თბილისი. საქართველოს ახალგაზრდა იურისტთა ასოციაციის კვლევით, კულტურის სფეროში განხორცილებულმა ცვლილებებმა და რეორგანიზაციამ აჩვენა, რომ გადაწყვეტილებების მიზანი კულტურისა და მეცნიერების სფეროს კონტროლი და ცენზურაა. ორგანიზაციამ 2021 წლიდან დღემდე იმუშავა 12 საქმეზე. საია გიზიარებთ არსებულ საქმეებში გამოკვეთილ ტენდენციებს და პრობლემებს. სრულად... წყარო: gyla.ge

აჭარა. „საერთაშორისო გამჭვირვალობა - საქართველომ” შეისწავლა 2021 წლის 3 დეკემბრიდან 2022 წლის 31 დეკემბრამდე, ქალაქ ბათუმის 2021 წლის მოწვევის საკრებულოს მიერ გაწეული საქმიანობა. „ანგარიში მოიცავს ძირითად მიგნებებსა და რეკომენდაციებსაც, რომელთა გათვალისწინებაც დაეხმარება საკრებულოს მომავალ საქმიანობაში. ანგარიშის საფუძვლად გამოყენებულია საკრებულოდან გამოთხოვილი საჯარო ინფორმაცია, „საერთაშორისო გამჭვირვალობა - საქართველოს” დაკვირვებები და მედიის მასალები“. სრულად... წყარო: transparency.ge

თბილისი. მედიის ადვოკატირების კოალიცია ეხმიანება „ტელეკომპანია პირველის“ ყოფილი წამყვანის, ვასილ დაბრუნდაშვილის საჯარო განცხადებას ჟურნალისტის კუთვნილი ბინიდან პირადი დოკუმენტების დაკარგვის და მის მიმართ შესაძლო თვალთვალის თაობაზე. „სპეციალურმა საგამოძიებო სამსახურმა შეტყობინება შინაგან საქმეთა სამინისტროს ექვსი დღის შემდეგ გადაუგზავნა, ჟურნალისტი კი მნიშვნელოვანი საფრთხის შესახებ ინფორმაციის გასაჯაროებიდან რამდენიმე დღის შემდეგ, 19 ივლისს გამოიკითხა. მედიის წინაშე არსებული გამოწვევების და მზარდი საფრთხეების გათვალისწინებით, ხელისუფლება ვალდებულია ჰქონდეს მყისიერი რეაგირება ჟურნალისტების თვალთვალის და დაშინების ყველა მცდელობასთან დაკავშირებით“, ნათქვამია ორგანიზაციის განცხადებაში. იხილეთ განცხადება ვრცლად... წყარო: mediacoalition.ge

20 ივლისს, 16:00 საათზე, საქართველოს ინოვაციებისა და ტექნოლოგიების სააგენტოში/ტექნოპარკში,პროექტის ფარგლებში - პანელური დისკუსიების ციკლი თემაზე „ქვეყნის განვითარება (ეკონომიკა, დემოკრატია, მშვიდობა) და შრომის ბაზარი - პედაგოგიკის გამოწვევები 2023“, წარიმართება პანელური დისკუსია თემაზე „საკვანძო კომპეტენციები და STEM-ის სწავლების გამოწვევები დაწყებით საფეხურზე“ (პროექტის შესახებ დამატებითი ინფორმაცია შეგიძლიათ იხილოთ ბმულზე. სრულად...

ამ წუთებში, საქართველოს ახალგაზრდა იურისტთა ასოციაცია კვლევის პრეზენტაციას მართავს თემაზე - „ევროკომისიის 2022 წლის 17 ივნისის რეკომენდაციების შესრულების მდგომარეობა საქართველოში“. მისამართი: თბილისი, ჭავჭავაძის გამზირი #37 (სასტუმრო „პულმანი“ აქსის თაუერსი, შეხვედრების ოთახი #4)

იმერეთი. საერთაშორისო გამჭვირვალობა - საქართველოს (TI Georgia) სამოქალაქო საბჭოს ინიციატივით, წყალტუბოს საკრებულოში, სოფელ გუმათის და სოფელ ბანოჯას დამაკავშირებელი გზის საფარის დაგების მოთხოვნით პეტიცია დარეგისტრირდა. პეტიციას  276 მოქალაქე აწერს ხელს. „ამ გზის მოწესრიგება  10 სოფელს (რიონი, ზარათი, გუმათი, სორმონი, ჭოლები, ოფურჩხეთი, ჟონეთი, დერჩი, დღნორისა, მამაწმინდა) პირდაპირ დააკავშირებს მუნიციპალურ ცენტრს. დღეს ამ სოფლების მაცხოვრებლებს მხოლოდ ქუთაისის გავლით  შეუძლიათ წყალტუბოში მოხვედრა“. ორგანიზაცია მოუწოდებს წყალტუბოს საკრებულოს კანონით დადგენილ ვადაში განიხილოს და მხარი დაუჭიროს მოქალაქეთა  პეტიციას. სრულად... წყარო: ორგანიზაციის გვერდი სოციალურ ქსელში

რაჭა-ლეჩხუმი. „უფლებები საქართველოს“ ამბროლაურის სამართლებრივი დახმარების ცენტრის იურისტმა ანა ჯელაძემ ცაგერში საინფორმაციო-საკონსულტაციო შეხვედრები გამართა. შეხვედრებს ესწრებოდნენ სკოლის დირექტორები, პედაგოგები, მშობლები და მოსწავლეები.  „მონაწილეებმა ისაუბრეს თავიანთ რეგიონში გენდერული თანასწორობის კუთხით არსებულ პრობლემებზე და ერთმანეთს საკუთარი გამოცდილება გაუზიარეს. „უფლებები საქართველოს“ იურისტმა მათ ამბროლაურის სამართლებრივი დახმარების ცენტრის საქმიანობა და უფასო იურიდიული დახმარებით სარგებლობის პირობები გააცნო. ასევე, მიაწოდა ინფორმაცია ეკონომიკური გაძლიერების კუთხით თავიანთ რეგიონში არსებულ შესაძლებლობებზე.“ სრულად... წყარო: rights.ge

თბილისი. საერთაშორისო გამჭვირვალობა - საქართველომ კიდევ ერთი საქმე მოიგო. ორგანიზაციის იურისტების დახმარებით, ქუთაისის სააპელაციო სასამართლომ საქმე შეწყვიტა და უდანაშაულოდ ცნო მოქალაქე ვაჟა თავართქილაძე, რომელსაც საკუთარი საშაურმის ვიტრინაზე გამოკრული ჰქონდა წარწერა: ბათუმის ზონდერი მერი - ხალხის მტერი. ამ გადაწყვეტილებამდე, ბათუმის საქალაქო სასამართლომ მოქალაქე 1000 ლარით დააჯარიმა. სრულად... წყარო: ორგანიზაციის გვერდი სოციალურ ქსელში

თბილისი. 17 ივლისს, პარტნიორობა ადამიანის უფლებებისთვის (PHR) ადვოკატები და ახალგაზრდა ქალი ფეხბურთელები ქუთაისიდან, აშშ-ს ელჩს, კელი დეგნანს შეხვდნენ.  „შეხვედრაზე ისაუბრეს ქალი ადვოკატებისა და უფლებადამცველების მიერ გაწეულ შრომაზე ქალთა უფლებების მიმართულებით. ასევე, ხაზი გაესვა ქალი ფეხბურთელების გამბედაობას და სწრაფვას სამართლიანობისკენ.  აშშ-ს მთავრობა, USAID-ის ჩათვლით, მზად არის მუდმივად შეუწყოს ხელი ქართველი ხალხის საყოველთაო უფლებების დაცვას“. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „საქართველოს ბავშვები“ გიზიარებთ ანა ნინუას ჩანაწერს მშობლებისთვის: ბავშვი და „დათვური სამსახური“. უფროსებს ბავშვებთან ურთიერობისას ხშირად გვჭირდება ნებისყოფა, რადგან ბავშვებმა ამა თუ იმ აქტივობის შესრულებას შეიძლება ბევრი დრო მოანდომონ ან ისე არ გამოუვიდეთ, როგორც ჩვენ ვისურვებდით. ამის გამო, მშობლები შვილებს ხანდახან იმაზე მეტად ვეხმარებით, ვიდრე მათ ეს სჭირდებათ. „დათვური სამსახურის“ გაწევა ბავშვის განვითარებას აფერხებს. წაიკითხეთ რჩევები, რომ ბავშვებისთვის უფრო მეტად მხარდამჭერები ვიყოთ, ვიდრე მათ ნაცვლად ვაკეთოთ საქმე. არ გააკეთოთ საქმე ბავშვის ნაცვლად... მიეცით ბავშვს საშუალება, გამოიმუშაოს დამოუკიდებლობის უნარები, დაუსვით მიმანიშნებელი შეკითხვები და არ გასცეთ მზა ინსტრუქციები... წაახალისეთ ბავშვის დამოუკიდებელი თამაში, არ დაუშალოთ ბავშვს დააკვირდეს მიმდინარე მოვლენებს. ნება დართეთ, დაუშვას შეცდომები... შეაქეთ გამოვლენილი ინიციატივისთვის... არ ჩაერიოთ ყველაფერში... აღიქვით ბავშვის აზრები სერიოზულად... ეცადეთ სახლში იყოს სივრცე დამოუკიდებელი აქტივობებისათვის... განსაზღვრეთ ბავშვის საშინაო საქმე... სრულად... წყარო: ორგანიზაციის გვერდი სოციალურ ქსელში

თბილისი. ელმირა ჯინჯოლია ერთ-ერთია კონფლიქტით დაზარალებულ იმ 80 მოქალაქეს შორის, რომლებმაც ევროკავშირისა და გაეროს განვითარების პროგრამის მხარდაჭერით ისარგებლეს. ელმირამ მეწარმეთა ტრენინგი გაიარა, საგრანტო პროგრამაში მიიღო მონაწილეობა და ყავახანას გახსნის ბიზნეს იდეა რეალობად აქცია. „ვისწავლეთ ბიზნეს გეგმის შედგენა. ჩემი ბიზნეს იდეა მოეწონათ, დამთანხმდნენ დაფინანსებაზე და პროექტის ფარგლებში შემიძინეს ყავის დასაფქვავი და ჩამოსასხმელი აპარატები. ეს არის ჩემი პირველი წარმატებული პროექტი, რომელმაც თავდაჯერებულობა შემძინა. მომავალში, ვაპირებ, გავაფართოვო ბიზნესი და ავიყვანო დამხმარეები“. სრულად... წყარო: ევროკავშირის გვერდი სოციალურ ქსელში

19 ივლისს, 19:30 საათზე, მანდალა გამართავს პოეზიის საღამოს. სრულად...

თბილისი. „უფლებები საქართველოს“ იურისტებმა უკრაინის მოქალაქეებისათვის საინფორმაციო შეხვედრა გამართეს. „შეხვედრის ფარგლებში მონაწილეებმა ბინადრობის ნებართვის მოპოვების, ბიზნესის რეგისტრაციის, სოციალურ სერვისებზე წვდომის და სხვა აქტუალურ საკითხებზე იმსჯელეს“. სრულად... წყარო: ორგანიზაციის გვერდი სოციალურ ქსელში

თბილისი. სამი სამოქალაქო საზოგადოების ორგანიზაციის შეფასებით, იუსტიციის უმაღლესი საბჭოს გამჭვირვალობის ხარისხი კიდევ უფრო გაუარესდა. „იუსტიციის საბჭოს სხდომების წინა დღეს დანიშვნა, სხდომების თარიღისა და დროის ქაოტური გადადება,  ართულებს სადამკვირვებლო ორგანიზაციების მუშაობას და კიდევ ერთხელ ნათლად აჩვენებს იუსტიციის საბჭოს ანგარიშვალდებულების არარსებობას და მისი საქმიანობის გამჭვირვალობის ხარისხს“. სრულად... წყარო: gdi.ge

თბილისი. „მაკ ჯორჯიას“ პროექტ „მშობლის სკივრის” ფარგლებში, თბილისში, სასტუმრო „სტამბაში“ მშობლებთან შეხვედრა გაიმართა. შეხვედრას გაუძღვა ნეიროფსიქოლოგი თამარ გაგოშიძე. სადისკუსიო თემა იყო - „სოციალურ-ემოციური განვითარება და სპეციალური საჭიროების მქონე მოზარდი“.  „„მშობლის სკივრი“ ყოველთვის ცდილობს მშობლებს მიაწოდოს მათთვის საჭირო და საინტერესო, ამავდროულად სანდო და გადამოწმებული ინფორმაციები და რესურსები. პირისპირ შეხვედრების ინიციატივის ფარგლებში, ვცილობთ ერთმანეთს შევახვედროთ სხვადასხვა ინტერესების და საჭიროებების მქონე მშობლები, რათა ერთმანეთს გაუზიარონ თავიანთი გამოცდილება“, ნათქვამია მაკ ჯორჯიას გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

კახეთი. სოციალური სამართლიანობის ცენტრი ეხმაურება სახელისუფლებო მედიასაშუალებების მიერ გავრცელებულ არასწორ ინფორმაციას წინანდალში ორგანიზებულ შეხვედრასთან დაკავშირებით. „სახელისუფლებო მედია საშუალებებმა ამ შეხვედრას სრულიად გაუმართლებელი პოლიტიკური კონოტაცია მისცეს ისე, რომ ჩვენთან, როგორც ამ შეხვედრის ორგანიზატორებთან არც კი გადაამოწმეს შეხვედრის მიზნებისა და შინაარსის შესახებ ინფორმაცია. სინამდვილეში, წინანდალში მიმდინარე სამდღიანი გასვლითი შეხვედრა კონფლიქტებისა და სამშვიდობო პოლიტიკის, ასევე ეთნიკური და რელიგიური უმცირესობების უფლებების დაცვისა და ინკლუზიის საკითხებს დაეთმო. შეხვედრაზე მოწვეული იყო ქართული ოცნების არა ერთი წევრი, თუმცა ღონისძიებას არცერთი მათგანი არ შეუერთდა. ამ ფონზე სრულიად დაუსაბუთებლად და თვითნებურად სახელისუფლებო მედია ირწმუნება, რომ წინანდალში „რევოლუციური გეგმა“ მზადდებოდა და ამ შეხვედრას ბიზნესმენი თემურ ჭყონია და პრეზიდენტი, სალომე ზურაბიშვილიც ესწრებოდნენ. ხაზგასმით აღვნიშნავთ, რომ ჩვენს ღონისძიებასთან პრეზიდენტსა და ბიზნესმენს არანაირი კავშირი არ ჰქონიათ და მათ მონაწილეობა არ მიუღიათ შეხვედრის არცერთ კომპონენტში. უკვე რამდენიმე წელია პოლიტიკური პოლარიზაციის მაღალი დონე და სახელისუფლებო მედიის პროპაგანდისტული მიდგომები ართულებს საზოგადოებრივ ინტერესებზე დაფუძნებული დღის წესრიგის შექმნას და ამ დღეებში მიმდინარე მოვლენები ამის აშკარაა მაგალითია. ამგვარი აგრესიული თავდასხმების მიზანი სამოქალაქო ორგანიზაციების მუშაობის პარალიზება და აპათიის დათესვაა. პოლარიზაციისა და მტრობის კულტურის ხელოვნური კულტივირების მიუხედავად, ჩვენ მომავალშიც შევეცდებით შევქმნათ შინაარსზე, საზოგადოებრივ ინტერესებზე და დემოკრატიულ კულტურაზე დაფუძნებული სივრცეები პოლიტიკურ, აკადემიურ და საზოგადოებრივ ჯგუფებს შორის“, ნათქვამია განცხადებაში. სოციალური სამართლიანობის ცენტრი ყალბი ინფორმაციის გავრცელების საკითხზე ჟურნალისტური ეთიკის ქარტიას მიმართავს. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს (TI Georgia) ინფორმაციით, ქუთაისის მერიამ თვენახევრის დაფუძნებულ კომპანიას პირდაპირი შესყიდვით მსხვილი კონტრაქტი გაუფორმა. „„ქართული ოცნების“ შემომწირველის კომპანიამ შპს „დ-კ ქონსტრაქშენმა“  დაარსებიდან თვენახევარში 214,524 ლარის კონტრაქტი მიიღო გამარტივებული (პირდაპირი) შესყიდვის გზით. შპს „დ-კ ქონსტრაქშენი“ 2023 წლის 4 აპრილს დაარსდა და თვენახევარში, 18 მაისს ქუთაისის მერიისგან 214,524 ლარის კონტრაქტი მიიღო. მერიამ პირდაპირი შესყიდვით ხელშეკრულება ბიზნესსაქმიანობის გამოცდილების არმქონე კომპანიას გაუფორმა“. სრულად... წყარო: transparency.ge

18 ივლისს, 19:00 საათზე, საქართველოს სტრატეგიისა და საერთაშორისო ურთიერთობების კვლევის ფონდი (რონდელის ფონდი) უმასპინძლებს დისკუსიას თემაზე „რუსეთ-საქართველოს შორის ოკუპირებული აფხაზეთის გავლით სარკინიგზო მიმოსვლის აღდგენის მოსალოდნელი პოლიტიკური შედეგები“. მისამართი: თბილისი, შიო ჩიტაძის ქ.3ა, (რონდელის ფონდი)

18 ივლისს, 14:00 საათზე, არასამთავრობო ორგანიზაცია „დევნილები დევნილებისათვის“ იუსტიციის სახლის წინ საპროტესტო აქციას გამართავს. თემა: აღუდგინონ ყველა ემიგრანტ დევნილს საქართველოს მოქალაქეობა.

ამ წუთებში, „საფარის“ ოფისში უცხო ქვეყნის მოქალაქის გაუპატიურების საქმეზე პრესკონფერენცია მიმდინარეობს. თემა: „საფარმა“ საჩივარი შეტანა საქმეში ჩართული პოლიციელების მიერ ჩადენილი სამოხელეო დანაშაულების ფაქტზე და ითხოვს მათ სისხლისსამართლებრივ პასუხისგებაში მიცემას.

ამ წუთებში, ტოლერანტობის და მრავალფეროვნების ინსტიტუტი (TDI) საქართველოში უცხოელთა უფლებრივი მდგომარეობისა და რასიზმის შესახებ მრგვალი მაგიდის ფორმატის დისკუსიას გამართავს. მისამართი: თბილისი, გუდიაშვილის #3 (სასტუმრო „ვინდჰემ გრანდ თბილისი“)

თბილისი. სოციალური სამართლიანობის ცენტრის ცნობით, საარსებო შემწეობა ის ფულადი დახმარებაა, რასაც 660 000 - ზე მეტი სოციალურად დაუცველი ადამიანი ყოველთვიურად იღებს.  „საარსებო შემწეობა მცირეა - იგი საარსებო მინიმუმს მნიშვნელოვნად ჩამორჩება და ადამიანების მინიმალური საჭიროებების დაკმაყოფილებას შეუძლებელს ხდის. ინფლაციის მიუხედავად, ზრდასრულ პირებზე გათვალისწინებული ყოველთვიური საარსებო შემწეობა 2015 წლის შემდგომ არ გაზრდილა“. სრულად... წყარო: ორგანიზაციის გვერდი სოციალურ ქსელში