თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: ტყიბული და სამართლიანი ტრანზიცია: გამოწვევები და შესაძლებლობები. „ამ ტექსტის მიზანი ქვანახშირზე დამოკიდებული რეგიონების ალტერნატიული განვითარების შესახებ არსებული ძირითადი დისკურსებისა და დაგროვებული გამოცდილების მოკლე მიმოხილვაა. მიმოხილვას სამართლიანი ტრანზიციის კონცეფციის განხილვით დავიწყებთ, რომელიც ეკონომიკური ტრანსფორმაციის დღეს არსებულ ჩარჩოებს შორის ყველაზე გავრცელებულია. ამის შემდეგ იმ ინტერვენციებს მიმოვიხილავთ, რომლებიც სამართლიანი სოციოეკონომიკური ტრანსფორმაციისკენაა მიმართული და სამართლიანი ტრანზიციის პრაქტიკულ ნაბიჯებად თარგმნის მაგალითებს წარმოადგენს. ბოლოს ალტერნატიული განვითარების ხელშეწყობის პროცესში სხვადასხვა ჩართული მხარის – პროფკავშირებისა და სხვადასხვა სამოქალაქო ორგანიზიციის – როლზეც ვისაუბრებთ, რადგან გააზრებული და კოორდინირებული მოქმედების გარეშე სამართლიანი ტრანზიციის უზრუნველყოფა შეუძლებელია“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კოალიცია მედიის ადვოკატირებისთვის მიიჩნევს, რომ ტელეკომპანია „მთავარის” მიერ მომზადებული სიუჟეტის გამო სისხლის სამართლის გამოძიების დაწყება, წარმოადგენს უმწვავეს, არათანაზომიერ რეაგირებას და მედიის თავისუფლებაში ჩარევის ძალზედ სახიფათო პრეცედენტს. „იმ პირობებში, როდესაც აშკარაა კონკრეტულად ტელეკომპანია „მთავარის” მიმართ ხელისუფლების უარყოფითი განწყობა (მაგალითად, სახელმწიფო თანამდებობის პირები საჯაროდ უცხადებდნენ ბოიკოტს არხს) და როდესაც საქართველო არაერთხელ მოხვდა მსოფლიოს ყურადღების ცენტრში დეზინფორმაციისა და ყალბი ანგარიშებით ანტიდასავლური პროპაგანდის ფაქტების სიმრავლის გამო, განსაკუთრებით შემაშფოთებელია, სუს-ის მიერ „მთავარ” არხზე გასული სიუჟეტის „საბოტაჟად” შეფასება. აღნიშნული ქმედება, რეპრესიული მექანიზმის შერჩევითად გამოყენების შთაბეჭდილებას ქმნის. ვფიქრობთ, რომ სატელევიზიო სიუჟეტის გამო საბოტაჟის მუხლით სისხლისსამართლებრივი დევნის დაწყებას, შეიძლება ჰქონდეს შეუქცევადი მსუსხავი ეფექტი ხელისუფლების მიმართ კრიტიკულად განწყობილი ყველა მედიასაშუალებებისთვის და დააზარალოს მოქალაქეთა მიერ ხელისუფლების კონტროლის იდეა“, ნათქვამია განცხადებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება სოციალური აგენტების მიერ დაანონსებულ გაფიცვას. ორგანიზაცია საგანგაშოდ მიიჩნევს იმ ფაქტს, რომ ჯანდაცვის სამინისტრო, როგორც ქვეყანაში შრომითი უფლებების დაცვასა და სოციალური დიალოგის ხელშეწყობაზე პასუხისმგებელი უწყება, უარს ამბობს საკუთარი დასაქმებულებისთვის ბაზისური შრომითი პირობების შექმნაზე და ვერ უზრუნველყოფს მოლაპარაკებების სამართლიან და თანასწორ გარემოს. EMC მოუწოდებს ჯანდაცვის სამინისტროს, დააკმაყოფილოს სოციალური აგენტების სამართლიანი მოთხოვნები. სრულად... წყარო: emc.org.ge

თბილისი. სამოქალაქო საზოგადოების ორგანიზაციები ეხმაურებიან საქართველოში გერმანიის ფედერაციული რესპუბლიკის ელჩის, ბატონი ჰუბერტ ქნირშის განცხადებას, რომელიც 25 ივნისს, გერმანიის საელჩოს ოფიციალური სოციალური ქსელის (Facebook) გვერდზე გამოქვეყნდა. „მიმართვაში ელჩი აფასებს საქართველოში მოქმედი არასამთავრობო ორგანიზაციის კრიტიკულ პოზიციას, რომელიც გაეროს ბავშვის უფლებათა კომიტეტის წევრობის კანდიდატად, საქართველოს პარლამენტის წევრის, სოფიო კილაძის წარდგენას ეხება. სახელმწიფოს მიერ წარმოდგენილი კანდიდატი გამოირჩევა სამოქალაქო საზოგადოებასთან ღია დაპირისპირებით. ის სიტყვიერად თავს ესხმის უფლებადამცველებს, შედის კონფრონტაციაში ადამიანის უფლებათა აქტივისტებთან, გამოირჩევა ჰომოფობიური და სხვაგვარი დისკრიმინაციული განწყობებით. განსაკუთრებით უნდა აღინიშნოს მისი უარყოფითი დამოკიდებულება ლგბტქ თემის წარმომადგენელთა მიმართ. აღნიშნული ფაქტები აღწერილია სხვადასხვა საერთაშორისო და ადგილობრივი ორგანიზაციების განცხადებებში და ფართოდ არის გაშუქებული არაერთი მედია საშუალების მიერ. აღნიშნულის გამო საზოგადოებამ არაერთ პროტესტის ფორმას მიმართა. ამიტომ, არასამთავრობო ორგანიზაციების განცხადება არა ქალბატონ კილაძეზე პერსონალური თავდასხმა, არამედ სახელმწიფოს მიერ ზემოთქმული პრინციპების უგულვებელყოფის შეფასებაა. ეს კი სამოქალაქო საზოგადოების ორგანიზაციების საქმიანობის ნაწილი და ამავდროულად, მოვალეობაცაა“. სრულად... წყარო: phrgeorgia.wordpress.com

თბილისი. პარტნიორობა ადამიანის უფლებებისთვის (PHR) ავრცელებს განცხადებას პოლიციის მხრიდან, არასრულწლოვნის მიმართ, სავარაუდო ძალადობასთან დაკავშირებით. ორგანიზაცია მიუთითებს, რომ დედის დასახმარებლად მიმავალი არასრულწლოვანი სამართალდამცავებმა უსაფუძვლოდ შეაჩერეს, მოსთხოვეს პირადობის დამადასტურებელი მოწმობა, ჩაუტარეს ზედაპირული შემოწმება და ცდილობდნენ გადაეღოთ ფოტო. ბავშვმა კი შესაბამისი საფუძვლის მითითება მოითხოვა მათგან, სამართალდამცავები გაღიზიანდნენ და უკანონოდ შეეცადნენ ბავშვის მანქანაში ჩასმას. აღნიშნული უკანონო ქმედებების და მუქარის შემდეგ არასრულწლოვანი შეუძლოდ გახდა, თუმცა პოლიციელები მაინც აგრძელებდნენ ძალის გამოყენებით მოზარდის მანქანაში გადაყვანას. ორგანიზაციის განცხადებით, ბავშვმა მხოლოდ მოქალაქეების დახმარებით დააღწია თავი პოლიციას და საქმეს ათეულობით მოწმე ჰყავს, ერთერთმა მოქალაქემ ინციდენტის ვიდეოც კი გადაიღო. „PHR-მა საქმეში ჩართვისთანავე გამოძიების დაწყების მოთხოვნით დამატებით მიმართა სახელმწიფო ინსპექტორის სამსახურს და ითხოვა მტკიცებულებების დაუყოვნებლივ შეგროვება. თუმცა ამ დრომდე გამოძიება არ დაწყებულა, შესაბამისად არ მომხდარა მტკიცებულებათა მოპოვება. ვინაიდან საქმეში ფიგურირებენ სამართალდამცავი ორგანოს თანამშრომლები არსებობს მტკიცებულებათა განადგურების მაღალი რისკი, შესაბამისად, სახელმწიფო ინსპექტორის სამსახურის მიერ გამოძიების დაწყების ხელოვნურად დაყოვნება საფრთხის ქვეშ აყენებს საქმეზე ჭეშმარიტების დადგენას და ზიანს აყენებს ბავშვის საუკეთესო ინტერესებს. PHR-ი აგრძელებს ბავშვის ინტერესების დაცვას და საზოგადოებას პერიოდულად მივაწოდებთ დეტალურ ინფორმაცია პროცესების განვითარების შესახებ“. სრულად... წყარო: phrgeorgia.wordpress.com

თბილისი. კოალიცია „მედიის ადოკატირებისათვის“ წევრი ორგანიზაციები თბილისის მერის და „ქართული ოცნების“ გენერალური მდივნის კახა კალაძის ინიციატივას ეხმიანებიან მედიაკრიტიკისათვის ახალი პლატფორმის შექმნასთან დაკავშირებით. „მიგვაჩნია, რომ მაღალი პოლიტიკური თანამდებობის პირის მხრიდან კრიტიკული მედიასაშუალების მისამართით მსგავსი კამპანიის წარმოება არ შეესაბამება დემოკრატიული საზოგადოების მოლოდინებს. უხეშად ეწინააღმდეგება მაღალი თანამდებობის პირთა ეთიკურ ღირებულებებს და პრინციპებს. მით უფრო, როცა არსებობს რისკი წახალისდეს ჟურნალისტების მიმართ აგრესია, სიტყვიერი და ფიზიკური თავდასხმა“, ნათქვამია განცხადებაში. სრულად... წყარო: კოალიციის გვერდი სოციალურ ქსელში

თბილისი. ადამიანის უფლებათა ცენტრი აქვეყნებს 20-21 ივნისის მოვლენების სისხლის სამართლის საქმეების სამართლებრივი ანალიზის დოკუმენტს. „დოკუმენტის მიზანია, საერთაშორისო პრაქტიკაზე დაყრდნობით და ქართული სპეციფიკის გათვალისწინებით, გასული წლის 20-21 ივნისის მოვლენების შემდეგ დაწყებული სისხლისსამართლებრივი დევნის ფაქტებისა და სხვადასხვა პირთა მიმართ მიმდინარე სისხლის სამართლის საქმეების სამართლებრივი შეფასება". ანალიტიკური დოკუმენტი სრულად... წყარო: humanrights.ge

თბილისი. ადამიანის უფლებების სწავლებისა და მონიტორინგის ცენტრი (EMC) მთავრობის ანტიკრიზისული გეგმის შემუშავებისა და ადმინისტრირების ეტაპზე გამოვლენილ ხარვეზებს და რისკებს აფასებს. ორგანიზაცია მიიჩნევს, რომ დახმარების გაცემის პროცესი მნიშვნელოვანი პრობლემებით ხასიათდება, რაც გულისხმობს პროგრამაში მოხვედრის ბუნდოვან ან წინააღმდეგობრივ კრიტერიუმებს, დამსაქმებლის კეთილ ნებაზე დამოკიდებული პროცედურების არსებობას, ცალკეული მოწყვლადი ჯგუფების სახელმწიფოს მხრიდან მხარდაჭერის გარეშე დატოვებას და სხვა. ამავდროულად, კვლავ ბუნდოვანი და გაუმჭირვალეა სახელმწიფოს მიერ აღებული დამატებითი საკრედიტო ვალდებულებების პირობები. ეს გარემოებები ანტიკრიზისული გეგმის ეფექტურობას ეჭვქვეშ აყენებს და მის გრძელვადიან შედეგებზე მნიშვნელოვან კითხვებს აჩენს. სრულად... წყარო: emc.org.ge

თბილისი. მედიაჩექერი აქვეყნებს ნატალია ვახტანგიშვილის და ნინო ნარიმანიშვილის სტატიას, რომელიც „მთავარი არხი“-ს მიერ ბავშვთა პორნოგრაფიის საქმეზე მომზადებულ სიუჟეტს შეეხება. სადავო სიუჟეტზე მასალის ავტორებს ფსიქოლოგი მაია ცირამუა ესაუბრა. მისი შეფასებით, მსხვერპლებისთვის ე.წ. სახის „გაბლარვა“ საკმარისი არ არის და არსებობს ბავშვების ამოცნობის საფრთხე, ასევე ტრავმის ხელახალი განცდის საშიშროება. პორნოგრაფიის საქმეში მონაწილე მოზარდები კი ჟურნალისტური მასალის გავრცელების შემდეგ სექსტინგისა და ბულინგის მსხვერპლებიც გახდნენ. საზოგადოების ნაწილმა ისინი დამნაშავეებად გამოიყვანა - „ამ ბავშვებს წავართვით შანსი, რომ ნდობა გაუჩნდეთ ადამიანების მიმართ. იმიტომ რომ ეს ტალღა, რისხვა, ისევ წავიდა ამ ბავშვების მისამართით და არა იქით, საითაც უნდა წასულიყო“, ამბობს მაია ცირამუა. სპეციალისტის განმარტებით, კიდევ ერთი პრობლემა, რომელიც ამ სიუჟეტს უკავშირდება არის ის, რომ ბავშვთა პორნოგრაფიის ამსახველი კადრები ხელახლა იწყებს ცირკულირებას, რაც პირველ რიგში, მზა მასალაა პედოფილებისთვის. სრულად... წყარო: www.mediachecker.ge

თბილისი. წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT შეშფოთებას გამოთქვამს „მთავარი არხის“ ეთერით გავრცელებული სიუჟეტის გამო, რომელიც არასრულწლოვანი, 6-დან 16 წლამდე ასაკის ბავშვების პორნო-ტრეფიკინგს შეეხებოდა. „კატეგორიულად მიუღებელია მასობრივი ინფორმაციის საშუალებით ბავშვების შიშველი, ეროტიკული შინაარსის ფოტო და ვიდეომასალის გავრცელება, იმის მიუხედავად, დაფარულია თუ არა მათი სახეები. ეს ქმედება ეწინააღმდეგება ბავშვთა სექსუალური ექსპლუატაციისა და სექსუალური ძალადობისაგან დაცვის ევროპის საბჭოს კონვენციას. ბავშვების სახეების დამალვა თავიდან ვერ აგვაცილებს მათი იდენტიფიცირების რისკს იმ ადამიანების მხრიდან, რომლებიც პირადად იცნობენ ამ პროცესში ჩართულ არასრულწლოვნებს. გარდა ამისა, მაღალია რეტრავმატიზაციის რისკი - არავინ იცის რა სიძლიერის განცდებს გამოიწვევს ამ მასალის ნახვა მოზარდებში, რომლებმაც საკუთარ თავზე გამოსცადეს ძალადობა. გასათვალისწინებელია ისიც, რომ ამ კადრების ტელევიზიით ტირაჟირებით, ინტერნეტში პრაქტიკულად სამუდამოდ ვტოვებთ ბავშვების ფოტო და ვიდეომასალას, რომელთა ნახვასაც მსხვერპლები წლების მერეც შეძლებენ“, ნათქვამია ორგანიზაციის ვებგვერდზე. სრულად... წყარო: gcrt.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს მასალას: პოლიციის საქმიანობაში საზოგადოებრივი ჩართულობის უზრუნველყოფა. ორგანიზაცია მიიჩნევს, რომ „დემოკრატიული ქვეყნისთვის მნიშვნელოვანია პოლიციის ზედამხედველობის გაძლიერების პროცესში საზოგადოების ჩართულობის უზრუნველყოფა და კარგ პრაქტიკაზე დაყრდნობით ემხრობა საქართველოში გარე დამოუკიდებელი მექანიზმის სახით საზოგადოებრივი ჩართულობის საბჭოების ჩამოყალიბებას, რომლებიც, სხვა უფლებამოსილებებთან ერთად, აღჭურვილი იქნება პოლიციის წინააღმდეგ მიმართული საჩივრების განხილვის შესაძლებლობით“. სრულად... წყარო: idfi.ge

თბილისი. ხელმომწერები ეხმიანებიან „შშმ პირთა უფლებების შესახებ“ კანონპროექტის განხილვას და მოუწოდებენ საქართველოს პარლამენტს, უზრუნველყოს საკანონმდებლო ცვლილებების პაკეტის საერთაშორისო ვალდებულებებთან სრულ შესაბამისობაში მოყვანა. ისინი, ასევე, მოუწოდებენ საკანონმდებლო ორგანოს, შშმ თემის აქტიური მონაწილეობისკენ მისი განხილვის პროცესში. „კიდევ ერთხელ გამოვთქვამთ პარლამენტთან და იუსტიციის სამინისტროსთან თანამშრომლობისა და სამუშაო შეხვედრებში მონაწილეობის მზადყოფნას, სადაც მოგვეცემა შესაძლებლობა, დაწვრილებით წარმოვადგინოთ ჩვენი მოსაზრებები და რეკომენდაციები კანონპროექტთან დაკავშირებით. მხოლოდ აქტიური კომუნიკაცია მოგვცემს საშუალებას, დავხვეწოთ დოკუმენტი იმგვარად, რომ მოხდეს მისი სრული შესაბამისობის უზრუნველყოფა საერთაშორისო სტანდარტებთან და კანონპროექტი იქცეს შშმ პირების უფლებების დაცვის ქმედით მექანიზმად“, ნათქვამია განცხადებაში. სრულად... წყარო: gyla.ge

თბილისი. საზოგადოებრივი ორგანიზაციები გაეროს ბავშვის უფლებათა კომიტეტს სოფიო კილაძის კომიტეტის წევრად შესაძლო არჩევასთან დაკავშირებით მიმართავენ.  „წინამდებარე განცხადებაზე ხელმომწერი ორგანიზაციები მივიჩნევთ, რომ სახელმწიფომ ბავშვის უფლებათა კომიტეტის წევრობის კანდიდატის შერჩევისას უგულებელყო გაეროს რეკომენდაციები კანდიდატის შერჩევის პროცედურასთან დაკავშირებით და ამასთან, კომიტეტის წევრობის კანდიდატად წარადგინა სოფიო კილაძე, რომელიც, ჩვენი შეფასებით, არ გამოირჩევა თანასწორობისა და ადამიანის უფლებების მაღალი რწმენითა და პატივისცემით. ქალბატონი კილაძე ადამიანის უფლებებისა და სამოქალაქო ინტეგრაციის კომიტეტის თავმჯდომარედ ყოფნის პერიოდში გამოირჩევა ჰომოფობიური განწყობებით და ზოგადად უმცირესობების უფლებების არაღიარების და არასათანადო მხარდაჭერის პრობლემური გამოცდილებით. ხელმომწერი ორგანიზაციები ვთვლით, რომ სამოქალაქო საზოგადოების პოზიცია ცნობილი უნდა იყოს კომიტეტისთვის გადაწყვეტილების მიღებამდე. სწორედ ამის გამო გიზიარებთ ჩვენი პოზიციის დასაბუთებას და გთხოვთ, რომ გადაწყვეტილების მიღების დროს ის გაითვალისწინოთ“, ნათქვამია ერთობლივ განცხადებაში. სრულად... წყარო: phrgeorgia.wordpress.com

ყრუ-უსინათლო პირთა მიმართ ცნობიერების ამაღლების კვირეული იწყება. „ყურადღებით იყავით - თქვენთვის, ყოველდღიურად, მოვამზადებთ მცირე კონკურსებს და გაგიზიარებთ ცოდნას ყრუ-უსინათლო პირების შესახებ ვებინარებისა და დებატების სახით. 22 - 28 ივნისი ყრუ-უსინათლო პირთა შესახებ ცნობიერების ამაღლების საერთაშორისო კვირეულია. მას ყოველწლიურად აღნიშნავენ მსოფლიოს არაერთ ქვეყანაში. ჩვენ კი, წელს უკვე მეორედ, საქართველოში აღვნიშნავთ“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ბლოგპოსტის თანახმად, 20-21 ივნისის მოვლენები გამოუძიებელია. „2019 წლის 20-21 ივნისს ადამიანის უფლებების დარღვევის სისტემურმა და ინდივიდუალურმა შემთხვევებმა, მისი მასშტაბების გათვალისწინებით, საქართველოს უახლოეს ისტორიაში მძიმე კვალი დატოვა. მიუხედავად იმისა, რომ ამ მოვლენებიდან ერთი წელი გავიდა, საქართველოს გენერალურ პროკურატურას, დაწყებული გამოძიების ფარგლებში, დღემდე არ გაუკეთებია მოვლენების სისტემური ანალიზი. აღსანიშნავია, რომ ამ დროისთვის არცერთი სამართალდამცავი არ არის დასჯილი და სისხლისსამართლებრივი დევნა მხოლოდ 3 პოლიციელის მიმართ მიმდინარეობს. ამასთან, შესაბამის უწყებებს არ გაუტარებიათ ის მნიშვნელოვანი რეფორმები, რომლებიც მსგავსი შემთხვევების პრევენციას შეუწყობდა ხელს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) და საქართველოს ახალგაზრდა იურისტთა ასოციაცია მოუწოდებენ საქართველოს პარლამენტს, გაატაროს დასაქმებულების ბაზისური უფლებების გარანტირებისთვის აუცილებელი შრომის კანონმდებლობის რეფორმა. „ქვეყანაში მასობრივად ირღვევა შრომითი უფლებები. საფრთხის შემცველი და ღირსების შემლახავი სამუშაო გარემო, დაურეგულირებელი სამუშაო დრო, შესვენებისა და დასვენების გარეშე მუშაობა, არაანაზღაურებადი ზეგანაკვეთური შრომა, სამუშაო ადგილზე დისკრიმინაცია და უფლებების შელახვის სხვა გავრცელებული პრაქტიკა, შრომის კანონმდებლობის აღსრულების მექანიზმების სისუსტის ფონზე, მშრომელების მასობრივ ექსპლუატაციასა და მოწყვლადობას განაპირობებს“, ნათქვამია ერთობლივ განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება გერმანიის ფედერაციულ რესპუბლიკაში საქართველოს მოქალაქის, ზელიმხან ხანგოშვილის მკვლელობის ფაქტზე მიმდინარე გამოძიების შედეგებს. „სამწუხაროდ, ბერლინში ხანგოშვილის მკვლელობის შემდგომ, საქართველოს ხელისუფლებას არ გამოუხატავს საკუთარი, ოფიციალური პოზიცია მომხდართან დაკავშირებით და მასში რუსეთის ფედერაციის მონაწილეობაზეც არაფერი უთქვამს. საკუთარი მოქალაქის სიცოცხლის მიმართ ამგვარი გულგრილობა, მით უფრო თუ გავითვალისწინებით საქმის ისტორიულ და პოლიტიკურ კონტექსტს, ჩვენი ქვეყნის ღირსებისა და საგარეო პოლიტიკის შესახებ კრიტიკულ კითხვებს აჩენს”, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს დოკუმენტს: ერთი წელი 20-21 ივნისის მოვლენებიდან. „2019 წლის 20-21 ივნისის მოვლენებიდან ერთი წლის თავზე, წინამდებარე დოკუმენტი აფასებს მასობრივი საპოლიციო ძალის გამოყენებით გამოწვეულ უფლებრივ დარღვევებზე სახელმწიფოს რეაგირების ეფექტიანობას, მოქალაქეთა მიმართ და პოლიციის წინააღმდეგ მიმდინარე გამოძიების დღემდე არსებულ შედეგებს. დოკუმენტი ეყრდნობა შესაბამისი უწყებებიდან მიღებულ ინფორმაციას, საჯარო წყაროებში არსებულ მასალას, სახალხო დამცველის სპეციალურ ანგარიშს 20-21 ივნისის მოვლენებზე პროკურატურაში მიმდინარე გამოძიების შესახებ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ ახალ კვლევას - “ეთნიკური უმცირესობების საკონსულტაციო მექანიზმები - რეალობა საქართველოში და საერთაშორისო გამოცდილება”. „საკონსულტაციო მექანიზმები ეთნიკური უმცირესობების პოლიტიკური ჩართულობისთვის მნიშვნელოვანი ინსტრუმენტია. მსგავსი მექანიზმები განსაკუთრებით მაშინ არის საჭირო, როდესაც ქვეყანაში არ არსებობს უმცირესობების საპარლამენტო დონეზე, ან სხვა არჩევით სისტემებში მონაწილეობის მექანიზმები, ხოლო უმცირესობების ეფექტიანი მონაწილეობის და პოლიტიკურ ცხოვრებაში ჩართულობის თვალსაზრისით, მნიშვნელოვანი ხარვეზებია. საქართველოში არსებული საკონსულტაციო მექანიზმები სუსტი, არაკოორდინირებული და ფრაგმენტულია, რომელიც ვერ უზრუნველყოფს არადომინანტი ეთნიკური ჯგუფების რეალურ ჩართულობას გადაწყვეტილების მიღების პროცესში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 20-21 ივნისის მოვლენების შედეგად დაზარალებულმა სამმა პირმა დღეს თბილისის საქალაქო სასამართლოში სარჩელი წარადგინა. „ისინი შინაგან საქმეთა სამინისტროსაგან ჯანმრთელობისათვის მიყენებული ზიანის გამო მატერიალური ან/და მორალური ზიანის ანაზღაურებას ითხოვენ. მოსარჩელეთა შორის 1 ჟურნალისტი და აქციის 2 მონაწილეა. სასამართლოში მათ ინტერესებს საია იცავს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „სკოლა ყველა ბავშვისათვის“ კამპანიის ფარგლებში ონლაინ დისკუსია გრძელდება. რა სირთულეებს აწყდებიან მიუსაფარი ბავშვები და როგორ ვუპასუხოთ ახალ გამოწვევებს?! 18 ივნისს, 17:00 საათზე, ამ თემებზე ისაუბრებენ ლალი კალანდაძე, თეა გალახვარიძე, სალომე ჭიჭინაძე, ნინო თოდუა, ლია რაზიკაშვილი. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ევრო-ატლანტიკურ კოალიციაში შემავალი ორგანიზაციები ეხმიანებიან ჟურნალისტ გიორგი გაბუნიას შესაძლო ლიკვიდაციის განზრახვას და მას საქართველოს დესტაბილიზაციის რუსულ გეგმად აფასებენ. „რუსული რბილი ძალიდან მომდინარე საფრთხეს სახელმწიფო უსაფრთხოების სამსახურიც ხაზს უსვამს თავის ანგარიშებში. ამ ფონზე ჟურნალისტის შესაძლო სამიზნედ ამოღება ქვეყნის უსაფრთხოების წინააღმდეგ და შესაძლო დესტაბილიზაციისკენ მიმართულ ქმედებად შეიძლება განვიხილოთ. ხელმომწერი ორგანიზაციები ვგმობთ რუსეთის ხელისუფლების წარმომადგენლების და მათ კონტროლ ქვეშ მყოფი პირების მხრიდან საქართველოს სუვერენიტეტისა და მისი მოქალაქეების წინააღმდეგ მიმართულ ქმედებებს. მოვუწოდებთ საქართველოს მთავრობას, გამჭვირვალედ წარმართოს გამოძიება, უზრუნველყოს მასში მეგობარი ქვეყნების ექსპერტების ჩართულობა და სრული ინფორმაცია მიაწოდოს საზოგადოებას დაგეგმილი დანაშაულის შესახებ“, ნათქვამია ერთობლივ განცხადებაში. სრულად... წყარო: transparency.ge