თბილისი. საქართველოს ახალგაზრდა იურისტთა ასოციაცია (საია) აქვეყნებს იურისტ, ნიკა სიმონიშვილის ბლოგპოსტს: ნებადართული, მაგრამ მაინც დასჯადი. „კანონპროექტი გვეუბნება, რომ პირად სივრცეში მარიხუანას მოხმარება დასაშვებია, მაგრამ მოხმარებამდე მისასვლელი ყველა გზა - აკრძალული. კანონი არ უშვებს და ჯარიმაა გათვალისწინებული მარიხუანას კულტივაციისთვის, ასევე ადმინისტრაციული სანქციაა გათვალისწინებული მცირე ოდენობით მისი შეძენის, შენახვის, გადაზიდვის ან გადაგზავნისთვის, ხოლო ამ ქმედებათა განმეორების შემთხვევაში, ქმედება დანაშაულად მიიჩნევა. უხეში პარალელი რომ გავავლოთ, ეს იგივეა, ვაზის მოყვანა, ღვინის დაწურვა ან საერთოდ მისი შეძენა რომ აგვიკრძალოს კანონმა, მაგრამ აქვე გვითხრას, ღვინო შეგიძლია დალიოვო. ამოცანა კი გვეკითხება, როგორ შევიდეთ წყალში ისე, რომ იქედან სველი არ გამოვიდეთ? პასუხი კი ერთია.. შემოთავაზებული რეგულაცია კანონიერ გზას არ უტოვებს პირს, მოიხმაროს ლეგალური პროდუქტი და დანაშაულის ჩადენისკენ უბიძგებს," ნათქვამია ორგანიზაციის ვებგვერდზე. სრულად... წყარო: www.gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ქვიარ ფორუმის ფარგლებში მომზადებულ ვიდეობლოგს: ბრძოლათა გადაკვეთა თუ ერთიანობა? უტოპიური მზერა შრომისა და სექსუალობის საკითხებზე. სრულად... წყარო: emc.org.ge

თბილისი. საქართველოს დემოკრატიული ინიციატივა (GDI) აქვეყნებს ილია ჭავჭავაძის სტატიას: ყალბი და ნამდვილი. „კაცს სამარცხვინო ბოძზედ ტყუილ-უბრალოდ გასაკრავად არა ჰზოგვენ, არ ჰთაკილობენ, და იძახიან-კი, – ადამიანის ღირსება, ადამიანობა ხელშეუხებელია, სათაყვანებელიაო, და გამკითხავი არავინ არის: სად ტყუილუბრალოდ ადამიანის თავზე ლაფის დასხმა და სად ხელშეუხებლობა ადამიანის ღირსებისა? ათასს ამისთანას ჩამოგითვლით, საცა თქმა საქმეს არ ებმის და საქმე თქმას არ ემსგავსება, არ ეთანხმება. ყველაფერი ეს ცარიელის სახელით გადის და სახრავს-კი არავინ დაგიდევთ. ფიცი სწამთ და ბოლო კი არავის აკვირვებს, თქმა ერთია და ქმნა სხვა", ნათქვამია ორგანიზაციის ვებგვერდზე. სრულად... წყარო: gdi.ge

csogeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

17 ნოემბერს, ტოლერანტობის საერთაშორისო დღესთან დაკავშირებით, სასტუმრო „ჰილტონის" საკონფერენციო დარბაზში გაიმართა კონფერენცია თემაზე – „რელიგია და ტოლერანტობა". სრულად... წყარო: ორგანიზაციის ვებგვერდი სოციალურ ქსელში

თბილისი. EWMI ACCESS-ის მხარდაჭერით, Tbilisi Architecture Biennial/თბილისის არქიტექტურის ბიენალე ინდიგო • Indigo-სთან და Artarea/Tv2.0 -თან ერთად ახორციელებს პროექტს ქალაქი ახლოდან. „პროექტის ფარგლებში ხდება ქ. თბილისის სხვადასხვა საკითხის კვლევა (რეკრეაციული ზონების რეგულაციები, სამშენებლო საქმიანობის რეგულაციები, საზოგადოებრივი ტრანსპორტის პოლიტიკა და სხვ.) და შედეგების გაცნობა როგორც საზოგადოებისთვის, ასევე გადაწყვეტილების მიმღები პირებისთვის," ნათქვამია ორგანიზაციის ვებგვერდზე. სრულად... წყარო: სოციალური ქსელი

თბილისი. „ადამიანის უფლებების სწავლებისა და მონიტორინგის ცენტრმა" (EMC) მოამზადა კვლევა - „უსაფრთხოების მზერის ქვეშ: ისტორია, პოლიტიკა და რელიგია პანკისის ხეობაში". როგორც ნაშრომის ავტორები აღნიშნავენ, კვლევის მიზანია, ერთი მხრივ, პანკისის ხეობის „საფრთხედ მონიშვნის" გენე¬ალოგიური ხაზის ძიება, მეორე მხრივ კი, პანკისელთა ცხოვრების წესის, დომინან¬ტურ სააზროვნო წესთან, პირისპირ დაყენების მცდელობა. სრულად  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველოს ინფორმაციით, აჭარის ავტონომიური რესპუბლიკის უმაღლესი საბჭოს საზედამხედველო ფუნქცია იზრდება. ორგანიზაცია წარმოგიდგენთ, უმაღლესი საბჭოს საზედამხედველო ფუნქციასთან დაკავშირებული და სხვა ძირითადი ცვლილებების შეფასებას. სრულად... წყარო: www.transparency.ge

თბილისი. რელიგიური და ადამიანის უფლებებზე მომუშავე საზოგადოებრივი ორგანიზაციები აზერბაიჯანში შეიხი მირტაგი ასადოვის დაკავებას ეხმიანებიან. ხელმომწერი ორგანიზაციები შეშფოთებას გამოვხატავთ აზერბაიჯანის ტერიტორიაზე ადგილობრივი პოლიციის მიერ სსიპ „სრულიად საქართველოს მუსლიმთა უმაღლესი სასულიერო სამმართველოს" თავმჯდომარის, შეიხი მირტაგი ასადოვის თვითნებური დაკავების საქმეზე და საქართველოსა და აზერბაიჯანის ხელისუფლებებს მოვუწოდებთ მიიღონ დროული და ეფექტიანი ღონისძიებები დაკავებული სასულიერო პირის უფლებების აღდგენის მიზნით", - ნათქვამია მათ მიერ გავრცელებულ განცხადებაში. სრულად  წყარო: https://gyla.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს დამოუკიდებელი აუდიტორების დასკვნას, რომელიც ორგანიზაციის მიერ სპეციალური დანიშნულების ფინანსების განკარგვას მიმოიხილავს. დაინტერესებულ საზოგადოებას, შეუძლია ორგანიზაციის ვებგვერდზე გაეცნოს ამ დოკუმენტს და ნახოს, როგორ გამოიყურება ციფრებში EMC-ის საქმიანობა, მისი ფუნქციონალური ხარჯები თუ ფულადი სახსრების მოძრაობა 2017 წლის 31 დეკემბრის მდგომარეობით. სრულად  წყარო: https://emc.org.ge/

თბილისი. საქართველოს დემოკრატიული ინიციატივა (GDI) აქვეყნებს მიხეილ ჯავახიშვილის ტექსტს: „შვიდი თავისუფლება." „ყოველ ადამიანს სრული უფლება აქვს, საცა უნდა და რამდენიც უნდა შეიკრიბნენ, რათა თავიანთ საქმეებზე და სხვა და სხვა საჭირბოროტო საკითხებზე მოილაპარაკონ. ამისთვის სრულიადაც საჭირო არ არის მთავრობის რაიმე ნებართვა ან განცხადება. ხალხს შეუძლია მრავლად შეიკრიბოს და ქუჩა-ქუჩა იაროს სიმღერით, დროშებით და სხვა. არც თუ ამის დაშლა შეუძლია ვისმე, ამ კრებებზე თავისუფლად შეიძლება ლაპარაკი სხვა და სხვა საგნებზე, მთავრობის, მოხელეთა მოქმედებაზე და სხვა... კრების თავისუფლებას დიდი მნიშვნელობა აქვს ხალხისათვის, რადგან ხალხს თვითმოქმედებას აჩვევს..." სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეოს, რომელიც ქვიარ ფორუმის ფარგლებში მომზადდა. „პაოლა ბაჩეტა კალიფორნიის უნივერსიტეტში, ბერკლიში გენდერისა და ქალთა კვლევების დეპატრამენტში პროფესორი და პედაგოგიკის ვიცე-თავმჯდომარეა. ბაჩეტა მრავალწლიანი აქტივისტია ფერადკანიან ლესბოსურ და ქვიარ, ფემინისტურ, ანტი-რასისტულ, დეკოლონიურ, ომის საწინააღმდეგო, ანტი-ოკუპაციური და მემარჯვენე რადიკალიზმის წინააღმდეგ არსებულ მოძრაობებში აშშ-ში, საფრანგეთში, ინდოეთსა და იტალიაში. ის 1970-იანი წლების ცნობილი Dyketactics-ის აქტივისტური ჯგუფის წევრია. ასევე, ერთ-ერთი იმ ექვსი Dyketactics-იდან, რომელთაც აშშ-ს ისტორიაში პირველი სასამართლო დავა წამოიწყო ქვიარების წინააღმდეგ მიმართული პოლიციის ბრუტალურობის წინააღმდეგ ("Dyketactics! Vs. The City of Philadelphia”). აღნიშნული მოვლენიდან ცოტა ხანში, შავკანიანთა განმათავისუფლებელი მოძრაობისა და ასატა შაკურის მხარდაჭერის აქტივობებში ჩართულობისთვის მცდარად იქნა გასამართლებული, ხოლო მოგვიანებით ევროპაში განდევნილი. როგორც დევნის პროცესში, ისე მოგვიანებით ის მუდმივად იყო სოციალურ აქტივიზმში ჩართული”, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „კონსტიტუციის 42-ე მუხლი" ეხმაურება ა/წ წლის 12 ნოემბერს პრეზიდენტობის კანდიდატის სალომე ზურაბიშვილის მიერ გაკეთებულ განცხადებას, რომლის მიხედვითაც მასზე და მის შვილებზე ხორციელდება სიცოცხლის მოსპობის მუქარა. „მნიშვნელოვანია, გავრცელებული ინფორმაციის საფუძველზე საქართველოს შს სამინისტროს მიერ საქართველოს სისხლის სამართლის კოდექსის 284-ე და 151-ე მუხლებით დაწყებული გამოძიება სწრაფად და ეფექტურად ჩატარდეს და მოხდეს მუქარის განმახორციელებელ პირთა იდენტიფიცირება. ამასთან, საკითხისადმი მაღალი საზოგადოებრივი ინტერესის გამო, საგამოძიებო ორგანოებმა, გამოძიების მიმდინარეობისა და პროგრესის შესახებ საზოგადოებას პერიოდულად მიაწოდონ ინფორმაცია", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „საერთაშორისო გამჭვირვალობა - საქართველო" პრეზიდენტობის ერთ-ერთი კანდიდატის, სალომე ზურაბიშვილის განცხადებას ეხმაურება. „პრესკონფერენციაზე მან განაცხადა, რომ მას და მისი ოჯახის წევრებს უცნობი პირები სიცოცხლის მოსპობით ემუქრებიან. „საერთაშორისო გამჭვირვალობა - საქართველოსთვის” აღნიშნული ფაქტი მიუღებელია. ამ შემთხვევაში იკვეთება სისხლის სამართლის დანაშაულის ნიშნები, მიგვაჩნია, რომ შინაგან საქმეთა სამინისტრომ მსგავსი ქმედებები სასწრაფოდ უნდა გამოიძიოს და, საჭიროებისამებრ, პასუხისმგებლობაში მისცეს ყველა პირი. ვფიქრობთ, რომ საპრეზიდენტო კანდიდატებს შორის რაც არ უნდა მაღალი იყოს კონკურენცია, აუცილებელია, რომ პოლიტიკური მეტოქეობა დარჩეს კანონისა და ეთიკის ფარგლებში. მოვუწოდებთ ყველა კანდიდატისა და პოლიტიკური პარტიის მხარდამჭერს, თავი შეიკავონ პოლიტიკური ოპონენტების მიმართ მუქარისა და არაეთიკური ქცევისგან", ნათქვამია ორგანიზაციის ვებგვერდზე სოციალურ ქსელში. სრულად...  წყარო: ორგანიზაციის ვებგვერდი სოციალურ ქსელში

თბილისი. „სამართლიანი არჩევნები" ეხმაურება საქართველოს პრეზიდენტობის კანდიდატის, სალომე ზურაბიშვილის დღევანდელ განცხადებას, რომლის მიხედვითაც 9-10 და 11 ნოემბერს მას და მის შვილებს, sms და ხმოვანი შეტყობინებებით, სიცოცხლის მოსპობით დაემუქრნენ. „მუქარა, რომელზეც პრეზიდენტობის კანდიდატი საუბრობს, წარმოადგენს სისხლის სამართლის დანაშაულს. მოვუწოდებთ შინაგან საქმეთა სამინისტროს, დროულად და ეფექტურად მოახდინოს რეაგირება და მაქსიმალურად სწრაფად გამოიძიოს სავარაუდო მუქარის ფაქტი. „სამართლიანი არჩევნები" აქამდეც შეშფოთებას გამოხატავდა პოლარიზებული საარჩევნო გარემოსა და მზარდი აგრესიული რიტორიკის გამოვლენის ფაქტებზე. კიდევ ერთხელ მოვუწოდებთ არჩევნებში ჩართულ სუბიექტებსა და მათ მხარდამჭერებს, თავი შეიკავონ ნებისმიერი ისეთი ქმედებისა და განცხადებისაგან, რომელმაც შესაძლოა გამოიწვიოს საარჩევნო გარემოსთვის ძალადობრივი ფონის შექმნა", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. აღმოსავლეთ–დასავლეთის მართვის ინსტიტუტმა ყოველთვიური ბიულეტენი გაავრცელა სამოქალაქო საზოგადოების განვითარებისა და მოქალაქეთა ჩართულობის პროექტის ფარგლებში. პროექტის აქტივობებთან ერთად გაეცანით დემოკრატიული ჩართულობის რამდენიმე ცენტრის ახალ მისამართს. და ასევე, ინსტიტუტის ინფორმაციით, ნოემბერში, პროექტის ფარგლებში, გამოცხადდება მოქალაქეთა ჩართულობის საგრანტო კონკურსი. სრულად... წყარო: აღმოსავლეთ–დასავლეთის მართვის ინსტიტუტი

დემოკრატიული ჩართულობის ცენტრის ვებ–გვერდი www.cce.ge  ტექნიკური ხარვეზის გამო დროებით მიუწვდომელია. ცენტრებში სივრცის დასაჯავშნად და სხვა ინფორმაციის მისაღებად უნდა ეწვიოთ ორგანიზაციის ვებ–გვერდს: www.ncce.ge. წყარო: დემოკრატიული ჩართულობის ცენტრები

იმერეთი. 7 ნოემბერს ცენტრი „აფხაზეთის” ქუთაისის ოფისში დაიწყო 2 დღიანი ტრენინგი თემაზე „ადვოკატირება და კომუნიკაცია”. „ტრენინგს იმერეთის რეგიონში დევნილთა დასახლებებში მცხოვრები ახალგაზრდები ესწრებიან, რომლებსაც სურვილი აქვთ მონაწილეობა მიიღონ თავიანთი საცხოვრისების განვითარებაში. ის მოიცავს მრავალ ისეთ მნიშვნელოვან საკითხს, რომელიც აუცილებელია ბინათმესაკუთრეთა ამხანაგობისა და სათემო ორგანიზაციების გამართული ფუნქციონირებისათვის, ასევე, ადგილზე არსებული სხვადასხვა ინფრასტრუქტურული პრობლემების მოგვარებისათვის”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს დემოკრატიული ინიციატივა (GDI) აქვეყნებს ვაჟა ფშაველას ნაშრომს: შინაური ამბები. „დეპუტატების არჩევნებზე რომ მიდგა საქმე მესამედ, დატრიალდა ჯარასავით გამარჯვებას ჩვეული დასი ეგრედ წოდებულ სოციალ-დემოკრატებისა. ათადან-ბაბადან ესეა მიღებული, რომ სუფრის თავს ხშირად ის წამოსკუპდება ხოლმე, ვინც უფრო ფეხმარდია, გაძრომგამოძრომა ეხერხება და, უკაცრავად კი ვიქნებით, თავაზიანობაზეც კი მწყრალად გახლავთ და ეთიკა- მორალს აგრე რიგად პატივს არა სცემს. ასეა თუ ისე, გამარჯვებულმა კვლავ გაიმარჯვა. ავირჩიეთ ჭირისუფლად ერისა კარლო ჩხეიძე. ვინ იყო ბატონი ჩხეიძე, რომელსაც თავისი ბედი ანდო აღმოსავლეთმა საქართველომ, თითქმის არავინ იცოდა შინაურებისა და მეგობრების გარდა. სახელიც უცნაური ჰქონდა, ქართველის ყურს ეხამუშებოდა. დიახ, ქართლში რომ ეს ამბებია, კახეთში უარესობაა. საქართველო დღეს წააგავს მსუქან დუმას, გარეშე კაცი მიეტანა ამ დუმას და ნელ-ნელა ათლის კაი-კაი ნაჭრებს. უფრო მდაბიოდ რომ მოგახსენოთ, ჩვენი ტერიტორია სხვის ხელში გადადის და ჩვენ, ქართველები, ამ დუმის თლას ან მიწაწყლის გადასვლას სხვის ხელში როდის ვეწინააღმდეგებით სასტიკად, როგორ ეკადრება ასეთი საქციელი ჩვენს კეთილშობილებას! დეპუტატ კარლოსის პროფესორებიც გაჯავრდებიან, აი თქვე შოვინისტებოო, განა სულ ერთი არ არის ვის ხელში იქნება ქართლ-კახეთის ავლადიდება, ქართველისა, თუ სხვისაო. ოღონდაც, რომ სულ ერთია და აკი ამისთვის ბატონმა კარლო ჩხეიძემ თავი დაანება დეპუტატობას და პოლონელების განვითარებას მიჰყო ხელი," ნათქვამია ორგანიზაციის ვებგვერდზე სოციალურ ქსელში. სრულად... წყარო: gdi.ge

თბილისი. 29-31 ოქტომბერს, რეგულირების ზეგავლენის შეფასების პრაქტიკოსთა გაერთიანების ფარგლებში რიგით მეორე ტრენინგი ჩატარდა. ტრენინგის თემას რეგულირების ზეგავლენის შეფასების (RIA) ეფექტური იმპლემენტაცია და მდგრადი სამართალშემოქმედების ინსტიტუციური ჩარჩო წარმოადგენდა. „სამი დღის განმავლობაში მონაწილეებმა საერთაშორისო და ადგილობრივ ექსპერტებთან ერთად დეტალურად განიხილეს მათ მიერ სხვადასხვა თემაზე განხორციელებული 5 რეგულირების ზეგავლენის შეფასება, პრაქტიკაში მიმდინარე მაგალითების საფუძველზე შეისწავლეს რეტროსპექტიული შეფასების ძირითადი ელემენტები, განიხილეს RIA-ს ხარისხის კონტროლის კრიტერიუმები და სახელმძღვანელო, რომელიც ითვალისწინებს RIA-ს პროცესში დღის წესრიგი 2030-ის მოთხოვნების ასახვას," ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 1 ნოემბერს, გაიმართა შეხვედრა სახელწოდებით „მდგრადი განვითარების გამყარება კანონის უზენაესობის მეშვეობით", რომელსაც არასამთავრობო ორგანიზაციები ესწრებოდნენ. მათ ისაუბრეს „რეგულირების გავლენის შეფასებაზე" მდგრადი განვითარების 2030 წლის დღის წესრიგის კონტექსტში. „დისკუსია შეეხო ზოგადად 2030 წლის დღის წესრიგს და კონკრეტულად რეგულირების გავლენის შეფასებას, როგორც პოლიტიკის შემუშავების პროცესის გასაუმჯობესებელ მნიშვნელოვან ინსტრუმენტს არასამთავრობო ორგანიზაციების ხელში.” სრულად... წყარო: ორგანიზაციის ვებგვერდი სოციალურ ქსელში

თბილისი. „რეგიონული დიალოგი" აქვეყნებს „ნიუ-ორკის საქალაქო უნივერსიტეტის” (CUNY) ანთროპოლოგიისა და გეოგრაფიის პროფესორის, დევიდ ჰარვის საჯარო ლექციის თარგმანს. რომელიც მან 2007 წელს მოსკოვში ყოფნისას წაიკითხა. ჰარვი კარლ მარქსის „კაპიტალზე" დაყრდნობით აანალიზებს პარიზისა და ნიუ-იორკის ურბანული განვითარების ისტორიას, რაც, ორივე შემთხვევაში ქალაქების ნეოლიბერალიზაციით დასრულდა. სრულად... წყარო: regional-dialogue.com