თბილისი. აშშ–ის ეროვნულ–დემოკრატიული ინსტიტუტმა (NDI) საზოგადოებრივი აზრის კვლევა გამოაქვეყნა 5 მაისს. იგი ასახავს როგორც საშინაო, ისე საგარეო პოლიტიკურ საკითხებზე მოსახლეობის დამოკიდებულებას. სრულად წყარო: civil.ge

თბილისი. საერთაშორისო გამჭვირვალობა – საქართველომ საპარლამენტო ამბების მორიგი პოდკასტი გამოაქვეყნა. აუდიოპოდკასტის თემებია: პარლამენტმა მიიღო ანტიდისკრიმინაციული კანონი, პრემიერის კრიტიკა არასამთავრობოების მიმართ, პარლამენტმა „მაუწყებლობის შესახებ" საქართველოს კანონში შესატანი ცვლილებები განიხილა. საპარლამენტო ამბების პოდკასტი წყარო:transparency.ge

თბილისი. ახალგაზრდა იურისტთა ასოციაციამ აპრილის თვეში განხორციელებული საქმიანობის შესახებ განათავსა ვებგვერდზე ინფორმაცია. სრულად წყარო: gyla.ge

თბილისი. 5–16 მაისს საქართველოში ევროპის კვირეული გაიმართება. კვირეული ნატოსა და ევროკავშირის შესახებ საინფორმაციო ცენტრის ორგანიზებითა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მხარდაჭერით ხორციელდება. კვირეულის დეტალები წყარო: სოციალურ ქსელში ვებგვერდი „ერთად შევეგებოთ ევროპას"

აჭარა. ბათუმის ახალგაზრდულმა ცენტრმა, 2 მაისს, საგზაო უსაფრთხოების თემაზე ადვოკატირების კამპანიის მეორე ეტაპი დაიწყო. ცენტრის წევრებმა პირველ საჯარო სკოლაში, დაწყებითი საფეხურის მოსწავლეებისთვის თანატოლთა ტრენინგი ჩაატარეს. ადვოკატირების კამპანია ტარდება ბათუმის საპატრულო პოლიციასთან ერთად. მისი მიზანია საზოგადოების ცნობიერების ამაღლება ქვეითად მოსიარულეთა უფლებებისა და საგზაო უსაფრთხოების დასაცავად.აღნიშნული ტრენინგი კიდევ ბათუმის 3 საჯარო სკოლაში გაიმართება. ადვოკატირების კამპანია იმართება ეროვნული ინტეგრაციის გაძლიერების პროექტის ფარგლებში, რომელსაც ახორციელებს საქართველოს გაეროს ასოციაცია (UNAG), ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო: ორგანიზაციის ვებგვერდი სოციალურ ქსელში

კახეთი. თელავში, ჩოლოყაშვილის 36-ში, საქართველოს სახალხო დამცველმა რეგიონული ოფისი გახსნა. უჩა ნანუაშვილმა ჟურნალისტებს და არასამთავრობო ორგანიზაციების წარმომადგენლებს ოფისის ახალი ხელმძღვანელი, თემურ ორკოდაშვილი, წარუდგინა, რომელიც აღნიშნულ თანამდებობაზე კონკურსის წესით შეირჩა. „ეს იქნება როგორც ადამიანის უფლებათა მონიტორინგის, ასევე, ადამიანების განათლებისა და ინფორმაციის ცენტრი, სადაც მოსახლეობას გაეწევა შესაბამისი დახმარება",- განაცხადა უჩა ნანუაშვილმა.

თბილისი. 2 მაისს, კამპანიის - „ეს შენ გეხება-ისევ გვისმენენ" - ვიდეორგოლების კონკურსის გამარჯვებულები გამოვლინდნენ. 4 გამარჯვებული კამპანიაში ჩართული არასამთავრობო ორგანიზაციების წარმომადგენლებმა გამოავლინეს. კონკურსში სულ 40-მდე ვიდეორგოლმა მიიღო მონაწილეობა. გამარჯვებული ვიდეორგოლები წყარო: კამპანიის გვერდი სოციალურ ქსელში

თბილისი. ინტერნეტ სივრცეში ახალი ვებ-გვერდი chemikucha.ge განთავსდა. გვერდზე ნებისმიერ მსურველს შეუძლია განათავსოს ინფორმაცია ქუჩაზე არსებული პრობლემებისა და დაზიანებების შესახებ, რომლებსაც შემდეგ ქალაქის მერიის შესაბამისი სამსახური მოაგვარებს. პროექტს „ჩემი ქუჩა საქართველო" მართავს არასამთავრობო ორგანიზაცია - „საერთაშორისო გამჭვირვალობა – საქართველო", რომელიც გამჭვირვალობისა და ანგარიშვალდებულების საკითხებზე მუშაობს. „საერთაშორისო გამჭვირვალობა – საქართველო" გლობალური „საერთშორისო გამჭვირვალობის" მოძრაობის წევრია. ვებ-გვერდი წყარო: chemikucha.ge

თბილისი. 30 აპრილს ფრონტლაინ კლუბში გაიმართა დისკუსია, სადაც საპატრიარქოს ბავშვთა სახლებში არსებულ ვითარებაზე და მონიტორინგის შედეგებზე ისაუბრეს. აღსანიშნავია, რომ ჯანდაცვის სამინისტრომ საპატრიარქოსთან არსებული ბავშვთა სახლების მონიტორინგი საერთაშორისო ორგანიზაცია DRI–ის კვლევის გამოქვეყნების შემდეგ გადაწყვიტა. აღნიშნულ შეხვედრას ესწრებოდნენ ჯანდაცვის სამინისტროს, არასამთავრობო სექტორის ა და საერთაშორისო ორგანიზაციების წარმომადგენლები. სრულად წყარო: liberali.ge

ქვემო ქართლი.  ახალგაზრდულმა ორგანიზაციამ „მწვანე მუშტმა"  პირველ მაისს, შრომის საერთაშორისო დღესთან დაკავშირებით აქცია გამართა. „მწვანე მუშტმა" აქცია უნივერსიტეტიდან დაიწყო და კაზრეთში, კაზრეთელ მუშების სოლიდარობის გამოსახატავად, დაასრულა. წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ ყვარლის მუნიციპალიტეტში 25 აპრილს განვითარებულ მოვლენებზე პრესკონფერენცია გამართა. როგორც ცნობილია, 2014 წლის 25 აპრილს პოლიციამ ყვარლის მუნიციპალიტეტის გამგებელი, ასევე მუნიციპალიტეტის სამი სოფლის რწმუნებული, „ქართული ოცნების" წევრები და მოქალაქეები, სულ 17 პირი დააკავა. ორგანიზაცია მოუწოდებს შსს–ს ყვარლის ინციდენტის ობიექტურად შესწავლისა და სათანადო რეაგირებისკენ. სრულად წყარო: gyla.ge

თბილისი. საბჭოთა წარსულის კვლევის ლაბორატორიამ ქსენია ბიძინაშვილის კოლექცია გამოაქვეყნა. კოლექციაში თავმოყრილია ჩრდილო იტალიაში მოქმედი ქართული პარტიზანული რაზმის და ბიძინაშვილების ოჯახის ყაზახეთის სსრ-ში გადასახლების ამსახველი დოკუმენტები და ზეპირი ისტორია. კოლექცია წყარო:ორგანიზაციის გვერდი სოციალურ ქსელში

აჭარა. 29 აპრილს, განვითარებისა და თანამშრომლობის ხელშეწყობის კავშირის „პროგრესის" ოფისში ჩატარდა სამუშაო შეხვედრა. მასში მონაწილეობდნენ ის ადამიანები, რომლებიც სამომავლოდ იმუშავებენ ბათუმის მერიის განათლების, კულტურის, ტურიზმისა და სპორტის სამსახურის, სპორტისა და ახალგაზრდული განყოფილების სამომავლო სტრატეგიის მიმართულებების შემუშავებაზე. სამუშაო შეხვედრას ესწრებოდნენ მერიის შესაბამისი სამსახურის წარმომადგენლები და განყოფილების უფროსი. სამუშაო ჯგუფი მსჯელობდა იმ პრობლემებსა და პრიორიტეტებზე, რომელიც ახალგაზრდების წინაშე დგას, ასევე პრიორიტეტებზე, რა მიმართულებითაც უნდა განხორციელდეს ახალგაზრდული პროგრამები. აღნიშნულ შეხვედრას ესწრებოდნენ ახალგაზრდული ორგანიზაციების წარმომადგენლებიც.

თბილისი. საერთაშორისო გამჭვირვალობა – საქართველომ საპარლამენტო ამბების მორიგი პოდკასტი გამოაქვეყნა. დაინტერესებულ პირებს შეუძლიათ გაეცნონ პარლამენტის პირველი წლის მუშაობის შეფასებას, ცვლილებებს საგზაო–სატრანსპორტო წესების დარღვევის გამო დაკისრებულ ჯარიმებზე და ა.შ. საპარლამენტო ამბების პოდკასტი წყარო: transparency.ge

თბილისი. კამპანიაში „ეს შენ გეხება" – ჩართული არასამთავრობო ორგანიზაციები საქართველოს პარლამენტსა და მთავრობას მიმართავენ. როგორც მიმართვაშია ნათქვამი – საქართველოს პარლამენტის რეგლამენტის თანახმად, ადგილობრივი თვითმმართველობის ორგანოების არჩევნებამდე 1 თვით ადრე საქართველოს პარალმენტში პლენარული სხდომები არ გაიმართება, შესაბამისად, ფარულ მიყურადებებთან დაკავშირებით საკანონმდებლო რეგულაციები განხილვა და მიღება შესაძლოა გადავადდეს. კამპანიაში ჩართული არასამთავრობო ორგანიზაციები კიდევ ერთხელ მოუწოდებენ „საქართველოს პარლამენტს დაუყოვნებლივ განაახლოს საკანონმდებლო პაკეტის განხილვა და ხელი შეუწყოს ფარულ მიყურადებებთან დაკავშირებული საკანონმდებლო ცვლილებების განხორციელების პროცესს. მნიშვნელოვანია, რომ კანონპროექტის განხილვა ადგილობრივი თვითმმართველობის არჩევნებამდე დასრულდეს. ასევე, მივმართავთ საქართველოს მთავრობას არ გააჭიანუროს სისხლის სამართლის საპროცესო კოდექსში შესატანი ცვლილებების განხილვის პროცესი და მხარი დაუჭიროს ფარულ მიყურადებებთან დაკავშრებით საკანონმდებლო ცვლილებების განხორციელებას, რომელიც უზრუნველყოფს პირადი ცხოვრების ხელშეუხებლობის კონსტიტუციური გარანტიის დაცვას და მის შესაბამისობას საერთაშორისო სტანდარტებთან". სრულად წყარო: isfed.ge

თბილისი. 25 აპრილს გაიმართა საჯარო ლექცია – „მასობრივი დახვრეტის და დამარხვის ადგილების აღმოჩენა და ნეშტების ექსჰუმაცია".ღონისძიება ინფორმაციის თავისუფლების განვითარების ინსტიტუტის (IDFI), საქართველოს შინაგან საქმეთა სამინისტროს არქივისა და ეროვნული მეხსიერების ინსტიტუტი - პოლონელი ერის წინააღმდეგ ჩადენილი დანაშაულის ეროვნული მეხსიერების კომისიის' (IPN) თანამშრომლობითი პროექტის ფარგლებში გაიმართა. მომხსენებლებმა დამსწრეებს გააცნეს პოლონეთის გამოცდილება საბჭოთა რეჟიმის მსხვერპლთა სამარხების აღმოჩენისა და ნეშტების ექსჰუმაციის კუთხით. სრულად წყარო:idfi.ge

თბილისი. 2014 წლის მოწვევის ახალგაზრდული პარლამენტის შესარჩევი ტური დასრულდა. ორგანიზაციამ გამოაქვეყნა აღნიშნული მოწვევის მონაწილეთა სია. სრულად წყარო: ორგანიზაციის ვებგვერდი

თბილისი. საქართველოს წითელი ჯვრის საზოგადოებამ დაიწყო მზადება „წითელი ჯვრის კვირეულისთვის", რომელიც ეძღვნება 8 მაისს, წითელი ჯვრის საერთაშორისო დღეს. წითელი ჯვარი მოხალისეებისა და დაინტერესებული პირებისთვის აქვეყნებს კვირეულის განრიგს. კვირეულის განრიგი წყარო: ორგანიზაციის ვებგვერდი სოციალურ ქსელში

თბილისი. ,,ახალგაზრდა კონსტიტუციონალისტთა ასოციაციას" ახალი პრეზიდენტი ჰყავს. თორნიკე ჭეიშვილმა თანამდებობა დატოვა და ამ პოსტს ერეკლე კალატოზიშვილი დაიკავებს. ის ორგანიზაციის დაარსების დღიდან ,,ახალგაზრდა კონსტიტუციონალსტთა ასოციაციის” წევრია და იურისტის პოზიციას იკავებდა. ერეკლე კალატოზიშვილის განცხადებით, ორგანიზაციის მუშაობის პრინციპები და მთავარი პრიორიტეტები არ შეიცვლება. წყარო: ორგანიზაციის ვებგვერდი სოციალურ ქსელში

კახეთი. თელავში წიგნის „როგორ აღწევენ ბავშვები წარმატებას" პრეზეტაცია გაიმართა. წიგნი დაფინანსებულია საქართველოში აშშ-ის საელჩოს წიგნების თარგმნის პროგრამის ფარგლებში, რომელიც არასამთავრობო ორგანიზაციამ „რადარიმმა" გამოსცა. წიგნის – „როგორ აღწევენ ბავშვები წარმატებას" – ავტორი ამერიკელი მწერალი პოლ ტაფია.

ქვემო ქართლი. საქართველოს ახალგაზრდულ პარლამენტმა და სახელმწიფო სერვისების განვითარების სააგენტომ თანამშრომლობა დაიწყეს. თანამშრომლობის ფარგლებში იგეგმება საზოგადოებრივ ცენტრებში სხვადასხვა პროგრამების ამუშავება. საზოგადოებრივი ცენტრები პროექტის ელექტრონული მმართველობის დანერგვის ფარგლებში ევროკავშირის მხარდაჭერით გაიხსნა საქართველოს სხვადასხვა რეგიონის სოფლებში. საქართველოს ახალგაზრდული პარლამენტი და სახელმწიფო სერვისების სააგენტო გეგმავს საზოგადოებრივ ცენტრებში სხვადასხვა სერვისების დანერგვას, როგორიცაა: უფასო იურიდიული მომსახურება, ბიზნესკონსულტაციები, ასევე საგანმანათლებლო და შემეცნებითი აქტივობები: ვიდეოლექციები, ტრენერთა ტრენინგები სხვადასხვა სფეროში, ახალგაზრდების ჩართულობა გადაწყვეტილების მიღების პროცესში. 25 აპრილს პირველი სიანფორმაციო შეხვედრა გაიმართა გარდაბნის მუნიციპალიტეტის სოფელ სართიჭალაში. შეხვედრას ესწრებოდნენ სართიჭალისა და მიმდებარე სოფლების სკოლის მოსწავლეები,მათ შორის ეთნიკური უმცირესობის წარმომადგენლები სოფელ მუღანდლოდან. შემდეგი შეხვედრა გაიმართება გურჯაანის მუნიციპალიტეტის სოფელ შაშიანში. წყარო:ორგანიზაციის გვერდი სოციალურ ქსელში

თბილისი. 30 აპრილს, „კივიტას გეორგიკას" ორგანიზებით ფოტო-გამოფენა გაიმართება. ღონისძიებაზე გამოიფინება პროექტის - „ფოტოგრაფები საზღვრებს გარეშე" - ფარგლებში გადაღებული ფოტოები. 10 დღის განმავლობაში ქართველი და აზერბაიჯანელი ფოტოგრაფები საქართველოში და აზერბაიჯანში ეთნიკური უმცირესობებით დასახლებული სოფლების ყოველდღიურ ცხოვრებას იღებდნენ. გამოფენაზე საუკეთესო ფოტო-ნამუშევრების ავტორებიც დაჯილდოვდებიან. „ფოტოგრაფები საზღვრებს გარეშე" აზერბაიჯანული არასამთავრობო ორგანიზაცია Uluchay-სა და კივიტას გეორგიკას ერთობლივი პროექტია, რომელიც Black Sea Trust-ის მხარდაჭერით ხორციელდება და მიზნად ისახავს აზერბაიჯანელ და ქართველ ახალგაზრდებს შორის ტოლერანტობის, კულტურათაშორისი ურთიერთობების გაღრმავებას. წყარო:ორგანიზაციის გვერდი სოციალურ ქსელში