იცი რომ ბიუჯეტი ხალხის ფულია? უყურე ვიდეოს და გაიგე რა არის და როგორ იქმნება სახელმწიფო ბიუჯეტი

ხობში, სოფელ თორსაში პატარა ღელე ჩამოდის, რომელსაც სახელად „თოლისკური“ ჰქვია. როცა პროფესიით ექიმმა გვანცა კიკალეიშვილმა თანამოაზრეებთან ერთად არასამთავრობო ორგანიზაცია დაარსა სახელზე ბევრი არ უფიქრია.„თოლისკური“ ასე ჰქვია, სოფელ თორსაში დაარსებულ განათლებისა და განვითარების ცენტრს, რომელიც ხობში მცხოვრები ახალგაზრდების არაფორმალური განათლების, სამოქალაქო აქტივიზმის და ადგილობრივების ეკონომიკური მდგომარეობის გაუმჯობესების ხელშეწყობის მიმართულებით მუშაობს.  ორგანიზაციამ 8 წლის განმავლობაში სამი ცენტრი შექმნა: შშმ ბავშვთა დღის ცენტრი „ჩვენი სახლი“, ახალგაზრდული ტექნოლოგიური ცენტრი და სოციალური საწარმო „ჩირიგე“. დღეს სოციალურ საწარმო „ჩირიგეზე“ გვინდა გიამბოთ. სოციალური მეწარმეობა ბიზნესის ახალი მიმართულებაა – ქმნის სხვადასხვა პროდუქტს, სერვისს და შემოსავლებს მიმართავს საზოგადოებისთვის მნიშვნელოვანი ინიციატივების განსახორციელებლად. საქართველოში ამ მოდელს ყველაზე ხშირად არასამთავრობო ორგანიზაციები იყენებენ. „თოლისკური“ ერთ–ერთია იმ ორგანიზაციებიდან, რომელმაც სოციალური საწარმოს მოდელი გამოიყენა – ადგილობრივი და დევნილი ქალები დაასაქმა, ადგილობრივი ფერმერებისგან სოფლებში მოყვანილი სხვადასხვა ეკოლოგიურად სუფთა ხილით ჩირის წარმოება დაიწყო. ახალგაზრდული ტექნოლოგიური ცენტრის წევრებმა კი ჩირისთვის სხვადასხვა შეფუთვა მოიფიქრეს და შექმნეს. სოციალური საწარმო „ჩირიგე“ სამომავლოდ ბევრ სიახლეს და განვითარებას გეგმავს, ხოლო სოციალური მიზნებისთვის წარმოებიდან შემოსული თანხით ახალგაზრდების და მათი ინიციატივების ფინანსურ მხარდაჭერას გეგმავს. ინიციატივების, რომლებიც ახალგაზრდების და მთლიანად სოფლის პრობლემებისა და განვითარებისკენ იქნება მიმართული. #გაიზიარეპასუხისმგებლობა რადგან #ესქვეყანაშენია

ანალიტიკური საზოგადოებრივი ორგანიზაცია – ეკონომიკური პოლიტიკის კვლევის ცენტრი18 წლის წინათ შეიქმნა. იგი სხვადასხვა მიმართულებით მუშაობს: ეკონომიკა; უსაფრთხოება და საგარეო პოლიტიკა; განათლება.  მისი აუდიტორია საკმაოდ ფართოა: საერთაშორისო საზოგადოების; არასამთავრობო ორგანიზაციების წარმომადგენლები; პოლიტიკოსები; ახალგაზრდები; მცირე და საშუალო ბიზნესის წარმომადგენლები.

სოციალური მეწარმეობა ბიზნესის ახალი მიმართულებაა, რომელიც საზოგადოების წინაშე არსებული კონკრეტული პრობლემების მოსაგვარებლად ბიზნეს მოდელს იყენებს. ქმნის სხვადასხვა პროდუქტს, აწვდის სხვადასხვა სექტორს სერვისს და შემოსავლებს მიმართავს საზოგადოების ინიციატივების განსახორციელებლად. ეს შეიძლება იყოს სხვადასხვა ჯგუფებისთვის არაფორმალური განათლების მიღება, გარემოსდაცვითი პრობლემების მოგვარება, თანასწორობის ხელშეწყობა, კულტურულ მემკვიდრეობაზე ზრუნვა და უამრავი სხვა მიმართულება. სოციალური მეწარმეობა საქართველოში მზარდი სექტორია, თავისებურება ისაა, რომ ამ მოდელს ძირითადად საზოგადოებრივი ორგანიზაციები იყენებენ. ალბათ გსმენიათ „წნულის“ შესახებ, რომელიც კასპში ბუნებრივი ნედლეულის საშუალებით არქაული ტიპის აქსესუარებს ამზადებს და მასში შშმ პირები არიან დასაქმებული. ასევე „ცოდნის კაფე“, რომელიც არაფორმალურ განათლებას აძლევს წნორში მცხოვრებ ბავშვებს, „ისტორიალი“ – უძველესი ნიმუშებს სწავლობს და ქმნის მსგავს პროდუქციას. ბათუმში „თავისუფალი სივრცე“, რომლის მიზანია შშმ პირთა ინტეგრაციის და დასაქმების ხელშეწყობა ინკლუზიურ კაფეში. სოციალური საწარმო „ფრილანსერი“, რომელიც კანონთან კონფლიქტში მყოფი პირების დასაქმებაზეა ორიენტირებული. საქართველოში ასეთი 100–მდე სოციალური საწარმოა. ყოველწლიურად მათგან ერთი, წლის საუკეთესოს სტატუსს იღებს. 2020 წლის 19 ნოემბერს, სოციალური საწარმოთა ალიანსის ორგანიზატორობით, ინტერნეტ სივრცეში გაიმართა ფორუმი, სადაც გამოვლინდა წლის სოციალური საწარმო - "გუმბათი". ალიანსი სოციალური საწარმოების ქოლგა ორგანიზაციაა, რომელიც 2016 წელს რამდენიმე არასამთავრობო ორგანიზაციამ და სოციალურმა საწარმომ დააფუძნა. რომლის მიზანია სოციალური საწარმოებისთვის ხელსაყრელ გარემოზე მუშაობა, სამართლებრივი ჩარჩოს შექმნა, საწარმოებისთვის მნიშვნელოვანი საკითხების ადვოკატირება, მოქმედი საწარმოებისა და სოციალური მეწარმეობის კონცეფციის პოპულარიზაცია, გამოცდილების გაზიარება.