სიღნაღიდან ორ კილომეტრში, ბოდბის მონასტრიდან ხელმარჯვნივ და ზევით მიმავალ გზას თუ დაადგებით ქედელის დასახლებას მიადგებით, ადგილობრივების თქმით ოდესღაც სოფელი იმდენად დიდი იყო, რომ მას ქუჩებიც კი „ყოფდა“, ვერ გეტყვით ასვლის შემდგომ რომელ ქუჩაზე აღმოჩნდებით, მაგრამ როგორც კი ცოტას გაივლით, ჭიშკარი შემოგვხვდებათ და იქიდან ჯერ ცნობისმოყვარე მომზირალ თვალებს, შემდეგ კი მომღიმარ სახეებს წააწყდებით... ისინი თემი „ქედელის“ ბენეფიციარები (მაცხოვრებლები) არიან. „ყველა ადამიანის ცხოვრებაში დგება მომენტი, როცა რაღაცას ამოწურავ, დაამთავრებ და ... რაღაც ახალი გინდა დაიწყო“, იხსენებს ლალი ხანდოლიშვილი, „ქედელის“ დამფუძნებელი. „ორგანიზაციის შექმნა იმ დროს დაემთხვა, როცა თითქოს დრო იყო გაჩერებული, არაფერი არ ხდებოდა, სიბნელეში ვიყავით. მართალია სამუშაო მქონდა, მაგრამ რაღაც ახლის კეთება მსურდა...“, დასძენს იგი. ლალიმ გადაწყვიტა, რომ თბილისში სოციალური თერაპიის სახლში დაეწყო მუსიკალურ თერაპევტად მუშაობა. სოციალური თერაპიის სახლი შეზღუდული შესაძლებლობის მოზრდილებს ემსახურება, ისინი მთელ დღეს იქ ატარებენ, მათი მშობლების დარდმა კიდევ ერთი ვირტუალური აგური „დადო“ „ქედელის“ საძირკველში. მაგრამ შემთხვევა, რომელიც ლალი ხანდოლიშვილის სიახლოვეს მოხდა გადამწყვეტი აღმოჩნდა – მეზობლად მცხოვრები შეზღუდული შესაძლებლობის მქონე ახალგაზრდა დედისა და ბებიის გარეშე, ანუ მარტო დარჩა. ამას მოჰყვა ფიქრიც და კეთებაც... ლალიმ და მისმა მეუღლემ სოფელ ქედელში, ოჯახის კუთვნილი მიწა შემოწირულობის სახით ორგანიზაციას გადასცეს. შემდეგ უცხოეთში წავიდა გამოცდილების მისაღებად.  ერთ დღეს გამოჩნდა გერმანელი სოციალ-თერაპევტი, რომელიც დარწმუნდა, რომ ეს იყო ის საქმე, რომლისთვისაც ფული უნდა გაეღო... ქედელში იყიდეს მიწის ნაკვეთები და ერთი პატარა, ძველი სახლი, რომელიც ზანზარებდა და წყალიც ჩამოდიოდა... ასე დაიწყეს ორგანიზაციის აწყობა... უცხოელებმა მათთვის ფონდი შექმნეს, თანხების მოძიება დაიწყეს...   „პირველი მიშა მოიყვანეს ნათესავებმა წყალტუბოდან, მას მშობლები არ ჰყავდა. ჯერ ჭერიც არ ჰქონდა სახლს, მაგრამ უკან ვერ გავუშვით“, – იხსენებს ლალი ხანდოლიშვილი. შემდეგ ნაწილი კასპის ფსიქონევროლოგიური პანსიონატიდან, სენაკის ბავშვთა სახლიდან, ფონდ „პირველი ნაბიჯის“ ზრდასრული ბენეფიციარები გადმოიყვანეს. ასე გამრავლდა თემი...  დღეს უკვე 28 ბენეფიციარი ცხოვრობს და სამი სახლი აქვთ, რომლებიც ჰოლანდიელი და გერმანელი მეგობრების დახმარებით ააშენეს. თემის წევრებმა მიტოვებული სოფელი „გამოაცოცხლეს“ და თანდათან დამოუკიდებელი ცხოვრებისთვის დაიწყეს მზადება. მათგან ნაწილი კულინარიას სწავლობს და პურის ცხობაში იღებს მონაწილეობას, ნაწილი ნათესებს ან ფერმას უვლის, საქსოვ ან ხის სახელოსნოების მუშაობაში იღებს მონაწილეობას.  ორგანიზაციას შემოსავლები დივერსიფიცირებული აქვს – ბენეფიციარების მოვლისთვის სახელმწიფო ვაუჩერულ სისტემაშია ჩართული, ამავე დროს სხვადასხვა საგრანტო კონკურსებში იღებს მონაწილეობას და რაც მთავარია, ადგილობრივი და უცხოელი მეგობრების შემოწირულობები. ახლაც ბელგიელი სოციალ- თერაპევტი, რომელიც სამშობლოში ანალოგიურ ორგანიზაციაში მუშაობს, თემისთვის ინვესტიციებს ეძებს, რათა მეოთხე სახლიც აშენდეს და ბენეფიციარებმა ოჯახთან მიახლოებულ გარემოში იცხოვრონ.

პოდკასტი საქართველოს პირველი რესპუბლიკის შესახებ. ეს ქვეყანა შენია ・This country is yours · პოდკასტი - დიმიტრი სილაქაძე

გაიცანით სოციალური საწარმო „ჩუ", რომელმაც ჟესტური ენის პოპულარიზაციის მიზნით, ისეთი სამაგიდო თამაში შექმნა, რომელიც მის სწავლაში, საკომუნიკაციო ბარიერების გადალახვასა და ინკლუზიური გარემოს შექმნაში გვეხმარება. სალომე წიქვაძე, სოციალური საწარმოს დამფუძნებელი, ინკლუზიურ თამაშზე გვიყვება: „ჩვენი პირველი თამაში ჟესტური ენის პოპულარიზებაზეა აგებული, რომლის დროსაც საუბარი საჭირო არ არის. შეგიძლია ყველაფერი ჟესტებით გადმოსცე, სწორედ აქედან გაჩნდა სოციალური საწარმოს და თამაშის სახელის იდეა – „ჩუ“. ჟესტური ენის სწავლა ბავშვობიდანვე მაინტერესებდა, თუმცა ეს მარტივი არ აღმოჩნდა. თამაში, გარდა იმისა, რომ ახალი ინფორმაციის მიღების, ახალი ადამიანების გაცნობის საუკეთესო საშუალებაა, იგი საუკეთესო გზაცაა ფართო აუდიტორიასთან მიგვეტანა ჩვენი სათქმელი – სმენის შეზღუდვის მქონე პირთა საზოგადოებაში ინტეგრაციის ხელშესაწყობისთვის, თუნდაც საბაზისო დონეზე, ჟესტური ენის სწავლების აუცილებლობა და მეთოდი. სალომე აღნიშნავს, რომ თამაშის შექმნაში აქტიურად მონაწილეობდა და მასთან ერთად მომუშავე გუნდის გარდა, მოსაზრებებს უზიარებდა სხვადასხვა სფეროს წარმომადგენლებს და, რა თქმა უნდა, ქართული ჟესტური ენის სპეციალისტებს. აღსანიშნავია, რომ წამოწყების გავრცელებამდე, ინიციატორებმა, ინკლუზიური თამაში სხვადასხვა ასაკისა და პროფესიის ადამიანებს გააცნეს და მათგან მიღებული უკუკავშირის საფუძველზე პროდუქტი დახვეწეს. „მათი მოსაზრებების შემდეგ დავრწმუნდით, რომ სწორ გზაზე ვიდექით და თამაში ნამდვილად შეძლება საზოგადოებაში პოზიტიური ცვლილება გამოეწვია ჟესტური ენის შესწავლის მიმართულებით“, ამბობს სალომე. თამაში „ჩუ“ შესაძლებლობას აძლევს 6 წლიდან ზევით, ნებისმიერ ადამიანს გაეცნოს და ისწავლოს ქართული ჟესტური ენის საბაზისო სიტყვები. #გაიზიარეპასუხისმგებლობა, რადგან #ესქვეყანაშენია

მოუსმინე "ჩართეს" გუნდის წევრი განათლების ხელმისაწვდომობის შესახებ. ეს ქვეყანა შენია ・This country is yours · პოდკასტი - მარიამ მჭედლიშვილი

სსო მეტრის 2022 წლის ანგარიშის შედეგების მიხედვით – საქართველო სსო–ების, აქტივისტებისა და ადამიანის უფლებათა დამცველებისთვის – საშუალო რისკის ქვეყანას წარმოადგენს. ანგარიში არ ასახავს დღეს არსებულ რეალობას, იგი მიმოიხილავს 2022 წლის იანვრიდან ნოემბრის ჩათვლით მომხდარ მოვლენებს და აფასებს სამოქალაქო საზოგადოების საარსებო გარემოს. შესაბამისად, 2022 წლის სსო მეტრი, საშუალებას გვაძლევს გავიგოთ თუ როგორი იყო გარემო „გუშინ“ და შევადაროთ იგი დღეს არსებულ მდგომარეობას. საქართველოში არსებულ გარემოს მაქსიმალური 7 ქულიდან - მინიჭებული აქვს 4,8 ქულა (საკანონმდებლო გარემო შეფასებულია – 5,2 ქულით, ხოლო პრაქტიკა – 4,4 ქულით). რა შეიცვალა?  მიუხედავად იმისა, რომ 2022 წლის საანგარიშო პერიოდში არ გამოკვეთილა ისეთი მოვლენები, რომლებმაც, წინა წელთან შედარებით, სსო-ების საარსებო გარემო მნიშვნელოვნად შეცვალა, ანგარიშში ხაზგასმულია საზოგადოებრივი სექტორის მიმართ სიტყვიერი თავდასხმების გაზრდილი მაჩვენებელი და თანმდევი ინიციატივები, რომლებიც, თავის მხრივ, მიანიშნებენ სსო–ების საარსებო გარემოს გაუარესების პოტენციალზე. ორგანიზაციების სარეგისტრაციო საფასურის გაორმაგებამ, მეწარმეთა შესახებ საქართველოს კანონში ფუნდამენტურმა ცვლილებებმა, საბანკო ანგარიშის გახსნის ეტაპზე იდენტიფიცირებულმა პრობლემებმა ნეგატიური გავლენა მოახდინეს, და წინა პერიოდთან შედარებით ქულები შემცირდა, შემდეგი მიმართულებით: გაერთიანების თავისუფლება (სამართლებრივ კომპონენტში ქულამ დაიკლო 6.2-დან 6.1-მდე) თანასწორობის უფლება (პრაქტიკის კომპონენტში ქულამ დაიკლო 5.4-დან 5.3-მდე) და პირადი ცხოვრების ხელშეუხებლობის უფლება (პრაქტიკის კომპონენტში ქულამ დაიკლო 3.1-დან 3.0-მდე). უფლებრივი სტანდარტების მიმოხილვა 7 ბალიანი შეფასების სისტემით ყველაზე მაღალი ქულა გაერთიანების თავისუფლების სტანდარტმა მიიღო – 6.1. ხოლო ყველაზე მეტი პრობლემა პირადი ცხოვრების ხელშეუხებლობის სტანდარტის მიმართ გამოიკვეთა და შესაბამისად დაბალი მაჩვენებლით შეფასდა – 3.8. გაერთიანების თავისუფლება  ჯამური ქულა – 6.1 (კანონმდებლობა – 6.1, პრაქტიკა – 6.0). ძირითადი ნეგატიური ცვლილება: იურიდიულ პირთა რეგისტრაციის ხარჯების ზრდა (გაორმაგება) და ამავე მიმართულებით ახალი, განუსაზღვრელი შინაარსის პროცედურული მოთხოვნების ამოქმედება. ცვლილებები ეხება როგორც ახლადშექმნილი სსო–ების რეგისტრაციას, ასევე, ავალდებულებს მოქმედ სსო-ებს, 2024 წლის 1 იანვრამდე, ახალი სტანდარტების მიხედვით შეცვალონ რეგისტრირებული მონაცემები, წინააღმდეგ შემთხვევაში, შესაძლოა, ორგანიზაციის რეგისტრაციის გაუქმების საკითხი დადგეს.  ძირითადი პოზიტიური ცვლილება: ყველა იურიდიულ პირს აქვს შესაძლებლობა ონლაინ, ინდივიდუალური პლატფორმის საშუალებით ჰქონდეს კომუნიკაცია საჯარო სტრუქტურებთან მიმოწერისა და კომუნიკაციის კუთხით. თანასწორი მოპყრობა ჯამური ქულა 5.6 (კანონმდებლობა – 5.8, პრაქტიკა – 5.3). ძირითადი ნეგატიური ცვლილება: საანგარიშო პერიოდში გამოვლენილი ზოგიერთი შემთხვევა მიუთითებს, რომ ფინანსური ინსტიტუტები (ბანკები), საბანკო ანგარიშის გახსნისას, სხვა ქვეყნის იურისდიქციასთან დაკავშირებული ორგანიზაციების მიმართ აწესებენ განსხვავებულ, კომპლექსურ მოთხოვნებს, რაც პროცესს ართულებს, ახანგრძლივებს და ზოგიერთ შემთხვევაში საბანკო ანგარიშის გახსნაზე უარით სრულდება.  ძირითადი პოზიტიური ცვლილება: არ ფიქსირდება. გადაწყვეტილების მიღების პროცესში მონაწილეობის უფლება ჯამური ქულა: 4.8 (კანონმდებლობა – 5.3, პრაქტიკა 4.3).  ძირითადი ნეგატიური ცვლილება: ხელისუფლებამ მოახერხა და არასახარბიელო გარემო შეუქმნა იმ „ვოჩდოგ“ ორგანიზაციებს, რომლებიც აკრიტიკებდნენ მთავრობის პოლიტიკას. აღნიშნულმა ფაქტორმა ხელი შეუშალა ორგანიზაციებს მონაწილეობით პროცესებში ჩართულიყვნენ, ან ისეთ პროცესებში იყვნენ ჩართულნი, სადაც მათი ინტერვენციის შესაძლებლობები დაბალი იყო.  ძირითადი პოზიტიური ცვლილება: ინსტიტუციური მარეგულირებელი ჩარჩოს გაუმჯობესება, კერძოდ, დამტკიცდა საჯარო კონსულტაციათა ჩატარების ინსტრუქცია, რითიც დგინდება, საჯარო დოკუმენტების შემუშავებამდე, მათი საჯარო განხილვის უზრუნველყოფის აუცილებლობა. გამოხატვის თავისუფლება  ჯამური ქულა: 4.9 (კანონმდებლობა – 5.6., პრაქტიკა – 4.1). ძირითადი ნეგატიური ცვლილება: საანგარიშო პერიოდში ძალაში შევიდა ზოგიერთი საკანონმდებლო წინადადება, რომელიც ორაზროვანი და გამოხატვის თავისუფლების შეზღუდვის საფრთხის შემცველია. მაგალითად მაუწყებლობის შესახებ კანონი.  ძირითადი პოზიტიური ცვლილება: არ ფიქსირდება. პირადი ცხოვრების ხელშეუხებლობა ჯამური ქულა: 3.8 (კანონმდებლობა – 4.6. პრაქტიკა –3.0). ძირითადი ნეგატიური ცვლილება: 2022 წლის ზაფხულში პარლამენტმა მიიღო ცვლილებები სისხლის სამართლის საპროცესო კოდექსში, რითიც შესაძლებელი გახადა ფარული საგამოძიებო მოქმედებების ჩატარება დამატებით 27 დანაშაულზე. შედეგად ამ სიაში მოხვედრილი ნაკლებად მძიმე დანაშაულთა რიცხვი 75-ს ცდება. მათ შორისაა ისეთი დანაშაულებიც, როგორიცაა საქართველოს სახელმწიფო დროშის უკანონოდ აღმართვა.  ძირითადი პოზიტიური ცვლილება: არ ფიქსირდება. სსო მეტრი 2022, ქვეყნის ანგარიში... 

ალბათ, გსმენიათ ფრაზები „ქართველობას, ტრადიციას გვართმევენ“, რომელიც ანტიდასავლური პროპაგანდით შექმნილი არასწორი, მცდარი მოსაზრების ამსახველი სტერეოტიპებია. მათ გავრცელებას საზოგადოების ნაწილი შეცდომაში შეჰყავს და შიშს იწვევს, რომ ვიღაც „გვართმევს ტრადიციას“ და თავს „გვახვევს“ მაგალითად, თანასწორი მოპყრობის, გაერთიანების, ან გამოხატვის თავისუფლების იდეას. ისტორიული გამოცდილება კარგი საშუალებაა უსაფუძვლო შიშების და არასწორი სტერეოტიპების დასაძლევად.  ამის საუკეთესო მაგალითია 1921 წლის საქართველოს დემოკრატიული რესპუბლიკის კონსტიტუცია. როგორც კონსტიტუციონალისტები ამბობენ, დოკუმენტმა „დროს გაუსწრო“ და დღესაც კი, პროგრესულად მიიჩნევა.  მან გააუქმა სიკვდილით დასჯა, აღიარებდა ადამიანის უფლებებსა და თანასწორობას კანონის წინაშე, ითვალისწინებდა გენდერულ თანასწორობას, იცავდა რწმენის, შეკრების თავისუფლებას. ეს ის უფლებები და ფასეულობებია, რომლებიც ჩვენთვის დღესაც აქტუალური და ფასეულია.  გაერთიანების თავისუფლება  1921 წლის კონსტიტუციის თანახმად საქართველოს რესპუბლიკის მოქალაქეებს უფლება ჰქონდათ დაეარსებინათ პროფესიული თუ სხვა ორგანიზაცია, თუ მათი მიზანი კანონით არ იყო აკრძალული. კავშირის გაუქმება მხოლოდ სასამართლოს დადგენილებით იყო შესაძლებელი (მუხლი 35).  თანასწორი მოპყრობა  კანონის წინაშე მოქალაქეები ყველანი თანასწორნი არიან (მუხლი 16), აღნიშნულია 1921 წლის კონსტიტუციაში, რომელშიც დაკონკრეტებულია გენდერული თანასწორობა „ორივე სქესის მოქალაქე თანასწორია, როგორც პოლიტიკურ ისე სამოქალაქო, ეკონომიურ და საოჯახო უფლებით“ (მუხლი 39).  საქართველოს რესპუბლიკის ყველა მოქალაქეს თანასწორ უფლებას ანიჭებდა კონსტიტუცია, რათა მიეღო სახელმწიფო, სამოქალაქო, სამხედრო და საქალაქო თუ საერობო სამსახური (მუხლი 133). საქართველოს მოქალაქე შეიძლება მიღებულ იქნეს ყოველ თანამდებობაზე, თუ კანონის მოთხოვნილებას აკმაყოფილებს (მუხლი 138).  ყოველი მოქალაქე სინდისის სრული თავისუფლებით სარგებლობს და შეუძლია აღიაროს ის სარწმუნოება, რომელიც სურს (მუხლი 31).  მშვიდობიანი შეკრების უფლება  საქართველოს რესპუბლიკის მოქალაქეებს, 1921 წლის კონსტიტუცია უფლებას აძლევს „მთავრობის ნებადაურთველად შეიკრიბნენ საჯაროდ და უიარაღოდ, როგორც ჭერქვეშ, ისე გარეთ“ (მუხლი 33). ასევე, მუშათა გაფიცვას თავისუფლად აცხადებს (მუხლი 38).  გამოხატვის თავისუფლება  მოქალაქეებს უფლება აქვს გამოთქვან თავიანთი შეხედულებები და გაავრცელონ ისინი (მუხლი 32), 1921 წლის კონსტიტუციის უზრუნველყოფილია პირადი და კოლექტიური პეტიციების უფლებაც (მუხლი 37).  პირადი ცხოვრების ხელშეუხელობის უფლება  კერძო მიმოწერა ხელშეუხებელია, მისი გაცნობა მხოლოდ სასამართლო დადგენილებით არის შესაძლებელი (მუხლი 29), აღნიშნულია 1921 წლის კონსტიტუციაში. 28–ე მუხლში საუბარია მოქალაქის ბინის „შეუვალობაზე“, რომლის გაჩხრეკაც, ასევე სასამართლოს დადგენილებით არის ნებადართული. ყოველი მოქალაქე სინდისის სრული თავისუფლებით სარგებლობს და მისი პოლიტიკური თუ სამოქალაქო უფლებათა შეზღუდვა სარწმუნოების ან რწმენის გამო, დაუშვებლად მიიჩნევა 1921 წლის კონსტიტუციით (მუხლი 31).  ნუ დაუჯერებ არასწორ სტერეოტიპებს, თავად გადაამოწმე! რადგან #ესქვეყანაშენია საქართველოს კონსტიტუცია, 1921

„ერთი ადამიანის ხმა, არა მარტო ხშირ შემთხვევაში, არამედ ყოველთვის არის გადამწყვეტი. მართალია, ჩვენ ამ წუთას ერთნი ვართ, მაგრამ რამდენიმეს გაერთიანება მთებს აბრუნებს. ასე იქმნებოდა სახელმწიფოები, ასე იქმნებოდა მშვიდობა, ასე იქმნებოდა კეთილდღეობა ნებისმიერ ქვეყანაში" – მოუსმინეთ ლევან ბუთხუზს.

საქართველოს პირველი რესპუბლიკის მხედარმთავარი – "საქართველო თავისი მოწყობით არის ევროპული და არა აზიური". თავის დროზე იგი რადიო "თავისუფლებამ" ჩაწერა. სწორედ ამ ჩანაწერს ეყრდნობა ანიმირებული ვიდეო. (ტექსტი და ხმა აღებულია რადიო თავისუფლების არქივიდან)

ჭაქვინჯის ციხე–სიმაგრე ზუგდიდიდან ჩრდილო-აღმოსავლეთით მდებარეობს. ის II-III საუკუნეებშია აგებული და XVIII საუკუნემდე მოქმედი იყო. ჯერ კიდევ ელინისტურ ხანაში (323-33წწ. ჩვენს წელთაღრიცხვამდე) ეს ადგილი აბრეშუმის გზას უკავშირდებოდა.  ძეგლი, ბოლო ორ საუკუნეზე მეტი ხნის განმავლობაში მიტოვებული იყო და რთულმა კლიმატურმა პირობებმა მძიმედ დააზიანა. საბჭოთა ტოტალიტარული მმართველობის ხანაში, აქ კირის კარიერი გახსნეს, მიწის მასების გამოტანამ გამოიწვია კლდის რღვევის პროცესი, რამაც დიდი საფრთხე შეუქმნა ძეგლის საძირკველს.  სულ ახლახანს, ევროპა ნოსტრამ და ევროპის საინვესტიციო ბანკის ინსტიტუტმა, ჭაქვინჯის ციხე, 2023 წლის, ევროპის განსაკუთრებული საფრხის ქვეშ მყოფ, 7 ძეგლს შორის დაასახელეს. ევროპა ნოსტრა, ანუ „კულტურული მემკვიდრეობის ხმა ევროპაში“ – კულტურული და ბუნებრივი მემკვიდრეობის დაცვის ევროპული ქსელია. იგი 50–ზე მეტი ქვეყნის 250 საზოგადოებრივ ორგანიზაციას, 150 ასოცირებულ და 1500 ინდივიდუალურ წევრს აერთიანებს. მიზანი – კულტურული და ბუნებრივი მემკვიდრეობის ძეგლების გამოვლენა, დაცვაა. მიზნის მისაღწევად ფართომასშტაბიან კამპანიებს მართავს, საფრთხის ქვეშ მყოფი ძეგლების, შენობა–ნაგებობების გადასარჩენად.  ევროპა ნოსტრას ჯილდო – ევროკავშირის კულტურული მემკვიდრეობის პრიზია, რომელიც ევროკავშირის უმაღლესი შეფასება და აღიარებაა. იგი გაიცემა შემდეგი კატეგორიების მიხედვით: კონსერვაცია–რესტავრაცია, კვლევა, განათლება, საზოგადოების მონაწილეობა და ცნობიერების ამაღლების კამპანიები, „კულტურული მემკვიდრეობის ჩემპიონები“.  ევროპა ნოსტრას საფრთხის ქვეშ მყოფი 7 ძეგლის პროგრამა – ევროპაში განადგურების პირას მყოფი ძეგლების და ლანდშაფტების გადარჩენის კამპანიაა. ძეგლების შერჩევა ხდება მისი კულტურული ფასეულობის და ასევე, არსებული საფრთხის მიხედვით. „ევროპა ნოსტრას ნომინაციებში მოხვედრა არის აღიარება და ძეგლის მნიშვნელობის წარმოჩენა“, აცხადებს „ევროპა ნოსტრას“ წარმომადგენელი საქართველოში, ხელოვნების საერთაშორისო ცენტრის ხელმძღვანელი მაკა დვალიშვილი. მისი ინფორმაციით, ევროპის საინვესტიციო ბანკის ინსტიტუტის ფინანსური მხარდაჭერით, ექსპერტები ადგილზე შეისწავლიან ჭაქვინჯის ციხე–სიმაგრის საჭიროებებს და შეიმუშავებენ რეკომენდაციებს. ამავე დროს ძეგლი მიიღებს გადაუდებელი საჭიროებისთვის, სწრაფი რეაგირების 10 000 ევროს ოდენობით ევროპის საინვესტიციო ბანკის მემკვიდრეობის გრანტს. სულ ახლახანს, ევროკავშირის კულტურის პროექტის მხარდაჭერით, შემუშავდა ზუგდიდის კულტურული განვითარების სტრატეგია, რომელიც ითვალისწინებს ზუგდიდის, როგორც კულტურული მემკვიდრეობის ინოვაციების ქალაქის განვითარებას. ევროპა ნოსტრას ნომინაციებში მოხვედრა და ზუგდიდის სტრატეგია ჭაქვინჯის ციხე–სიმაგრის აღდგენისთვის საჭირო საერთაშორისო გრანტების მოზიდვის ხელსაყრელ გარემოს ქმნის. სხვათა შორის, ევროპის ამ პრესტიჟული კონკურსის, სხვადასხვა ნომინაციების გამარჯვებული, არაერთხელ ყოფილა ქართული კულტურული მემკვიდრეობის მატერიალური, თუ არამატერიალური ძეგლი, პროექტი. ევროპა ნოსტრას ჯილდოების მფლობელი ორგანიზაციები და მათ მიერ განხორციელებული გამარჯვებული პროექტები საქართველოდან: ევროპა ნოსტრას ჯილდოს მფლობელები 2021 წელს ევროპა ნოსტრას ჯილდო მიიღო – ვარძიის კლდეში ნაკვეთი კომპლექსის პროაქტიული კონსერვაციის და მონიტორინგის სისტემის პროექტმა (წარადგინა კულტურული მემკვიდრეობის ეროვნულმა სააგენტომ, იტალიის გარემოს დაცვისა დაკვლევების უმაღლესმა ინსტიტუტმა (ISPRA) და ილიას სახელმწიფო უნივერსიტეტის კულტურული მემკვიდრეობის და გარმოს კვლევის ცენტრთან თანამშრომლობით). 2019 წელს ევროპა ნოსტრას და „სახალხო რჩეული“ ჯილდო მიიღო ციხე–სოფელის მუცოს რეაბილიტაციის პროექტმა (წარადგინა კულტურული მემკვიდრეობის ეროვნულმა სააგენტომ). 2018 წელს სამეცნიერო კვლევით კატეგორიაში ევროპა ნოსტრას ჯილდო მიიღო პროექტმა „ქსოვილი საქართველოდან“ (წარადგინა ხელოვნების სასახლემ). 2017 წელს ტრენინგებისა და საზოგადოების გათვითცნობიერების კატეგორიაში, ევროპა ნოსტრას ჯილდო მიიღო პროექტმა „ტრადიციული რეწვის ინიციატივა საქართველოში“ (წარადგინა ხელოვნების საერთაშორისო ცენტრმა). 2006 წელს ევროპა ნოსტრას ჯილდო მიიღო ტიმოთესუბინის ფრესკების საკონსერვაციო სამუშაოების პროექტმა (წარადგინა ხელოვნების საერთაშორისო ცენტრმა, იტალიის პარტნიორ ორგანიზაციასთან (Conservazione Beni Culturali) ერთად თანამშრომლობით). ევროპა ნოსტრას ჟიურის სპეციალური აღნიშვნა 2018 წელს ცნობიერების ამაღლების კატეგორიაში, ევროპა ნოსტრას ჟიურის სპეციალური ჯილდოს მფლობელი გახდა კომპანია „არტარეას“ პროექტი – „თბილისური ტურები და თბილისური ეზოები“. 2017 წელს კონსერვაცია–რესტავრაციის კატეგორიაში, ევროპა ნოსტრას ჟიურის სპეციალური ჯილდოს მფლობელი გახდა თბილისის განვითარების ფონდის პროექტი – აღმაშენებლის გამზირის ისტორიული შენობების სარეაბილიტაციო სამუშაოები. 2016 წელს, კულტურული მემკვიდრეობის სფეროში გაწეული ღვაწლისთვის, ევროპა ნოსტრას ჟიურის სპეციალური ჯილდოს მფლობელი გახდა საქართველოს ხელოვნების სასახლე. 2015 წელს, კულტურული მემკვიდრეობის სფეროში გაწეული ღვაწლისთვის, ევროპა ნოსტრას ჟიურის სპეციალური ჯილდოს მფლობელი გახდა ხელოვნების საერთაშორისო ცენტრი. განსაკუთრებული საფრთხის ქვეშ მყოფი 7 ძეგლის პროგრამა 2023 წელს, ევროპა ნოსტრას „საფრთხის ქვეშ მყოფი 7 ძეგლის პროგრამის ფინალისტი გახდა ჭაქვინჯის ციხე–სიმაგრე (წარადგინა ხელოვნების საერთაშორისო ცენტრმა, ზუგდიდის მუნიციპალიტეტის მერიასთან თანამშრომლობით). 2021 წელს, ევროპა ნოსტრას „განსაკუთრებული საფრთხის ქვეშ მყოფი 12 ძეგლის ნომინანტი გახდა ციხე–სიმაგრე ნარიყალა (წარადგინა თბილისის განვითარების ფონდმა). 2018 წელს, ევროპა ნოსტრას „განსაკუთრებული საფრთხის ქვეშ მყოფი 12 ძეგლის ნომინანტი გახდა ჭიათურის საბაგირო გზების პროექტი (წარადგინა საქართველოს კულტურისა და ძეგლთა დაცვის სამინისტრომ). 2018 წელს, ევროპა ნოსტრას „საფრთხის ქვეშ მყოფი 7 ძეგლის პროგრამის ფინალისტი გახდა დავით გარეჯის სამონასტრო კომპლექსი (წარადგინა ხელოვნების საერთაშორისო ცენტრმა).

საერთაშორისო რესპუბლიკურმა ინსტიტუტმა (IRI), 25 აპრილს, საზოგადოებრივი აზრის კვლევა გამოაქვეყნა. შედეგების თანახმად, ევროკავშირში გაწევრიანებას საქართველოს მოქალაქეების მტკიცე მხარდაჭერა აქვს. საერთაშორისო რესპუბლიკურმა ინსტიტუტმა მოსახლეობას სთხოვა პოლიტიკური პარტნიორები და საფრთხეები დაესახელებინათ, შედეგები კი ასეთია: ყველაზე მნიშვნელოვან პოლიტიკურ პარტნიორებად 63%-მა ევროკავშირი, 47%-მა აშშ, 27%-მა უკრაინა, 18%-მა თურქეთი, 16%-მა კი აზერბაიჯანი დაასახელა.  ქვეყნისთვის მთავარ პოლიტიკურ საფრთხედ გამოკითხულთა 87%-ი რუსეთს, 8%-8%–ი აშშ-სა და თურქეთს, 4%–ი ირანს, 3%-3%–ი კი სომხეთს, აზერბაიჯანსა და ევროკავშირს მიიჩნევს. რაც შეეხება ეკონომიკურ პარტნიორებსა და საფრთხეებს, ქვეყნისთვის ყველაზე მნიშვნელოვან ეკონომიკურ პარტნიორად გამოკითხულთა 60%–ი ევროკავშირს მიიჩნევს, 43%–ი აშშ-ს, 30%–ი თურქეთს, 22%–ი აზერბაიჯანს, 21%–ი კი – უკრაინას.  ეკონომიკურ საფრთხეებს შორის 76%–ი რუსეთს ასახელებს, 6%–ი თურქეთს, 5%–ი აშშ-ს, 2%-2%–ი კი – ევროკავშირს, უკრაინას, ირანს, ჩინეთს, სომხეთსა და აზერბაიჯანს. გამოკითხვა ასევე ეხებოდა რუსეთთან დიალოგსაც, გამოკითხულთა 34%–ი კატეგორიულად ეწინააღმდეგება, 27%–ი ნაწილობრივ უჭერს მხარს, 26%–ი სრულად, 9%–ი მეტწილად ეწინააღმდეგება, 4%-მა კი – არ იცის ან უარს ამბობს პასუხზე. რესპონდენტების 30% ძალიან ნეგატიურად აფასებს საქართველოს მთავრობის რუსეთთან ურთიერთობების დინამიკას, ძალიან დადებითად კი – მხოლოდ 10%-ი. რას ფიქრობენ საქართველოს მთავრობის საგარეო კურსის შესახებ? გამოკითხულების 17%–ი ამბობს, რომ კურსი პროდასავლურია; 21%-ის მოსაზრებით, უფრო პროდასავლური, ვიდრე პრორუსული; 20%-ის მოსაზრებით, უფრო პრორუსული, ვიდრე პროდასავლური; 25%-ის აზრით კი – პრორუსული. რა დამოკიდებულებაა ევროკავშირში გაწევრიანების მიმართ? გამოკითხულთა 89%–ი სრულად ან მეტწილად ემხრობა; 8%–ი საერთოდ არ ემხრობა, ან მეტწილად არ ემხრობა; 3%-მა კი – არ იცის ან უარს ამბობს პასუხის გაცემაზე. ემხრობა თუ არა მოსახლება ნატოში გაწევრიანებას? ქვეყნის ჩრდილო ატლანტიკურ ალიანსში გაწევრიანება, სრულად, ან მეტწილად რესპონდენტების 80%-ს სურს. 14%–ი საერთოდ, ან მეტწილად არ ემხრობა; 6%-მა კი არ იცის ან უარს ამბობს პასუხზე. საზოგადოებრივი აზრის კვლევა, 2023 წლის 4-23 მარტს, „საერთაშორისო რესპუბლიკური ინსტიტუტის“ დაკვეთით, ბალტიის კვლევების/გელაპის (The Gallup) მიერ ჩატარდა და საქართველოს მასშტაბით (ოკუპირებული რეგიონების გარდა), საარჩევნო უფლების მქონე და შესაბამისი ასაკის 1 500 ადამიანი გამოიკითხა. კვლევის ავტორების განმარტებით, შედეგების საშუალო ცდომილების ზღვარი +/- 2.5%-ია. კვლევა სრულად... 

ჟესტური ენის ალტერნატიული სკოლა მოხალისეობრივი ინიციატივაა, რომელიც ბათუმში 5 წელზე მეტია მუშაობს. მიზანი – სმენის არმქონე ადამიანებთან ურთიერთობის გამარტივებაა. სწავლა განსაკუთრებით ახალგაზრდებსა და მესამე სექტორის წარმომადგენლებს აინტერესებთ, თუმცა საჯარო მოხელეებიც არიან ჩართულნი.  ყველაფერი იმით დაიწყო, რომ ორგანიზაციამ „ცვლილებები თანაბარი უფლებებისთვის“ შეზღუდული შესაძლებლობის მქონე პირებისთვის ადაპტირებული სივრცის შექმნა გადაწყვიტა. ბევრი ფიქრისა და მუშაობის შემდეგ, შეძლეს ბათუმში ერთ–ერთი ცნობილი, სოციალური კაფე – თავისუფალი სივრცე შეექმნათ.  პროექტის იდეის თანაავტორი ნინო ჩხაიძე იხსენებს, რომ სივრცე, სადაც ახლა კაფეა, საწყობად გამოიყენებოდა და მსგავსი ინიციატივა, საწყის ეტაპზე, ამბიციურად ჩანდა.  ორგანიზაციის ყველა თანამშრომელი და მეგობარი ცდილობდა სახსრების მოძიებას. მოხალისეობრივად ჩაერთვნენ – შეღებეს კედლები, მოაწესრიგეს იატაკი, გააკეთეს მაგიდები. მოკლედ, რაც შეეძლოთ საკუთარი ხელით გააკეთეს და მოაწესრიგეს.  ასე, ერთობლივად შექმნეს თავისუფალი სივრცე, რომელიც დღეს, არა მხოლოდ ერთ–ერთი ყველაზე ადაპტირებული გარემოა შეზღუდული შესაძლებლობების მქონე პირებისათვის, არამედ საგანმანათლებლო და შემეცნებითი სივრცეცაა ყველასთვის. ღონისძიებები, დისკუსიები, აზრთა გაზიარება, სიახლეების გაცნობა, საგანმანათლებლო პროგრამები – „თავისუფალი სივრცის“ მთავარი მამოძრავებელი ძალაა.  #გაიზიარეპასუხისმგებლობა, რადგან #ესქვეყანაშენია

სიძულვილის ენა მოიაზრებს გამოხატვის ყველა ფორმას, რომელიც ხელს უწყობს, პროვოცირებას უწევს, ან ამართლებს ქსენოფობიას, რასობრივ შუღლს, ანტისემიტიზმს, შეუწყნარებლობას. სიძულვილის ენა მოიცავს გამონათქვამებს, მტკიცებას, იდეებსა თუ შეხედულებებს, რომლებიც მიმართულია ამა თუ იმ სოციალური ჯგუფის წინააღმდეგ; ასევე ძალადობისკენ მოწოდებას, იქნება ეს ზოგადი ხასიათის, თუ კონკრეტული ადრესატისადმი მიმართული. სიძულვილის ენის ამსახველი ტექსტები ხშირად ეყრდნობა კონსპირაციულ თეორიას, დეზინფორმაციის ხასიათს ატარებს და ამავე დროს, კონტექსტიდან ამოგლეჯილ ერთ ფრაგმენტზე ამახვილებს ყურადღებას. სიძულვილის ენა საშიშია საზოგადოებისთვის, არა მხოლოდ უფლებებისა და თავისუფლებების დარღვევის კუთხით, არამედ საზოგადოებრივი, პოლიტიკური თუ ეკონომიკური ცხოვრებიდან სხვადასხვა ჯგუფის გარიყვის საშიშროების მხრივაც. სიძულვილის ენა საფრთხეს უქმნის საზოგადოების ჰარმონიულ თანაცხოვრებას. რა ფორმით შეიძლება გამოიხატოს სიძულვილის ენა?  ეს შეიძლება იყოს ფოტო, კარიკატურა, მიმი, სიმბოლო, რაიმე დოკუმენტი, ან სტატია, რომელიც ონლაინ ან რეალურ სივრცეშია განთავსებული. იყავი ყურადღებით და ნუ გაავრცელებ სიძულვილის ენის ამსახველ მასალას! #გაიზიარეპასუხისმგებლობა, რადგან #ესქვეყანაშენია