თბილისი. 4 ივნისს ილიას უნივერსიტეტში სტრატეგიული კვლევების ინსტიტუტმა გამართა საჯარო ლექცია თემაზე: „ოკუპირებული ტერიტორიები: სამართლებრივი ასპექტები." ლექცია წაიკითხა სტრატეგიული კვლევების ინსტიტუტის პრეზიდენტმა ეკა ტყეშელაშვილმა და ვიცე პრეზიდენტმა ირაკლი ფორჩხიძემ. ლექციის შემდეგ გაიმართა დისკუსია. წყარო: cipdd.org

თბილისი. საზოგადოებრივი ორგანიზაციები ეხმიანებიან შს მინისტრის მიერ ბრიუსელში ვიზიტისას,  პირადი ცხოვრების ამსახველი მასალის განადგურების გეგმის შესახებ განცხადებას. ისინი მინისტრს მიმართავენ „თქვენ აღნიშნეთ, რომ უკანონოდ ჩაწერილი ვიდეომასალა უახლოეს დღეებში განადგურდება. ჩვენ, არასამთავრობო ორგანიზაციები „საერთაშორისო გამჭვირვალობა – საქართველო", „სამართლიანი არჩევნებისა და დემოკრატიის საერთაშორისო საზოგადოება", „საქართველოს ახალგაზრდა იურისტთა ასოციაცია" და „კონსტიტუციის 42-ე მუხლი" გამოვთქვამთ სურვილსა და მზადყოფნას, დაუყოვნებლივ ჩავერთოთ ამ პროცესში და გთხოვთ, შეგვატყობინოთ არქივის განადგურების შემდგომი ნაბიჯების შესახებ". მიმართვა წყარო: transparency.ge

თბილისი. 6 ივნისს თავისუფლების კლუბის ორგანიზებით გაიმართება დავით დარჩიაშვილის საჯარო ლექცია – „წინასაარჩევნო სამზადისი და პოლიტიკური პერსპექტივები". ლექციის ბოლოს დამსწრეებს საშუალება ექნებათ მომხსენებელს კითხვები დაუსვან. ლექციაზე დასწრება თავისუფალია.  წყარო:ორგანიზაციის გვერდი სოციალურ ქსელში

იმერეთი. საიას ქუთაისის ფილიალსა და ხარაგაულის მუნიციპალიტეტის მაჟორიტარ დეპუტატსა და მაჟორიტარი დეპუტატის ბიუროს შორის ურთიერთთანამშრომლობის მემორანდუმი გაფორმდა. აღნიშნული აქტივობა პროექტის – „ჩემი ხმა პარლამენტში" – ფარგლებში განხორციელდა. წყარო: ორგანიზაციის გვერდი სოციალურ ქსელში

თბილისი.კოალიცია დამოუკიდებელი და გამჭვირვალე მართლმსაჯულებისთვის ეხმიანება 9 ივნისს გასამართ მოსამართლეთა კონფერენციას და აღნიშნავს ამ მოვლენის განსაკუთრებულ მნიშვნელობას დამოუკიდებელი მართლმსაჯულების ჩამოყალიბების პროცესში. „კოალიცია კიდევ ერთხელ გამოხატავს სურვილს თვალი მიადევნოს მოსამართლეთა კონფერენციის სხდომას და წარადგინოს საკუთარი წარმომადგენლები დამკვირვებლის სტატუსით. ამასთან, იმედი გვაქვს, რომ კონფერენციის მომზადება მოხდება იმგვარად, რომ უზრუნველყოფილი იყოს როგორც კონფერენციის დაუბრკოლებლად ჩატარება, ასევე დამკვირვებლებისა და მედიის შეუფერხებლად საქმიანობა”, ნათქვამია კოალიციის მიერ გავრცელებულ განცხადებაში. სრულად წყარო:კონსტიტუციია 42–ე მუხლის გვერდი სოციალურ ქსელში

თბილისი. საერთაშორისო გამჭვირვალობა – საქართველომ და კონსტიტუციის 42-ე მუხლმა დღეს იუსტიციის უმაღლესი საბჭოსა და საერთო სასამართლოების მოსამართლეთა სადისციპლინო კოლეგიის წევრობის საკუთარი კანდიდატები წარადგინეს. იუსტიციის უმაღლესი საბჭოს წევრობის კანდიდატები: დავით კერესელიძე (საერთაშორისო გამჭვირვალობა – საქართველო, კონსტიტუციის 42-ე მუხლი), ზურაბ ძლიერიშვილი (საერთაშორისო გამჭვირვალობა – საქართველო, კონსტიტუციის 42-ე მუხლი) და კახა წიქარიშვილი (კონსტიტუციის 42-ე მუხლი). საერთო სასამართლოების მოსამართლეთა სადისციპლინო კოლეგიის წევრობის კანდიდატი: გიორგი გიორგაძე (საერთაშორისო გამჭვირვალობა – საქართველო, კონსტიტუციის 42-ე მუხლი). წყარო:საერთაშორისო გამჭვირვალობა – საქართველოს გვერდი სოციალურ ქსელში

თბილისი. საერთაშორისო გამჭვირვალობა–საქართველომ საპარლამენტო ამბების  აუდიო პოდკასტი გამოაქვეყნა. 3 ივნისის გამოშვების თემებია: საგარეო ურთიერთობათა კომიტეტის თავმჯდომარის განცხადება სამხრეთ ოსეთის ადმინისტრაციულ საზღვრის საოკუპაციო ხაზის გადმოწევასთან დაკავშირებით და არასამთავრობო ორგანიზაციების ვიზიტი სოფელ დიცსა და დვანში. პოდკასტში ასევე საუბარია საკითხებზე: პარლამენტმა მაუწყებლობის შესახებ კანონში ცვლილებები დაამტკიცა: მოსაზრებები და შენიშვნები; პარლამენტმა ორ კანონპროექტზე პრეზიდენტის ვეტო დაძლია: საკონსტიტუციო სასამართლოს შესახებ კანონში და სამოქალაქო კოდექსში ცვლილებები; პრეზიდენტმა ვეტოს უფლება გამოიყენა კიდევ ერთ კანონპროექტთან მიმართებაში: სისხლის სამართლის საპროცესო კოდექსში ადვოკატის მიერ ჩხრეკის უფლებებთან დაკავშირებული ცვლილებები; ახალი საკანონმდებლო ინიციატივა: სასოფლო-სამეურნეო მიწების უცხოელებისათვის შესყიდვის უფლების შეჩერება; „აირზენას" თბილისი-ქუთაისი და ქუთაისი-თბილისი ავიარეისები დღეიდან კვირაში სამჯერ განხორციელდება.  აუდიო პოდკასტი  წყარო: transparency.ge

თბილისი. გოუ ჯგუფი ახალი პროგრამის ფარგლებში იწვევს იმ პირებს, ვისაც სურს გახდეს მოქალაქე რეპორტიორი. ახალი კურსის ფარგლებში, რომელიც მთელ სამხრეთ კავკასიას მოიცავს, გოუ ჯგუფის წარმომადგენლები ასწავლიან, როგორ გახდნენ მსურველები წარმატებული ბლოგერი, როგორ გადაიღონ საინტერესო დოკუმენტური ფილმი და როგორ გახდნენ აქტიური მოქალაქეები. კონკურსი ღიაა ნებისმიერი მსურველისთვის, უპირატესობა ეძლევა რეგიონში მცხოვრებ კანდიდატებს. კანდიდატი უნდა ფლობდეს რუსულ ენას; კომპიუტერთან ზოგადი მუშაობის უნარიც უპირატესობად ჩაითვლება. კონკურსში მონაწილეობის მისაღებად გააგზავნეთ წერილი თქვენს შესახებ მისამართზე: maka.tsnobiladze@gogroupmedia.net წყარო: გოუ ჯგუფის გვერდი სოციალურ ქსელში

თბილისი. საქართველოს წითელი ჯვრის საზოგადოების პროექტის –„ვიმოქმედოთ ერთად" –თანამშრომლები და მოხალისეები ასურელი თემის წარმომადგენლებს ასურელთა კულტურის ცენტრში შეხვდნენ. წითელი ჯვრის წარმომადგენლებმა წარმოადგინეს პრეზენტაცია წითელი ჯვრისა და პროექტის „ვიმოქმედოთ ერთად" შესახებ. შეხვედრის მიზანი იყო ასურული თემისთვის წითელი ჯვრის პრინციპებისა და სტრატეგიული მიმართულებების შესახებ ინფორმაციის მიწოდება და პროექტის საქმიანობების გაცნობა.  წყარო:ორგანიზაციის გვერდი სოციალურ ქსელში

თბილისი. 29 მაისს ჰაინრიჰ ბიოლის ფონდი გაიმართა დისკუსი თემაზე „ვის ეშინია სეკულარული დემოკრატიის?". მათ ვინც ვერ შეძლო საჯარო დისკუსიაზე დასწრება შეუძლია იხილოთ დისკუსიის ჩანაწერი. „ვის ეშინია სეკულარული დემოკრატიის"? წყარო: ნაკადი – სამოქალაქო ინტერნეტ მაუწყებლობა

თბილისი. საქართველოს ახალგაზრდა იურისტთა ასოციაციამ პროკურატურის რეფორმირების საკითხზე განცხადება გაავრცელა. „უმნიშვნელოვანესი საკითხი, რომელიც რეფორმის ფარგლებში უნდა იქნეს მიღწეული, პროკურატურის პოლიტიკური ნეიტრალურობის უზრუნველყოფაა. ამ თვალსაზრისით, იუსტიციის მინისტრისათვის სისხლისსამართლებრივი დევნისა და საპროკურორო ზედამხედველობის ფუნქციის ჩამოშორება მნიშვნელოვანი ნაბიჯია", ნათქვამია განცხადებაში. ორგანიზაცია მიუკერძოებელი საქმიანობის მნიშვნელოვან გარანტად მიიჩნევს ისეთი საკითხების მოგვარებას როგორიცაა: მთავარი პროკურორის დანიშვნა/გათავისუფლების წესის დახვეწას... მთავარი პროკურორის მიუკერძოებლობის უზრუნველმყოფი მექანიზმის შექმნას... მთავარი პროკურორის სისხლისსამართლებრივი პასუხისმგებლობის საკითხის მოწესრიგებას. რაც შეეხება პროცედურულ საკითხებს საია აღნიშნავს, რომ „ასეთი მნიშვნელოვანი პროექტების განხილვისას სამოქალაქო სექტორის მონაწილეობის მნიშვნელობა სათანადოდ უნდა იქნეს გააზრებული. შესაბამისად, მივმართავთ საქართველოს პარლამენტს, არ მიიღოს კანონი მესამე მოსმენით, დააბრუნოს ის მეორე მოსმენაზე განსახილველად და უზრუნველყოს სამოქალაქო სექტორის დაინტერესებული წარმომადგენლების კანონპროექტის განხილვის პროცესში ჩართვა". სრულად წყარო: gyla.ge

თბილისი. საერთაშორისო გამჭვირვალობა საქართველომ მაყურებლებს ტელეკრიტიკის საშუალებით სადისკუსიოდ ახალ თემას სთავაზობს: დაზიანებული ტრავერტინები ყაზბეგში. სრულად  წყარო: telekritika.ge

თბილისი. ინფორმაციის თავისუფლების განვითარების ინსტიტუტი ახალ ვიდეო–რგოლს აქვეყნებს,  რომლის მიზანია საზოგადოებას მიაწოდს ინფორმაცია ინიციატივის – „ღია მმართველობის პარტნიორობა" – შესახებ. ღია მმართველობის ინიციატივა თანამედროვე ტექნოლოგიების გამოყენებით ხელს უწყობს მთავრობების ღიაობასა და პოლიტიკურ პროცესებში მოქალაქეების ჩართულობის გაზრდა. იუსტიციის სამინისტროს ვებ-გვერდზე სპეციალურად ამ ინიციატივისთვის შექმნილია განყოფილება, სადაც მოქალაქეებს შეუძლიათ მთავრობას გაუგზავნონ საკუთარი იდეები მთავრობის მეტი გამჭვირვალობის მისაღწევად.  ვიდეო-რგოლი შექმნილია ინფორმაციის თავისუფლების განვითარების ინსტიტუტის მიერ პროექტის „ელექტრონული ჩართულობის განვითარება საქართველოში" ფარგლებში.  ვიდეო-რგოლი მომზადდა აღმოსავლეთ-დასავლეთის მართვის ინსტიტუტის (EWMI) პროგრამის „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარება" (G-PAC) ფარგლებში, რომელსაც აფინანსებს ამერიკის შეერთებული შტატების საერთაშორისო განვითარების სააგენტო (USAID). ვიდეო–რგოლი  წყარო: ორგანიზაციის გვერდი სოციალურ ქსელში

კახეთი. სათემო განვითარების ცენტრი სოფელ ერის იმედის სკოლისთვის წიგნების შეგროვებას იწყებს. სკოლის ბიბლიოთეკისა და წიგნის ფონდის შექმნისთვის წიგნებით დახმარება ნებისმიერ მსურველს შეუძლია. სრულად  წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა–საქართველომ Telekritika.ge–ზე დისკუსიის მორიგი თემები – „ვანო მერაბიშვილს ბრალი დაუმძიმდა" და „სოფელ დიცთან საზღვრის გადმოწევის შედეგები" – გამოაქვეყნა. კომენტარის დატოვება და დისკუსიის დაწყება ნებისმიერ მსურველს შეუძლია.  ტელეკრიტიკა – „ვანო მერაბიშვილს ბრალი დაუმძიმდა" ტელეკრიტიკა  „სოფელ დიცთან საზღვრის გადმოწევის შედეგები"  წყარო: telekritika.ge

გერმანიის ქართულმა სათვისტომომ კონკურსის – „წლის საუკეთესო სტუდენტი" – გამარჯვებული გამოავლინა. ხელოვნებისა და სოციალურ მეცნიერებათა ალანუს უნივერსიტეტის სახვითი ხელოვნების ფაკულტეტის სტუდენტ ლევან სვანიშვილს, საქართველოს დამოუკიდებლობისადმი მიძღვნილ ზეიმზე, ფულადი პრემია და სათვისტომოს საპატიო სიგელი გადაეცა. 2013 წლის კონკურსში მონაწილეობისათვის კონკურსზე განაცხადი 8 სტუდენტმა შეიტანა, ყველა მათგანი საპატიო სიგელით დაჯილდოვდა.  წყარო:ორგანიზაციის გვერდი სოციალურ ქსელში

თბილისი. 29 მაისს, ინფორმაციის თავისუფლების განვითარების ინსტიტუტმა საჯარო დისკუსია გამართა და დამსწრე საზოგადოებას მოქალაქეების პოლიტიკური ჩართულობის პლატფორმის www.ichange.ge -ს საკუთარი კონცეფცია გააცნო. დისკუსიაში მონაწილეობა მიიღეს როგორც არასამთავრობო ორგანიზაციების, ასევე სამთავრობო სექტორის წარმომადგენლებმა და სხვა დაინტერესებულმა პირებმა.  შეხვედრის დასაწყისში პრეზეტაცია წარმოადგინა IDFI-ს თავმჯდომარემ და  ისაუბრა საერთაშორისო პრაქტიკის მაგალითებზე, იმის შესახებ რა ფუნქციონალი და მექანიზმები უნდა არსებობდეს მოქალაქეთა მონაწილეობის პლატფორმის. დისკუსიის მონაწილეებმა დასვეს კითხვები წარმოდგენილი კონცეფციის ირგვლივ და გამოხატეს საკუთარი მოსაზრებები. მსჯელობა გაიმართა პეტიციის ხელმომწერთა საჭირო რაოდენობის, ასევე პლატფორმის სახელწოდებისა და სხვა დეტალების შესახებ.  წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა საქართველომ ღია წერილით მიმართა საქართველოს ხელისუფლების ყველა შტოს წარმომადგენლებს. წერილი მობილური ოპერატორების მეშვეობით მოქალაქეთა უკონტროლო მიყურადღებას ეხება. „ბოლო რამდენიმე წელია, მთავრობის მიერ ფარული თვალთვალის წარმოება ქვეყანაში სერიოზულ პრობლემას წარმოადგენს, რაც არასამთავრობო ორგანიზაციების არაერთ კვლევაში და აშშ–ის სახელმწიფო დეპარტამენტის ადამიანის უფლებათა დაცვის მოხსენებებშიც აისახა... ჩვენთვის ცნობილია, რომ სატელეკომუნიკაციო კომპანიების სერვერებში შინაგან საქმეთა სამინისტრომ რამდენიმე წლის წინ დაამონტაჟა სპეციალური მოწყობილობები – ე.წ. შავი ყუთები, რომელთა მეშვეობითაც მოქალაქეების საკომუნიკაციო მონაცემებზე ოპერატიულ-სამძებრო ორგანოებს პირდაპირი და შეუზღუდავი წვდომა ჰქონდათ. რაც მნიშვნელოვანია, ამ ინფრასტრუქტურის დემონტაჟი ახალი ხელისუფლების პირობებშიც არ მომხდარა და შინაგან საქმეთა სამინისტროს შავი ყუთები მსხვილი სატელეკომუნიკაციო კომპანიების სერვერებზე ახლაც არის განთავსებული.  სატელეკომუნიკაციო კომპანიების წარმომადგენლებზე დაყრდნობით, ჩვენთვის ცნობილია, რომ სახელისუფლებო ორგანოებს ერთდროულად 21,000 მობილური ნომრის მოსმენა შეუძლიათ. ვფიქრობთ, რომ ხელისუფლებამ სატელეკომუნიკაციო კომპანიების ინფრასტრუქტურიდან დაუყოვნებლივ უნდა ამოიღოს მისთვის კუთვნილი შავი ყუთები და მობილურ ოპერატორებთან ურთიერთობა კანონიერ ჩარჩოში ჩასვას...", ნათქვამია ღია წერილში სრულად წყარო: transparency.ge

თბილისი. ინფორმაციის თავისუფლების განვითარების ინსტიტუტმა აქტიური მოქალაქის შესახებ ახალი ვიდეო–რგოლი განათავსა ინტერნეტ სივრცეში. რგონის მიზანია განმარტოს აქტიური მოქალაქის მნიშვნელობა დემოკრატიული ინსტიტუტების ფორმირების პროცესში და ასევე აჩვენოს, რატომ არის სამოქალაქო მონაწილეობა დაჩართულობა აუცილებელი ცვლილებების მისაღწევად. ვიდეო-რგოლი შექმნილია ინფორმაციის თავისუფლების განვითარების ინსტიტუტის მიერ პროექტის „ელექტრონული ჩართულობის განვითარება საქართველოში" ფარგლებში.  ვიდეო-რგოლი მომზადდა აღმოსავლეთ-დასავლეთის მართვის ინსტიტუტის (EWMI) პროგრამის „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარება" (G-PAC) ფარგლებში, რომელსაც აფინანსებს ამერიკის შეერთებული შტატების საერთაშორისო განვითარების სააგენტო (USAID). ვიდეო–რგოლი – შენი აქტიურობა ცვლილებებისთვის წყარო: ორგანიზაციის გვერდი სოციალურ ქსელში

თბილისი. 30 მაისს ფონდ „ღია საზოგადოება – საქართველოს" ოფისში გაიმართება მერაბ მამარდაშვილისადმი მიძღვნილი სემინარი. ღონისძიების თემაა : „საბჭოთა დისკურსის მეტამორფოზები: ინტელექტუალური აზროვნების ამბივალენტურობა პოსტ–საბჭოთა სივრცეში". სემინარზე მოხსნებას გააკეთებს პოლიტოლოგი ბაქარ ბერეკაშვილი. სემინარი იმართება პროექტის – „ეძვღვნება მერაბ მამარდაშვილს 2" – ფარგლებში, რომელსაც სტრატეგიული გამოკვლევათა ცენტრი ფონდ „ღია საზოგადოება საქართველოს" მხარდაჭერით 2012 წლის აპრილიდან ახორციელებს. წყარო: osgf.ge

თბილისი. საქართველოს ახალგაზრდული პარლამენტი რუსი სამხედროების  მიერ ოკუპაციის ხაზის გადმოწევასთან დაკავშირებით აღშფოთებას გამოთქვამს. „საქართველოს ახალგაზრდული პარლამენტი მოუწოდებს საქართველოს მთავრობას რეაგირებისკენ, რათა გაეგზავნოს ნოტა საერთაშორისო ორგანიზაციებს და დადგეს ეს საკითხი ივნისში ჩანიშნულ ჟენევის მომდევნო რაუნდზე. რუსი სამხედროების ქმედება წარმოადგენს საქართველოს ტერიტორიული მთლიანობის კიდევ ერთხელ დარღვევას და და აუცილებელია სათანადო და მკაცრი რეაქცია", ნათქვამია გავრცელებულ განცხადებაში.  სრულად წყარო:ორგანიზაციის გვერდი სოციალურ ქსელში

აჭარა. 27 მაისს, ბათუმის პრეს–კაფეში „თავისუფალ ჟურნალისტთა სახლმა" და არასამთავრობო ორგანიზაცია „ბორჯღალომ" დისკუსია გამართა თემზე: ეკომიგრანტები და ხელისუფლება. დისკუსიის ფარგლებში განხილეს ეკომიგრანტების პრობლემები და ხელისუფლების პოლიტიკა მათ მიმართ. დისკუსია გადაიცემოდა ინტერნეტის საშუალებით, მაყურებელს საშუალება ჰქონდა პირდაპირ ეთერში დაესვა კითხვები და ჩაერთულიყო დისკუსიაში. დისკუსია გაიმართა NED-ის დაფინანსებული პროექტის –„დემოკრატიული იდეების განვითარება" – ფარგლებში.