სიახლეები
თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) თბილისის სახელმწიფო უნივერსიტეტში, 18 მაისს ჩატარებული სტუდენტური თვითმმართველობის არჩევნებს აკვირდებოდა.
„არჩევნები მშვიდ ვითარებაში წარიმართა. დაცული იქნა ხმის მიცემის ფარულობის პრინციპი. თუმცა, დამკვირვებელთა ინფორმაციის საფუძველზე დაფიქსირდა სხვადასხვა დარღვევა, რაც, უმრავლეს შემთხვევაში, განპირობებული იყო ქვედა დონის საარჩევნო ადმინისტრაციების არასათანადო კვალიფიკაციით" – ნათქვამია ორგანიზაციის მიერ გამოქვეყნებულ განცხადებაში.
განცხადება სრულად
წყარო – www.isfed.ge
იმერეთი. კამპანიის – ,,ეს შენ გეხება" – ფარგლებში, „სამართლიანი არჩევნებისა და დემოკრატიის საერთაშორისო საზოგადოება" (ISFED) ქუთაისის პოლიტიკური პარტიების, საზოგადოებრივი ორგანიზაციების, ასევე ადგილობრივი მედიის წარმომადგენლებს შეხვდა. ორგანიზატორებმა დამსწრე საზოგადოებას, კამპანიის ფარგლებში, მომზადებული ინიციატივები და წინასაარჩევნო მონიტორინგის შედეგები გააცნეს. შეხვედრაზე პოლიტიკურ პარტიებსა და საზოგადოებრივ ორგანიზაციებს შორის მსჯელობა გაიმართა შემდეგ საკითხებზე – წინასაარჩევნო გარემო, სახელმწიფოს მიერ დახარჯული თანხები 2012 წელს, კონტროლის პალატის უფლებამოსილება, საკონსტიტუციო ცვლილებები.
რაც შეეხება მონიტორინგს, იგი მოიცავს 2012 წლის 1 იანვრიდან 20 მარტამდე პერიოდს და სამი მიმართულებით ჩატარდა: საბიუჯეტო პროცესები, საქართველოს ბიუჯეტი და კონკრეტული ქალაქების ბიუჯეტი, პოლიტიკური ნიშნით ზეწოლის ფაქტები.
მონიტორინგი ჩატარდა 4 ქალაქში: თბილისში, ქუთაისში, ბათუმსა და გორში.
გურია. საქართველოს ახალგაზრდა იურისტთა ასოციაციისა და სამართლიანი არჩევნების მიერ მოეწყო მრგვალი მაგიდა. შეხვედრის მიზანი იყო საარჩევნო კოდექსში შესული ცვლილებების და საქართველოს კონსტიტუციაში მოსალოდნელი ცვლილებების განხილვა და საზოგადოების მოსაზრებების მოსმენა. დემოკრატიული ჩართულობის ცენტრში გამართულ შეხვედრას ესწრებოდნენ პოლიტიკური პარტიების, მედიის და საზოგადოებრივი ორგანიზაციების წარმომადგენლები.
თბილისი. კამპანიის „ეს შენ გეხება" მონაწილეებმა პარლამენტს ცვლილებათა ახალი პაკეტი შესთავაზეს, რომელსაც ხელს 35 საზოგადოებრივი და მედია ორგანიზაცია აწერს. აღნიშნული აქტივობა კამპანიის მეორე ეტაპის ფარგლებში განხორციელდა, რომელიც „საარჩევნო კოდექსში" ცვლილებების შეტანას და საარჩევნო პერიოდში მედია გარემოს გაუმჯობესებას ითვალისწინებს.
თბილისი. საქართველოში წინასარჩევნო, საარჩევნო და პოსტსაარჩევნო პროცესს დააკვირდება საერთაშორისო ორგანიზაცია „ღია დემოკრატიის საზოგადოება". ამისთვის, სადამკვირვებლო მისიას სხვადასხვა ქვეყნიდან 20–დან 25–მდე დამკვირვებელი შეურთდება. მათ საქართველოს სხვადასხვა რეგიონში გადაანაწილებენ. ასევე იგეგმება საპარლამენტო არჩევნების მონიტორინგის პროცესში 200 –დან 300 –მდე ადგილობრივი დამკვირვებლის ჩართვა.
„ჩვენ მეთოდოლოგიად გამოვიყენებთ იმავე პროცედურებს, რასაც ევროკავშირში და სხვა ქვეყნებში იყენებენ. ჩვენ ვიწყებთ შეხვედრებს საზოგადოებრივ ორგანიზაციებთან, არჩევნებში მონაწილე სუბიექტებთან, მედიასა და ყველა დაინტერესებულ მხარესთან. ანუ, ვხვდებით ყველა იმ აქტორს, რომლებიც ჩართულნი არიან არჩევნების პროცესში. თუმცა, რა თქმა უნდა, ჩვენი დაკვირვების ძირითადი ობიექტი არის საარჩევნო ადმინისტრირების პროცესი" – ამბობს ორგანიზაციის ერთ–ერთი წარმომადგენელი.
„ღია დემოკრატიის საზოგადოება" საქართველოში საქართველოს პრეზიდენტის და საგარეო საქმეთა სამინისტროს მოწვევით იმყოფება.
შიდა ქართლი. საქართველოს ახალგაზრდა იურისტთა ასოციაცია გორის ფილიალის ოფისში გაიმართა ადგილობრივი საზოგადოებრივი ორგანიზაციების შეხვედრა, რომლის მიზანიც იყო მომავალი საპარლამენტო არჩევნების წინ არსებული საარჩევნო გარემოს შეფასება. განიხილებოდა შიდა ქართლის რეგიონში არსებული სიტუაცია. შეხვედრას ასევე ესწრებოდა საქართველოში ამერიკის შეერთებული შტატების საელჩოს წარმომადგენელი.
თბილისი. გაეროს განვითარების პროგრამა (UNDP) და ევროკავშირი 2012 წლის საპარლამენტო არჩევნებისთვის იწყებენ მედიის მონიტორინგის ახალ ეტაპს. პროექტის განხორციელებაში მონაწილეობას მიიღებს ოთხი ორგანიზაცია: კავკასიის კვლევითი რესურსების ცენტრი (CRRC) სამართლიანი არჩევნებისა და დემოკრატიის საერთაშორისო საზოგადოება (ISFED); ინტერნიუსი საქართველო და საქართველოს საზოგადოებრივ საქმეთა ინსტიტუტი (GIPA). მონიტორინგი უახლოეს მომავალში დაიწყება და დეკემბრამდე გაგრძელდება.
ახალი პროექტის წარდგენის პარალელურად, გაეროს განვითარების პროგრამამ წარმოადგინა 2011 წელს არასამთავრობო ორგანიზაციების მიერ ჩატარებული და დასრულებული მედია მონიტორინგის შედეგები, რომელიც მოიცავდა სოციალურ, საარჩევნო, სამოქალაქო საზოგადოების, თვითმმართველობის, ადამიანის უფლებების საკითხების მედიაში გაშუქების ხარისხობრივ და თვისობრივ ანგარიშებს.