ადამიანის უფლებათა ევროპულმა სასამართლომ "რუსული კანონის" წინააღმდეგ საჩივარი დაარეგისტრირა. „საზოგადოებას შევახსენებთ, რომ "რუსული კანონი" ადამიანის უფლებათა ევროპულ სასამართლოში 16 მედია ორგანიზაციის, 120 სამოქალაქო საზოგადოების ორგანიზაციისა და 4 ფიზიკური პირის სახელით გასაჩივრდა. მომჩივნები ადამიანის უფლებათა ევროპული კონვენციით დაცული შეკრებისა და გაერთიანების თავისუფლების (მე-11 მუხლი), გამოხატვის თავისუფლების (მე-10 მუხლი), პირადი და ოჯახური ცხოვრების დაცულობის უფლების (მე-8 მუხლი), დისკრიმინაციის (მე-14 მუხლი), სამართლებრივი დაცვის ქმედითი საშუალებების უფლების (მე-13 მუხლი) და უფლებების შეზღუდვათა გამოყენების ფარგლების (მე-18 მუხლის) დარღვევებზე დავობენ“.  წყარო: საია

არასამთავრობო ორგანიზაციები ერთობლივ ინფორმაციას ავრცელებენ:  „ბოლო პერიოდში სამთავრობო მედია ავრცელებს მცდარ ინფორმაციას, თითქოს არასამთავრობო ორგანიზაციებს #რუსულიკანონის წინააღმდეგ საჩივარი სტრასბურგის სასამართლოში არ გაუგზავნიათ. გვინდა განვმარტოთ, რომ ეს ინფორმაცია არ შეესაბამება სინამდვილეს.  საჩივარი 2024 წლის 17 ოქტომბერს გაიგზავნა. პოსტს თან ერთვის გადამზიდი კომპანიის მიერ მოწოდებული დოკუმენტი, რომელიც ადასტურებს, რომ საჩივარი, სტრასბურგის სასამართლოს 2024 წლის 22 ოქტომბერს ჩაბარდა.  ამ ეტაპზე მიმდინარეობს საქმის რეგისტრაციის პროცედურები, რომელიც საქმის მოცულობის გათვალისწინებით, გარკვეულ დროს მოითხოვს“.  წყარო: საია

არასამთავრობო ორგანიზაციები აქტიურად აკვირდებოდნენ არჩევნების წინა პერიოდს, არჩევნების დღეს და საარჩევნო დარღვევების მონიტორინგს აქტიურად ეხმაურებოდნენ და ეხმაურებიან. არასამთავრობო ორგანიზაციებმა სხვადასხვა ინტსტანციის სასამართლოში სარჩელები შეიტანეს. დეტალური ინფორმაციისთვის თვალი ადევნეთ სადამკვირვებლო ორგანიზაციების ვებგვერდებსა და ფბ გვერდებს.

ქართული არასამთავრობო ორგანიზაციები რუსული კანონის წინააღმდეგ ბრძოლის ახალ ეტაპს იწყებენ! 16 მედია, 120 არასამთავრობო ორგანიზაცია რუსულ კანონსა და მის მიერ გამოწვეულ შედეგებს ადამიანის უფლებათა ევროპულ სასამართლოში ასაჩივრებს. "რუსული კანონი არა მხოლოდ სამოქალაქო საზოგადოებისა და მედიის შეზღუდვას ისახავს მიზნად, არამედ ყველა მოქალაქის ერთმანეთისგან გათიშვასა და კრიტიკული ხმის ჩახშობას ემსახურება. მომჩივანი ორგანიზაციები ისეთ საზოგადოებრივ პრობლემებზე მუშაობენ, როგორებიცაა: გარემოს დაცვა, შშმ პირთა დახმარება, ქალთა და ბავშვთა ძალადობისგან დაცვა, სასამართლოს რეფორმა, კორუფციასთან ბრძოლა, საგამოძიებო ჟურნალისტიკა და ა. შ. მომჩივნები ადამიანის უფლებათა ევროპული კონვენციით დაცული შეკრებისა და გაერთიანების თავისუფლების (მე-11 მუხლი), გამოხატვის თავისუფლების (მე-10 მუხლი), პირადი და ოჯახური ცხოვრების დაცულობის უფლების (მე-8 მუხლი), დისკრიმინაციის (მე-14 მუხლი), სამართლებრივი დაცვის ქმედითი საშუალებების უფლების (მე-13 მუხლი) და უფლებების შეზღუდვათა გამოყენების ფარგლების (მე-18 მუხლის) დარღვევებზე ვიდავებთ. დამოუკიდებელ ორგანიზაციებთან რუსული მეთოდებით ბრძოლა არა მხოლოდ ადამიანის ფუნდამენტურ უფლებებს ლახავს, არამედ ასევე, ძირს უთხრის ქართველი ხალხის ურყევ არჩევანს ევროატლანტიკურ სტრუქტურებში ინტეგრაციასთან დაკავშირებით. სამწუხაროა, რომ კონსტიტუციურ ვალდებულებას, რომელიც ყველა ამ ცივილიზაციური არჩევანის დაცვას სახელმწიფო ორგანოებს ავალდებულებს, სწორედ სახელისუფლებო ორგანოები არღვევენ, ხოლო, საკონსტიტუციო სასამართლო საკუთარი მოვალეობის შესრულებაზე უარს ამბობს. საკონსტიტუციო სასამართლოს მიერ საკუთარი მოვალეობის შეუსრულებლობის მიუხედავად, ჩვენი ბრძოლა რუსული კანონის წინააღმდეგ გრძელდება და ის აუცილებლად ქართველი ხალხის უპირობო გამარჯვებით დასრულდება.  არა რუსულ კანონს!  კი - ევროკავშირს!" წყარო: ინფორმაციის თავისუფლების განვითარების ინსტიტუტი

საზოგადოებრივი ორგანიზაციები ერთობლივ განცხადებას ავრცელებენ: „საკონსტიტუციო სასამართლომ საკუთარი მოვალეობა არ შეასრულა საკონსტიტუციო სასამართლოს გადაწყვეტილება, არ შეაჩეროს რუსული კანონის მოქმედება, მოკლებულია „სამართლებრივ დასაბუთებას, არ ითვალისწინებს ადგილობრივი და საერთაშორისო ექსპერტების სამართლებრივ დასკვნებს და მოსამართლეთა მხრიდან კონსტიტუციის ღალატს წარმოადგენს“. სრულად... წყარო: სამოქალაქო საზოგადოების ფონდი

სადამკვირვებლო მისია „ჩემი ხმა“ აერთიანებს 30 არასამთავრობო ორგანიზაციას. ისინი საპარლამენტო არჩევნების უპრეცედენტოდ მასშტაბურ სადამკვირვებლო მისიისთვის ემზადებიან, რომლის მიზანია სამართლიანი არჩევნების ხელშეწყობა და ქართველი ამომრჩევლების ხმების დაცვა. ორგანიზაციების დამკვირვებლები არჩევნებს დააკვირდებიან როგორც საქართველოში, ასევე უცხოეთში გახსნილ უბნებშიც.  კოალიცია საზოგადოებას აწვდიან ინფორმაციას ამ დრომდე სადამკვირვებლო მისიის მიერ გაწეული საქმიანობის შესახებ.  სრულად...  წყარო: სამოქალაქო საზოგადოების ფონდი

კოალიცია ინფორმაციის სანდოობისთვის აქვეყნებს პუბლიკაციას – „ოთხი კანონი ოთხ სახელმწიფოში, ოთხი მმართველი პარტია და იდენტური დეზინფორმაციული ნარატივები“. "ყირგიზეთში, ბოსნია-ჰერცოგოვინის სპრსკას რესპუბლიკაში, საქართველოსა და სლოვაკეთში, თითქმის ერთდროულად დაინიცირდა ერთმანეთის მსგავსი “უცხოური გავლენის გამჭვირვალობის შესახებ". ოთხ სახელმწიფოში კანონზე მუშაობას იდენტური და მძლავრი დეზინფორმაციული ნარატივები ახლდა თან". სრულად...  წყარო: კოალიცია ინფორმაციის სანდოობისთვის

საია და სამართლიანი არჩევნები ეხმიანებიან ანტიკორუფციული ბიუროს მიერ 24 სექტემბერის გადაწყვეტილებას, ცნოს „საერთაშორისო გამჭვირვალობა – საქართველო“ და მისი დირექტორი - ეკა გიგაური, ასევე, ორგანიზაცია „აირჩიე ევროპა“, მისი დირექტორი ხათუნა ლაგაზიძე და თანადამფუძნებლები „განცხადებული საარჩევნო მიზნის” მქონე პირებად. საია და „სამართლიანი არჩევნები“ მიიჩნევენ, რომ „ანტიკორუფციული ბიუროს ეს გადაწყვეტილება უკანონოა. ვინაიდან იგი არ შეესაბამება „მოქალაქეთა პოლიტიკური გაერთიანებების შესახებ“ საქართველოს კანონით განსაზღვრული განცხადებული საარჩევნო მიზნის მქონე პირის ცნების განმარტებას. გარდა ამისა, კანონის ამგვარი ინტერპრეტაცია ქმნის სახიფათო პრეცედენტს იმისთვის, რომ იგი გამოყენებულ იქნეს სიტყვისა და გამოხატვის თავისუფლების არაპროპორციულად შეზღუდვისთვის“.  სრულად...  წყარო: საია

23 სექტემბერს ჟესტური ენის დღე აღინიშნა. „მშობლების სკივრი“ გვიაზრებს დედა–შვილის ხათუნას და ბარბარეს მიერ ჟესტურ ენაზე შესრულებულ სიმღერას ყვითელ ფოთლებზე. წყარო: მშობლების სკივრი ვიდეო... 

მედიის ადვოკატირების კოალიცია განცხადებას ავრცელებს. ორგანიზაცია „გმობს უცხოელი ჟურნალისტებისთვის საქართველოში შემოსვლის უკანონო და გაუმართლებელი აკრძალვის შემთხვევებს. ეს შემაშფოთებელი ტენდენცია, რომელიც მხოლოდ ამ კვირაში ორჯერ დაფიქსირდა, ხაზს უსვამს მედიის თავისუფლების შეზღუდვისა და დამოუკიდებელი ჟურნალისტიკის საქმიანობის შეფერხების შემაშფოთებელ მდგომარეობას ქვეყანაში“. სრულად...  წყარო: ორგანიზაციის გვერდი სოციალურ ქსელში

საია ეხმიანება ანტიკორუფციული ბიუროს მიერ „აირჩიე ევროპის“ საქმიანობის და მისი დამფუძნებლების საბანკო ანგარიშებზე განხორციელებული ტრანზაქციების შესახებ ინფორმაციის გამოთხოვას. „ბიურომ 2024 წლის 6 სექტემბერს სასამართლოს მიმართა ორგანიზაციის საბანკო ანგარიშებზე და ტრანზაქციების შესახებ ინფორმაციის გამოთხოვის მიზნით. თუმცა, საიას მიერ შესწავლილი დოკუმენტები აჩვენებს, რომ შუამდგომლობაში არ არის დეტალურად განმარტებული მონიტორინგის საფუძვლები და მიზანი.“  საია მოუწოდებს ანტიკორუფციულ ბიუროსა და სასამართლოს, იხელმძღვანელონ „კანონის მოთხოვნებისა და სამართლებრივი პრინციპების დაცვით, თავისი საქმიანობა წარმართონ შესაბამისი დასაბუთების საფუძველზე და მონიტორინგის განხორციელების პროცესში შეაფასონ პირთა ძირითადი უფლებების არათანაზომიერი შეზღუდვის რისკები”.  სრულად... წყარო: საია

აჭარის სხვადასხვა მუნიციპალიტეტში დევნილთა კომპაქტურ ჩასახლებებში და ეკო მიგრანტებთან საიას ბათუმის ოფისის წარმომადგენლებმა გასვლითი შეხვედრები გამართეს. შეხვედრებზე მოსახლეობას მიეწოდათ ინფორმაცია 2024 წლის საპარლამენტო არჩევნებში ელექტრონული ტექნოლოგიების გამოყენების შესახებ.  საიას რეგიონალური ოფისების წარმომადგენლები მსგავს შეხვედრებს საქართველოს სხვადასხვა რეგიონში ატარებენ. საარჩევნო ტექნოლოგიების შესახებ მოსახლეობის ინფორმირება მნიშვნელოვანია კენჭისყრის პროცესის სანდოობისათვის, არჩევნებში მონაწილეობა კი არის მათი შესაძლებლობა, გამოხატონ პოზიცია და გავლენა მოახდინონ ქვეყნის მომავალზე.  წყარო: საია

საზოგადოებრივმა ორგანიზაციებმა, 8 სექტემბერს გამართეს კოალიციის „ჩემი ხმა ევროკავშირს“ პრეზენტაცია. კოალიციაში 29 ორგანიზაციაა გაერთიანებული, მისი მიზანია ამომრჩეველთა ინფორმირება და ცნობიერებია გაზრდა, 2024 წლის 26 ოქრომბრის არჩევნების შესახებ.  კოალიცია ასევე მიზნად ისახავს დააკვირდეს არჩევნებს საქართველოში არსებულ ყველა უბანზე და დაიცვას ამომრჩეველთა ხმები. კოალიციას ეყოლება სპეციალურად დატრენინგებული დამკვირვებლები და ასევე იურისტთა გუნდი.  კოალიციის ვებ–გვერდი... https://www.wevote.ge წყარო: ჩემი ხმა ევროკაშვირს

„თავისუფლებაც ხომ სწორედ ეს არის – ადამიანს უნდა იყოს ადამიანი, ადამიანს უნდა იყოს სხვანაირი, ადამიანს უნდს იყოს ის, რაც თვითონ არის... და ტანსაცმელიც ხანდახან იყო ამის საშუალება“.  ძალიან მალე სოვლაბი და არტისტი ნატალია ვაწაძე წარმოგიდგენთ ერთობლივ გამოფენას, „საკაბე - კარადაში შენახული თავისუფლების ამბები“.  გამოფენაზე ფოტოხელოვან გურამ წიბახაშვილის პირად კოლექციაში დაცული ფოტოებიც გამოიფინება.  წყარო: სოვლაბი

8 სექტემბერს, 18:00 საათზე, დედაენის ბაღში გაიმართება სამოქალაქო საზოგადოების ახალი სადამკვირვებლო მისიის „ჩემი ხმის“ წარდგენა. მისი მიზანია 26 ოქტომბრის არჩევნების დაკვირვება. შესაბამისად იწვევს ყველას, ვინც მზად არის მოხალისეობრივად ჩაერთოს. სრულად...  წყარო: სამოქალაქო საზოგადოების ფონდი

უფლებები საქართველო: კიდევ ერთხელ გადავხედოთ ისტორიულ ფაქტებს და საქართველოს გამოცდილებას, რათა გვახსოვდეს, ვინ გვართმევს და ვინ გვინარჩუნებს ქართველობას. სრულად...   წყარო: უფლებები საქართველო

თბილისი. 26–27 ივლისს, პროექტის „სამოქალაქო საზოგადოების ინიციატივის“ ფარგლებში ჩატარდა ორდღიანი საინფორმაციო სემინარი – „საქართველოს ევროპული მომავალი“. სემინარს უძღვებოდნენ კონრად ადენაუერის ფონდის (KAS) პოლიტიკური განათლების აკადემიის კურსდამთავრებულები.  ახალგაზრდებს ევროპასა და ევროპულ გამოცდილებაზე ესაუბრა მსახიობი და ტელეწამყვანი ილო ბეროშვილი.  ახალგაზრდებმა ასევე მონაწილეობა მიიღეს შემეცნებით თამაშში (City Game) "აღმოაჩინე #ევროპა შენს ქალაქში". სხვადასხვა მინიშნებებისა და დავალებების შესრულების შემდეგ, მათ აღმოაჩინეს ევროპული კვალი დედაქალაქში. გამარჯვებული გუნდი დაჯილდოვდა სამახსოვრო საჩუქრებით.  პროექტი "სამოქალაქო საზოგადოების ინიციატივა" ხორციელდება ევროკავშირისა (EU) და კონრად ადენაუერის ფონდისა (KAS) მხარდაჭერით.  წყარო: პროექტი „სამოქალაქო საზოგადოების ინიციატივა“

თბილისი. ინფორმაციის თავისუფლების განვითარების ინსტიტუტის ინფორმაციით,  საქართველოში მცხოვრები ეთნიკური უმცირესობების პოლიტიკური ინტეგრაცია დღემდე გამოწვევად რჩება. ცენტრალურ და ადგილობრივ დონეზე გადაწყვეტილების მიღების პროცესში მათი ნაკლები მონაწილეობა ზრდის გარიყულობის შეგრძნებას. ეთნიკური უმცირესობები (გარდა ოკუპირებული აფხაზეთისა და ცხინვალის რეგიონებისა) მოსახლეობის 13.2%-ს (489,240 ადამიანი) შეადგენენ. მეათე მოწვევის პარლამენტში მანდატის მქონე 9 პოლიტიკური პარტიის პროპორციულ სიაში მყოფი 1335 კანდიდატიდან მხოლოდ 33 იყო ეთნიკური უმცირესობის წარმომადგენელი. სრულად... წყარო: ინფორმაციის თავისუფლების განვითარების ინსტიტუტი

თბილისი. ეკონომიკური პოლიტიკის კვლევის ცენტრი აგრძელებს დემოკრატიული ტრადიციის შესახებ ბლოგების ციკლს. ამჯერად მკითხველს აცნობს 1918 წლის 26 მაისს დამოუკიდებლობის გამოცხადების შემდეგ პირველი კოალიციური მთავრობის შესახებ ინფორმაციას. მასში შედიოდნენ სოციალ–დემოკრატები, სოციალისტ–ფედერალისტები, სოციალისტ–რევოლუციონერები და ეროვნულ–დემოკრატები. სრულად... წყარო: eprc

შიდა ქართლი. სოფელ შინდისში, სამოქალაქო კამპანიის „ეს ქვეყანა შენიას“ ფარგლებში, 19 ივლისს, გაიმართა შეხვედრა შინდისელ ახალგაზრდებთან. სამოქალაქო საზოგადოების ინსტიტუტის (CSI) მიერ ორგანიზებული შეხვედრის მიზანი იყო მოსახლეობაში სამოქალაქო საზოგადოების ღირებულებების დამკვიდრება, საზოგადოებრივი ორგანიზაციების როლის და ფუნქციის, მათი საქმიანობის წარმოჩენა და სამოქალაქო აქტივიზმის პოპულარიზაცია.  შეხვედრაზე მოწვეული სტუმრები, მწერალი და ტელეწამყვანი დათო ტურაშვილი, ასევე მწერალი და ტელეწამყვანი ტორესა მოსი და ფილოლოგი და მთარგმნელი ოქტაი ქაზუმოვი, ახალგაზრდებს ესაუბრნენ სამოქალაქო საზოგადოების განვითარებასა და სამოქალაქო პასუხისმგებლობის მნიშვნელობაზე, ასევე საქართველოს ევროპულ იდენტობაზე, ჩვენი ღირებულებების სიახლოვეზე და იმაზე რომ „საქართველო ევროპაა“.  შეხვედრაზე ასევე გამოცხადდა უკვე ტრადიციული კონკურსი „ეს ქვეყანა შენია“, რომელიც გაიმართება მთელი ქვეყნის მასშტაბით და გამარჯვებულები გამოვლინდება რეგიონების მიხედვით.  კამპანიას „ეს ქვეყანა შენიას“ უძღვება სამოქალაქო საზოგადოების ინსტიტუტი (CSI), ევროკავშირისა (EU) და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივის“ ფარგლებში.

განათლების განვითარებისა და დასაქმების ცენტრის გამგეობის თავმჯდომარე განცხადებას ავრცელებს და ეხმიანება, „ქართული ოცნების“ მიერ გამოქვეყნებულ კვლევის ანგარიშს. „კვლევა ეხება იმ მედია და არასამთავრობო ორგანიზაციებს, ვინც „უცხო ძალის გავლენის გამჭვირვალობის შესახებ“ კანონის მიღებას ეწინააღმდეგებოდა და ამტკიცებს, რომ ამ ორგანიზაციების უმრავლესობას აქვს გამჭვირვალობის და ანგარიშვალდებულების ნაკლებობა.  კვლევაში მოცემულია მცდარი მონაცემები განათლების განვითარების და დასაქმების ცენტრის - EDEC შესახებ. თითქოს, EDEC-ს არ გააჩნია ვებგვერდი, არ აქვს მითითებული დონორის ლოგო, განხორციელებული პროექტების შესახებ ინფორმაცია და გრანტის ოდენობა. ასევე არ არის ხელმისაწვდომი თანამშრომლების შესახებ ინფორმაცია.  EDEC- ის შესახებ ინფორმაცია სრულიად არ შეესაბამება სიმართლეს!  ჩვენს ორგანიზაციას ვებგვერდი აქვს მისი შექმნის პირველივე დღიდან. გარდა ამისა, საზოგადოებასთან კავშირის შენარჩუნებისთვის ვიყენებთ სხვადასხვა პლატფორმას, როგორიცაა Facebook, LinkedIn, და YouTube. ჩვენი ვებგვერდი, www.edec.ge, აქტიურად ფუნქციონირებს და მუდმივად ახლდება. ვებგვერდზე მითითებულია ყველა დონორი, მიმდინარე და წარსულში განხორციელებული პროექტები, გრანტის ოდენობა, პროექტის ვადები, სახელწოდება, პარტნიორები, მიზნები, შედეგები და აქტივობები“.  სრულად... წყარო: EDEC

თბილისი. ჰაინრიჰ ბიოლის ფონდი აქვეყნებს სტატიას: „ავტორიტარული კონსოლიდაციის (გეო) პოლიტიკური ეკონომიკა საქართველოში: უცხოური გავლენის კანონის განზომილებები „სტატიაში განხილულია „უცხოური გამჭვირვალობის შესახებ“ კანონის გეოპოლიტიკური და ეკონომიკური შედეგები, რომელიც საქართველოში ცოტა ხნის წინ იქნა მიღებული, საზოგადოების სხვადასხვა ჯგუფის ხმამაღალი პროტესტის მიუხედავად. (...) სტატია აანალიზებს კანონის შესაძლო შედეგებს ინფრასტრუქტურულ პროექტებსა და ვალზე დაფუძნებული განვითარების რეჟიმისთვის, ხაზს უსვამს საერთაშორისო ფინანსური ინსტიტუტების როლს და ეჭვქვეშ აყენებს მთავრობის მიზანს სუვერენიტეტის გაძლიერების შესახებ“, ნათქვამია ორგანიზაციის ვებგვერდზე. სრულად...  წყარო: ბიოლის ფონდი