8 ივლისს, 11:00 საათზე, საქართველოს ახალგაზრდა იურისტთა ასოციაცია, მედიისათვის, კვლევის „ავტომობილით დედამიწის გარშემო" პრეზენტაციას გამართავს. პრეზენტაციაზე წარმოდგენილი იქნება ინფორმაცია, 2015 წლის განმავლობაში მცხეთა-მთიანეთის მხარის ადმინისტრაციისა და მუნიციპალიტეტების მიერ მოხმარებული საწვავის შესახებ. მისამართი: თბილისი, ჯ. კახიძის ქ. #15, საქართველოს ახალგაზრდა იურისტთა ასოციაციის სასემინარო დარბაზი.

8 ივლისს, 11:00 საათზე, სახალხო დამცველი ბრიფინგს გამართავს. თემა: სახალხო დამცველის 2015 წლის ანგარიშთან დაკავშირებით პარლამენტის მიერ მიღებული დადგენილება. მისამართი: თბილისი, ნ. რამიშვილის #6

8 ივლისს, 10:00 საათზე, სასტუმრო „ქორთიარდ მარიოტში” „ადგილობრივი თვითმმართველობის ეროვნული ასოციაციის" (NALAG) მიერ განხორციელებული ერთ-ერთი ყველაზე მასშტაბური პროექტის „სამოქალაქო საზოგადოება ადგილობრივი დემოკრატიისთვის" დასკვნითი კონფერენცია გაიმართება. მისამართი: თბილისი, თავისუფლების მოედანი #4

თბილისი. საქართველოს რეგიონულ მაუწყებელთა ასოციაცია (GARB) აქვეყნებს თბილისში ეუთოს ეგიდით მიმდინარე მედია-კონფერენციის ვიდეო-მიმოხილვას. კონფერენცია ძირითადად ეხებოდა შემდეგ საკითხებს: „რა გამოწვევები არსებობს სამხრეთ კავკასიის ქვეყნების მედიაში და როგორია სოციალურ ქსელებში არსებული ტენდენციები". სრულად... წყარო: garb.ge

თბილისი. 5 ივლისს საქართველოს გაეროს ასოციაციის (UNAG) ორგანიზებით იურიდიული დახმარების სამსახურის ადვოკატებისათვის გაიმართა ტრენინგი თემაზე „პრაქტიკული მხარე და გამოწვევები ლტოლვილთა კანონმდებლობის განხორციელებაში". „ტრენინგი მიზნად ისახავდა იურდიული დახმარების სამსახურის ადვოკატების ცოდნის გაღრმავებას თავშესაფრის საკითხებზე და ასევე პრაქტიკაში არსებული გამოწვევებზე ინფორმაციის გაცვლას," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოსა და ამერიკის შეერთებულ შტატებს შორის საგანმანათლებლო თანამშრომლობის სფეროში ურთიერთგაგების მემორანდუმი გაფორმდა. შეთანხმება ხელს შეუწყობს: „სახელმწიფო და კერძო უნივერსიტეტებსა და ინსტიტუტებს შორის თანამშრომლობას, აფართოებს Fulbright-ის აკადემიურ გაცვლით პროგრამას, წაახალისებს საგანმანათლებლო სტიპენდიებისა და აკადემიური გრანტების გამოყოფას," ნათქვამია საქართველოს მთავრობის ვებ-გვერდზე სოციალურ ქსელში. პროგრამას საქართველოს მხრიდან განახორციელებს განათლების საერთაშორისო ცენტრი, აშშ-ის მხრიდან კი მისი პარტნიორი იქნება განათლების საერთაშორისო ინსტიტუტი. სრულად... წყარო: საქართველოს მთავრობის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ივნისის თვის საინფორმაციო ბიულეტენს. ბიულეტენი... წყარო: idfi.ge

თბილისი. საქართველოს ახალგაზრდა იურისტთა ასოციაცია აქვეყნებს იურისტ ნინო ბაღაშვილის ბლოგპოსტს: „მაგდა პაპიძე რომ უდანაშაულო ყოფილიყო..." „პაპიძის საქმე არის ამბავი საზოგადოებაზე, რომელსაც შეუძლია ძალიან მარტივად, დაუფიქრებლად, ყოველგვარი მტკიცებულებების გარეშე ბოლომდე გაწიროს ადამიანი, ისე რომ გადარჩენის გზაც არ დაუტოვოს. ეს არის ამბავი არაპროფესიონალ და არაჰუმანურ მედიაზე, რომელსაც შეუძლია უდიდესი ტრაგედია ჩვეულებრივ, ტაბლოიდურ, ყვითელ თემად აქციოს. და რაც მთავარია, ეს არის ამბავი მორალისტურ საზოგადოებაზე, რომელიც თავადვე ხდება ტყვე მორალური თუ სტერეოტიპული წარმოდგენების და ქმნის შერჩევითი სამართლიანობის პრეცენდენტებს," ნათქვამია ბლოგპოსტში. სრულად... წყარო: gyla.ge

გურია. 6 ივლისს, ლანჩხუთის მუნიციპალიტეტის სოფელ მაჩხვარეთში არასამთავრობო ორგანიზაციების წარომადგენლები ადგილობრივ მოსახლეობას შეხვდნენ. „საუბარი შემდეგ საკითხებს დაეთმო: სოფლის პრობლემები და როგორ შეიძლება ამ პრობლემების მოგვარება; რატომ არის მნიშვნელოვანი მოქალაქეთა ჩართულობა თვითმმართველობის პროცესში და რა გზები არსებოს ამის განსახორციელებლად; რა შესაძლებლობებს აძლევს სოფლის მოსახლეობას ევროპასთან თავისუფალი ვაჭრობა, როგორ უნდა ისარგებლონ ფერმერებმა შესაბამისი სახელმწიფო პროგრამებით და რა სტანდარტები უნდა დააკმაყოფილონ ევროპის ბაზარზე პროდუქციის გასატანად," ნათქვამია ორგანიზაციის ვებ-გვერდზე სოციალურ ქსელში. ამ წუთებში შეხვედრა მიმდინარეობს ოზურგეთის მუნიციპალიტეტის სოფელ ბაილეთში. 8 ივნისს კი შეხვედრა დაგეგმილია სოფელ ჯურუყვეთის ადგილობრივ მოსახლეობასთან. სრულად... წყარო: ორგანიზაციის ვებ-გვერდი სოციალურ ქსელში

თბილისი. საიამ ამომრჩევლის სავარაუდო მოსყიდვისა და წინასაარჩევნო აგიტაციაში სავარაუდოდ კანონის დარღვევით მონაწილეობის ფაქტებთან დაკავშირებით სახელმწიფო აუდიტის სამსახურსა და ცენტრალურ საარჩევნო კომისიას მიმართა. „აღსანიშნავია, რომ პოლიტიკურ პარტიას ეკრძალება კანდიდატის, წარმომადგენლის ან სხვა პირის მეშვეობით, პირდაპირ ან არაპირდაპირ, საქართველოს მოქალაქისათვის ფასდაკლებით/შეღავათიანი პირობებით საქონლის ან მომსახურების მიყიდვა ან მიწოდება, საბაზრო ფასზე მეტ ფასად საქონლის ან მომსახურების შესყიდვა, უსასყიდლოდ საქონლის ან მომსახურების (გარდა კანონით გათვალისწინებული გამონაკლისებისა) მიწოდება ან გავრცელება, ან საქართველოს მოქალაქის დაინტერესება ფულადი სახსრების, ფასიანი ქაღალდების, მატერიალურ ან არამატერიალურ ფასეულობათა ან მომსახურების (მათ შორის, ფიქციური შრომითი ან სხვაგვარი ურთიერთობების დამყარების) მიწოდებით ან დაპირებით," ნათქვამია ორგანიზაცის განცხადებაში. საია მოუწოდებს აუდიტის სამსახურს და ცესკოს ეფექტურად გამოიძიონ განცხადებაში აღწერილი ფაქტობრივი მონაცემები. სრულად... წყარო: gyla.ge

7 ივლისს, 15:00 საათზე, CSR კვირეულის ფარგლებში , „ჯიპიაი ჰოლდინგის” ტრენინგცენტრში გაიმართება შეხვედრა თემაზე „ქალთა გაძლიერების პრინციპების იმპელემენტაცია.” შეხვედრა გაეროს ქალთა ორგანიზაციის (UN Women) მონაწილეობით ტარდება და მას ბიზნესის, არასამთავრობო ორგანიზაციებისა და მედიის წარმომადგენლები დაესწრებიან. სრულად... მისამართი: თბილისი, აღმაშენებლის #61

7 ივლისს, 13:30 საათზე საქართველოს ადვოკატთა ასოციაციის ორგანიზებით მართლმსაჯულების საკითხებზე კონფერენცია გაიმართება. მისამართი: თბილისი, სასტუმრო „რუმსი"

7 ივლისს, 11:00 საათზე სოფლის მეურნეობის განვითარების ევროკავშირის სამეზობლო პროგრამის ფარგლებში, მერსი ქორპსი, ოქსფამი და საზოგადოებრივ საქმეთა ინსტიტუტი გამართავენ შიდა ქართლის რეგიონულ ფორუმს. მისამართი: გორი, სასტუმრო „ვიქტორია"

1 ივლისს, გაეროს ადამიანის უფლებათა საბჭომ მიიღო რეზოლუცია, რითიც ინტერნეტის ხელმისაწვდომობა ადამიანის ფუნდამენტურ და ძირითად უფლებად აღიარა. „რეზოლუციის პირველი პუნქტის თანახმად, ადამიანები ინტერნეტის გამოყენების დროს (Online) იმავე უფლებებით უნდა სარგებლობდნენ (მაგალითად, გამოხატვის თავისუფლება), რომლებითაც სარგებლობენ კავშირგარეშე (Offline). რეზოლუცია ასევე მოუწოდებს სახელმწიფოებს ხელი შეუწყონ ციფრულ წიგნიერებას (digital literacy) და უზრუნველყონ ინფორმაციაზე ხელმისაწვდომობა ინტერნეტში, რაც განათლების უფლების ხელშეწყობის ეფექტიანი ინსტრუმენტია," ნათქვამია ინფორმაციის თავისუფლების განვითარების ინსტიტუტის ვებ-გვერდზე. სრულად... წყარო: idfi.ge

თბილისი. „საერთაშორისო გამჭვირვალობა - საქართველო" ჩართულია გონიოს მიწებთან დაკავშირებულ პროცესში და მუდმივ რეჟიმში აკვირდება მოცემული თემის ირგვლივ განვითარებულ მოვლენებს. „მოვუწოდებთ ქ. ბათუმის მუნიციპალიტეტის ტერიტორიაზე თვითნებურად დაკავებულ მიწის ნაკვეთებზე საკუთრების უფლების აღიარების კომისიას ადმინისტრაციულ წარმოებაში ჩართულ 271 მოქალაქის საკითხი შეისწავლოს ინდივიდუალურად და წერილობით განუმარტოს თითოეულ მათგანს მიღებული გადაწყვეტილების საფუძვლები. გადაწყვეტილება მიიღოს სადაო ურთიერთობის სრულად და ყოველმხრივ გამოკვლევის შემდგომ, კანონის სრული დაცვით," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ახალგაზრდა ფინანსისტთა და ბიზნესმენთა ასოციაციის ანალიტიკოსი ეხმაურება ავტოგაზის ბაზარზე არსებულ არაჯანსაღ კონკურენტულ გარემოსა და აზერბაიჯანული „სოკარის" სახით შექმნილი დომინანტური მდგომარეობის საფრთხეებს. „ანალიტიკოსის განცხადებით, არსებული რეალობიდან გამომდინარე, ბუნებრივი აირის ბაზარზე, „სოკარის" სახით, ერთი მონოპოლისტი მომწოდებელი ოპერირებს, რაც ბუნებრივია, აზარალებს ბაზარზე კონკურენტული გარემოს ფორმირებას და რა თქმა უნდა, ქართველ მომხმარებლებს," ნათქვამია ორგანიზაციის ვებ-გვერდზე. სრულად... წყარო: bfm.ge

აჭარა. „ახალგაზრდა ადვოკატები" ბათუმში, საქართველოს საკონსტიტუციო სასამართლოსთან საპროტესტო აქციას მართავს. „ორგანიზაცია სასამართლოს სპეციალურ მიმართვას უგზავნის, სადაც საუბარია გიორგი პაპუაშვილის მხრიდან კანონის დარღვევის ფაქტებზე. „ახალგაზრდა ადვოკატების" წარმომადგენლობით, გიორგი პაპუაშვილთან მოქალაქე როლანდ ბლადაძის სადავო ქონებაზე დავა გრძელდება თბილისის საქალაქო სასამართლოში," ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. მედიის განვითარების ფონდი აქვეყნებს თამარ კინწურაშვილის ბლოგპოსტს: „პროკურატურისა და მედიის „რომაული არდადეგები". სტატია მაგდა პაპიძის საქმეს ეხმაურება. „ერთი მხრივ, მედიამ ვერ შეძლო ბალანსის დაცვა საზოგადოების ინფორმირებასა და ბრალდებულის პირადი ცხოვრების ხელშეუხებლობას შორის, მეორე მხრივ, ეს უფლება თავად ბრალდების მხარემ უგულებელყო, როცა დახურული სხდომის დეტალები ხელისუფლების მიმართ ლოიალურ მედია საშუალებების მეშვეობით გაასაჯაროვა. პროკურატურის მიერ დახურული სხდომის დეტალების ცალკეული მედიუმების მეშვეობით გასაჯაროვებამ აზრი დაუკარგა თავად პროცესის დახურვას, რაც განსასჯელის მიმართ წაყენებული ბრალდებისთვის მეტი დამაჯერებლობის მიცემას და ნაფიც მსაჯულებზე ზემოქმედებას ისახავდა მიზნად," ნათქვამია ორგანიზაციის ვებ-გვერდზე. სრულად... წყარო: mediameter.ge

თბილისი. ადამიანის უფლებათა ცენტრი და საქართველოს ადვოკატთა ასოციაცია ადვოკატთა ხელშეშლის ფაქტებთან დაკავშირებით ერთობლივ განცხადებას ავრცელებს. „ადამიანის უფლებათა ცენტრი და საქართველოს ადვოკატთა ასოციაცია გამოხატავენ შეშფოთებას სასჯელაღსრულების დაწესებულებებში არსებული მანკიერი პრაქტიკის გამო, როდესაც სად-ის თანამშრომლები ადვოკატებისგან კანონდარღვევით მოითხოვენ, გააცნონ მისი დაცვის ქვეშ მყოფთან ვიზიტისას მომზადებული ჩანაწერები,” ნათქვამია ერთობლივ განცხადებაში. სრულად... წყარო: humanrights.ge

6 ივლისს, 14:00 საათზე, CSR კვირეულის ფარგლებში, „საქართველოს ბანკის" ცენტრალურ ოფისში გაიმართება შეხვედრა თემაზე: „შშმ პირების პრობლემები საქართველოში და კორპორაციული სოციალური პასუხისმგებლობის როლი". მისამართი: თბილისი, გაგარინის #29ა

6 ივლისს, 12:00 საათზე, „პირველის პრესკლუბში" „ახალგაზრდა ფინანსისტთა და ბიზნესმენთა ასოციაცია - „აფბას" ანალიტიკოსი ანდრია გვიდიანი ბრიფინგს გამართავს. თემა: საავტომობილო გაზის ბაზარზე არსებული დომინანტური პოზიციების გამო, კონკურენციის სააგენტომ „სოკარის" წინააღმდეგ მოკვლევა უნდა დაიწყოს. მისამართი: თბილისი, წერეთლის 116, ბიზნეს ცენტრი „დიდუბე პლაზა", მეორე სართული

6 ივლისს, 11:30 საათზე, არასამთავრობო ორგანიზაცია „ლეონიდ ჩერნოვეცკი - ქართული მომავალის” დირექტორი გიორგი ქვრივიშვილი პორტალ „კვირას" პრესკლუბში პრესკონფერენციას გამართავს. თემა: „პარლამენტის მიერ დამტკიცებული კანონის შედეგად ქობულეთში, ლეონიდ ჩერნოვეცკის მიერ დაარსებული ბავშვთა პანსიონის იძულებით დახურვა". მისამართი: თბილისი, ნუცუბიძის ქუჩა #14ბ, სადარბაზო 1, სართული 2