თბილისი. მედიის ადვოკატირების კოალიცია მიმართავს საქართველოს პარლამენტის თავმჯდომარეს, ბატონ შალვა პაპუაშვილს, დაუყოვნებლივ აღუდგინოს ჟურნალისტებს აკრედიტაცია პარლამენტში, უზრუნველყოს საკანონმდებლო ორგანოში ჟურნალისტების შეუფერხებელი და უსაფრთხო სამუშაო გარემო, კონსტიტუციით გარანტირებული გამოხატვის თავისუფლების დაცვა, განსაკუთრებით ამ კვირას დაგეგმილი „რუსული კანონის“ განხილვის დროს.   სრულად... წყარო: კოალიციის გვერდი სოციალურ ქსელში

6 მარტს, 19:00 საათზე, საქართველოს ახალგაზრდა იურისტთა ასოციაცია (საია) ევროინტეგრაციის საკითხებზე, ევროკომისიის რეკომენდაციების შესრულების მნიშვნელობასა და ამ მიმართულებით საქართველოს პარლამენტში მიმდინარე პროცესებზე სასაუბროდ იწვევს დაინტერესებულ სტუდენტებს. სრულად...

6 მარტს, 18:00 საათზე, საქართველოს ენისა და მეტყველების თერაპევტთა ასოციაციის, მაკ ჯორჯიასა და მშობლის სკივრის გუნდის ორგანიზებით, გაიმართება საინფორმაციო შეხვედრა - ალტერნატიული და აუგმენტური კომუნიკაცია (ააკ), როგორც კომუნიკაციის განვითარების გზა. სრულად...

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. საქართველოს პენ-ცენტრი მიიჩნევს, რომ ე.წ. „ხალხის ძალის“ ინიცირებული და „ქართული ოცნების“ მიერ მხარდაჭერილი ორივე კანონპროექტი ე.წ. „უცხოური გავლენის აგენტების“ შესახებ, თავისი შინაარსით, ცალსახად და ერთმნიშვნელოვნად წარმოადგენს ანალოგიური რუსული კანონის საქართველოში დაკანონების მცდელობას. „აღნიშნული კანონის მიღებით, საქართველოს პარლამენტი სამუდამოდ უსპობს ჩვენს ქვეყანას ევროატლანტიკური ინტეგრაციის პერსპექტივას და მიმართულია თავისუფალი სიტყვის, გამოხატვის თავისუფლებისა და ქართული სახელმწიფოებრიობის წინააღმდეგ“, აღნიშნულია განცხადებაში. სრულად... წყარო: manifest.ge

თბილისი. „ჰელფინგ ჰენდ-ი” 2023 წლის 10 მარტს, თბილისში, მოხალისეობის ყოველწლიურ გამოფენა-ფორუმს გამართავს. ღონისძიებას რამდენიმე წლის წინ, მშვიდობის კორპუსის მოხალისეების მხარდაჭერით ჩაეყარა საფუძველი. ღონისძიების მიზანია მოხალისეობის, როგორც დემოკრატიული საზოგადოების განვითარების ერთ-ერთი მძლავრი მექანიზმის, პოპულარიზაცია და ახალგაზრდებისა და, ზოგადად, მოქალაქეების მოხალისეობრივ პროგრამებში აქტიური ჩართულობის ხელშეწყობა. რეგისტრაცია გამოფენაში მონაწილე ორგანიზაციებისათვის მიმდინარეობს 2023 წლის 3 მარტამდე... ღონისძიების პარტნიორია საქართველოს ეროვნული უნივერსიტეტი. სრულად... წყარო: ორგანიზაციის გვერდი სოციალურ ქსელში

თბილისი. სოციალურ მეცნიერებათა ცენტრი (CSS) მიმართავს მის ერთ-ერთ დამფუძნებელს, საგარეო ურთიერთობათა კომიტეტის თავმჯდომარის მოადგილეს, გიორგი ხელაშვილს: „არ მისცეთ ხმა კანონს თქვენ მიერ დაფუძნებული და სხვა მსგავსი ორგანიზაციების წინააღმდეგ, რომელთა საქმიანობაშიც, წლების მანძილზე, თავად დიდი წვლილი შეიტანეთ!“ CSS 2003 წელს დაარსებული არასამთავრობო ორგანიზაციაა და მისი მიზანია ხელი შეუწყოს კრეატიული, მტკიცებულებებზე დაფუძნებული კვლევის განვითარებას სოციალური მეცნიერებების მიმართულებით საქართველოში, რაც ღირებულების მომტანი იქნება საზოგადოებისთვის. ცენტრში ოთხი კვლევითი განყოფილებაა: საგარეო პოლიტიკა და უსაფრთხოება; ევროკავშირში ინტეგრაცია; გენდერის კვლევები; განათლება. სრულად... წყარო: css.ge

რეპრესირებული მწერლების მუზეუმი 2 მარტს, მაჩაბლის 13-ში რეპრესირებული მწერლების მუზეუმი გაიხსნება! მუდმივმოქმედი ექსპოზიცია და დროებითი გამოფენა ტოტალიტარული სახელმწიფოსა და მწერლების დაპირისპირების ტრაგიკულ ამბებს მოგვიყვება. მოგვიყვება იმ მეთოდების შესახებ, რომლებსაც სისტემა „მწერლობის მოსათვინიერებლად“ იყენებდა.  3 თვის განმავლობაში გამოფენა დაეთმობა პაოლო იაშვლის საიუბილეო ექსპოზიციას.  1937 წლის ზაფხულში მაჩაბლის 13-ში ყოველ კვირას იმართებოდა მწერალთა კავშირის სხდომები, სადაც მწერლებს ერთმანეთისთვის გამოჰქონდათ განაჩენი და „ამხელდნენ ხალხის მტრებს“. ერთ-ერთი მთავარი სამიზნე პაოლო იაშვილი იყო.  1937 წლის 22 ივლისს დაკითხვებითა და გაურკვევლობით გაწამებულმა პოეტმა სანადირო თოფით მოიკლა თავი მწერალთა სასახლის მეორე სართულზე. ექსპოზიციაზე იმუშავეს საბჭოთა წარსულის კვლევის ლაბორატორიამ, მაგდა ცოცხალაშვილმა, მარიამ ნატროშვილმა, დეთუ ჯინჭარაძემ და ნინო ანდრიაშვილმა. მუზეუმის ფინანსური მხარდამჭერები არიან: საქართველოში ამერიკის საელჩო და იუნესკოს პროექტი „თბილისი - წიგნის მსოფლიო დედაქალაქი“.  წყარო: რეპრესირებული მწერლების მუზეუმი

ნორვეგიის საგარეო საქმეთა სამინისტრო შეშფოთებულია „უცხოური გავლენის გამჭვირვალობის შესახებ“ კანონპროექტით, რომელიც სამოქალაქო საზოგადოების ორგანიზაციებს „უცხოელ აგენტებად“ განსაზღვრავს. შემოთავაზებული კანონპროექტი ეწინააღმდეგება ქართველი ხალხის მტკიცე მისწრაფებებს ევროკავშირისკენ და ასევე, ადამიანის უფლებათა დაცვის საერთაშორისო ვალდებულებებს. კანონპროექტი უარყოფითად აისახება ნორვეგია-საქართველოს თანამშრომლობაზე. ნორვეგია მოუწოდებს კანონის ინიციატორებს, იმოქმედონ დემოკრატიული ინტერესების ფარგლებში. სრულად... წყარო: twitter.com

ქვემო ქართლი. ქვემო ქართლის სამოქალაქო საზოგადოების ნაწილი ეხმაურება საქართველოს პარლამენტში ინიცირებულ კანონპროექტებს უცხოური გავლენის გამჭვირვალობის და აგენტების შესახებ. ზაურ ხალილოვი, სამოქალაქო ინტეგრაციის ფონდი: -     „რუსეთში, მსგავსმა კანონმა გაანადგურა სამოქალაქო საზოგადოება. თუ ჩვენი ქვეყანაც მიისწრაფის ამისკენ, რომ შეუზღუდოს სამოქალაქო სექტორს და საერთაშორისო ორგანიზაციებს მუშაობა, ამ გზით, არ მისცეს საშუალება სოციალური, სამართლებრივი და  ეკონომიკური პროექტების განხორციელების, ეს არაფერს სასიკეთოს არ მოუტანს ქვეყანას“. უფლებადამცველი სამირა ბაირამოვა:  -    „ეს კანონი არის ღია ბრძოლა საზოგადოებრივი სექტორის წინააღმდეგ, პირდაპირი შეტევაა. დიდი ხანი მიმდინარეობდა ეს პროცესი, მაგრამ ახლა ეს ყველაფერი „კანონიერად“ მოხდება“. გულიკო შოშიტაშვილი, „საქართველოს სამოქალაქო საზოგადოების განვითარების ასოციაცია“ (ACSDG): -     „ეს კანონი, თუკი ამ სახით იქნება მიღებული, ყველა იმ არასამთავრობო და მედიაორგანიზაციას, რომელსაც დღეს აქვს უნარი, ცოდნა და შესაძლებლობა გამოთქვას კრიტიკული აზრი, არსებობის შესაძლებლობას მოუსპობს. ვინაიდან ფინანსური დამოუკიდებლობაა ამისი მთავარი პირობა, რაც დღევანდელ საქართველოში მხოლოდ საერთაშორისო ორგანიზაციების დახმარებით არის შესაძლებელი”. გვანცა შიშინაშვილი, „სამოქალაქო აქტივობისა და რეგიონული განვითარების ცენტრი“: -    არასამთავრობო სექტორისა და დასავლური დონორების ერთობლივმა მუშაობამ ჩვენს რეგიონში, ქვემო ქართლში, უამრავი შესაძლებლობა გააჩინა და დასანანია, რომ საზოგადოების ფართო წრეებისთვის ამ კანონპროექტის საზიანო შედეგები არასამთავრობო სექტორს არ სცდება. არადა რუსული კანონპროექტის მიღების შემთხვევაში მოწყვლადი ჯგუფები (შშმ პირები, ბავშვები, ქალები, ხანდაზმულები, სპეციალური საჭიროების მქონენი, უმცირესობები და ა.შ.) რჩებიან მათ საჭიროებებზე ორიენტირებული სერვისებისა და შესაბამისი აქტივობების გარეშე; შესაძლებლობების მიღმა რჩებიან ახალგაზრდებიც (მათ შორის სასკოლო ასაკის) და მათთან ერთად პროფესიული ჯგუფებიც, რომელთათვისაც უამრავი მოხალისეობრივი და გაცვლითი საგანმანათლებლო პროგრამა შექმნა დასავლურმა დონაციებმა; გვანცა თვალიაშვილი, ახალგაზრდული მუშაკი: -    ეს კანონპროექტი არის დიქტატურის დამყარების გამოვლინება, ქვეყნის რეგრესი და დემოკრატიაზე უარის თქმა. აგრეთვე ყველა იმ სიკეთისა თუ შესაძლებლობის აკრძალვა, რომელიც გვაახლოებს განვითარებულ სამყაროსთან. როზი დევნოზაშვილი „ნეკერი-ქვემო ქართლის სათემო ორგანიზაცია“: -    უცხოური გავლენის აგენტები იმიტომ ვართ, რომ თანამოაზრეები ერთად ბავშვების კეთილდღეობისთვის ყოველდღიურად ვშრომობთ?! ბაღებსა და სკოლებში ბავშვების საჭიროებებსა და ინტერესებზე მორგებული გარემოს შესაქმნელად გეგმაზომიერ აქტივობებს რომ ვახორციელებთ, ამიტომ?! შეკითხვები რომ გვაქვს და პრობლემების იდენტიფიცირებას ვცდილობთ, რათა ჩვენი დახარჯული რესურსი მათი მოგვარებისკენ მივმართოთ, ამიტომ?! ფიქრობენ, რომ ამ ყველაფერს უცხოური გავლენის გამო ვაკეთებთ? უცხოური ქვეყნების ინტერესია, როცა ფინანსურ მხარდაჭერას გვიცხადებენ და საქართველოს ინტერესი, არა, რომ ერთხელ და სამუდამოდ ღირსეულად ვიცხოვროთ შემდგარ ქვეყანაში?! მასალის ავტორი: მანონ ბოკუჩავა სრულად... წყარო: qvemoqartli.ge

თბილისი. საქართველოს პროფკავშირების გაერთიანება მიიჩნევს, რომ უცხოური გავლენის გამჭვირვალობის კანონპროექტები, უხეშად არღვევს თავად საქართველოს კონსტიტუციით გარანტირებულ გამოხატვისა და გაერთიანების თავისუფლებებს. ასევე, ეწინააღმდეგება საქართველოს საკონსტიტუციო სასამართლოს მიერ დამკვიდრებულ პრაქტიკას უფლებათა შეზღუდვის „ლეგიტიმურობის ტესტთან“ დაკავშირებით. „...როცა ქვეყენაში უამრავი გამოწვევაა და საქართველო ემზადება ევროკავშირის წევრობის კანდიდატის სტატუსის მისაღებად, გაუგებარია, ევროკავშირის 12-პუნქტიანი გეგმის რომელი პუნქტის შესასრულებლად არის საჭირო „უცხოური გავლენის გამჭვირვალობის შესახებ“ კანონის მიღება, მით უფრო, რომ განმარტებით ბარათებში ამის შესახებ ფაქტობრივად  არაფერია ნათქვამი. საქართველოს პროფკავშირების გაერთიანება ხაზს უსვამს, რომ ევროინტეგრაცია ჩვენი ქვეყნის მოქალაქეების ურყევი ნებაა და საქართველოს პარლამენტმა, თავისი კომპეტენციის ფარგლებში, ამისთვის ყველაფერი უნდა გააკეთოს. ამავდროულად, მოსახლეობის პრიორიტეტი, არაერთი სოციალური გამოკითხვის თანახმად, მწვავე შრომითი და სოციალური პრობლემების გადაჭრაა, რაც, ასევე, არის ევროინტეგრაციის მნიშვნელოვანი ნაწილი. პროფკავშირების გაერთიანება მიმართავს პარლამენტს, არ დაუჭიროს მხარი „უცხოური გავლენის გამჭვირვალობის შესახებ“ კანონპროექტებს და გააგრძელოს მუშაობა ევროკავშირის 12-პუნქტიანი გეგმის შესასრულებლად“. სრულად... წყარო: gtuc.ge

ამ წუთებში, „სოციალური სამართლიანობის ცენტრი“ სასტუმრო „თბილისი მარიოტში“, ახალი კვლევის „შრომის ანაზღაურების გაუმჭვირვალობა იუსტიციის უმაღლეს საბჭოში“ პრეზენტაციას მართავს. მისამართი: თბილისი, შოთა რუსთაველის გამზ. 13

თბილისი. ადამიანის უფლებათა კომისარმა დუნია მიატოვიჩმა საქართველოს პარლამენტის თავმჯდომარეს „უცხოური გავლენის გამჭვირვალობის“ კანონპროექტის შესახებ წერილი მისწერა. „გამჭვირვალობა შეიძლება იყოს ლეგიტიმური ინტერესი. მიუხედავად ამისა, ეს მიზანი არ უნდა მიიღწეოდეს არაკომერციული ორგანიზაციებისა და მედია საშუალებათა მიერ თავიანთი უფლებებითა და თავისუფლებებით სარგებლობის, მათი ლეგიტიმური საქმიანობის დაზიანებით. ანგარიშგების მოთხოვნა, შემოსავლის წყაროს მიუხედავად, უნდა ეფუძნებოდეს თანაბარ და მიუკერძოებელ მიდგომას. ნებისმიერი ჩარევა ამ სფეროში უნდა შეესაბამებოდეს აუცილებლობისა და პროპორციულობის პრინციპებს, როგორც ამას ითვალისწინებს ადამიანის უფლებათა ევროპული სასამართლოს პრეცედენტული სამართალი.“ წერილის ქართული ვერსია... წყარო: www.coe.int

თბილისი. „საერთაშორისო გამჭვირვალობა – საქართველოს“ ინფორმაციით, ორგანიზაციის იურისტების დახმარებით, მოქალაქე გია აბულაძემ ბათუმის საკრებულოში დაკარგული სამსახური დაიბრუნა. აბულაძე სოციალურ ქსელში, არასამუშაო დროს, მისი პირადი პოლიტიკური შეხედულების გამოხატვის გამო უკანონოდ გაათავისუფლეს. სრულად... წყარო: ორგანიზაციის გვერდი სოციალურ ქსელში

თბილისი. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრი (GCRT) აქვეყნებს 2022 წლის საქმიანობის შემაჯამებელ ანგარიშს. ორგანიზაცია 22 წელია ზრუნავს სასტიკი და არაჰუმანური მოპყრობის მსხვერპლებსა და ღრმად ტრავმირებულ ადამიანებზე, მათ შორის ოჯახში და გენდერული ნიშნით ძალადობის მსხვერპლ ქალებზე, ბავშვებსა და მოზარდებზე, იძულებით ადგილნაცვალ პირებზე, უგზოუკვლოდ დაკარგული პირების ოჯახის წევრებზე, ომით დაზარალებულ ადამიანებზე. 2022 წლის განმავლობაში, GCRT-ის ფსიქო-სოციალური და სამედიცინო სერვისით 390 პირმა ისარგებლა, ჩატარდა 2616 კონსულტაცია, რეფერალური სერვისით ისარგებლა 185 ადამიანმა. გასულ წელს ორგანიზაციამ ახალი სტრატეგიული მიმართულება დაამატა თავის საქმიანობას და შექმნა ციფრული ფსიქოსაგანმანათლებლო სივრცე - აისი, რომლის მთავარი მიზანია საზოგადოებაში მტკიცებულებებსა და უახლეს კვლევებზე დაფუძნებული, სანდო ინფორმაციის გავრცელება. ანგარიშის ბმული... წყარო: gcrt.ge

თბილისი. ამერიკის შეერთებული შტატების ელჩი საქართველოში კელი დეგნანი პუბლიკასთან ინტერვიუში ამბობს, რომ „უცხოური გავლენის გამჭვირვალობის შესახებ“ კანონპროექტს ძალიან მნიშვნელოვანი გავლენა ექნება ამერიკის შესაძლებლობებზე, გააგრძელოს სხვადასხვა სახის დახმარება, მაგ: ფერმერთა ასოციაციების, იურიდიული სერვისების, ტურიზმის, შეზღუდული შესაძლებლობის მქონე პირების მიმართ. „...ვფიქრობ, ყველა დონორი ქვეყანა შეაფასებს, შეგვიძლია თუ არა ამ სახის მხარდაჭერის გაგრძელება საქართველოსთვის. ზოგიერთ შემთხვევაში, ჩვენი მხარდაჭერა მიმართულია ადგილობრივი მთავრობების ან ცენტრალური ხელისუფლებისადმი, რათა უზრუნველვყოთ ისეთი სერვისები, რომელთა მიწოდებაც მთავრობას არ შეუძლია. ასე რომ, მას ექნება მნიშვნელოვანი გავლენა“, აღნიშნავს კელი დეგნანი. სრულად... წყარო: პუბლიკას გვერდი სოციალურ ქსელში ფოტო: პუბლიკა

აჭარა. არასამთავრობო ორგანიზაცია „ცვლილებები თანაბარი უფლებებისთვის“ შეზღუდული შესაძლებლობების მქონე პირების უფლებებზე, მათ გაძლიერებაზე მომუშავე ორგანიზაციაა. ნეტგაზეთთან ინტერვიუში, ორგანიზაციის ხელმძღვანელი თომა კაკაბაძე ამბობს, რომ „რეპრესიული რუსული კანონის ანალოგის მიღებით ათასობით ადამიანი სასიცოცხლოდ მნიშვნელოვან სერვისებს ვეღარ მიიღებს, უმუშევრად დარჩება არაერთი შშმ პირიც - ერთი კონკრეტული პროექტიც რომ გაჩერდეს, აქ ათასობით ადამიანისთვის ჩაიკეტება თავისუფლების, დამოუკიდებლობის და ღირსეული ცხოვრების კარი“. სრულად... წყარო: batumelebi.netgazeti.ge ფოტო: ნეტგაზეთი

„ცოდნის კაფე“ გიზიარებთ ინფორმაციას, რას გულისხმობს ინიცირებული კანონპროექტი „უცხოური გავლენის გამჭვირვალობის შესახებ“. ორგანიზაციისთვის მიუღებელი და ღირსები შემლახავია, კანონპროექტის თანახმად, უცხოური გავლენის გამჭვირვალობის აგენტად დარეგისტრირება - „ჩვენ ძალიან ხისტი და ქიზიყური სიჯიუტით ვუპირისპირდებით რუსულ კანონპროექტს!“ „...კანონპროექტის მიღების შემთხვევაში უდიდესი რისკია ვეღარ მოვემსახუროთ ასობით სოციალურად შეჭირვებულ ახალგაზრდას და ბავშვს, ასობით ხანდაზმულს და რეგიონში მცხოვრებ ქალებს/გოგოებს.  ერთად მოვუწოდოთ საქართველოს პარლამენტი-ს წევრებს არ მიიღონ რუსული კანონპროექტი და არ დაგვინგრიონ საზოგადოებას, რაც აქამდე წვალებით და სიხარულით ერთად ვაშენეთ - საქართველოს დემოკრატია!“. წყარო: ცოდნის კაფეს გვერდი სოციალურ ქსელში

თბილისი. არაკომერციული სამართლის საერთაშორისო ცენტრმა (ICNL) და არაკომერციული სამართლის ევროპულმა ცენტრმა (ECNL) ჩაატარეს შედარებითი ანალიზი - რამდენად თავსებადია „უცხოური გავლენის გამჭვირვალობის შესახებ“ კანონპროექტი საერთაშორისო სამართალთან და ევროპულ სტანდარტებთან. ანალიზის თანახმად, კანონპროექტის ბევრი დებულება არ შეესაბამება საქართველოს მიერ საერთაშორისო კანონებით გათვალისწინებულ და ევროკავშირის სტანდარტების ფარგლებში ნაკისრ ვალდებულებებს. „...მაშინ, როდესაც საქართველო აქტიურად მუშაობს ევროკავშირის კანდიდატის სტატუსის მოპოვებაზე, აღნიშნული კანონპროექტის მიღებამ, შესაძლოა, დააზარალოს ეს ძალისხმევა. ...ყველა ა(ა)იპ-ი და მედია ორგანიზაცია, რომლის გასული წლის ჯამური შემოსავლის 20%-ზე მეტი მიღებულია უცხოური წყაროებიდან უნდა დარეგისტრირდეს და მიენიჭოს უცხოური გავლენის აგენტის სტატუსი. ეს ტერმინი საქართველოში უარყოფით დატვირთვას ატარებს და ხშირად „უცხოური ჯაშუშის“ ან „მოღალატის“ სინონიმად აღიქმება. უცხოური აგენტის სტატუსი საზოგადოებას უარყოფითად განაწყობს, რაც ამ სტატუსის მქონე ორგანიზაციების საქმიანობას საფრთხეს შეუქმნის - დააზარალებს მათ ურთიერთობას დახმარების მიმღებ პირებთან, მხარდამჭერებთან, დასაქმებულებთან და მოხალისეებთან. ...კანონპროექტის მიღების შემთხვევაში დაირღვევა საქართველოს მიერ ECHR-ისა და ICCPR-ის ფარგლებში ნაკისრი არაერთი ვალდებულება, მათ შორის, გაერთიანების თავისუფლების, პირადი ცხოვრების ხელშეუხებლობის და დისკრიმინაციისგან დაცვის ვალდებულებები. კანონპროექტის მიღება უარყოფითად იმოქმედებს საქართველოს ევროკავშირში გაწევრიანების პროცესზე. კანონპროექტი არსებითად დაასუსტებს საქართველოს სამოქალაქო საზოგადოებას, რადგან არასამთავრობო ორგანიზაციებისა და მასმედიის მიმართ ნდობა და მხარდაჭერა შემცირდება. არასამთავრობო სექტორი და მედია ვერ განახორციელებენ ეფექტიან დამოუკიდებელ კონტროლს, ვერ გაუწევენ მოქალაქეებს მნიშვნელოვან დახმარებას და ვერ შეუწყობენ ხელს დემოკრატიის გაძლიერებას“, ნათქვამია ანალიტიკურ დოკუმენტში. სრულად... წყარო: ewmi-activism.org

1 მარტს, ოთხშაბათს, 19:00 საათზე, პოლიტიკაში, გაიმართება სამუშაო შეხვედრა თემაზე: გილდია, შრომა და თუმანიშვილის თეატრის გამოცდილება. სრულად...

1 მარტს, 11:30 საათზე, ადამიანის უფლებათა ცენტრი პრესკონფერენციაზე ანალიტიკურ დოკუმენტს: „სამედიცინო მომსახურებისას დაზარალებული მოქალაქეების სამართლებრივი პრობლემების ანალიზი“ წარადგენს, რომელსაც დაზარალებული პაციენტების წარმომადგენლებიც დაესწრებიან. მისამართი: თბილისი, აკაკი გახოკიძის 11 ა, თბილისის ადამიანის უფლებათა სახლის საკონფერენციო დარბაზი.

თბილისი. 27 თებერვალს, სოციალური სამართლიანობის ცენტრმა გამართა საჯარო დისკუსია თემაზე: „ჩვენ“ და „ისინი“ – ქართული ნაციონალიზმი და მის მიერ წარმოებული „სხვები“. დისკუსიის ფარგლებში ახალგაზრდა მკვლევრებმა წარმოადგინეს სოციალური სამართლიანობის ცენტრის მხარდაჭერით მომზადებული ნახევრად-აკადემიური სტატიები. ვრცლად... წყარო: ორგანიზაციის გვერდი სოციალურ ქსელში