აჭარა. 25 ივლისს, ბათუმის დემოკრატიული ჩართულობის ცენტრის ორგანიზებით გაიმართა საჯარო დისკუსია თემაზე: „პარტიათა საარჩევნო კამპანიის დროს ძირითადი ქცევის წესების დეკლარაცია". დისკუსიაში მონაწილეებს საშუალება ჰქონდათ დეტალურად განეხილათ ქცევის წესები დეკლარაციის პრინციპები, აგრეთვე წარადგინეს საკუთარი ხედვები და შენიშვნები.

სამცხე–ჯავახეთი. 24 ივლისს, კოალიციამ „არჩევანის თავისუფლებისთვის” ახალციხის დემოკრატიული ჩართულობის ცენტრში  ადგილობრივი საზოგადოებრივი,  მედია ორგანიზაციებისა და პოლიტიკური პარტიების წარმომადგენლებთან შეხვედრა გამართა. შეხვედრაზე კოალიციის წარმომადგენლებმა საზოგადოებას მიაწოდეს  ინფორმაცია  კამპანია „ეს შენ გეხებას” მიზნებსა და სამოქმედო გეგმებზე, აგრეთვე, საარჩევნო გარემოსთან დაკავშირებულ პრობლემებსა და მის გაჯანსაღებისთვის აუცილებელ ღონისძიებებზე. შეხვედრას ესწრებოდნენ კოალიციის „არჩევნის თავისუფლებისთვის". მათ შეხვედრაზე ისაუბრეს ე.წ. must carry-ისა და must offer-ის პრინციპების კანონმდებლობაში ასახვის საკითხებზე, კანონში შეტანილი ცვლილებების დადებით და უარყოფით მხარეებზე. აგრეთვე, პოლიტიკური პარტიების ,,ქცევის კოდექსზე" საარჩევნო პერიოდში.  ,,მნიშვნელოვანია, რომ იყოს მჭიდრო კონტაქტი თბილისისა და ადგილობრივ ორგანიზაციებს შორის. მოხდეს აზრთა გაცვლა-გამოცვლა და ამ პრობლემატიკაზე მუშაობა, იმისათვის, რომ საზოგადოებრივი ცხოვრება გამოცოცხლებული იყოს არამარტო თბილისში, არამედ რეგიონებშიც”, - განაცხადა  ირაკლი მელაშვილმა.  მსაგვსი შეხვედრები საქართველოს სხვადასხვა რეგიონში უკვე ჩატარდა. კოალიცია „არჩევანის თავისუფლებისთვის" სამომავლოდ სამცხე-ჯავახეთში სადამკვირვებლო მისიას და ტრენინგების ჩატარებასაც გეგმავს. 

თბილისი. „სამართლიანი არჩევნებისა და დემოკრატიის საერთაშორისო საზოგადოება" ორგანიზაციის გრძელვადიან დამკვირვებელზე ზეწოლას აპროტესტებს და ითხოვს უწყებათშორისმა კომისიამ შეისწავლოს აღნიშნული ფაქტი. განცხადება ორგანიზაციამ საკუთარ ვებგვერდზე გამოაქვეყნა.  სრულად  წყარო: isfed.ge

თბილისი. „სახელმწიფო სახსრების საარჩევნო მიზნებით ხარჯვა"  – ასე ქვია საერთაშორისო გაჭვირვალობა – საქართველოს ახალ ანგარიშს, რომელიც პროექტის „გამჭვირვალე და ანგარიშვალდებული პოლიტიკური ფინანსები საქართველოში" ფარგლებში ჩატარდა. ანგარიშში ცენტრალური მთავრობის საარჩევნოდ მოტივირებულ ხარჯვაზეა გამახვილებული ყურადღება და იგი არ მოიცავს  განხილული საკითხების ეკონომიკური მიზანშეწონილობის ანალიზს. „საჯარო ფინანსების ხარჯვის ტენდენციები საარჩევნო წლებში განსხვავებულია – ბიუჯეტი  უფრო მეტად სოციალური, მოკლევადიანი დასაქმების და სხვა ტიპის პოპულისტური პროექტების განხორციელებაზეა ორიენტირებული. ამ კუთხით არც 2012 წელია გამონაკლისი", ნათქვამია კვლევაში. კვლევა – „სახელმწიფო სახსრების საარჩევნო მიზნებით ხარჯვა"   წყარო: transparency.ge

თბილისი. 19 ივლისს სასტუმრო „თბილისი მარიოტში" საარჩევნო ვებ–პორტალის,  www. electionsportal.ge პრეზენტაცია გაიმართა. პორტალი სამი საზოგადოებრივი ორგანიზაციის  - „სამართლიანი არჩევნებისა და დემოკრატიის საერთაშორისო საზოგადოების” (ISFED), „საქართველოს ახალგაზრდა იურისტთა ასოციაციისა" და „საერთაშორისო გამჭვირვალობა  - საქართველოს" ერთობლივ პროდუქტს წარმოადგენს და მისი მთავარი მიზანია 2012 წლის საპარლამეტნო არჩევნების შესახებ ინფორმაციის გავრცელება – წინასაარჩევნო პერიოდში, არჩევნების დღეს და მის შემდგომ საზოგადოებრივი ორგანიზაციებისა და მოქალაქეების მიერ დაფიქსირებული სავარაუდო დარღვევების აღრიცხვა და საიტზე განთავსება.   ვებ–პორტალის ადმინისტირებას ახორციელებს „სამართლიანი არჩევნებისა და დემოკრატიის საერთაშორისო საზოგადოება”, პროექტი ხორციელდება USAID-ის მეშვეობით. პორტალი ფინანსდება ეროვნულ დემოკრატიული ინსტიტუტის (NDI), ასევე, აღმოსავლეთ-დასავლეთის მართვის ინსტიტუტის (EWMI) მიერ. პორტალის საწყისი მხარდაჭერა უზრუნველყო  ფონდმა „ღია საზოგადოება –  საქართველომ". 

თბილისი.სამოქალაქო კამპანიის „ეს შენ გეხებას" მონაწილე ორგანიზაციები ეხმიანებიან ინიციატივას პოლიტიკური პარტიების ქცევის წესების შექმნის შესახებ და მიიჩნევენ, რომ აუცილებელია გარკვეული შეთანხმების მიღწევა პოლიტიკურ პარტიებს შორის, იმისათვის, რომ  წარიმართოს სამართლიანი და მშვიდობიანი საარჩევნო პროცესი. სრულად

გურია. სამოქალაქო განვითარების ინსტიტუტს, რომელიც ახორციელებს პროექტს  – „მოქალაქე ჟურნალისტები თავისუფალი და სამართლიანი არჩევნებისთვის'' საქართველოს 11 მუნიციპალიტეტში (მათ შორის ოზურგეთშიც) 12 და 13 ივლისს ჰქონდა შეხვედრები ოზურგეთის  საზოგადოების წარმომადგენლებთან. პროექტი დაფინანსებულია გაეროს განვითარების ფონდის მიერ.

აჭარა. 14 ივლისს, ბათუმის დემოკრატიული ჩართულობის ცენტრში, „სამოქალაქო განვითარების ინსტიტუტი" საზოგადოებრივი ორგანიზაციების წარმომადგენლებს შეხვდა და მათ პროექტის  „მოქალაქე ჟურნალისტები თავისუფალი და სამართლიანი არჩევნებისთვის" დეტალები გააცნო.  პროექტში ჩართულია საქართველოს 11 ქალაქი, რომელთა მაცხოვრებლები – აქტიური მოქალაქე და პროფესიონალი ჟურნალისტები – შეეცდებიან, მოიპოვონ და გაავრცელონ ინფორმაცია არჩევნების წინა პერიოდში, არჩევნების დღეს და შემდგომ დღეებში საქართველოში განვითარებული მოვლენების შესახებ. პროექტი მიზანი არჩევნები კოორდინირებულად გაშუქდეს. პროექტის ფარგლებში დაიწერება და გამოქვეყნდება 110 სტატია, მომზადდება 3 სიღრმისეული რეპორტაჟი, 2 მოკლემეტრაჟიანი ფილმი. შეიქმნება 5 ტრენინგ-მოდული და ჩატარდება ტრენინგები პროექტში მონაწილე 22 პროფესიონალი ჟურნალისტისთვის. პროექტი დაფინანსებულია გაერთიანებული ერების დემოკრატიული ფონდის მიერ.

თბილისი.„სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს საქართველოში წინასაარჩევნო მონიტორინგის რიგით მესამე ანგარიშს. ანგარიში მოიცავს 4 ივნისიდან 2 ივლისამდე პერიოდს.   სამართლიანი არჩევნები" წინასაარჩევნო გარემოს მონიტორინგს საქართველოს ყველა ოლქში 73  გრძელვადიანი დამკვირვებლის მეშვეობით ახორციელებს.  დამკვირვებლები აკვირდებიან წინასაარჩევნო პერიოდში გამოვლენილ დარღვევებს, მონიტორინგი ეროვნულ–დემოკრატიული ინსტიტუტის (NDI) ფინანსური მხარდაჭერით ხორციელდება. წყარო: www.isfed.ge 2012 წლის საპარლამენტო არჩევნების წინასაარჩევნო პერიოდის მონიტორინგის მესამე შუალედური ანგარიში

იმერეთი. 12 ივლისს ქუთაისში საარჩევნო სისტემების საერთაშორისო ფონდისა და ცესკო–ს ორგანიზებით კონფერენცია გაიმართა. მასში ცენტრალური კომისიის თავმჯდომარესთან, ზურაბ ხარატიშვილთან ერთად მონაწილეობა იმერეთის საოლქო საარჩევნო კომისიების თავმჯდომარეებმა, მედიასაშუალებების რედაქტორებმა, პროდიუსერებმა და გამომცემლებმა მიიღეს. ცესკო-მ ჟურნალისტებს 2012 წლის პარლამენტის არჩევნებისთვის მოსამზადებელ პროცესში უკვე განხორციელებულ და უახლოეს მომავალში დაგეგმილი ღონისძიებების შესახებ ინფორმაცია გააცნო. დამსწრე საზოგადოება ასევე ცესკოს გრძელვადიან - 2012-2014 წლებზე გაწერილ სამოქმედო გეგმას გაეცნო. მსგავსი შეხვედრები ცენტრალურ საარჩევნო კომისიას უახლოეს მომავალში დაგეგმილი აქვს აჭარის, გურიისა და სამეგრელოს მედიაწარმომადგენლებთან. 

აჭარა. 9 ივლისს, ბათუმის დემოკრატიული ჩართულობის ცენტრში, „მშვიდობის, დემოკრატიისა და განვითარების კავკასიურმა ინსტიტუტმა" ახალგაზრდებისათვის გამართა შეხვედრა თემაზე: „მე და არჩევნები". შეხვედრის მიზანი იყო ახალგაზრდებისათვის საარჩევნო სისტემისა და პროცედურების გაცნობა, მათი მოტივაციის გაზრდა არჩევნებში მონაწილეობის მისაღებად.  შეხვედრაზე ისაუბრეს თუ რატომ არის არჩევნები ასეთი მნიშვნელოვანი ჩვენი პოლიტიკური სისტემისათვის. რა უფლებამოსილება აქვს იმ ორგანოებს, რომელთა არჩევნებშიც ვიღებთ მონაწილეობას. შეხვედრის ბოლოს ახალგაზრდებს დაურიგდათ ბროშურები სახელწოდებით „მე და არჩევნები", რომელიც დაფინანსებულია ევროპის საბჭოს მიერ.    

სამცხე–ჯავახეთი. 3 ივლისს, საზოგადოებრივმა ორგანიზაციამ ,,დემოკრატ მესხთა კავშირის" ოფისში გაიმართა სადისკუსიო შეხვედრა თემაზე: ,,მე და არჩევნები".  შეხვედრას უძღვებოდა სამოქალაქო კულტურის საერთაშორისო ცენტრის გამგეობის თავმჯდომარე კოტე კანდელაკი და მშვიდობის, დემოკრატიისა და განვითარების კავკასიური ინსტიტუტის გამგეობის წევრი, პოლიტოლოგი გია ნოდია.

თბილისი. 29 ივნისს, ეროვნულ–დემოკრატიულმა ინსტიტუტმა (NDI) პრესკონფერენცია გამართა, სადაც წინასარჩევნოდ ჩამოსულმა დელეგეციამ ვიზიტის შედეგები წარმოადგინა. ვიზიტის ფარგლებში დელეგაციის წევრები შეხვდნენ მმართველი გუნდის და ოპოზიციური პარტიების ლიდერებს, ცენტრალური საარჩევნო კომისიის თავმჯდომარეს, აღმასრულებელი და საკანონმდებლო ხელისუფლების წარმომადგენლებს, საზოგადოებრივ ორგანიზაციებს, მედიის წარმომადგენლებს და ა.შ. ვიზიტის მიზანი იყო საპარლამენტო არჩევნებისთვის მზადების პროცესის შეფასება და იმ ფაქტორების შესწავლა, რომელმაც საარჩევნო პროცესზე შეიძლება გავლენა მოახდინოს. ანგარიშში დადებითად არის შეფასებული ცენტრალური საარჩევნო კომისიის საქმიანობა,  ასევე ის ფაქტი, რომ ოპოზიციური პარტიების მიერ ორგანიზებულმა ფართო მასშტაბიანმა აქციებმა ინციდენტების გარეშე  ჩაიარა, Must Carry-ს პრინციპების გატარება,  თუმცა დელეგაცია შეშფოთებას  გამოთქვამს პოლიტიკურ ლიდერებს შორის დიალოგის არარსებობის, ასევე სიძულვილის ენის გამოყენების შემთხვევების გამო წინასაარჩევნოდ ა.შ.  ანგარიშს თან ახლავს ასევე რეკომენდაციები. რომელიც მიმართულია პარლამენტისა და მთავრობის, პოლიტიკური პარტიების, ცენტრალური საარჩევნო კომისიის, მედიის, სამოქალაქო საზოგადოების მიმართ. NDI-ს სადამკვირვებლო ჯგუფი რეკომენდაციით მიმართავს საქართველოს პარლამენტს, Must Carry-ის პრინციპების მოქმედების ვადის გახანგრძლივების შესაძლებლობაც განიხილონ. დელეგაცია საქართველოს 2012 წლის 25 ივნისიდან 29 ივნისამდე სტუმრობდა.

კახეთი.22-23 ივნისს, გურჯაანში, გაზეთ „კახეთის ხმის" ოფისში სამოქალაქო განვითარების ინსტიტუტმა შეხვედრა გამართა ახალი პროექტის შესახებ „მოქალაქე ჟურნალისტები თავისუფალი და სამართლიანი არჩევნებისთვის". ახალი პროექტის მიზანია საქართველოს სხვადასხვა ქალაქებში მოქალაქე ჟურნალისტების მოძებნა და მათ მიერ საარჩევნო თემაზე საჭირო მასალის მიწოდება. პროექტი ხორციელდება საქართველოს 11 ქალაქში. პროექტის ხელმძღვანელია ჟურნალისტი, მედია ექსპერტი ია ანთაძე. პროექტის განმავლობაში ყველა ქალაქში მომზადდება სტატია წინასწარ შეთანხმებულ 10 თემაზე. სულ 110 სტატია. პროექტში ასევე ჩართულები იქნებიან პროფესიონალი ჟურნალისტები, რომლებიც მოქალაქე ჟურნალისტებთან ერთად მასალას მიაწვდიან ორგანიზაციას. მასალის მიწოდება შესაძლებელია მეილზე info@cdi.org.ge  და ტელეფონზე (790) 88 99 00. მიწოდებული მასალა განთავსდება ვებგვერდზე www.cdi.org.ge. დამატებითი ინფორმაცია იხილეთ ამავე ვებგვერდზე.

თბილისი. 20 ივნისს, „მშვიდობის დემოკრატიის და განვითარების კავკასიური  ინსტიტუტის" ორგანიზებით, ილიას სახელმწიფო უნივერსიტეტში, ახალგაზრდებთან შეხვედრა გაიმართა თემაზე „მე და არჩევნები". პროექტი ევროპის საბჭოს დაფინანსებით ხორციელდება და მისი მისი მიზანია საარჩევნო თემატიკაზე გაიმართოს შეხვედრები და დისკუსიები იმ ადამიანებთან, რომლებიც პირველად მიდიან არჩევნებზე. შეხვედრას უძღვებოდა „მშვიდობის დემოკრატიის და განვითარების კავკასიური  ინსტიტუტის"  თავმჯდომარე, გია ნოდია და „სამოქალაქო კულტურის საერთაშორისო ცენტრის" გამგეობის თავმჯდომარე, კოტე კანდელაკი. შეხვედრაზე  ისაუბრეს იმაზე, თუ რატომაა არჩევნები მნიშვნელოვანი პროცესი დემოკრატიულ განვთარებისთვის,  საარჩევნო სისტემის თავისებურებებზე, საარჩევნო  პროცედურებსა და არჩევნებთან დაკავშირებულ სხვა საკანონმდებლო ინიციატივებსა თუ ცვლილებებებზე. „ის რომ ხალხის მიერ არჩეული ხელისუფალი არსებობს, არასაკმარისი პირობაა დემოკრატიისთვის. ძალიან მნიშვნელოვანია, მაგრამ არასაკმარისი" – აღნიშნა შეხვედრაზე გია ნოდიამ. შეხვედრის ბოლოს მონაწილეებს დაურიგდათ ბროშურა „მე და არჩევნები".

გურია. 18 ივნისს, ოზურგეთში „დემოკრატიული ჩართულობის ცენტრში" კოალიციამ „არჩევანის თავისუფლებისთვის" წარმომადგენლებმა შეხვედრა გამართეს საზოგადოებრივი ორგანიზაციის, მედიისა და საზოგადოების წარმომადგენლებთან. შეხვედრის მიზანი იყო  კამპანია „ეს შენ გეხებას" ფარგლებში განხორციელებული და დაგეგმილი ღონისძიებების შესახებ ინფორმაციის მიწოდება. ასევე საუბარი შეეხო საარჩევნო გარემოს და მასთან დაკავშირებულ საკითხებს. კოალიცია „არჩევანის თავისუფლებისთვის" საქართველოს 8 რეგიონში შეხვედრების ორგანიზება 15 ივნისიდან დაიწყო.

აჭარა. 16 ივნისს, პრეს–კაფეში, კოალიციამ „სამართლიანი არჩევნისთვის" გამართა შეხვედრა არასამთავრობო და მედია ორგანიზაციების წარმომადგენლებთან, აგრეთვე, აქტიურ მოქალაქეებთან, რომლებიც დაინტერესებულნი არიან საარჩევნო გარემოს გაუმჯობესების საკითხებით. კოალიციამ საზოგადოებას გააცნო ის მოთხოვნები, რომლებიც, მათი აზრით, მნიშვნელოვანი და აუცილებელია საარჩევნო გარემოს გაუმჯობესებისთვის.  ესენია: ქართული ყველა  საინფორმაციო არხის ხელმისაწვდომობა; წინასაარჩევნო ტელედებატები, სამსახურეობრივი რესურსების გამოყენების შემთხვევაში არჩევნებში მონაწილეობის უფლების ჩამორთმევა. შეხვედრის ჩანაწერი

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) წინასაარჩევნო გარემოს მონიტორინგის მეორე შუალედურ ანგარიშს აქვეყნებს. ანგარიშში მოიცავს 2012 წლის 4 მაისიდან 4 ივნისის პერიოდს, თუმცა მასში ასევე ასახულია 4 მაისამდე განვითარებული ის მოვლენები, რომლებიც მონიტორინგის პერიოდშიც მიმდინარეობდა. სამართლიანი არჩევნები" წინასაარჩევნო გარემოს მონიტორინგს საქართველოს 73 საარჩევნო ოლქში ახორციელებს. წყარო: www. isfed.ge  მონიტორინგის მეორე შუალედურ ანგარიში 

თბილისი. 11 ივნისს, 17 საათზე საქართველოს პარლამენტის იურიდიულ საკითხთა კომიტეტში კამპანიის –  „ეს შენ გეხება" –  მონაწილე ორგანიზაციების მიერ მომზადებული საკანონმდებლო წინადადებების ავტორები შეხვდებიან იურიდიული კომიტეტის თავმჯდომარეს. საკანონმდებლო წინადადებები ითვალისწინებს „საარჩევნო კოდექსში" ცლილებებსა და მედია გარემოს გაჯანსაღებას საარჩევნო პერიოდში. შეგახსენებთ, აღნიშნული წინადადებებით კამპანიის მონაწილეებმა 7 მაისს მიმართეს საქართველოს პარლამენტს. წყარო: http://esshengexeba.ge/

შიდა ქართლი. 8-9 ივნისს გორის დემოკრატიული ჩართულობის ცენტრში „სამოქალაქო განვითარების ინსტიტუტმა" გამართა შეხვედრები პროექტის - „მოქალაქე ჟურნალისტები გამჭვირვალე და სამართლიანი არჩევნებისთვის" – ფარგლებში. პროექტი დაფინანსებულია გაერთიანებული ერების დემოკრატიის ფონდის (UNDEF) მიერ. 8 ივნისს შედგა ორი შეხვედრა. პირველზე  მიწვეული იყვნენ პოლიტიკური პარტიების წარმომადგენლები. მათგან უშუალოდ შეხვედრას დაესწრნენ: „ნაციონალური მოძრაობის", კოალიცია „ქართული ოცნების", „ერთიანი ნაციონალური მოძრაობის", „ახალი მემარჯვენეების", „ქართული პარტიის", „ქრისტიან–დემოკრატიული მოძრაობის" და  „დემოკრატიული მოძრაობის" წევრები. მეორე შეხვედრას ესწრებოდნენ ადგილობრივი საზოგადოებრივი ორგანიზაციების და მედიის წარმომადგენლები. შეხვედრას უძღვებოდა „სამოქალაქო განვითარების ინსტიტუტის" ხელმძღვანელი ია ანთაძე. საუბარი შეეხო არსებულ საარჩევნო გარემოს და საზოგადოების მონაწილეობის მნიშვნელობას მისი გაუმჯობესების საქმეში. 9 ივნისის შეხვედრები ასევე ორ ეტაპად შედგა: პირველ შეხვედრას ესწრებოდნენ ადგილობრივი ახალგაზრდები, ხოლო მეორეს - აქტიური მოქალაქეები. მათთან საუბარი წარიმართა ასევე საარჩევნო გარემოს შესახებ. ყურადღება გამახვილდა თუ როგორ შეეძლოთ მოქალაქეებს გამოეყენებინათ „სამოქალაქო განვითარების ინსტიტუტის" რესურსი როგორც წინასაარჩევნო პერიოდში, ისევე კენჭისყრის დღეს  დარღვევების შემჩნევის შემთხვევაში.

თბილისი. საზოგადოერბივი ორგანიზაცია „კონსტიტუციის 42–ე მუხლი" „Freedom House”-ის მიერ გამოქვეყნებულ ანგარიშს ეხმიანება და შესაბამის სტრუქტურებს მოუწოდებს, რომ გაითვალსიწინონ წინასაარჩევნოდ მოცემული რეკომენდაციები, რომლებიც არჩევნების სამართლიანად და გამჭვირვალედ ჩატარებას განაპირობებს.  „კონსტიტუციის 42–ე მუხლის" განცხადება  წყარო: www.article42.ge 

ბათუმი. 25 მაისს, ბათუმის დემოკრატიული ჩართულობის ცენტრში, „სამართლიანი არჩევნებისა და დემოკრატიის საერთაშორისო საზოგადოებამ" (ISFED), ,,საქართველოს ახალგაზრდა იურისტთა ასოციაციასა" და ,,საერთაშორისო გამჭვირვალობა - საქართველოსთან" პარტნიორობით,  გამართა  მრგვალი მაგიდა პარლამენტში შეტანილ ახალ საკანონმდებლო ინიციატივებზე. მომხსენებლებმა საარჩევნო ადმინისტრაციის, პოლიტიკური პარტიების, საზოგადოებრივი  ორგანიზაციებისა და მედიის წარმომადგენლებს ის საარჩევნო საკანონმდებლო წინადადებები წარუდგინეს, რომლითაც პარლამენტს მიმართეს. აღნიშნული წინადადებები კამპანიის –  „ეს შენ გეხება"–  ფარგლებში მოამზადეს საზოგადოებრივმა ორგანიზაციებმა.