იმერეთი. 9 ნოემბერს, საქართველოს ახალგაზრდა იურისტთა ასოციაციის ქუთაისის ფილიალის თავმჯდომარემ და ორგანიზაციის იურისტმა სამოქალაქო განათლების საკვირაო სკოლის მოსწავლებთან საინფორმაციო შეხვედრა გამართეს. მოსწავლეები გაეცნენ ინფორმაციას საიას, ორგანიზაციის იურიდიული განათლების ხელშეწყობის ფონდის და საია-ს ქუთაისის ფილიალის მისიას, მიზნებსა და საქმიანობას. აგრეთვე მიაწოდეს ინფორმაცია სამოქალაქო განათლების საკვირაო სკოლის და სკოლაში შესასწავლი საკითხების შესახებ. საკვირაო სკოლაში ქუთაისის საჯარო და კერძო სკოლის მე-9, მე-10 , მე-11 და მე-12 კლასის მოსწავლეები სწავლობენ. მოსწავლეებს იურისტები შეასწავლიან პრაქტიკული სამართლისა და სამოქალაქო განათლების აქტუალურ საკითხებს. წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ ოქტომბრის თვის წარმატებული საქმეები გამოაქვეყნა. ორგანიზაციის ვებ-გვერდზე განთავსდა ინფორმაცია ექვსი საქმის შესახებ. სრულად... წყარო: gyla.ge

თბილისი. საქართველოს სახალხო დამცველი უჩა ნანუაშვილი, სახალხო დამცველთან არსებული საკონსულტაციო საბჭოს - ოსური ფორუმის წევრებს შეხვდა და საქართველოში მცხოვრები ოსური თემის უფლებრივი მდგომარეობა განიხილა. საუბარი ძირითადად შეეხო ოსური ენის სწავლების, ოსური კულტურის საკითხებს, მოქალაქეობასთან დაკავშირებულ პრობლემებს, ე.წ. „გამყოფ ხაზთან" დაკავებებს და პატიმრების მდგომარეობას და რესტიტუციის საკითხებს. შეხვედრას ესწრებოდნენ თბილისში, შიდა ქართლში და კახეთში მოქმედი ოსური არასამთავრობო და სათემო ორგანიზაციები და ადგილობრივი აქტივისტები. სრულად... წყარო: www.ombudsman.ge

ქვემო ქართლი. არასამთავრობო ორგანიზაციამ ,,სიდამ" გამოსცა დამხმარე სახელმძღვანელოები: „სათემო მობილიზაცია" და „თანამონაწილეობითი დაგეგმარება", რომელთა ელექტრონული ვერსია ნებისმიერი დაინტერესებული პირისთვის ხელმისაწვდომია. „სათემო მობილიზაცია"... წყარო: „სიდას" ვებგვერდი სოციალურ ქსელში

კახეთი. დედოფლისწყაროში, გერმანიის ტექნიკური თანამშრომლობის ორგანიზაციის (GIZ) წარმომადგენლებმა  პროექტის - „ხანძრების მართვის ეროვნული პოტენციალის გაზრდა და ბუნებრივი ხანძრების რისკის შემცირება სამხრეთ კავკასიის ქვეყნებში" – ფარგლებში, ხანძრების მართვის საკითხებზე საინფორმაციო შეხვედრა გამართეს. შეხვედრას გერმანელი პროფესორი გლობალური ხანძრების მონიტორინგის ცენტრის, არასამთავრობო ორგანიზაციებისა და ადგილობრივი თვითმმართველობის წარმომადგენლებიც ესწრებოდნენ.შეხვედრის ორგანიზატორების თქმით, საუბარი სასოფლო-სამეურნეო საქმიანობით გამოწვეული ხანძრების პრობლემებსა და ხანძრების მართვას შეეხო.

თბილისი. 6 ნოემბერს, ლიბცენტრმა გამართა დისკუსია - „უნდა ჰქონდეთ თუ არა უცხოელებს მიწის ყიდვის უფლება?”დისკუსიისას ცენტრის წევრებმა წარმოადგინეს არგუმენტები თუ რატომ უნდა / არ უნდა ჰქონდეთ უცხო ქვეყნის მოქალაქეებს საქართველოში მიწის ყიდვის უფლება.მხარეების პოზიციის წარმოდგენის შემდეგ არგუმენტები შეაჯამა და ანალიზი გაუკეთა მენტორმა – ადამიანის უფლებების სწავლებისა და მონიტორინგის ცენტრის (EMC) იურისტმა გიორგი დავითურმა. წყარო: ორგანიზაციის გვერდი სოციალურ ქსელში

ქვემო ქართლი. 5 ნოემბერს, ქალთა საინფორმაციო ცენტრის წარმომადგენლები, ესტუმრნენ მარნეულის რაიონის სოფელ ქასუმლოს, ბაიათლოს და ბეითარაბჩას, რათა უკეთ შეესწავლათ სოფელში მცხოვრები ეროვნული უმცირესობების მდგომარეობა.ვიზიტის მიზანი იყო ეროვნული უმცირესობების განსაკუთრებული პრობლემების გამოკვეთა ერთი ფანჯრის პრინციპის საკონსულტაციო შეხვედრისთვის, რომელიც გაიმართება მარნეულის მუნიციპალიტეტში. წყარო: ორგანიზაციის გვერდი სოციალურ ქსელში

ნოემბერში ორგანიზაცია „რადარამმა" დევიდ გრებერის - „დემოკრატიის პროექტის" - ქართული თარგმანი გამოსცა. ამასთან დაკავშირებით ზუგდიდში, მესტიასა და ქუთაისში პრეზენტაციების სერია მოეწყო. წიგნის შესახებ ფილოსოფოსმა, ლაშა ხარაზმა ისაუბრა.„დევიდ გრებერი ამერიკაში ცნობილია, როგორც ანთროპოლოგიის პროფესორი, და რადიკალი აქტივისტი. მისი წიგნი, ,,დემოკრატიის პროექტი" კი ამერიკელებისათვის, და არა მარტო მათთვის, ყველაზე აქტუალურ თემას - დამოკრატიას ეხება…", ნათქვამია ორგანიზაციის გვერდზე. წყარო: ორგანიზაციის გვერდი სოციალურ ქსელში

კახეთი. არასამთავრობო ორგანიზაციამ ,,თელავის ახალგაზრდულმა ცენტრმა", თელავში რამდენიმე დღიანი აქცია დაასრულა. მათ, ქუჩის აქცია სახელწოდებით ,,დაუთმე გზა ქვეითს” მოაწყეს, რომლის მიზანი მძღოლების ინფორმირება იყო. ორგანიზაციის წარმომადგენლების თქმით, ზოლიან ტანსაცმელში გამოწყობილი მოსწავლეები თემატური პოსტერებით ხელში ქუჩებში მოძრაობდნენ და ცდილობდნენ, გადასასვლელებზე მძღოლების ყურადღება შეტყობინებაზე – დაუთმე გზა ქვეითს გაემახვილებინათ.

თბილისი. წელს 25 წელი სრულდება რაც ბერლინი კედელი დაეცა და გერმანიის დემოკრატიულ რესპუბლიკაში მშვიდობიანი რევოლუცია მოხდა. იუბილის აღსანიშნავად გერმანიის საელჩო აწყობს ღონისძიებებს სახელწოდებით „ბერლინის კედლის დაცემის 25 წელი". ღონისძიებების ფარგლებში გაიმართება დოკუმენტური ფილმის ჩვენება, რომელიც მოგვითხრობს 1989 წელს გდრ–იდან გაქცეული პირების ისტორიას. იუბილის ფარგლებში გაიმართება დისკუსია – „ბერლინის კედლის დაცემის 25 წელი". დისკუსიაში მონაწილეობას მიიღებენ სხვადასხვა სფეროს გერმანელი და ქართველი წარმომადგენლები. დისკუსიას წაიყვანს ოლივერ რაისნერი (ისტორიკოსი). სრულად... წყარო: გერმანიის საელჩოს ვებგვერდი სოციალურ ქსელში

თბილისი. „ახალგაზრდა კონსტიტუციონალისტთა ასოციაციამ" საქართველოს უზენაესი სასამართლოს წარმომადგენლებთან შეხვედრა გამართა. ორგანიზაციის წევრები სასჯელაღსრულების დაწესებულებებში მყოფი პირების საარჩევნო უფლებასთან დაკავშირებით საქართველოს უზენაესი სასამართლოს წარმომადგენლებს შეხვდნენ. შეხვედრაზე მათ ორგანიზაციის მიერ მომზადებული კვლევა გადაეცათ, ისაუბრეს ასევე ინიციატივის სამომავლო პერსპექტივებზე. მსჯავრდებულთა საარჩევნო უფლებებთან დაკავშირებულ კვლევაში განხილულია ევროსაბჭოს წევრი ქვეყნების პრაქტიკა და ადამიანის უფლებათა ევროპული სასამართლოს გადაწყვეტილებები. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა გამოაქვეყნა საინფორმაციო ბიულეტენი. ბიულეტენში წარმოდგენლია ღია მმართველობის პარტნიორობასთან (OGP) დაკავშირებული ინსტიტუტის აქტივობები, რომელიც 2014 წლის ივლისი-ოქტომბრის პერიოდში განხორციელდა. საინფორმაციო ბიულეტენი...  წყარო: idfi.ge

თბილისი. ეკონომიკური პოლიტიკის კვლევის ცენტრი( EPRC) ვესტმისტერის დემოკრატიის ფონდის (WDF) მხარდაჭერით საქართველოს პარლამენტის წევრებისა და კომიტეტების აპარატის თანამშრომლებისთვის ტრენინგ კურსს იწყებს. „საბიუჯეტო ციკლი და პროგრამული ბიუჯეტირების საფუძვლები" პირველი ეტაპის კურსი 5 ნოემბრამდე გაგრძელდება. ტრენინგებს ბრიტანელი ექსპერტი ვინს მაკკარტი და EPRC--ის ექსპერტები ირინა გურული, თემურ ხომერიკი და ნინო ევგენიძე გაუძღვებიან. წყარო: ორგანიზაციის გვერდი სოციალურ ქსელში

თბილისი. 4 ნოემბერს, „ღია საზოგადოება-საქართველომ" და „ციხეების კვლევების საერთაშორისო ცენტრმა" კვლევის პრეზენტაცია გამართეს.  „საქართველოს პენიტენციურ სისტემაში წამებისა და არაადამიანური მოპყრობის პრაქტიკის კვლევა" 2003-2012 წლებს მოიცავს. „ანგარიში მოიცავს პატიმრებთან და ყოფილ პატიმრებთან ჩატარებული გამოკითხვის სრულიად ახალი, ემპირიული გამოკითხვის მონაცემებს… კვლევის პროცესში, პირდაპირი ინტერვიუების სახით იქნა გამოკითხული 1200 მსჯავრდებული, რომელთაგან 600 ყოფილი პატიმარია.კვლევის შედეგები პასუხობს მთავარ კითხვებს: როდის დაიწყო, რამდენად გავრცელებული იყო და რამდენად სისტემური და ხშირი ხასიათი ჰქონდა არაადამიანურ და დამამცირებელ მოპყრობას. რა ძირითადი ფაქტორები განაპირობებდა წამებას, რა მიზანი ჰქონდა წამების ფოტო- ვიდეო დოკუმენტირებას, წამების რა ფიზიკური და ფსიქოლოგიური მეთოდები იყო ყველაზე ხშირად გამოყენებული, წამება ხდებოდა გარკვეულ ციხეებში, თუ ქვეყნის სრული მასშტაბით, ხდებოდა ეს ციხის ადმინისტრაციის კონკრეტული ჯგუფის ფარგლებში, თუ ეს იყო ოფიციალური პოლიტიკა.ანგარიში მოიცავს კონკრეტულ რეკომენდაციებს სამომავლოდ მსგავსი პრაქტიკის აღმოფხვრის მიმართულებით და ზოგადად, ციხის მართვის საკითხებზე", ნათქვამია ფონდის ვებ-გვერდზე. კვლევა წყარო: osgf.ge

თბილისი. საერთაშორისო გამჭვირვალობა - საქართველომ საპარლამენტო ამბების აუდიო პოდკასტის მორიგი გამოშვება გამოაქვეყნა. 3 ნოემბრის პოდკასტის თემებია: ფარულ მოსმენებთან დაკავშირებული კანონპროექტი; მარტოხელა მშობლის სტატუსის განსაზღვრა; ცვლილები „იარაღის შესახებ" საქართველოს კანონში. პოდკასტი წყარო: www.transparency.ge

თბილისი. საქართველოს სახალხო დამცველმა საქართველოს მთავარ პროკურორს მიმართა. ომბუდსმენი პროკურორს „შსს წყალტუბოს რაიონული სამმართველოს თანამშრომლების მხრიდან მოქალაქე დ.ხ.-ს მიმართ განხორციელებულ შესაძლო დანაშაულებრივ ქმედებებთან დაკავშირებით გამოძიების დაწყების წინადადებით მიმართა". სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრმა სახელმწიფო საკონსტიტუციო კომისიის საქმიანობის აღწერილობითი მიმოხილვა გამოაქვეყნა. „2013 წლის 4 ოქტომბერს, საქართველოს პარლამენტის ინიციატივით, შეიქმნა ჯერ კიდევ უკანასკნელი საპარლამენტო არჩევნების მიმდინარეობისას დაანონსებული საკონსტიტუციო კომისია. კომისია დაკომპლექტდა 58 წევრით, სადაც განსხვავებული პროპორციით არის წარმოდგენილი საპარლამენტო უმრავლესობა და უმცირესობა, აგრეთვე პარლამენტის დამოუკიდებელი წევრები, არასაპარლამენტო პოლიტიკური ძალები, რომლთა მიერ წარმოდგენილმა საპრეზიდენტო კანდიდატებმა 2013 წლის არჩევნებში მიიღეს 3%-ზე მეტი. კომისიის შემადგენლობაში შევიდნენ არასამთავრობო ორგანიზაციების წარმომადგენლები, შესაბამისი დარგის ექსპერტები, აგრეთვე მთავრობის, საკონსტიტუციო და საერთო სასამართლოების თითო წარმომადგენელი", ნათვამია ორგანიზაციის ვებ-გვერდზე. სრულად... წყარო: emc.org.ge

თბილისი. 31 ოქტომბერს, ადამიანის უფლებათა სახლის საკონფერენციო დარბაზში მრგვალი მაგიდა - „ადრეული, ქორწინება, გამომწვევი მიზეზები და შედეგები” - გაიმართა. მრგვალ მაგიდას დაესწრნენ განათლებისა და მეცნიერების სამინისტროს, პარლამენტის ჯანდაცვის კომიტეტის, სახალხო დამცველის აპარატის, გერმანიის საერთაშორისო თანამშრომლობის საზოგადოების (GIZ), არასამთავრობო ორგანიზაციების წარმომადგენლები. სამინისტროსა და სახალხო დამცველის აპარატის წარმომადგენლებმა მრგვალი მაგიდის ფორმატში, აღნიშნულ თემასთან დაკავშირებით, წარმოადგინეს პრეზენტაციები. მრგვალ მაგიდაზე განიხილეს შემდეგი თემები: ადრეული ქორწინება, არასრულწლოვანის რეპროდუქიული უფლებები, ოჯახური ძალადობა. წყარო: კონსტიტუციის 42-ე მუხლის გვერდი სოციალურ ქსელში

კახეთი. სტრატეგიული კვლევებისა და განვითარების ცენტრმა, თელავში, 30 ოქტომბერს, სურსათის უვნებლობის საკითხების შესახებ შეხვედრა გამართა. შეხვედრაზე განიხილეს ისეთი საკითხები როგორიცაა ევროკავშირის ასოცირების ხელშეკრულების ფარგლებში რა ტიპის სამუშაოები უნდა გასწიოს საქართველომ სურსათის უვნებლობის კუთხით. შეხვედრაზე განიხილეს ევროინტეგრაციისათვის აუცილებელი მოთხოვნები, როგორიცაა: კონკურენციის პოლიტიკის გატარება; სასურსათო უსაფრთხოებაზე ზრუნვა; ინტელექტუალური საკუთრების დაცვა; შრომის კოდექსის ევროპულთან თანხვედრაში მოყვანა; ვაჭრობაზე ტექნიკური ბარიერების მოხსნა და ა.შ. ღონისძიებას ესწრებოდნენ თელავის არასამთავრობო სექტორისა და სასოფლო გაერთიანებების წარმომადგენლები.

კახეთი. ახმეტაში, ასოციაციების მართვის ცენტრის (AMC) ინიციატივით, 31 ოქტომბერს, საინფორმაციო-საკოორდინაციო შეხვედრა გაიმართა. შეხვედრის მიზანს მეცხვარეობის დარგში არსებულ პრობლემებზე დისკუსია - მსჯელობა და დაინტერესებული მხარეების აქტიური მონაწილეობით შესაძლო გამოსავლის გზების ძიება წარმოადგენდა. ასოციაციების მართვის ცენტრის წარმომადგენლების თქმით, ევროკავშირის დაფინანსებით, გაეროს განვითარების პროგრამის -„საქართველოში საძოვრების მდგრადი მართვა ადგილობრივი თემებისთვის კლიმატის ცვლილებების შერბილებისა და მასთან ადაპტაციის სარგებლისა და დივიდენდების დემონსტრირების მიზნით” ფარგლებში, ჩატარდა კვლევა. კვლევის ფარგლებში შეისწავლეს თუში მეცხვარეების ადგილობრივი ცხოვრების პირობები, რომლებიც ზამთრის საძოვრებად იყენებენ ვაშლოვანის დაცულ ტერიტორიას. შეხვედრის მონაწილეებმა იმსჯელეს მეცხვარეობის დარგის განვითარების მიზნით მოსალოდნელ საკანონმდებლო ცვლილებებსა და რეგულაციებზე, ასევე დარგის განვითარებით დაინტერესებული მხარეების როლსა და ჩართულობის გაზრდაზე.

კახეთი. თელავის დემოკრატიული ჩართულობის ცენტრში, 31 ოქტომბერს, მშვიდობის კორპუსის ორგანიზებით, გაიმართა დისკუსია თემაზე „მულტიკულტურალიზმი და გამოხატვის თავისუფლება". დისკუსია მიეძღვნა საქართველოში მცხოვრები სხვადასხვა ეროვნების წარმომადგენელთა ეროვნულ ტრადიციებსა და სახალხო-რელიგიურ დღესასწაულებს. შეხვედრის მიზანს საზოგადოების წევრ სხვადასხვა ეროვნებისა და რელიგიის წარმომადგენლებს შორის დიალოგისა და მშვიდობიანი თანაცხოვრების წახალისება წარმოადგენდა. კაილ საური, მშვიდობის კორპუსის მოხალისე - მასწავლებელი თელავში: ,,კახეთში, როგორც ეთნიკურად მდიდარ მხარეში, მნიშვნელოვანია განსხვავებული ეროვნებისა და რელიგიის წარმომადგენლებს შორის მსგავსი დიალოგის ხელშეწყობა და მულტიკულტურალიზმის, პლურალიზმისა და გამოხატვის თავისუფლების წახალისება სხვადასხვა სახის ღონისძიებების, საინფორმაციო შეხვედრებისა და ერთობლივი სახალხო ზეიმების დამკვიდრებით".

თბილისი. ინფორმაციის თავისუფლების განვითარების ინსტიტუტმა გამოაქვეყნა ინფორმაცია, სახელწოდება – „APT28: რუსეთის კიბერ-ოპერაციები ჟურნალისტების წინააღმდეგ საქართველოში". „როგორც რამდენიმე დღის წინ გახდა ცნობილი, აშშ-ს სადაზვერვო კომპანია FireEye-მ აღმოაჩინა ჰაკერული დაჯგუფება, რომელსაც დიდი ალბათობით რუსეთის ფედერაციის უშიშროების სამსახური მართავს. კომპანიის განცხადებით... ამ შემთხვევაში ჰაკერული დაჯგუფება, რომელსაც პირობითად უწოდეს „APT28", აგროვებდა ინფორმაციას თავდაცვისა და გეოპოლიტიკურ საკითხებზე, რაც მხოლოდ მთავრობისთვის შეიძლებოდა ყოფილიყო საინტერესო. APT28, რომელიც სულ მცირე 2007 წლიდან არსებობს, შეტევებს ახორციელებდა რუსეთის საერთაშორისო ინტერესების შესაბამისი სადაზვერვო ინფორმაციის მოსაპოვებლად ძირითადად სამი მიმართულებით: კავკასიის რეგიონი, კერძოდ კი საქართველო, აღმოსავლეთ ევროპის რეგიონი, კერძოდ უნგრეთი და პოლონეთი, ევროპული უსაფრთხოების ორგანიზაციები: NATO და ეუთო...", ნათქვამია ინსტიტუტის ვებგვერდზე. სრულად... წყარო: idfi.ge