თბილისი. ინფორმაციის თავისუფლების განვითარების ინსტიტუტმა (IDFI) სტატისტიკური მონაცემების ანალიზი გამოაქვეყნა საქართველოს სხვადასხვა საჯარო დაწესებულებიდან 2014 წელს განთავისუფლებულ თანამშრომელთა შესახებ. „2014 წელს სხვადასხვა მიზეზით საჯარო დაწესებულებებიდან განთავისუფლდა 8 388 თანამშრომელი. საქართველოს 17 სამინისტროდან და სახელმწიფო მინისტრის აპარატიდან ჯამში განთავისუფლდა 1 737 თანამშრომელი, მათი უმრავლესობა 1 225 თანამშრომელი შინაგან საქმეთა სამინისტროდან. სამინისტროების დაქვემდებარებში არსებული 42 სსიპ-დან და საქვეუწყებო დაწესებულებიდან ჯამში განთავისუფლდა 2 832 თანამშრომელი. დამოუკიდებელი საჯარო სამართლის იურიდიული პირებიდან 2014 წელს სულ განთავისუფლდა 568 თანამშრომელი”, ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი ახალ პროექტს იწყებს: „ჩაგრულთა ხმები: კვლევა, ხელოვნება და აქტივიზმი სოციალური ცვლილებებისთვის". პროექტის მიზანია, სამოქალაქო აქტივისტების, მკვლევრებისა და არტისტების მობილიზება მარგინალიზებული ჯგუფების ჩაგვრისა და ჩაგვრის მიზეზების კვლევისათვის. სრულად... წყარო: emc.org.ge

თბილისი. საქართველოს ჟურნალისტური ეთიკის ქარტიის საბჭოს მიერ განხილული საქმეების რაოდენობა წლიდან წლამდე იზრდება. ქარტიამ 2010 წლიდან დღემდე კი ჯამში 72 საქმეზე გამოიტანა გადაწყვეტილება, 2015 წელს კი საბჭომ 32 საქმე განიხილა. ყველაზე მეტჯერ პირველი პრინციპის (სიზუსტე) დარღვევა დადგინდა. სტატისტიკური ინფორმაციის გარდა, ქარტიის ვებ-გვერდზე შეგიძლიათ ნახოთ განსახილველი და განხილული საქმეების სრული სია და დასაბუთებული გადაწყვეტილებები. სრულად... წყარო: qartia.org.ge

თბილისი. საერთაშორისო გამჭვირვალობა საქართველომ გურიის მუნიციპალიტეტებიდან საჯარო ინფორმაცია გამოითხოვა 2014 წლის მაისის და 2015 წლის ოქტომბრის მდგომარეობით დასაქმებულთა რაოდენობისა და თვის მანძილზე გასაცემი ხელფასის ოდენობის შესახებ. „საერთაშორისო გამჭვირვალობა - საქართველო" კიდევ ერთხელ მოუწოდებს მუნიციპალიტეტებს ადგილობრივი საჭიროებებიდან გამომდინარე განსაზღვრონ, თუ რა სახის იურიდიული პირების არსებობაა საჭირო თვითმმართველობის გამართული საქმიანობისათვის. მწირი საბიუჯეტო რესურსების პირობებში მუნიციპალიტეტები მაქსიმალურად უნდა იყვნენ ორიენტირებულნი ადმინისტრაციული ხარჯების ეკონომიასა და მოქალაქეთა პირველადი საჭიროებების, კომუნალური თუ ინფრასქტრუქტურული პროექტების განხორციელებაზე”, ნათქვამია ორგანიზაციის განცხადებაში. სრულად... წყარო: www.transparency.ge

თბილისი. 18 ნოემბერს, „ადამიანის უფლებების სწავლებისა და მონიტორინგის ცენტრმა (EMC)" გამართა ახალი პროექტის პრეზენტაცია, რომელიც პოლიციის საქმიანობის მონიტორინგს შეეხება. „მონიტორინგი განხორციელდება ოთხი ძირითადი მიმართულებით. ორგანიზაცია დააკვირდება და შეისწავლის მაღალი თანამდებობის პირების საჯარო გამოსვლებსა და განცხადებებს, ასევე საჯარო შეკრებებს, ნარკოტიკული დანაშაულის ფაქტებს. ასევე, განხორციელდება განწყობების კვლევა და მოქმედი სამართლებრივი სივრცის ანალიზი. ოთხივე მიმართულებაში აქცენტი გაკეთდება პოლიციის მხრიდან საკუთარი ვალდებულებების პოლიტიკური ნეიტრალიტეტის დაცვით განხორციელებაზე", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. „საერთაშორისო გამჭვირვალობა - საქართველო” სახელმწიფო/ადგილობრივი თვითმმართველობის ორგანოების მიერ განხორციელებული გამარტივებული შესყიდვების მონიტორინგს წლების მანძილზე ახორციელებს. „ამჯერად ორგანიზაცია ბაღდათის მუნიციპალიტეტის მიერ განხორციელებული გამარტივებული შესყიდვების გზით გაფორმებული ხელშეკრულებებით დაინტერესდა. კვლევის ფარგლებში ორი საინტერესო შემთხვევა გამოვლინდა" სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია 2015 წლის 31 ოქტომბერს მარტვილსა და საგარეჯოში საქართველოს პარლამენტის შუალედურ არჩევნებს დააკვირდა. საიამ კენჭისყრის დღის დაკვირვება განახორციელა როგორც სტატიკურად, ასევე მობილური ჯგუფების მეშვეობით. „ხმის მიცემა დაბალი აქტივობით წარიმართა, თუმცა მაღალი იყო როგორც ცენტრალური ასევე ადგილობრივი ხელისუფლების ჩართულობა წინასაარჩევნო პროცესებში და უშუალოდ არჩევნების დღეს. მართალია, პოლიტიკური თანამდებობის პირების აქტიური ჩართულობის გამო საარჩევნო კანონმდებლობა არ დარღვეულა, თუმცა, მსგავსი ფონი არ ქმნიდა თანაბარი საარჩევნო გარემოს აღქმას", ნათქვამია ორგანიზაციის განცხადებაში. სრულად... წყარო: gyla.ge

თბილისი. ორგანიზაცია კონსტიტუციის 42-ე მუხლი აწარმოებს პროექტს „2015 წლის 13-14 ივნისს თბილისში სტიქიით მიყენებული ზიანის აღმოფხვრისათვის მობილიზებული თანხებისა და რესურსების ხარჯვის პროცესის მონიტორინგი". ამ პროექტის ფარგლებში ორგანიზაციამ გამოითხოვა ინფორმაცია საჯარო დაწესებულებებისა და ბანკებისაგან. „თბილისის მერიის წერილით ირკვევა, რომ 13-14 ივნისის სტიქიის შედეგად დაზარალებული რაიონების ინფრასტრუქტურის მოსაწესრიგებლად ჯამში დაიხარჯა 19 538 465 ლარი. რაც შეეხება სხვა კითხვებზე პასუხს დაზარალებულთა სიების, მათი ფართით თუ ქირით უზრუნველყოფის თაობაზე და ა. შ თბილისი მერიის მხრიდან პასუხი არ მიგვიღია. თბილისის მერიამ აღნიშნა, რომ აღნიშნულ საკითხებზე თბილისის მუნიციპალიტეტების ქონების მართვის სააგენტოს გადაეგზავნა ჩვენი წერილი", ნათქვამია ორგანიზაციის განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა – საქართველომ ტელეკომპანია „რუსთავი 2"–ის სასამართლო საქმეზე ინფორმაცია გაავრცელა სოციალურ ქსელში. „საერთაშორისო გამჭვირვალობა – საქართველო" გამოითხოვს საქმის მასალებს და გადაწყვეტილების დასაბუთებას, რის შემდეგაც საზოგადოებას მიაწვდის დეტალურ სამართლებრივ ანალიზს „რუსთავი 2"-ის საქმეზე", ნათქვამია სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა განცხადებით მიმართა საქართველოს კომუნიკაციების ეროვნულ კომისიას. „IDFI-მ ითხოვა შპს „რ.ბ.ჯ."-ს სანქცირება, „მაუწყებლობის შესახებ" საქართველოს კანონის მოთხოვნათა დარღვევის გამო. განცხადება ეყრდნობა IDFI-ს მიერ აღნიშნული ავტორიზებული პირის პროგრამების მონიტორინგს, რომლის შედეგების მიხედვით შპს „რ.ბ.ჯ."-ს მიერ ხორციელდება რუსეთის ფედერაციის საზოგადოებრივი სახელმწიფო ტელევიზიის - ORT-ს პირველი არხის პროგრამების გავრცელება ღია საეთერო ციფრული ქსელით", ნათქვამია ორგანიზაციის განცხადებაში. სრულად... წყარო: idfi.ge

თბილისი. „საერთაშორისო გამჭვირვალობა საქართველო" საზოგადოებრივი მაუწყებლის საკადრო პოლიტიკის შესწავლას აგრძელებს. ორგანიზაცია მოუწოდებს საზოგადოებრივ მაუწყებელს, „შეისწავლოს ფინანსების დარგში საზოგადოებრივი მაუწყებლის გენერალური დირექტორის მოადგილის კახაბერ სონიშვილის მიერ „საჯარო სამსახურის შესახებ" კანონის შესაძლო დარღვევის საკითხი, მოახდინოს სათანადო რეაგირება და დასაბუთებული პასუხი გასცეს არსებულ კითხვებზე. მეორე მხრივ, ვფიქრობთ, კახაბერ სონიშვილის შემთხვევა კიდევ ერთხელ მიუთითებს საქართველოში კორუფციის საწინააღმდეგო საკანონმდებლო რეგულაციების პრაქტიკაში ეფექტურად აღსრულების ნაკლოვანებებზე", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს სახალხო დამცველის აპარატის პრევენციის და მონიტორინგის დეპარტამენტის თანამშრომლებმა მეორედ განახორციელეს მიგრანტთა დაბრუნების ერთობლივი ოპერაციის მონიტორინგი. „მონიტორინგი განხორციელდა საქართველოსა და ევროკავშირს შორის გაფორმებული რეადმისიის ხელშეკრულების იმპლემენტაციის ფარგლებში და მიზნად ისახავდა ევროკავშირის ქვეყნებიდან საქართველოს 35 მოქალაქის დეპორტაციის მონიტორინგს", ნათქვამია სახალხო დამცველის ვებ-გვერდზე. სრულად... წყარო: http://www.ombudsman.ge

თბილისი. სახალხო დამცველმა პრევენციის ეროვნული მექანიზმის მეორე კვარტალური საინფორმაციო ბიულეტენი გამოსცა. „ბიულეტენი შეიცავს პრევენციის ეროვნული მექანიზმის მიერ 2014-2015 წლებში N17, N2, N3, N8, N14 დაწესებულებებში განხორციელებული ვიზიტის შემდგომ ანგარიშებში ასახული ძირითადი რეკომენდაციების შესრულების ანალიზს", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. სახალხო დამცველმა სპეციალური ანგარიში წარადგინა არასრულწლოვანთა პანსიონებში ბავშვთა უფლებრივი მდგომარეობის შესახებ. ანგარიში მართლმადიდებელი ეკლესიის საპატრიარქოსა და საქართველოში მუსლიმური კონფესიის დაქვემდებარებაში მყოფ არასრულწლოვანთა პანსიონებს შეეხება. „მონიტორინგის შედეგად გამოიკვეთა, რომ ზრუნვის მიწოდების ხარისხი განსხვავებულია ზემოთ აღნიშნული დაწესებულებების მიხედვით და არ არის დარეგულირებული ბავშვზე ზრუნვის ერთიანი სისტემით, რადგან პანსიონების ბენეფიციარები არ იმყოფებიან სახელმწიფო ზრუნვის ქვეშ – სოციალური სამსახური ზრუნვის პროცესში ჩართული არ არის. ეს ართულებს ბავშვის ისეთი ფუნდამენტური უფლებებისა და თავისუფლებების განხორციელებას...", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 19 ოქტომბერს, ომბუდსმენთან არსებული შშმ პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საკონსულტაციო საბჭოს მეორე სამუშაო შეხვედრა გაიმართა. „ერთი თვის ვადაში მოხდება შშმ პირთა უფლებების კონვენციის იმპლემენტაციის მონიტორინგის ჯგუფის წევრების შერჩევა საბჭოს მიერ დამტკიცებული კრიტერიუმების შესაბამისად, სპეციალურად შექმნილი კომისიის მიერ, რომლის შემადგენლობაში ჩაერთვებიან საბჭოს მოწვეული წევრები", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. საერთაშორისო გამჭვირვალობა – საქართველო აქვეყნებს ახალ ბლოგს: „რეგიონულ მედიაზე ზეწოლის გახშირებული ფაქტები". ორგანიზაციის ინფორმაციით, „ბოლო ორი წლის მანძილზე ცენტრალური და ადგილობრივი ხელისუფლების წარმომადგენლების მხრიდან რეგიონულ მედიაზე ზეწოლის 15–ზე მეტი შემთხვევა დაფიქსირდა...". სრულად... წყარო: transparency.ge

თბილისი. საერთაშორისო გამჭვირვალობა - საქართველო სისხლის სამართლის საქმეების მონიტორინგის მესამე ანგარიშს აქვეყნებს. ანგარიში მოიცავს სასამართლო სხდომებზე განვითარებულ მოვლენებს, პროცესის აღწერას. „მესამე ანგარიში მოიცავს 2014 წლის მაისიდან 2015 წლის ივნისამდე პერიოდს. დაკვირვება 11 სისხლის სამართლის საქმეზე მიმდინარეობდა, სადაც ბრალდებულები იყვნენ წინა ხელისუფლების ყოფილი თანამდებობის პირები: მიხეილ სააკაშვილი, გიგი უგულავა, ვანო მერაბიშვილი, ბაჩანა ახალაია და სხვები", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 7 ოქტომბერს, სახალხო დამცველმა სპეციალური პრევენციული ჯგუფის მიერ N2 პენიტენციურ დაწესებულებაში განხორციელებული ვიზიტის ანგარიში გამოაქვეყნა. „ვიზიტის შედეგად გაირკვა, რომ N2 დაწესებულებაში პრობლემას წარმოადგენს უსაფრთხოების თვალსაზრისით გამოყენებული ვიზუალური მეთვალყურეობის პრაქტიკა. არადამაკმაყოფილებელია სამარტოო საკნების სანიტარიულ-ჰიგიენური მდგომარეობა, მონიტორინგის პერიოდში არ ხდებოდა დაწესებულების მაღაზიის პროდუქციით სათანადო მომარაგება", ნათქვამია ომბუდსმენის ანგარიშში. სრულად... წყარო: www.ombudsman.ge

თბილისი. არასამთავრობო ორგანიზაციები ქვეყანაში მიმდინარე მოვლენებს აფასებენ. ორგანიზაციები საქართველოს მოქალაქეებისა და საერთაშორისო ორგანიზაციების ყურადღებას მიმართავენ ადამიანის უფლებების დაცვის, დემოკრატიულ ღირებულებებისა და კანონის უზენაესობის საკითხებზე. „მიუხედავად იმისა, რომ უკანასკნელ წლებში ქვეყანაში სხვადასხვა სფეროში არსებული პრობლემების აღმოფხვრის კუთხით არაერთი რეფორმა დაიგეგმა და განხორციელდა, რჩება უმნიშვნელოვანესი გამოწვევები, რომლებიც პირდაპირ გავლენას ახდენს წინასაარჩევნო გარემოზე", ნათქვამია ერთობლივ განცხადებაში. გამოწვევები შეეხება: საარჩევნო რეფორმას, მედია გარემოს, შეკრების და გამოხატვის თავისუფლებას, სასამართლოს, სამართალდამცავ ორგანოებს... სრულად... წყარო: gyla.ge

იმერეთი. 7 ოქტომბერს, ქუთაისის განათლების განვითარების და დასაქმების ცენტრის ინიციატივით შეხვედრა გაიმართა. შეხვედრას ესწრებოდნენ შშმ პირთა საკითხებზე მომუშავე არასამთავრობო და სამთავრობო ორგანიზაციების წარმომადგენლები, დამსაქმებლები, შშმ პირები და უფლებადამცველები. „შეხვედრაზე განხილულ იქნა შშმ პირთა თანაბარი შესაძლებლობების უზრუნველყოფის 2014–2016 წლების სამთავრობო სამოქმედო გეგმა და ამ გეგმით (თავიIX – შრომა და დასაქმება) განსაზღვრული ღონისძიებების შესრულების მონიტორინგის შედეგების პრეზენტაცია", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აშშ-ში საქართველოს ლობისტურ საქმიანობაზე დაკვირვების შედეგად ანალიტიკურ სტატიას აქვეყნებს. „არსებული ღია წყაროების საფუძველზე IDFI-ის მიერ დეტალურად იქნა შესწავლილი საქართველოს (როგორც სახელმწიფო ისე ფიზიკური და იურიდიული პირების) ლობისტური საქმიანობა აშშ-ში 2008 წლიდან დღემდე. ამ პერიოდში საქართველოდან სულ 9 დაწესებულება/პირი იღებდა აშშ-ში ლობისტური კომპანიების მომსახურებას", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. საერთაშორისო გამჭვირვალობა საქართველო სოციოლოგიური გამოკითხვის შედეგებს აქვეყნებს. გამოკითხვა ორგანიზაციის დაკვეთით კავკასიის კვლევითი რესურსების ცენტრმა (CRRC) ჩაატარა. გამოკითხულია საქართველოს 1867 მოქალაქე. „კვლევის შედეგები იმის ხაზგასმის საშუალებას იძლევა, რომ ადგილობრივი თვითმმართველობის წარმომადგენლობითი ორგანოების მუშაობის პრიორიტეტები არასწორად არის განსაზღვრული. კერძოდ: საკრებულოს წევრებს ელექტორატთან კომუნიკაცია აკლიათ და ისინი საკუთარი აქტივობების განხორციელებამდე ნაკლებად მართავენ საჯარო განხილვებს," ნათქვამია ორგანიზაციის კვლევაში. საერთაშორისო გამჭვირვალობა საქართველო მოუწოდებს ადგილობრივ თვითმმართველობებს ბიუჯეტის ხარჯვის, პროექტების განხორციელების პროცესი იყოს გამჭვირვალე. საჯარო ინფორმაცია კი ყველასთვის ხელმისაწვდომი. სრულად... წყარო: www.transparency.ge