თბილისი. „ინფორმაციის თავისუფლებსი განვითარების ინსტიტუტის“ (IDFI) დასკვნით, საჯარო მმართველობის რეფორმის (PAR) სამოქმედო გეგმა არსებულ გამოწვევებს ვერ პასუხობს. „როგორც საჯარო მმართველობის რეფორმის უწყებათაშორის საკოორდინაციო საბჭოს წევრი არასამთავრობო ორგანიზაცია, IDFI ჩართული იყო PAR-ის სამოქმედო გეგმის მომზადების პროცესში.სამოქმედო გეგმის სამუშაო ვერსიის განხილვისას IDFI-მ არაერთხელ დააფიქსირა დოკუმენტში მნიშვნელოვანი რეფორმებისა და ვალდებულებების გათვალისწინების აუცილებლობა. მიუხედავად ამისა, საჯარო მმართველობის რეფორმის ახალი სამოქმედო გეგმა არ ითვალისწინებს ამბიციურ რეფორმებს, განსაკუთრებით, გამჭვირვალობის და ანგარიშვალდებულების გაზრდის მიმართულები”, - ვკითხულობთ IDFI-ის მიერ გავრცელებულ ინფორმაციაში, - „ხარვეზების აღმოფხვრის მიზნით, აუცილებელია, მხედველობაში იქნეს მიღებული შემდეგი რეკომენდაციები: სამოქალაქო საზოგადოების (განსაკუთრებით, რეგიონულ დონეზე) გაძლიერება და ნებისმიერი ეროვნული თუ სექტორული პოლიტიკის დოკუმენტის შემუშავებისას მათი ჩართულობის უზრუნველყოფა; საზოგადოების ცნობიერების ამაღლება საჯარო მმართველობის რეფორმის საკითხებზე და ნებისმიერი ეროვნული თუ სექტორული პოლიტიკის დოკუმენტის შემუშავებისას ფართო საჯარო კონსულტაციების უზრუნველყოფა; PAR-ის სამოქმედო გეგმის შემდგომი განახლება მასში ამბიციური რეფორმების / ვალდებულებების განსაზღვრისა და განხილული ტექნიკური ხარვეზების აღმოფხვრის მიზნით; PAR-ის სამოქმედო გეგმის შესრულებაზე პასუხისმგებელ უწყებათა წრის გაფართოება და მასში მუნიციპალიტეტების ჩართულობის გაზრდა“.  სრულად...  წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტმა“ (IDFI) დღეს, საქართველოში საჯარო და კერძო სექტორებს შორის დიალოგის ხარისხის შეფასების 2014-2019 წლების ანგარიშის წარმოადგინა და მონაწილეობის თვალსაზრისით, ყველაზე მაღალი ხარისხის მქონე კანონპროექტების ინიციატორი სახელმწიფო უწყებები დააჯილდოვა.  IDFI და USAID-ის პროექტის - „მმართველობა განვითარებისთვის საქართველოში“ (G4G) - მიერ ორგანიზებულ ღონისძიებაზე ასეთებად დასახელდნენ: 1. საქართველოს სივრცითი მოწყობისა და მშენებლობის კოდექსი - ეკონომიკისა და მდგრადი განვითარების სამინისტრო; 2. საგადასახადო კოდექსი ცვლილებების შეტანის შესახებ/კორპორატიული საშემოსავლო გადასახადი ე.წ. ესტონური მოდელი - ფინანსთა სამინისტრო; 2. საქართველოს კანონი პროფესიული განათლების შესახებ - განათლების, მეცნიერების, კულტურისა და სპორტის სამინისტრო.  სრულად...  წყარო: ორგანიზაციის ვებგვერდი

თბილისი. „მედიის განვითარების ფონდმა“ გამოაქვეყნა ანტიდასავლური პროპაგანდის მონიტორინგის შედეგები, 2018 წლის მიხედვით. „მედიის განვითარების ფონდი 2014 წლიდან ქართულენოვან მედიაში ანტიდასავლური პროპაგანდის საკითხებს სწავლობს. წინამდებარე კვლევა 2018 წლის მედია მონიტორინგის შედეგებს ასახავს, რომელიც ანტიდასავლურ გზავნილებს, ყალბ ინფორმაციას და მათ წყაროებს აანალიზებს. დაკვირვება როგორც მედია საშუალებებზე, ასევე სხვა წყაროებზე – პოლიტიკურ კლასზე, სასულიერო პირებზე, საზოგადოებრივ ორგანიზაციებსა და საზოგადოების ცალკეულ წარმომადგენლებზე ხორციელდებოდა“, - ნათქვამია დოკუმენტის წინასიტყვაობაში.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია 20-21 ივნისის მოვლენების შესახებ ანგარიშს მოამზადებს.  „20-21 ივნისს საზოგადოება კიდევ ერთხელ გახდა ფართომასშტაბიანი საპროტესტო აქციის არაპროპორციული საპოლიციო ძალის გამოყენებით დაშლის მოწმე. აქციის დაშლას 305 პირის ადმინისტრაციული წესით დაკავება მოჰყვა, ხოლო ჯანმრთელობის დაზიანება არაერთმა პირმა მიიღო“, - აღნიშნულია საია-ს მიერ გავრცელებულ ინფორმაციაში.  სრულად...  წყარო: ორგანიზაციის ვებგვერდი

თბილისი. “კონსტიტუციის 42-ე მუხლმა” 2019 წლის 7 ივნისს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტს ადამიანის უფლებათა ევროპული სასამართლოს მიერ საქართველოს წინააღმდეგ გამოტანილი გადაწყვეტილებების აღსრულების შესახებ ალტერნატიული ანგარიში წარუდგინა.  ანგარიში მოიცავს ეროვნული კანონმდებლობისა და პრაქტიკის ანალიზს სამ თემატურ საკითხზე. ყველა მათგანთან დაკავშირებით რეფორმების გატარება საქართველოს წინააღმდეგ ევროპული სასამართლოს მიერ გამოტანილი გადაწყვეტილებებიდან გამომდინარეობს, რომელთა აღსრულებას ევროპის საბჭოს მინისტრთა კომიტეტი ზედამხედველობს.  სრულად...  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო“ საჯარო და კერძო სექტორებს შორის სამსახურებრივი გადაადგილების, ე.წ. „მბრუნავი კარის“ საფრთხეების შესახებ საუბრობს.  „საჯარო და კერძო სექტორებს შორის სამსახურეობრივი გადაადგილება (რაც „მბრუნავი კარის“ სახელით არის ცნობილი) ინტერესთა კონფლიქტისა და კორუფციის რისკს შეიძლება შეიცავდეს, როდესაც ასეთი გადაადგილება ერთი სექტორის ფარგლებში ხდება. მაგალითად, თანამდებობის პირმა, რომელიც ამა თუ იმ სფეროს რეგულირებაში მონაწილეობს, შეიძლება საკუთარი თანამდებობა კერძო კომპანიის სასარგებლოდ გამოიყენოს იმ მოლოდინით, რომ შემდგომ იმავე კომპანიაში მაღალანაზღაურებად სამსახურს მიიღებს. გარდა ამისა, კერძო კომპანიაში გადანაცვლებულმა ყოფილმა თანამდებობის პირმა ხელისუფლებაში შემორჩენილი კავშირები და გავლენა შეიძლება ლობირებისთვის და ამ კომპანიისთვის უსამართლო უპირატესობის მოსაპოვებლად გამოიყენოს”, - ვკითხულობთ ორგნიზაციის მიერ გავრცელებულ მასალაში, - „ამ საფრთხეების პრევენციისთვის მნიშვნელოვანია მსგავსი შემთხვევების მონიტორინგი და აღირცხვა. ამასთან, არაერთ ქვეყანაში გამოიყენება ე.წ. „გაგრილების პერიოდის“ მექანიზმი, რომელიც ყოფილ თანამდებობის პირებს საჯარო სამსახურის დატოვების შემდეგ გარკვეული დროის განმავლობაში კერძო სექტორის ზოგიერთი კატეგორიის სამსახურში დასაქმებას უკრძალავს“.  სრულად...  წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტმა“ (IDFI), გლობალური საქველმოქმედო ორგანიზაცია Luminate-ის ფინანსური მხარდაჭერით, მონაცემთა ჟურნალისტებისთვის პრაქტიკული სახელმძღვანელო მოამზადა.  „საჯარო სექტორის მონაცემების ხელმისაწვდომობის გაზრდამ და ტექნოლოგიების გაუმჯობესებამ ჟურნალისტებს მისცა საშუალება ჩაუღრმავდნენ ცალკეულ საკითხებს და გამოიყენონ სხვადასხვა აპლიკაციები თუ პროგრამები მონაცემთა მასივების გასაანალიზებლად და ძირითადი მიგნებების უკეთ წარმოსაჩენად. თუმცა, ეს ახალი შესაძლებლობები დაკავშირებულია დამატებით გამოწვევებთან, მონაცემების მოპოვებისა თუ დამუშავებისთვის ახალი უნარების და მეტი დროის აუცილებლობასთან. ამის გამო, ამ ტიპის ჟურნალისტიკას ხშირად მონაცემთა ან საგამოძიებო ჟურნალისტიკას უწოდებენ. მონაცემთა ჟურნალისტის მიზანია არა უბრალოდ ფაქტების აღწერა ან მიმოხილვა, არამედ მათი გამომწვევი მიზეზების კვლევა/განსაზღვრა და, ხშირ შემთხვევაში, პრობლემის გადაჭრის შესაძლო გზების ძიება“, - აღნიშნულია სახელმძღვანელოს შესავალში.  სრულად...  წყარო: ორგანიზაციის ვებგვერდი

აჭარა. „საერთაშორისო გამჭვირვალობა - საქართველოს“ (IT) დასკვნით, მუნიციპალური იურიდიული პირების შენახვა ბათუმს წელიწადში 33 მილიონ ლარზე მეტი უჯდება.  „ბათუმის მუნიციპალიტეტის 11 ა(ა)იპ-ში დასაქმებულთა შრომის ანაზღაურებაზე ყოველთვიურად - 1 626 899, წლიურად კი, 19 522 796 ლარი იხარჯება. ამასთან, ბათუმის მუნიციპალიტეტის 8 შპს-ს სუბსიდირებაზე 2019 წელს 13 720 200 ლარია გამოყოფილი. ჯამში, ბათუმის მუნიციპალიტეტი იურიდიული პირების შენახვაზე 33,242,996 ლარს ხარჯავს, რაც ბათუმის 2019 წლის ბიუჯეტის (154 361 000 ლარი) 21.5%-ია. დასაქმებულ პირთა რაოდენობა და შრომითი ანაზღაურება ა(ა)იპ-ებში ბათუმის მუნიციპალიტეტის 11 ა(ა)იპ-ში 2 497 თანამშრომელი მუშაობს. მიუხედავად იმისა, რომ ა(ა)იპ-ების რაოდენობა 2018-2019 წლებში, 2014-2015 წლებთან შედარებით, 3-ით შემცირდა, თანამშრომელთა რაოდენობამ 393-ით მოიმატა, რამაც ა(ა)იპ-ების შრომითი სარგოს 612 000 ლარით გაზრდა განაპირობა“, - ვკითხულობთ IT-ის მიერ გავრცელებულ ინფორმაციაში.  სრულად  წყარო: ორგანიზაციის ვებგვერდი

თბილისი. საქართველოს სტრატეგიული კვლევებისა და განვითარების ცენტრის (CSRDG) ორგანიზებით, ტარდება ტრენინგი „ევროკავშირ-საქართველოს ასოცირების შეთანხმების თაობაზე”. „ტრენინგი 4 დღიანია და მისი მიზანია, ხელი შეუწყოს ქართული საზოგადოებრივი ორგანიზაციების მიერ ასოცირების შეთანხმების შესრულების მონიტორინგს. ტრენინგების ციკლის დასრულების შემდგომ, გამოცხადდება მცირე გრანტების კონკურსი ქართული რეგიონული არასამთავრობო ორგანიზაციებისათვის, ასოცირების შეთანხმებით გათვალისწინებულ ვალდებულებათა შესრულების მონიტორინგისათვის”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველომ“ (TI) აფხაზეთის ავტონომიური რესპუბლიკის მთავრობისა და უზენაესი საბჭოს წევრთა ნაწილის 2019 წელს ქონებრივ დეკლარაციებში დარღვევები აღმოაჩინა.  „საერთაშორისო გამჭვირვალობა-საქართველომ” თანამდებობის პირთა 20-ზე მეტი ქონებრივი დეკლარაცია შეისწავლა. შედეგად დეკლარაციების არასრულად შევსების 5 ფაქტი და კუთვნილი წილების სხვა პირებზე მინდობით გადაუცემლობის 2 ფაქტი გამოავლინა. აღნიშნული გარემოებები წარმოადგენს საჯარო სამსახურში ინტერესთა შეუთავსებლობისა და კორუფციის შესახებ კანონის მოთხოვნათა დარღვევას - კანონი თანამდებობის პირს ავალდებულებს, ქონებრივ დეკლარაციაში ასახოს როგორც საკუთარი, ასევე ოჯახის წევრების სამეწარმეო საქმიანობა. ამავე კანონის მე-13 მუხლის მოთხოვნის თანახმად, თანამდებობის პირი ვალდებულია სამსახურის გავლის ვადით სამართავად სხვას გადასცეს მის საკუთრებაში არსებული სამეწარმეო საქმიანობის სუბიექტის საწარმოს კაპიტალის წილები“, - აღნიშნულია TI-ის მიერ გავრცელებულ ინფორმაციაში.  სრულად წყარო: ორგანიზაციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოება“ (ISFED) აქვეყნებს შოთა ნარსიას ბლოგს, რომელიც, რუსთაველის გამზირზე მიმდინარე აქციების წინააღმდეგ, facbook-ზე წარმართულ კამპანიას მიმოიხილავს. „20-21 ივნისის ღამის მოვლენების შემდეგ აგორებული საპროტესტო აქციების წინააღმდეგ „ფეისბუქზე“ დისკრედიტაციის დასპონსორებული კამპანია აქტიურად მიმდინარეობს. აღნიშნულ კამპანიაში ის გვერდები ჩაერთვნენ, რომლებიც 2018 წლის საპრეზიდენტო არჩევნებისთვის ოპოზიციური კანდიდატებისა და პარტიების წინააღმდეგ მოქმედებდნენ. აგრეთვე, მოცემული გვერდები აქტიურად ეწეოდნენ მიმდინარე წლის ივნისში მთაწმინდის შუალედური არჩევნების მეორე ტურის წინ ოპოზიციური კანდიდატის, შალვა შავგულიძის, დისკრედიტაციას. დისკრედიტაციის კამპანიისათვის გამოიყენება ახალშექმნილი გვერდებიც. მადისკრედიტირებელი კამპანია წარიმართა ცრუ მედიის გვერდებზეც. აღსანიშნავია, რომ კიდევ ერთხელ გამოჩნდა მოჩვენებითად მხარდამჭერი, ყალბი გვერდების შექმნისა და ცრუ მხარდამჭერი პოსტების დასპონსორების ტაქტიკის გამოყენების შემთხვევაც. ამასთან, აქციების საწინააღმდეგო კამპანია აქტიურად წარიმართება დეზინფორმაციულ და პროპაგანდისტულ, ულტრამემარჯვენე ნარატივის გვერდებზე“, - ვკითხულობთ ბლოგში.  სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა „პრევენციის ეროვნული მექანიზმის 2018 წლის ანგარიში“ წარმოადგინა.  „ანგარიშში ასახულია ქვეყანაში თავისუფლების აღკვეთისა და შეზღუდვის ადგილებში წამებისა და არასათანადო მოპყრობასთან დაკავშირებით არსებული მდგომარეობა. პენიტენციური სისტემის მიმართულებით შემუშავდა პენიტენციური სისტემის განვითარების 2019-2020 გეგმა.მიუხედავად ამისა, სახალხო დამცველის 2017 წლის რეკომენდაციების მნიშვნელოვანი ნაწილი, რომელიც წამებისა და არასათანადო მოპყრობისაგან დაცვის პროცედურული და ინსტიტუციური გარანტიების გაძლიერებისკენ იყო მიმართული, კვლავ შეუსრულებელია. მნიშვნელოვანი გამოწვევა და სერიოზული საფრთხის შემცველია კრიმინალური სუბკულტურა. ანგარიშში მიმოხილულია დეესკალაციის ოთახში ხანგრძლივად მოთავსების პრაქტიკა, უსაფრთხოების ზომების შესაბამისი დასაბუთების გარეშე ჩატარება, რეაბილიტაციის ღონისძიებების სიმცირე, დაწესებულებებში არსებული გადატვირთულობა და ფიზიკური გარემოს კუთხით არსებული პრობლემები“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა წარმოადგინა ანგარიში „არასათანადო მოპყრობის სისხლის სამართლის საქმეთა გამოძიების ეფექტიანობა“. „წინამდებარე ანგარიშში საზოგადოება გაეცნობა 38 კონკრეტული სისხლის სამართლის საქმის ანალიზს. ყველა საქმეზე გამოძიება ისე წარიმართა და დასრულდა, რომ შედეგი არ დამდგარა, კონკრეტული პირი პასუხისგებაში არ მიცემულა, გამოძიება ისე შეწყდა, რომ სავარაუდო მსხვერპლი არც ერთ შემთხვევაში არ სცნო გამოძიებამ დაზარალებულად. გამოძიებას სერიოზული პრობლემები ხშირ შემთხვევაში ჰქონდა ინსტიტუციური დამოუკიდებლობის თვალსაზრისით. მიუხედავად ვალდებულებისა, გამოძიება დაეწყო და ეწარმოებინა პროკურატურას, ეს მოთხოვნა მრავალ საქმეში არ შესრულდა. გამოძიებაში აქტიურად იყვნენ ჩართულნი ის უწყებები, რომელთა თანამშრომლების მიმართაც არასათანადო მოპყრობის ჩადენის ეჭვები არსებობდა“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. „კოალიცია დამოუკიდებელი და გამჭვირვალე მართლმსაჯულებისთვის“ ინფორმაციით, იუსტიციის საბჭო უზენაესი სასამართლოს მოსამართლეების კანდიდატებთან დაკავშირებულ საჯარო ინფორმაციას არ გასცემს. „კოალიცია ხაზგასმით აღნიშნავს, რომ იუსტიციის უმაღლესი საბჭოს გადაწყვეტილება, კანდიდატების შესახებ არსებული დოკუმენტების დახურვის შესახებ, კონკურსისადმი საზოგადოების ნდობის პერსპექტივას გამორიცხავს. კოალიცია მოუწოდებს იუსტიციის უმაღლეს საბჭოს დაუყოვნებლივ გაასაჯაროოს კანდიდატების შესახებ საბჭოში წარდგენილი და საბჭოს მიერ მოძიებული ინფორმაცია  (გარდა ჯანმრთელობის მდგომარეობის შესახებ ინფორმაციისა), მანამდე კი არ გააგრძელოს კონკურსის პროცედურები“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. კოალიცია მედიის ადვოკატირებისთვის მიიჩნევს, რომ მაუწყებლობის თვითრეგულირებას მიკუთვნებული საკითხების რეგულირებაში გადატანა დაუშვებელია. „კოალიცია მიიჩნევს, რომ კანონპროექტი გამოხატვის თავისუფლების შეზღუდვისკენ არის მიმართული და დიდ საფრთხეებს შეიცავს. კომუნიკაციების ეროვნული კომისიის მიერ შემოთავაზებული ცვლილებებით მედიის თვითრეგულირების სფეროში არსებული საკითხები გადადის სახელმწიფო რეგულირების კომპეტენციაში, შესაძლებელი ხდება მედიის თვითრეგულირების ორგანოს გადაწყვეტილების კომუნიკაციების ეროვნულ კომისიაში ან სასამართლოში გასაჩივრება. ეს ქმნის გამოხატვის თავისუფლების თვითნებური, დაუსაბუთებელი შეზღუდვის რისკებს", ნათქვამია ორგანიზაციის ვებგვერდზე.  სრულად... წყარო: gyla.ge

თბილისი. „ინფორმაციის თავისუფლების განვითარების ინსტიტუტმა" (IDFI), საჯარო ინფორმაციის პროაქტიულად გამოქვეყნების თვალსაზრისით, საქართველოს საჯარო უწყებებში არსებული ვითარება შეისწავლა. „წინამდებარე ანგარიშში წარმოდგენილია საქართველოში საჯარო ინფორმაციის პროაქტიული ხელმისაწვდომობის შეფასება 2019 წლის მაისის მდგომარეობით და მოცემულია ინფორმაციის პროაქტიული ხელმისაწვდომობის ტენდეციები 2014 წელთან შედარებით. ანგარიში მოიცავს ასევე საჯარო დაწესებულებათა პროაქტიული გამჭვირვალობის რეიტინგებს", - ვკითხულობთ IDFI-ის მიერ გავრცელებულ ინფორმაციაში, - „IDFI-მ შეისწავლა საჯარო ინფორმაციის პროაქტიული გამოქვეყნების პრაქტიკა 100 საჯარო დაწესებულებაში და ამ მიზნით განახორციელა შემდეგ უწყებათა ვებ-გვერდების დეტალური მონიტორინგი: საქართველოს პარლამენტი, საქართველოს პრეზიდენტის ადმინისტრაცია, საქართველოს მთავრობის ადმინისტრაცია, 11 - სამინისტრო/სახელმწიფო მინისტრის აპარატი, 86 - სამინისტროს დაქვემდებარებული სსიპ და საქვეუწყებო დაწესებულება".  სრულად წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: საქართველოს ანტიკორუფციული პოლიტიკა ვერ პასუხობს ასოცირების შეთანხმებითა და დღის წესრიგით ნაკისრ ვალდებულებებს. „ასოცირების დღის წესრიგის დამტკიცებიდან წელიწადნახევრის თავზე, საქართველოს პოზიტიური შედეგები აქვს წვრილმანი კორუფციის აღმოფხვრის მხრივ მიღწეული პროგრესის შენარჩუნების თვალსაზრისით, თუმცა ვერ ხერხდება მდგომარეობის გაუმჯობესება მაღალი დონის კორუფციასთან ბრძოლის სფეროში", ნათქვამია ორგანიზაციის გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაციის (საია) შეფასებით, 2019 წლის 19 მაისის შუალედური არჩევნების მეორე ტურმა არსებითი დარღვევების გარეშე ჩაიარა, თუმცა გამოიკვეთა ნეგატიური ტენდენცია, რომელიც ამომრჩევლის ნების გამოხატვის კონტროლსა და ზოგიერთ უბანზე დაძაბულ გარემოს უკავშირდება, სამწუხაროდ, იყო ფიზიკურ დაპირისპირების და მუქარის შემთხვევები. სრულად... წყარო: gyla.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის” ეხმიანება სახელმწიფო ინსპექტორის თანამდებობაზე გამოცხადებული კონკურსის დარღვევით მიმდინარეობასა და ინსპექტორის სამსახურის ფინანსური გარანტიებით უზრუნველყოფის ვალდებულების შეუსრულებლობას. კოალიცია მოუწოდებს საქართველოს პარლამენტსა და მთავრობას: - საქართველოს პარლამენტმა მხარი არ დაუჭიროს კონკურსის წესების დარღვევით შერჩეულ კანდიდატებს; - საქართველოს პრემიერ-მინისტრმა გამოაცხადოს ახალი კონკურსი; - სახელმწიფო ინსპექტორის სამსახურს დროულად მიეწოდოს სათანადო ფინანსური სახსრები, რათა 2019 წლის 1 ივლისს საგამოძიებო მექანიზმის ამოქმედებას საფრთხე არ დაემუქროს. სრულად... წყარო: gyla.ge

თბილისი. საქართველოს სახალხო დამცველის მიმართვის საფუძველზე, ეუთოს დემოკრატიული ინსტიტუტებისა და ადამიანის უფლებების ორგანიზაცია (OSCE/ODIHR) საქართველოს უზენაესი სასამართლოს მოსამართლეთა შერჩევის მიმდინარე პროცესს დააკვირდება. „უზენაესი სასამართლოს მოსამართლეთა შერჩევის პროცესის მაღალი მნიშვნელობის გამო, საქართველოს სახალხო დამცველმა მიმდინარე წლის 27 მაისს მიმართა ეუთოს დემოკრატიული ინსტიტუტებისა და ადამიანის უფლებების ორგანიზაციას და სთხოვა აღნიშნული პროცესის მონიტორინგი. გასათვალისწინებელია, რომ უზენაესი სასამართლოს მოსამართლეების შერჩევის საკითხზე, ასევე სახალხო დამცველის თხოვნით, ამავე ორგანიზაციამ მიმდინარე წლის 17 აპრილს გამოაქვეყნა სამართლებრივი მოსაზრება და რეკომენდაციები პარლამენტში ინიცირებულ კანონპროექტთან დაკავშირებით. მოსამართლეთა შერჩევის პროცესის მონიტორინგი ამ პროცესის ლოგიკური გაგრძელება იქნება. მიმდინარე წლის 30 მაისის წერილით, ეუთოს დემოკრატიული ინსტიტუტებისა და ადამიანის უფლებების ორგანიზაციამ დაადასტურა საკუთარი მზაობა, დააკვირდეს შერჩევის პროცესს და მის შესაბამისობას როგორც ეროვნულ კანონმდებლობასთან, ასევე, საერთაშორისო სტანდარტებსა და კარგ პრაქტიკასთან", - ვკითხულობთ სახალხო დამცველის აპარატის მიერ გავრცელებულ ინფორმაციაში. სრულად  წყარო: სახალხო დამცველის აპარატის ვებგვერდი

თბილისი. საქართველოს სტრატეგიული კვლევებისა და განვითარების ცენტრის (CSRDG) ორგანიზებით, დაიწყო ტრენინგი „ევროკავშირ-საქართველოს ასოცირების შეთანხმების თაობაზე". „ტრენინგი ეხმარება არასამთავრობო ორგანიზაციების წარმომადგენლებს ასოცირების შეთანხმებით გათვალისწინებული ვალდებულებათა შესრულების მონიტორინგის განხორციელებაში. გაითვალისწინეთ, ტრენინგების ციკლის დასრულების შემდგომ, გამოცხადდება მცირე გრანტების კონკურსი ქართული რეგიონული არასამთავრობო ორგანიზაციებისათვის, ასოცირების შეთანხმებით გათვალისწინებულ ვალდებულებათა შესრულების მონიტორინგისათვის", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის ორგანიზებით გაიმართა ტრენინგი ევროკავშირსა და საქართველოს ასოცირების შეთანხების შესახებ. ტრენინგი ხელს უწყობს არასამთავრობო ორგანიზაციების წარმომადგენლებს ასოცირების შეთანხმებით გათვალისწინებული ვალდებულებათა შესრულების მონიტორინგის განხორციელებაში. ტრენინგის ციკლის დასრულების შემდგომ გამოცხადდება საგრანტო კონკურსი საზოგადოებრივი ორგანიზაციებისთვის ასოცირების შეთანხმებით გათვალისწინებული ვალდებულებების შესრულების მონიტორინგისთვის. ტრენინგი გაიმართა პროექტის „სამოქალაქო საზოგადოების განვითარების ინიციატივის“ ფარგლებში, რომლის მხარდამჭერია ევროკავშირი და კონრად ადენაუერის ფონდი.