თბილისი. საქართველოს ახალგაზრდა კონსტიტუციონალისტთა ასოციაცია გამოკითხვას ატარებს. ორგანიზაცია ჯილდოს ქართული კონსტიტუციონალიზმის განვითარებაში შეტანილი განსაკუთრებული წვლილისათვის გასცემს. ხმის მიცემა ნებისმიერ მსურველს შეუძლია. ხმის მიცემა წყარო: gyca.ge

თბილისი. ფრონტლაინ კლუბში ფონდმა „ღია საზოგადოება-საქართველომ " და მწერალმა ლაშა ბუღაძემ საზოგადოებას წიგნად გამოცემული რადიოგადაცემების ციკლი „დიალოგი ცენზურაზე" წარუდგინეს. წიგნში გაერთიანებულია 47 გადაცემა, რომელიც 2013 წლის იანვრიდან რადიო „შოკოლადის" ეთერში (98.5FM) გადიოდა და რომლის წამყვანიც ლაშა ბუღაძე იყო. ამ პერიოდის განმავლობაში გადაცემის სტუმრები იყვნენ ლიტერატორები, მეცნიერები, ხელოვანები, რომლებიც საუბრობდნენ ისეთ თემებზე, როგორიცაა: ცენზურა და ხელოვნება, ცენზურა და რელიგია, ცენზურის გავლენა ადამიანის ცხოვრება, ცენზურა ტოტალიტარული რეჟიმების პირობებში და სხვა. გადაცემა „დიალოგი ცენზურაზე" მზადდებოდა პროექტის ფარგლებში, რომელსაც რადიო „შოკოლადი" და საქართველოს პენ-ცენტრი ფონდი „ღია საზოგადოება საქართველოს" მხარდაჭერით ახორციელებდა. სრულად წყარო: osgf.ge

იმერეთი. „ახალგაზრდა ინიციატორთა კავშირმა" სოციალურ ქსელში განცხადება გაავრცელა. ორგანიზაცია „დაარსებიდან დღემდე ძირითადად ახორციელებდა ახალგაზრდობაზე ორიენტირებულ სპორტულ, კულტურულ, საქველმოქმედო და სხვა სახის პროექტებს. ორგანიზაცია გადადის ახალ ეტაპზე, რაც ითვალისწინებს ხარაგაულის სამოქალაქო საზოგადოების გააქტიურებასა და განვითარებას, რისთვისაც დაგეგმილია სხვადასხვა პროექტების განხორციელება. მიგვაჩნია, რომ აქტიური სამოქალაქო საზოგადოების გარეშე შეუძლებელია ჩვენი რაიონის განვითარება. ამ პროცესებში კი, ახალგაზრდობის ჩართულობას გადამწყვეტი მნიშვნელობა აქვს", ნათქვამია განცხადებაში. აღნიშნულ საკითხთან დაკავშირებით ორგანიზაცია მზადაა ითანამშრომლოს ნებისმიერ დაინტერესებულ პირთან. ცვლილების მიუხედავად „ახალგაზრდა ინიციატორთა კავშირი" არ შეწყვეტს და კვლავ განაგრძობს ახალგაზრდობაზე ორიენტირებული პროექტების განხორციელებას. წყარო:ორგანიზაციის გვერდი სოციალურ ქსელში

სამცხე–ჯავახეთი. აშშ-ის საელჩოს დემოკრატიის განვითარების მცირე გრანტების კონკურსის ფარგლებში ახალციხეში საკონსულტაციო შეხვედრა გაიმართება ოთხშაბათს, 12 თებერვალს, 4:30 საათზე, დემოკრატიული ჩართულობის ცენტრში. მისამართი: მანველიშვილის ქ. 19 (საკონტაქტო პირი: ამალია სარკისიან 595 333 834). წყარო: საერთაშორისო განათლების ცენტრი – ახალციხე

თბილისი. ინფორმაციის თავისუფლების განვითარების ინსტიტუტმა „ინტერნეტ მომხმარებელთა სტატისტიკა საქართველოში" გამოაქვეყნა. ინსტიტუტი „რეგულარულად ცდილობს ამ სფეროს შესახებ არსებული ინფორმაციის ანალიზს. ამჯერად ორგანიზაციამ მიმართა საქართველოს კომუნიკაციების ეროვნულ კომისიას 2013 წლის შესაბამისი მონაცემების მოთხოვნით. IDFI-ი კომისიიდან ითხოვდა მონაცემებს სადენიანი, უსადენო და მობილური ინტერნეტ მომხმარებლების შესახებ რეგიონების, ქალაქების, ტექნოლოგიების, ავტორიზებული პირების, ფიზიკური და კორპორატიული აბონენტების მიხედვით", ნათქვამია ორგანიზაციის ვებ-გვერდზე. IDFI-იმ მიღებული მონაცემების დამუშავებისას გამოვლენილი ძირითადი ტენდენციები გამოაქვეყნა. სრულად წყარო: eparticipationge.wordpress.com

თბილისი. „პირველმა ნაბიჯმა" ონლაინ სივრცეში განათავსა წლიური საინფორმაციო ელ–ჟურნალი. იგი ასახავს ორგანიზაციის მნიშვნელოვან ამბებსა და აქტივობებს. ასევე ორგანიზაციის სერვისებს. ჟურნალი წყარო: ორგანიზაციის გვერდი სოციალურ ქსელში

თბილისი. ევროპის საბჭოს გენერალური მდივანი ტორბიორნ იაგლანდი საქართველოში ევროპის საბჭოს ორწლიანი სამოქმედო გეგმის განხორციელების დაწყების მიზნით 6 თებერვალს თბილისს სტუმრობს. სამოქმედო გეგმა, რომლის მთლიანი ბიუჯეტიც 17 მილიონ ევროს შეადგენს და 34 პროექტს მოიცავს ისეთ სფეროებში, როგორიცაა ადამიანის უფლებები; სასამართლო სისტემის დამოუკიდებლობა; პენიტენციალური სისტემა და პოლიციის რეფორმა; კარგი მმართველობა; არჩევნები; მედიის და გამოხატვის თავისუფლება; ადგილობრივი დემოკრატია; ნდობის აღდგენის მექანიზმები; შემწყნარებლობა და ანტიდისკრიმინაციული პოლიტიკა. ამ პროექტებს ევროპის საბჭო საქართველოს მთავრობასთან, პარლამენტთან, სასამართლო ხელისუფლებასთან, სახალხო დამცველის ოფისთან და ადგილობრივ საზოგადოებრივ ორგანიზაციებთან პარტნიორობით განახორციელებს. სრულად წყარო: civil.ge

თბილისი. საქართველოს ახალგაზრდა იურისტთა ასოციაციამ „იანვრის თვის წარმატებული საქმეები" გამოაქვეყნა. ორგანიზაციის ვებ-გვერდზე განთავსდა ინფორმაცია 8 საქმის შესახებ. სრულად წყარო: gyla.ge

თბილისი. 6 თებერვალს, სპორტისა და ახალგაზრდობის საქმეთა სამინისტროს საქართველოში ამერიკის მშვიდობის კორპუსის მისიის ხელმძღვანელი მაურა ფულტონი ეწვია. მშვიდობის კორპუსის წარმომადგენელს მინისტრმა და ბავშვთა და ახალგაზრდობის განვითარების ფონდის დირექტორმა უმასპინძლეს. ამერიკის მშვიდობის კორპუსი არის აშშ-ს მთავრობის დამოუკიდებელი ფედერალური სააგენტო, რომლის მიზანს მსოფლიოში მშვიდობის ხელშეწყობა წარმოადგენს. სამუშაო შეხვედრაზე განხილეს ახალგაზრდობის სფეროში სამინისტროს მიერ დაგეგმილი პროექტები, მშვიდობის კორპუსის 2014 წლის სამოქმედო სტრატეგია და ერთობლივი ღონისძიებების განხორციელების პერსპექტივები. წყარო: fondi.gov.ge

თბილისი. 13-14 თებერვალს, ევრაზიის თანამშრომლობის ფონდი მასპინძლობს „ცვლილებების ინიციატორთა" ფორუმს. ღონისძიებაში მონაწილეობას მიიღებენ იმ არასამთავრობო ორგანიზაციების, მედიის, სამთავრობო სტრუქტურებისა და კერძო სექტორის წარმომადგენლები, რომელთა საქმიანობას ქვეყნის კულტურულ, სოციალურ და ბიზნეს გარემოში ცვლილებები მოაქვს. სრულად წყარო: www.caf.epfound.ge

თბილისი. იაპონიის საგანგებო და სრულუფლებიანმა ელჩმა საქართველოში ტოშიო კაიტანიმ და საქართველოს დემოკრატიული განვითარების კავშირის' აღმასრულებელმა დირექტორმა ლევან ხინთიბიძემ ოფიციალურად მოაწერეს ხელი პროექტს. იგი იაპონური მხარის დაფინანსებით, ჩოხატაურის #1 საბავშვო ბაღის სრულ რეაბილიტაციასა და აღჭურვას ითვალისწინებს. ეს 'საქართველოს დემოკრატიული განვითარების კავშირისა და ჩოხატაურის მუნიციპალიტეტის ადგილობრივი ხელისუფლების ერთობლივი პროექტია. პროექტის ხელმოწერის ცერემონია საქართველოში იაპონიის საელჩოს შენობაში გაიმართა.

თბილისი.  „ლიბერალიზმის სასწავლო ცენტრში" 31 იანვარს გაიმართა პოლიტოლოგ კობა კუპრაშვილის საჯარო ლექცია: „ცივილიზაციათა შეჯახება". მათ ვინც ვერ შეძლო ლექციაზე დასწრება ცენტრი საშუალებას აძლევს ლექციის ჩანაწერი იხილოს. ლექცია: „ცივილიზაციათა შეჯახება" წყარო: ცენტრის გვერდი სოციალურ ქსელში

თბილისი. საქართველოს ადვოკატთა ასოციაციის ადვოკატის უფლებების დაცვის კომისიის პირველი სხდომა გაიმართა. სხდომაზე, კომისიის თავმჯდომარე ზაზა ხატიაშვილმა ისაუბრა კომისიის მიმართულებებზე და პრიორიტეტებზე, კომისიის მნიშვნელობაზე ადვოკატის პროფესიული უფლებების დაცვის კუთხით. სხდომაზე გაიმართა მსჯელობა სამომავლო გეგმებზე და ღონისძიებებზე. პირველ ეტაპზე, კომისიის შიგნით შეიქმნა ორი სამუშაო ჯგუფი, რომელიც შეისწავლის  საერთაშორისო პრაქტიკას ადვოკატის ინსტიტუციური დაცვის საკითხებთან დაკავშირებით საკანონმდებლო დონეზე და მოამზადებს რეკომენდაციებს ადვოკატთა შესახებ კანონში ცვლილებების შესატანად და მეორე ჯგუფი მოამზადებს სისხლის სამართლის კოდექსში შესატან ცვლილებებს, რომლის თანახმად ადვოკატის  პროფესიული საქმიანობისათვის ხელისშეშლა გახდება დასჯადი. ორივე ჯგუფს დაევალა ერთი თვის ვადაში მომზადონ ცვლილებების პაკეტი, რომელიც აღმასრულებელ საბჭოს განსახილველად წარედგინება. წყარო:gba.ge

თბილისი. საერთო - სამოქალაქო მოძრაობა „მრავალეროვანი საქართველოს" ოფისში ეროვნულ უმცირესობის ლიდერთა საბჭოს სხდომა გაიმართა. შეხვედრას 20 სათვისტომოს პირველი პირები და საქართველოს პარლამენტის დეპუტატი, რეგიონული პოლიტიკისა და თვითმმართველობის კომიტეტის თავმჯდომარის მოადგილე დაესწრნენ. პარლამენტის დეპუტატმა ეროვნულ უმცირესობათა ლიდერებს პარლამენტში მისი საქმიანობა და სამუშაო გეგმა გააცნო. საუბარი შეეხო თვითმმართველობის რეფორმას და ეთნიკური უმცირესობის მდგომარეობას რეგიონებში, კერძოთ ქვემო ქართლში. წყარო:ორგანიზაციის გვერდი სოციალურ ქსელში

თბილისი. 31 იანვარს, წითელი ჯვრის საერთაშორისო კომიტეტსა და საქართველოს წითელი ჯვრის საზოგადოებას შორის ურთიერთთანამშრომლობის ხელშეკრულება გაფორმდა. ხელშეკრულებას ხელი საქართველოს წითელი ჯვრის საზოგადოების პრეზიდენტმა და წითელი ჯვრის საერთაშორისო კომიტეტის დელეგაციის ხელმძღვანელის მოადგილემ მოაწერეს. დოკუმენტი  ითვალისწინებს პარტნიორობის გაფართოებას საგანგებო სიტუაციებზე მზადყოფნის და რეაგირების სფეროში. გარდა ამისა, ხელშეკრულება გულისხმობს საქართველოს წითელი ჯვრის საზოგადოების მოხალისეების ჩართულობას წითელი ჯვრის საერთაშორისო კომიტეტთან ოპერაციულ საქმიანობებში. წყარო:ორგანიზაციის გვერდი სოციალურ ქსელში

თბილისი. ადამიანის უფლებათა ცენტრი ეხმაურება მუხროვანის შესახებ სოციალურ ქსელებში გავრცელებულ ვიდეოკადრებს. ცენტრს მიაჩნია, რომ ეს ვიდეოკადრები ხელისუფლების მხრიდან საჭიროებს სასწრაფო რეაგირებას. „მთავარმა პროკურატურამ დროული გამოძიება უნდა დაიწყოს ვიდეოკადრებში ასახულ ფაქტთან დაკავშირებით და დაადგინოს, კონკრეტულად ვის ეხებოდა ყოფილი შს მინისტრის მიერ ადამიანების გაუსამართლებლად ლიკვიდაციის ბრძანება. სასწრაფოდ უნდა დაიკითხონ  კადრებში აღბეჭდილი ის სამხედრო მაღალჩინოსნები, რომლებიც უშუალოდ იღებდნენ მითითებებს ვანო მერაბიშვილისაგან სამხედრო ოპერაციის ჩატარების თაობაზე", ნათქვამია განცხადებაში. სრულად წყარო: humanrights.ge

თბილისი. სახალხო დამცველი მიესალმება საქართველოს პრემიერ-მინისტრის გადაწყვეტილებას, რომ სახელმწიფო ბიუჯეტიდან საქართველოს მართლმადიდებელი ეკლესიის საპატრიარქოს გარდა, საქართველოში  სხვა რელიგიურმა გაერთიანებებმაც მიიღონ დაფინანსება.  „უნდა ითქვას, რომ ამ კუთხით,  მთავრობის ინიციატივა შეიცავს დისკრიმინაციული გარემოს აღმოფხვრის მკაფიო სურვილს, მაგრამ, გადაწყვეტილება, რომელიც  მხოლოდ ოთხი რელიგიური გაერთიანების დაფინანსებას ითვალისწინებს, რამდენიმე მიზეზის გამო პრობლემატურია . ...უაღრესად მნიშვნელოვანია, რომ რელიგიურ გაერთიანებათა დაფინანსების თაობაზე მთავრობა გაეცნოს რელიგიათა საბჭოს პოზიციას, რადგან სახალხო დამცველთან არსებული რელიგიათა საბჭო ამ საკითხს ინტენსიურად განიხილავდა  და საბჭოს წევრებისთვის მისაღები რამდენიმე ვარიანტი აქვს შემუშავებული", ნათქვამია გავრცელებულ განცხადებაში. სრულად წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრმა გიორგი ხარიბეგაშვილის ბლოგპოსტი - „შმიტის „პოლიტიკურის ცნება" და მისი დეკონსტრუქცია" - გამოაქვეყნა. „პირველ რიგში, თვით სახელმწიფოს ცნების შმიტისეულ განმარტების გააზრებას და სახელმწიფო-არასახელმწიფოებრივის დიქოტომიის ლოგიკური წინააღმდეგობრიობის გამოაშკარავებას შევეცდებით; თავის „პოლიტიკურის ცნებაში" შმიტი ამ ბინარულ ოპოზიციას ამგვარად წარმოგვიდგენს: „სახელმწიფო არის სავსებით გარკვეული, ცალსახად განსაზღვრული სიდიდე, რომელიც უპირისპირდება არასახელმწიფოებრივს და ამიტომ, არაპოლიტიკურ საკითხებსა და ჯგუფებს", ნათქვამია ბლოგპოსტში. სრულად წყარო: emc.org.ge

თბილისი. ინფორმაციის თავისუფლების განვითარების ინსტიტუტმა განცხადება - „IDFI-ს პარტნიორი ორგანიზაცია რუსეთში უცხოეთის აგენტად გამოაცხადეს" - გამოაქვეყნა. „IDFI-ის პარტნიორი არასამთავრობო ორგანიზაციის - „ინფორმაციის თავისუფლების განვითარების ფონდის"(სანქტ-პეტერბურგი) საქმიანობა რუსეთის პროკურატურამ პოლიტიკურ საქმიანობად შეაფასა და ფონდს „არაკომერციული ორგანიზაციების შესახებ" კანონის დარღვევის აღმოფხვრა მოსთხოვა. ამის შესახებ განცხადება ფონდის ვებ-გვერდზე 28 იანვარს გამოქვეყნდა. ...არასამთავრობო ორგანიზაციის საქმიანობის შემოწმება დაინტერესებული მოქალაქის მიმართვის საფუძველზე განხორციელდა. შემოწმების შედეგად პროკურატურამ მიიჩნია, რომ ფონდი, რომელიც უცხოურ დაფინანსებას იღებს, პოლიტიკურ საქმიანობას ეწევა, „საზოგადოებრივი აზრის ფორმირების ინსტრუმენტია" და რუსეთის კანონმდებლობის შესაბამისად აღიარებული უნდა იქნეს „უცხოეთის აგენტად", ნათქვამია ორგანიზაციის გვერდზე. სრულად წყარო: idfi.ge

ქვემო ქართლი. ორგანიზაცია „სიდამ" გამოაქვეყნა ვიდეო ინსტრუქცია: „როგორ გამოვიყენოთ სოციალური მედია საზოგადოებასთან ურთიერთობისათვის". ვიდეოინსტრუქცია „სამოქალაქო საზოგადოების რეგიონული ქსელის" მიერ მომზადდა და იგი ყველა დაინტერესებულ პირს მიიღოს ინფორმაცია თუ როგორ უნდა გამოიყენოს სოციალური მედია საზოგადოებასთან ურთიერთობისათვის. ვიდეო ინსტრუქცია: „როგორ გამოვიყენოთ სოციალური მედია საზოგადოებასთან ურთიერთობისათვის"   წყარო: ქსელის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი პარლამენტისა და საკონსტიტუციო სასამართლოს პროაქტიული გამოქვეყნების ახალი სტანდარტის შესახებ განცხადებას ავრცელებს. ორგანიზაცია მიესალმება იმ ფაქტს, რომ საქართველოს პარლამენტმა და საკონსტიტუციო სასამართლომ დაამტკიცეს საჯარო ინფორმაციის ელექტრონული ფორმით მოთხოვნის სტანდარტი, ინფორმაციის პროაქტიულად გამოქვეყნების წესი და შესაბამისი ნუსხა. ,,მისასალმებელია ის ფაქტიც, რომ აღნიშნულმა დაწესებულებებმა პროაქტიული გამოქვეყნების წესების დანერგვისას იხელმძღვანელეს საქართველოს მთავრობის მიერ დამტკიცებული სტანდარტით და ამასთან დამატებით განსაზღვრეს, საკუთარი საქმიანობის სპეციფიკიდან გამომდინარე არსებული ინფორმაციის გამოქვეყნების ვალდებულება. IDFI გამოთქვამს იმედს, რომ 2014 წლის 1 მარტამდე მათ მიერ ჯეროვნად იქნება შესრულებული აღნიშნული სამართლებრივი აქტებით დაკისრებული ვალდებულებები’’ – ნათქვამია განცხადებაში. სრულად წყარო: opendatablog.wordpress.com

თბილისი. 28 იანვარს, „ფრონტლაინ ჯორჯიას" ოფისში, გაიმართა შეხვედრა საპარტიარქოს ბავშვთა სახლების მონიტორინგის საკითხზე. შეხვედრაზე მიწვეულნი იყვნენ შრომის, ჯანმრთელობისა და სოციალური დაცვის სამინისტროს სოციალური დაცვის დეპარტამენტის უფროსი, ორგანიზაციის - „პარტნიორობა ადამიანის უფლებებისთვის" - წარმომადგენელი  და საპატრიარქოს სოციალური დეპარტამენტის ხელმძღვანელი. შეხვედრას მოდერაციას უწევდა ადამიანის უფლებების სწავლებისა და მონიტორინგის ცენტრის წარმომადგენელი. შეხვედრას ასევე ესწრებოდნენ სამოქალაქო საზოგადოების და საერთაშორისო ორგანიზაციების წარმომადგენლები. სრულად წყარო: „პარტნიორობა ადამიანის უფლებებისთვის" გვერდი სოციალურ ქსელში