თბილისი. არასამთავრობო ორგანიზაცია „ახალგაზრდა ადვოკატები" საქართველოს პარლამენტის წევრ, „ერთიანი ნაციონალური მოძრაობის" აღმასრულებელ მდივან, ზურაბ ჯაფარიძის განცხადებას ეხმაურება. „...რომლის თანახმადაც, „ე.წ არასამთავრობო ორგანიზაცია ახალგაზრდა ადვოკატები", ყველა ინფორმაციით დასტურდება, რომ არის პირადად ღარიბაშვილის მიერ მართული" (სტილი დაცულია). ორგანიზაცია მიმართავს მაღალი პოლიტიკური თანამდებობის პირს, საკუთარი განცხადება საზოგადოებას კონკრეტული დოკუმენტებით დაუსაბუთოს, ვინაიდან პოლიტიკოსის მტკიცებით ფორმაში გაკეთებული განცხადება მიუთითებს ფაქტზე, თუკი ორგანიზაციის ფარული კავშირები ხელისუფლებასთან და ხელისუფლების დავალებების შესრულება „ყველა ინფორმაციით დასტურდება", ზურაბ ჯაფარიძე ანგარიშვალდებულია ამომრჩევლის და საზოგადოების წინაშე, საკუთარი განცხადების ერთი დამადასტურებელი დოკუმენტი მაინც გაასაჯაროვოს...", ნათქვამია ორგანიზაციის მიერ გავრცელებულ განცხადებაში. სრულად... წყარო: barristers.ge

თბილისი. საერთაშორისო გამჭვირვალობა – საქართველო წინასწარი პატიმრობის გამოყენების შესახებ საერთაშორისო შეფასებებისა და საქართველოს პრაქტიკის შესახებ ინფორმაციას აქვეყნებს. „...ქართული კანონმდებლობით და საერთაშორისო პრაქტიკით, წინასწარი პატიმრობა უნდა გამოიყენებოდეს როგორც აღკვეთის ღონისძიების უკიდურესი ზომა. გახმაურებულ საქმეებთან მიმართებაში წინასწარი პატიმრობის შეფარდების საკითხი საერთაშორისო ორგანიზაციების ანგარიშებსა და შეფასებებში ბოლო დროს რამდენჯერმე მოხვდა. აქედან გამომდინარე, ვფიქრობთ, განსაკუთრებით საინტერესოა, რა გადაწყვეტილებას გამოიტანს სასამართლო გიგი უგულავას მიმართ აღკვეთის ღონისძიების შეცვლის თაობაზე...". ნათქვამია ორგანიზაციის ვებგვერდზე. სრულად... წყარო: transparency.ge

ევროპის ჟურნალისტმა ცენტრმა გამოაქვეყნა გზამკვლევი სამოქალაქო საზოგადოების ორგანიზაციებისა და მედიის თანამშრომლობის შესახებ. ინგლისურ ენაზე მომზადებული გზამკვლევის გაცნობა ევროპის ჟურნალისტთა ცენტრის ვებგვერდზეა შესაძლებელი. გზამკვლევი... წყარო: ejc.net

თბილისი. არასამთავრობო ორგანიზაციამ „ახალგაზრდა ადვოკატებმა" განცხადება გაავრცელეს საქართველოს პრეზიდენტის მიერ უზენაესი სასამართლოს თავმჯდომარის კანდიდატად ნინო გვენეტაძის წარდგენის შესახებ. ორგანიზაცია „საქართველოს პრეზიდენტის გადაწყვეტილებას, საქართველოს უზენაესი სასამართლოს თავმჯდომარის კანდიდატურად პარლამენტს ნინო გვენეტაძე წარედგინოს, სამართლებრივი სახელმწიფოს და დამოუკიდებელი მართლმსაჯულების შექმნისკენ გადადგმულ ნაბიჯად აფასებს". სრულად... წყარო: barristers.ge

აჭარა. შუახევის, ხულოს მუნიციპალიტეტებში გზებზე არსებული რისკების შემცირების და პრევენციის მიზნით, საგზაო უსაფრთხოების ცნობიერების ამაღლების მიზნით ფართომასშტაბიანი საგანმანათლებლო პროექტის განხორციელება იწყება. საგზაო უსაფრთხოების ტრენინგებს გამართავენ ინგლისური ორგანიზაცია აღმოსავლეთ ევროპის ალიანსი უსაფრთხო და მდგრადი ტრანსპორტისთვის, ფონდი „პარტნიორობა საგზაო უსაფრთხოებისთვის" და კომპანია „აჭარისწყალი ჯორჯია". ტრენინგებში მონაწილეობას მიიღებენ ადგილობრივი მუნიციპალიტეტების, რესურსცენტრების, სკოლების წარმომადგენლები.

თბილისი. 17-20 თებერვალს, 12:00-17:00 საათზე საიას იურიდიული განათლების ხელშეწყობის ფონდი გასცემს შემდეგი დასახელების წიგნებს: 1. იან კროპჰოლერის გერმანიის სამოქალაქო კოდექსის კომენტარი; 2. იურიდიული მეთოდების მოძღვრება (რაინჰოლდ ციპელიუსი); 3. განმარტებითი იურიდიული ლექსიკონი; 4. მოსამართლის მიერ გადაწყვეტილების მიღების პროცესი სამოქალაქო სამართალში. წიგნის მიღების მსურველებმა თან უნდა იქონიონ იურიდიულ ფაკულტეტზე სწავლის დამადასტურებელი მოწმობა (სტუდბილეთის ასლი ან დიპლომის ასლი). საკონტაქტო ინფორმაცია: ტელ: 2 93 61 01 (შიდა ნომერი 147); მისამართი: ჯ.კახიძის #15, საქართველოს ახალგაზრდა იურისტთა ასოციაციის ოფისი. სრულად წყარო: ორგანიზაციის გვერდი სოციალურ ქსელში

თბილისი. ასოციაცია „ანიკას" აღსაზრდელები მონაწილეობას იღებენ სპექტაკლში „იპოვე ერთი განსხვავება". ორგანიზაცია სპექტაკლზე დასასწრებად იწვევს ყველა დაინტერესებულ პირს და მეგობრებს. სპექტაკლი გაიმართება 19 თებერვალს, 18:00 საათზე საქართველოს სახელმწიფო პანტომიმის თეატრში. სრულად... წყარო: კოალიციის ვებგვერდი სოციალურ ქსელში

აჭარა. ქალაქ ბათუმის მუნიციპალიტეტის საკრებულოსა და გენდერული თანასწორობის ქსელს შორის ურთიერთთანამშრომლობის მემორანდუმი გაფორმდა. დოკუმენტი ხემომწერი მხარეების თანამშრომლობის იმ ძირითად პრონციპებსა და მიმართულებებს განსაზღვრავს, რაც გენდერული თანასწორობის დამკვიდრებასა და ქალთა პოლიტიკურ გაძლიერებასთან არის დაკავშირებული. წყარო: ორგანიზაციის გვერდი სოციალურ ქსელში

გურია. შინაგან საქმეთა სამინისტროს ორგანიზებითა და დემოკრატიული ჩართულობის ცენტრის მხარდაჭერით, კამპანიის ,,უსაფრთხო ქალაქის” ფარგლებში პირველი შეხვედრა ოზურგეთში გაიმართა. შინაგან საქმეთა მინისტრის მოადგილემ, არჩილ თალაკვაძემ, სამინისტროს საქვეუწყებო დეპარტამენტისა და ადმინისტრაციის წარმომადგენლებთან ერთად, საზოგადოებას აღნიშნულ სამინისტროში მიმდინარე სიახლეები, უწყების საქმიანობა გააცნო. შინაგან საქმეთა სამინისტროს საჯაროობა, ადამიანის უფლებები და მისი დაცულობა, ბრძოლა კორუფციასთან და ნარკოტიკებთან, საპატრულო პოლიციის საქმიანობა, ოჯახში ძალადობა - ეს არასრული ჩამონათვალია იმ საკითხებისა, რომელსაც მინისტრის მოადგილე გამოსვლისას დეტალურად შეეხო. შეხვედრა ინტერაქტიული გახლდათ და საზოგადოების წარმომადგენლებს, საშუალება მიეცათ მათთვის საინტერესო კითხვებზე პასუხი მინისტრის მოადგილისგან მიეღოთ. შეხვედრას, გურიის გუბერნატორის მოვალეობის შემსრულებელი, ქეთევან მოისწრაფეშვილი, ადგილობრივი თვითმმართველობების, არასამთავრობო სექტორისა და მედიის წარმომადგენლები, ასევე სტუდენტები და რიგითი ოზურგეთელები ესწრებოდნენ.

თბილისი. სახალხო დამცველი საქართველოს პარლამენტს დისკრიმინაციის ყველა ფორმის აღმოფხვრის შესახებ კანონის გაუმჯობესების მიზნით საკანონმდებლო წინადადებით მიმართავს. „დისკრიმინაციის ყველა ფორმის აღმოფხვრის შესახებ" კანონის თანახმად, სახალხო დამცველი აჩერებს საქმის წარმოებას, თუ სავარაუდო დისკრიმინაციის იმავე ფაქტის გამო დავას სასამართლო განიხილავს. ვინაიდან, დისკრიმინაციასთან ბრძოლის ძირითადი ბერკეტები არის სახალხო დამცველისთვის და სასამართლოში სარჩელით მიმართვა, შესაძლებელია, ისე მოეწყოს, რომ სახალხო დამცველისა და სასამართლოს ფუნქციები არ ფარავდეს ერთმანეთს და მათი ერთობლივი თანაარსებობა, ურთიერთდახმარების გზით, ორიენტირებული იყოს დისკრიმინაციისგან ადამიანთა ეფექტურ დაცვაზე", ნათქვამია სახალხო დამცველის ვებ-გვერდზე. სრულად... წყარო:  www.ombudsman.ge

აჭარა. 12 თებერვალს, ბათუმის დემოკრატიული ჩართულობის ცენტრში, ორგანიზაციამ „შშმ პირთა უფლებებისათვის" „ბათუმის ავტოტრანსპორთან" გაფორმებული თანამშრომლობის მემორანდუმის შედეგები შეაფასა. ორგანიზაციის წარმომადგენელი დადებითად აფასებს ავტობუსის გაჩერებებზე სპეციალური საინფორმაციო დაფების განთავსებას, გამარტივებულ სამგზავრო ბარათებს და შშმ პირებისთვის ადაპტირებულ ავტობუსებს.

კახეთი. მსოფლიო ბანკის ფინანსური მხარდაჭერით, კახეთში, მოძრაობის უსაფრთხოების საგანმანათლებლო კამპანიის პროექტი იწყება. არასამთავრობო ორგანიზაცია, ფონდი ,,პარტნიორობა საგზაო უსაფრთხოებისთვის” კახეთის რეგიონში საგზაო უსაფრთხოების საგანმანათლებლო და ცნობიერების ამაღლების კამპანიას საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტთან ერთად იწყებს. პროექტის მიზანია კახეთის რეგიონში გზების გასწვრივ მცხოვრებთა ცნობიერების ამაღლება გადაადგილების უსაფრთხოების საკითხებში.

თბილისი. „ლიბცენტრი", ლიბერალიზმის სასწავლო ცენტრის დისკუსიების ფარგლებში საგზაო უსაფრთხოების უზრუნველყოფის საკითხებზე გამართული დისკუსიის ვიდეოჩანაწერს აქვეყნებს. „ლიბცენტრის" სტუდენტებმა გამართეს პრეზენტაციები საგზაო უსაფრთხოების შესახებ, ხოლო შემდგომ წამოჭრილი საკითხები შეაჯამა ფონდის „პარტნიორობა საგზაო უსაფრთხოებისთვის" დამფუძნებელმა გელა კვაშილამ. დისკუსია... წყარო: ლიბცენტრის ვებგვერდი სოციალურ ქსელში

კახეთი. 10 თებერვალს, ,,კახეთის სამხარეო განვითარების პროგრამის" ორგანიზებით, თელავში, უსაფრთხო ინტერნეტის დღე აღინიშნა. შეხვედრაზე „ვოლდ ვიჟენის" წარმომადგენლებმა პროექტის - ,,უსაფრთხო ინტერნეტ ცნობიერების ამაღლება ახალგაზრდებში" შესახებ ისაუბრეს, რომელიც მათივე თქმით, საკმაოდ მოთხოვნადი აღმოჩნდა: ,,ერთ-ერთი პროექტი, რომელიც ორგანიზაციამ განახორციელდა, ეხება უსაფრთხო ინტერნეტზე ცნობიერების ამაღლებას ახალგაზრდებში. პროექტის დასასრულს გაჩნდა იდეა „ფეისბუქ გვერდის" შექმნის თაობაზე, რომელიც აქტიურ დახმარებას გაუწევდა ინტერნეტ დაზარალებულ ადამიანებსა და გვერდის მომხმარებლებს, რომელთაც კითხვები აქვთ „ფეისბუქთან” დაკავშირებით. ეს გვერდი ახლა უკვე არსებობს და აქტიურ დახმარებას უწევს დაზარალებულ ინტერნეტ მომხმარებლებს. გვინდა აღვნიშნოთ, რომ გვერდის წესები საკმაოდ მოქნილი და მარტივია. თითოეული მომხმარებელი უმოკლეს ვადაში იღებს კითხვებზე პასუხებს", - აცხადებენ ორგანიზაციაში.

თბილისი. ფონდი „ღია საზოგადოება – საქართველო" ახალი კვლევის დოკუმენტს აქვეყნებს, რომლის მიზანია საზოგადოებას გააცნოს საქართველოს ევროპის ენერგეტიკულ გაერთიანებაში გაწევრიანების დადებითი მხარეები, შესაძლო რისკები და საფრთხეები, რომლებიც შეიძლება თან ახლდეს გაწევრიანების პროცესის გადავადებას. დოკუმენტში ასევე, წარმოდგენილია სამოქალაქო საზოგადოების ხედვა და პოზიცია მიმდინარე პროცესებთან დაკავშირებით. „საქართველოს გაწევრიანება ენერგეტიკულ გაერთიანებაში – პოლიტიკის კვლევის დოკუმენტი"... წყარო: ფონდ „ღია საზოგადოება საქართველოს" ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ იანვრის თვეში ორგანიზაციის წარმატებული საქმეების შესახებ ინფორმაცია გამოაქვეყნა. სრულად... წყარო: gyla.ge

თბილისი. სასტუმრო თბილისი მერიოტში, ოფიციალურად გაიხსნა ინფორმაციის თავისუფლების განვითარების ინსტიტუტის მიერ ორგანიზებული ორდღიანი საერთაშორისო სამეცნიერო ფორუმი „ახალი სოციალური და ეკონომიკური განვითარების სტრატეგია - საქართველო 2020".  14 უცხოელი მკვლევარი, რომლებიც საქართველოსა და აღმოსავლეთ ევროპის საკითხებს იკვლევენ, საქართველოს  სპეციალურად აღნიშნულ სამეცნიერო ფორუმში მონაწილეობის მისაღებად ეწვივნენ. ფორუმის ძირითადი თემებია სტრატეგიული განვითარების დოკუმენტების იმპლემენტაცია, როგორც მდგრადი სოციალურ-ეკონომიკური განვითარების საშუალება პოსტ-საბჭოთა სივრცის ქვეყნებისთვის, საქართველოს რეგიონული უსაფრთხოება და ენერგო გამოწვევები 2020 წლისთვის და სახელმწიფოს მშენებლობის პროცესის მიმდინარეობა საქართველოში და მისი გავლენა საქართველო 2020-ის მიზნების მიღწევადობაზე. ხვალ, დღის მეორე ნახევარში, დამსწრეთათვის ფორუმი ღია იქნება. ფორუმის სრული განრიგი... წყარო: idfi.ge

თბილისი. შვედეთის საელჩო, შვედეთის საერთაშორისო განვითარებისა და თანამშრომლობის სააგენტოსა და საქართველოს თანამშრომლობის შესახებ ინფორმაციას აქვეყნებს. საელჩო ეხმაურება ბოლო დროს ქართულ მედიაში გაკეთებულ განცხადებებს და აქვეყნებს შვედეთის საერთაშორისო განვითარებისა და თანამშრომლობის სააგენტოს საქართველოში საქმიანობის სფეროებისა და მიმართულებების შესახებ ინფორმაციას. სრულად (ინგ)... წყარო: www.swedenabroad.com

თბილისი. „კოალიცია თანასწორობისათვის" ნებისმიერ მსურველს, რომელიც ფიქრობს, რომ დისკრიმინაციის მსხვერპლია, იურიდიულ დახმარებას სთავაზობს. „კვალიფიციური იურისტები თქვენ უფასო სამართლებრივ დახმარებას გაგიწევენ, მოგიმზადებენ სამართლებრივ დოკუმენტებს და დაიცავენ თქვენს ინტერესებს სასამართლოსა და საქართველოს სახალხო დამცველთან", ნათქვამია გავრცელებულ განცხადებაში. „კოალიციაში თანასწორობისთვის" შედიან არასამთავრობო ორგანიზაციები: „ადამიანის უფლებების სწავლებისა და მონიტორინგის ცენტრი", „იდენტობა", „კონსტიტუციის 42-ე მუხლი", „საფარი" და „საქართველოს ახალგაზრდა იურისტთა ასოციაცია". „კოალიცია თანასწორობისთვის" შექმნილია ფონდ „ღია საზოგადოება - საქართველოს" მხარდაჭერით. ცხელ ხაზი 568 321 221 წყარო: „ადამიანის უფლებების სწავლებისა და მონიტორინგის ცენტრი"

თბილისი. 5 თებერვალს სახალხო დამცველთან არსებულმა ეროვნულ უმცირესობათა საბჭომ „საქართველოს მცირერიცხოვანი ეროვნული უმცირესობების მშობლიური ენის შენარჩუნებისა და სწავლების მდგომარეობის" შესახებ შეხვედრა გამართა. შეხვედრას სახელმწიფო უწყებების, სახალხო დამცველთან არსებული ეროვნულ უმცირესობათა საბჭოსა და არასამთავრობო ორგანიზაციების წარმომადგენლები დაესწრნენ. სრულად... წყარო: www.ombudsman.ge

თბილისი. ორგანიზაცია „ახალგაზრდა ადვოკატები" განცხადებას ავრცელებს. „ორგანიზაციაკომპანია „ყაზტრანსგაზ-თბილისის" წინააღმდეგ თბილისის საქალაქო სასამართლოში სარჩელს შეიტანს და კომპანიის მიერ მიღებულ გადაწყვეტილებას გაასაჩივრებს, რომლის მიხედვითაც, 2015 წლის 1 მარტიდან არასაყოფაცხოვრებო მომხმარებლებისათვის ბუნებრივი გაზის ტარიფი გაიზრდება", ნათქვამია განცხადებაში. სრულად... წყარო: barristers.ge

თბილისი. ადამიანის უფლებების სწავლებისა და მონიტორინგის ცენტრი განცხადებას ავრცელებს. ორგანიზაცია „მიესალმება შინაგან საქმეთა სამინისტროს ანტიკორუფციული სააგენტოს დებულების გასაჯაროების ფაქტს. თუმცა, შინაგან საქმეთა მინისტრის 2015 წლის 3 თებერვლის ბრძანებით, ძველი დებულებისთვის საიდუმლო გრიფის მოხსნის ნაცვლად, მინისტრმა ანტიკორუფციული სააგენტოს ახალი დებულება დაამტკიცა. აქამდე მოქმედი დებულების შინაარსი და მისი გასაიდუმლოების მოტივაცია კი ჩვენთვის უცნობი დარჩა.უნდა ითქვას, რომ ჯერ კიდევ საიდუმლოა შს სამინისტროს არაერთი მნიშვნელოვანი დეპარტამენტის დებულება, მათ შორისაა, გენერალური ინსპექცია, კრიმინალური პოლიციის დეპარტამენტი, სახელმწიფო უსაფრთხოების სააგენტო და სხვა. ამასთან, ბოლო რამდენიმე თვის განმავლობაში, EMC ახორციელებს სამართლებრივ პროცედურებს შს სამინისტროს გენერალური ინსპექციის დებულების გასაჯაროების მოთხოვნით”, ნათქვამია გავრცელებულ განცხადებაში. წყარო: ორგანიზაციის გვერდი სოციალურ ქსელში