თბილისი. დიღმის ტყე-პარკში დაგეგმილ მშენებლობასთან დაკავშირებით, საზოგადოებრივი ორგანიზაციების ნაწილი თბილისის მერსა და საკრებულოს თავმჯდომარეს მიმართავს. „მოვითხოვთ, უარი ეთქვას დიღმის ტყე-პარკის ტერიტორიაზე ახალი ნაგებობის პროექტის შეთანხმებისა და მშენებლობის ნებართვის გაცემის მოთხოვნას; ქალაქ თბილისის მერის განცხადებასთან თანხმობაში, KIA Motors-ის ამ ტერიტორიაზე განლაგებულ შენობა-ნაგებობას მიენიჭოს შეუსაბამო ნაგებობის სტატუსი; ახალი გენგეგმის პროექტის ფარგლებში, დიღმის ტყე-პარკის მთლიან ტერიტორიაზე (აღმაშენებლის ხეივნის, ახმეტელის, ლიუბლიანას და ჭოხონელიძის ქუჩებს შორის სრული არეალი, აღმაშენებლის ხეივნის გასწვრივ არსებული ნაწილობრივ განაშენიანებული ზოლის ჩათვლით) გავრცელდეს ლანდშაფტურ-სარეკრეაციო ზონის სტატუსი, რათა მომავალში თავიდან იქნას აცილებული ყოველგვარი მშენებლობა; მომავალ გენერალურ გეგმაში შენარჩუნდეს ამ ტერიტორიისთვის 2006 წელს მინიჭებული სპეციალური გამწვანების ზონის სტატუსი და შეზღუდვის ზონა; გაიმართოს საჯარო შეხვედრები დაინტერესებულ ჯგუფებთან დიღმის ტყე-პარკის დაცვისა და შენარჩუნების სამოქმედო გეგმის განხილვის მიზნით", - ნათქვამია განცხადებაში. სრულად  წყარო: emc.org.ge

სამცხე-ჯავახეთი. 2008 წლის აგვისტოს ომთან და საერთაშორისო კონფლიქტებთან დაკავშირებით, დემოკრატ მესხთა კავშირში, დავით ჯიქიას სემინარი გაიმართა, რომელზეც, დეტალურად მოხდა, კონფლიქტის დაწყების წინანდელი მდგომარეობისა და ომის შედეგად, დამდგარი ახალი რეალობის განხილვა. ღონისძიება დაიგეგმა, დემოკრატიული ჩართულობის მხარაჭერის პროგრამა FID-ის ფარგლებში, რომელსაც ახორციელებს, საქართველოს გაეროს ასოციაცია, შვედეთს გაეროს ასოციაციის ფინანსური მხარდჭერით. სრულად... წყარო: ორგანიზაციის ვებგვერდი სოციალურ ქსელში

თბილისი. კავშირი „საფარი" აქვეყნებს ბლოგპოსტს: ცვლილებებისათვის მოცლილი დრო. „ვუყურებდი საკუთარ ანარეკლს და ვფიქრობდი – მე ხომ დიდი ხნის წინ შემეძლო, ვყოფილიყავი ის, ვინც ახლა ვარ – წარმატებული საქმეში, საყვარელი სამეგობრო წრეში და დამაჯერებლად, გულწრფელად საყვარელი საპირისპირო სქესისათვის.? ვუყურებდი ჩემს თავს ჩაბნელებულ გვირაბს იქით და ვხედავდი მკაცრ გამოხედვას, თავდაჯერებულ იერს, წარმატებულ ქალს", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. უზენაესი სასამართლოს თავმჯდომარის შერჩევის მიზნით, პრეზიდენტის მრჩევლებსა და საზოგადოებრივი ორგანიზაციების წარმომადგენლებს შორის საკონსულტაციო შეხვედრა გაიმართა. შეხვედრაში კოალიციის „დამოუკიდებელი და გამჭვირვალე მართლმსაჯულებისთვის" წევრი ორგანიზაციები. შეხვედრის მონაწილეებმა პრეზიდენტის მრჩევლებს თავიანთი ხედვა და ის კრიტერიუმები გაუზიარეს, რასაც მათი მოსაზრებით, უზენაესი სასამართლოს თავმჯდომარე უნდა აკმაყოფილებდეს. შეხვედრის ფარგლებში ასევე განიხილეს კანდიდატის შერჩევის პროცდურების ღიაობის მნიშვნელობისა და ფართო კონსენსუსის საჭიროების საკითხი. სრულად  წყარო: phrgeorgia.wordpress.com

თბილისი. 2018 წლის 6 აგვისტოს საქართველოს სახალხო დამცველმა ზოგადი წინადადებით მიმართა საქართველოს პრემიერ-მინისტრს და მთავრობის სახელით გამოცემულ საკანონმდებლო აქტებში გამოყენებული ტერმინის, „ოჯახის უფროსის" სხვა უფრო ნეიტრალური ფორმით მოდიფიცირება მოითხოვა. „მართალია, ზემოხსენებულ აქტებში პირდაპირ არ არის მითითებული თუ ვინ არის, ან ვინ უნდა იყოს ოჯახის უფროსი, თუმცა საუკუნეების მანძილზე ჩამოყალიბებულ ტრადიციულ წარმოდგენებში „ოჯახის უფროსად" მოიაზრებოდა მამაკაცი, რომელიც მისი სქესის გამო ოჯახში გადაწყვეტილების მიმღები პირი იყო. სახალხო დამცველის აზრით, თანამედროვეობაში აღნიშნული ტერმინის გამოყენება ამყარებს ქალის შესახებ სტერეოტიპულ წარმოდგენებს, რომ ქალი ოჯახის მეორეხარისხოვანი წევრია, არ არის თანასწორად გადაწყვეტილების მიმღები და დოვლათის შემომტანი, რაც, თავის მხრივ, სქესის საფუძველზე ნეგატიური შეხედულებების წამახალისებელია", - მიიჩნევს საქართველოს სახალხო დამცველი. სრულად  წყარო: სახალხო დამცველის ვებგვერდი

თბილისი. საქართველოს ახალგაზრდა იურისტთა ასოციაცია (საია) აქვეყნებს გიორგი ტაბატაძის ბლოგპოსტს: ბებო... „მთელი ღამე ვერ დავიძინე, შვილოო, თვალი არ მომიხუჭავს და როგორც კი გათენდა, შვილიშვილებს გამოვეპარე და პირველივე „მარშუტკას" გამოვყევიო. 85 წლის ვარ და ამ ასაკში სამშობლოს ღალატი ხომ არ ჩავიდინე და აფხაზეთი და ოსეთი ხომ არ ვაღიარეო. ვიპოვე მისი შევსებული კითხვარი, წავუკითხე და ვაჩვენე, რომ პირიქით, საქართველოს ტერიტორიული მთლიანობის აღიარება შემოხაზა. შვებით ამოისუნთქა", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) საკონსტიტუციო სასამართლოს მიერ ნარკოპოლიტიკასთან დაკავშირებით გამოტანილ გადაწყვეტილებებსა და საქართველოს პარლამენტის წინაშე ამ კუთხით არსებულ გამოწვევებს აფასებს. „საქართველოს პარლამენტი ამ დრომდე არ ასრულებს მასზე დაკისრებულ პასუხისმგებლობას - განსაზღვროს ახალი ნარკოპოლიტიკა ქვეყანაში. საკონსტიტუციო სასამართლოს მიერ გამოტანილი გადაწყვეტილებები, ერთი მხრივ, არის ფრაგმენტული (სასამართლო ვერ გაცდება მის კომპეტენციას და ვერ განსაზღვრავს მთლიანად ნარკოპოლიტიკას), მეორე მხრივ კი, ისინი ხშირ შემთხვევაში აჩენს არასწორ მოლოდინებს მოქალაქეებში. ასეთ პირობებში კი, მნიშვნელოვნად რთულდება ნარკოტიკის მოხმარებით გამოწვეულ რისკებზე და პრობლემებზე ეფექტიანი ღონისძიებების გატარება. საქართველოს პარლამენტმა უარი უნდა თქვას პასიურ როლზე, რა დროსაც ის ფაქტობრივად ელოდება საკონსტიტუციო სასამართლოს გადაწყვეტილებებს და არ იღებს რეალურ პასუხისმგებლობას. ამის ნაცვლად, პარლამენტში აქტიურად უნდა წარიმართოს მუშაობა როგორც სასამართლოს გადაწყვეტილებებით წარმოშობილი საკანონმდებლო ვაკუუმების შესავსებად, ასევე ზოგადად, სისტემურად ახალი ნარკოპოლიტიკის შემუშავების მიზნით", - აღნიშნულია EMC-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. 8 აგვისტოს, სოფელ ერგნეთში, გამყოფი ხაზიდან ასიოდე მეტრში, 10 წლის წინანდელ ომს გაიხსენებენ. „სტუმრებს ერთდროულად ორი დამოუკიდებელი პროექტის პრეზენტაცია ელოდებათ, რომელთაც ერთი სათქმელი აერთიანებთ, ესენია: „მცოცავი საზღვრები" და 080808. 8 აგვისტოს 6 საათზე, ერგნეთში, ლია ჩლაჩიძის სახლში, სადაც მისი ინიციატივით აგვისტოს ომის მუზეუმი დაფუძნდა, მემორიალური აქცია გაიმართება და სტუმრები, მეხსიერების პორტალიდან ომგამოვლილი ადამიანების ისტორიებს წაიკითხავენ. გამომცემლობა ინდიგო და წამების მსხვერპლთა ფსიქოსოციალური და სამედიცინო რეაბილიტაციის ცენტრი GCRT სტუმრებს მეხსიერების პორტალს წარუდგენენ, რომელიც 2008 წელს ომგამოვლილი ადამიანების ისტორიებს ინახავს. www.08.08.08.ge ბოლო ომის განსხვავებული პერსპექტივით, ადამიანის ბიოგრაფიიდან დანახვას ცდილობს. ზეპირი ისტორიები ჩაწერილია ომგამოვლილ ადამიანებთან გამყოფი ხაზის მიმდებარე სოფლებში, დევნილთა დასახლებებში და გორში. პროექტი შეიქმნა ჟურნალ ინდიგოსა და GCRT-ის - წამების მსხვერპლთა ფსიქოსოციალური და სამედიცინო რეაბილიტაციის ცენტრის კოლაბორაციით და განხორციელდა ღია საზოგადოების ფონდის მხარდაჭერით", ნათქვამია ორგანიზაციის ვებგვერდზე. სრულად... წყარო: www.osgf.ge

თბილისი. გერმანიის საერთაშორისო თანამშრომლობის საზოგადოება (GIZ) აქვეყნებს დოქტორ მარტინ მორლოკის დასკვნას: პოლიტიკური გაერთიანებების შესახებ საქართველოს კანონი და მისი გაუმჯობესების შესაძლებლობები. "საქართველოში განხორციელებულმა საკონსტიტუციო რეფორმამ გააძლიერა საპარლამენტო ელემენტები. შესაბამისად მიზანშეწონილი იქნებოდა პოლიტიკური პარტიების სამართლისთვის სათანადო ყურადღების მიქცევა და პარტიული სისტემის გაძლიერების შესაძლებლობების ძიება. კარგად ფუნქციონირებადი პოლიტიკური პარტიები საჭიროებს სამართლებრივ მოწესრიგებას. არსებობს პოლიტიკური პარტიების მომწესრიგებელი კანონმდებლობის საჭიროება, კერძოდ, მინიმუმ, ორი მიმართულებით", ნათქვამია დასკვნაში. სრულად... წყარო: ორგანიზაციის ვებგვერდი სოციალურ ქსელში

თბილისი. დასრულდა მსოფლიო ბანკის მიერ დაფინანსებული პროექტი „საქართველოს ტურიზმის სექტორში ჩართული ღარიბი თემებისა და მიკრო-მეწარმეების გაძლიერება", რომლის ერთ-ერთი კომპონენტი „მცირე სათემო სამუშაოები კულტურული მემკვიდრეობის ძეგლების სიახლოვეს" სიდამ განახორციელა. პროექტის ფარგლებში იმერეთისა და კახეთის რეგიონში, ექვს ადგილას, მოეწყო ტურისტული ინფრასტრუქტურა. სრულად... წყარო: www.cida.ge

თბილისი. პარტნიორობა ადამიანის უფლებებისთვის (PHR) განცხადების საფუძველზე სახალხო დამცველმა ჯანდაცვის სამინისტროს მიმართა, რათა საქართველოს მთავრობის N145 დადგენილებაში განეხორციელებინა ტერმინთა მოდიფიცირება. „25 ივლისს, სახალხო დამცველმა ორგანიზაციას წერილობით აცნობა, რომ მოპასუხე მხარემ აღნიშნულ დადგენილებაში ცვლილებები შეიტანა და ტერმინები „ჯანმრთელი ბავშვი" და „შეზღუდული შესაძლებლობის მქონე ბავშვი" ჩანაცვლდა ტერმინებით „ბავშვი" და „განსხვავებული საჭიროების მქონე ბავშვი", რითაც აღმოიფხვრა სავარაუდო დისკრიმინაციის შედეგები”, ნათქვამია ვებგვერდზე. სრულად... წყარო: phrgeorgia.wordpress.com

თბილისი. „ადამიანის უფლებების სწავლებისა და მონიტორინგის ცენტრი" (EMC), სვანეთში მიმიდნარე მოვლენებთან დაკავშირებით, სტატიას აქვეყნებს. „უახლესი ისტორიის განთვალისწინებით, როდესაც სახელმწიფოს მხრიდან გატარებული რეპრესიული პოლიტიკა სისტემურ ხასიათს ატარებდა, სვანეთში მიმდინარე ეს მოვლენები მძაფრ ასოციაციებს აჩენს სახელმწიფო დონეზე სისტემური რეპრესიისა და პოლიციური რეჟიმის განახლების შესახებ. ამასთან, სვანეთში ბოლო წლებში ჰიდროელექტრო სადგურებისა თუ კაშხლების მშენებლობის ირგვლივ წარმოებული წინააღმდეგობის პოლიტიკის და ადგილობრივი თემის ე.წ. „მონოკულტურული განვითარების" იმპერატივთან ღია დაპირისპირების პირობებში, კიდევ უფრო მკვეთრ კონტურებს იძენს ჭუბერსა და ხაიშში საპოლიციო ძალების მაღალი კონცენტრირება და სადამსჯელო ხასიათის მატარებელი სამთავრობო ინიციატივები" - ნათქვამია სტატიაში. სრულად  წყარო: ორგანიზაციის ვებგვერდი

იმერეთი. მიმდინარე წლის 26 ივლისს ა(ა)იპ ადგილობრივი დემოკრატიის სააგენტო საქართველომ, როგორც სამოქალაქო საზოგადოების ფორუმის საქართველოს ეროვნული პლატფორმის რეგიონულმა წარმომარმადგენელმა, ბაღდათის მუნიციპალიტეტის თვითმმართველობის წარმომადენლებისთვის საინფორმაციო შეხვედრა ჩაატარა. შეხვედრის მიზანს წარმოადგენდა ევროპასთან ინტეგრაციის პროცესებთან დაკავშირებული საკითხების, ასევე, ადგილობრივი მნიშვნელობის იმ საკითხების განხილვა, რომელიც ევროპასთან ინტეგრაციის პროცესთან არის დაკავშირებული. სრულად  წყარო: https://www.facebook.com/LDAGeorgia/posts/1879379645697402

თბილისი. 2018 წლის 26 ივლისს, ხუთშაბათს, ფონდ "ღია საზოგადოება - საქართველოს" ოფისში კონსულტაციის დღე გაიმართება. ფონდის პროგრამების მენეჯერები თქვენს შეკითხვებს უპასუხებენ. კონსულტაციები ჩატარდება შემდეგი პროგრამების მიხედვით: ეროვნული ინტეგრაცია, საზოგადოებრივი ჯანმრთელობა, მონაწილეობითი დემოკრატიის პროგრამა, ადამიანის უფლებები, ევროინტეგრაცია. სრულად  წყარო: ორგანიზაციის ვებგვერდი

თბილისი. არასამთავრობო ორგანიზაცია Transparify-ის მიერ გამოქვეყნებული ანგარიშის მიხედვით, „საერთაშორისო გამჭვირვალობა-საქართველომ" (TI) ფინანსური გამჭვირვალობის კუთხით 2018 წელს უმაღლესი შეფასება, ხუთვარსკვლავიანი ჯილდო მიიღო. 17 ივლისს გამოქვეყნებულ ანგარიშში 24 ქვეყნის 92 ანალიტიკური ინსტიტუტის ფინანსური გამჭვირვალობა არის შეფასებული. კერძოდ, Transparify აფასებს, თუ რამდენად ასაჯაროებენ არასამთავრობო ორგანიზაციები თავიანთი ვებ-გვერდების მეშვეობით დაფინანსების წარმომავლობისა და ოდენობების შესახებ ინფორმაციას. Transparify-ის რეიტინგში გამჭვირვალობის ხარისხის მიხედვით ორგანიზაციებს 0-დან 5 ქულამდე აქვთ მინიჭებული, სადაც 5 „ყველაზე გამჭვირვალეს" ნიშნავს. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველის აპარატი, 2018 წლის 23 ივლისიდან, ახალ შენობაში გადადის. ცენტრალური ოფისის ახალი მისამართია – თბილისი, დავით აღმაშენებლის გამზირი N150. სახალხო დამცველის აპარატი აცხადებს, რომ, მიუხედავად ორგანიზაციის გადასვლასთან დაკავშირებული ტექნიკური სირთულეებისა, შეფერხების გარეშე მიიღებს მოქალაქეთა განცხადებებს და იმუშავებს ცხელი ხაზის რეაგირების ჯგუფი, რომლის ტელეფონის ნომერი არ იცვლება. სრულად  წყარო: სახალხო დამცველის ვებგვერდი

სამეგრელო. 7 ივლისს, ასოციაცია „ათინათის" ახალგაზრდული ცენტრის წევრებისათვის რესტორან „ელ ბარკოში" ჩატარდა კულინარიული ვორქშოფი „მრავალფეროვანი სამზარეულო". „ახალგაზრდები დაიყვნენ მცირე ჯგუფებად, რომელთაც დაევალათ კონკრეტული კერძების დამზადება. მონაწილეებმა ვორქშოფის ფასილიტატორის მითითებების მიხედვით დაამზადეს და დააგემოვნეს იტალიური სამზარეულოს ყველაზე მოთხოვნადი, საფირმო კერძები", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

26 ივნისს, საქართველოს სახალხო დამცველის პირველმა მოადგილე, თამარ გვარამაძემ ბელგიის დედაქალაქ ბრიუსელში გამართულ საქართველო - ევროკავშირის ასოცირების კომიტეტის მეოთხე სხდომაში მიიღო მონაწილეობა. „შეხვედრაზე განიხილეს საქართველო-ევროკავშირის თანამშრომლობის საკითხების ფართო სპექტრი: პოლიტიკური დიალოგისა და რეფორმის, პოლიტიკური ასოცირების, მართლმსაჯულების, თავისუფლებისა და უსაფრთხოების, კონფლიქტის გადაწყვეტის, ეკონომიკური და სექტორული თანამშრომლობის საკითხები; მართლმსაჯულების, თავისუფლებისა და უსაფრთხოების კონტექსტში ერთ-ერთ საკითხად ანტიდისკრიმინაციული კანონის განხორციელებაზე გაამახვილეს ყურადღება. მოხსენებით გამოსვლისას სახალხო დამცველის პირველმა მოადგილემ კანონის ეფექტური აღსრულების თვალსაზრისით ამ ეტაპისათვის არსებულ გამოწვევებსა და საკანონმდებლო ხარვეზებზე ისაუბრა", ნათქვამია ორგანიზაციის ვებგვერდზე. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: ადამიანის უფლებათა ევროპული სასამართლოს პრეცედენტული გადაწყვეტილება: ინტერნეტში განთავსებულ ინფორმაციაზე წვდომა V. დავიწყების უფლება. „ადამიანის უფლებათა ევროპულმა სასამართლომ, მიმდინარე წლის 28 ივნისის გადაწყვეტილებით  საქმეზე „მ.ლ და ვ.ვ გერმანიის წინააღმდეგ" (M.L. and W.W. v. Germany) დაადგინა ბალანსი ადამიანის უფლებათა ევროპული კონვენციის მე-8 მუხლით დაცულ პირადი და ოჯახური ცხოვრების პატივისცემის უფლებასა და მე-10 მუხლით დაცულ გამოხატვის თავისუფლებას შორის. გადაწყვეტილება მნიშვნელოვანია პერსონალური მონაცემების შემცველ ინფორმაციაზე წვდომის უფლების კუთხით. აღნიშნული გადაწყვეტილებით ადამიანის უფლებათა ევროპულმა სასამართლომ უპასუხა იმ კითხვებს, რომლებიც დარჩა 2017 წლის 27 ივნისის  მის მიერ მიღებული გადაწყვეტილების შემდგომ  საქმეზე Satakunnan Markkinapörssi Oy and Satamedia Oy v. Finland", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინფოგრაფიკას ინტერნეტის უსაფრთხოების მთავარ წესებზე. მონაცემების დაშიფვრა, სხვადასხვა სიმბოლოებისგან შედგენილი პაროლები და მათი ხშირი ცვლა, ორფაქტორიანი ავტორიზაცია, „ვირტუალური პირადი ქსელი", TOR ბრაუზერი, დაცული მისამართები - ის ძირითადი ხერხებია, რომლებიც თქვენს ინტერნეტ უსაფრთხოებას უზრუნველყოფს. სრულად... წყარო: idfi.ge

თბილისი. 1949 წლის ივნისში, სსრკ-ში კიდევ ერთი დიდი დეპორტაციის ოპერაცია ჩატარდა. ამიერკავკასიიდან საბჭოთა რეჟიმმა მასობრივად გადაასახლა ოსმალეთის იმპერიის და სპარსეთის ყოფილი მოქალაქეები - ეთნიკური სომხები და ასირიელები. თბილისიდან 1949 წლის 13 ივნისს რამდენიმე ათასი მოქალაქე ეშელონებით გაასახლეს შორეულ ციმბირში - ალთაის მხარესა და ტომსკის ოლქში, სადაც მათ 1954-1955 წლამდე მოუხდათ დარჩენა. დეპორტაციის მსხვერპლი ამ ერებისთვის ეს თარიღი ტრაგიკული კოლექტიური მეხსიერების ნაწილია, თუმცა ქართული საზოგადოების უმრავლესობას ამ დეპორტაციის შესახებ არაფერი სმენია და იგი მეხსიერებიდან ამოშლილია. საბჭოთა კვლევის ლაბორატორია გთავაზობთ პრასკელია ბიტკაშის კოლექციას - ზეპირი ისტორიით, სადაც იგი 1949 წელს მისი ოჯახის დეპორტაციის ამბავს ყვება. სრულად... წყარო: საბჭოთა კვლევის ლაბორატორია

თბილისი. შენობის ავარიული მდგომარეობის გამო, საქართველოს სახალხო დამცველის აპარატი სამუშაო პროცესს დროებით, 2018 წლის 2 ივლისამდე აჩერებს. ექსპერტიზის დასკვნით, შენობას მესამე ხარისხის დაზიანება დაუდგინდა. ამასთან, პრობლემას მიმდებარე ტერიტორიაზე მიმდინარე სარეაბილიტაციო სამუშაოებით გამოწვეული ბიძგებიც ქმნის. „მთავრობის უახლოეს სხდომაზე დაგეგემილია სახალხო დამცველის აპარატისთვის დამატებითი თანხის გამოყოფა, რაც დროებითი ალტერნატიული ფართის დაქირავების შესაძლებლობას მოგვცემს. სახალხო დამცველის აპარატი ყველა ღონეს იხმარს, რათა არ შეფერხდეს საქმისწარმოების პროცესი", - ნათქვამია სახალხო დამცველის აპარატის მიერ გავრცელებულ განცხადებაში. სრულად  წყარო: სახალხო დამცველის ვებგვერდი