თბილისი. საერთაშორისო გამჭვირვალობა – საქართველომ მიხეილ კუკავას ბლოგპოსტი გამოქვეყნა: „2015 წლის თბილისის ბიუჯეტი: სიახლეები და პრობლემები". „19 დეკემბერს თბილისის საკრებულომ დედაქალაქის 2015 წლის ბიუჯეტი დაამტკიცა. ბიუჯეტის თავდაპირველ ვერსიასთან შედარებით საბოლოო ვერსიაში არაერთი ცვლილება შევიდა, განსაკუთრებით – ჯანმრთელობის და სოციალური უზრუნველყოფის მიმართულებით. 2015 წელს დედაქალაქის შემოსავლები 2014 წელთან შედარებით 47.59 მილიონი ლარით იზრდება (7.2 პროცენტი), ხოლო ხარჯები – 38.15 მილიონი ლარით (5.78 პროცენტი)", ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა – საქართველო უახლოეს მომავალში გამოაქვეყნებს სამართლებრივ ანალიზს მუნიციპალიტეტებში არსებული პრემიების წესის შესახებ. მანამდე ორგანიზაცია ზუგდიდის მუნიციპალიტეტის მიერ ამავე საკითხზე მიღებულ გადაწყვეტილებაზე ინფორმაციას აქვეყნებს. „16 დეკემბერს გამართულ სხდომაზე თვითმმართველი თემი ზუგდიდის მუნიციპალიტეტის საკრებულომ, მთავრობის კანცელარიის ზედამხედველობის სამსახურის დასკვნის საფუძველზე, პრემიების გაცემის მანამდე სამაგალითო წესში ცვლილებები შეიტანა. აღსანიშნავია, რომ ცვლილებას მხარი დაუჭირეს საკრებულოს როგორც უმრავლესობის, ისე – უმცირესობის წარმომადგენელმა წევრებმა. ... ზუგდიდის მუნიციპალიტეტის საკრებულოს მიერ მიღებული საბოლოო გადაწყვეტილება არის კიდევ ერთი ნიშანი იმისა, რომ დეცენტრალიზაციის პროცესი ქვეყანაში ძალიან ნელა მიმდინარეობს, მთავრობა უხეშად ერევა მუნიციპალიტეტების საქმიანობაში, ადგილობრივი თვითმმართველობის ორგანოები კი დამოუკიდებლად ვერ იღებენ გადაწყვეტილებებს თავიანთ ექსკლუზიურ უფლებამოსილებებთან დაკავშირებულ საკითხებზე", ნათქვამია ორგანიზაციის ვებგვერდზე. სრულად... წყარო: transparency.ge

 თბილისი. 19 დეკემბერს ევრაზიის თანამშრომლობის ფონდმა გამართა ახალი პროექტის – თანამშრომლობა ბიუჯეტის გამჭვირვალობისთვის: სახელმწიფო ხარჯების სამოქალაქო მონიტორინგი საქართველოში – პრეზენტაცია. აღნიშნული პროექტი მიზნად ისახავს ქვეყანაში ბიუჯეტის გამჭვირვალობის გაუმჯობესებას და სახელმწიფო სახსრების ხარჯვაზე ანგარიშვალდებულების გაზრდას. ევრაზიის თანამშრომლობის ფონდმა ევროკავშირის მიერ დაფინანსებული პროექტის განხორციელება 2014 წლის 1 ნოემბრიდან დაიწყო. პროექტის ფარგლებში დაგეგმილი ღონისძიებებისა და მოსალოდნელი შედეგების შესახებ ისაუბრეს ევრაზიის თანამშრომლობის ფონდის პრეზიდენტმა, ქალბატონმა ქეთევან ვაშაკიძემ და ფონდის პროგრამის მენეჯერმა, ბატონმა ვიქტორ ბარამიამ. პროექტის მნიშვნელობაზე აგრეთვე ისაუბრა ევროკავშირის დელეგაციის ხელმძღვანელის მოადგილემ, ბატონმა ბორის იაროშევიჩმა. მომხსენებელთა გამოსვლა გაგრძელდა დისკუსიით. წყარო: ორგანიზაციის ვებგვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა შეფასებისა და გამოცდების ეროვნულ ცენტრს მიმართა და გამოითხოვა 2005–2014 წლების ერთიანი ეროვნული გამოცდების შესახებ სტატისტიკური მონაცემები. კერძოდ, დაინტერესებულ მოქალაქეებს საშუალება აქვთ გაეცნონ სტატისტიკურ მონაცემებს ერთიან ეროვნულ გამოცდებზე დარეგისტრირებულ და გამოცხადებულ აბიტურიენტთა რაოდენობას, ერთიანი ეროვნული გამოცდების შედეგად უმაღლეს სასწავლებელში ჩარიცხულ აბიტურიენტთა რაოდენობას, ასევე ერთიან ეროვნულ გამოცდებში მონაწილეობის შედეგად 100 %-იანი, 70 %-იანი, 50 %-იანი და 30 %-იანი სახელმწიფო გრანტის მიმღებ აბიტურიენტთა რაოდენობა და ერთიან ეროვნულ გამოცდებზე დარეგისტრირებულ იმ აბიტურიენტთაგან რაოდენობა, რომლებმაც ვერ გადალახეს მინიმალური კომპეტენციის ზღვარი (ცალ-ცალკე თითოეული საგნის მიხედვით). სრულად... წყარო: idfi.ge

თბილისი. პრევენციის ეროვნული მექანიზმი სასჯელაღსრულების დეპარტამენტის ქუთაისის N2 დაწესებულებაში და სასჯელაღსრულების N3 დაწესებულებაში ვიზიტების შესახებ ანგარიშებს აქვეყნებს. მონიტორინგი დაწესებულებებში 21-24 ოქტომბერს განხორციელდა. ანგარიში სასჯელაღსრულების N2 დაწესებულებაში ვიზიტის შესახებ... ანგარიში სასჯელაღსრულების N3 დაწესებულებაში ვიზიტის შესახებ... წყარო: ombudsman.ge

თბილისი. საერთაშორისო გამჭვირვალობა – საქართველო აქვეყნებს ანა დაბრუნდაშვილის და მამუკა ანდღულაძის ბლოგპოსტს – „შინაგან საქმეთა სამინისტროს თანამშრომელი განათლების სამინისტროში. „საერთაშორისო გამჭვირვალობა – საქართველო კიდევ ერთხელ მოუწოდებს ხელისუფლებას და განსაკუთრებით საქართველოს უმაღლეს საკანონმდებლო ორგანოს შეისწავლოს ამ მანკიერი ინსტიტუტის ლეგიტიმურობის საკითხი, რომელიც სხვადასხვა სახელმწიფო ინსტიტუტების დამოუკიდებლობას ხელყოფს.ამჯერად ... მოგაწვდით ინფორმაციას უშიშროების საკითხებში კიდევ ერთი ოფიცრის შესახებ, რომელიც განათლების სამინისტროში მაღალ თანამდებობას იკავებდა", ნათქვამია ბლოგპოსტში. სრულად... წყარო: transparency.ge

თბილისი. საერთაშორისო გამჭვირვალობა საქართველო აქვეყნებს ბლოგს: „საკანონმდებლო ნორმების გადავადება მთავრობის არაეფექტურ ფუნქციონირებაზე მიუთითებს". „წინა კვირას პარლამენტმა გამარტივებული წესით (ერთი მოსმენით) მიიღო მთავრობისა და პარლამენტის წევრების საკანონმდებლო ინიციატივები, რომლებიც 2015 წლიდან ასამოქმედებელი რიგი საკანონმდებლო ნორმების ერთი წლით გადავადებას გულისხმობს. როგორც ჩანს, ხელისუფლების მხრიდან გრძელდება მნიშვნელოვანი ცვლილებების ამოქმედების გადადების პრაქტიკა, რაც, გარკვეულწილად, მის არაეფექტურ მუშაობაზე მიუთითებს. აღსანიშნავია", ნათქვამია ბლოგში. მასში საუბარი იმ კონკრეტულ ცვლილებებზე, რომლებიც 2015 წლის 1 იანვრიდან უნდა შესულიყო ძალაში. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტმა პუბლიკაცია სათაურით „სრულყოფილი სტატისტიკური ინფორმაცია პატიმართა წამების შემთხვევების გამოძიების შესახებ კვლავ უცნობია". ინსტიტუტმა ამ ინფორმაციის მოპოვებისა და საზოგადოებისთვის გაცნობის მიზნით მიმართა საქართველოს მთავარ პროკურატურას, სასჯელაღსრულებისა და პრობაციის სამინისტროს და მოითხოვა ინფორმაცია. „...აღსანიშნავია, რომ საქართველოს პროკურატურამ, ისვე როგორც სასჯელაღსრულებისა და პრობაციის სამინისტრომ მოთხოვნილი ინფორმაცია სამწუხაროდ მოგვაწოდა არასრულყოფილი სახით. კერძოდ არა იმ პერიოდისთვის და არა იმ სახით როგორც ამას ინსტიტუტი ითხოვდა...", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. კორუფციასთან ბრძოლის საერთაშორისო დღესთან დაკავშირებით, 3-დან 9 დეკემბრის ჩათვლით, „საერთაშორისო გამჭვირვალობა – საქართველომ" მოაწყო ანტიკორუფციული კვირეული. კვირეულის რომლის ფარგლებშიც გაიმართა ორგანიზაციის ახალი ანგარიშების პრეზენტაციები და დისკუსიები. კვირეულის მიზანი იყო ორგანიზაციის მიგნებების საფუძველზე შემუშავებული კონკრეტული რეკომენდაციების წარმოდგენა სახელმწიფო ინსტიტუტების ანგარიშვალდებულების გაზრდისა და ქვეყნის ანტიკორუფციული პოლიტიკის დასახვეწად. წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველომ" 2015 წლის სახელმწიფო ბიუჯეტის პროექტის ანალიზი და რეკომენდაციები გამოაქვეყნა. „მიმოხილვაში ვაანალიზებთ წარმოდგენილი პროექტის პრიორიტეტებს, დაგეგმილ შემოსავლებსა და ხარჯებს.  ანალიზში წამოწეულია ყურადსაღები პრობლემები, მათ შორის ის, თუ რა გაკვეთილს სთავაზობს მთავრობას 10 თვის მდგომარეობით 2014 წლის სახელმწიფო ბიუჯეტის შესრულებისას გამოვლენილი სერიოზული პრობლემები როგორც შემოსავლების, ისე ხარჯების ნაწილში", ნათქვამია ორგანიზაციის გვერდზე. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ორგანიზებით კონფერენცია – „საქართველოს ანტიკორუფციული პოლიტიკის გამოწვევები" – გაიმართა. ღონისძიებაზე ორგანიზაციამ ქვეყნის ეროვნული ანტიკორუფციული სისტემის ზოგად მიმოხილვა წარმოადგინა და საქართველოს ანტიკორუფციული პოლიტიკის მიღწევებსა და სისუსტეებზე გაამახვილა ყურადღება. სრულად... წყარო: transparency.ge

თბილისი. საერთაშორისო გამჭვირვალობა – საქართველო აქვეყნებს ბლოგს: „ადგილობრივ თვითმმართველობებში საჯარო მოსამსახურეთა რაოდენობის ზრდა საშუალოდ 17 მილიონი ლარით გაზრდის საბიუჯეტო ხარჯებს". მასში ნათქვამია, რომ „ადგილობრივი თვითმმართველობის კოდექსში" 28 ნოემბერს შესული ცვლილებებით, შეიცვალა ფორმულა, რომელიც თვითმმართველ საჯარო უწყებებში ასაყვან თანამშრომელთა მაქსიმალურ რაოდენობას ადგენდა. „ძველი ფორმულით, ადგილობრივ თვითმმართველობებში 10 157 საშტატო ერთეული იყო განსაზღვრული, ახლით კი – 12 573. ცვლილებების შედეგადად, მთელი ქვეყნის მასშტაბით ადგილობრივი თვითმმართველობის ერთეულების საჯარო მოხელეთა მაქსიმალური საშტატო რაოდენობა 2 416-ით (24%) გაიზარდა…კანონპროექტის... განმარტებით ბარათში ცვლილების მიღების მიზეზად მიუთითებს შემდეგს: „შენარჩუნდეს მუნიციპალიტეტების მოსამსახურეთა არსებული შტატების რაოდენობა თითქმის ყველა მუნიციპალიტეტში, თუმცა შეიზღუდოს მისი გაზრდის შესაძლებლობა". ჩვენ მიერ გაკეთებული გამოთვლებით, მხოლოდ ქუთაისსა და ხელვაჩაურის მუნიციპალიტეტში შემცირდა ეს ზღვარი, ყველა დანარჩენ შემთხვევაში კი ზღვარი იზრდება”, ნათქვამია ორგანიზაციის პუბლიკაციაში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციამ კორუფციასთან ბრძოლის საერთაშორისო დღესთან დაკავშირებით განცხადება გაავრცელა. „ბოლო 10 წლის განმავლობაში საქართველოში არაერთი მნიშვნელოვანი ანტიკორუფციული ხასიათის რეფორმა იქნა გატარებული, რომელმაც ძირეულად შეცვალა  მძიმე კორუფციული მდგომარეობა საქართველოში და არსებითად შეამცირა მისი მასშტაბები. ... თუმცა, წარმატებების პარალელურად კვლავაც რჩება არაერთი გამოწვევა, რომელსაც სათანადო ყურადღება უნდა დაუთმოს ხელისფლებამ". სრულად... წყარო: gyla.ge

თბილისი. „საერთაშორისო გამჭვირვალობა - საქართველომ" აზარტული თამაშების ბაზრის შესახებ კვლევის ანგარიში გამოაქვეყნა. ანგარიშში მიმოხილულია სფეროს მარეგულირებელი ქართული კანონმდებლობა და წარმოდგენილია ბაზრის ძირითადი მახასიათებლები: სტატისტიკური მონაცემები, ძირითადი მოთამაშეები და მათი მფლობელების შესახებ საინტერესო ინფორმაცია. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ" საერთო სასამართლოთა სისტემაში მოქმედი 168 მოსამართლის განათლება, სამუშაო გამოცდილება და მათი ქონებრივი დეკლარაცია შეისწავლა. ორგანიზაციამ შეისწავლა ინფორმაცია საქართველოს უზენაესი სასამართლოს, თბილისისა და ქუთაისის სააპელაციო სასამართლოს, თბილისის, ბათუმისა და ქუთაისის საქალაქო სასამართლოების მოსამართლეთა შესახებ. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ" ბლოგ-პოსტი - „800 000 ლარზე მეტი მთავრობის რეკლამირებისათვის" - გამოაქვეყნა. ორგანიზაციამ „საჯარო ინფორმაციის გამოთხოვის შედეგად დაადგინა, რომ საქართველოს მთავრობის ორი წლის საქმიანობის ანგარიშის „ცვლილებების ორი წელი" საინფორმაციო და სარეკლამო მომსახურება დაახლოებით 830,000 ლარი დაჯდა. ამ მიზნებისთვის მთავრობის სარეზერვო ფონდიდან თანხები ორჯერ გამოიყო", ნათქვამია ბლოგ პოსტში. სრულად... წყარო: transparency.ge

თბილისი. 4 დეკემბერს, „სამართლიანი არჩევნებისა და დემოკრატიის საერთაშორისო საზოგადოებამ" 2014 წლის ადგილობრივი თვითმმართველობის ორგანოების საქმიანობის მონიტორინგის პირველი შუალედური ანგარიში გამოაქვეყნა. ორგანიზაცია ადგილობრივი თვითმმართველი ორგანოების მონიტორინგს საქართველოს ყველა თვითმმართველ თემსა და ქალაქში 73 დამკვირვებლის მეშვეობით ახორციელებს. სრულად... წყარო: www.isfed.ge

თბილისი. 4 დეკემბერს სასტუმრო „ქორთიარდ მარიოტში" საქართველოს ახალგაზრდა იურისტთა ასოციაციამ და საერთაშორისო გამჭვირვალობა – საქართველომ სისხლის სამართლისა და ადმინისტრაციულ საქმეთა სასამართლო მონიტორინგის სამი წლის შედეგების პრეზენტაცია გამართეს. სრულად... წყარო: gyla.ge

„ფრიდომ ჰაუსმა" (Freedom House) გამოაქვეყნა ინტერნეტის თავისუფლების 2014 წლის გლობალურ ანგარიში, რომელშიც ასახულია ერთი წლის მანძილზე რა მდგომარეობაა მსოფლიოს 65 ქვეყანაში. ანგარიშში ასახულია საქართველოში ინტერნეტის თავისუფლების ხარისხიც. ანგარიში (ინგ)... წყარო: freedomhouse.org

„საერთაშორისო გამჭვირვალობის” სამდივნომ კორუფციის აღქმის ინდექსი (CPI) გამოაქვეყნა. დოკუმენტის მიხედვით, საქართველო 100 შესაძლებლიდან 52 ქულით 50-ე ადგილზეა 175 ქვეყანას შორის. „შედეგები იმაზე მეტყველებს, რომ საქართველოში კორუფციის აღქმის დონე ბოლო სამი წლის მანძილზე სტაბილურია და ამ პერიოდში მნიშვნელოვანი პროგრესი ან უკუსვლა არ მომხდარა", ნათქვამია საერთაშორისო გამჭვირვალობა - საქართველოს გვერდზე. სრულად... წყარო: transparency.ge

თბილისი. ორგანიზაციამ „ახალგაზრდა ადვოკატებმა" საყდრისი-ყაჩაღიანის ძეგლის სამართლებრივი სტატუსის შესახებ მომზადებული კვლევა და სარეკომენდაციო წინადადებები წარუდგინეს საზოგადოებას. კვლევას ორგანიზაცია ორი თვის მანძილზე ახორციელებდა და მასში ახალგაზრდა ადვოკატების სამართლის ჯგუფი მონაწილეობდა. სრულად... წყარო: barristers.ge

თბილისი. ინფორმაციის თავისუფლების განვითარების ინსტიტუტმა 2013 ნოემბერი-2014 ნოემბერში თბილისის საკრებულოში გაცემული პრემიების შესახებ ინფორმაცია გამოაქვეყნა. „.... როგორც თბილისის საკრებულოდან მიღებული უახლესი მონაცემებიდან ირკვევა, 2013 წლის ნოემბრის თვის შემდგომ არამცთუ შემცირდა, არამედ თვითმმართველობის არჩევნების მოახლოებასთან და მაშინდელი მოქმედი საკრებულოს წევრების უფლებამოსილების მოახლოებულ შეწყვეტასთან ერთად მნიშვნელოვნად გაიზარდა საკრებულოში ყოველთვიურად გაცემული პრემიების ოდენობა...", ნათქვამია ორგანიზაციის ვებ-გვერდზე. ორგანიზაცია იმედს გამოთქვამს, რომ „ქალაქ თბილისის საკრებულოს ახალი შემადგენლობა უფრო მეტად იქნება ორიენტირებული ქალაქისა და მისი მოსახლეობის წინაშე მდგარი რეალური პრობლემების მოგვარებაზე ვიდრე საკუთარი ფინანსური კეთილდღეობის საბიუჯეტო სახსრების ხარჯზე გაუმჯობესებაზე". სრულად... წყარო: idfi.ge