სამეგრელო. აშშ-ის ეროვნულმა გეოგრაფიულმა საზოგადოებამ (National Geographic Society) საკუთარი გამოცემის პრეზენტაცია ზუგდიდში გამართა და წარმოადგინა ფოტომასალები არქეოლოგიური აღმოჩენების, კვლევების, მსოფლიო კულტურის და ისტორიის, საინტერესო ფაქტების და მოვლენების შესახებ. იგეგმება, რომ აღნიშნული ფოტოგამოფენა მოძრავი გახდეს და საქართველოს სხვადასხვა რეგიონებში მოეწყოს გამოფენები.

თბილისი. ინფორმაციის თავისუფლების განვითარების ინსტიტუტმა საზოგადოებრივ მაუწყებელს საჯარო ინფორმაციის გაცემაზე უარის თქმის გამო ადმინისტრაციული საჩივრით მიმართა. „მოთხოვნილი ინფორმაცია არ შეიცავს არც სახელმწიფო, და არც პროფესიულ ან კომერციულ საიდუმლოებას. ინსტიტუტს უსაფუძვლოდ ეთქვა უარი სსიპ „საზოგადოებრივ მაუწყებლის" მხრიდან. ვიტოვებთ იმედს, რომ ინფორმაციის თავისუფლების განვითარების ინსტიტუტის საჩივარს მოჰყვება ადეკვატური რეაქცია სსიპ „საზოგადოებრივი მაუწყებლის" მხრიდან", ნათქვამია ორგანიზაციის ვებგვერდზე. წყარო:ორგანიზაციის გვერდი სოციალურ ქსელში

კახეთი.11 აპრილს, თელავის დემოკრატიული ჩართულობის ცენტრში გაეროს მოსახლეობის ფონდმა ჩაატარა ტრენინგი „მამაკაცური საუბრები”. ტრენინგი ორდღიანი და კასკადური ხასიათისაა, იგი კახეთის სხვადასხვა ქალაქში ჩატარდება, რომლის მიზანია მამაკაცთა ჩართულობის გაძლიერება გენდერული თანასწორობის დამკვიდრების პროცესში. მარიამ ბანძელიძე, კომპონენტის მენეჯერი, გაეროს მოსახლეობის ფონდი: „ტრენინგი მიზანია ქალებთან ერთად მამაკაცების ჩართულობის გაზრდას გენდერული თანასწორობის გაზრდის პროცესში, რაც თავისთავად დადებითად წაადგება მონაწილე პირებს".

აჭარა. 11 აპრილს, ბათუმის დემოკრატიული ჩართულობის ცენტრში, ISET-ის კვლევითმა ინსტიტუტმა „რეგიონული პრობლემატიკის კვლევის" შედეგების პრეზენტაცია გამართა. მოცემული კვლევის ფარგლებში, სულ 1405 რესპოდენტი გამოიკითხა. კვლევის მიზანი რეგიონში არსებული პრობლემების იდენტიფიკაცია, ასევე თვითმმართველობის საქმიანობის შეფასება და სხვადასხვა საზოგადოებრივი და სახელმწიფო ინსტიტუტების მიმართ მოსახლეობის ნდობის გამოვლენა იყო. აღნიშნული ანგარიში მოიცავდა ინფორმაციის შეგროვებას  საქართველოს პოტენციალის შესახებ, გამოიყენოს თავისი ხელსაყრელი გეოგრაფიული მდებარეობა და ბიზნეს გარემო, რათა გახდეს სატრანზიტო, ლოჯისტიკური და ტურისტული ცენტრი (ჰაბი) კავკასიის რეგიონში. პრეზენტაციის დროს ყურადღება გამახვილდა ბათუმის (და ზოგადად, აჭარის რეგიონის), როგორც პოტენციური რეგიონალური ჰაბის როლზე. ანგარიში მომზადდა USAID G-PAC–ის პროექტის მხარდაჭერით. სხვა პარტნიორები არიან: USAID-ის ეკონომიკური კეთილდღეობის ინიციატივა (EPI), საქართველოს ეროვნული უშიშროების საბჭო და საქართველოს ეროვნული ბანკი. 

სამცხე–ჯავახეთი. 11 აპრილს ახალციხის დემოკრატიული ჩართულობის ცენტრში ორგანიზაცია ,,გენდერული თანასწორობის ქსელმა" შეხვედრა გამართა. შეხვედრის თემა იყო: როგორ ემზადებიან ადგილობრივი თვითმმართველობის არჩევნებისთვის ქალები და აპირებენ თუ არა ისინი პოლიტიკურ ცხოვრებაში ატიურად ჩართვას. შეხვედრას სამცხე-ჯავახეთის ექვსივე მუნიციპალიტეტში მცხოვრები ქალბატონები ესწრებოდნენ. ასევე დისკუსიაში მონაწილეობა გენდერულ თემაზე მომუშავე არასამთავრობო ორგანიზაციების წარმომადგენლებმა და რეგიონში მცხოვრებმა ეთნიკური უმცირესობების წარმომადგენლებმა მიიღეს. შეხვედრის მონაწილეებმა იმსჯელეს პოლიტიკაში ქალის ჩართულობის მექანიზმზე და განიხილეს, რამდენადაა დარღვეული გენდერული ბალანსი არჩევნების დროს და რატომ არის საქართველოს პარლამენტის წევრთა შორის მამაკაცების უმეტესობა.როგორც შეხვედრაზე განაცხადეს, ორგანიზაციის მიზანი ადგილობრივი თვითმმართველობის არჩევნებში რაც შეიძლება მეტი ქალბატონის ჩართვაა.

თბილისი. კონსტიტუციის 42-ე მუხლი პატიმრის ზაზა ჩხიკვაძის გადასარჩენად სასჯელაღსრულების, პრობაციისა და იურიდიული დახმარების სამინისტროს და სახალხო დამცველის აპარატს მიმართავს. ორგანიზაცია მოუწოდებს უწყებებს მიიღონ სათანადო ზომები და გამოინახონ გზა პრობლემის მოსაგვარებლად. „სახელმწიფოს უპირველესი მოვალეობაა იზრუნოს ქვეყნის თვითოეული მოქალაქის სიცოცხლესა და ჯანმრთელობაზე, მიუხედავად მისი სოციალური სტატუსისა. განსაკუთრებით მაღალია სახელმწიფოს პასუხისმგებლობა, როდესაც საქმე ეხება თავისუფლებაშეზღუდულ პირს",  ნათქვამია ორგანიზაციის მიერ გავრცელებულ განცხადებაში. წყარო:ორგანიზაციის გვერდი სოციალურ ქსელში

12 აპრილს, 19:00 საათზე - საერთაშორისო ორგანიზაცია „ქართველ სტუდენტთა მსოფლიო გაერთიანება" მსახიობ გიორგი ყორღანაშვილის დასახმარებლად პოეზიის საღამოს გამართავს. მისამართი: თბილისი, სამეფო უბნის თეატრში

12 აპრილს, 17:00 საათზე, სამოქალაქო მრჩეველთა საბჭოს ორგანიზებით გაიმართება თვითმმართველი ქალაქი ბათუმის საკრებულოს წლიური ანგარიშის პრეზენტაცია. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი

12 აპრილს, 15:00 საათზე გარემოს დაცვის სამინისტროსა და კავკასიის გარემოსდაცვითი არასამთავრობო ორგანიზაციების ქსელის (CENN) ორგანიზებით გამწვანების აქცია ჩატარდება. მისამართი: ახალციხე

12 აპრილს, 14:00 საათზე  საქართველოს რეგიონული განვითარებისა და ინფრასტრუქტურის სამინისტრო და საერთაშორისო ფონდი „მოძრაობა შიმშლის წინააღმდეგ" (ACF Iinternational) მცხეთა-მთიანეთის რეგიონში განხორციელებული ინფრასტრუქტურული პროექტების დახურვის ღონისძიებას წარმოადგენს. მისამართი: წეროვანის დევნილთა დასახლება

12 აპრილს, 12:00 საათზე, „საერთაშორისო გამჭვირვალობა – საქართველო" ანგარიშის –„პოლიტიკური პარტიების ფინანსები 2012 წელს" – პრეზენტაციას გამართავს. მისამართი: თბილისი, სასტუმრო "თბილისი მარიოტი" (თამარ მეფის დარბაზი)

12 აპრილს, 11:30 საათზე არასამთავრობო ორგანიზაცია „საქართველოს მომავლისთვის" წევრები ბრიფინგს გამართავენ.  თემა: 19 აპრილი და სერგეი ლავროვის განცხადება.  მისამართი:თბილისი, ჩიტაძის #3 ა (იტალიის საელჩოს მიმდებარე ტერიტორია)  „პოლიტიკოს" პრესკლუბი

12 აპრილს,14:00 საათზე სამოქალაქო საზოგადოების ინსტიტუტი გამართავს საზოგადოებრივი ორგანიზაციების ვებპორტალის  – www.csogeorgia.org  –  პრეზენტაციას.  მისამართი:  რუსთავი,  დემოკრატიული ჩართულობის ცენტრი. 

12 აპრილს, 19:00 საათზე ჰაინრიჰ ბიოლის ფონდის სამხრეთ კავკასიის რეგიონული ბიურო აწყობს პუბლიკაციის პრეზენტაციას: სტალინის თავსატეხი. მისამართი: თბილისი, ხოვრეთის 38, ჰაინრიჰ ბიოლის ფონდი

შიდა ქართლი. სამოქალაქო საზოგადოების ინსტიტუტი აგრძელებს საზოგადოებრივი ორგანიზაციების ვებპორტალის www.csogeorgia.org- პრეზენტაციებს რეგიონებში. 11 აპრილს გორის დემოკრატიული ჩართულობის ცენტრში საზოგადოებრივი ორგანიზაციების, მედიისა და დაინტერესებული საზოგადოებისთვის გამართულ პრეზენტაციაზე, სამოქალაქო საზოგადოების ინსტიტუტმა მომხმარებელს დეტალურად გააცნო პორტალის შესახებ ინფორმაცია. სხვადასხვა რეგიონში გამართულ პრეზენტაციებს კიდევ ერთი მიზანი აქვს – პორტალის უშუალო მომხმარებლებისგან ინიციატივებისა და წინადადებების გაცნობა, რაც ხელს შეუწყობს პორტალის განვითარებას.

თბილისი.  ინფორმაციის თავისუფლების განვითარების ინსტიტუტმა საქართველოს ფოსტის 2010 წლის ფინანსური ანგარიში გამოაქვეყნა. ინფორმაცია მოიცავს „სახელმწიფო ლატარიის კომპანიისა" და შპს "საქართველოს ფოსტის" 2010, 2011 და 2012 წლების საბალანსო უწყისსა და მოგება-ზარალის ანგარიშგებას.  სრულად წყარო:ორგანიზაციის გვერდი სოციალურ ქსელში

აჭარა. აღმოსავლეთ პარტნიორობის ეროვნული პლატფორმის განცხადებას, რომელიც საიას თანამშრომლებისა და აჭარის შსს მთავარი სამმართველოს უფროსს შორის მომხდარი ინციდენტის საქმის ობიექტური გამოძიების მოთხოვნით გავრცელდა 5 აპრილს, შეუერთდა აჭარაში მოქმედი 14 არასამთავრობო, არაპლატფორმის წევრი ორგანიზაცია. კერძოდ: თავისუფალ ჟურნალისტთა სახლი, ორგანიზაცია „ბათომი", „სთეფ ფოვარდი", საქართველოს დემოკრატიისა და ეკონომიკური განვითარების ინსტიტუტი, განვითარებისა და თანამშრომლობის ხელშეწყობის კავშირი „პროგრესი", სიმართლისა  და სამართლის, ჩაგრულთა და პატიმართა უფლებების დაცვისა და სოციალური უზრუნველყოფის  საერთაშორისო ორგანიზაცია, „არტ ვეი", მეგობრის ხმა, IV Agency, წამების მსხვერპლთა ფსიქო–სოციალური და სამედიცინო რეაბილიტაციის ცენტრი–ბათუმი, საერთაშორისო განათლების ცენტრი- ბათუმი, ახალგაზრდა ბათუმელთა კავშირი „ერთიანობა და კეთილდღეობა",ორგანიზაცია „ჩვენი თაობა", ახალგაზრდა მეცნიერთა კავშირი - „ინტელექტი". განცხადება

თბილისი. 11 აპრილს გერმანული ფონდმა  Bread for the World საზოგადოებრივი ორგანიზაციებისთვის გამართა ვორკშოფში. შეხვედრას ესწრებოდნენ  დონორი ორგანიზაციის რეგიონული პარტნიორი არასამთავრობო ორგანიზაციები საქართველოდან, სომხეთიდან და აზერბაიჯანიდან. ვორქშოფის თემა იყო ორიენტირებული დაგეგმვისა და მონიტორინგის შედეგი და ზეგავლენა. მონაწილეებმა საკუთარ გამოცდილებებზე ისაუბრეს, გაიმართა დისკუსიაც.

11 აპრილს საქართველოს სხვადასხვა რეგიონში ჩატარდა სამოქალაქო საზოგადოების რეგიონული ქსელის მიერ საქართველოს 10 რეგიონში ჩატარებული კვლევის შედეგების პრეზენტაცია. კვლევის მიზანია რეგიონში არსებული პრობლემების, თვითმმართველობის საქმიანობის და სხვადასხვა ინსტიტუტების მიმართ მოსახლეობის ნდობის გამოვლენა. სამოქალაქო საზოგადოების რეგიონული ქსელი 40–მდე რეგიონულ არასამთავრობო ორგანიზაციას აერთიანებს, რომელიც 2012 წლიდან ფუნქციონირებს და მას ფასილიტაციას სამოქალაქო განვითარების სააგენტო „სიდა" უწევს.

თბილისი. საქართველოს ჟურნალისტური ეთიკის ქარტიის საბჭო, სავარაუდოდ, 15 აპრილს შეიკრიბება და განიხილავს ქარტიის აღმასრულებელი დირექტორის ვაკანტური ადგილის დასაკავებლად გამოცხადებულ კონკურსში მონაწილე კანდიდატებს. ქარტიის თავმჯდომარის, გიორგი მგელაძის განცხადებით, აღმასრულებელი დირექტორის თანამდებობის დასაკავებლად, კონკურსის დროს სულ 6 განაცხადი შევიდა. ჟურნალისტური ეთიკის ქარტიის აღმასრულებელი დირექტორის ადგილის დასაკავებლად კონკურსი 29 მარტს გამოცხადდა მას შემდეგ, რაც ყოფილმა აღმასრულებელმა დირექტორმა, თამარ კორძაიამ შუალედურ საპარლამენტო არჩევნებში მონაწილეობა გადაწყვიტა. წყარო:media.ge

თბილისი. გაეროს განვითარების პროგრამის (UNDP) ფინანსური მხარდაჭერით გამოიცა ბროშურა და რუკა, სახელწოდებით „უფასო იურიდიული დახმარების ცენტრები საქართველოში". დოკუმენტები ხელს შეუწყობს თვითდამცველი პირებისათვის კვალიფიციური იურიდიული მომსახურების ხელმისაწვდომობას. „უფასო იურიდიული დახმარების ცენტრები საქართველოში" წყარო: საქართველოს სასამართლოების გვერდი სოციალურ ქსელში

თბილისი. ორგანიზაცია „რადარამის" მიერ თარგმნილი და სულ ახლახანს გამოცემული მაიკლ ლუისის წიგნის შეძენა შესაძლებელია წიგნის მაღაზია ლიგამუსში, პარნასსა და ლატერნაში. ლუისის „ბუმერანგი - მოგზაურობა ახალ მესამე სამყაროში" გამოცემისთანავე ბესტსელერად იქცა. ავტორი  ერთგვარი პირადი კვლევის საფუძველზე აღწერს საკმაოდ საინტერესო და უცნობ ფაქტებს ცალკეული ქვეყნების სახელმწიფო მოხელეთა და მოქალაქეთა ქცევიდან. მიუხედავად იმისა, რომ წიგნი ისეთ რთულ და მნიშვნელოვან საკითხს ეხება, როგორიცაა მსოფლიო ეკონომიკური კრიზისი და ცალკეული ქვეყნების როლი აღნიშნული კრიზისის გამწვავებაში, ის საკმაოდ მარტივად და  გასაგებად იკითხება.  წყარო: ორგანიზაციის გვერდი სოციალურ ქსელში