საქართველო არის და იქნება ევროპა, #გაიზიარეპასუხისმგებლობა, რადგან #ესქვეყანაშენია

ზუსტად 222 წლის წინათ დაიწყო წინააღმდეგობა, რომელსაც ორ საუკუნეზე მეტი ხნის მანძილზე უამრავი აჯანყება, შეთქმულება და პროტესტი მოჰყვა. ანტირუსული გამოსვლების დასაწყისად ითვლება 1802 წლის 12 აპრილი – თბილისში, სიონის ტაძარში, რუსეთის იმპერატორის მანიფესტის გამოცხადებისას განვითარებული მოვლენები. რუსული ჯარით გარშემორტყმულ ტაძარში კახეთის თავადაზნაურობამ ქართლ–კახეთის სამეფოს გაუქმების მანიფესტს პროტესტით უპასუხა და იმპერატორის ერთგულების ფიცი არ მიიღო.  1802 წლის ივლისში ქიზიყში, ქელმენჩურის მიდამოებში, კახელი თავადაზნაურების ინიციატივით რამდენიმე ათასი ადამიანის შეკრება რუსეთის წინააღმდეგ პოლიტიკურ გამოსვლაში გადაიზარდა.  პოლიტიკური გამოსვლის მასშტაბურობის მიუხედავად, რუსეთის იმპერიამ მოახერხა მისი განეიტრალება, ჩახშობა. თუმცა ცხადი გახდა, რომ ქართველი ხალხი სახელმწიფოებრიობის დაკარგვას ვერ შეურიგდებოდა და თავისუფლებისთვის ბრძოლას არ შეწყვეტდა.  წყარო: რონდელის ფონდის პუბლიკაცია – „რუსეთის ექსპანსია კავკასიაში და საქართველო“ #გახსოვდესისტორია, რადგან #ესქვეყანაშენია

ახლა 2024 წელია და საქართველოს ტერიტორიის 20% ოკუპირებულია რუსეთის მიერ.  თუმცა რუსეთის ასეთი პოლიტიკა საუკუნეების მანძილზე გრძელდება და ოკუპანტი სახელმწიფო ყველა ბერკეტით ცდილობს საქართველოს დამორჩილებას.  რუსეთის დამპყრობლური პოლიტიკა ასეთია - წაგართვას ის, რაც ყველაზე მნიშვნელოვანია. თუკი ისტორიას გადავხედავთ, საუკუნეების მანძილზე, ქართველი ხალხი მუდმივად იცავდა სამშობლოს, ქართულ დამწერლობასა და რელიგიას - ქრისტიანობას.  მრავალწლიანი ტერორის და სამოქალაქო საზოგადოების გატეხვის მცდელობასთან ერთად, რუსეთი სწორედ იმას დაუპირისპირდა, რაც ქართველი ხალხისთვის ყველაზე ძვირფასია.  რამდენიმე მაგალითი:  მამული - რუსეთის ჯარებმა არაერთხელ დაიკავეს საქართველოს ტერიტორია, 1921 წელს კი მთელი ქვეყანა საბჭოთა იმპერიის ნაწილად აქციეს. ახლაც ჩვენი ტერიტორიის 20% აქვს ოკუპირებული.  ენა - 1881 წელს ქართულ სკოლებში ქართული ენა არასავალდებულოდ გამოაცხადა რუსეთის იმპერიამ.  1978 წელს, საბჭოთა კავშირის ხელისუფლებამ გადაწყვიტა მოკავშირე რესპუბლიკებში, მათ შორის საქართველოში, ადგილობრივი ენისთვის სახელმწიფო ენის სტატუსის ჩამორთმევა და სახელმწიფო ენად რუსულის გამოცხადება.  სარწმუნოება - 1811 წელს საქართველოს ეკლესიის ავტოკეფალია გააუქმა რუსეთის იმპერიამ. საქართველოს ეკლესიის ტრადიციების მოსპობის მიზნით შეიზღუდა ქართველი წმინდანების ხსენება.  მეოცე საუკუნის დასაწყისში რუსეთმა საქართველოში ასობით ეკლესია დაკეტა, ნაწილი დაანგრია, ნაწილი გადაღება.  მე-20 საუკუნის ბოლოს და 21-ე საუკუნის დასაწყისში რუსეთმა კვლავ გააგრძელა თავისი პოლიტიკა – საქართველოს ტერიტორიის 20% ოკუპირებულია, რასაც უამრავი მოქალაქე შეეწირა, მოსახლეობა საკუთარი სახლებიდან გამოდევნა, ისტორიულ-კულტურულ მემკვიდრეობას დიდი ზიანი მიაყენა, მათ შორის ეკლესიებსაც - ნაწილი განადგურდა, ან ახლა ნადგურდება.  რას გვასწავლის ისტორია?  უნდა დავიცვათ და გავუფრთხილდეთ ქვეყნის დამოუკიდებლობას, რადგან რუსული პოლიტიკა საუკუნეების მანძილზე არ იცვლება...  #გაიზიარეპასუხისმგებლობა რადგან #ესქვეყანაშენია

საიდან მოვდივართ და რატომ არის ჩვენი ადგილი ევროპაში? მოუსმინეთ და გაიგეთ მეტი ტორესა მოსის პოდკასტიდან.

მოუსმინეთ სულხან სალაძის პორდკასტს და გაიგეთ როგორ იყო ძველ ევროპულ რუკებში საქართველო ასახული. 

გახსოვდეს, ტოტალიტარული რეჟიმების ბრძოლის იარაღი მხოლოდ ომები, ძალადობა ან უმცირესობების ჩაგვრა არ არის. პროპაგანდა ის ფარული იარაღია, რომელიც დარტყმას კოლექტიურ ცნობიერებას აყენებს და საზოგადოებას ასუსტებს. #გაიზიარეპასუხისმგებლობა, არ დაუჯერო პროპაგანდას, რადგან #ესქვეყანაშენია

იცი რა აქვთ საერთო ოლივერ კრომველს, ენდრიუ ჯონსონს, რეზერფორდ ჰეისს და ჩარლზ პირველს? მათი ბედი ზუსტად ერთმა ხმამ გადაწყვიტა. ერთ ხმას ბევრი რამის შეცვლა შეუძლია, ნახე ვიდეო და თავად დარწმუნდი.  

100 წლის წინ, 1924 წელს, საბჭოთა მმართველობისა და რუსული ოკუპაციის წინააღმდეგ საერთო სახალხო აჯანყების მიზანი საბჭოთა ოკუპაციისგან საქართველოს გათავისუფლება და დემოკრატიული რესპუბლიკის აღდგენა იყო. საბჭოთა საოკუპაციო რეჟიმმა, ყველაზე მასშტაბური ანტისაბჭოური აჯანყება სასტიკად ჩაახშო - საქართველოში მასობრივი დახვრეტები დაიწყო, რასაც 4000-მდე მოქალაქე ემსხვერპლა. რუსეთი ოკუპანტია, ამას როგორც აწმყო, ისე ისტორიაც მოწმობს! ჩვენი ქვეყანა კი რუსული მარწუხებისგან დაღწევას უკვე რამდენიმე საუკუნეა ცდილობს.  #გაიზიარეპასუხისმგებლობა და იბრძოლე საქართველოს თავისუფლებისთვის!

არსებობს სტერეოტიპები, რომლებიც ხელს გვიშლის დემოკრატიული სახელმწიფოს აშენებაში და სამწუხაროდ, ასეთ დამოკიდებულებებს ჩვენი საზოგადოების გარკვეული ნაწილი იზიარებს კიდეც. #გაიზიარეპასუხისმგებლობა და არ აჰყვე სტერეოტიპებს, რადგან #ესქვეყანაშენია

უკვე იცი, რომ 2019-2024 წლებში ევროკავშირის დაფინანსება საქართველოს სამინისტროებისთვის 11-ჯერ აღემატება საზოგადოებრივი ორგანიზაციებისთვის გამოყოფილ თანხებს. 2019-2024 წლებში საქართველოს სამინისტროებისა და სხვა სახელმწიფო ინსტიტუტებისთვის, ევროკავშირის ფინანსურმა მხარდაჭერამ 517. 82 მილიონი ევრო შეადგინა, მაშინ როცა საზოგადოებრივი ორგანიზაციებისთვის ფინანსური მხარდაჭერა - 46.1 მილიონი ევროა. ევროკავშირის მიერ საზოგადოებრივი ორგანიზაციებისთვის გამოყოფილი თანხის 2/3-ზე მეტი კი განკუთვნილია იმ ორგანიზაციებისთვის, რომლებიც უშუალოდ მოსახლეობას უწევენ მომსახურებასა და დახმარებას. გაეცანი მონაცემებს, ნუ დაუჯერებ გადაუმოწმებელ ინფორმაციას, რადგან #ესქვეყანაშენია წყარო: ევროკავშირი

2024 წლის 1 აგვისტოს გამოქვეყნდა, საქართველოს იუსტიციის მინისტრის ბრძანება, რომელიც განსაზღვრავს უცხოური გავლენის გამჭვირვალობის შესახებ, იგივე „რუსული კანონის“ საფუძველზე შექმნილი რეესტრის წარმოების, საფინანსო დეკლარაციის წარდგენისა და მონიტორინგის წესებს. მანამდე, 29 ივლისს, საქართველოს იუსტიციის მინისტრის გადაწყვეტილებით, სსიპ - საჯარო რეესტრის ეროვნულ სააგენტოში შეიქმნა ახალი ერთეული, ფინანსური დეკლარირების დეპარტამენტი, რომელიც, მათ შორის, „უცხოური ძალის ინტერესების გამტარებელ ორგანიზაციათა რეესტრის“ წარმოებასა და მის საჯაროობაზე იქნება პასუხისმგებელი. აღსანიშნავია, რომ სამოქალაქო საზოგადოების ორგანიზაციათა მნიშვნელოვანი ნაწილი არ გეგმავს აღნიშნულ რეესტრში ნებაყოფლობით რეგისტრაციასა და საფინანსო დეკლარაციის წარმოდგენას, რადგან მათი განცხადებით, ამას არაფერი აქვს საერთო გამჭვირვალობასთან და მიმართულია ორგანიზაციების დისკრედიტაციისკენ, თუმცა კანონის მოთხოვნები იმ ორგანიზაციებისთვისაც პრობლემური აღმოჩნდება, რომლებიც ამგვარ რეესტრში, შესაძლოა, რეგისტრაციას გეგმავენ. იუსტიციის მინისტრის მიერ პირველ აგვისტოს გამოცემული ნორმატიული აქტით განსაზღვრული საფინანსო დეკლარაცია, რომელიც ორგანიზაციებმა უნდა წარადგინონ, სხვა ვალდებულებებთან ერთად, ასევე ითხოვს დეტალურ საიდენტიფიკაციო მონაცემებს ორგანიზაციასთან ურთიერთობაში მყოფი ყველა ფიზიკური პირის შესახებ, რომელთა მიმართაც საანგარიშო პერიოდის განმავლობაში რაიმე ხარჯი გაწეულა. საგულისხმოა, რომ იგივე ეხება დამფინანსებელ ფიზიკურ პირებსაც. ეს ვრცელდება 2023 წლის მონაცემებზეც, რომელთა ახალი წესით შეგროვებაც ორგანიზაციათა მნიშვნელოვანი ნაწილისთვის დიდ სირთულეს წარმოადგენს. აღნიშნული ინფორმაციის მოძიება და დამუშავება, გამომდინარე ამ ინფორმაციის ოდენობისა და სენსიტიურობისა, ასევე დამატებითი ადამიანური და ფინანსური რესურსის მობილიზების აუცილებლობის გამო, ორგანიზაციათა მნიშვნელოვანი ნაწილისთვის შესაძლოა წარმოადგენდეს ისეთი ტიპის სირთულეს, რამაც შეიძლება გამოიწვიოს ამ ორგანიზაციათა ფაქტობრივი პარალიზება და შესაბამისად მუშაობის შეფერხება. გარდა ამისა, სამომავლოდ მსგავსი დეტალიზაციის ინფორმაციის მოძიებამ, შესაძლოა, გააჩინოს ბენეფიციარებში პროცესისადმი უნდობლობა, რაც განსაკუთრებით დამაზიანებელი იქნება მომსახურების მიმწოდებელი და მოწყვლადი საზოგადოებრივი ჯგუფების თემატიკაზე მომუშავე ორგანიზაციებისთვის, რაც საბოლოოდ მნიშვნელოვნად შეუშლის ხელს ამ ორგანიზაციებს მუშაობაში. საყურადღებოა ისიც, რომ „რუსული კანონი“ ერთთვიან ვადას აძლევს ორგანიზაციებს, რათა მათ მატერიალური ფორმით წარადგინონ წერილობითი განცხადება უცხოური ძალის ინტერესების გამტარებელ ორგანიზაციად რეგისტრაციის შესახებ. ამის შემდეგ, 2 დღის ვადაში ორგანიზაცია დაიშვება „სათანადო ვებ-გვერდზე“, სადაც მან 10 სამუშაო დღეში უნდა შეავსოს განაცხადი, რაც ამავდროულად არის საფინანსო დეკლარაცია. გამომდინარე აქედან, კანონი დეკლარაციის მომზადებისა და წარდგენისთვის, პრაქტიკულად ძალიან მცირე დროს, ერთ თვე-ნახევარს განსაზღვრავს (არასწორად ან/და არასრულყოფილად შევსებული განაცხადის ავტორი ვალდებულია ხარვეზი 10 სამუშაო დღის ვადაში აღმოფხვრას). შედარებისთვის სამეწარმეო სუბიექტებისათვის ანგარიშგებისათვის, რაც "ბუღალტრული აღრიცხვის, ანგარიშგებისა და აუდიტის შესახებ" კანონით რეგულირდება, 9 თვეა განსაზღვრული. საინტერესოა, ისიც, რომ სამეწარმეო სუბიექტების ანგარიშგების წესში ცვლილებების შემოღებისას, რაც, ცხადია, თავისი არსით განსხვავდება სამოქალაქო საზოგადოების ორგანიზაციებისა და მედიისთვის შემოღებული ანგარიშგებისა, მოსამზადებელ პერიოდი ორი წელი გაგრძელდა, რა დროსაც სახელმწიფო ასევე ავრცელებდა ინფორმაციასა და ცოდნას არსებულ ცვლილებებზე. საფინანსო დეკლარაციის შევსებისა და წარდგენისთვის შემჭიდროვებული ვადები დამატებით ხელის შემშლელ ფაქტორს წარმოადგენს ორგანიზაციებისთვის და უარყოფითად აისახება მათ მუშაობაზე. გარდა ამისა, აღნიშნული შეზღუდვები მიუთითებს, რომ კანონის ამოქმედების მიზანს არა ორგანიზაციათა გამჭვირვალობის უზრუნველყოფა, არამედ მათი მუშაობის შეფერხება შეიძლება წარმოადგენდეს. საბოლოოდ, აღნიშნული მოთხოვნები, მათ შორის არსებული და სამომავლო სირთულეები, რომლებიც დაკავშირებულია ინფორმაციის მოძიებასა და დამუშავებასთან, ასევე შემჭიდროვებული ვადები, რომელშიც უნდა მოხდეს საფინანსო დეკლარაციის წარდგენა, ნეგატიურ ზეგავლენას მოახდენს სამოქალაქო სივრცის იმ აქტორების მუშაობაზე, რომლებიც ნებაყოფლობით რეგისტრაციას, ან სახელმწიფოს მიერ მათი რეგისტრაციის შემდეგ დეკლარაციის წარდგენას გეგმავენ, რაც, შესაძლოა, ამ საბოლოოდ მუშაობის შეჩერებითაც დასრულდეს. აღნიშნული სირთულეები კიდევ უფრო მეტად აუარესებს სამოქალაქო საზოგადოების ორგანიზაციების საარსებო გარემოს და ართულებს სამოქალაქო საზოგადოების ორგანიზაციების მხრიდან ადვოკატირებისა და მომსახურების მიწოდების შესაძლებლობას.

27 ივნისს ევროპის საბჭოს საპარლამენტო ასამბლეამ (PACE) 66 ხმით 4-ის წინააღმდეგ მხარი დაუჭირა რეზოლუციას, რომელიც საქართველოში დემოკრატიის წინაშე არსებულ გამოწვევებს ეხმიანება. რეზოლუციაში ასახული შეშფოთებები პრაქტიკულად განმეორდა ევროპის საბჭოს გადაწყვეტილებებსა და მოწოდებებშიც. რეზოლუციის ტექსტში ნათქვამია, რომ საპარლამენტო ასამბლეა გამოხატავს ღრმა შეშფოთებას საქართველოში ბოლო დროს განვითარებული მოვლენების გამო, რაც სერიოზულ ეჭვებს ბადებს ქვეყნის მხრიდან საერთაშორისო დემოკრატიული ნორმებისა და ევრო-ატლანტიკური მისწრაფებებისადმი ერთგულებასთან დაკავშირებით. რეზოლუციის თანახმად, ასამბლეა სრულად უჭერს მხარს უცხოური გავლენის გამჭვირვალობის შესახებ კანონთან დაკავშირებით ვენეციის კომისიის მიერ მომზადებულ დასკვნას და მიიჩნევს, რომ ეს კანონი, ისევე როგორც მისი მიღების წესი, არის შეუთავსებელი ევროპულ დემოკრატიულ და ადამიანის უფლებათა სტანდარტებთან. ასამბლეის ხედვით, ამ კანონს არაფერი აქვს საერთო არც არაკომერციული სუბიექტების, მათ შორის, სამოქალაქო საზოგადოების ორგანიზაციებისა და მედიის ფინანსურ გამჭვირვალობასთან და არც მტრული უცხოური გავლენის შეკავებასთან, არამედ ის საშუალებას აძლევს ხელისუფლებას, სამოქალაქო საზოგადოებასა და მედიაზე არასათანადო პოლიტიკური კონტროლი დაამყაროს. PACE-ს რეზოლუციის მიხედვით, კანონი მთლიანად უნდა გაუქმდეს ყოველგვარი შეფერხების გარეშე. რეზოლუციის ტექსტის თანახმად, ამ კანონის მიღება არ არის იზოლირებული შემთხვევა, არამედ წარმოადგენს მოვლენათა განვითარების ერთგვარ კულმინაციას, რაც ნათლად წარმოაჩენს ქვეყანაში დემოკრატიულ უკუსვლას. ასამბლეა საქართველოს კვლავ დემოკრატიული კურსისკენ დაბრუნებისკენ მოუწოდებს, რაც არამხოლოდ სიტყვებში, არამედ მკაფიო მოქმედებებში უნდა გამოიხატებოდეს. უცხოური გავლენის გამჭვირვალობის შესახებ კანონის მიღება არ შეიძლება განიხილებოდეს საქართველოს მოახლოებული საპარლამენტო არჩევნებისგან იზოლირებულად, რომელიც ჩატარდება 2024 წლის 26 ოქტომბერს. ასამბლეა შიშობს, რომ ეს კანონი უარყოფით გავლენას მოახდენს არჩევნებზე და შედეგებისადმი ნდობაზე, რამაც „შეიძლება გავლენა მოახდინოს არჩევნების ლეგიტიმურობაზე“. გარდა რუსული კანონის გაუქმების მოწოდებისა, რეზოლუციაში ასევე ნათქვამია, რომ ასამბლეა შეშფოთებულია პოლიციის მიერ ძალის გადაჭარბებული და არაპროპორციული გამოყენების, ასევე, დემონსტრანტების, სამოქალაქო საზოგადოების აქტივისტების, ჟურნალისტების და პარლამენტის წევრების წინააღმდეგ ძალადობრივი თავდასხმებისა და დაშინების კამპანიების გამო. ასამბლეა ასევე შეშფოთებულია, რომ ეს თავდასხმები არ არის საკმარისად გამოძიებული და დაგმობილი ხელისუფლების მიერ, რამაც შეიძლება დაუსჯელობის ატმოსფერო შექმნას. 27 ივნისს, მათ შორის, საქართველოს შესახებ იმსჯელა ევროპულმა საბჭომაც (EUCO). საბჭო, ისევე როგორც საპარლამენტო ასამბლეა, შეშფოთებას გამოხატავს ქვეყანაში მიმდინარე მოვლენების გამო. საბჭო თავის გადაწყვეტილებაში აცხადებს, რომ უცხოური გავლენის გამჭვირვალობის შესახებ მიღებული კანონი კანდიდატის სტატუსის მინიჭების შესახებ ევროკომისიის რეკომენდაციაში მითითებულ ნაბიჯებთან მიმართებაში უკუსვლას წარმოადგენს. ევროპული საბჭო მოუწოდებს საქართველოს ხელისუფლებას, სიცხადე შეიტანოს თავის განზრახვებში არსებულ მოქმედებათა კურსის ცვლილების საშუალებით, რაც საფრთხეს უქმნის საქართველოს ევროკავშირისკენ მიმავალ გზას და გაწევრიანების პროცესი ფაქტობრივად გაჩერებამდე მიყავს. გარდა ამისა, ევროპული საბჭო სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების მიმართ დაშინების, მუქარისა და ფიზიკური თავდასხმის მზარდი შემთხვევების შეწყვეტის მოწოდებით გამოდის. საბჭო აღნიშნავს, რომ ნებისმიერი ქვეყნისთვის, რომელიც ევროკავშირში გაწევრიანებისკენ მიისწრაფვის, არსებითია იმ ღირებულებებისა და პრინციპების პატივისცემა, რომელსაც ევროკავშირი ეფუძნება. საბჭო თავის მოწოდებებში ასევე აღნიშნავს, რომ დაგეგმილი არჩევნები უნდა იყოს თავისუფალი და სამართლიანი და მხარს უჭერს პარტნიორების მხრიდან არჩევნებზე გრძელვადიან და მოკლევადიან სიღრმისეულ დაკვირვებას. EUCO კვლავ ადასტურებს ურყევ მხარდაჭერას საქართველოს ტერიტორიული მთლიანობის მიმართ და გამოხატავს მტკიცე სოლიდარობას საქართველოს მოსახლეობისადმი და მზაობას განაგრძოს მისი მხარდაჭერა ევროპული მომავლისკენ მიმავალ გზაზე. ევროპული საბჭო არის ევროკავშირის კოლეგიალური ორგანო, რომელიც განსაზღვრავს კავშირის პოლიტიკურ მიმართულებასა და პრიორიტეტებს. იგი აერთიანებს წევრი ქვეყნების სახელმწიფოთა და მთავრობათა მეთაურებსა და ევროკომისიისა და ევროპული საბჭოს პრეზიდენტებს. რაც შეეხება ევროპის საბჭოს საპარლამენტო ასამბლეას, ესაა საბჭოს ერთგვარი საპარლამენტო ორგანო, რომელშიც 46 ქვეყნის, მათ შორის საქართველოს, წარმომადგენლები შედიან.