თბილისი. „მოხალისეობის განვითარება სამოქალაქო ცვლილებებისათვის" პროექტის ფარგლებში კავკასიის კვლევითი რესურსების ცენტრის (CRRC –საქართველო) საქართველოს ოფისში „ახალგაზრდების დამოკიდებულება მოხალისეობის ფენომენისადმი" კვლევაში მონაწილე მოხალისეებისათვის ტრენინგი გაიმართა. ტრენინგის დაესწრო 25 სოციოლოგიის სპეციალობის სტუდენტი ილიას სახელმწიფო უნივერსიტეტიდან და თბილისის ივანე ჯავახიშვილის სახელობის სახელმწიფო უნივერსიტეტიდან. პროექტი ხორციელდება ევრაზიის თანამშრომლობის ფონდის მხარდაჭერით. წყარო:ორგანიზაციის გვერდი სოციალურ ქსელში

მცხეთა–მთიანეთი. „თავისუფალი დებატების ლიგისა" და „თავისუფლების კლუბის" ორგანიზებით 5-7 აპრილს, ბაზალეთის ტრენინგ ცენტრში გაიმართა „თავისუფლების ვიქენდი". მონაწილეებმა მოისმინეს ორი ლექცია სოციალური უფლებების შესახებ და იდებატეს ბრიტანული პარლამენტის ფორმატით. დებატებში გამოვლინდნენ გამარჯვებულები და დაჯილდოვნდნენ სპეციალური პრიზებით.  წყარო:ორგანიზაციის გვერდი სოციალურ ქსელში

10 აპრილს, 14:00 საათზე, აშშ-ს საერთაშორისო განვითარების სააგენტოს (USAID) ეკონომიკური აღმავლობის ინიციატივის (EPI) ორგანიზებით, თბილისის სახელმწიფო უნივერსიტეტის ეკონომიკის საერთაშორისო სკოლის (ISET) ოფისში, გაიმართება მეორე ღონისძიება მრგვალი მაგიდის შეხვედრების სერიიდან - "სტრატეგიული დიალოგი საქართველოს კონკურენტუნარიანობაზე". მის: ზანდუკელის ქ.#16 

10 აპრილს, 12:00 საათზე ადვოკატი მამუკა ნოზაძე ევროპულ სასამართლოში განხილვადამთავრებულ საქმეებთან მიმართებაში საქართველოს მთავრობის დამოკიდებულებასა და სასჯელის გადავადების შერჩევითობაზე  პრესკონფერენციას გამართავს.   მისამართი: თბილისი, ადვოკატთა ასოციაციის ოფისი

თბილისი. საერთაშორისო გამჭვირვალობა–საქართველომ ყოველკვირეული საპარლამენტო ამბების აუდიო პოდკასტი გამოაქვეყნა. 8 აპრილის გამოშვების თემებია: საზოგადოებრივი მაუწყებლობის სამეურვეო საბჭოს რეფორმა, შრომის კოდექსი, ნაფიც მსაჯულებთან დაკავშირებული ცვლილებები, საარჩევნო კოდექსი, სავალდებულო სამხედრო სამსახურის ვადა, იუსტიციის საბჭოს რეფორმა, პარლამენტის თბილისის შენობის დარბაზების რეკონსტრუქცია.  საპარლამენტო ამბების პოდკასტი – 8 აპრილი  წყარო: transparency.ge

კახეთი. 8 აპრილს, თელავის დემოკრატიული ჩართულობის ცენტრში, თელავის მუნიციპალიტეტის თვითმართველობის წარმომადგენლებსა და არასამთავრობო ორგანიზაციებს შორის შეხვედრა გაიმართა. შეხვედრა მიზნად ისახავდა თვითმართველობის საქმიანობის გამჭირვალობის ხელშეწყობას, ასევე, კომუნიკაციას თვითმართველობასა და არასამთავრობო სექტორს შორის.  შეხვედრას ესწრებოდნენ საინიციატივო ჯგუფების, საზოგადოებრივი გაერთიანებების წარმომადგენლები და რიგითი მოქალაქეები.  შეხვედრა კითხვა–პასუხის რეჟიმში მიმდინარეობდა და განიხილეს ყველა ის საკითხი რაც დღეს ხალხს აწუხებს. თელავის მუნიციპალიტეტის გამგებელი ზურაბ ყურაშვილი: ,,შევხვდით არასამთავრობო ორგანიზაციებთან, რომ მათთან ერთად განგვეხილა პროექტები, როგორც მოკლევადიანი, ასევე გრძელვადიანი. მსგავს შეხვედრებს არ ექნება ერთჯერადი ხასიათი".

თბილისი. კავკასიურმა სახლმა ინტერნეტ დღიურის მორიგი გამოშვებები გამოაქვეყნა. 29 მარტს, რუბრიკაში –„სილუეტი" წარმოდგენილია ინტერვიუ, რომელიც 2011 წელს ჩაიწერა მხატვართან და მწერალთან თემო ჯაფარიძესთან. 5 აპრილის გამოშვების თემაა ქართულ–აფხაზური ურთიერთობები. თემაზე კავკასიური სახლის წარმომადგენელთან ერთად პოლონელი მოხალისე საუბრობს.   29 მარტის კავკასიური დღიური 5 აპრილის კავკასიური დღიური წყარო:ორგანიზაციის გვერდი სოციალურ ქსელში

სამცხე-ჯავახეთი. ახალციხის N1 საჯარო სკოლის სამოქალაქო კლუბის წევრებმა, მცირე გრანტების პროექტის ,,ახალგაზრდა ჟურნალისტის" ფარგლებში, ეკოლოგიური ღონისძიება მოაწყვეს. დამამთავრებელი კლასის მოსწავლეებმა სკოლის ეზო ნარჩენებისგან გაწმინდეს და საგულდაგულოდ დაასუფთავეს. შემდეგ კი ჟურნალისტებთან ერთად აქციის შესახებ სიუჟეტი მოამზადეს.  პროექტი ,,ახალგაზრდა ჟურნალისტი"  ადგილობრივ ტელეკომპანია მეცხრე არხთან თანამშრომლობით, ამერიკული ორგანიზაცია ,,ფიეიჩ ინტერნეიშენალისა" და აშშ განვითარების სააგენტოს დაფინანსებით, 2013 წლის იანვრიდან ხორციელდება. დამამამთავრებელი კლასის მოსწავლეები ჟურნალისტიკის პროფესიას  ეცნობიან და სიუჟეტების მომზადებაში მედიის წარმომადგენლებთან ერთად მონაწილეობენ. 

თბილისი. 7 აპრილს ფემინისტების დამოუკიდებელმა ჯგუფმა ანტი-აბორტების აქციის საწინააღმდეგო აქცია კანცელარიასთან გამართა.  აქციის მონაწილეების განცხადებით : „აბორტი ქალის უფლებაა, მშიერი ბავშვების სიცოცხლეა დასაცავი და არა ემბრიონის, აბორტის აკრძალვა ზრდის სიკვდილიანობას, სოციალური პრობლემების მოგვარება ამცირებს აბორტების რაოდენობას და არა მისი კრიმინალიზება".  წყარო:ორგანიზაციის გვერდი სოციალურ ქსელში

კახეთი. 7 აპრილს ნუკრიანის საგანმანათლებლო ცენტრში ახალგაზრდებისთვის ჩატარდა სემინარი, რომელზედაც ისაუბრეს თემაზე – „პრობლემების ანალიზი, გადაჭრის გზები და მიზნები". მსმენელებს ნუკრიანის სახელოსნოებში შეკერილი მაისურები და ჩანთები გადაეცათ.  წყარო:ორგანიზაციის გვერდი სოციალურ ქსელში

იმერეთი. 5 აპრილს ქუთაისის მე-19 საჯარო სკოლაში ჟურნალისტმა დავით ლიკლიკაძემ სამოქალაქო კლუბის წევრებისათვის ტრენიგი ჩაატარა თემაზე ..ჟურნალისტიკის პრინციპები’’. ტრენინგზე განიხილეს ის თემები და საკითხები, რასაც სამოქალაქო კლუბი სკოლაში რადიო კვანძის ფუნქციონირებისთვის გამოიყენებს. ტრენინგი სამოქალაქო განათლებისა და პედაგოგთა გადამზადების პროგრამის მცირე გრანტების კონკურსში გამარჯვებული პროექტის „ჩემი ხმა მომავალში" ფარგლებში ჩატარდა.  წყარო:ორგანიზაციის გვერდი სოციალურ ქსელში

სამცხე–ჯავახეთი. არასამთავრობო ორგანიზაცია დემოკრატ მესხთა კავშირი, ანახლებს პროექტს „ახალგაზრდული საკრებულო" და მასში მონაწილეობისათვის იწვევს ახალციხის მუნიციპალიტეტში მცხოვრებ 18-25 წლამდე ახალგაზრდებს. მსურველებმა გთხოვთ წარმოადგინოთ CV და სამოტივაციო წერილი მისამართზე: ახალციხე, რუსთაველის 26, დემოკრატ მესხთა კავშირის ოფისი. წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაციები საარჩევნო კოდექსში შესატან ცვლილებებთან დაკავშირებით, 8 აპრილს განცხადებას ავრცელებენ. 25 მარტს საქართველოს პარლამენტის ბიურომ მიიღო გადაწყვეტილება „საქართველოს საარჩევნო კოდექსში" შესატანი ცვლილებების დაჩქარებული წესით განხილვის შესახებ. არასამთავრობო ორგანიზაციები მოუწოდებენ საქართველოს პარლამენტს საქართველოს „საარჩევნო კოდექსში შესატან ცვლილებებთან დაკავშირებით საზოგადოებას ფართო საჯარო დისკუსიის გამართვის შესაძლებლობა მისცეს და არ დაუშვას აღნიშნული ცვლილებების დაჩქარებული წესით მიღება". სრულად წყარო: სამართლიანი არჩევნების გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა თბილისის, ილიას,  სოხუმის, აკაკი წერეთლის,  თელავის სახელმწიფო უნივერსიტეტებიდან მიღებული ინფორმაცია გამოაქვეყნა. დოკუმენტები მოიცავენ ინფორმაციას პრემიების, განთავისუფლებული თანამშრომლების, საშტატო ნუსხის,  ავტოპარკზე გაწეული ხარჯების, დაფინანსებული ღონისძიებების, საჯარო ინფორმაციის გაცემისა და ბიუჯეტის შესრულების ანგარიშებს, ინფორმაციას თანამშრომლების, თანამდებობის პირების ბიოგრაფიული მონაცემების, დაფინანსებული ღონისძიებების, ასევე 10 დეკემბრის ანგარიშის შესახებ. წყარო: opendata.ge  ილიას სახელმწიფო უნივერსიტეტი  სოხუმის სახელმწიფო უნივერსიტეტი  აკაკი წერეთლის სახელმწიფო უნივერსიტეტი  თელავის სახელმწიფო უნივერსიტეტი   თბილისის სახელმწიფო სამედიცინო უნივერსიტეტი თბილისის სახელმწიფო უნივერსიტეტი

სამცხე–ჯავახეთი. არასამთავრობო ორგანიზაციის – „ვიმეგობროთ შეზღუდული შესაძლებლობების მქონე ადამიანებთან" –  ორგანიზებით ახალციხის ციხეს უსინათლო ბავშვთა სკოლისა და ქართულ-ბრიტანული აკადემიის მოსწავლეები ესტუმრნენ.  უსინათლო ბაშვებს გამცილებლობას ქართულ-ბრიტანული აკადემიის მოსწავლეები უწევდნენ. მათ სპეციალური გადამზადება გაიარეს, რათა უსინათლოებს არ შექმნოდათ პრობლემები გადაადგილებისას. ორგანიზაცია „ვიმეგობროთ შეზღუდული შესაძლებლობების მქონე ადამიანებთან” წარმომადგენელი გიორგი ჯუანშერიშვილის განმარტებით: ექსკურსიაზე უსინათლო, მცირე მხედველი ან მხედველი ბავშვები დააწყვილეს. მეწყვილეები ბავშვებს უხსნიდნენ და ასწავლიდნენ ტექნიკას, თუ როგორ უნდა შეიგრძნოს და აღიქვას უსინათლომ გარემო, რადგან უსინათლო ადამიანი ხელის მოკიდებით აღიქვამს სამყაროს.  გიორგი ჯუანშერიშვილი თქმით ,,ქართულ-ბრიტანული აკადემიის მოსწავლეებს უკვე სწორი შეხედულება შეექმნებათ უსინათლო ბავშვებზე, არ ექნებათ სტერეოტიპული მიდგომები და მათი რეალური შესაძლებლობები ეცოდინებათ: ამ პროექტის მიზანიც სწორედ ისაა, რომ მოხდეს ბავშვების საზოგადოებაში ინტეგრირება, საზოგადოებამ დაინახოს და სწორად აღიქვას უსინათლო ბავშვები ან მცირე მხედველი ბავშვების შესაძლებლობები”. 

თბილისი. „ლიბერალიზმის სასწავლო ცენტრში" 5 აპრილს ჟურნალისტმა ზვიად ქორიძემ ციკლიდან „საუბრები ილიაზე" მორიგი ლექცია გამართა. ამჯერად საუბარი ილიას შემოქმედებაში დედათა საკითხს შეეხო. ლექციაზე განხილული იყო გენდერული თანასწორობა და საერთოდ ადამიანთა თანასწორობა, როგორც განვითარებული ქვეყნის აუცილებელი შემადგენელი კომპონენტი. ლექციაზე  გაიხსესნეს ის პირველი ნაბიჯები, რომლებიც მსოფლიოს სხვადასხვა ქვეყნებში  გადადგეს ქალებმა  საზოგადობაში სრულფასოვანი ადგილის დასამკვიდრებლად. ასევე ნაჩვენები იყო ის ფუნდამენტური განსხვავებები, რითაც ეს პროცესი  განსხვავდებოდა დასავლეთ ევროპაში, ამერიკასა და რუსეთში. დისკუსიის ერთ-ერთი თემა გახდა გენდერული თანასწორობის საკითხი დღევანდელ საქართველოში და ამ კუთხით ცვლილებები შრომის ბაზარზე. წყარო:ორგანიზაციის გვერდი სოციალურ ქსელში

კახეთი.  სიღნაღის მუნიციპალიტეტის სოფელ ანაგაში მდებარე ,,დღის ცენტრს’’ პრობლემები აქვს. მიზეზი ფინანსებია, რომელიც სპეციალური საჭიროებების მქონე ბავშვების ყოველდღიური ტრანსპირტირებისთვის არის საჭირო. დაახლოებით ერთი თვის წინ ანაგელმა მშობლებმა შვილებისთვის თავისივე ინიციატივით ე.წ. დღის ცენტრი დაარსეს. ერთ-ერთმა თანასოფლელმა მათ სახლი დაუთმო. „სახლიდან აქ მოსასვლელად  დღეში ათი ლარი მაინც გვჭირდება, რისი საშუალებაც არ გვაქვს, ამას თან ახლავს პრობლემებიც. იმედია ვინმე დაგვეხმარება და ცენტრის დახურვა არ მოგვიწევს’’, განაცხადა მშობელმა ნაზი შოშიაშვილმა.

იმერეთი. სამეცნიერო–ინტელექტუალური კლუბის „თაობათა დიალოგის" ორგანიზებით RICDOG მოხალისეებისთვის გაიმართა ორდღიანი ტრენინგი თემაზე „პიროვნებათშორისი კონფლიქტი". ტრენინგის მიზანი იყო სამიზნე ჯგუფის ინფორმირება პიროვნებებს შორის კონფლიქტის მოგვარების თაობაზე.თუ როგორ უნდა მოგვარდეს იგი, რა უნდა გაითვალისწინონ რომ მართული გახდეს კონფლიქტი. ტრენინგი აგებული იყო არაფორმალური განათლების მეთოდიკაზე. წყარო:ორგანიზაციის გვერდი სოციალურ ქსელში

აჭარა. 7 აპრილს ჯანმრთელობის საერთაშორისო დღეს ბათუმის ახალგაზრდული ცენტრის წარმომადგენლები ეწვივნენ ბათუმის წმინდა ეკატერინეს სახელობის სათნოების სავანეს და გამართეს საქველმოქმედო აქცია, რომლის დროსაც იქ მცხოვრებ მოხუცებს საჩუქრად გადასცეს დიაბეტური ტკბილეული და შაქრის საზომი აპარატი. აქტივობა განხორციელდა „ეროვნული ინტეგრაციის გაძლიერება საქართველოში" პროექტის ფარგლებში, რომელსაც ახორციელებს საქართველოს გაეროს ასოციაცია აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. თემის განვითარების რესურს ცენტრმა სამუშაო შეხვედრა გამართა – „თემთან მუშაობა - სათემო ფონდების უცხოური გამოცდილება და მისი განვითარების პერსპექტივა კავკასიის რეგიონში". შეხვედრაზე თემის განვითარების კოალიციამ წარადგინა კოალიციის 2012 წლის გამოცემა „თემთან მუშაობა და თემის განვითარება". წყარო: სათემო განვითარების ცენტრის გვერდი სოციალურ ქსელში

სამეგრელო. ზუგდიდში, ახლადდაფუძნებული არასამთავრობო ორგანიზაცია „სამეგრელოს ხმის" ინიციატივით, თვითმმართველობის განვითარების ახალი სტრატეგიის კონცეფციის განხილვა გაიმართა, 5 აპრილს, დემოკრატიული ჩართულობის ცენტრში. შეხვედრას,   სხვა არასამთავრობო ორგანიზაციების, ზუგდიდის მუნიციპალიტეტის გამგეობის,  საკრებულოს თანამშრომლები და მოქალაქეები ესწრებოდნენ.  ორგანიზაციის დამფუძნებლის თენგიზ თქმით,არასამთავრობო ორგანიზაციის საქმიანობის ერთ-ერთი მთავარი მიმართულება თვითმმართველობის განვითარების ახალი სტრატეგიის მოსახლეობისთვის გაცნობა და მათთან ერთად კონკრეტული წინადადებების, რეკომენდაციების  შემუშავება იქნება. 

აჭარა. 5 აპრილს, ბათუმის დემოკრატიული ჩართულობის ცენტრში, „ინვალიდ-მეომართა და დაღუპულ მებრძოლთა მეუღლეთა კავშირმა" დისკუსია გამართა, თემაზე: „გენდერული თანასწორობა პოლიტიკურ პროცესებში".  დისკუსიის მიზანი იყო მოსახლეობის ცნობიერების ამაღლება გენდერული თანასწორობის საკითხებში, გენდერული თანასწორობის ქსელის მიზნების, საქმიანობისა და აქტივობების შესახებ. შეხვედრას ესწრებოდნენ აჭარის რაიონებიდან მოწვეული წარმომადგენლები. დისკუსიაში ასევე მონაწილეობდნენ აჭარში მცხოვრები აქტივისტი/ლიდერი ქალები, გენდერულ თემაზე მომუშავე არასამთავრობო და საერთაშორისო ორგანიზაციების, ხელისუფლების, პოლიტიკური პარტიების, სხვადასხვა სოციალური ჯგუფების წარმომადგენელი ქალბატონები.