7 ივლისს, 16:30 საათზე, საქართველოს პროფესიული კავშირების გაერთიანებას ამერიკის ელჩი ეწვევა და პროფკავშირების თავმჯდომარეს, გაერთიანების წევრი დარგობრივი ორგანიზაციების ლიდერებს შეხვდება.

თბილისი. საქართველოს სოციალურ მუშაკთა ასოციაციამ უმასპინძლა საერთაშორისო კონფერეციას „ჯანმრთელობის დაცვის სფეროში სოციალური მუშაობის ინტეგრაცია, როგორც გლობალური გამოწვევა". კონფერენციაზე კიდევ ერთხელ აღინიშნა სოციალური მუშაკების როლი, როგორც უშუალოდ ბენეფიციართა დახმარების, ისე ჯანმრთელობის ხელშეწყობის, ჯანმრთელობის დაცვაზე ორიენტირებული პოლიტიკის მიმართულებების ადვოკატობის, დაავადებათა პრევენციისა და სათემო დონეზე ჯანდაცვის მომსახურებების ხელმისაწვდომობის კუთხით არსებული ბარიერების გადასალახად. სოციალურ მუშაკთა ასოციაციამ კონფერენციის ორგანიზება ადგილობრივი და საერთაშორისო პარტნიორების - „ჩეხეთის რესპუბლიკის კარიტასი საქართველოში", მოლდავეთის არასამთავრობო ორგანიზაცია „Project Casa Mare"-სა და მოლდავეთის სოციალურ მუშაკთა ასოციაციასთან ერთად განახორციელა. სრულად წყარო: ორგანიზაციის ოფიციალური ფეისბუქგვერდი

თბილისი. 24 მარტს, „საქართველოს ჟურნალისტთა დამოუკიდებელი ასოციაციის" ინიციატივით, მედიის თანამშრომელთა შრომით უფლებებზე დისკუსია გაიმართა. გარდა ამისა, მედიის, საზოგადოებრივი არხის პროფკავშირების, დამსაქმებელთა ასოციაციისა და შრომისა და ჯანმრთელობის დაცვის სამინისტროს წარმომადგენლებმა ხელი მოაწერეს დეკლარაციას „მედიის შრომითი უფლებების საკითხებზე, ინსტიტუციური დიალოგის განვითარების შესახებ". „საქართველოს ჟურნალისტთა დამოუკიდებელი ასოციაცია" ჟურნალისტთა საერთაშორისო ფედერაციასთან ერთად ახორციელებს რეგიონალური მასშტაბის ევროკავშირის პროექტს, რომელიც მიზნად ისახავს სამხრეთ კავკასიაში მედიისა და ჟურნალისტების სოლიდარობის ინსტიტუტის განვითარება-გაძლიერებას. პროექტის ფარგლებში ასოციაცია გეგმავს შეხვედრებს მედიის წარმომადგენლებთან საქართველოს დედაქალაქსა და სხვადასხვა რეგიონში, რათა შეისწავლოს მედიაში არსებული მდგომარეობა. გარდა ამისა, დაგეგმილია ტრენინგები და რიგი ღონისძიებები. სრულად წყარო: media.ge

გურია.8 მაისს, ოზურგეთის დემოკრატიული ჩართულობის ცენტრის ორგანიზებით გაიმართა შეხვედრა  „საქართველოს შრომის კოდექსში შესატანი ახალი საკანონმდებლო ინიციატივის შესახებ". შეხვედრის მიზანს წარმოადგენდა  საქართველოს შრომის კანონში არსებული ნორმების, ხარვეზების, პრაქტიკისა და ახალი ინიციატივების განხილვა. დისკუსიაში მონაწილეობდნენ საქართველოს პროფესიული კავშირების გაერთიანების თავმჯდომარე ირაკლი პეტრიაშვილი და „საერთაშორისო გამჭვირვალობა -საქართველოს" ანალიტიკოსი გიგი ჩიხლაძე. შეხვედრაზე განხილეს როგორც ახალი სამთავრობო ინიციატივა, ასევე არასამთავრობო ორგანიზაციების რეკომენდაციები - დასაქმებულსა  და დამსაქმებელს შორის არსებული დისბალანსის აღმოფხვრის შესახებ. ასე ისაუბრეს საქართველოს გაერთიანებული პროფკავშირის როლზე, შრომითი ხელშეკრულების მხარეთათვის სამართლიანი და თანაბარი უფლებების უზრუნველყოფის საქმეში.

თბილისი. საქართველოს  გაერთიანებულმა პროფკავშირებმა არასამთავრობო სექტორს  შრომის კოდექსში  შესატანი ცვლილებებისა და დამატებების  შესახებ  შენიშვნებისა და რეკომენდაციების  პაკეტი წარუდგინა. პროფკავშირების გაერთიანების თავმჯდომარის ირაკლი პეტრიაშვილის თქმით, შრომის კოდექსში შესატან ცვლილებებთან დაკავშირებით  იუსტიციის სამინისტროსა და პროფკავშირების გაერთიანებას შორის  გარკვეული შეთანხმება ზოგიერთ საკითხზე მოხდა, თუმცა არის საკითხები, რომელთა შესახებაც ამ ორ მხარეს განსხვავეული პოზიციები აქვთ და შეთანხმება ვერ ხერხდება.  შრომის კოდექსში შესატანი ცვლილებების შესახებ, შეხვედრაზე წარმოდგენილი შენიშვნებისა და რეკომენდაციების ირგვლივ, საქართველოს პროფკავშირების გაერთიანების წარმომადგენლებსა და არასამთავრობო ორგანიზაციების  იურისტებს შორის დისკუსიაც გაიმართა. სრულად წყარო: humanrights.ge

იმერეთი. 15 იანვარს, ქუთაისში, დემოკრატიული ჩართულობის ცენტრში „საქართველოს განათლებისა და მეცნიერების თავისუფალმა პროფკავშირმა" შეხვედრა გამართა. ძირითადად საუბარი იყო ორგანიზაციის რეაბილიტაციასა და სამომავლო გეგემებზე, ასევე განიხილეს პროფკავშირის არსი და დანიშნულება, დემოკრატიული გაერთიანების სტრუქტურა და მართვა. „დავიწყეთ სტრუქტურული ერთეულების აღორძინება ქალაქებში, რეგიონებში. გვაქვს ახალი ხედვები. ვიწყებთ პედაგოგების მოზიდვას. უკვე გვყავს აქტიური წევრები. ჩვენ გვინდა მათ გავაცნოთ ის ინიციატივები, რომელიც ახალ ხელისუფლებასთან დავაყენეთ, რათა გაუმჯობესდეს პედაგოგთა უფლებები, რომელიც დიდი ხნის მანძილზე უხეშად ირღვეოდა", განაცხადა „საქართველოს განათლებისა და მეცნიერების თავისუფალი პროფკავშირის" პრეზიდენტმა მაია კობახიძემ. შეგახსენებთ, რომ ორგანიზაცია 2010 წელს შეაჩერა საქმიანობა.

თბილისი. საზოგადოებრივი ორგანიზაცია „ფსიქოლოგთა და ფსიქოთერაპევტთა ასოციაცია" იწყებს წევრების მიღებას ორგანიზაციაში. გაწევრიანების მსურველები უნდა იყვნენ  პროფესიით ფსიქოლოგები, ფსიქოთერაპევტები, სამედიცინო განათლების მქონე პროფესიონალები, ან რომელიმე ზემოთ ჩამოთვლილი ფაკულტეტის სტუდენტები. სრულად

აჭარა. 16 ივნისს, პოლიციის ვეტერანთა კავშირმა ფარი – საქართველომ, ბათუმის დემოკრატიული ჩართულობის ცენტრში, შეხვედრა გამართა „პოლიციის ვეტერთა კავშირის" კონცეფციის შესახებ. შეხვედრის მიმდინაეობის პროცესში ყურადღება გამახვილდა  შინაგან საქმეთა სამინისტოს რეფორმებზე, მათ ოპტიმიზაციაზე. ასევე საბჭოს მიერ იქნა წარდგენილი, მათივე მიზნები და ამოცანები, რომლებიც ითვალისწინებს პოლიციის ვეტერანთა და მათი ოჯახების წევრთა ცხოვრების დონის ხარისხის ამაღლების ხელშეწყობასა და კავშირის წევრების ინტელექტუალური და ეკონომიკური პოტენციალის რეალიზაციისათვის სათანადო პირობების შექმნას. შეხვედრას ესწრებოდნენ ამავე კავშირის წევრები – ვეტერანი პოლიციელები და მედიის წარმომადგენლები.