თბილისი. „ლიბერალიზმის სასწავლო ცენტრმა" გადაცემა „ლიბთაიმის" მორიგი გადაცემის - „ბულინგი ქართულ სკოლებში" - ჩანაწერი გამოაქვეყნა. „ბულინგი ფიზიკური და ფსიქოლოგიური ძალადობაა ადამიანზე შიშის გამოწვევის მიზნით, რომელიც განსაკუთრებით აქტუალური სკოლებშია. რა შედეგი შეიძლება მოიტანოს ბულინგმა, ვის ეკისრება პასუხისმგებლობა მის აღკვეთაზე და რა მექანიზმები არსებობს მასთან საბრძოლველად” - თემაზე გადაცემის წამყვანთან ერთად გიორგი ნონიაშვილი, ორგანიზაცია „იდენტობას" მკვლევარი საუბრობს. გადაცემა წყარო: ორგანიზაციის გვერდი სოციალურ ქსელში

თბილისი. საქართველოს თავდაცვის მინისტრი მინდია ჯანელიძე მოადგილეებთან, გოჩა რატიანთან და ლევან ღირსიაშვილთან ერთად, სამოქალაქო სექტორის წარმომადგენლებს შეხვდა. გაცნობითი ხასიათის შეხვედრაზე თავდაცვის მინისტრმა სტუმრებს თავდაცვის სფეროში მიმდინარე პროცესები გააცნო და სამომავლო გეგმებზე ესაუბრა. საუბარი თავდაცვის სისტემის გამჭვირვალობის მნიშვნელობასაც შეეხო. თავდაცვის უწყების ხელმძღვანელმა საზოგადოებასთან ინტერაქციის გააქტიურებისა და ერთობლივი საქმიანი ღონისძიებების დაგეგმვის მნიშვნელობაზე ყურადღება გაამახვილა. სრულად... წყარო: ეთნოსთაშორისო თანამშრომლობისა და კონსულტაციების ანალიტიკური ცენტრი

თბილისი. საქართველოს ახალგაზრდა იურისტთა ასოციაციამ დეკემბრის თვის განმავლობაში განხორციელებული წარმატებული საქმეების შესახებ ინფორმაცია გამოაქვეყნა. სრულად... წყარო: gyla.ge

კახეთი. ,,ახალგაზრდობის განვითარების ცენტრი - XXI-ს" ორგანიზებით, პროექტის - „გაიგე მეტი, შეცვალე დამოკიდებულება" ფარგლებში, სოფლებში ლამბალოში, ხაშმში, გიორგიწმინდასა და ნინოწმინდაში გაიმართა საჯარო შეხვედრები. იგი ადრეული ქორწინების, მოსალოდნელი შედეგების შესახებ დისკუსიებს მიეძღვნა. ასევე ნაჩვენები იყო ამავე საკითხებზე შექმნილი დოკუმენტური ფილმი. ,,საჯარო დისკუსიამ კიდევ ერთხელ დაგვანახა მსგავსი აქტივობების გაგრძელების საჭიროება, ყველაზე მეტად კი იქ, სადაც ინფორმაციის არანაირი წყარო არსებობს ამ თემების შესახებ. იგი წარიმართა თანასწორთა განათლების მეთოდებით, სიმულაციური სავარჯიშოების მეშვეობით ახალგაზრდებმა შეაფასეს და კრიტიკულად გაანალიზეს გენდერული თანასწორობისა და გენდერული სტერეოტიპების პრობლემა საქართველოში", აღნიშნავს პროექტის კოორდინატორი ანუკი მოსიაშვილი. პროექტი ხორციელდება კახეთის სამოქალაქო ლიგის მხარდაჭერით გაეროს ერთობლივი პროგრამის მცირე გრანტების ფარგლებში.

თბილისი. 24 დეკემბერს, ლიტერატურის მუზეუმში ტიმოთი სნაიდერის წიგნის - „სისხლიანი მიწები: ევროპა ჰიტლერსა და სტალინს შორის" - თარგმანის პრეზენტაცია შედგა. „ტიმოთი სნაიდერი ამერიკელი ისტორიკოსი და იელის უნივერსიტეტის პროფესორია. ის იმ ოცწლიან პერიოდს იკვლევს, როდესაც ნაცისტური გერმანიისა და საბჭოთა კავშირის სისტემას თოთხმეტი მილიონი ადამიანი შეეწირა. ეს ადამიანები არ ყოფილან ჯარისკაცები, ისინი არ დაღუპულან სამხედრო ოპერაციებისას, ისინი ბალტიის ქვეყნების, ბელარუსის, უკრაინის, პოლონეთის და რეგიონის სხვა ქვეყნების მშვიდობიანი მოქალაქეები იყვნენ, რომლებიც ამ ტოტალიტარულ რეჟიმებს ემსხვერპლნენ. თავის ნაშრომში ტიმოთი სნაიდერი მეოცე საუკუნის ამ სისხლიან სტატისტიკას წარმოგვიდგენს და საშუალებას გვაძლევს ისტორიული ცნობების მიღმა ცალკეული ადამიანები დავინახოთ", ნათქვამია წიგნის აღწერაში. წიგნი ითარგმნა და გამოიცა „რადარამის" მიერ, ჰაინრიჰ ბიოლის ფონდის სამხრეთ კავკასიის რეგიონული ბიუროს მონაწილეობითა და ფინანსური მხარდაჭერით. წყარო: ბიოლის ფონდის გვერდი სოციალურ ქსელში

თბილისი. 26 დეკემბერს, სამხრეთ კავკასიის ამერიკული კვლევითი ინსტიტუტის საქართველოს წარმომადგენლობა (ARISC Georgia) მკითხველთა კლუბს უმასპინძლებს. საღამოზე ნებისმიერ დაინტერესებულ პირს შეუძლია დასწრება. დისკუსია გაიმართება ალექსანდრე დიუმას „კავკასიის" შესახებ. მკითხველთა კლუბის ენა არის ინგლისური. მისამართი: თბილისი, ქაქუცა ჩოლოყაშვილის ქუჩა 3/5, ილიას უნივერსიტეტი აუდიტორია F415 სრულად... წყარო: arisc.org

თბილისი. დღეს, ფონდ „ღია საზოგადოება – საქართველოს" ოფისში კამპანიაში – „ეს შენ გეხება" მონაწილე საზოგადოებრივი ორგანიზაციების წევრები შეიკრიბებიან. ისინი მოამზადებენ საქართველოს პარლამენტის წევრებისთვის დასარიგებელ სიმბოლურ საჩუქრებს. წყარო:media.ge

თბილისი. ინფორმაციის თავისუფლების განვითარების ინსტიტუტმა სოციალურ ქსელში ორგანიზაციის ვებგვერდზე განათავსა ინფორმაცია თბილისის საქალაქო სასამართლოს მიერ ინსტიტუტის სარჩელის განხილვის შესახებ. „თბილისის საქალაქო სასამართლომ, დღეს საქმეზე IDFI საქართველოს შინაგან საქმეთა სამინისტროს წინააღმდეგ, სრულად დააკმაყოფილა ინსტიტუტის სასარჩელო მოთხოვნა. საქართველოს შინაგან საქმეთა სამინისტროს დაევალა სრულყოფილად გასცეს ინფორმაცია, 2013 წელს სამინისტროს თანამდებობის პირებზე (მინისტრი, მინისტრის მოადგილეები და დეპარტამენტის უფროსები) დარიცხული პრემიების და დანამატების შესახებ ცალ–ცალკე სახელისა და გვარის მითითებით თვეების მიხედვით. ვიმედოვნებთ, რომ საქართველოს შინაგან საქმეთა სამინისტრო სრულყოფილად აღასრულებს სასამართლოს გადაწყვეტილებას", ნათქვამია ორგანიზაციის ვებგვერდზე. სრულად... წყარო: ინსტიტუტის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის თავმჯდომარედ ორგანიზაციის იურისტი – ანა ნაცვლიშვილი აირჩიეს, ხოლო მის მოადგილეთ – ნათია კაციტაძე, რომელიც სახალხო დამცველის აპარატში მართლმსაჯულების დეპარტამენტის უფროსია. სრულად... წყარო: gyla.ge

თბილისი. საქართველოს რეფორმების ასოციაციამ ახალი პუბლიკაცია გამოაქვეყნა: „საიმიგრაციო პოლიტიკის ცვლილებები და შედეგად შექმნილი გამოწვევები". პუბლიკაცია ყურადღებას ამახვილებს განათლების სფეროზე, ტურიზმის სფეროზე, საქართველოში მცხოვრებ უცხო ქვეყნის მოქალაქეებზე, პირდაპირ უცხოურ ინვესტიციებზე და უცხო ქვეყნის მოქალაქეებზე, განსაკუთრებით, დაუსაბუთებელი გადაწყვეტილებები მათთვის შესაბამისი დოკუმენტის მიღებაზე უარის თქმის შესახებ. პუბლიკაცია... წყარო: ორგანიზაციის ვებგვერდი სოციალურ ქსელში

თბილისი. 23 დეკემბერს საქართველოს ახალგაზრდა იურისტთა ასოციაცია ახალ თავმჯდომარეს აირჩევს. როგორც ნეტგაზეთს საიას აღმასრულებელმა დირექტორმა თამარ გვარამაძემ განუცხადა, კახა კოჟორიძემ, რომელსაც საიას წესდების მიხედვით კიდევ ერთი წლის ვადით შეეძლო ორგანიზაციის ხელმძღვანელის პოსტზე კენჭისყრა, არჩევნებში მონაწილეობაზე უარი თქვა, თუმცა იგი გამგეობის წევრად დარჩება. საიას გამგეობაში 21 ადამიანი წევრიანდება. თავმჯდომარის კანდიდატურებს სწორედ ისინი დაასახელებენ. სრულად... წყარო: www.netgazeti.ge

თბილისი. სახალხო დამცველი ეკონომიკის სამინისტროს რეკომენდაციით მიმართავს. „ინფორმაციის თავისუფლების განვითარების ინსტიტუტმა 2014 წლის 27 იანვარს საჯარო ინფორმაციის მიღების მოთხოვნით მიმართა საქართველოს ეკონომიკისა და მდგრადი განვითარების სამინისტროს. ...სამწუხაროდ ეკონომიკის სამინისტრომ ინფორმაცია არ მოგვაწოდა მოთხოვნილი სახით. ...ეკონომიკის სამინისტროს მიერ საკუთარი უფლება–მოსილების არაჯეროვანად განხორციელების გამო ინსტიტუტმა განცხადებით მიმართა საქართველოს სახალხო დამცველს და აცნობა მას, საჯარო ინფორმაციის მიღებაზე ინსტიტუტის უფლების დარღვევის შესახებ. სახალხო დამცველს საკუთარი უფლებამოსილების ფარგლებში მოეთხოვა გაეგზავნა წინადადებები ეკონომიკის სამინისტროსთვის კონსტიტუციის 41–ე მუხლით დაცული უფლების დარღვევის აღმოფხვრის მიზნით. განცხადების მიღებისა და შესაბამისი წარმოების ჩატარების შემდეგ სახალხო დამცველმა შეიმუშავა რეკომენდაცია. სრულად... წყარო: idfi.ge

კახეთი. გერმანიის საერთაშორის თანამშრომლობის საზოგადოების (GIZ) ორგანიზებით, თელავის სახელმწიფო უნივერსიტეტში სტუდენტების განწყობების კვლევა ტარდება. კვლევითი სამუშაოები განათლებისა და მეცნიერების სამინისტროს დაკვეთით მიმდინარეობს. თესაუს პროფესიული პროგრამების (ფარმაცევტის თანაშემწე, მეტყევე) სტუდენტებს კითხვარი დაურიგდათ, რომელიც პროფესიულ განათლებასთან დაკავშირებით მათი განწყობების კვლევას ითვალისწინებს. კვლევაში მონაწილე სტუდენტების შერჩევა შემთხვევითობის პრინციპით მოხდა, რომელთა პასუხებიც კონფიდენციალურია. საკითხები ძირითადად საუნივერსიტეტო გარემოს ეხება, მაგალითად რა არის ის ძირითადი პრობლემა და ხარვეზი, რომლის გამოსწორებასაც სტუდენტი ისურვებს, რას შეცვლიდა თავის პროფესიულ სასწავლებელში, რა დამატებითი აქტივობები შეიძლება მათთვის საინტერესო იყოს და სხვა მსგავსი საკითხები.

კახეთი. ნატოსა და ევროკავშირის საინფორმაციო ცენტრის კახეთის ბიურომ საზოგადოებას წლიური ანგარიში წარუდგინა. 9 თვის განმავლობაში საინფორმაციო ცენტრმა 50-მდე სხვადასხვა სახის შეხვედრა და ღონისძიება გამართა. კახეთის ბიუროს ხელმძღვანელის ერეკლე როსებიშვილის თქმით, ნატოსა და ევროკავშირის საინფორმაციო ცენტრის კახეთის ბიურო აქტიურად თანამშრომლობდა ადგილობრივ ხელისუფლებასთან, საერთაშორისო და არასამთავრობო ორგანიზაციებთან, სამოქალაქო კლუბებთან, საგანმანათლებლო დაწესებულებებთან და მედია საშუალებებთან. მისივე თქმით, საინფორმაციო ცენტრი მოსახლეობის ინფორმირებას ნატოსა და ევროკავშირის შესახებ კვლავ გააგრძელებს. ნატოსა და ევროკავშირის საინფორმაციო ცენტრის კახეთის ბიურო 2014 წლის მარტში დაარსდა. ეს საინფორმაციო ცენტრის მეოთხე რეგიონული წარმომადგენლობაა. საინფორმაციო ცენტრის რეგიონული ბიუროების მიზანია მოსახლეობაში აქტიური საინფორმაციო-საგანმანათლებლო კამპანია, რათა მოქალაქეებისათვის ინფორმაცია იყოს მაქსიმალურად ხელმისაწვდომი და შესაბამისად, ევროკავშირსა და ნატოში ინტეგრაციის მიმართ საზოგადოების მხარდაჭერა იყოს გაცნობიერებული.

თბილისი. ადამიანის უფლებების სწავლებისა და მონიტორინგის ცენტრმა სოფო ვერძეულის ბლოგპოსტი - „პროკურატურის პოლიტიკური ნეიტრალიტეტი" - გამოაქვეყნა. „მოქმედ სისტემაში პროკურატურა მთავრობის ორგანული ნაწილია და ამდენად, მოწყვლადია პოლიტიკური ზეგავლენების მიმართ. დღეს, მთავრობა თვითონაა როგორც სისხლის სამართლის პოლიტიკის ავტორი, ისე განმახორციელებელი. ამ გზით, მთავრობაში განსაკუთრებული ძალაუფლება გროვდება", ნათქვამია ბლოგპოსტში. სრულად... წყარო: emc.org.ge

თბილისი. 19 დეკემბერს ცენტრმა „აფხაზეთმა" იუსტიციის სამინისტროსთან ორ საგრანტო ხელშეკრულებას მოაწერა ხელი. პროექტები კანონთან კონფლიქტში მყოფ ადამიანებსა და დანაშაულის ჩადენის რისკის ჯგუფს მიკუთვნებულ არასრულწლოვნებს ეხება. წყარო: ცენტრ „აფხაზეთის" ვებგვერდი სოციალურ ქსელში

კახეთი. ჩეხეთის განვითარების პროგრამების ფარგლებში, ჩეხეთის რესპუბლიკის სრულუფლებიანმა ელჩმა ტომაშ პერნიცკიმ, თუშეთის დაცული ლანდშაფტის ადმინისტრაციას საჩუქრად გადასცა მაღალი განმავლობის მანქანა, რომელიც მოემსახურება თუშეთის მაღალმთიანი რეგიონის მოსახლეობას და გაუწევს სასწრაფო დახმარებას გადაუდებელი სამედიცინო შემთხვევების დროს. სასწრაფო სამედიცინო დახმარების გასაწევად ადგილობრივ ამბულატორიის სამედიცინო პერსონალს ჩაუტარდებათ გადამზადება.

იმერეთი. 20 დეკემბერს, საქართველოს ახალგაზრდა იურისტთა ასოციაციის ქუთაისის ფილიალმა მე-16 საერთო კრება გამართა. საერთო კრებაზე საიას ქუთაისის ფილიალის თავმჯდომარემ წევრებს 2014 წლის ანგარიში წარუდგინა. საერთო კრებაზე ტრადიციულად გამგეობის ახალი წევრების არჩევნები ჩატარდა. საერთო კრებაზე წევრებს საიას გამოცემებთან ერთად 2014 წლის საიას ქუთაისის ფილიალის წლიური ანგარიში დაურიგდათ, რომელშიც ორგანიზაციის მიერ საანგარიშო პერიოდში (2013 წლის 1 დეკემბერი - 2014 წლის 30 ნოემბერი ) გაწეული საქმიანობაა აღწერილი. წყარო: ორგანიზაციის გვერდი სოციალურ ქსელში

თბილისი. ნატოსა და ევროკავშირის საინფორმაციო ცენტრის დირექტორმა ელენე გოცაძემ და ლიტვის ელჩმა საქართველოში იონას პასლაუსკასმა თბილისის მე-60 საჯარო სკოლაში შეხვედრა გამართეს. სკოლის უფროსკლასელებმა სტუმრებს ევროპული განათლების თემაზე პრეზენტაცია წარუდგინეს. ელჩმა მოსწავლეებს ინფორმაცია მიაწოდა ევროკავშირსა და ნატოში გაწევრიანების პროცესში ლიტვის გამოცდილების შესახებ. ღონისძიებაზე, ასევე, ისუბრეს ევროპული ღირებულებებისა და საქართველოს ევროპულ სტრუქტურებში ინტეგრაციის პერსპექტივებზე. შეხვედრა სკოლის პედაგოგებისა და მოსწავლეების ინიციატივით გაიმართა. წყარო: ორგანიზაციის გვერდი სოციალურ ქსელში

კახეთი. თელავის სახელმწიფო უნივერსიტეტში, ნიდერლანდების ინსტიტუტი მრავალპარტიული დემოკრატიისთვის (NIMD) ორგანიზებით, ჩატარდა საქართველო - ევროკავშირს შორის ასოცირების შეთანხმების გზამკვლევის პრეზენტაცია. გზამკვლევის პრეზენტაციას ესწრებოდნენ უნივერსიტეტის სტუდენტები, პროფესორ მასწავლებლები და დემოკრატიის სკოლის კურსდამთავრებულები. დემოკრატიის სკოლის ხელმძღვანელის ნიკოლოზ შარვაშიძეს განმარტებით, გზამკვლევი ილუსტრირებულია და რაც მთავარია დეტალურად და გასაგებადაა გადმოცემული ინფორმაცია ევროკავშირთან ასოცირების შესახებ.

თბილისი. გერმანიის საერთაშორისო თანამშრომლობის საზოგადოების სამართლის პროგრამამ საქართველოში (GIZ) საჯარო დაწესებულებებში კონკურსისა და ატესტაციის ჩატარების პრაქტიკული სახელმძღვანელო გამოაქვეყნა. პუბლიკაციის ელექტრონული ვერსიის ნახვა ნებისმიერ მსურველს შეუძლია. პუბლიკაცია... წყარო: lawlibrary.info

თბილისი. 18–19 დეკემბერს, ადვოკატის როლის და პროფესიული გარანტიების შესახებ საერთაშორისო კონფერენცია გაიმართება. კონფერენციის მიზანია საუკეთესო საერთაშორისო პრაქტიკისა და თეორიის გაცნობა. დღის წესრიგით გათვალისწინებული სამი სესიის განმავლობაში, მსჯელობა გაიმართება ადვოკატის როლის შესახებ მართლმსაჯულების პროცესში, ადვოკატის პროფესიის საპროცესო გარანტიებზე, ადვოკატის პროფესიის დაუფლებისათვის აუცილებელი სტაჟირების პერიოდსა და აუცილებელ სტანდარტებზე, დაცვის უფლების უზრუნველყოფის ცალკეულ გარანტიებზე სისხლის სამართლის პროცესში. ღონისძიება ორგანიზებულია საქართველოს ადვოკატთა ასოციაციის მიერ, ევროკავშირის მიერ დაფინანსებული პროექტის - ,,სისხლის სამართლის რეფორმის მხარდაჭერა საქართველოში" - მიერ. წყარო: ორგანიზაციის გვერდი სოციალურ ქსელში