თბილისი. 31 ივლისს ევრაზიის თანამშრომლობის ფონდმა გამართა საჯარო ფორუმი თემაზე: ბიუჯეტის გამჭვირვალობა და სახელმწიფო ხარჯების სამოქალაქო მონიტორინგი საქართველოში. ფორუმი მიზნად ისახავდა სამოქალაქო საზოგადოებისა და ხელისუფლების წარმომადგენლებს შორის დიალოგის გააქტიურებას, რაც ხელს შეუწყობს საქართველოში ბიუჯეტის გამჭვირვალობისა და სახელმწიფო სახსრების ხარჯვაზე ანგარიშვალდებულების გაზრდას. ფორუმის ფარგლებში დამსწრე საზოგადოება გაეცნო ევრაზიის თანამშრომლობის ფონდის ინიციატივით შექმნილ საზოგადოებრივ ორგანიზაციათა პლატფორმას „თანამშრომლობა ბიუჯეტის გამჭვირვალობისთვის", მის მიზნებსა და ამოცანებს. პლატფორმა ღიაა ყველა დაინტერესებული ორგანიზაციისთვის, რომელიც ბიუჯეტის გამჭვირვალობისა და ბიუჯეტის ხარჯების მონიტორინგის მიმართულებით მუშაობს და სურს წვლილი შეიტანოს საზოგადოებრივი მონიტორინგის გამართული სისტემის შექმნაში. სრულად... წყარო: epfound.ge

თბილისი. ,,ახალგაზრდა ადვოკატებმა" უკრაინის მთავრობაში დასაქმებული, საქართველოს ყოფილი მაღალი თანამდებობის პირთა სახელფასო ფონდის, პრემიებისა და დანამატების, სამივლინებო და ცხოვრების ხარჯების შესახებ მიღებული ინფორმაციის შესწავლა დაასრულეს. მიღებული ინფორმაციის საფუძველზე, „უკრაინის ხელისუფლება ინფორმაციას არ ფლობს, შრომითი ანაზღაურების გარდა, ვინ უზრუნველყოფს უკრაინის ხელისუფლებაში დანიშნული ქართველი ყოფილი მაღალი თანამდებობის პირთა ცხოვრების ხარჯებს. მიხეილ სააკაშვილის შრომით ანაზღაურება წარმოადგენს 5644 უკრაინულ გრივნას, რაც საქართველოს ეროვნულ ვალუტაში შეადგენს, დაახლოებით 578 ლარს", ნათქვამია განცხადებაში. სრულად... წყარო: barristers.ge

თბილისი. 29 ივლისს, „კოალიციამ თანასწორობისთვის” ანტიდისკრიმინაციული კანონის აღსრულების ერთი წლის მონიტორინგის ანგარიში გამოაქვეყნა. ანგარიშში ასახულია ანტიდისკრიმინაციული კანონმდებლობის სრულყოფისა და მისი სათანადო განხორციელების მიზნით გატარებული ქმედებები 2014 წლის მაისიდან 2015 წლის 1 აპრილამდე. „ანგარიშის თავები ეთმობა კოალიციის წევრი ორგანიზაციების მიერ წარმოებულ საქმეებს, სახალხო დამცველის მიერ "დისკრიმინაციის ყველა ფორმის აღმოფხვრის შესახებ" კანონის გამოყენებისას გამოვლენილ მიღწევებს და გამოწვევებს, სასამართლო ხელისუფლების მიერ ანტიდისკრიმინაციული კანონმდებლობის იმპლემენტაციის პროცესუალურ თავისებურებებს და საქმის წარმოებას სხვა ადმინისტრაციულ ორგანოებში. ანგარიშის დასკვნითი ნაწილი რეკომენდაციებს გვთავაზობს, რაც სახელმწიფო სტრუქტურებს ანტიდისკრიმინაციული ღონისძიებების დახვეწაში დაეხმარება", ნათქვამია განცხადებაში. ანგარიში... წყარო: www.osgf.ge

თბილისი. საერთაშორისო გამჭვირვალობა – საქართველომ გამოაქვეყნა პოლიტიკის დოკუმენტი: „მამხილებელთა დაცვა – საერთაშორისო პრაქტიკა და რეკომენდაციები საქართველოსთვის". მასში წარმოდგენილია რეკომენდაციების ნუსხა, „რომელთა შესრულებამაც უნდა აღმოფხვრას საქართველოში მამხილებელთა დაცვის სისტემის ძირითადი ნაკლოვანებები და ის საუკეთესო საერთაშორისო გამოცდილებასთან დააახლოვოს". სრულად... წყარო: www.transparency.ge

კახეთი. ახალგაზრდა იურისტთა ასოციაციის თელავის ოფისმა, თელავის დემოკრატიული ჩართულობის ცენტრში, პროექტის „დაცული არჩევანი - ეფექტური თვითმმართველობის გარანტი" – ფარგლებში კვლევის შედეგების პრეზენტაცია გამართა. საქართველოს ახალგაზრდა იურისტთა ასოციაცია და ადგილობრივი დემოკრატიის სააგენტო – საქართველო, ფონდ „ღია საზოგადოება - საქართველოს" მხარდაჭერით ახორციელებენ აღნიშნულ პროექტს. საიამ პროექტის პირველ ეტაპზე იანვარსა და თებერვალში თვითმმართველ ქალაქებში ჩატარდა ფოკუს ჯგუფები ადგილობრივი თვითმმართველობის ორგანოებისა და სამოქალაქო საზოგადოების წარმომადგენლებთან. ფოკუს ჯგუფების მიზანი იყო ზემოაღნიშნულ პირთა დამოკიდებულების გამოვლენა, რამდენად დაცულები არიან საჯარო მოხელეები ადგილობრივი თვითმმართველობის კოდექსით განსაზღვრული სამართლებრივი რეგულაციების ფარგლებში და შესაძლებელია თუ არა ალტერნატიული მექანიზმების შემუშავების გზით აღნიშნული მდგომარეობის გაუმჯობესება.

თბილისი. 28 ივლისს, „საქართველოს დემოკრატიულმა ინიციატივამ" (GDI) ფონდი „ღია საზოგადოება - საქართველოს" ოფისში წარადგინა ანგარიში ადამიანის უფლებათა სამოქმედო გეგმის I და II თავების შესრულებასთან დაკავშირებით. ანგარიშში რაოდენობრივი და ხარისხობრივი თვალსაზრისით შეფასდა პასუხისმგებელი უწყებების მიერ 2014 წლის ივლისიდან 2014 წლის დეკემბრამდე პერიოდში განხორციელებული საქმიანობები. ორგანიზაციის მიერ ჩატარებული მონიტორინგის შედეგად გამოიკვეთა სამოქმედო გეგმის განხორციელების პროცესის როგორც პოზიტიური, ისე ნეგატიური ასპექტები. „მაგალითისთვის პოზიტიურად შეგვიძლია მივიჩნიოთ დაზარალებულის უფლებების განმტკიცება სისხლის სამართლის პროცესში, საპროცესო შეთანხმების ინსტიტუტის რეფორმირება, „საერთო სასამართლოების შესახებ" ორგანულ კანონში ცვლილებების განხორციელება, რომლის მიხედვითაც უზენაეს სასამართლოში საკვალიფიკაციო პალატა ჩამოყალიბდა და სხვა. თუმცა, „საქართველოს დემოკრატიული ინიციატივა" უარყოფითად აფასებს ადამიანის უფლებათა დაცვის სამდივნოს მიერ მომზადებულ შუალედურ თუ საბოლოო ანგარიშში პასუხისმგებელი უწყებების მიერ განხორციელებული აქტივობების მხოლოდ დადებითი კუთხით წარმოჩენის ფაქტს", ნათქვამია ორგანიზაციის ვებ-გვერდზე... ანგარიში... წყარო: gdi.ge

თბილისი. 29 ივლისს, 09:30 საათზე, სასტუმრო „რუმსში” კოალიცია თანასწორობისთვის ანტიდისკრიმინაციული კანონის აღსრულების ერთი წლის მონიტორინგის ანგარიშს წარადგენს. ანგარიშში ასახულია ანტიდისკრიმინაციული კანონმდებლობის სრულყოფისა და მისი სათანადო განხორციელების მიზნით გატარებული ქმედებები 2014 წლის მაისიდან 2015 წლის 1 აპრილამდე. ანგარიში მომზადებულია „კოალიცია თანასწორობისთვის” წევრი ორგანიზაციების მიერ სახალხო დამცველის აპარატში წარდგენილი საჩივრების, სასამართლოებში შეტანილი სარჩელების, სახალხო დამცველისა და საერთო სასამართლოების მიერ მიღებული საბოლოო და შუალედური გადაწყვეტილებების, მოქმედი კანონმდებლობის და საჯარო ინფორმაციის სახით სახალხო დამცველის აპარატიდან გამოთხოვილი მასალების ანალიზის საფუძველზე. სრულად...

თბილისი. სახალხო დამცველის ვებგვრდზე განთავსდა სპეციალური ანგარიში ქალთა მიმართ ძალადობა და ოჯახში ძალადობა საქართველოში. იგი მოიცავს სახალხო დამცველის აპარატის მიერ 2014 წელს ქალთა მიმართ ძალადობისა და ოჯახში ძალადობის საკითხებზე სახელმწიფო სერვისებისა და მექანიზმების შესაფასებლად ჩატარებული მონიტორინგისა და შესწავლის შედეგებს. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტმა (IDFI) სამინისტროებისგან და სახელმწიფო მინისტრის აპარატებისგან თანამდებობის პირების ე.წ „როუმინგულ" მომსახურებაზე გაწეული ხარჯების შესახებ ინფორმაცია მოითხოვა. „აღნიშნული მოთხოვნა უპასუხოდ დატოვეს იუსტიციის, ეკონომიკისა და მდგრადი განვითარების, შინაგან საქმეთა და კულტურისა და ძეგლთა დაცვის სამინისტროებმა. საგარეო საქმეთა სამინისტრომ და შერიგებისა და სამოქალაქო თანასწორობის საკითხებში სახელმწიფო მინისტრის აპარატმა ინსტიტუტს განუმარტა, რომ მათ მიერ ვერ ხერხდებოდა კავშირგაბმულობის ხარჯების ჯამური რაოდენობიდან „როუმინგული" ხარჯების გამოყოფა და შესაბამისად, მოკლებული იყვნენ შესაძლებლობას მოეწოდებინათ აღნიშნული ინფორმაცია. სხვა სამინისტროების და სახელმწიფო მინისტრის აპარატებიდან მოწოდებული ინფორმაციის მიხედვით 2014 წელს თანამდებობის პირების მიერ „როუმინგულ" მომსახურებაზე გაწეული ხარჯები სულ შეადგინეს 84 115.9 ლარს, საიდანაც ყველაზე მეტი - 22 527 ლარი დახარჯულია ენერგეტიკის სამინისტროს მიერ"... სრულად... წყარო: opendata.ge

თბილისი. 10-11 ივნისს, საქართველოს სახალხო დამცველის აპარატის გენდერული თანასწორობის დეპარტამენტმა, ადამიანით ვაჭრობის (ტრეფიკინგის) მსხვერპლთა მომსახურების დაწესებულების (თავშესაფარი) მონიტორინგი განახორციელა. შემოწმდა თბილისისა და ბათუმის თავშესაფრები და სერვისის მიწოდების ძლიერი და სუსტი მხარეები გამოვლინდა. „მონიტორინგის შედეგად გამოვლინდა რომ თავშესაფრებში არსებული მდგომარეობა კეთილსაიმედოა. აშკარაა, რომ თავშესაფრის ადმინისტრაცია ძალისხმევას არ იშურებს ბენეფიციართა კეთილდღეობის უზრუნველსაყოფად. თუმცა, გამოიკვეთა რიგი პრობლემური საკითხები, რომელთა მოგვარება მნიშვნელოვნად გააუმჯობესებს სერვისის მიწოდების ხარისხს. აღსანიშნავია, რომ დაწესებულებას არ აქვს სტანდარტები, რომელთა მიხედვითაც უნდა იყოს მოწყობილი საცხოვრებელი და განსაზღვრული მომსახურების გაწევის წესები", ნათქვამია განცხადებაში... სრულად... წყარო: www.ombudsman.ge

თბილისი. „სამართლიანმა არჩევნებმა" სტიქიის შედეგად უსახლკაროდ დარჩენილი 33 ოჯახი გამოკითხა და მათთვის სახელმწიფოს მხრიდან გაწეული დახმარების პროცესის ეფექტურობა შეაფასა. „ინტერვიუების დროს გამოიკვეთა, რომ სასტუმროებში მცხოვრებ ოჯახების ნაწილს არ სურთ ქირით გადასვლა, და სახელმწიფოს შემოთავაზებაზე იმ მიზეზით ამბობენ უარს, რომ არ აკმაყოფილებთ შემოთავაზებული ხელშეკრულების პირობები. კერძოდ, ქირის გადამხდელად დაფიქსირებულია ოჯახის ერთ-ერთი წევრი, რომელსაც ზეპირსიტყვიერი შეთანხმების საფუძველზე შესაბამისი ადმინისტრაციული ორგანო ანგარიშზე ყოველთვიურად ურიცხავს ბინის ქირისთვის განკუთვნილ თანხას. ხელშეკრულებაში არსად ფიგურირებს ადგილობრივი ხელისუფლება, რაც, როგორც დაზარალებულს, ასევე გამქირავებელს უქმნის უნდობლობის განცდას ქირის გადახდის ვალდებულებასთან დაკავშირებით. გარდა ამისა, დაზარალებულებს აქვთ შიში, რომ სასტუმროდან საცხოვრებელ ბინაში ქირით გადასვლის შემთხვევაში გაჭიანურდება მათი მუდმივი საცხოვრებლით დაკმაყოფილების პროცესი". „სამართლიანი არჩევნები" განაგრძობს მონიტორინგს და შედეგებს მომდევნო ანგარიშებში შემოგთავაზებთ. სრულად... წყარო: www.isfed.ge

თბილისი. ახალგაზრდა ფინანსისტთა და ბიზნესმენთა ასოციაციამ ეროვნული ბანკის საკითხზე ბრიფინგი გამართეს. შეხვედრაზე, ორგანიზაციის წარმომადგენლებმა რეფინანსირების სესხების მოცულობაზე გააკეთეს აქცენტი. „...რეფინანსირების, ასევე მუდმივმოქმედი და ერთდღიანი სესხების მოცულობის მკვეთრმა ზრდამ, 855 მილიონი ლარიდან 1,120 მილიარდ ლარამდე გასულ კვირაში ლარის კურსზე ნეგატიურად იმოქმედა და ლარი რამდენიმე პუნქტით გაუფასურდა...", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ჯამპსტარტ ჯორჯია აქვეყნებს ახალ ვიზუალიზაციას: „შესასრულებელი მისია – უვიზო ევროპა საქართველოსთვის". „საქართველომ ევროკავშირთან სავიზო რეჟიმის გამარტივებისა და რეადმისიის შესახებ ხელშეკრულებას ხელი 2010 წელს მოაწერა. 2013 წლის 25 თებერვალს მას ოფიციალურად გადმოეცა სავიზო რეჟიმის ლიბერალიზაციის სამოქმედო გეგმა (VLAP), რომელიც ორი ფაზისგან შედგება: კანონმდებლობის დახვეწა და მისი განხორციელება. 2015 წლის 8 მაისს ევროკომისიამ გამოაქვეყნა მესამე ანგარიში სამოქმედო გეგმის განხორციელების შესახებ, რომლის თანახმადაც, პროგრამით განსაზღვრული ოთხი მიმართულებით საქართველომ 15 პუნქტიდან 7 სრულად შეასრულა...", ნათქვამია ფერად ინფოზე. ვიზუალიზაცია... წყარო: feradi.info

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ახალ კვლევას: „საქართველოს მთავრობის ინიციატივა – „მაღალსიჩქარიანი ინტერნეტი ყველას" – პრობლემები და რეკომენდაციები". ინსტიტუტის კვლევა ეხება 2015 წლის დასაწყისში, საქართველოს მთავრობის მიერ, სპეციალური პროგრამის ფარგლებში, საქართველოს ფართოზოლოვანი დაფარვის, ანუ ინტერნეტიზაციის მაჩვენებლის გაზრდის მიზნით, გამოცხადებული კონკურსის და ზოგადად ამ საკითხის ირგვლივ მიმდინარე პრობლემებს. „წარდგენილი წინადადებებიდან დადგენილი პირობები ვერცერთმა ვერ დააკმაყოფილა და საქართველოს ეკონომიკისა და მდგრადი განვითარების სამინისტრო და სსიპ „ინოვაციების და ტექნოლოგიების სააგენტო" ამ პირობების მოდიფიცირებასა და ახალი კონკურსის გამოცხადებაზე მუშაობს. ...", ნათქვამია კვლევაში. სრულად... წყარო: idfi.ge

თბილისი. საერთაშორისო გამჭვირვალობა – საქართველო აქვეყნებს მორიგ ბლოგს: „მილიონ ლარზე მეტი სამინისტროების რეკლამისთვის". გამჭვირვალობამ ინფორმაცია სამინისტროების სარეკლამო დანახარჯებზე თავად სახელმწიფო უწყებებიდან და სახელმწიფო შესყიდვების ელექტრონული პლატფორმიდან მოიპოვა. „სამინისტროებმა და მათ დაქვემდებარებაში მყოფმა საჯარო სამართლის იურიდიულმა პირებმა 2015 წლის იანვარი-მაისის პერიოდში სარეკლამო რგოლების დამზადებასა და სხვადასხვა ტელევიზიებში მათ განთავსებაზე მილიონზე მეტი ლარი დახარჯეს. სარეკლამო რგოლების დამზადებაში ჯამში 199,521 ლარი დაიხარჯა, განთავსებში კი 902,559 ლარი", ნათქვამია პუბლიკაციაში. სრულად... წყარო: transparency.ge

თბილისი. საერთაშორისო გამჭვირვალობა – საქართველო აქვეყნებს ვიდეოს: „როგორ მოვიძიოთ ნორმატიული აქტები?". მასში აღწერილია, თუ როგორ უნდა მოიძიოს დაინტერესებულმა პირმა კანონები და სხვა ნორმატიული აქტები საჯარო უწყებების ვებგვერდებიდან. სრულად... წყარო: transparency.ge

თბილისი. საერთაშორისო გამჭვირვალობა – საქართველო აქვეყნებს ახალ ბლოგს: „ვინ მიიღებს ანაკლიის პორტის მშენებლობის ნებართვას?". ორგანიზაციის ინფორმაციით, „...ანაკლიის ღრმაწყლოვანი პორტის მშენებლობის თაობაზე ინტერესი პირველ ეტაპზე 12 კომპანიამ გამოხატა, რომელთაგან მთავრობის მიერ შექმნილი კომისიის გადაწყვეტილებით, 7 კომპანია შეირჩა. ... სამთავრობო კომისიის 2015 წლის მაისის გადაწყვეტილებით, საბოლოო წინადადებების წარდგენის შესაძლებლობა 7 პრეტენდენტიდან ორს მიეცა."... საერთაშორისო გამჭვირვალობა – საქართველო დაინტერესდა, თუ ვინ არიან კონკურსის საბოლოო ეტაპზე გასული კომპანიების ორი ჯგუფის ხელმძღვანელები და მათ შესახებ სხვადასხვა წყაროდან მიღებულ ინფორმაციას აქვეყნებს ბლოგში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციამ გამოაქვეყნა საყდრისი–ყაჩაღიანის შესახებ მომზადებული კვლევა. ორგანიზაცია მიიჩნევს, რომ 2013–2015 წლებში საყდრისი–ყაჩაღიანი ს ირგვლივ განვითარებული მოვლენები აუცილებლად უნდა გახდეს სამართალდამცავი ორგანოების მხრიდან ობიექტური გამოძიების საგანი. კვლევა... წყარო: gyla.ge

თბილისი. საერთაშორისო გამჭვირვალობა – საქართველომ გამოაქვეყნა საქართველოს პარლამენტის 2014 წლის საქმიანობის შეფასება. კვლევა ეფუძნება ორგანიზაციის მიერ მოპოვებულ ინფორმაციას, ორგანიზაციის საპარლამენტო ოფისის დაკვირვებებს, პარლამენტიდან გამოთხოვილ სტატისტიკურ ინფორმაციას და საზოგადოებრივი აზრის კვლევის შედეგებს. ანგარიში ეხება „2014 წლის მნიშვნელოვან საკანონმდებლო ცვლილებებს, პარლამენტის წევრთა საქმიანობის შეფასებას, მათ მონაწილეობას საპარლამენტო ცხოვრებაში და დისციპლინური პასუხისმგებლობის საკითხებს, პარლამენტის წევრთა კავშირს ბიზნესთან და არადეკლარირებულ სამეწარმეო საქმიანობას, ასევე, მაჟორიტარი პარლამენტის წევრების ბიუროების საქმიანობას. ანგარიშში შეფასებულია პარლამენტის კომიტეტების საქმიანობა და საპარლამენტო კონტროლის განხორციელება". სრულად... წყარო: transparency.ge

თბილისი. საქართველოს სახალხო დამცველი სასჯელაღსრულების N5 ქალთა სპეციალურ დაწესებულებაში ვიზიტის შესახებ ანგარიშს აქვეყნებს". ვიზიტი გაეროს ქალთა ორგანიზაციის მხარდაჭერით განხორციელდა და მიზნად ისახავდა ქალი პატიმარების საჭიროებების გამოვლენას და შეფასებაზე დაყრდნობით რეკომენდაციების მომზადებას. ანგარიშის მომზადებისას სხვა მასალასთან ერთად გამოყენებული იქნა სპეციალური პრევენციული ჯგუფის ვიზიტში მონაწილე წევრების ტექნიკური ანგარიშები და ვიზიტის დროს მოპოვებული დოკუმენტაცია. მონიტორინგის ჯგუფის წევრთა ანგარიშები, რომლებიც საქართველოს სახალხო დამცველის აპარატში ინახება, მოიცავს მონიტორინგის ჯგუფის ძირითად მიგნებებს და შედგენილია იმგვარად, რომ ინტერვიუს კონფიდენციალური ხასიათიდან გამომდინარე, არ მოხდეს რესპოდენტ პატიმართა იდენტიფიკაცია". სრულად... წყარო: www.ombudsman.ge

თბილისი. საერთაშორისო გამჭვირვალობა – საქართველო აქვეყნებს ანგარიშს: „სახელმწიფო შესყიდვები 2013–2014 წლებში: როგორ და რაში იხარჯება ბიუჯეტი". ბოლო ხუთი წლის განმავლობაში განხორციელებულმა ძირეულმა რეფორმებმა საქართველოს სახელმწიფო შესყიდვების სისტემა მსოფლიოში ერთ-ერთ ყველაზე გამჭვირვალედ აქცია, რასაც „საერთაშორისო გამჭვირვალობა – საქართველომ" და არაერთმა საერთაშორისო ორგანიზაციამ მაღალი შეფასება მისცა. თუმცა „სახელმწიფო შესყიდვების სისტემის ღიაობა და გამჭვირვალობა ყოველთვის არ ნიშნავს იმას, რომ სისტემა ასეთივე წარმატებით უზრუნველყოფს სახსრების დაზოგვას, სათანადო კონკურენციას და ა.შ. ახალ ანგარიშში „საერთაშორისო გამჭვირვალობა – საქართველო" წარმოგიდგენთ 2013-2014 წლებში სახელმწიფო შესყიდვების კუთხით გამოვლენილ საინტერესო ტენდენციებს, პრობლემებს და მათი გადაჭრის კონკრეტულ გზებს", ნათქვამია ვებგვერდზე. სრულად.... წყარო: transparency.ge

თბილისი. ინფორმაციის თავისუფლების განვითარების ინსტიტუტმა კულტურისა და ძეგლთა დაცვის სამინისტროდან გამოითხოვა საჯარო ინფორმაცია. მასზე დაყრდნობით, ინსტიტუტის მიერ გამოქვეყნებულ ინფორმაციაში ნათქვამია, რომ „აღნიშნულ პერიოდში (2014–2015) სამინისტროს მიერ გაცემულმა დაფინანსებამ სულ შეადგინა 7 410 636.54 ლარი. სამინისტროს მიერ დაფინანსებულ პროექტებს შორის ყველაზე დიდი თანხა - 4 053 062.15 ლარი მოხმარდა კულტურული ღონისძიებების დაფინანსებას (ფესტივალი, სპექტაკლი, გამოფენა, კონცერტი)". სრულად... წყარო: idfi.ge