თბილისი. გაეროს ბავშვთა ფონდი (UNICEF) ეროვნული კანონმდებლობის ანალიზს აქვეყნებს ბავშვთა უფლებების კონვენციის და შეზღუდული შესაძლებლობის მქონე პირთა კონვენციის მიხედვით. „ანგარიშში წარმოდგენილია საქართველოს ეროვნული საკანონმდებლო ბაზის ანალიზი და განხილულია ძირითადი საკანონმდებლო ხარვეზები გაეროს ბავშვთა უფლებების კონვენციასა (შმდეგ - CRC) და შეზღუდული შესაძლებლობის მქონე პირთა უფლებების კონვენციასთან მიმართებაში. აგრეთვე, შემოთავაზებულია რეკომენდაციები საკანონმდებლო ცვლილებებისთვის”, ნათქვამია ორგანიზაციის ვებ-გვერდზე. სრულად... წყარო: unicef.ge

თბილისი. 1 ოქტომბერს, სახალხო დამცველმა სადღეღამისო სპეციალიზებულ დაწესებულებებში ხანდაზმულ პირთა უფლებრივი მდგომარეობის შესახებ მონიტორინგის ანგარიში წარმოადგინა. „სახალხო დამცველმა შესაბამისი რეკომენდაციებით მიმართა პასუხისმგებელ უწყებებს, რათა სათანადოდ განახორციელონ სახელმწიფო ზრუნვის ქვეშ მყოფი ხანდაზმული პირების უფლებების რეალიზაცია, უზრუნველყონ არსებული ხარვეზების აღმოფხვრა", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. საერთაშორისო გამჭვირვალობა საქართველო საზოგადოებრივი აზრის გამოკითხვის შედეგებს აქვეყნებს. გამოკითხვა შეეხო სამუშაო პირობებს, სამსახურის ტიპს და ზეგანაკვეთურ სამუშაოსდა ანაზღაურებას. „დაქირავებულ მუშაკთა 78% აღნიშნავს, რომ უკანასკნელი ექვსი თვის განმავლობაში ზეგანაკვეთური სამუშაო არ გაუწევია, 7% კი ზეგანაკვეთურად თითქმის ყოველდღე მუშაობს. ასეთ შემთხვევებში, ზეგანაკვეთური შრომა 62%-ს არ უნაზღაურდება, 22%-ს ყოველთვის უნაზღაურდება, დანარჩენს კი პერიოდულად", ნათქვამია ორგანიზაციის კვლევაში. გამოკითხვა ჩატარდა 2015 წლის აპრილ-მაისის პერიოდში „კავკასიის კვლევითი რესურსების ცენტრის" მიერ. სრულად... წყარო: www.transparency.ge

თბილისი. ახალგაზრდა ადვოკატებმა საქართველოს საკონსტიტუციო სასამართლოს ხარჯვითი ნაწილი შეისწავლეს და მონიტორინგის შედეგებზე ისაუბრეს. „მონიტორინგის შედეგების მიხედვით კი, საქართველოს საკონსტიტუციო სასამართლო, საქართველოში ერთ-ერთი ყველაზე მხარჯველ საჯარო დაწესებულებად შეიძლება ჩაითვალოს. საკონსტიტუციო სასამართლოს მიერ ხელფასების, პრემია-დანამატებისა და სამივლინებო ხარჯებისთვის სახელმწიფო ბიუჯეტიდან მოთხოვნილი თანხები კოლოსალურია და არ შეესაბამება ქვეყნის სოციალურ-ეკონომიკურ მდგომარეობას", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. საქართველოს პარლამენტმა 2014 წელს მიიღო კანონი „დისკრიმინაციის ყველა ფორმის აღმოფხვრის შესახებ". კანონით დისკრიმინაციის აღმოფხვრა და ზედამხედველობა სახალხო დამცველს დაევალა. ომბუდსმენი დისკრიმინაციასთან ბრძოლისა და ზედამხედველობის შესახებ 2015 წლის აგვისტოს ჩათვლით განხორციელებულ საქმიანობას ანგარიშში მიმოიხილავს. „ანგარიშში მიმოხილულია სახალხო დამცველის მიერ ცალკეული განცხადებების/საჩივრების მიღების, დასაშვებობის ეტაპის გავლისა და საბოლოო გადაწყვეტილების მიღების პროცედურები. ანგარიში აგრეთვე მოიცავს მტკიცებულებათა მოპოვება/შეგროვებისა და მტკიცების ტვირთის განაწილების თავისებურებებს, სასამართლო მეგობრის მოსაზრების წარდგენისა და მხარეთა მორიგების მიზნით ჩატარებული ზეპირი მოსმენის გამართვის სპეციფიკას", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. სახალხო დამცველმა სპეციალური პრევენციული ჯგუფის მიერ N7 დაწესებულებაში განხორციელებული ვიზიტის შესახებ ანგარიში გამოაქვეყნა. „აღსანიშნავია, რომ ვიზიტის დროს სპეციალური პრევენციული ჯგუფის წევრებს პატიმრების მიმართ ფიზიკური ძალადობის ან სიტყვიერი შეურაცხყოფის ფაქტების შესახებ ინფორმაცია არ მიუღიათ; თუმცა, დაწესებულებაში არსებული მძიმე საყოფაცხოვრებო პირობები, უსაფრთხოების ღონისძიებების გადაჭარბებული გამოყენების პრაქტიკა, არასათანადო სამედიცინო მომსახურება, სარეაბილიტაციო აქტივობების არარსებობა, ოჯახის წევრებთან და ზოგადად გარე სამყაროსთან საკმარისი კონტაქტის არარსებობა შეუძლებელს ხდის პატიმრების მიერ სასჯელის მოხდას მათი ღირსების პატივისცემის პირობებში", ნათქვამია ანგარიშში. სახალხო დამცველი იმედოვნებს, რომ სასჯელაღსრულების სამინისტრო გაატარებს ყველა საჭირო ღონისძიებას და პატიმრებს ადამიანის ღირსებასთან თავსებადი პატიმრობის პირობები შეექმნებათ. სრულად... წყარო: www.ombudsman.ge

თბილისი. საერთაშორისო გამჭვირვალობა – საქართველო აქვეყნებს საზოგადოებრივი აზრის გამოკითხვის შედეგებს სახელწოდებით: „ნეპოტიზმი, თანამდებობის ბოროტად გამოყენება, მექრთამეობა: საზოგადოებრივი აზრის გამოკითხვის შედეგები". „როგორც კვლევის შედეგებიდან ჩანს, გამოკითხულთა მხოლოდ 5% ამართლებს სრულად (1%) ან ნაწილობრივ (4%) თანამდებობის პირების მხრიდან ღია კონკურსის გარეშე თავიანთი ნათესავების, მეგობრების ან პარტიის წევრების საჯარო სექტორში დასაქმებას. რაც შეეხება პოზიტიურ ცვლილებებს, ამ მხრივ აღსანიშნავია, რომ, კვლევის მიხედვით, 2015 წელს საჯარო სამსახური კვლავაც დიდწილად თავისუფალია მექრთამეობისგან და ამ მხრივ 2013 წელთან შედარებით გაუმჯობესებაც აქვს", ნათქვამია განცხადებაში. სრულად... წყარო: www.transparency.ge

თბილისი. „საერთაშორისო გამჭვირვალობა საქართველო" საზოგადოებრივი აზრის გამოკითხვის შედეგებს აქვეყნებს. გამოკითხვა საჯარო სკოლებში ფულის შეგროვების საკითხს ეხებოდა. „იმ გამოკითხულთა 14%, რომელთა ოჯახის წევრიც საჯარო სკოლაში სწავლობს, აღნიშნავს, რომ უახლოესი 12 თვის განმავლობაში სკოლაში რაიმეს შესაძენად ან შესაკეთებლად ფული შეუგროვებია. 19% კი მიუთითებს, რომ ფული მასწავლებლებისთვის საჩუქრის შესაძენად შეუგროვებიათ. თუმცა, გამოკითხულთა უმეტესობა აღნიშნავს, რომ ასეთი ფაქტები იშვიათია. გამოკითხვის შედეგების თანახმად, საქართველოში კვლავ საკმაოდ ხშირია მოსწავლეების რეპეტიტორებთან მომზადება. რეპეტიტორებთან საჯარო სკოლის მოსწავლეების მეოთხედზე მეტი ემზადება. ზოგ შემთხვევაში იგივე პედაგოგებთან, რომლებიც მათ საჯარო სკოლებში ასწავლიან", აღნიშნულია ორგანიზაციის კვლევაში. სრულად... წყარო: www.transparency.ge

თბილისი. საერთაშორის გამჭვირვალობა საქართველო ბლოგპოსტს აქვეყნებს. კვლევა შეეხება მოქალაქეთა დამოკიდებულების ანალიზს საყოველთაო ჯანდაცვის პროგრამასთან დაკავშირებით. „2015 წელს ჩატარებული კვლევის მიხედვით, ქვეყანაში ჯანდაცვასთან დაკავშირებულ ორ უმთავრეს მიგნებას წარმოადგენს ის, რომ: 1. საქართველოს მინიმუმ 1.5 მილიონი ზრდასრული მოქალაქე მზად არის საკუთარი ჯანმრთელობის დაზღვევის ფინანსური ტვირთი სახელმწიფოსთან ერთად გაინაწილოს 2. საყოველთაო ჯანდაცვის გამოკითხული ბენეფიციარების 36% ჯერ კიდევ არ სარგებლობს გეგმიური ამბულატორიის მომსახურებებით, რაც ნიშნავს რომ სულ ცოტა 1.1 მილიონი ლარი იხარჯება 1.1 ბენეფიციარზე ისე, რომ ისინი ამ მომსახურებებით არ სარგებლობენ", ნათქვამია კვლევაში. სრულად... წყარო: www.transparency.ge

თბილისი. საერთაშორისო გამჭვირვალობა საქართველო მორიგ ბლოგპოსტს აქვეყნებს. ორგანიზაციამ გამოითხოვა „საჯარო ინფორმაცია სამეგრელო-ზემო სვანეთის მუნიციპალიტეტებიდან ა(ა)იპ-ებში 2014 წლის მაისის და 2015 წლის ივლისის მდგომარეობით დასაქმებულთა რაოდენობისა და თვის მანძილზე გასაცემი ხელფასის ოდენობების შესახებ". მიღებული ინფორმაციის თანახმად „თუ გავითვალისწინებთ საქართველოში არსებულ უმუშევრობის მაღალ მაჩვენებელს, მუნიციპალიტეტების მნიშვნელოვან ნაწილში ადგილობრივი თვითმმართველობა დასაქმების ერთ-ერთ ძირითად საშუალებად რჩება. თუმცა არაგონივრულად გაზრდილი საშტატო ერთეულები ხშირ შემთხვევაში მძიმე ტვირთად აწევს მუნიციპალიტეტის ისედაც მწირ საბიუჯეტო რესურსებს", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 26 სექტემბრიდან, განვითარებისა და დემოკრატიის ცენტრის (CDD) დამკვირვებლები საქართველოს ცენტრალურ საარჩევნო კომისიაში, საარჩევნო ადმინისტრაციის მოხელეთა სასერტიფიკაციო გამოცდების მიმდინარეობას დააკვირდებიან. როგორც ცნობილია, 3 სექტემბრიდან 20 სექტემბრის ჩათვლით სერტიფიცირების მსურველთა რეგისტრაცია შესაძლებელი იყო ინტერნეტის საშუალებით. სასერტიფიკაციო გამოცდის ჩაბარების მსურველთა რაოდენობამ შეადგინა 3220. გამოცდის გამოცხადებიდან ყველა დაინტერესებულ მხარეს შეეძლო ეხილა საგამოცდო ტესტები, როგორც ცესკოს ასევე სწავლების ცენტრის ვებ-გვერდებზე. გამოცდების ჩატარებას უზრუნველყოფს სსიპ „საარჩევნო სისტემების განვითარების, რეფორმებისა და სწავლების ცენტრი". გამოცდის ჩატარების ხანგრძლივობაა 1 საათი. გამოცდა ჩატარდება ელექტრონული ტესტირების მეთოდით. თითოეული გამოსაცდელისათვის ავტომატურად, შემთხვევითი შერჩევის მეთოდით შეირჩევა 30 საგამოცდო ტესტი. დადებითი შეფასების მისაღებად გამოსაცდელმა უნდა დააგროვოს 24 ქულა. გამსვლელი ქულის მიღების შემთხვევაში გამოსაცდელს ადგილზე გადაეცემა სერტიფიკატი. წყარო: განვითარებისა და დემოკრატიის ცენტრი

თბილისი. „საერთაშორისო გამჭვირვალობა საქართველო" მედიკამენტებთან და რეცეპტების სისტემასთან დაკავშირებით საზოგადოებრივი აზრის კვლევის შედეგებს აქვეყნებს. კვლევის თანახმად „1. გამოკითხულთა დაახლოებით ნახევრის შეფასებით მათზე და მათ ოჯახზე რეცეპტების სისტემაში განხორციელებულმა ცვლილებებმა უარყოფითი გავლენა მოახდინა. 2.წამლებზე ყოველთვიური დანახარჯები კვლავ საკმაოდ მაღალია", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტი აქვეყნებს ინფორმაციას საჯარო დაწესებულებებში დასაქმებულთა სტატისტიკას გენდერულ ჭრილში. ინსტიტუტისთვის მოწოდებული ინფორმაციისა და ვებ-გვერდებიდან დამუშავებული მონაცემების საფუძველზე ირკვევა, რომ „საქართველოს 141 საჯარო დაწესებულებაში დასაქმებულ თანამშრომელთა რაოდენობა ჯამში შეადგენს 72 726 ადამიანს. 141 საჯარო დაწესებულებაში დასაქმებულ საჯარო მოსამსახურეთა შორის 27 383 დასაქმებულია მთავრობის ადმინისტრაციასა და სამინისტროებში (სახელმწიფო მინისტრების აპარატების ჩათვლით), 407 აჭარის ა/რ-ის მთავრობის აპარატსა და სამინისტროებში, 33 117 სამინისტროების დაქვემდებარებულ საჯარო სამართლის იურიდიულ პირებსა და საქვეუწყებო დაწესებულებებში (56 დაწესებულება), 5 174 ადგილობრივ თვითმმართველობებში (42 მერია და გამგეობა), 5 488 დამოუკიდებელ სსიპ-ებსა და კომისიებში (17 დაწესებულება), ხოლო 1 157 პარლამენტის აპარატსა და მაჟორიტარი დეპუტატების ბიუროებში. ამასთან, ხაზი უნდა გავუსვათ იმასაც რომ წინამდებარე მასალაში წარმოდგენილი ნებისმიერი მონაცემი ასახავს მხოლოდ 141 საჯარო დაწესებულებაში (ძალოვანი სტრუქტურების ჩათვლით) 2015 წლის მარტის მდგომარეობით არსებულ სურათს". სრულად... წყარო: idfi.ge

თბილისი. ჯამპსტარტ ჯორჯია აქვეყნებს ახალ ვიზუალიზაციას: „ნაგავში გადაყრილი ფული". ორგანიზაციამ ვიზუალურად გამოსახა გარემოს დაბინძურებისთვის გათვალისწინებული ჯარიმები, მათი რაოდენობა და ბიუჯეტში შესული თანხები. „გარემოს დაბინძურებისთვის სხვადსხვა ოდენობის ჯარიმას ითვალისწინებს. 6 თვეში წესების დარღვევის გამო დაჯარიმდა 7284 ადამიანი, ჯარიმებიდან შემოსული თანხის საერთო რაოდენობამ კი 232 660 ლარს გადააჭარბა", ნათქვამია ფერად ინფოზე. ვიზუალიზაცია... წყარო: feradi.info

2015 წლის „ღია ბიუჯეტის ინდექსში" საქართველომ 100 შესაძლებელი ქულიდან 66 ქულა მიიღო, ავრცელებს ინფორმაციას საერთაშორისო გამჭვირვალობა საქართველო. გლობალური ანგარიში ორ წელიწადში ერთხელ ქვეყნდება. სრულად... წყარო: transparency.ge

თბილისი. საერთაშორისო გამჭვირვალობა საქართველო 1992-2015 წლებში საქართველოს სახელმწიფოს მიერ აღებული საგარეო ვალის შესახებ ინფორმაციას ავრცელებს. „საგარეო ვალი ძვირადღირებული ფინანსური რესურსია, რაც გადასახადის გადამხდელების, მათ შორის მომავალი თაობების ფისკალურ ტვირთს წარმოადგენს. მნიშვნელოვანია, საზოგადოებამ იცოდეს, რას ხმარდება ეს ძვირადღირებული ფინანსური რესურსი", ნათქვამია დოკუმენტში. სრულად წყარო: transparency.ge

თბილისი. ორგანიზაცია „მწვანე ალტერნატივა" ავრცელებს შენიშვნებსა და კომენტარებს თბილისის მერიის მიერ გავრცელებული თბილისის გარემოსდაცვითი სტრატეგიის (2015–2020) დოკუმენტის შესახებ. „დოკუმენტი ზოგადი ხასიათისაა. მართალია, ქალაქში არსებული პრობლემების აღწერა შეესაბამება არსებულ სიტუაციას, მათი გადაჭრის გზები და მიდგომები არ არის ჩამოყალიბებული. ეს დოკუმენტის მთავარ ნაკლოვანებას წარმოადგენს, ვინაიდან, სწორედ ამ გზებით უნდა მიაღწიოს ქალაქმა დასახულ მიზნებს. ამასთან, ბუნდოვანია დროში გაწერილად მოსალოდნელი შედეგები და სტრატეგიის განხორციელების კავშირი ქალაქის ბიუჯეტის ფორმირებასთან, არ მოიცავს ანგარიშგებისა და შეფასების ინდიკატორებს, რაც საბოლოო ჯამში გაართულებს როგორც დოკუმენტის შესრულებას, ასევე მის მონიტორინგს და განხორციელების შეფასებას", ნათქვამია ორგანიზაციის ვებგვერდზე. შენიშვნები და კომენტარები... წყარო: greenalt.org  

თბილისი. 4 აგვისტოს საქართველოს იურიდიული ფირმების ასოციაციის (სიფა) წევრმა ადვოკატებმა გამოაქვეყნეს სახელმძღვანელო „ადვოკატებისთვის ფულის გათეთრების პრევენციული ზომების თაობაზე". სახელმძღვანელო საშუალებას იძლევა, გაანალიზდეს ფულის გათეთრების თაობაზე არსებული საკანონმდებლო რეგულირების შესაბამისობა საერთაშორისო სტანდარტებთან და ადვოკატებს მიეწოდოთ ინფორმაცია ფულის გათეთრების სფეროში კანონით დადგენილი ვალდებულების შესრულების თაობაზე. საქართველოს იურიდიული ფირმების ასოციაციამ სახელმძღვანელო მოამზადა ფონდი „ღია საზოგადოება საქართველოს" მიერ დაფინანსებული პროექტის „სახელმწიფო პოლიტიკის გაუმჯობესება ფულის გათეთრების და ტერორიზმის დაფინანსების სფეროში" ფარგლებში. სახელმძღვანელო... წყარო: osgf.ge

თბილისი. საქართველოს დემოკრატიული ინიციატივა აქვეყნებს მორიგ საინფორმაციო ბიულეტენს ადამიანის უფლებათა შესახებ. სადაც მიმოხილულია ადამიანის უფლებების სფეროს მნიშვნელოვანი მოვლენები და საკანონმდებლო ინიციატივები, მათ შორის, აშშ სახელმწიფო დეპარტამენტის ანგარიში საქართველოში ადამიანის უფლებათა შესახებ, გაეროს რეზოლუცია საქართველოში იძულებით გადაადგილებულ პირთა და ლტოლვილთა სტატუსის შესახებ და სხვა. სრულად... წყარო: gdi.ge

თბილისი. „ახალგაზრდა ადვოკატებმა" საზოგადოებრივი მაუწყებლის გენერალური დირექტორის, მოადგილეების, სამეურვეო საბჭოს თავჯდომარისა და მისი წევრების, მონიტორინგის საბჭოსა და საზოგადოებრივი საბჭოს წევრების შრომითი ანაზღაურების, პრემიების, დანამატებისა და სამივლინებო ხარჯების შესახებ მონიტორინგი მოამზადა. შესწავლილი მასალის მიხედვით, ორგანიზაცია აცხადებს, რომ სახელფასო პოლიტიკა მკვეთრად დისკრიმინაციულია.  „საზოგადოებრივმა მაუწყებელმა არ დააკმაყოფილა საჯარო ინტერესი და არ გასცა ინფორმაცია მაუწყებელზე მომზადებული საზოგადოებრივი და პოლიტიკური კატეგორიის საავტორო გადაცემათა წამყვანების ყოველთვიური შრომითი ანაზღაურების, პრემიების, დანამატებისა და სამივლინებო ხარჯების შესახებ. მაუწყებელმა უნდა უპასუხოს საჯარო ინტერესს და სახელფასო პოლიტიკის მიმართ ინფორმაცია ხელმისაწვდომი, პროაქტიურად გამოქვეყნებადი გახდეს მაუწყებლის ოფიციალურ გვერდზე. ამასთან, მონიტორინგმა აჩვენა, რომ სამთავრობო პოლიტიკა ე.წ. „ქამრების შემოჭერის" მიმართულებით, საზოგადოებრივ მაუწყებელზე, როგორც სახელმწიფო ბიუჯეტიდან დაფინანსებულ სტრუქტურაზე, არ ასახულა", ნათქვამია ორგანიზაციის განცხადებაში. სრულად... წყარო: barristers.ge

თბილისი. ინფორმაციის თავისუფლების განვითარების ინსტიტუტი (IDFI) ათონელის ქუჩაზე მდებარე რეზიდენციის საკითხს კვლავ უბრუნდება და მორიგ პუბლიკაციას აქვეყნებს: „ათონელის რეზიდენციის ბედი კვლავ უცნობია". ინსტიტუტის ვებგვერდზე ნათქვამია, რომ მას შემდეგ რაც ინსტიტუტმა პირველ ივლისს გამოაქვეყნა რეზიდენციის შესახებ დოკუმენტაცია „პრესაში გავრცელდა ინფორმაცია, რომ ათონელის რეზიდენციასთან დაკავშირებით არსებულ უთანხმოებაში მთავრობასა და პრეზიდენტთან ერთად აქტიურად იყო ჩართული აგრეთვე საქართველოს უშიშროების საბჭოს აპარატიც". მაღალი საზოგადოებრივი ინტერესიდან გამომდინარე ინსტიტუტმა ამჯერად მთავრობის ადმინისტრაციიდან და ეროვნული უშიშროების საბჭოს აპარატიდან გამოითხოვა ათონელის ქუჩაზე არსებულ რეზიდენციასთან დაკავშირებით არსებული მიმოწერის ასლები. 5 აგვისტოს გამოქვეყნებულ პუბლიკაციაში ინსტიტუტი საზოგადოებას აწვდის მათ ხელთ არსებულ სრულ დოკუმენტაციას, „რომელიც მოიცავს 2014 წლის ოქტომბრიდან (როდესაც დღის წესრიგში დადგა უშიშროების საბჭოს აპარატის მთავრობის ადმინისტრაციიდან გადასვა) დღემდე აღნიშნულ უწყებებს შორის არსებულ მიმოწერას". სრულად... წყარო: idfi.ge

თბილისი. საერთაშორისო გამჭვირვალობა – საქართველო ახალ ბლოგპოსტს აქვეყნებს: „ჯანდაცვის სამინისტრომ უნდა დაასაბუთოს, რატომ შეარჩია გლობალ ალიანსი რეფორმის განსახორციელებლად". ორგანიზაციის ინფორმაციით, მიმდინარე წლის გაზაფხულზე საქართველომ მთავრობამ საყოველთაო ჯანდაცვის პროგრამის არსებითი კორექტირება გადაწყვიტა. „ამ მიზნის მისაღწევად საქართველოს შრომის, ჯანმრთელობისა და სოციალური დაცვის სამინისტრომ ... 7 აპრილს ... გამარტივებული სახელმწიფო შესყიდვის ხელშეკრულება გაუფორმა ბრიტანულ კომპანია გლობალ ალიანსს...". საერთაშორისო გამჭვირვალობა – საქართველოს მიერ მოპოვებული ოფიციალური ინფორმაციის საფუძველზე, „შეუძლებელია ითქვას, რომ ამ კომპანიას აქვს საკმარისი გამოცდილება და ექსპერტიზა, რომ სათანადოდ დაგეგმოს და განახორციელოს საქართველოს ჯანდაცვის სისტემის ყოვლისმომცველი რეფორმა". სრულად... წყარო: transparency.ge