თბილისი. ახალგაზრდა ადვოკატები იური ვაზაგაშვილი დაღუპვასთან დაკავშირებით განცხადებას ავრცელებენ. „მიგვაჩნია, რომ საქართველოს მთავარმა პროკურატურამ იური ვაზაგაშვილის სისხლის სამართლის საქმეზე გამოძიება სწრაფი ფორმით უნდა წარმართოს და მაღალი საზოგადოებრივი ინტერესებიდან გამომდინარე, საზოგადოებას მიეწოდოს ინფორმაცია, გამოძიების მიმდინარეობის ეტაპების თაობაზე", ნათქვამია ორგანიზაციის ვებგვერდზე. სრულად... წყარო: barristers.ge

თბილისი. ,,საქართველოს ახალგაზრდა კონსტიტუციონალისტთა ასოციაციამ" გასული წლის საქმიანობის ანგარიში წარადგინა. ორგანიზაციამ წლის განმავლობაში საქართველოს მასშტაბით ოთხი საგანამნათლებლო პროექტი განახორციელა.ღონისძიებაზე სტუმრებს 2015 წლის პრიორიტეტები და გასახორციელებელი პროექტებიც გააცნეს.  მრგვალ მაგიდაზე მოწვეულ სტუმრებს შორის პარტნიორი დონორი ორგანიზაციები, არასამთავრობო სექტორი, გახორციელებული პროექტების ბენეფიციარები და საქართველოში აკრედიტებული საერთაშორისო ორგანიზაციების წარმომადგენლები იყვნენ. სრულად… წყარო: ორგანიზაციის გვერდი სოციალურ ქსელში

თბილისი. არასამთავრობო ორგანიზაციები „სამართლიანი არჩევნებისა და დემოკრატიის საერთაშორისო საზოგადოება", „საერთაშორისო გამჭვირვალობა - საქართველო", „კონსტიტუციის 42-ე მუხლი" და სამოქალაქო განვითარების სააგენტო (CIDA) ღრმა მწუხარებას გამოვთქვამთ იური ვაზაგაშვილის გარდაცვალების გამო. „იური ვაზაგაშვილი 20 იანვარს, შვილის, ზურაბ ვაზაგაშვილის საფლავზე გარდაცვლილი იპოვნეს. მედიის მიერ გავრცელებული ინფორმაციით, ის აფეთქების შედეგად გარდაიცვალა. იური ვაზაგაშვილი წლების მანძილზე ითხოვდა 2006 წელს, სპეცოპერაციის შედეგად დაღუპული შვილის, ზურაბ ვაზაგაშვილის საქმის გამოძიებას, რომელიც ამ დრომდე არ არის დასრულებული. არასამთავრობო ორგანიზაციები ვითხოვთ, პროკურატურამ დაუყოვნებლივ და ობიექტურად გამოიძიოს იური ვაზაგაშვილის გარდაცვალების საქმე. მიგვაჩნია, რომ მაღალი საჯარო ინტერესიდან გამომდინარე სამართალდამცავმა ორგანოებმა საზოგადოებას ასევე უნდა მიაწოდონ ინფორმაცია, თუ რა ეტაპზეა ახლა ზურაბ ვაზაგაშვილის საქმის გამოძიება", ნათქვამია არასამთავრობოების განცხადებაში. სრულად... წყარო: isfed.ge

თბილისი. ადამიანის უფლებების სწავლებისა და მონიტორინგის ცენტრმა 20 იანვარს შინაგან საქმეთა სამინისტროს მიმართა. ცენტრი „ქუჩის მხატვრების მანიფესტის საქმეზე, პოლიციის მაღალი თანამდებობის პირების მიერ პოლიციის შესახებ კანონის მოთხოვნების უხეშ დარღვევებზე რეაგირებას მოითხოვს", აღნიშნულია ორგანიზაციის ვებგვერდზე. საქმე ეხება 8 იანვარს, საპატრიარქოს განცხადების საფუძველზე, ძველი თბილისის პოლიციის განყოფილებაში მხატვრების, მარიამ ნატროშვილის და გვანცა ჯიშკარიანის „დაბარებისა და მათთან გასაუბრების კანონიერების საკითხს". 4 იანვარს, ქუჩის მხატვრების მიერ საპატრიარქოს მიმდებარე ტერიტორიასა და ფილარმონიის დიდი საკონცერტო დარბაზის მიმდებარე ტერიტორიაზე შავი სტენსილით დაწერილ 25 000 000, „რითაც მართლმადიდებელი ეკლესიის არასეკულარული და დისკრიმინაციული დაფინანსების პოლიტიკა გააპროტესტეს". სრულად... წყარო: emc.org.ge

აჭარა. 16 იანვარს, საზოგადოებრივი მაუწყებლის აჭარის რადიოში, გენდერის მედიაცენტრის პოპულარიზაციის მიზნით, შეხვედრა გაიმართა. ორგანიზაციის „შეზღუდული შესაძლებლობების მქონე პირთა უფლებებისთვის” წარმომადგენლები აჭარის რადიოს ჟურნალისტებს შეხვდნენ და მედიაცენტრის მუშაობის პრინციპებს გაეცნენ. შეხვედრაზე სამომავლო თანამშრომლობის საკითხებზე ისაუბრეს.

სამცხე-ჯავახეთი. გასულ კვირას პროექტის „შენ გაქვს უფლება იცოდე" ფარგლებში ქალაქ ახალქალაქში ტრენინგი ჩატარდა. ტრენინგის თემა იყო სამოქალაქო ჩართულობა. ტრენინგს უძღვებოდა სტრატეგიული კვლევების რეგიონული ცენტრის დირექტორი მიხეილ მირზიაშვილი. პროექტს „შენ გაქვს უფლება იცოდე" ახორციელებს საზოგადოებრივი ორგანიზაცია „დემოკრატ მესხთა კავშირი".

თბილისი. არასამთავრობო ორგანიზაცია „საზოგადოება და ბანკებმა" 2014 წლის ანგარიში მედიას გააცნო. პრეზენტაციაზე ორგანიზაციის გამგეობის თავმჯდომარემ წლის განმავლობაში განხორციელებული პროექტები და მთავარი კამპანიები მიმოიხილა. გიორგი კეპულაძემ საბანკო-საფინანსო სფეროში არსებულ პრობლემებზეც ისაუბრა. ანგარიში წყარო: sab.ge

თბილისი. ორგანიზაცია „ახალგაზრდა ადვოკატები" განცხადებას ავრცელებს. ორგანიზაცია „პრეზიდენტთან არასამთავრობო ორგანიზაციების შეხვედრაზე არ დაუშვეს. ჩვენთვის აღნიშნული გარემოება არ იქნებოდა განსაკუთრებული მნიშვნელობის ფაქტი, თუ არ შევნიშნავდით საქართველოს პრეზიდენტის მეტად საყურადღებო დაშვებებს, რომელიც უკავშირდება სამოქალაქო ორგანიზაციებთან დამოკიდებულების საკითხს. მიგვაჩნია, რომ საქართველოს პრეზიდენტი გიორგი მარგველაშვილი და ჯგუფი, რომელიც პრეზიდენტის სახელით, სამოქალაქო სექტორთან კომუნიკაციის პოლიტიკას განსაზღვრავს, სერიოზულ შეცდომებს უშვებენ”, ნათქვამია ორგანიზაციის ვებ-გვერდზე. სრულად... წყარო: barristers.ge

კახეთი. ინოვაციებისა და განვითარების ფონდმა პროექტის ,,სახელმწიფო - 3.0: რეფორმების ახალი ტალღა" ფარგლებში, დღეს, თელავში შეხვედრა ჩაატარა, რომელსაც სახელმწიფო უნივერსიტეტის, პროფესიული სასწავლებლის სტუდენტები და არასამთავრობო სექტორის წარმომადგენლები ესწრებოდნენ. შეხვედრა მიზნად ისახავდა, რომ ახალგაზრდების ჩართულობით შექმნას თანამშრომლობითი მექანიზმები, რომლებიც ფოკუსირებული იქნება კონკრეტული პრობლემების ინოვაციურ გადაწყვეტაზე და ხელს შეუწყობს კრეატიული ჯგუფების ფორმირებას. ინოვაციებისა და განვითარების ფონდის პროექტების კოორდინატორის, პაატა მანჯგალაძეს თქმით, საზოგადოების გამოწვევების საპასუხოდ საჭიროა ახალი და მძლავრი რეფორმები, რომლებიც ახალი ტენდენციების გათვალისწინებითა და ინოვაციური მიდგომების დანერგვის გზით ახალ შესაძლებლობებს მისცემს, როგორც საზოგადოების თითოეულ წევრს, ასევე, მთელს საზოგადოებას: ,,რეფორმების ახალი ტალღა წარმატებული და მდგრადი იქნება, თუ ის დაიგეგმება და განხორციელდება ქვევიდან-ზევით, ჰორიზონტალური და თანამშრომლობითი მექანიზმების გამოყენების გზით, საზოგადოების მაქსიმალური თანამონაწილეობით. პროექტის ფარგლებში ათასობით მონაწილე იმუშავებს ხუთი კონკრეტული მიმართულებით 12 თვითმმართველ ქალაქში. ყველა მსურველს ექნება საშუალება ჩაერთოს და მიიღოს მონაწილეობა საკუთარი ქალაქისა და მთელი რეგიონის ჯანდაცვის, განათლების, სამართლდამცავი სისტემის, ეკონომიკის, სახელმწიფო სერვისების განვითარების სტრატეგიული გეგმის შემუშავებაში, რომელთა განხორციელება სწორედ მათზე იქნება დამოკიდებული”.

თბილისი. „საქართველოს სახალხო დამცველის შესახებ" ორგანულ კანონში განხორციელებული ცვლილებით საქართველოს სახალხო დამცველს ჰყავს პირველი მოადგილე და მოადგილეები. ცვლილებამდე, სახალხო დამცველს მხოლოდ ერთი მოადგილე ყავდა. 2015 წლის 12 იანვარს, საქართველოს ორგანული კანონის შესაბამისად, განხორციელდა ცვლილება სახალხო დამცველის აპარატის დებულებაშიც და სახალხო დამცველის პირველ მოადგილედ დაინიშნა პაატა ბელთაძე, რომელიც მანამდე იყო სახალხო დამცველის მოადგილე; ხოლო, სახალხო დამცველის აპარატის მართლმსაჯულების დეპარტამენტის უფროსი 2013–2014 წლებში ნათია კაციტაძე დაინიშნა სახალხო დამცველის მოადგილედ. სრულად... წყარო: ombudsman.ge

თბილისი. „სამართლიანი არჩევნებისა და დემოკრატიის საერთაშორისო საზოგადოებამ" განცხადება გაავრცელა. „ხელვაჩაურის მუნიციპალიტეტის საკრებულოში ვაკანტურ პოზიციაზე კონკურსანტების დანიშვნასთან დაკავშირებით გამოვლენილ პრობლემურ საკითხზე „სამართლიანი არჩევნების" რეაგირებამ შედეგი გამოიღო. ...მიგვაჩნია, რომ თვითმმართველობაში მიმდინარე საკადრო ცვლილებებისას არასამთავრობო სექტორის რეკომენდაციების გათვალისწინება პოზიტიური მოვლენაა, რაც ხელს უწყობს პროცესის სამართლიანად და გამჭვირვალედ წარმართვას", ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. „ადამიანის უფლებების სწავლებისა და მონიტორინგის ცენტრი” (EMC) იწყებს ახალ პროექტს, რომელიც მიზნად ისახავს სოციალური სამართლიანობისა და გარემოსდაცვითი პრინციპების მხარდაჭერას, ინდუსტრიულ ზონებში დასაქმებულთა და ახალგაზრდა სამოქალაქო აქტივისტთა გაძლიერებისა და საზოგადოებაში აღნიშნული პრობლემატიკის მიმართ ცნობიერების ამაღლების გზით. პროექტი ხორციელდება „ადამიანის უფლებების სწავლებისა და მონიტორინგის ცენტრის" (EMC) ადმინისტრირებით, „მწვანე ალტერნატივასთან” თანამშრომლობით, ჰაინრიჰ ბიოლის ფონდის სამხრეთ კავკასიის რეიონული ბიუროს დაფინანსებით. წყარო: ორგანიზაციის ვებგვერდი სოციალურ ქსელში

კახეთი. თელავში, პროექტის ,,ტრანსსასაზღვრო ახალგაზრდული პლატფორმის ჩამოყალიბების" ფარგლებში 3 დღიანი კავკასიის ტრანსსასაზღვრო ახალგაზრდული ფორუმი გაიმართა. შეხვედრა აზერბაიჯანული საზოგადოებრივი გაერთიანების „მეხსიერების" ორგანიზებით ჩატარდა. პროექტის მიზანია ტრანსსასაზღვრო ახალგაზრდული პლატფორმის შექმნა, რომელიც ხელს შეუწყობს ორი ქვეყნის რეგიონში არსებული ახალგაზრდული არასამთავრობო ორგანიზაციების თანამშრომლობას, ინსტიტუციონალური განვითარების დაჩქარებას და მათი პროფესიონალიზმის ამაღლებას. პროექტი ხორციელდება შეკი-ზაქათალის რეგიონსა და საქართველოს კახეთის რეგიონის მუნიციპალიტეტებში. პროექტის ფარგლებში, იანვარში ჩატარდება შეხვედრები ორივე რეგიონის არასამთავრობო ახალგაზრდული ორგანიზაციების, ახალგაზრდობისა და სპორტის სამინისტროებისა და ადგილობრივი თვითმმართველობების ორგანოების წარმომადგენლების მონაწილოებით, სადაც განიხილეს ორივე რეგიონის ახალგაზრდული ორგანიზაციების თანამშრომლობის პერსპექტივები, კულტურული, ეკონომიკური და სხვა სფეროებში ურთიერთობების განვითარების გეგმები. პროექტის ფარგლებში გათვალისწინებულია საიტის შექმნაც.

თბილისი. პრეზიდენტის ადმინისტრაციის ინფორმაციით, ადამიანის უფლებებისა და მართლმსაჯულების სფეროში გიორგი მარგველაშვილის მრჩევლად, საქართველოს ახალგაზრდა იურისტთა ასოციაციის ყოფილი ხელმძღვანელი, კახა კოჟორიძე დაინიშნა. სრულად... წყარო: პრეზიდენტის ვებგვერდი სოციალურ ქსელში

თბილისი. სამოქალაქო საზოგადოების ინსტიტუტი გაცნობებთ, რომ 2014 წლის 12 დეკემბერს საქართველოს საგადასახადო კოდექსში შეტანილი იქნა ცვლილება (საგადასახადო კოდექსის 82-ე მუხლის 1-ლ ნაწილის ბ2 პუნქტი). რომლის თანახმადაც საშემოსავლო გადასახადის გადახდისაგან თავისუფლდებიან ის ფიზიკური პირები, რომლებიც მკურნალობის ან სამედიცინო მომსახურების ხარჯების დაფინანსების მიზნით სარგებელს მიიღებენ საქველმოქმედო ორგანიზაციის სტატუსის მქონე იურიდიული პირისგან. ცვლილებებამდე არსებული რედაქციის თანახმად საქველმოქმედო ორგანიზაციის მიერ ფიზიკური პირისათვის გაცემული თანხა, რომელიც მიზნად ისახავდა მკურნალობის ან სამედიცინო ხარჯების დაფინანსებას 20%–იანი საშემოსავლო გადასახადით იბეგრებოდა, რაც საგრძნობლად ართულებდა და აძვირებდა ქველმოქმედებას.

თბილისი. 9 იანვარს, ადამიანის უფლებების სწავლებისა და მონიტორინგის ცენტრმა (EMC) შსს-ს წინააღმდეგ სარჩელით მიმართა თბილისის საქალაქო სასამართლოს. სარჩელი შეეხება შსს-ს გენერალური ინსპექციის დებულებისთვის საიდუმლო გრიფის მოხსნის საკითხს. როგორც ორგანიზაციის ვებ-გვერდზეა ნათქვამი, ამჟამად, შსს-ს გენერალური ინსპექციის დებულება გასაიდუმლოებულია და ხელმისაწვდომი არ არის დაინტერესებული საზოგადოებისთვის. სრულად... წყარო: emc.org.ge

აჭარა. 9 იანვარს, ბათუმის დემოკრატიული ჩართულობის ცენტრში, შეხვედრა გაიმართა. ბათუმში კიდევ ერთი საზოგადოებრივი ორგანიზაცია - „სამოქალაქო მონიტორინგი'' დაფუძნდა. მისი მიზანი რეგიონის მასშტაბით ადგილობრივი თვითმმართველობების მონიტორინგია. ორგანიზაცია ყველა მუნიციპალიტეტში იმუშავებს და მთავარი მიმართულება ჯანდაცვა და სოციალური სფეროები იქნება. არასამთავრობო ორგანიზაციის პრეზენტაციას უმაღლესი საბჭოს წევრები და მესამე სექტორის წარმომადგენლები ესწრებოდნენ.

თბილისი. ინფორმაციის თავისუფლების განვითარების ინსტიტუტმა განცხადება გაავრცელა. ორანიზაცია „აჯამებს გიორგი კლდიაშვილის უკანონო დაკავებასთან დაკავშირებით განვითარებულ მოვლენებს". „12 დეკემბერს საქართველოს შინაგან საქმეთა სამინისტროს კრიმინალური პოლიციის დეპარტამენტმა იარაღის უკანონო ტარების ბრალდებით დააკავა ინფორმაციის თავისუფლების განვითარების ინსტიტუტის დირექტორი გიორგი კლდიაშვილი… ორი დღის განმავლობაში გიორგი კლდიაშვილის უკანონო დაკავება, საქმის სისხლის სამართლებრივი და არა ადმინისტრაციული წარმოება, მინიშნება გიორგი კლდიაშვილისა და მისი ორგანიზაციის სამოქალაქო აქტივიზმზე, - ერთმნიშვნელოვნად მიანიშნებს იმაზე, რომ შინაგან საქმეთა სამინისტროსა და საქართველოს პროკურატურის მოქმედება მიზნად ისახავდა გიორგი კლდიაშვილის დაშინებას და მასზე ზემოქმედებას. სამართალდამცავი ორგანოების მხრიდან ეს განხორციელებული ქმედებები შეიძლება მიჩნეულ იქნას სამოქალაქო საზოგადოების იმ ჯგუფის საქმიანობაზე გავლენის მოხდენის მცდელობად, რომელსაც IDFI მიეკუთვნება. IDFI გააგრძელებს გიორგი კლდიაშვილის საქმის მსვლელობაზე დაკვირვებას და მომავალშიც შემოგთავაზებთ განახლებულ ინფორმაციას", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. ევრაზიის თანამშრომლობის ფონდმა საგრანტო კონკურსის – თანამონაწილეობა და მონიტორინგი ცვლილებებისათვის – გამარჯვებულები გამოავლინა. ფონდის ვებგვერდზე განთავსებული ინფორმაციის თანახმად საგრანტო კონკურსი გაიმარჯვეს ორგანიზაციებმა: კოალიცია – შინმოვლა საქართველოში, ოზურგეთის ახალგაზრდა მეცნიერთა კლუბი. სრულად... წყარო: epfound.ge

თბილისი. ინფორმაციის თავისუფლების განვითარების ინსტიტუტმა (IDFI) დეკემბრის თვის საინფორმაციო ბიულეტენი გამოაქვეყნა. მასში შესულია ყველა მნიშვნელოვანი სიახლე თუ აქტივობა, რომელიც ორგანიზაციამ 2014 წლის ბოლო თვეში განახორციელა. სრულად... წყარო: idfi.ge

თბილისი. არასამთავრობო ორგანიზაცია „იდენტობა” საქართველოს შინაგან საქმეთა სამინისტროს მოუწოდებს „დროული რეაგირებისკენ, რათა მიიღოს ყველა ზომა ორგანიზაციისა და მისი თანამშრომლების უსაფრთხოების უზრუნველსაყოფად." როგორც media.ge იუწყება ორგანიზაციამ თავის ვებ-გვერდზე გაავრცელა განცხადება, რომ „იდენტობის” დირექტორი ირაკლი ვაჭარაძე და თავად ეს ორგანიზაცია, „მეორე დღეა რელიგიური ექტრემისტებისა და ნეოფაშიტური დაჯგუფებების სამიზნეა." სრულად... წყარო: media.ge

TEDx თბილისი ეძებს სპიკერებს. მსურველებმა უნდა წარმოადგინონ თავისი ისტორია, ხედვა, მესიჯი რომელიც სურთ რომ საზოგადოებამ მიიღოს. სპიკერებმა თავიანთი გამოსვლები უნდა წარმოადგინონ ინგლისურ ენაზე, ხანგრძლივობა არ უნდა აღემატებოდეს 18 წუთს. ღონისძიების ორგანიზატორები, მსურველებთან გასაუბრების შემდეგ შერჩეულ სპიკერებს, დაუნიშნავენ მწვრთნელებს, რომლებთან ერთადაც იმუშავებენ გამოსვლებზე. რეგისტრაციის ფორმა... წყარო: TEDxTbilisi