„რუსული კანონის“ სახელით ცნობილი „უცხოური გავლენის გამჭვირვალობის შესახებ“ კანონის აღსრულების მიზნით, საქართველოს იუსტიციის მინისტრის გადაწყვეტილებით, სსიპ - საჯარო რეესტრის ეროვნულ სააგენტოში შეიქმნა ცალკე დეპარტამენტი - ფინანსური დეკლარირების დეპარტამენტი. სწორედ ამ დეპარტამენტის უფროსი არის ის პირი რომელსაც მიენიჭა, ამ კანონის საფუძველზე შექმნილ რეესტრში რეგისტრაციისთვის წარდგენილი დოკუმენტების შესწავლის, მონიტორინგის განხორციელების, ამ რეესტრში იძულებითი რეგისტრაციის და სუბიექტებისათვის ადმინისტრაციული პასუხისმგებლობის დაკისრების უფლებამოსილება. 2024 წლის 1 აგვისტოს გამოქვეყნდა, საქართველოს იუსტიციის მინისტრის ბრძანება, რომელიც განსაზღვრავს ამ კანონის საფუძველზე შექმნილი რეესტრის წარმოების, საფინანსო დეკლარაციის წარდგენისა და მონიტორინგის წესებს. ბრძანებას სხვა დანართებთან ერთად, ახლავს საფინანსო დეკლარაციის დეტალური ფორმა და ადმინისტრაციულ სამართალდარღვევის შესახებ ოქმის ფორმა.

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს.  ელ-ბიულეტენი…

თბილისი. 30 ივლისს ინგორიყვას 22-ში, ეგრეთ წოდებულ ჩეკას სახლთან, სადაც 1921-1934 წლებში საბჭოთა ტერორის მთავარი ცენტრი, ჩეკას შტაბ-ბინა მდებარეობდა, საბჭოთა წარსულის კვლევის ლაბორატორიამ სტალინური ტერორის მსხვერპლთა ხსოვნის დღეს აღნიშნა. წლევანდელი ღონისძიება მთლიანად მიეძღვნა 1924 წლის ანტისაბჭოთა ეროვნული აჯანყებას, რომლის 100 წლისთავიც წელს აღინიშნება.  ღონისძიებაზე სოვლაბის წევრებმა და საზოგადოების წარმომადგენლებმა აჯანყების ჩახშობის შემდეგ საბჭოთა რუსული საოკუპაციო რეჟიმის მიერ დახვრეტილთა გვარებს წაიკითხეს. ღონისძიებაზე ასევე გამოფენილი იყო 1924 წლის დახვრეტებისა და რეპრესიების ტალღის მსხვერპლთა, მათ შორის დამფუძნებელი კრების 11 დახვრეტილი წევრის ფოტოები.  სტალინური ტერორის მსხვერპლთა ხსოვნის დღე აღინიშნება 30 ივლისს რადგან 1937 წლის 30 ივლისს საბჭოთა კავშირის შინაგან საქმეთა სახალხო კომისარიატმა (НКВД) გამოსცა ბრძანება ნომრით 004447, რომელმაც სტალინური რეპრესიების ერთ-ერთ ყველაზე სისხლიან ტალღას დაუდო სათავე.  წყარო: საბჭოთა წარსულის კვლევის ლაბორატორია

აჭარა. ბათუმის ახალგაზრდა აქტივისტთა კლუბის ორგანიზებით, 2024 წლის 30 ივლისს სიმულაციური არჩევნები – „გააფერადე, ნუ შემოხაზავ“ გაიმართა. აქტივობის მიზანი იყო არჩევნებზე ხმის მიცემის პროცედურებში ცვლილებების შესახებ მოქალაქეთა ინფორმირება.  სახალისო სიმულაცია ღია სივრცეში გაიმართა და 35 მოქალაქე ჩაერთო. მოქალაქეებს შესაძლებლობა ჰქონდათ საარჩევნო ბიულეტენის ფურცელზე შესაბამისი წრის გაფერადებით აერჩიათ საუკეთესო ფეხბურთელი, მუსიკალური ბენდი ან კერძი. კლუბის წევრებმა მოქალაქეებს მიაწოდეს ინფორმაცია 26 ოქტომბრის ელექტრონული არჩევნების პროცედურასთან დაკავშირებით.  ბათუმის ახალგაზრდა აქტივისტთა კლუბის ფარგლებში დაგეგმილი აქტივობები ხორციელდება CSI-ის და პარტნიორი ორგანიზაციების „ბათუმის დამოუკიდებელი ცხოვრების ცენტრის”, „შშმ ქალთა ალიანსის” და „ცვლილებები თანაბარი უფლებებისთვის” მხარდაჭერით.

თბილისი. ტოლერანტობის და მრავალფეროვნების ინსტიტუტი აქვეყნებს რელიგიისა და რწმენის თავისუფლების შესახებ 2023 წლის ანგარიშს.  ორგანიზაციის გვერდზე სოციალურ ქსელში ნათქვამია, რომ ანგარიშში განხილულია "სახელმწიფოს რელიგიური პოლიტიკა, კანონმდებლობაში არსებული დისკრიმინაცია, არადომინანტური რელიგიური გაერთიანებების ქონებრივი პრობლემები, მნიშვნელოვანი სასამართლო საქმეები, რელიგიური გაერთიანებების სახელმწიფო დაფინანსება, რელიგიური შეუწყნარებლობით ჩადენილი დანაშაულები, რელიგია საგანმანათლებლო სივრცეში, ანტისემიტიზმის პრობლემა".  ანგარიში...  წყარო: ორგანიზაციის გვერდი სოციალურ ქსელში

თბილისი. 26–27 ივლისს, პროექტის „სამოქალაქო საზოგადოების ინიციატივის“ ფარგლებში ჩატარდა ორდღიანი საინფორმაციო სემინარი – „საქართველოს ევროპული მომავალი“. სემინარს უძღვებოდნენ კონრად ადენაუერის ფონდის (KAS) პოლიტიკური განათლების აკადემიის კურსდამთავრებულები.  ახალგაზრდებს ევროპასა და ევროპულ გამოცდილებაზე ესაუბრა მსახიობი და ტელეწამყვანი ილო ბეროშვილი.  ახალგაზრდებმა ასევე მონაწილეობა მიიღეს შემეცნებით თამაშში (City Game) "აღმოაჩინე #ევროპა შენს ქალაქში". სხვადასხვა მინიშნებებისა და დავალებების შესრულების შემდეგ, მათ აღმოაჩინეს ევროპული კვალი დედაქალაქში. გამარჯვებული გუნდი დაჯილდოვდა სამახსოვრო საჩუქრებით.  პროექტი "სამოქალაქო საზოგადოების ინიციატივა" ხორციელდება ევროკავშირისა (EU) და კონრად ადენაუერის ფონდისა (KAS) მხარდაჭერით.  წყარო: პროექტი „სამოქალაქო საზოგადოების ინიციატივა“

თბილისი. ინფორმაციის თავისუფლების განვითარების ინსტიტუტის ინფორმაციით,  საქართველოში მცხოვრები ეთნიკური უმცირესობების პოლიტიკური ინტეგრაცია დღემდე გამოწვევად რჩება. ცენტრალურ და ადგილობრივ დონეზე გადაწყვეტილების მიღების პროცესში მათი ნაკლები მონაწილეობა ზრდის გარიყულობის შეგრძნებას. ეთნიკური უმცირესობები (გარდა ოკუპირებული აფხაზეთისა და ცხინვალის რეგიონებისა) მოსახლეობის 13.2%-ს (489,240 ადამიანი) შეადგენენ. მეათე მოწვევის პარლამენტში მანდატის მქონე 9 პოლიტიკური პარტიის პროპორციულ სიაში მყოფი 1335 კანდიდატიდან მხოლოდ 33 იყო ეთნიკური უმცირესობის წარმომადგენელი. სრულად... წყარო: ინფორმაციის თავისუფლების განვითარების ინსტიტუტი

თბილისი. ეკონომიკური პოლიტიკის კვლევის ცენტრი აგრძელებს დემოკრატიული ტრადიციის შესახებ ბლოგების ციკლს. ამჯერად მკითხველს აცნობს 1918 წლის 26 მაისს დამოუკიდებლობის გამოცხადების შემდეგ პირველი კოალიციური მთავრობის შესახებ ინფორმაციას. მასში შედიოდნენ სოციალ–დემოკრატები, სოციალისტ–ფედერალისტები, სოციალისტ–რევოლუციონერები და ეროვნულ–დემოკრატები. სრულად... წყარო: eprc

შიდა ქართლი. სოფელ შინდისში, სამოქალაქო კამპანიის „ეს ქვეყანა შენიას“ ფარგლებში, 19 ივლისს, გაიმართა შეხვედრა შინდისელ ახალგაზრდებთან. სამოქალაქო საზოგადოების ინსტიტუტის (CSI) მიერ ორგანიზებული შეხვედრის მიზანი იყო მოსახლეობაში სამოქალაქო საზოგადოების ღირებულებების დამკვიდრება, საზოგადოებრივი ორგანიზაციების როლის და ფუნქციის, მათი საქმიანობის წარმოჩენა და სამოქალაქო აქტივიზმის პოპულარიზაცია.  შეხვედრაზე მოწვეული სტუმრები, მწერალი და ტელეწამყვანი დათო ტურაშვილი, ასევე მწერალი და ტელეწამყვანი ტორესა მოსი და ფილოლოგი და მთარგმნელი ოქტაი ქაზუმოვი, ახალგაზრდებს ესაუბრნენ სამოქალაქო საზოგადოების განვითარებასა და სამოქალაქო პასუხისმგებლობის მნიშვნელობაზე, ასევე საქართველოს ევროპულ იდენტობაზე, ჩვენი ღირებულებების სიახლოვეზე და იმაზე რომ „საქართველო ევროპაა“.  შეხვედრაზე ასევე გამოცხადდა უკვე ტრადიციული კონკურსი „ეს ქვეყანა შენია“, რომელიც გაიმართება მთელი ქვეყნის მასშტაბით და გამარჯვებულები გამოვლინდება რეგიონების მიხედვით.  კამპანიას „ეს ქვეყანა შენიას“ უძღვება სამოქალაქო საზოგადოების ინსტიტუტი (CSI), ევროკავშირისა (EU) და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივის“ ფარგლებში.

თბილისი. 28 ივლისს გამოვლინდნენ სოფლად მცხოვრები ქალების სამწუთიანი ფილმების კონკურსის გამარჯვებულები. პირველი საპრიზო ადგილი ერგო ნამუშევარს სახელწოდებით „მასწავლებლები შუაფხოდან“, ავტორები - ნინო აფაქიძე და თამთა ჩხაიძე, მეორე ადგილი - „მარტოხელა დედის თავდაუზოგავი შრომა შვილის განათლებისთვის“, ავტორი - ფარი ისმაილოვა, მესამე ადგილი - „შორეული მოგონებები გონების მიღმა“, ავტორები - ლუკა ქარჩხაძე, სანდრო ქუფარაშვილი. „ფონდი ტასო“ სოფლად მცხოვრები ქალების თემაზე სამწუთიანი ფილმების კონკურსს უკვე მესამედ მართავს. დღემდე, კონკურსის ფარგლებში, აღნიშნულ თემაზე, ასამდე ფილმია შექმნილი. გამარჯვებული და შერჩეული ფილმები ჩვენი მედია არხების საშუალებით ეტაპობრივად გავრცელდება. წყარო: ფონდი „ტასო“

თბილისი. 30 ივლისს, 19:00 საათზე, ინგოროყვას 22-ში, ე.წ. ჩეკას სახლთან, შენობასთან სადაც 1921-1934 წლებში საბჭოთა ტერორის მთავარი ცენტრი, ჩეკას შტაბ-ბინა მდებარეობდა, საბჭოთა წარსულის კვლევის ლაბორატორია სტალინური ტერორის მსხვერპლთა ხსოვნის დღეს აღნიშნავს. წლევანდელი ღონისძიების ფოკუსი იქნება 1924 წლის ანტისაბჭოთა ეროვნული აჯანყება, რომლის 100 წლისთავიც წელს აღინიშნება. ღონისძიებაზე სოვლაბის წევრები და საზოგადოების წარმომადგენლები აჯანყების ჩახშობის შემდეგ საბჭოთა რუსული საოკუპაციო რეჟიმის მიერ დახვრეტილთა გვარებს წაიკითხავენ.  სტალინური ტერორის მსხვერპლთა ხსოვნის დღე აღინიშნება 30 ივლისს რადგან 1937 წლის 30 ივლისს საბჭოთა კავშირის შინაგან საქმეთა სახალხო კომისარიატმა (НКВД) გამოსცა ბრძანება ნომრით 004447, რომელმაც სტალინური რეპრესიების ერთ-ერთ ყველაზე სისხლიან ტალღას დაუდო სათავე.  სრულად... წყარო: საბჭოთა წარსულის კვლევის ლაბორატორია

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს.  ელ-ბიულეტენი…

თბილისი. კოალიცია დამოუკიდებელი და გამჭვირვალე მართლმსაჯულებისთვის განცხადებას ავრცელებს. კერძოდ – მიმდინარე წლის 22 ივლისს, თბილისის საქალაქო სასამართლოს მოსამართლე, ლიელა ფოლადიშვილმა შეაჩერა საქართველოს პრეზიდენტის განკარგულება კახა წიქარიშვილის, იუსტიციის უმაღლესი საბჭოს წევრად დანიშვნის შესახებ.  „სასამართლოს მიერ პრეზიდენტის გადაწყვეტილების მოქმედების შეჩერება უხეშად არღვევს საქართველოს კონსტიტუციით გარანტირებულ ხელისუფლების დანაწილების პრინციპს და სასამართლო ხელისუფლების თვითლუსტრაციის მორიგი, საგანგაშო ფაქტია. მომხდარი ინციდენტი კარგად აჩვენებს კლანის მიერ მართლმსაჯულების სისტემის საკუთარი ინტერესებისთვის გამოყენებას და სასამართლო ხელისუფლების ძირითადი ორგანოების პერსონალის რეფორმის აუცილებლობის დამატებითი მტკიცებულებაა“, ნათქვამია განცხადებაში.  სრულად... წყარო: სოციალური სამართლიანობის ცენტრი

განათლების განვითარებისა და დასაქმების ცენტრის გამგეობის თავმჯდომარე განცხადებას ავრცელებს და ეხმიანება, „ქართული ოცნების“ მიერ გამოქვეყნებულ კვლევის ანგარიშს. „კვლევა ეხება იმ მედია და არასამთავრობო ორგანიზაციებს, ვინც „უცხო ძალის გავლენის გამჭვირვალობის შესახებ“ კანონის მიღებას ეწინააღმდეგებოდა და ამტკიცებს, რომ ამ ორგანიზაციების უმრავლესობას აქვს გამჭვირვალობის და ანგარიშვალდებულების ნაკლებობა.  კვლევაში მოცემულია მცდარი მონაცემები განათლების განვითარების და დასაქმების ცენტრის - EDEC შესახებ. თითქოს, EDEC-ს არ გააჩნია ვებგვერდი, არ აქვს მითითებული დონორის ლოგო, განხორციელებული პროექტების შესახებ ინფორმაცია და გრანტის ოდენობა. ასევე არ არის ხელმისაწვდომი თანამშრომლების შესახებ ინფორმაცია.  EDEC- ის შესახებ ინფორმაცია სრულიად არ შეესაბამება სიმართლეს!  ჩვენს ორგანიზაციას ვებგვერდი აქვს მისი შექმნის პირველივე დღიდან. გარდა ამისა, საზოგადოებასთან კავშირის შენარჩუნებისთვის ვიყენებთ სხვადასხვა პლატფორმას, როგორიცაა Facebook, LinkedIn, და YouTube. ჩვენი ვებგვერდი, www.edec.ge, აქტიურად ფუნქციონირებს და მუდმივად ახლდება. ვებგვერდზე მითითებულია ყველა დონორი, მიმდინარე და წარსულში განხორციელებული პროექტები, გრანტის ოდენობა, პროექტის ვადები, სახელწოდება, პარტნიორები, მიზნები, შედეგები და აქტივობები“.  სრულად... წყარო: EDEC

თბილისი. ჰაინრიჰ ბიოლის ფონდი აქვეყნებს სტატიას: „ავტორიტარული კონსოლიდაციის (გეო) პოლიტიკური ეკონომიკა საქართველოში: უცხოური გავლენის კანონის განზომილებები „სტატიაში განხილულია „უცხოური გამჭვირვალობის შესახებ“ კანონის გეოპოლიტიკური და ეკონომიკური შედეგები, რომელიც საქართველოში ცოტა ხნის წინ იქნა მიღებული, საზოგადოების სხვადასხვა ჯგუფის ხმამაღალი პროტესტის მიუხედავად. (...) სტატია აანალიზებს კანონის შესაძლო შედეგებს ინფრასტრუქტურულ პროექტებსა და ვალზე დაფუძნებული განვითარების რეჟიმისთვის, ხაზს უსვამს საერთაშორისო ფინანსური ინსტიტუტების როლს და ეჭვქვეშ აყენებს მთავრობის მიზანს სუვერენიტეტის გაძლიერების შესახებ“, ნათქვამია ორგანიზაციის ვებგვერდზე. სრულად...  წყარო: ბიოლის ფონდი

ქვემო ქართლი. პროექტის „ველო საქართველოს“ ფარგლებში მარნეულის, ბოლნისისა და თეთრიწყაროს მუნიციპალიტეტებში მცხოვრებ გოგონებს და ქალებს ველოს მართვას ასწავლიან.  „თუ გყავთ ველოსიპედი, რომელსაც არ იყენებთ (თუნდაც შესაკეთებელი), გადმოგვეცით, ჩვენ მოვიყვანთ ფორმაში და თქვენი სახელით ვაჩუქებთ პროექტის მონაწილეებს“, აღნიშნული პროექტის გვერდზე სოციალურ ქსელში.  ველოსიპედის მართვის სწავლით დაინტერესებულმა პირებმა უნდა გაიარონ რეგისტრაცია... სრულად...  წყარო: სისიენი

თბილისი. ფონდ „ტასოს“ მიერ გამოცხადებული 3 წუთიანი ფილმების კონკურსის შესარჩევი ეტაპი დასრულდა. მეორე საკონკურსო ეტაპზე 10 ფილმი გადავიდა. სოფლად მცხოვრები ქალების თემაზე გადაღებული 3–წუთიანი ფილმების კონკურსში 3 გამარჯვებული ფილმი გამოვლინდება, რომელიც 28 ივლისს დასახელდება.  სრულად...  წყარო: ფონდი „ტასო“

მცხეთა–მთიანეთი. 21 ივლისს, პროექტის ,,მოხალისეობრივი ფესტივალი წეროვანში” ფარგლებში, წეროვნის დასახლების ცენტრალურ სკვერში, მოხალისეობის საზაფხულო ფესტივალი გაიმართა. ღონისძიება საინტერესო ტურნირებით, მინი ჩემპიონატებით, შემეცნებითი ვიქტორინებით და სხვა მრავალფეროვანი აქტივობებით გამოირჩეოდა. სტუმრების განწყობაზე ილუზიონისტმა ავთანდილ ცქიტიშვილმა იზრუნა. ადგილობრივ მეწარმეებს თავიანთი პროდუქციის გამოფენისა და გაყიდვის შესაძლებლობა ჰქონდათ. საღამო მუსიკალურად ფოლკლორულმა ჯგუფმა "ქართული, სპეციალურად მოწვეულმა ბენდმა „ქილეიჯესი“ და დიჯეიმ გააფორმეს. ღონისძიება ორგანიზებული იყო 7 წეროვანელი ახალგაზრდის მიერ, რომლებმაც იდეა რეალობად აქციეს და მოხალისეობრივი ინიციატივების საგრანტო კონკურსში გამარჯვების შედეგად ადგილობრივ მოსახლეობას დაუვიწყარი დღე აჩუქეს. პროექტი ,,მოხალისეობრივი ფესტივალი წეროვანში” ხორციელდება განათლების განვითარების და დასაქმების ცენტრის მხარდაჭერით ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა" ფარგლებში. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). წყარო: განათლების განვითარების და დასაქმების ცენტრი

მცხეთა–მთიანეთი. მოხალისეთა კვირეული, მცხეთა–მთიანეთის რეგიონული ჰაბის ორგანიზებით, მეოთხედ გაიმართა. მასში მონაწილეობას 7 საინიციატივო ჯგუფი და 170–მდე ადამიანი იღებდა მონაწილეობას, რომლებმაც დადებითი წვლილი შეიტანეს საკუთარი სოფლის თუ ქალაქის საკეთილდღეოდ. სრულად... წყარო: მცხეთა–მთიანეთის რეგიონული ჰაბი

საიამ მარლთმსაჯულების სისტემაში არსებულ გამოწვევებთან დაკავშირებით, ქუთაისში, ბათუმში, თელავსა და გორში დისკუსიები გამართა. ყურადღება გამახვილდა, მარლთმსაჯულების სფეროში არსებულ სისტემურ გამოწვევებზე. იუსტიციის უმაღლესი საბჭოს მონიტორინგის შედეგად გამოვლენილ პრობლემებსა და სისხლის სამართლის პროცესებთან დაკავშირებულ ხარვეზებზე, რომლებიც არსებით გავლენას ახდენს პირის თავისუფლების და უსაფრთხოების უფლებაზე.  დისკუსიაში მონაწილეობას იღებდნენ ადგილობრივი არასამთავრობო ორგანიზაციებისა და მედიის წარმომადგენლები, დარგის პროფესიონალები და სტუდენტები.  სრულად...  წყარო: საია

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს მონიტორინგის შედეგებს – „არასამთავრობო და მედია ორგანიზაციების “გამჭვირვალობის” კვლევით დაკავებული ხელისუფლების გამჭვირვალობა“.  შეგახსენებთ, რომ 15 ივლისს, საქართველოს მმართველმა პარტიამ, საზოგადოებას გააცნო „არასამთავრობო და მედია ორგანიზაციების გამჭვირვალეობის საბაზისო კვლევა“, რომელიც აფასებდა „რუსული კანონის“ საწინააღმდეგო განცხადებაზე ხელმომწერი 474 ქართული არასამთავრობო და მედია ორგანიზაციის გამჭვირვალობას შვიდი სხვადასხვა კრიტერიუმის მიხედვით .  IDFI-ს შეფასებით „ამ კვლევის რეალურ მიზანს წარმოადგენდა საქართველოს ხელისუფლების მიერ რუსული კანონის საჭიროებაზე პროპაგანდის გაძლიერება და არა ამ არასამთავრობო ორგანიზაციების პროაქტიული გამჭვირვალობის შეფასება“. ორგანიზაცია აცხადებს, რომ „არასამთავრობო და მედია ორგანიზაციების “გამჭვირვალობის” კვლევით დაკავებული ხელისუფლება თავად ვერ უზრუნველყოფს გამჭვირვალობის მინიმალურ სტანდარტებს.“  ინფორმაციის თავისუფლების განვითარების ინსტიტუტი წლების განმავლობაში სწავლობს საჯარო უწყების გამჭვირვალობის და ანგარიშვალდებულების საკითხებს. კვლევებზე დაყრდნობით ორგანიზაცია აცხადებს, რომ „შესწავლილი საჯარო უწყებების (პარლამენტი, მთავრობა, სამინისტროები) 71%-ს ვებ-გვერდზე გამოქვეყნებული არ აქვს 2023 წელს მიღებული და გაცემული გრანტების შესახებ სრულყოფილი ინფორმაცია, ხოლო 65%-ს 2023 წლის საქმიანობის წლიური ანგარიშები“. სრულად...  წყარო: ინფორმაციის თავისუფლების განვითარების ინსტიტუტი

თბილისი. საიამ გამოაქვეყნა კვლევის ანგარიში „სახელმწიფოს რეაგირება გენდერულად მოტივირებულ ძალადობაზე საქართველოში, კანონმდებლობისა და პრაქტიკის ანალიზი“. დოკუმენტი საუბრობს საქართველოში გენდერულად მოტივირებულ ძალადობაზე რეაგირების სისტემისა და იმ დაბრკოლებების შესახებ, რომლებსაც ასეთი ძალადობის მსხვერპლნი აწყდებიან. „სახელმწიფო აქტიურად ცდილობს სამოქალაქო საზოგადოების საარსებო სივრცის შევიწროებას, მათ შორის, რუსული კანონის მიღების გზით, რაც, მნიშვნელოვნად შეამცირებს წვდომას იურიდიული დახმარების, მხარდაჭერის სერვისებზე და, სტამბოლის კონვენციის სტანდარტის საწინააღმდეგოდ, შეუძლებელს გახდის გენდერულად მოტივირებულ ძალადობასთან ბრძოლისა და პრევენციის პოლიტიკის შემუშავების, განხორციელების, მონიტორინგისა და შეფასების პროცესში სამოქალაქო საზოგადოების ჩართულობას“, ნათქვამია ორგანიზაციის გვერდზე სოციალურ ქსელში.  სრულად...  წყარო: საია