თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: საქართველოში პოლიტიკური პოლარიზაციის ხელშემწყობი რუსული საინფორმაციო ოპერაცია Facebook-ზე და მასში ჩართული არაავთენტური ანგარიშები. „2020 წლის 30 აპრილს „ფეისბუქმა“ საკუთარი პლატფორმიდან წაშალა კრემლის პროპაგანდისტული საინფორმაციო სააგენტო „ნიუს-ფრონტის“ „ფეისბუქ“ გვერდები ქართულ და სხვა ენებზე, რომელთაც გამოცემა სხვადასხვა ქვეყნებში იყენებდა. სამართლიანი არჩევნებისა და დემოკრატიის საერთაშორისო საზოგადოება სოციალური მედიის მონიტორინგის ფარგლებში „ნიუს-ფრონტ ჯორჯიას“ და მასთან დაკავშირებულ ანგარიშებს „ფეისბუქზე“ 2019 წლის ნოემბრიდან აკვირდებოდა. „ნიუს-ფრონტი“ საქართველოში მოქმედი კრემლისტური საინფორმაციო საგენტოა, რომელიც აქტიურად იყენებდა „ფეისბუქს“ პრო-რუსული და ანტიდასავლური საინფორმაციო კამპანიის საწარმოებლად“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: კონკურენციის სააგენტოს საქმიანობა 2014-2019 წლებში: უფლებამოსილებები და განხილული საქმეები. „2014 წელს საქართველოს კონკურენციის სააგენტო დამოუკიდებელ ორგანოდ ჩამოყალიბდა. სააგენტოს მთავარი მიზანი ქვეყანაში სამართლიანი და თავისუფალი კონკურენტული გარემოს უზრუნველყოფაა. „კონკურენციის სააგენტომ საზოგადოების ყურადღება ძირითადად სამი ბაზრის მონიტორინგის მოკვლევის გარშემო მიიქცია. ერთ-ერთი არის 2018 წელს პურის გაძვირების მიზეზების დადგენა, რომელიც პრემიერ მინისტრმა დაავალა სააგენტოს. მონიტორინგის დაწყებიდან ერთი წელზე მეტი გავიდა და ჯერ სააგენტოს არ დაუდგენია, რამ გამოიწვია ფასის ზრდა და პურის მიმწოდებელი საწარმოებისგან ჰქონდა თუ არა ადგილი სავარაუდო კანონსაწინააღმდეგო ქმედებებს. მეორე გახმაურებული საქმე საავტომობილო საწვავის ბაზრის მოკვლევა იყო. მესამე საქმეში კონკურენციის სააგენტოს მხრიდან უცნაურ ქმედებას ჰქონდა ადგილი“. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ინფორმაციით, ბიუჯეტის გამჭვირვალობის მხრივ საქართველო მსოფლიოში კვლავ მეხუთე ადგილზეა. „2019 წლის „ღია ბიუჯეტის ინდექსში“ საქართველომ 100 შესაძლებელი ქულიდან 81 ქულა მიიღო, რაც 2017 წელთან შედარებით, უმნიშვნელო - ერთპუნქტიანი გაუარესებაა. აღნიშნული ცვლილება ძირითადად „საერთაშორისო საბიუჯეტო პარტნიორობის“ მხრიდან რამდენიმე საკითხის შეფასების მეთოდოლოგიის ცვლილებამ გამოიწვია. ამ მაჩვენებლით 117 ქვეყნის მსოფლიო რეიტინგში საქართველო, წინა კვლევის მსგავსად, კვლავ მე-5 ადგილზე დარჩა, რაც მნიშვნელოვანი მიღწევაა და მას მხოლოდ ახალი ზელანდია, სამხრეთ აფრიკა, შვედეთი და მექსიკა უსწრებენ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ომბუდსმენის რეკომენდაციას, რომელიც მან საზოგადოებრივი მაუწყებლის აჭარის ტელევიზიისა და რადიოდან გათავისუფლებული შორენა ღლონტის, მაია მერკვილაძისა და თეონა ბაკურიძის საქმეებზე გამოსცა. „მნიშვნელოვანია აღინიშნოს, რომ სახალხო დამცველი მის ვრცელ რეკომენდაციაში არსებითად იზიარებს იმ სამართლებრივ დასაბუთებას და არგუმენტაციას, რომელიც სამივე საქმეზე სასამართლოში უკვე გაგზავნილ სარჩელებში წარმოდგენილია EMC-ს მიერ. EMC რეკომენდაციის ტექსტს სასამართლოს მალევე გაუზიარებს და ვიმედოვნებთ, რომ სახალხო დამცველის შეფასებები კიდევ უფრო მეტად გააძლიერებს შორენა ღლონტის, მაია მერკვილაძისა და თეონა ბაკურიძის სამართლებრივი ინტერესების და უფლებების დაცვის პროცესს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) მთავრობის ანტიკრიზისული გეგმის შეფასებას აქვეყნებს და მთავრობას სოციალური მხარდაჭერის უფრო სრულყოფილი, მოქნილი და საყოველთაო პოლიტიკისკენ მოუწოდებს. „უკიდურესად მნიშვნელოვანია, რომ ანტიკრიზისული გეგმის იმპლემენტაცია მაქსიმალურად სწრაფად დაიწყოს და დახმარების მისაღებად საჭირო პროცედურების შესახებ საზოგადოების, მათ შორის განსაკუთრებით ეთნიკური უმცირესობების, სათანადო ინფორმირება მოხდეს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „ინფორმაციის თავისუფლების განვითარების ინსტიტუტმა“ (IDFI), საქართველოს ღია მმართველობის უწყებათაშორისი საკოორდინაციო საბჭოს სამდივნოს, სამოქალაქო საზოგადოების სხვა წარმომადგენლებთან ერთად, წარუდგინა ვალდებულებები, რომლებიც განსახილველად გაეგზავნათ საბჭოში შემავალ სახელმწიფო უწყებებს. „ორგანიზაციის მიერ წარმოდგენილი ვალდებულებები დაფუძნებულია საუკეთესო საერთაშორისო პრაქტიკაზე, მათ შორის OGP-ის წევრი სახელმწიფოების მიერ აღებულ ვალდებულებებზე და მიზნად ისახავს საქართველოში მოქალაქეთა ჩართულობისა და კანონის უზენაესობის გაძლიერებას, მონაცემებზე წვდომის და ინფორმაციის თავისუფლების გაზრდას, კორუფციასთან ბრძოლას და სახელმწიფო უწყებების მეტი გამჭვირვალობის ხელშეწყობას“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს შეფასებას საგანგებო მდგომარეობასთან დაკავშირებით მიღებულ საკანონმდებლო ცვლილებებზე. „უპირველეს ყოვლისა, უნდა აღინიშნოს, რომ კანონპროექტთან დაკავშირებით ინფორმაცია 2020 წლის 17 მარტს გავრცელდა და ამავე დღეს დარეგისტრირდა პარლამენტში, თუმცა ის არ იყო საჯაროდ ხელმისაწვდომი 2020 წლის 13 აპრილამდე, სანამ პარლამენტის ბიურომ არ გადასცა განსახილველად შესაბამის კომიტეტს. ამ პერიოდში არ იყო უზრუნველყოფილი კანონპროექტის გაცნობა დაინტერესებული პირებისათვის და მასთან დაკავშირებით შესაბამისი შენიშვნების წარმოდგენის შესაძლებლობა. ასევე აღსანიშნავია ისიც, რომ კანონპროექტი განიხილა მხოლოდ იურიდიულ საკითხთა კომიტეტმა და მის განხილვაში მონაწილეობა არ მიუღია ადამიანის უფლებათა დაცვისა და სამოქალაქო ინტეგრაციის კომიტეტს, რომლის მონაწილეობა ამ პროცესში მნიშვნელოვანი იყო. შესაბამისად, საკანონმდებლო პროცესი წარიმართა დახურულად და არ ყოფილა მასში რაიმე ფორმით მონაწილეობის შესაძლებლობა“, ნათქვამია ორგანიზაციის შეფასებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება „სახელმწიფო უსაფრთხოების სამსახურის“ ყოველწლიურ ანგარიშს. „ორგანიზაცია პრობლემურად მიიჩნევს დოკუმენტში მოყვანილ არაერთ მსჯელობას, რომელიც ხელს უწყობს კონკრეტული ჯგუფების მარგინალიზებას, აძლიერებს უსაფრთხოების და კონტროლის რიტორიკას არამხოლოდ ოკუპირებულ ტერიტორიებთან დაკავშირებით, არამედ ქვეყანაში არსებული ე.წ. ჰიბრიდულ საფრთხეებთან გასამკლავებლადაც. ამავდროულად, ანგარიში მხოლოდ ზედაპირულ და პოპულისტურ ინფორმაციას შეიცავს ოკუპაციის, კონტრტერორიზმის და სხვა სენსიტიურ საკითხებზე, რაც ფაქტობრივად შეუძლებელს ხდის როგორც პარლამენტის, ასევე საზოგადოების მიერ, უწყების საქმიანობის ეფექტიან ზედამხედველობასა და მონიტორინგს“, ნათვქამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: კორუფციის რისკები ქობულეთის მუნიციპალიტეტის უკონკურენტო შესყიდვებში.  „„ჯორჯიან სტოუნი”, რომლის დირექტორი ქობულეთის მუნიციპალიტეტის არქიტექტურის სამსახურის ყოფილი უფროსი, ბადრი რომანაძეა, ამავე მუნიციპალიტეტის მიერ გამოცხადებული ინფრასტრუქტურული სამუშაოების ერთ-ერთი მთავარი მიმწოდებელია. 2019 წელს სწორედ ამ კომპანიამ შეასრულა ქობულეთის სანაპირო ზოლის ზღვისპირა პარკის 2,770,077 ლარის ღირებულების პირველი ეტაპის სამუშაოებიც. სახელმწიფო შესყიდვების სააგენტოს ინფორმაციის ანალიზი აჩვენებს, რომ ქობულეთის მერია სატენდერო პირობებს სავარაუდოდ არგებს „ჯორჯიან სტოუნის” ინტერესებს, რაც ანტიკორუფციული სამსახურის მოკვლევის საგანი უნდა გახდეს. საყურადღებოა, რომ კომპანიამ სსიპ „ბათუმის ბულვარის” შესყიდვებში ასევე კონკურენტი კომპანიების დისკვალიფიკაციის ხარჯზე გაიმარჯვა“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. კორონა ვირუსით განპირობებული გლობალური გამოწვევების საპასუხოდ „ინფორმაციის თავისუფლების განვითარების ინსტიტუტმა“ (IDFI) შეიმუშავა რეკომენდაციები პანდემიის პირობებში პროაქტიულად გამოსაქვეყნებელი საჯაროინფორმაციისა და სახელმწიფო შესყიდვების განხორციელების შესახებ. „შექმნილი კრიზისული მდგომარეობის ფონზე კიდევ უფრო თვალსაჩინოა საჯარო ინფორმაციის პროაქტიული გამოქვეყნების მნიშვნელობა. რაც უფრო ღია და გამჭვირვალე მიდგომა ექნება ხელისუფლებას ინფორმაციის გამოქვეყნების თვალსაზრისით, მით მეტად ინფორმირებულ გადაწყვეტილებებს მიიღებენ მოქალაქეები. ასევე, გაიზრდება ნდობა კრიზისული ვითარებაში მიღებული გადაწყვეტილებების მიმართ. გარდა ამისა, მკვლევარებს, დარგის სპეციალისტებს, სამოქალაქო საზოგადოების წარმომადგენლებსა და ჟურნალისტებს გაუმარტივდებათ მნიშვნელოვან ინფორმაციაზე წვდომა“. სრულად... წყარო: idfi.ge

აჭარა. საერთაშორისო გამჭვირვალობა - საქართველოს ინფორმაციის თანახმად, ქალაქ ბათუმის მუნიციპალიტეტის საკრებულოს, მერიისა და მუნიციპალური ორგანიზაციების 10 თანამდებობის პირის ქონებრივი დეკლარაცია არასრულადაა შევსებული. სრულად... წყარო: transparency.ge

თბილისი. საერთაშორისო გამჭვირვალობა - საქართველო თვლის, რომ ზუგდიდის მუნიციპალიტეტმა შპს “ზუგდიდაგროსერვისი” არ უნდა დააფინანსოს. „ზუგდიდის მუნიციპალიტეტის შპს “ზუგდიდაგროსერვისი” მთლიანად ადგილობრივი ბიუჯეტიდან ფინანსდება, თუმცა მას არავითარი სარგებელი არ მოაქვს. 2018-2019 წლებში შპს “ზუგდიდიაგროსერვისმა” ადგილობრივი ბიუჯეტიდან 460,000 ლარი მიიღო, 2020 წელს კი მისი ბიუჯეტი 350 000 ლარს შეადგენს და ზუგდიდში არსებულ სამ მუნიციპალურ შპს-ს შორის ერთადერთია, რომელსაც არც გასულ წლებში მიუღია საკუთარი შემოსავალი და არც წელს აქვს განსაზღვრული, თუ რა კონკრეტული შემოსავალი შეიძლება მიიღოს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „საერთაშორისო გამჭვირვალობა-საქართველოს” ანგარიში „საპარლამენტო კონტროლი საქართველოში“ მოიცავს ახალი რეგლამენტით გათვალისწინებული საპარლამენტო კონტროლის მექანიზმების მოქმედებას 2019 წლის საგაზაფხულო სესიის პერიოდში. „პარლამენტის მიერ საზედამხედველო ფუნქციის შესრულების ანალიზი აჩვენებს, რომ საკანონმდებლო ნორმების გაუმჯობესება დადებითად აისახა საპარლამენტო კონტროლის განხორციელების პრაქტიკაზე. პროგრესის მიუხედავად, საპარლამენტო კონტროლის განხორციელების პროცესში, კვლავ პრობლემად რჩება, როგორც დეპუტატების, ასევე მთავრობის წევრთა, ანგარიშვალდებულება და პასუხისმგებლობა“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ინფორმაციით, ახალციხეში „ქართული ოცნების“ ყოფილი მაღალჩინოსანი ბენზინგასამართ სადგურს კანონდარღვევით აშენებს. „ქალაქ ახალციხის საკრებულოში ფრაქცია „ქართული ოცნების“ ყოფილმა თავმჯდომარემ, მამუკა მიქელაძემ ბენზინგასამართი სადგურის მშენებლობა ნებართვის გარეშე დაიწყო. ყოფილი მაღალჩინოსანი სადგურს, ქალაქის შესასვლელში, საკუთარ მიწაზე აშენებს, თუმცა აგებული შენობა ფარავს როგორც სახელმწიფოს, ასევე მიქელაძის საკუთრებაში არსებულ იმ მეორე მიწის ნაკვეთსაც, რომელსაც ყადაღა ადევს. დარღვევების შესახებ ინფორმირებულია ახალციხის მერია. უწყებაში ამბობენ, რომ საკითხს სწავლობენ, თუმცა ამ დრომდე მათი მხრიდან გატარებული ღონისძიებების შესახებ, უცნობია“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: ღია მონაცემების მნიშვნელობა პანდემიასთან ბრძოლაში: საერთაშორისო მაგალითები და საქართველო. „უახლოეს მომავალში, ვირუსის შიდა გავრცელების დაწყებასთან ერთად, მიზანშეწონილია საერთაშორისო საუკეთესო პრაქტიკის გამოყენება და შესაბამისი მიდგომების დანერგვა. მაგალითად, აუცილებელია მოქალაქეებს მიეწოდოთ დამატებითი ინფორმაცია ინფიცირების დადასტურების ადგილების შესახებ, რათა უფრო ფრთხილი ზომები მიიღონ. გადაადგილების წესების გამკაცრებასთან ერთად, მნიშვნელოვანია მოქალაქეებს ჰქონდეთ წვდომა სხვადასხვა ონლაინ სერვისზე, განსაკუთრებით კი სამედიცინო დახმარებისა და რჩევების მიღების თვალსაზრისით. ასევე, დიდი მნიშვნელობა ექნება დაანონსებულ აპლიკაციას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: რუსული საინფორმაციო ოპერაცია საქართველოში - „სპუტნიკის“კოორდინირებული ქსელი FACEBOOK-ზე. „ISFED-მა „ფეისბუქის“ ქართულ სივრცეში რუსული მედიასაშუალება „სპუტნიკის“ მასალების კოორდინირებულად გავრცელების საეჭვო სქემა აღმოაჩინა. „ფეისბუქის“ ღია წყაროებზე დაკვირვების შედეგად, ორგანიზაცია მივიდა დასკვნამდე, რომ „ფეისბუქის“ ყალბი პირადი ანგარიშები და გარკვეული თემატური „ფეისბუქ“ გვერდები „სპუტნიკის“ ვებ-გვერდზე განთავსებული მასალების გასავრცელებლად არაავთენტურ კოორდინირებულ სქემას ქმნიან“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: პანდემია და კორუფციული რისკები. „ახალი კორონავირუსის (COVID-19) წინააღმდეგ ბრძოლის ფარგლებში 2020 წლის 21 მარტს საქართველოში საგანგებო მდგომარეობა გამოცხადდა სამწუხაროდ, საერთაშორისო გამოცდილება ცხადჰყოფს, რომ ამგვარი კრიზისის პირობებში იზრდება კორუფციის რისკები, რამდენადაც ზოგიერთი პანდემიას განიხილავს, როგორც საგანგებო სიტუაციით სარგებლობის შესაძლებლობას, რომ გამოიყენოს საკუთარი ძალაუფლება პირადი სარგებლობისთვის. მნიშვნელოვანია, რომ ხელისუფლებამ უზრუნველყოს სამედიცინო სფეროში კორუფციული რისკფაქტორების იდენტიფიცირება და შესაბამისი ზომების მიღება, რომ ამ მიმართულებით გამოყოფილი თანხები რაციონალურად და მიზნობრივად დაიხარჯოს. მნიშვნელოვანია, ხელისუფლებამ უზრუნველყოს მაქსიმალური გამჭვირვალობა სასიცოცხლოდ მნიშვნელოვანი ვაქცინების, ტესტებისა და აღჭურვილობის შესყიდვისას ღია და გამჭვირვალე პროცედურის საშუალებით“. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოების ინფორმაციით, 30 მარტს გამოცემა ZDnet-ის მიერ გავრცელებული ინფორმაცია საქართველოს ამომრჩეველთა სიის გამოქვეყნების შესახებ არაერთ კითხვის ნიშანს აჩენს. „2020 საპარლამენტო არჩევნებამდე 7 თვით ადრე ამომრჩეველთა პერსონალური მონაცემების მასობრივი გამჟღავნების შესახებ ინფორმაცია, შესაძლოა, მიმართული იყოს ამომრჩეველთა სიისა და საარჩევნო პროცესისადმი სანდოობის შერყევისაკენ.  ამდენად, მნიშვნელოვანია საქართველოს მოქალაქეთა პერსონალური მონაცემების მასშტაბურად გავრცელების შესაძლო ფაქტზე დროული და სრულყოფილი გამოძიება, რათა დადგინდეს ნამდვილად ჰქონდა თუ არა მსგავს ფაქტს ადგილი, შეიცავს თუ არა გასაჯაროვებული ინფორმაცია საქართველოს მოქალაქეთა რეალურ მონაცემებს, რომელი მონაცემთა ბაზები გასაჯაროვდა, რა გზით მოხდა მათზე წვდომის მოპოვება და ვის მიერ“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ნაშრომს: საქართველო კანონის უზენაესობის 2020 წლის ინდექსში. „IDFI-ის მიერ მომზადებული ნაშრომის მიზანს წარმოადგენს საქართველოში კანონის უზენაესობის გლობალური ინდექსის მაჩვენებლების განხილვა 2020 წლის მდგომარეობით, მისი შედარება წინა წლების მაჩვენებლებთან, პრობლემური მიმართულებების გამოვლენა და იმ ტენდენციების ჩვენება, რაც კანონის უზენაესობის ინდექსით შეფასების შედეგად გახდა შესაძლებელი. 2020 წლის კანონის უზენაესობის გლობალური ინდექსის თანახმად, საქართველოში კანონის უზენაესობის მდგომარეობა 0,60 ქულით არის შეფასებული (მაქსიმალური 1 ქულა). საქართველო 42-ე ადგილს იკავებს შეფასებულ 128 ქვეყანას შორის. მოცემული მაჩვენებლებით საქართველოს პოზიცია წინა წელთან შედარებით 0,01 ქულითა და 1 პოზიციით გაუარესდა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს პროექტის მოწვეული ექსპერტის თორნიკე გერლიანის ბლოგპოსტს: „მინისტრის საათი“ – რა შეცვალა საპარლამენტო ზედამხედველობის ახალმა მექანიზმა. „„მინისტრის საათი“, აზრობრივი თვალსაზრისით, „სამთავრობო საათის“ (შეკითხვის დრო, Question Time) ასოციაციას ქმნის, თუმცა, რეალურად, ამ ორ მექანიზმს ერთმანეთთან არაფერი აკავშირებს – მათი მიზნები რადიკალურად განსხვავებულია“. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: მართლმსაჯულების სისტემა ხელისუფლების ოპონენტების წინააღმდეგ. „ბოლო პერიოდში საქართველოს პარტნიორი ქვეყნების წარმომადგენლები და საერთაშორისო ორგანიზაციები სულ უფრო ხშირად მიუთითებენ ქვეყანაში დემოკრატიული განვითარების კუთხით არსებულ შემაშფოთებელ ტენდენციებზე. საარჩევნო სისტემასთან ერთად, დასავლელი პარტნიორების განცხადებებში ყურადღება სასამართლოსა და პროკურატურის დამოუკიდებლობის კუთხით არსებულ პრობლემებსა და პოლიტიკური ოპონენტების დევნაზე არის გამახვილებული. ცხადია, დანაშაულის არსებობის შემთხვევაში, მნიშვნელოვანია ნებისმიერი პირის პასუხისმგებლობის საკითხის დაყენება, თუმცა პოლიტიკური ოპონენტებისა და ხელისუფლების მიმართ კრიტიკული მედიასაშუალებების წარმომადგენელთა წინააღმდეგ არსებულ სისხლის სამართლის საქმეებში რამდენიმე საეჭვო გარემოება იკვეთება - გამოძიების მიმდინარეობა, სისხლისამართლებრივი დევნის დაწყების დრო, კონტექსტი და სხვა მოვლენათა ანალიზი გვაფიქრებინებს, რომ მართლმსაჯულების სისტემა შეთანხმებულად მოქმედებს და იგი პოლიტიკური ანგარიშსწორების იარაღად გამოიყენება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს სახალხო დამცველმა დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ სპეციალური ანგარიში წარმოადგინა.  ანგარიშში განხილულია 2019 წლის განმავლობაში ცალკეული დაუცველი ჯგუფების, მათ შორის, ქალების, შეზღუდული შესაძლებლობის მქონე პირების, ლგბტ+ თემის წევრების, რელიგიური უმცირესობებისა და ხანდაზმული პირების თანასწორუფლებიანობის დაცვის მხრივ არსებული პრობლემები; მიმოხილულია სავარაუდო სიძულვილით მოტივირებული დანაშაულების გამოძიების ხარვეზები, დისკრიმინაციის წახალისების შემთხვევები და სახალხო დამცველის წარმოებაში არსებული საქმეების სტატისტიკური მონაცემები; გაანალიზებულია 2019 წელს თბილისი პრაიდის შესახებ დისკუსიის ფონზე ლგბტ+ თემის წევრების უფლებების სისტემური დარღვევის და სახელმწიფოს არასათანადო რეაგირების საკითხი.  სრულად...  წყარო: http://ombudsman.ge