თბილისი. საერთაშორისო გამჭვირვალობა-საქართველო (TI) განაგრძობს სახელმწიფო შესყიდვების პროცესის მონიტორინგს.  კორუფციის სავარაუდო ნიშნების არსებობის გამო, ამჯერად, ორგანიზაციის ყურადღება საგარეჯოს მუნიციპალიტეტის გამარტივებულმა შესყიდვებმა მიიპყრო, სადაც ტენდერებს და გამარტივებულ შესყიდვებს საგარეჯოს საკრებულოს თავმჯდომარის, ოთარ ჩალათაშვილის ბიზნესპარტიორი, ოთარ ბუზარიაშვილი იღებს.  სრულად...  წყარო: https://www.transparency.ge

თბილისი. „საერთაშორისო გამჭვირვალობა - საქართველოს” საპარლამენტო მონიტორინგის პროექტის ფარგლებში შესრულებული კვლევა მოიცავს გენდერული თანასწორობის საბჭოს საქმიანობას 2018 წლის 29 ივლისიდან - 2019 წლის 31 ივლისის ჩათვლით პერიოდში. „წარმოდგენილი კვლევის ფარგლებში შესწავლილი და შეფასებულია საბჭოს აქტივობა სახელმწიფო პოლიტიკის ძირითადი მიმართულების განსაზღვრის ხელშეწყობის, კანონმდებლობის გენდერული ანალიზის, ახალ საკანონმდებლო ინიციატივებზე მუშაობის და გენდერულ საკითხებთან დაკავშირებით ანგარიშვალდებული ორგანოების საქმიანობის ზედამხედველობის მიმართულებით“, ნათქვამია ორგანიზაციის ვებგვერდზე. სრულად... წყარო: www.transparency.ge

კახეთი. „საერთაშორისო გამჭვირვალობა - საქართველოს” სამოქალაქო საბჭოების წევრებმა კახეთის 4 მუნიციპალიტეტის (სიღნაღი, თელავი, ყვარელი, ახმეტა) 12-მდე დასახლებაში 30-მდე ინფრასტრუქტული პრობლემა/საჭიროება გამოავლინეს.  ორგანიზაციის სამოქალაქო საბჭოების წევრების მიერ გამოკითხული მოქალაქეები ისეთ საჭიროებებსა და პრობლემებს ასახელებენ, როგორიცაა: სასმელი და სარწყავი წყლის სისტემების რეაბილიტაცია, შიდა საუბნო და ცენტრალურ ტრასამდე დამაკავშირებელი გზების კეთილმოწყობა, სანიაღვრე არხების მოწესრიგება, საექიმო ამბულატორიების მშენებლობა, საბავშვო ბაღების რეაბილიტაცია და ა.შ.  სრულად...  წყარო: https://www.transparency.ge

თბილისი. „საერთაშორისო გამჭვირვალობა - საქართველოს” სამოქალაქო საბჭოების წევრებმა შიდა ქართლის 2 მუნიციპალიტეტის (ქარელი, გორი) 6 დასახლებაში 15 ინფრასტრუქტურული პრობლემა/საჭიროება გამოავლინეს. „როგორც აღმოჩნდა, ადგილობრივ საჭიროებებს შორის ერთ-ერთ ყველაზე მნიშვნელოვანი სასმელი წყლის სისტემის მოწესრიგებაა. ხურვალეთის დევნილთა დასახლებაში სასმელი წყლით უზრუნველყოფას ითხოვენ, სოფელ დვანსა და უფლისციხეში კი წყლის ლაბორატორიული ანალიზის ჩატარებას. სოფელ უფლისციხეში, წყლის ლაბორატორიულ ანალიზთან ერთად, არსებულ წყაროებზე ონკანების დაყენებასაც მოითხოვენ. პრობლემებს შორის მოხვდა შიდა სასოფლო გზების, საბავშვო ბაღების არსებული მდგომარეობა და ა.შ.“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. „პარლამენტმა უზენაესი სასამართლოს მოსამართლეობის კანდიდატების სიას მხარი არ უნდა დაუჭიროს!“ - აცხადებს ორგანიზაცია „კონსტიტუციის 42-ე მუხლი“ და უზენაესი სასამართლოს მოსამართლეობის კანდიდატებთან გასაუბრების პროცესზე დაკვირვების შედეგებს აქვეყნებს.  „წარმოვადგენთ დაკვირვების შედეგებს, სადაც მკაფიოდ ჩანს, რომ კანდიდატების აბსოლუტური უმრავლესობის მიმართ ეჭვქვეშ დადგა მათი კეთილსინდისიერება და სამოსამართლო ღირებულებების ერთგულება. გასაუბრების დროს კანდიდატები ცდილობდნენ სასამართლოს შიგნით არსებული პრობლემები მიჩქმალონ, სასამართლოს დამოუკიდებლობის დაბალი ხარისხი, სასამართლის მიმართ ნდობის ნაკლებობა გარე ფაქტორებს გადააბრალონ და პასუხისმგებლობა აარიდონ სასამართლოს გავლენიან ჯგუფს ე. წ. „კლანს“, - ვკითხულობთ ორგანიზაციის მიერ გავრცელებულ ინფორმაციაში.  სრულად...  წყარო: article42.ge

თბილისი. „საერთაშორისო გამჭვირვალობა - საქართველო“ ეხმაურება საჯარო სამსახურის ბიუროს 10 დეკემბრის განცხადებას, რომელიც ეხება ორგანიზაციის მიერ იმავე დღეს გამოქვეყნებულ კვლევას მინისტრების და მათი მოადგილეების ბიზნეს კავშირებზე. „ბიუროს განცხადება დიდწილად ბუნდოვანია და უმეტეს შემთხვევაში რთულია იმის გაგება, თუ კონკრეტულად კვლევაში მოყვანილ რომელ ფაქტებს ან დასკვნებს აყენებს ბიურო ეჭვქვეშ. ასევე, უკიდურესად შემაშფოთებელია თავად საჯარო სამსახურის ბიუროს განცხადების სულისკვეთება. იქმნება შთაბეჭდილება, რომ ბიურო მიზნად ისახავს პოლიტიკური თანამდებობის პირების დაცვას კრიტიკისგან და ამ მიზნის მიღწევას ცდილობს სამოქალაქო საზოგადოების ორგანიზაციის მიერ განხორციელებული კვლევის დისკრედიტაციის საშუალებით. ასეთი ქმედება ძირეულად ეწინააღმდეგება ბიუროს, როგორც პოლიტიკურად ნეიტრალური საჯარო ინსტიტუტის, მისიას“, ნათქვამია განცხადებაში. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბოლნისის მუნიციპალიტეტში არსებული პრობლემების და გამოწვევების შეფასების ზოგად დოკუმენტს. „შესწავლის ფარგლებში გამოვლინდა გამოწვევები, რომელიც უკავშირდება პოლიტიკური მონაწილეობის, სათანადო განათლების, სოციალური დაცვის, საჯარო ტრანსპორტის, გარემოს დაცვის, კულტურული თვითმყოფადობის შენარჩუნების საკითხებს. შეხვედრებისას ადგილობრივებმა გაგვიზიარეს, რომ სოფლის მაცხოვრებლები არათუ არ მონაწილეობენ მუნიციპალიტეტის ცხოვრებაში, არამედ ხშირ შემთხვევაში ენის ბარიერის გამო კომუნიკაციაც კი არ აქვთ მუნიციპალიტეტის ადმინისტრაციულ ორგანოებთან“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ქართული ოცნების“ მიერ აჭარის ტელევიზიის ხელში ჩაგდების მცდელობის ქრონოლოგია. „მმართველი პარტიის მხრიდან აჭარის ტელევიზიაზე ზეგავლენის მოპოვების აქტიური მცდელობა 2019 წლის აპრილში აჭარის ტელევიზიისა და რადიოს დირექტორის, ნათია კაპანაძის, დაუსაბუთებელი იმპიჩმენტით დაიწყო. თავად იმპიჩმენტი იმ ფონზე განხორციელდა, როდესაც კაპანაძის დირექტორობის პერიოდში, მაუწყებელი ადგილობრივი და საერთაშორისო ორგანიზაციების შეფასებით, პოლარიზებულ მედია გარემოში დაბალანსებულობითა და მიუკერძოებლობით გამოირჩეოდა. ამის შემდეგ კი ხელისუფლების მხრიდან მთელი რიგი ნაბიჯები გადაიდგა აჭარის ტელევიზიაზე ზეგავლენის საბოლოოდ მოსაპოვებლად“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ადამიანის უფლებათა დაცვის საერთაშორისო დღესთან დაკავშირებით, საქართველოს სახალხო დამცველი განცხადებას ავრცელებს.  „წინამდებარე განცხადებით, გვსურს, გასული წლების მსგავსად, შევახსენოთ ხელისუფლებას და საზოგადოებას ადამიანის უფლებათა დაცვის მნიშვნელობა. სწორედ, ადამიანის უფლებათა და თავისუფლებათა დაცვის კუთხით არსებული მდგომარეობა განაპირობებს ქვეყანაში თითოეული ადამიანის კეთილდღეობას. ადამიანი და მისი ღირსება უნდა იყოს მთავარი მამოძრავებელი ნებისმიერი ხელისუფლებისთვის. გადაწყვეტილების მიმღები პირები, თავიანთი უფლებამოსილებების შესრულების პროცესში, ადამიანის ძირითადი უფლებებითა და თავისუფლებებით უნდა იყვნენ შებოჭილნი“, - ნათქვამია განცხადებაში.  სრულად... წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) მიმდინარე წელს ადამიანის უფლებათა მდგომარეობას აფასებს.  EMC მიიჩნევს, რომ პოლიტიკური, სოციალური და უფლებრივი თვალსაზრისით ეს იყო ქართული ოცნების მმართველობის პერიოდში ყველაზე რთული წელი, რომელმაც პოლიტიკურის კრიზისები და ჩვენს საზოგადოებაში არსებული სოციალური ფრუსტრაცია კიდევ უფრო გააღრმავა.  სრულად...  წყარო: https://emc.org.ge

თბილისი. საქართველოს ახალგაზრდა იურისტთა ასოციაცია (საია) 2019 წელს საქართველოში ადამიანის უფლებათა დაცვის მდგომარეობის შესახებ ანგარიშს აქვეყნებს. „საია-ს შეფასებით, წლის განმავლობაში აქტუალურ თემებს შორის იყო შეკრების და მანიფესტაციის უფლების უხეში დარღვევის ფაქტები, არაპროპორციული პოლიციური ძალის გამოყენების შემთხვევები, სასამართლოში ადმინისტრაციული სამართალდარღვევის საქმეების ფორმალური განხილვის პრაქტიკა, სისხლის სამართლის საქმეებზე მოსამართლის ფორმალური როლი ადამიანის უფლებების დაცვაზე სასამართლო კონტროლის განხორციელებისას, საოკუპაციო ხაზთან არსებული მძიმე ჰუმანიტარული კრიზისი, მედია გარემოს მიმართულებით შექმნილი საფრთხეები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: მინისტრებისა და მათი მოადგილეების ბიზნესინტერესები – 2019 წლის მდგომარეობა და აღმოჩენილი დარღვევები. „ოფიციალური მონაცემების მიხედვით, საქართველოს მინისტრებისა და მინისტრის მოადგილეების თითქმის ნახევარს – 64-დან 29-ს – უდასტურდება კომერციული ინტერესი (მას და/ან მის ოჯახის წევრს). შემაშფოთებელია ის ფაქტი, რომ ბიზნესინტერესის მქონე მინისტრებისა და მინისტრის მოადგილეების უმეტესობას (29-დან 22-ს), ამა თუ იმ ფორმით, დარღვეული აქვს კანონის ის მოთხოვნები, რომლებიც უკავშირდება კომერციული ინტერესის გამჟღავნებას და ინტერესთა შეუთავსებლობის თავიდან აცილებას“, ნათქვამია ორგანიზაციის გვერდზე სოციალურ ქსელში. სრულად... წყარო: transparency.ge

თბილისი. 2019 წლის 9 დეკემბერს უფლებადამცველების საერთაშორისო დღე საქართველოში მეორედ აღინიშნა. მისი აღნიშვნის მიზანი უფლებადამცველებისა და უფლებადაცვითი ორგანიზაციების საქმიანობის შესახებ ცნობადობის გაზრდა და მათი როლის აღიარებაა.  „საქართველოს, როგორც გაეროს ერთ-ერთ წევრ სახელმწიფოს აკისრია ვალდებულება, ადამიანის უფლებათა დამცველებს შეუქმნას საქმიანობისთვის შესაბამისი პირობები და დაიცვას ისინი ნებისმიერი სახის ზეგავლენისაგან“, - ნათქვამია სახალხო დამცველის მიერ გავრცელებულ განცხადებაში, - „ჩვენ ყურადღება გავამახვილეთ ბოლო წლების სამწუხარო ტენდენციებზე; განსაკუთრებით იმ ფაქტებზე, როდესაც მაღალი პოლიტიკური თანამდებობის პირები სიტყვიერად ესხმოდნენ თავს არასამთავრობო ორგანიზაციების წარმომადგენლებს და ახდენდნენ მათ დისკრედიტაციას. ასევე, არასამთავრობო ორგანიზაციებისა და ადამიანის უფლებადამცველების მიმართ სოციალურ ქსელებში მიმდინარე დეზინფორმაციულ კამპანიაზე, რომელსაც კარგად დაფინანსებული ორგანიზებული ხასიათი ქონდა“.  სრულად...  წყარო: http://ombudsman.ge

თბილისი. საქართველოში ადამიანის უფლებების მდგომარეობასთან დაკავშირებით, საქართველოს დემოკრატიულმა ინიციატივამ მიმოხილვა მოამზადა.  მიმოხილვა ასახავს, 2019 წლისთვის, ქვეყანაში ადამიანის უფლებათა დაცვის მდგომარეობას და გამოყოფს ამ მიმართულებით არსებულ ძირითად პრობლემებსა და გამოწვევებს. მათ გადაჭრას, ორგანიზაციის აზრით, ფუნდამენტური მნიშვნელობა ექნება, სამომავლოდ, ადამიანის უფლებათა პოლიტიკის განსაზღვრისთვის და უფლებათა დარღვევების წინააღმდეგ დაცვის მექანიზმების გასაძლიერებლად.  სრულად...  წყარო: www.gdi.ge

თბილისი. საერთაშორისო გამჭვირვალობა - საქართველო, კორუფციასთან ბრძოლის საერთაშორისო დღესთან დაკავშირებით განცხადებას ავრცელებს. „კორუფციის სხვადასხვა ფორმასთან გამკლავება მნიშვნელოვან გამოწვევად რჩება საქართველოსთვის. საქართველოში გამოკითხულთა 36% ფიქრობს, რომ გავრცელებულია თანამდებობის პირთა მიერ თანამდებობის გამოყენება პირადი გამორჩენისთვის (მხოლოდ 15% ფიქრობს, რომ არ არის გავრცელებული), ხოლო 51% ფიქრობს, რომ არ ხდება კორუფციის შემთხვევების სათანადოდ გამოძიება მაშინ, როდესაც საქმე მაღალი თანამდებობის პირებს ან მმართველ პარტიასთან დაკავშირებულ გავლენიან ადამიანებს ეხება“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტმა (IDFI) საპროცესო შეთანხმების შესახებ კანონმდებლობისა და პრაქტიკის ანალიზის პრეზენტაცია გამართა. „ჩვენი კვლევა ემსახურება საპროცესო შეთანხმებებთან დაკავშირებით არსებული ხარვეზების და გამოწვევების იდენტიფიცირებას და მათი აღმოფხვრის მიზნით კონკრეტული წინადადებების განსაზღვრას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: გახშირებული პოლიტიკური დაპირისპირებები ქვეყნისთვის სახიფათო ფორმებს იღებს. „ბოლო პერიოდში თბილისსა და ქვეყნის სხვა ქალაქებში სამოქალაქო აქტივისტების ჯგუფებისა და ოპოზიციური პოლიტიკური პარტიების საპროტესტო აქციებს „ქართული ოცნების” აქტივისტები და მხარდამჭერები უპირისპირდებიან. ზოგიერთ შემთხვევაში საქმე ფიზიკურ დაპირისპირებამდეც კი მივიდა. მიუხედავად იმისა, რომ პოლიცია ყველა შემთხვევის დროს დაპირისპირების ადგილზე იმყოფებოდა, ზოგჯერ იქმნებოდა შთაბეჭდილება, რომ იგი ბოლომდე ვერ ან არ ახერხებდა მდგომარეობის განმუხტვას. „საერთაშორისო გამჭვირვალობა - საქართველო” მოუწოდებს პოლიტიკურ პარტიებს, პროტესტის გამოხატვის დროს არ გავიდნენ კანონის ჩარჩოებიდან და თავი შეიკავონ აგრესიული კონტრაქციებისგან. ასევე, მოვუწოდებთ შინაგან საქმეთა სამინისტროს, მაქსიმალურად უზრუნველყოს საპროტესტო აქციების მონაწილეების უსაფრთხოება და პასუხისგებაში მისცეს ყველა სამართალდამრღვევი“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტმა (IDFI) 29-30 ნოემბერს, ორდღიან საერთაშორისო კონფერენციას - კარგი მმართველობის ფორუმს (GG Forum) უმასპინძლა. „ფორუმის მიზანი იყო კორუფციასთან, განსაკუთრებით კი მაღალი დონის კორუფციასთან ბრძოლის ინოვაციური და ეფექტური მიდგომების განხილვა. ამ მიზნით, ღონისძიებაზე, ადგილობრივი და საერთაშორისო ექსპერტებისა და დაინტერესებული პირების ჩართულობით დისკუსიები გაიმართა შემდეგ საკითხებზე: საჯარო შესყიდვები და ღია კონტრაქტები, კომპანიების ბენეფიციარი მფლობელების ღიაობა და მოპოვებითი დარგების გამჭირვალობის ინიციატივა, კორუფციასთან ბრძოლის ინსტიტუციური მოდელები და კამპანიები“, ნათქვამია ორგანიზაციის გვერდზე სოციალურ ქსელში. სრულად... წყარო: idfi.ge

თბილისი. „საერთაშორისო გამჭვირვალობა - საქართველომ“ შეისწავლა თბილისის VI მოწვევის საკრებულოს 50-ვე წევრის სამეწარმეო საქმიანობა და, როგორც ორგანიზაციის მიერ გავრცელებულ ინფორმაციაშია აღნიშნული, რამდენიმე დარღვევა გამოავლინა.  კერძოდ: საკრებულოს 10 თანამდებობის პირს არასრულად აქვს დეკლარირებული საკუთარი ან ოჯახის წევრის სამეწარმეო საქმიანობა; ექვსმა კერძო კომპანიაში საკუთარი წილი მართვის უფლებით სხვა პირს არ გადასცა; ხოლო ერთი იკავებს დირექტორის პოზიციას კერძო კომპანიაში, რითაც ეწევა თანამდებობასთან შეუთავსებელ საქმიანობას.  „საერთაშორისო გამჭვირვალობა - საქართველო“ მიმართავს „საჯარო სამსახურის ბიუროს“, შეისწავლოს ამ თანამდებობის პირების ქონებრივი მდგომარეობის დეკლარაციები და მოახდინოს შესაბამისი რეაგირება.  სრულად...  წყარო: www.transparency.ge

თბილისი. „მითების დეტექტორი“ აქვეყნებს ბლოგპოსტს: 21 ტროლი საპროტესტო აქციების წინააღმდეგ. „საპროტესტო აქციების პარალელურად, ფეისბუკში კვლავ გამოჩდნენ სახელისუფლებო ტროლები, რომლებიც აქციების მონაწილეების დისკრედიტაციას ახდენდნენ და ხელისუფლების მიმართ მხარდაჭერას გამოხატავდნენ. “მითების დეტექტორმა” გამოავლინა ასეთი 21 ტროლი, რომელიც სხვადსხვა სოციალულ ქსელებში დარეგისტრირებული მომხმარებლების იდენტობებს იპარავენ. გამოვლენილი 21 ტროლიდან 5 მართავს ერთი და იმავე სპამ ჯგუფებს, სადაც ისინი აქციის მადისკრედიტირებელი შინაარსის პოსტებს აზიარებდნენ. ამ ჯგუფების 5 ადმინისტრატორიდან 2 დეაქტივირებულია. პოსტების ჯგუფებში გაზიარების სქემა ტროლების კოორდინირებულ მოქმედებაზე მიუთითებს. ეს ჯგუფებია უნივერსალური, უფალო შეგვიწყალენ, საინტერესო, პოსტალიონი, ბიძინა ივანიშვილი ჩემი თანამოქალაქეა“, ნათქვამია ორგანიზაციის ვებგვერდზე. სრულად... წყარო: www.mythdetector.ge

თბილისი. საერთაშორისო გამჭვირვალობა - საქართველო აქვეყნებს დოკუმენტს - „ეთიკის ნორმების დარღვევა და რეაგირების მექანიზმები საქართველოს პარლამენტში“.  „საკანონმდებლო ორგანოში სიტყვიერი და ფიზიკური დაპირისპირებები არაერთხელ გამხდარა საზოგადოების განსჯის საგანი. პარლამენტმა 2019 წლის 22 თებერვალს ეთიკის კოდექსი მიიღო, თუმცა ეთიკის საბჭოს დებულება ამ დრომდე არ არის დამტკიცებული და ეთიკის საბჭო ყველა წევრით არ დაკომპლექტებულა. შესაბამისად, ის ვერ განიხილავს საჩივრებს და დეპუტატების მიერ ეთიკური კოდექსის ნორმების დარღვევებს, რამაც ბევრი მნიშვნელოვანი ინციდენტი სათანადო რეაგირების გარეშე დატოვა“, - ვკითხულობთ დოკუმენტის შესავალში.  სრულად...  წყარო: www.transparency.ge

თბილისი. საერთაშორისო გამჭვირვალობა - საქართველო სიღნაღის მუნიციპალიტეტში კორუფციის სავარაუდო ნიშნების არსებობის შესახებ საუბრობს.  „სიღნაღის მუნიციპალიტეტის მიერ განხორციელებული შესყიდვების ანალიზმა გამოკვეთა სიღნაღის მუნიციპალიტეტის საკრებულოს წევრის, ივანე მირიანაშვილისა და მისი გარემოცვის კერძო ინტერესები: მისი შვილისა და მასთან დაახლოებული პირების კომპანიებმა, 2013 წლიდან 2019 წლის ჩათვლით, ჯამში 5,375,427.64 ლარის ღირებულების 44 ტენდერი და 57 გამარტივებული შესყიდვა მიიღეს“, - ვკითხულობთ ორგანიზაციის მიერ გავრცელებულ ინფორმაციაში.  სრულად...  წყარო: www.transparency.ge