თბილისი. სამართლიანმა არჩევნებმა, ორგანიზაციის ვებგვერდზე სოციალურ ქსელში განათავსა ინფოგრაფიკები და ვიდეო რგოლები საარჩევნო თემაზე ერთი სათაურით: „საარჩევნო რეფორმა ვერ მოიცდის 2020 წლამდე". ყოველ გრაფიკს თუ ვიდეორგოლს ახლავს განმარტება თუ რატომ არის საჭირო ცვლილება ახლა. სრულად... წყარო: ორგანიზაციის ვებგვერდი სოციალურ ქსელში

თბილისი. არასამთავრობო ორგანიზაციებმა ერთობლივი განცხადება გაავრცელეს საარჩევნო სისტემის რეფორმის საკითხზე მმართველი კოალიციის პოზიციის შესახებ. განცხადებაში ნათქვამია, რომ „5 ივნისს ხელისუფლებაში მყოფმა კოალიციამ „ქართული ოცნება" საზოგადოებას საკუთარი გადაწყვეტილება გააცნო, რომლის მიხედვითაც, 2016 წელს საპარლამენტო არჩევნები კვლავ დღეს მოქმედი შერეული საარჩევნო სისტემით ჩატარდება, თუმცა გარკვეული ცვლილებებით, კერძოდ: მაჟორიტარული სისტემით დეპუტატების არჩევისთვის 50% ბარიერი დაწესდება. აგრეთვე, ამომრჩეველთა ხმების თანასწორობის პრინციპის დასაცავად და მიმდინარე წელს მიღებული საკონსტიტუციო სასამართლოს გადაწყვეტილების შესასრულებლად, მაჟორიტარული ოლქების საზღვრები შეიცვლება. რაც შეეხება საარჩევნო სისტემის შემდგომ რეფორმას, ხელისუფლების განცხადებით, 2020 წლის საპარლამენტო არჩევნებისთვის გაუქმდება მაჟორიტარული სისტემა და არჩევნები პროპორციული წესით ჩატარდება. ვფიქრობთ, რომ წარმოდგენილი ცვლილებები, მხოლოდ ნაწილობრივ ეხმიანება იმ პრობლემებს, რომელიც მოქმედ საარჩევნო სისტემას ახასიათებს და იგი კომპლექსურად ვერ უზრუნველყოფს საქართველოში კონკურენტუნარიანი და თანაბარი საარჩევნო გარემოს შექმნას", ნათქვამია განცხადებაში. სრულად... წყარო: gyla.ge

თბილისი. 4 ივნისს, ადგილობრივმა სადამკვირვებლო ორგანიზაციებმა პრესკონფერენცია გამართეს, სადაც ადგილობრივმა სადამკვირვებლო ცხრა ორგანიზაციამ ერთობლივი განცხადება გაავრცელა. „28 მაისს, საქართველოს საკონსტიტუციო სასამართლომ არაკონსტიტუციურად სცნო დღეს მოქმედ საარჩევნო სისტემაში მაჟორიტარულ ოლქებად დაყოფის არსებული წესი, რითაც დარღვეულია ამომრჩევლის ხმის თანაბრობის პრინციპი. ...დღეს მოქმედი საარჩევნო სისტემა წლებია წარმოადგენს კრიტიკის საგანს ადგილობრივი/საერთაშორისო სადამკვირვებლო ორგანიზაციებისა და პოლიტიკური პარტიების მხრიდან, ვინაიდან, ის ვერ უზრუნველყოფს მნიშვნელოვანი საერთაშორისო სტანდარტების აღსრულებას: ამომრჩეველთა ნების პროპორციულად ასახვას მანდატებში, არ არის დაცული ერთი ხმის თანაბრობის პრინციპი"... ვინაიდან საპარლამენტო არჩევნებამდე ძირეული რეფორმის დაგეგმა–განხორციელებამდე მცირე დრო რჩება, ორგანიზაციები მოუწოდებენ ხელისუფლებას „...უმოკლეს დროში, შექმნას სამუშაო ჯგუფი ყველა დაინტერესებული მხარის მონაწილეობით, რათა მიღწეული იქნას კონსენსუსი საარჩევნო სისტემის გასაუმჯობესებლად". ასევე მოუწოდებენ საკონსტიტუციო კომისიას „დაუყოვნებლივ დანიშნოს სხდომა საარჩევნო სისტემის საკითხის ძირეული განხილვის მიზნით". სრულად... წყარო: განვითარებისა და დემოკრატიის ცენტრის ვებ-გვერდი სოციალურ ქსელში

თბილისი. 30 მაისს, არასამთავრობო რვა ორგანიზაციასა და 14 პარტიის წარმომადგენლებმა, პრეზიდენტის ინიციატივით გამართულ კონფერენციაზე, ქვეყნის საარჩევნო სისტემის რეფორმირების საკითხზე დოკუმენტი გააფორმეს. „აღნიშნულ დოკუმენტში ასახულია ერთიანი ხედვა, რომელიც მაჟორიტარული საარჩევნო სისტემის, პროპორციული საარჩევნო სისტემით შეცვლას გულისხმობს", ნათქვამია საიას ვებგვერდზე. ხელმომწერი არასამთავრობო ორგანიზაციები და პოლიტიკური პარტიები ამ წინადადებით ქვეყნის კანონმდებლებს მიმართავენ. სრულად... წყარო: gyla.ge

სამეგრელო. სამართლიანი არჩევნები სენაკისა და ზუგდიდის რამდენიმე ოლქში მიმდინარე საკრებულოს შუალედურ არჩევნებს აკვირდებოდა. ორგანიზაციამ შედეგების შესახებ ინფოგრაფიკა გაავრცელა. სრულად... ორგანიზაციის ვებგვერდი სოციალურ ქსელში

სამეგრელო. საიას დამკვირვებლები ადგილობრივი თვითმმართველობის წარმომადგენლობითი ორგანოს - საკრებულოს 2014 წლის 15 ივნისის არჩევნების მაჟორიტარული საარჩევნო სისტემით მიმდინარე შუალედურ არჩევნებს სენაკის #64 ოლქსა და ზუგდიდის #67 ოლქში დააკვირდნენ. „მიუხედავად გარკვეული პროცედურული დარღვევებისა, კენჭისყრის პროცესი ძირითადად მშვიდ ვითარებაში მიმდინარეობდა". სრულად... წყარო: gyla.ge

აჭარა. 28 მაისს საქართველოს საკონსტიტუციო სასამართლოს პირველმა კოლეგიამ დააკმაყოფილა სარჩელი – „საქართველოს მოქალაქეები უჩა ნანუაშვილი და მიხეილ შარაშიძე საქართველოს პარლამენტის წინააღმდეგ". სასამართლომ არაკონსტიტუციურად ცნო საქართველოს საარჩევნო კოდექსის ის ნორმები, რომლებიც ადგენდა 73 ერთმანდატიანი მაჟორიტარული საარჩევნო ოლქის განსაზღვრის წესს: „ერთხელ და სამუდამოდ ალბათ ქვეყანაში უნდა შეიქმნას საარჩევნო სისტემა, რომელიც იქნება მაქსიმალურად სამართლიანი და ობიექტური და მე ვფიქრობ, ეს გადაწყვეტილება ამ მხრივ შეასრულებს კატალიზატორის ფუნქციას" – განაცხადა სახალხო დამცველმა. სრულად... წყარო: www.ombudsman.ge

თბილისი. სამართლიანმა არჩევნებმა სოციალურ ქსელში განათავსა საინფორმაციო ვიდეო–რგოლი: „მაჟორიტარული სისტემა ვერ ასახავს ამომრჩეველთა უმრავლესობის ნებას". წყარო: ორგანიზაციის ვებგვერდი სოციალურ ქსელში

თბილისი. საერთაშორისო გამჭვირვალობა – საქართველომ საარჩევნო თემატიკაზე ვიდეორგოლი განათავსა სოციალურ ქსელში – „რა წონა აქვს ამომრჩევლის ხმას?". სრულად... წყარო: ორგანიზაციის ვებგვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაცია 2015 წლის 31 მაისს ზუგდიდსა და სენაკის ოლქებში ადგილობრივი თვითმმარათველობის არჩევნებს დააკვირდება. საიას სადამკვირვებლო მისია მოიცავს, როგორც წინასაარჩევნო კამპანიის, ასევე კენჭისყრის დღისა და შედეგების შეჯამების მონიტორინგს. ადგილობრივი თვითმმართველობის წარმომადგენლობითი ორგანოს შუალედური არჩევნები სენაკის (ფოცხოს) და ზუგდიდის (ერგეტის) ადგილობრივ მაჟორიტარულ საარჩევნო ოლქებში გაიმართება. წყარო: gyla.ge

თბილისი. საარჩევნო სისტემის რეფორმირებაზე მომუშავე ინტერპარტიული ჯგუფი საქართველოს პარლამენტის თავმჯდომარეს დავით უსუფაშვილს შეხვდა. განვითარებისა და დემოკრატიის ცენტრის ინფორმაციით განიხილეს სამოქალაქო თანხმობის მემორანდუმი საარჩევნო გარემოს შესაცვლელად. მემორანდუმის შემუშავებაში მონაწილეობდნენ საარჩევნო საკითხებზე მომუშავე არასამთავრობო ორგანიზაციების წარმომადგენლები, ასევე პოლიტიკური პარტიების წარმომადგენლები და დამოუკიდებელი ექსპერტები. წყარო: განვითარებისა და დემოკრატიის ცენტრი

თბილისი. საქართველოს ახალგაზრდა კონსტიტუციონალისტთა ასოციაცია განცხადებას ავრცელებს. სადაც იგი ადგილობრივი თვითმმართველობის ორგანოების არჩევნებში პასიური საარჩევნო უფლებით მონაწილეობისათვის დადგენილ ბინადრობის ცენზს არაკონსტიტუციურად მიიჩნევს. სრულად... წყარო: ორგანიზაციის ვებგვერდი სოციალურ ქსელში

თბილისი. ინტერნიუს საქართველომ პროექტის „ინფორმირებული ამომრჩევლის" ფარგლებში მოამზადა დოკუმენტური ფილმი, რომელშიც საუბარია მედიის როლზე არჩევნების პერიოდში და საზოგადოებრივი აზრის ფორმირების პროცესში მის ზემოქმედებაზე – რამდენად ობიექტურ და დაბალანსებულ ინფორმაციას აწვდიან მედიასაშუალებები ამომრჩევლებს წინასაარჩევნო კამპანიის გაშუქებისას, რამდენად მიუკერძოებელია მედია. პროექტი „ინფორმირებული ამომრჩეველი", რომელიც მიზნად ისახავს სამოქალაქო თვითშეგნების ამაღლებას, სხვადასხვა ასაკის ამომრჩევლის ინფორმირებას საარჩევნო უფლებების და მოვალეობების შესახებ, რაც თავის მხრივ, ითვალისწინებს არჩევნებში მოქალაქეთა ჩართულობის ზრდის ხელშეწყობას. სრულად... წყარო: www.media.ge

თბილისი. ადამიანის უფლებათა სახლში, 24 თებერვალს, კოალიციის ფარგლებში ჩატარდა შეხვედრა არასამთავრობო ორგანიზაციის წევრებსა და პოლიტიკური პარტიების წარმომადგენლებს შორის. შეხვედრაზე საქართველოში საარჩევნო გარემოს გაუმჯობესებისა და საკანონმდებლო ბაზის საერთაშორისო სტანდარტებთან სრული ჰარმონიზაციის საკითხებზე ისაუბრეს. შეგახსენებთ, რომ აღნიშნული კოალიცია 10 არასამთავრობო ორგანიზაციას აერთიანებს. წყარო: კონსტიტუციის 42–ე მუხლის ვებგვერდი სოციალურ ქსელში

თბილისი. „ინტერნიუსი-საქართველომ" დაიწყო რეგიონალური ტოქშოუების ციკლი „ინფორმირებული ამომრჩეველი", რომელიც მიზნად ისახავს სხვადასხვა ასაკის ამომრჩევლის ინფორმირებას საარჩევნო უფლებების და მოვალეობების შესახებ, რაც თავის მხრივ, ითვალისწინებს არჩევნებში მოქალაქეთა ჩართულობის ზრდის ხელშეწყობას. პირველი თოქშოუ გაიმართა გორში, 12 თებერვალს. „ინფორმირებული ამომრჩეველი" ტელეკოპმანია „თრიალეთის" პირდაპირ ეთერში საღამოს 19:00 საათზე გავიდა, თემა- არჩევნების დროს მედიის როლი მნიშვნელობა. გადაცემაში ისაუბრეს საარჩევნო საკითხებზე, ობიექტური, მიუკერძოებელი და დაბალანსებული ინფორმაციის მიწოდების მნიშვნელობაზე. გადაცემაში მოწვეულნი იყვნენ ადგილობრივი სადამკვირვებლო და არასამთავრობო ორგანიზაციის თანამშრომლები, სამოქალაქო საზოგადოების წარმომადგენლები და ჟურნალისტები, რომლებიც აქტიურად არიან ჩართულები საარჩევნო პროცესებში. მოწვეულმა სტუმრებმა გამართეს დისკუსია თემის ირგვლივ, ისაუბრეს არსებულ პრობლემებზე და მათ მოგვარების გზებზე. „ინტერნიუსი - საქართველოს" პროექტი ითვალისწინებს სატელევიზიო, საგანმანათლებლო თოქშოუების მოწყობას კიდევ 6 რეგიონალურ ტელემაუწყებელში. პროექტი „მედია და ინფორმირებული ამომრჩეველი" დაფინანსებულია საარჩევნო სისტემების განვითარების, რეფორმებისა და სწავლების ცენტრის მიერ. სრულად... წყარო: media.ge

თბილისი. 21 იანვარს სამართლიანი არჩევნებისა და დემოკრატიის საერთაშორისო საზოგადოების და საქართველოს ახალგაზრდა იურისტთა ასოციაცის კონსტიტუციურ სარჩელზე საკონსტიტუციო სასამართლოში არსებითი განხილვა გაიმართება. „მოსარჩელეები ითხოვენ, უზენაესმა სასამართლომ არაკონსტიტუციურად ცნოს საარჩევნო კოდექსის ის ნორმები, რომლებიც მხოლოდ პარტიას/საარჩევნო ბლოკს აძლევს უფლებას, წარადგინონ მერობის და გამგებლობის კანდიდატები. დამოუკიდებელ კანდიდატებს ერთმევა შესაძლებლობა ისარგებლონ პასიური საარჩევნო უფლებით, რაც წინააღმდეგობაში მოდის, კონსტიტუციის 28-ე და 29-ე მუხლებთან", ნათქვამია სამართლიანი არჩევნების ვებგვერდზე. სრულად... წყარო: isfed.ge

თბილისი. სამართლიანი არჩევნები, საქართველოს ახალგაზრდა იურისტთა ასოციაცია და საერთაშორისო გამჭვირვალობა-საქართველო საარჩევნო სისტემასთან დაკავშირებით შემუშავებულ რეკომენდაციებს აქვეყნებენ. ორგანიზაციები მოუწოდებენ ხელისუფლებას „უმოკლეს ვადებში დაიწყოს რეგიონალურ პროპორციული სისტემის განხილვა, რომელიც ყველაზე მეტად პასუხობს არსებულ გამოწვევებს". რეკომენდაციები... წყარო: www.isfed.ge

თბილისი. საზოგადოებრივი ორგანიზაცია „სამართლიანი არჩევნები" მიმართვას ავრცელებს და ხელისუფლებას მოუწოდებს უმოკლეს ვადებში დაიწყოს საარჩევნო სისტემის შესაცვლელად მუშაობა. ორგანიზაცია მიიჩნევს, რომ მომავალი საპარლამენტო არჩევნების ჭრილში პრიორიტეტულ საკითხს არსებული საარჩევნო სისტემის შეცვლა წარმოადგენს, კერძოდ, „უნდა მოხდეს ისეთი სისტემის დამკვიდრება, რომელიც უზრუნველყოფს სამართლიანი არჩევნების ჩატარებას, ამომრჩეველთა ნების პროპორციულად გარდასახვას მანდატებში, დაკარგული ხმების მინიმუმამდე შემცირებას და ხმის წონის თანაბრობის პრინციპის დაცვას", ნათქვამია ორგანიზაციის ვებგვერდზე. სრულად... წყარო: isfed.ge

იმერეთი. 19 დეკემბერს, საქართველოს ახალგაზრდა იურისტთა ასოციაციის ქუთაისის ფილიალმა ადამიანის უფლებათა დაცვის კვირეულის ფარგლებში ანგარიშის პრეზენტაცია გამართა. დოკუმენტი მოიცავს ინფორმაციას 2014 წლის ადგილობრივი თვითმმართველობის არჩევნების წინასაარჩევნო გარემოს, არჩევნების დღისა და არჩევნების შემდგომი პერიოდის მონიტორინგის შესახებ. წყარო: ორგანიზაციის გვერდი სოციალურ ქსელში

კახეთი. 12 დეკემბერს, წნორში, სამოქალაქო ინიციატივის ოფისში გაიმართა ტრენინგი ქალთა პოლიტიკური მონაწილეობის თემაზე. ტრენინგის ფორმატში მონაწილეებმა მიიღეს პრაქტიკული გამოცდილება სამოქალაქო აქტივიზმის და ამ პროცესში სოციალური მედიის სხვადასხვა ფორმების გამოყენების შესაძლებლობების შესახებ. ასევე გაიმართა მრგვალი მაგიდა საარჩევნო პროცესში ქალთა ჩართულობის თემაზე. შეხვედრაზე განიხილეს გამოკითხვის შედეგები, რომელიც პოლიტიკური პარტიების საარჩევნო პროგრამებში ქალთა საჭიროებების სრულფასოვნად ასახვის მიზნით სიღნაღში თანამშრომლობის ქსელის წევრმა ჩაატარა. წყარო: ორგანიზაციის გვერდი სოციალურ ქსელში

თბილისი. „საქართველოს ახალგაზრდა კონსტიტუციონალისტთა ასოციაციის" წარმომადგენლებმა შეხვედრა გამართეს საქართველოს ცენტრალურ საარჩევნო კომისიაში მსჯავრდებულის საარჩევნო უფლებასთან დაკავშირებით. ორგანიზაციის წარმომადგენლებმა შეხვედრის მონაწილეებს გააცნეს ინიციატივა, რომელიც გულისხმობს სასჯელაღსრულების დაწესებულებაში მყოფი პირებისათვის აქტიური საარჩევნო უფლების ჩამორთმევას არა დანაშაულის სიმძიმის, არამედ დანაშაულის კატეგორიისა და ინდივიდუალური გარემოებების გათვალისწინებით სასამართლოს გადაწყვეტილებით. სრულად... წყარო: gyca.ge

სამცხე–ჯავახეთი. საარჩევნო გარემო და 2014 წლის ადგილობრივი თვითმმართველობის არჩევნების დროს დაფიქსირებული ხარვეზები –  ახალციხის დემოკრატიული ჩართულობის ცენტრში  ცენტრალური საარჩევნო კომისიის თანამშრომლებსა და ადგილობრიც არასამთავრობო ორგანიზაციებს შორის შეხვედრა გაიმართა. ცსკ–ოს  თანამშრომლები  ადგილობრივ არასამთავრობო ორგანიზაციებისა და მედიის წარმომადგენლებს მათ მიერ განხორციელებულ პროგრამებზე ესაუბრნენ საარჩევნო გარემოს გაუმჯობესებისა და რესურსების სწორად გამოყენების მიზნით  ცენტრალური საარჩევნო კომისიის წარმომადგენლებმა აუდიტორიისგან კონკრეტული რეკომენდაციებიც მოისმინეს. ცსკ–ოს თანამშრომელთა განმარტებით, აღნიშნული რეკომენდაციები მომავალი საპარლამენტო არჩევნებისთვის გათვალისწინებული იქნება.