თბილისი. ადამიანის უფლებათა ცენტრი აქვეყნებს ანალიტიკურ დოკუმენტს „სამოქალაქო აქტივისტების წინააღმდეგ მიმდინარე ადმინისტრაციული სამართალდარღვევის საქმეები – სასამართლო მონიტორინგის შედეგები“. „მონიტორინგის მიგნებების თანახმად, მთავარი პრობლემებია, მათ შორის, პოლიციის მიერ დაკავების საფუძვლისა და უფლებების შესახებ განმარტების მიუწოდებლობა, დაკავებისა და მისი ვადის გაგრძელების საფუძვლების დაუსაბუთებლობა, ადმინისტრაციული ორგანოს მხრიდან მტკიცებულებების მოპოვებისა და სასამართლოში წარდგენის დაბალი სტანდარტი, მოწმეების სახით დაკითხულ პოლიციელთა ჩვენებების სანდოობა და სხვ“, ნათქვამია დოკუმენტში სრულად... წყარო: ადამიანის უფლებათა ცენტრი.

თბილისი. საერთაშორისო გამჭვირვალობა – საქართველო აგრძელებს თანამდებობის პირთა დეკლარაციების შესწავლას. ამჯერად ორგანიზაცია აქვეყნებს ინფორმაციას თბილისის საკრებულოს კომისიის თავმჯდომარის კახაბერ ლაბუჩიძის დეკლარაციის შესახებ. მან „... 2024 წლის თანამდებობის პირთა ქონებრივი მდგომარეობის დეკლარაციაში საკუთარი უძრავი ქონება და ხელფასი არ მიუთითა“, ნათქვამია ინფორმაციაში. გამჭვირვალობა – საქართველო მიმართავს სსიპ ანტიკორუფციულ ბიუროს შეისწავლის კახაბერ ლაბუჩიძის დეკლარაციაში გამოვლენილი დარღვევები და მოახდინოს შესაბამისი რეაგირება.  სრულად...  წყარო: საერთაშორისო გამჭვირვალობა – საქართველო

აჭარა. „ჩაერთე მართვის“ ბათუმის კლუბის წევრი ახალგაზრდები აგრძელებენ ადვოკატირების კამპანიას. ამ მიზნით მათ სხვადასხვა აქტივობები განახორციელეს. კლუბის მონაწილეთა ნაწილმა, მონაწილეობითი მექანიზმების შესახებ ცნობიერების ამაღლების და ადგილობრივი საჭიროებების მოკვლევის მიზნით, ხანდაზმულებთან და მოხალისეებთან გამართა შეხვედრა.  ახალგაზრდების ნაწილი კი ბათუმის დამოუკიდებელი ცხოვრების ცენტრის წარმომადგენლებს შეხვდნენ და ბათუმის ერთ–ერთი ქუჩის ადაპტირების საკითხებზე მონიტორინგი ჩაატარეს.  „ჩაერთე მართვის“ კლუბის წევრების მონიტორინგის მიზანია შედეგებზე დაყრდნობით სარეკომენდაციო წინადადებების შემუშავება და მუნიციპალიტეტის წარმომადგენლებისთვის განსახილველად წარდგენა.  კლუბი „ჩაერთე მართვაში“ საქართველოს 4 რეგიონში ფუნქციონირებს. კლუბები შეიქმნა კამპანიის „ჩაერთე მართვის“ ფარგლებში, რომელსაც სამოქალაქო საზოგადოების ინსტიტუტი (CSI), აშშ–ის საერთაშორისო განვითარების სააგენტოს ადგილობრივი თვითმმართველობის პროგრამის ფარგლებში. წყარო: ჩაერთე მართვაში

თბილისი. სოციალური სამართლიანობის ცენტრი ახალ ანალიტიკურ დოკუმენტს აქვეყნებს.  „მნიშვნელოვანია, რომ საქართველოს ხელისუფლებამ განსაკუთრებული ყურადღება მიაქციოს გალის რაიონში ქალთა მიმართ ძალადობის შემთხვევებზე და ამ რეგიონში მცხოვრები ადამიანების მობილობის გათვალისწინებით, ადგილობრივ საჭიროებებზე დაფუძნებული და ადვილად ხელმისაწვდომი მოქნილი პროგრამები დანერგოს.“ - აღნიშნულია დოკუმენტში  სრულად...  წყარო: სოციალური სამართლიანობის ცენტრი

თბილისი. სამართლიანი არჩევნები საქართველოში ფეისბუქისა და ინსტაგრამის პლატფორმებზე განთავსებული რეკლამების რაოდენობის, მათი განმთავსებელისა და დანახარჯების კვარტალურ მიმოხილვას აქვეყნებს. „„მეტას“ პოლიტიკური რეკლამების ბიბლიოთეკის (Ad Library) მონაცემების მიხედვით, 2023 წლის 1 ოქტომბრიდან 29 დეკემბრის ჩათვლით პერიოდში ფეისბუქისა და ინსტაგრამის პლატფორმებზე საქართველოში მყოფი მომხმარებლებისთვის სოციალური/პოლიტიკური რეკლამა 846-მა გვერდმა/ანგარიშმა განათავსა, 288-ით მეტმა, ვიდრე წინა კვარტალში.“ - ნათქვამია მიმოხილვაში სრულად... წყარო: სამართლიანი არჩევნები

თბილისი. გამჭვირვალობა საქართველო 2023 წლის 1 ოქტომბრიდან 31 დეკემბრის ჩათვლით პარტიების შემოწირულობის შესწავლის შედეგად საინფორმაციო ბიულეტენს აქვეყნებს.  „მმართველი პარტიის შემომწირველებთან დაკავშირებულმა თერთმეტმა კომპანიამ 2023 წლის მეორე ნახევარში 200 მილიონზე მეტი ლარის ოდენობის ტენდერი მოიგო, ამავე კომპანიებს 2013 წლიდან 1.7 მილიარდ ლარზე მეტი ღირებულების ტენდერი აქვთ მოგებული„ - ნათქვამია ორგანიზაციის ვებგვერდზე  საინფორმაციო ბიუნეტენი N6- ის ძირითადი მიგნებები იხილეთ ვრცლად... წყარო: საერთაშორისო გამჭვირვალობა-საქართველო

თბილისი. ევროკავშირის წარმომადგენლობა საქართველოში EU4Business-ის 2023 წლის ქვეყნის ანგარიშს აქვეყნებს.  2022 წელს, საქართველო ევროკავშირის EU4Business პროგრამის მთავარი ბენეფიციარი იყო. გაეცანით EU4Business-ის 2023 წლის ქვეყნის ანგარიშს ...  წყარო: ევროკავშირის წარმომადგენლობა საქართველოში

თბილისი. საერთაშორისო გამჭვირვალობა-საქართველო 30 იანვარს, 2023 წლის კორუფციის აღქმის ინდექსს გამოაქვეყნებს.  “ანალიზი ფოკუსირებული იქნება იმაზე, თუ როგორ აძლევს გზას კორუფციას მართლმსაჯულების სისტემის შესუსტება.” - ნათქვამია გამჭვირვალობა საქართველოს ფბ გვერდზე  სრულად...  წყარო: საერთაშორისო გამჭვირვალობა-საქართველო

თბილისი. ადამიანის უფლებათა ცენტრმა წლიური ანგარიში - ადამიანის უფლებების მდგომარეობა საქართველოში, 2023 გამოაქვეყნა.  ანგარიში მოიცავს ადამიანის უფლებათა საკვანძო მიმართულებებს ისეთ სფეროებში, როგორიცაა: მართლმსაჯულების სისტემა, თანასწორობის უფლება, გამოხატვის თავისუფლება და ა.შ. ანგარიშში მიმოხილულია ბავშვთა, ქალთა, შშმ პირთა, ლგბტ+ თემის წარმომადგენელთა, იძულებით გადაადგილებულთა, უსახლკარო და ხანდაზმული პირების, ეროვნული და რელიგიური უმცირესობების უფლებრივი მდგომარეობა.  სრულად... წყარო: ადამიანის უფლებათა ცენტრი

თბილისი. ადამიანის უფლებათა ცენტრმა 22 იანვარს გამოაქვეყნა შემაჯამებელი ანგარიში შეკრებებისა და მანიფესტაციების მონიტორინგის შესახებ. ანგარიში მიმოიხილავს 2023 წლის განმავლობაში აქციების მონიტორინგის შედეგად გამოვლენილ უფლებადარღვევებსა და მთავარ გამოწვევებს. ანგარიში მომზადდა ევროკავშირის მხარდაჭერით, პროექტის - „ადამიანის უფლებებზე მონიტორინგისა და ადვოკატირების შესაძლებლობის გაძლიერება საქართველოში“ ფარგლებში. იხილეთ ანგარიში ვრცლად... წყარო: ადამიანის უფლებათა ცენტრი

თბილისი. საერთაშორისო გამჭვირვალობა-საქართველო ახალ ბლოგს აქვეყნებს: „მთავრობამ ვანო ჩხარტიშვილის ოფშორულ კომპანიას პრივატიზაციის პირობები შეუცვალა, დეტალები უცნობია“.  „4 დეკემბრის განკარგულებით, საქართველოს მთავრობამ ცვლილებები შეიტანა ბიძინა ივანიშვილის ბიზნეს პარტნიორის, ვანო ჩხარტიშვილის ოჯახის კომპანიისთვის გადაცემული ქონების პრივატიზაციის პირობებში. მთავრობის ადმინისტრაცია არ ასაჯაროებს“, ნათქვამია ბლოგში. საერთაშორისო გამჭვირვალობა საქართველო მოუწოდებს მთავრობის ადმინისტრაციას „იმოქმედოს საქართველოს კანონმდებლობის მოთხოვნების შესაბამისად, უარი თქვას მთავრობის განკარგულებებისა და პრემიერ-მინისტრის ბრძანებების დამალვის უკანონო პრაქტიკაზე და საზოგადოებისთვის საჯარო გახადოს ეს დოკუმენტები“.  იხილეთ ვრცლად... წყარო: საერთაშორისო გამჭვირვალობა-საქართველო

თბილისი. „სამართლიანი არჩევნები“ ახალ ანგარიშს "2022-23 წლებში საჯარო სკოლების დირექტორთა სერტიფიცირების პროცესი" ავრცელებს.  ანგარიშში აღწერილია 2022-2023 წლებში საჯარო სკოლების დირექტორთა სერტიფიცირების პროცესი, გამოვლენილი ხარვეზები და მათი გამოსწორების მიზნით შემუშავებული რეკომენდაციები. სრულად... წყარო: სამართლიანი არჩევნები

თბილისი. ინფორმაციის თავისუფლების განვითარების ინსტიტუტმა "ჰიუმან რაითს ვოთჩის" ახალი ანგარიშის მიმოხილვა გამოაქვეყნა.  ანგარიშში ყურადღება გამახვილებულია 2023 წელს საქართველოში ადამიანის უფლებების დაცვის მდოგმაროებაზე.  ანგარიში მიმოიხილავს, მათ შორის, შეკრებისა და გაერთიანების თავისუფლების, სამართალდამცავი სისტემის ანგარიშვალდებულებისა და ჟურნალისტების წინააღმდეგ თავდასხმების თვალსაზრისით არსებულ ძირითად გამოწვევებს. სრულად...  წყარო: ინფორმაციის თავისუფლების განვითარების ინსტიტუტი

თბილისი. სოციალური სამართლიანობის ცენტრმა გაფიცვების შესახებ ანგარიში წარმოადგინა, რომელიც მიმოიხილავს 2021-2023 წლებში საქართველოში ჩატარებულ ძირითად გაფიცვებს, მათ მიზეზებს, გაფიცვის პროცესის მიმდინარეობას, მოვლენებში ჩართული სხვადასხვა აქტორის როლს და გაფიცვის შედეგებს.  ანგარიშში მოყვანილი 26 გაფიცვის შემთხვევის ანალიზი აჩვენებს, რომ გაფიცვა საქართველოში შრომის ანაზღაურების გაზრდის მოთხოვნით იწყება და ყველა შემთხვევაში ის ინფლაციის მზარდ მაჩვენებელს, ეკონომიკურ და სოციალურ ცვლილებებს უკავშირდება.  სრულად... წყარო: სოციალური სამართლიანობის ცენტრი

თბილისი. საერთაშორისო გამჭვირვალობა-საქართველო ახალ ბლოგს აქვეყნებს: „ ქართული მედიის მიმართ ძალადობის 2023 წლის სტატისტიკა და სახელმწიფოს რეაგირება“.  საერთაშორისო გამჭვირვალობა - საქართველო გამოთხოვილ ინფორმაციაზე დაყრდნობით წერს რომ „სპეციალური საგამოძიებო სამსახურის ცნობით, 2023 წლის 1 იანვრიდან 2023 წლის 30 ნოემბრის პერიოდში, ჟურნალისტისთვის პროფესიულ საქმიანობაში უკანონოდ ხელის შეშლის ფაქტზე გამოძიება დაიწყო 14 სისხლის სამართლის საქმეზე“.  ორგანიზაცია მიიჩნევს, რომ „ევროინტეგრაციისა და 2024 წლის მნიშვნელოვანი საპარლამენტო არჩევნების პირისპირ, კრიტიკულად მნიშვნელოვანია, რომ უპირველეს ყოვლისა, სწორედ მმართველმა პარტიამ უზრუნველყოს შიშისგან თავისუფალი და უსაფრთხო მედიაგარემო, სადაც ჟურნალისტები დაუბრკოლებლად შეძლებენ პროფესიული საქმიანობის განხორციელებას და შესაბამისად, საზოგადოების სათანადო ინფორმირებას. ამის ერთ-ერთი წინაპირობა კი, ჟურნალისტების წინააღმდეგ ჩადენილი დანაშაულების დროული გამოძიება და დამნაშავეთა დაუსჯელობის დასრულებაა“. სრულად... წყარო: საერთაშორისო გამჭვირვალობა-საქართველო

თბილისი. საერთაშორისო გამჭვირვალობა-საქართველო აქვეყნებს ახალი მონიტორინგის შედეგებს: „შავ სიაში შეყვანილი 4 კომპანიის მფლობელი ტენდერებს მეხუთე ახალი კომპანიით იგებს“. პუბლიკაციაში ყურადღება გამახვილებულია ბიზნესმენ ალექსანდრე ბარათაშვილსა და მის კომპანიებზე. „ბიზნესმენმა ალექსანდრე ბარათაშვილმა სახელმწიფო შესყიდვების შავი სიას 4-ჯერ ზედიზედ უპრობლემოდ დააღწია თავი.  მას შემდეგ, რაც მისი 4 კომპანია ერთი მეორის მიყოლებით შავ სიაში მოხვდა, მან მეხუთე კომპანია დააარსა და რამდენიმე კვირაში სახელმწიფო შესყიდვებიდან ნახევარი მილიონი ლარის 7 კონტრაქტი მიიღო.  მის ყველა კომპანიას შესყიდვებიდან 4.5 მლნ ლარი აქვს მიღებული.“ - ნათქვამია განცხადებაში სრულად... წყარო: საერთაშორისო გამჭვირვალობა-საქართველო

თბილისი. 20 დეკემბერს, არასამთავრობო ორგანიზაცია „სამართლისა და საჯარო პოლიტიკის ცენტრი“, ღია საზოგადოების ფონდის მხარდაჭერით, მართავს კვლევის პრეზენტაციას – „შრომის ინსპექციის სამსახურის გამჭვირვალობის შეფასება.“  კვლევა აანალიზებს, თუ რა ინფორმაციას ამუშავებს/არ ამუშავების შრომის შრომის ინსპექციის სამსახური, რამდენად არის გამოქვეყნებული ინფორმაცია მომხმარებელზე ორიენტირებული და რამდენად სრულყოფილია გაცემული საჯარო ინფორმაცია.  ღონისძიება გაიმართება ღია საზოგადოების ფონდის ოფისში.  სრულად... წყარო: ღია საზოგადოების ფონდი

თბილისი. ინფორმაციის თავისუფლების განვითარების ინსტიტუტი (IDFI) მონიტორინგის ახალ შედეგებს ავრცელებს. წინამდებარე კვლევის ფარგლებში შესწავლილია 2021-2023 წლებში მუნიციპალიტეტების თანამდებობის პირების მიერ შევსებული დეკლარაციები, სადაც დეკლარირებულია თანამდებობის პირებისა და მათი ოჯახის წევრების მიერ 2020-2022 წლებში მიღებული საჩუქრების შესახებ ინფორმაცია.  IDFI მოუწოდებს ანტიკორუფციულ ბიუროს და შესაბამის საგამოძიებო ორგანოებს, შეისწავლონ ქონებრივი დეკლარაციების მონიტორინგის ფარგლებში გამოვლენილი საეჭვო შემთხვევები და გაატარონ კანონით გათვალისწინებული ღონისძიებები.  სრულად... წყარო: ინფორმაციის თავისუფლების განვითარების ინსტიტუტი

თბილისი. ინფორმაციის თავისუფლების განვითარების ინსტიტუტი აქვეყნებს ევროკავშირის გაფართოების პოლიტიკის თაობაზე 12 დეკემბერს მიღებული შეფასების მიმოხილვას.  „ 2023 წლის 14-15 დეკემბერს, ევროპული საბჭოს მიერ გადაწყვეტილების მიღების წინ, ევროკავშირის საბჭო აფასებს გაფართოების პაკეტში არსებული ქვეყნების პროგრესს, პერსპექტივებს, მათ შორის, მხედველობაში იღებს ევროკომისიის 2023 წლის 8 ნოემბრის ანგარიშს. ევროკავშირის საბჭოს განსახილველი დასკვნა გამოქვეყნდა საქართველოსთვის კანდიდატის სტატუსის მინიჭების საკითხის გადაწყვეტამდე სამი დღით ადრე და ამ თვალსაზრისით, იგი განსაკუთრებული მნიშვნელობის მქონეა. დასკვნაში ევროკავშირის საბჭო (შემდგომში, საბჭო) მიუთითებს, რომ იმ ღირებულებების პატივისცემა, რომელთა საფუძველზეც დაფუძნდა ევროკავშირი და ევროკავშირის წევრობისთვის მოთხოვნილი ვალდებულებების შესრულება, აუცილებელია ყველა პარტნიორი სახელმწიფოსთვის, რომლებიც გამოხატავენ გაწევრიანებისკენ მისწრაფებას. რაც შეეხება საქართველოსთან მიმართებით გაკეთებულ კონკრეტულ მოწოდებებს, საბჭო მხედველობაში იღებს ევროკომისიის 2023 წლის 08 ნოემბრის ანგარიშს და მოუწოდებს საქართველოს, წარმოაჩინოს ცხადი ერთგულება ევროკავშირის ღირებულებებისადმი, გააგრძელოს წინსვლა რეფორმების თვალსაზრისით და ინკლუზიურად, არსებითად და შეუქცევადად შეასრულოს ევროკომისიის დათქმები“.  სრულად... წყარო: ინფორმაციის თავისუფლების განვითარების ინსტიტუტი

თბილისი. სოციალური სამართლიანობის ცენტრი 2023 წელს უფლებრივ მდგომარეობას აფასებს და ანგარიშს აქვეყნებს.  „2023 წელი ქვეყნისთვის მნიშვნელოვანი აღმოჩნდა ევროინტეგრაციის მიმართულებით. წლის ბოლოს ევროკომისიის მიერ ქვეყნისთვის ევროკავშირის კანდიდატის სტატუსის მინიჭებაზე რეკომენდაცია ცალსახად პოზიტიურ შეფასებას იმსახურებს, თუმცა ამ გადაწყვეტილების მიღმა, ნიშანდობლივია დემოკრატიული სივრცეების და უფლებრივი სტანდარტების მნიშვნელოვნად გაუარესება. გაზრდილი წნეხი სამოქალაქო ორგანიზაციებსა თუ მედიაზე არსებითად ართულებს მათ თავისუფალ, შეუზღუდავ მუშაობას“. სრულად... წყარო: სოციალური სამართლიანობის ცენტრი

თბილისი. ქვეყანაში რუსულ-უკრაინულენოვანი იმიგრანტებისთვის არსებულ საგანმანათლებლო შესაძლებლობებსა და სექტორში არსებულ გამოწვევებს ეხმაურება კვლევა, რომელიც სამოქალაქო ინტეგრაციისა და ეროვნებათშორისი ურთიერთობების ცენტრმა 2023 წელს, საქართველოს ღია საზოგადოების ფონდის მხარდაჭერით ჩაატარა.  „იკვეთება ახალდაარსებული კერძო სკოლების კლასტერი, რომელიც იმიგრირებულ რუსულენოვან მოსწავლეებს აერთიანებს და მათ რუსეთის ფედერაციის სასწავლო გეგმისა და მოთხოვნების შესაბამის სწავლებას სთავაზობს.  გამოვლინდა 16-მდე არაავტორიზებული სკოლა ან საგანმანათლებლო ცენტრი, რომელთა შორის 12, რუსეთში არსებულ სერტიფიცირებულ სკოლასთან პარტნიორობის საშუალებით, მოსწავლეებს რუსული საატესტატო გამოცდების ჩაბარებას სთავაზობს. ეს ჩამონათვალი არასრულია, რადგან ეყრდნობა მხოლოდ მკვლევართა მიერ შესწავლილ ალტერნატიულ საინფორმაციო წყაროებს და არა ოფიციალურ მონაცემებს.  საქართველოში არსებობს ისეთი არაავტორიზებული სკოლები, რომელთა შესახებ მონაცემები განათლებისა და მეცნიერების სამინისტროსათვის ოფიციალურად ხელმისაწვდომი არ არის.  2022 წელს საქართველოში იმიგრანტთა ტალღის ყველაზე დიდი წილი მოდიოდა რუსეთის, უკრაინისა და ბელარუსის მოქალაქეებზე. 6-დან 18 წლის ასაკამდე რუსეთის, უკრაინისა და ბელორუსის მოქალაქეობის მქონე 4000-ზე მეტი პირი არ არის საქართველოს განათლების სისტემის ფარგლებში მოქცეული“.  სრულად...  წყარო: ღია საზოგადოების ფონდი

თბილისი. სამართლიანი არჩევნები აქვეყნებს სოციალურ ქსელში 15–29 ნოემბერს გავრცელებულ პროპაგანდისტული გზავნილების მიმოხილვას. მიმოხილვაში აღწერილია ის გზანვილები, რომლებიც ეხმიანება პოლიტიკურ საკითხებს და სოციალურ ქსელში ვირუსულად ცირკულირებს. სრულად... წყარო: სამართლიანი არჩევნების გვერდი სოციალურ ქსელში