივლისის ჩათვლით, მითების დეტექტორი ტრადიციულ და სოციალურ მედიას აკვირდებოდა და ის ძირითადი გზავნილები და აქტორები გამოავლინა, რომლებიც პრაიდის საწინააღმდეგო კამპანიაში იყვნენ ჩართულნი. ანგარიშის თანახმად, ისინი მედიაში სიძულვილის ენის შემცველ გზავნილებს ავრცელებდნენ და პრაიდის საწინააღმდეგო აქციაზე მოქალაქეების შეკრებას ხელმძღვანელობდნენ. „ყველაზე მეტი კომენტარი ანტიდასავლური შინაარსის იყო (62), რა დროსაც, ერთი მხრივ, ჰომოსექსუალობა დასავლეთის მიერ თავსხმოხვეულად იყო წარმოჩენილი, მეორე მხრივ, ხდებოდა ინდივიდუალური თავდასხმები და მუქარები ევროპარლამენტარებსა და დიპლომატიურ კორპუსზე, მათ შორის ამერიკის ელჩზე, რომლის განცხადებები ადამიანის ფუნდამენტური უფლებების დაცვაზე ქვეყნის საშინაო საქმეებში ჩარევად იყო წარმოჩენილი“. სრულად... წყარო: mythdetector.ge

თბილისი. 5 ივლისიდან ევროკავშირისა (EU) და გაეროს განვითარების პროგრამის (UNDP) ხელშეწყობით, 2021 წლის ადგილობრივი არჩევნების მედიაში გაშუქების მონიტორინგი დაიწყო. მედიამონიტორინგი მოიცავს 54 ეროვნულ და რეგიონულ მედია-საშუალებას და სრული საარჩევნო ციკლის მანძილზე გაგრძელდება. ასევე, გავრცელდება არჩვენების შემდგომ პერიოდზეც (2021 წლის ივლისიდან 2022 წლის მარტამდე). მონიტორინგს ახორციელებენ ორგანიზაციები: საქართველოს ჟურნალისტური ეთიკის ქარტია, ინტერნიუს საქართველო და CRRC-საქართველო. სრულად... წყარო: www.ge.undp.org

თბილისი. საერთაშორისო გამჭვირვალობა - საქართველოს ინფორმაციით, ბოლო წლების განმავლობაში კომისიონერად შერჩევისა და არჩევის პროცესში ორი საგანგაშო ტენდენცია იკვეთება: დაბალი კონკურსი და მმართველი ძალის მიერ კომისიონერებად მოქმედი თანამშრომლების თუ კომისიონერების არჩევა. „არსებული პრაქტიკა უფრო კონკურსის იმიტაციის შთაბეჭდილებას ტოვებს, რაც შედეგად აკნინებს კომისიის უდაოდ მაღალ როლს და მნიშვნელობას არსებულ პოლიტიზებულ გარემოში, ზრდის მმართველი ხელისუფლების ზეგავლენას უწყებაზე და მოტივაციას უკარგავს პროფესიონალ, დამოუკიდებელ კადრებს მონაწილეობა მიიღონ შერჩევის პროცესში.  ხუთწევრიანი კომისიის ოთხი წევრიდან ორი მოქმედი კომისიონერი და ორიც თანამშრომელია. დღეისათვის პარლამენტში მეხუთე წევრად ასარჩევად წარდგენილი სამი კანდიდატიდანაც ერთი კომისიის მოქმედი და ერთიც ყოფილი თანამშრომელია“. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ინფორმაციით, 28 ივნისს პარლამენტმა მესამე მოსმენით მიიღო საარჩევნო კოდექსში ცვლილებები, რომელთა მიზანიც საარჩევნო კანონმდებლობის გაუმჯობესება იყო. სამუშაო პროცესი რამდენიმე თვეს გაგრძელდა და დოკუმენტის საბოლოო ვერსიაში, ასევე, აისახა პოლიტიკურ პარტიებს შორის გაფორმებული შეთანხმებით (ე.წ. „შარლ მიშელის დოკუმენტი“) გათვალისწინებული დებულებებიც. ორგანიზაცია მთლიანობაში დადებითად აფასებს განხორციელებულ ცვლილებებს, თუმცა, ასევე, არის რამდენიმე საკითხი, რომელსაც პრობლემურად მიიჩნევენ. სრულად... წყარო: transparency.ge

თბილისი. საქართველოს ეს-ო-ეს ბავშვთა სოფელი (SOS Children’s Village Georgia) ოფიციალური განცხადებით ეხმაურება მასმედიის საშუალებით გაჟღერებულ ინფორმაციას ორგანიზაციის მცირე საოჯახო სახლის მომსახურებაში წარსულში მომხდარ ორ სავარუდო ძალადობის ფაქტს. „ორგანიზაცია დიდ წუხილს გამოთქვამს იმის გამო, რომ ჩვენი ყოფილი ორი ბენეფიციარისთვის ტრავმული აღმოჩნდა მცირე საოჯახო სახლში ცხოვრება და ჩვენთვის, ძალიან მძიმე იყო მათი ისტორიების მოსმენა. ასოციაცია გამოხატავს მაქსიმალურ მზაობასა და ღიაობას, კანონის ფარგლებში ხელი შეუწყოს ნებისმიერი სახის გამოძიების პროცესს; მეტიც, ორგანიზაციის დადგენილი პრაქტიკით უზრუნველყოს, როგორც ძალადობის სავარაუდო მსხვერპლი, ისე ყოფილი აღსაზრდელების ფსიქო-ემოციური და სამართლებრივი მხარდაჭერა. ყველა გამოვლენილი ფაქტი, მიუხედავად შემთხვევის ხანდაზმულობისა, ყოველთვის ქმნის იმის წინაპირობას, რომ გადაისინჯოს ორგანიზაციაში არსებული მონიტორინგის მოქმედი სისტემები, რათა უზრუნველყოფილ იქნას თითოეული აღსაზრდელის უსაფრთხო და დაცულ გარემოში აღზრდა-განვითარება“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. სახელმწიფო ინსპექტორის სამსახურთან თანამშრომლობით „ინფორმაციის თავისუფლების განვითარების ინსტიტუტმა” (IDFI) და „სოციალური სამართლიანობის ცენტრმა” მედიის წარმომადგენლებთან სამუშაო შეხვედრა გამართეს. „IDFI-სა და სოციალური სამართლიანობის ცენტრის წარმომადგენლებმა შეხვედრის მონაწილეებს გააცნეს კვლევის „დამოუკიდებელი საგამოძიებო მექანიზმი საქართველოში - მიღწევები და არსებული გამოწვევები“ ძირითადი მიგნებები, რომლის საჯარო პრეზენტაცია 2021 წლის 12 ივლისს იგეგმება. IDFI-ს და სოციალური სამართლიანობის ცენტრის ეს ერთობლივი კვლევა პირველი დოკუმენტია, რომელიც სრულყოფილად მიმოიხილავს დამოუკიდებელი საგამოძიებო მექანიზმის საქმიანობას და ყურადღებას ამახვილებს სამსახურის ინსტიტუციური გაძლიერებისა და დამოუკიდებლობის ხარისხის გაზრდის მიზნით გასატარებელ ღონისძიებებზე“. სრულად... წყარო: idfi.ge

სამცხე-ჯავახეთი. 2018 წლის შემდეგ, სახალხო დამცველი ნინო ლომჯარია პირველად ესტუმრა ნინოწმინდის ბავშვთა პანსიონს. „მაქვს მოლოდინი, რომ მოგვეცემა შესაძლებლობა სრულყოფილად გავეცნოთ მიმდინარე პროცესებს და ინფრასტრუქტურულ მდგომარეობას. ჩამოვედი აპარატის რამდენიმე თანამშრომელთან ერთად, რომლებიც ბავშვთა უფლებების მიმართულებით მუშაობენ, ასევე გვახლავს ბავშვთა ფსიქოლოგი და თუ ბავშვებს ჩვენთან საუბრის სურვილი ექნებათ, გავესაუბრებით.  პირველ რიგში, შეხვედრა გვექნება პანსიონის ხელმძღვანელობასთან, მეუფე იაკობთან და შემდეგ ვაპირებთ, რომ ვნახოთ, რა პროცესები მიმდინარეობს ბავშვების საჭიროებების შეფასებებთან დაკავშირებით და რას აკეთებენ სოციალური მუშაკები“, აცხადებს ომბუდსმენი მედიასთან საუბრისას. სრულად... წყარო: ომბუდსმენის გვერდი სოციალურ ქსელში

თბილისი. ქალთა საინფორმაციო ცენტრი აქვეყნებს 2021 წლის CEDAW კომიტეტისთვის მომზადებულ ქალთა მიმართ დისკრიმინაციის ყველა ფორმის აღმოფხვრის შესახებ კონვენციის შესრულების ალტერნატიულ ანგარიშს. „ანგარიშის საწყისი პროექტი მომზადდა არასამთავრობო ორგანიზაცია ქალთა საინფორმაციო ცენტრის მიერ, ხოლო ანგარიშის საბოლოო შემუშავების პროცესში ჩართული იყო 29 სამოქალაქო საზოგადოების ორგანიზაცია, რომლებიც მუშაობენ გენდერულ თანასწორობასა და ქალთა უფლებების საკითხებზე საქართველოში. ანგარიში შემუშავდა გაეროს ქალთა ორგანიზაციისა და ნორვეგიის მთავრობის ტექნიკური და ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „მბრუნავი კარის” შემთხვევა სენაკის მუნიციპალიტეტში. „„მბრუნავი კარი” საჯარო და კერძო სექტორებს შორის ინტერესთა კონფლიქტისა და კორუფციის რისკების შემცველი სამსახურეობრივი გადაადგილებაა, რომელსაც პერიოდულად იკვლევს ორგანიზაცია. ამჯერად მსგავსი ფაქტი სენაკის მუნიციპალიტეტში გამოიკვეთა მერიის ადმინისტრაციული სამსახურის უფროსთან, ნანა ზარანდიასთან მიმართებაში. მოვუწოდებთ სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს ნანა ზარანდიას ჩართულობით სს “არქეოპოლისის” სენაკის მუნიციპალიტეტის ტენდერებში მონაწილეობის პროცესი და დაადგინოს, შეიცავს თუ არა იგი კორუფციის შესაძლო ნიშნებს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: წარმომადგენლობითი და სამივლინებო ხარჯები საჯარო სამართლის იურიდიულ პირებში. „კვლევამ აჩვენა, რომ 2020 წელს სსიპ-ების და სხვა დამოუკიდებელი უწყებების წარმომადგენლობითი და სამივლინებო ხარჯები მნივშენლოვნად შემცირდა, რაც მეტწილად უკავშირდება პანდემიის შედეგად შექმნილ მდგომარეობას და მსოფლიო მასშტაბით გადაადგილებაზე დაწესებულ შეზღუდვებს. ასევე, აღსანიშნავია, რომ ცალკეულ შემთხვევებში, უწყებების მიერ გაწეული სარესტორნო ხარჯები დაფიქსირდა ისეთ პერიოდებში, როდესაც უკვე მოქმედებდა გარკვეული შეზღუდვები საკვებ ობიექტებსა და თავშეყრის ადგილებზე. საყურადღებოა ის უწყებებიც, რომლებიც არ პასუხობენ ან არასრულად პასუხობენ წარმომადგენლობითი და სამივლინებო ხარჯების შესახებ საჯარო ინფორმაციის მოთხოვნას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრის ინფორმაციით, 25 ივნისს პრემიერ-მინისტრი საქართველოს პარლამენტში სამთავრობო პროგრამის შესრულების შესახებ ანგარიშით წარდგება. „ჩვენი შეფასებით, ანგარიშში მოცემული ინფორმაცია სრულად არ მოიცავს ქვეყანაში არსებულ ყველა პრობლემას, ყურადღების მიღმა ტოვებს მნიშვნელოვან საზოგადოებრივ წუხილებს და ინტერესებს. ბევრი მიმართულებით, რაზეც ანგარიშში პოზიტიურად არის მსჯელობა, რეალური, სოციალურ საჭიროებებზე ორიენტირებული და ადამიანის უფლებებზე დაფუძნებული ქმედებები მთავრობის მიერ ამ დრომდე არ გადადგმულა. მნიშვნელოვან პრობლემად რჩება ქვეყანაში სოციალური და თანასწორობის საკითხები, კვლავაც კრიტიკულია მართლმსაჯულების და მართლწესრიგის, საზოგადოებრივი უსაფრთხოების კუთხით არსებული პრობლემები. სახელმწიფომ ამ დრომდე ვერ შეძლო ჯეროვანი, ყოვლისმომცველი რეფორმების ინიცირება და კვლავაც ფრაგმენტული, კანონმდებლობაში ფორმალური ცვლილებებით შემოიფარგლება“. სრულად... წყარო: socialjustice.org.ge

საზოგადოებრივი ორგანიზაციების საარსებო გარემოს მონიტორინგის ინსტრუმენტის – სსო მეტრის გაფართოვება იგეგმება. ინსტრუმენტის შემუშავებაში აღმოსავლეთ ევროპის 800–ზე მეტი ორგანიზაცია მონაწილეობდა.  შეგახსენებთ, რომ საერთაშორისო სტანდარტებზე დაფუძნებული ეს ინსტრუმენტი მოიცავს 10 სხვადასხვა სფეროს და ინდიკატორს, რომლითაც იზომება სსო–ების საარსებო გარემო - როგორც საკანონმდებლო, ასევე პრაქტიკული კუთხით. სსო მეტრი დაყოფილია 2 ძირითად ნაწილად: 1. ფუნდამენტური უფლებები და თავისუფლებები, რომელიც არის სამოქალაქო საზოგადოების არსებობის საფუძველი. 2. აუცილებელი პირობები, რომლებიც უზრუნველყოფს დამატებით მხარდაჭერას და მნიშვნელოვანია სამოქალაქო საზოგადოების განავითარებისთვის. ინსტრუმენტის საფუძველზე მომზადებულია რეგიონული ანგარიშები, მათ შორის საქართველოს შესახებ. საქართველოში კვლევას სამოქალაქო საზოგადოების ინსტიტუტი (CSI) არასამეწარმეო სამართლის ევროპული ცენტრთან (ECNL) თანამშრომლობით აწარმოებს.  უახლოეს მომავალში, როგორც ზემოთ აღვნიშნეთ იგეგმება ინსტრუმენტის დახვეწა. კერძოდ ECNL, სამოქალაქო საზოგადოების ინსტიტუტთან და სხვა პარტნიორებთან ერთად გეგმავს ინსტრუმენტს ქულების შეფასების სისტემა დაუმატოს. რაც დაინტერსებულ პირებსა და მხარეებს საშუალებას მისცეს შეადაროს კვლევის შედეგები წლების, სფეროების, ქვეყნების მიხედვით.  გარდა ამისა, მომდევნო წლებში გაფართოვდება ინსტრუმენტის საკვლევი არეალი – მაგალითად, სამოქალაქო ჯგუფებზე ციფრული ტექნოლოგიების ან ხელოვნური ინტელექტის საშუალებით გავლენის შეფასება. ასევე იგეგმება სსო მეტრის, როგორც მონიტორინგის საშუალების, მომხმარებლების – სსო–ებისა და აქტივისტების წრის გაფართოება სამიზნე ქვეყნებში.  ახალი ინიციატივები და ცვლილებები განხორციელდება პროექტის – „სსო მეტრი: ხელსაყრელი გარემოს და ძლიერი საზოგადოებრივი ორგანიზაციების მეგზურის“ ფარგლებში. მას არაკომერციული სამართლის ევროპული ცენტრი (ECNL), ევროკავშირის ფინანსური მხარდაჭერით, პარტნიორ ორიგანიზაციებთან: საერთაშორისო გამჭვირვალობა – სომხეთი (TIAC); შპს MG ქონსალთინგი (აზერბაიჯანი), სამოქალაქო საზოგადოების ინსტიტუტი (საქართველო), პრომო-ლექს ასოციაცია (მოლდოვა), უკრაინის დამოუკიდებელი პოლიტიკური კვლევების ცენტრი (უკრაინა) – ერთად ახორციელებს.