კახეთი. ახმეტაში პროექტის, „ახალგაზრდა ქისტი ქალები ინტეგრაციისთვის" პრეზენტაცია გაიმართა. შეხვედრას ესწრებოდნენ არასამთავრობო სექტორისა და ახმეტის მუნიციპალიტეტის წარმომადგენლები. პროექტის მიზანია მოქალაქეობრივი ცნობიერების ამაღლების ხელშეწყობა. პროექტი გათვლილია 16-დან 25 წლამდე ახალგაზრდებზე. პროექტის ამოცანებია ეროვნული უმცირესობის უფლება მოვალეობებისა და დემოკრატიული ღირებულებების გაცნობა, პროფესიული უნარ-ჩვევების სწავლა და სოციალური უნარების განვითარება.

თბილისი. ინფორმაციის თავისუფლების განვითარების ინსტიტუტმა შინაგან საქმეთა სამინისტროს მიერ გამოქვეყნებული დანაშაულის სტატისტიკის შესახებ განცხადება გაავრცელა. ორგანიზაცია „მიესალმება სამინისტროს მხრიდან აღნიშნული მონაცემების საზოგადოებისთვის გაცნობას, თუმცა აღსანიშნავია ის ფაქტი რომ, სამწუხაროდ,შინაგან საქმეთა სამინსიტროს მიერ არ ხდება სტატისტიკური მონაცემების ჩაშლა დანაშაულის სახეების მიხედვით", ნათქვამია ორგანიზაციის ვებ-გვერდზე. სრულად წყარო: www.idfi.ge

თბილისი. „ტოლერანტობის და მრავალფეროვნების ინსტიტუტმა" განცხადება გაავრცელა. ორგანიზაცია „გმობს 4 დეკემბერს, თავისუფლების მოედანზე, ხანუქას დღესასწაულისადმი მიძღვნილ ღონისძიებაზე მართლმადიდებელი სასულიერო პირების თანამონაწილეობით რელიგიური შუღლის გაღვივებისა და ანტისემიტიზმის გამოვლენის ფაქტს. ...ყოველივე ამასთან ერთად, ორგანიზაცია მიესალმება საქართველოს პრეზიდენტისა და მთავრობის წარმომადგენლების მონაწილეობით, თბილისის ცენტრალურ მოედანზე ხანუქას დღესასწაულის აღნიშვნის ტრადიციისთვის საფუძვლის დადებას, ასევე სამართალდამცველების მიერ ანტისემიტიზმის გამოვლინების გამო ორი კანონდამრღვევის დაკავებასა და მათ ადმინისტრაციულ პასუხისგებაში მიცემას", ნათქვამია განცხადებაში. სრულად წყარო: tdigeorgia.wordpress.com

თბილისი. ადამიანის უფლებების სწავლებისა და მონიტორინგის ცენტრმა კვლევა - „სეკულარიზმის კრიზისი და ლოიალობა დომინანტი ჯგუფის მიმართ" - გამოაქვეყნა. კვლევა მოიცავს, 2012-2013 წლებში სოფელ ნიგვზიანში, წინწყაროსა და სამთაწყაროში გამოვლენილი რელიგიური კონფლიქტების შესწავლასა და კონფლიქტების გადაწყვეტის პროცესში სახელმწიფოს მიერ გატარებული პოლიტიკის ანალიზს. კვლევაში სამივე რელიგიური კონფლიქტი ერთიან დინამიკაშია შეფასებული და კონფლიქტის მხარეების შეფასებებზე დაყრნობით მიმოხილულია ის პოლიტიკური, სოციალური და კულტურული გარემო, რომელიც გავლენას ახდენდა და განაპირობებდა კონფლიქტებს. კვლევა წყარო:emc.org.ge

თბილისი. „მწვანე ალტერნატივამ" 5 დეკემბერს განცხადება გაავრცელა. განცხადებაში საუბარია ენერგეტიკის მინისტრის კომენტარზე ორგანიზაციასთან დაკავშირებით. ორგანიზაციამ საქართველოს ენერგეტიკის მინისტრის წინააღმდეგ 19 ნოემბერს სარჩელი წარადგინა თბილისის საქალაქო სასამართლოს სამოქალაქო საქმეთა კოლეგიაში. „მწვანე ალტერნატივა ითხოვს, დაევალოს კახა კალაძეს ასოციაცია მწვანე ალტერნატივას პატივის, ღირსებისა და  საქმიანი რეპუტაციის შემლახავი ინფორმაციის უარყოფა იმავე საინფორმაციო საშუალებების მეშვეობით და ორგანიზაციის სასარგებლოდ მორალური ზიანის ანაზღაურება 1 აშშ დოლარის ექვივალენტი  ლარის ოდენობით", ნათქვამია ორგანიზაციის მიერ გავრცელებულ განცხადებაში. სრულად წყარო: greenalt.org

თბილისი. „დემოკრატიული განვითარების ეროვნული ცენტრმა" უკრაინაში განვითარებულ მოვლენებთან დაკავშირებით განცხადება გაავრცელა. „ვიზიარებთ რა სრულიად საქართელოს სამოქალაქო საზოგადოების პასუხისმგებლობას უკრაინისა და საქართელოს თავისუფალი ერების ევროპულ და ევროატლანტიკურ სივრცეში ინტეგრაციის გზაზე, შეშფოთებას გამოვთქვამთ უკრაინაში განვითარებულ მოვლენებთან დაკავშირებით. გვინდა შევახსენოთ უკრანის ხელისუფლებას რომ დემოკრატია ოცდამეერთე საუკუნის ცივილიზებული სამყაროს ცხოვრების წესი და ვალდებულებაა და არა მოდა რომელსაც შეიძლება სკეპტიკურად ვუყუროთ. ...ჩვენ ვალდებული ვართ სოლიდარულები ვიყოთ უკრაინელი ხალხის მიმართ და მივესალმებით მათ მტკიცე პოზიციას დაიცვას საკუთარი არჩევანი იყოს ევროპული ოჯახის სრულუფლებიანი წევრი. თანადგომას ვუცხადებთ პოლიტიკურ ძალებს, რომლებმაც იტვირთეს პასუხისმგებლობა დადგნენ ქვეყნის თავისუფლებისა და სუვერენიტეტის სადარაჯოზე", ნათქვამია განცხადებაში. სრულად წყარო: ncdd.ge

თბილისი. არასამთავრობო ორგანიზაციებმა თვითმმართველობის რეფორმის განხორციელების პროცესთან დაკავშირებით განცხადება გაავრცელეს. „ჩვენ, არასამთავრობო ორგანიზაციებს მიგვაჩნია, რომ მოქალაქეთა მიერ ადგილობრივი თვითმმართველობის განხორციელების იდეა წარმოადგენს უმთავრეს ფასეულობას, რომელსაც ემყარება დემოკრატიული მმართველობის მთელი სისტემა. მოქალაქეთა უფლება, მონაწილეობა მიიღონ საკუთარი, ადგილობრივი მნიშვნელობის საქმეების წარმართვაში, საერთოა ყველა დემოკრატიული სახელმწიფოსთვის. მხოლოდ მაღალი ლეგიტიმაციის მქონე ადგილობრივ ხელისუფლებას, მოქალაქეთა ჩართულობით შეუძლია უზრუნველყოს ეფექტური და, ამასთან, მოქალაქესთან დაახლოებული მმართველობა, ჩამოაყალიბოს ადგილებზე განვითარების სრულფასოვანი პირობები", ნათქვამია განცხადებაში. განცხადებას ხელს 24 არასამთავრობო ორგანიზაცია აწერს სრულად წყარო: osgf.ge

თბილისი. ინფორმაციის თავისუფლების განვითარების ინსტიტუტი განათლების სამინისტროს მიმართავს მაგისტრანტთა სასწავლო–კვლევითი პროექტების დაფინანსების კონკურსის შესახებ. „2013 2013 წლის 3 დეკემბერს საქართველოს განათლებისა და მეცნიერების სამინისტრომ გამოაცხადა კონკურსი მაგისტრანტთა სასწავლო-კვლევითი პროექტების დაფინანსების მოსაპოვებლად. კონკურსი დღეს, 5 დეკემბერს იხურება. ამგვარი პროექტების ინიცირება მხოლოდ მისასალმებელია, თუმცა საკონკურსო განცხადებების წარსადგენად დაწესებული მხოლოდ ორდღიანი ვადა ეჭვქვეშ აყენებს პროცესის გამჭვირვალედ და სამართლიანად წარმართვის შესაძლებლობას. ამგვარი მოკლე პერიოდი - სულ 2 დღე - სტუდენტების მიერ არათუ სრულყოფილი პროექტების ჩამოსაყალიბებლად, არამედ კონკურსის შესახებ ინფორმაციის სათანადოდ გავრცელებისთვისაც არ არის საკმარისი...", ნათქვამია ორგანიზაციის განცხადებაში. სრულად წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრმა გრიგოლ მახარაძის ბლოგპოსტი : „პატრიარქის დეცენტრალიზაცია" -  გამოაქვეყნა. „ჩვენ გვაშინებენ.ჩვენ გვაშინებენ, რომ თუ თვითმმართველობას შემოვიღებთ, თუ მოქალაქეები საკუთარ საქმეებს თავად მივხედავთ, საქართველო დაიშლება. მოდი, დავაზუსტოთ, სახელმწიფოს დამანგრევლი რეგიონულ დონეზე თვითმმართველობის ელემენტების შემოტანა ყოფილა", ნათქვამია ბლოგპოსტში. სრულად წყარო: emc.org.ge

ადამიანის უფლებათა სახლის ქსელის (HRHN) წევრებმა და პარტნიორებმა უკრაინის პრეზიდენტ ვიქტორ იანუკოვიჩს წერილით მიმართეს. „ჩვენ უკიდურესად ვგმობთ უკრაინის ხელისუფლების მიერ გამოყენებულ გადამეტებულ ძალას მშვიდობიანი დემონსტრაციების დასაშლელად, რომლებიც მოჰყვა უკრაინის უარს, ხელი მოეწერა ევროკავშირთან ასოცირების შეთანხმებაზე. ბ-ნო პრეზიდენტო, ჩვენ მოგიწოდებთ, დაუყოვნებლივ გაუქმდეს დემონსტრანტების წინააღმდეგ მიმართული ძალისმიერი ზომები და გამოიყენოთ არსებული დემოკრატიული საშუალებები სიტუაციის შესაფასებლად, ისეთი, როგორიც არის დებატები პარლამენტში იმის შესახებ, შეუძლია თუ არა მთავრობას სიტუაციასთან გამკლავება", ნათქვამია მიმართვაში. წერილს ხელს აწერენ თბილისის, კიევის, აზერბაიჯანის, ბელორუსიის, ბელგრადის, ოსლოს, ვორონეჟის, ერევანისა და ზაგრების ადამიანის უფლებათა სახლები, ასევე რუსეთის ადამიანის უფლებათა კვლევის, ცენტრის, ადამიანის უფლებათა ჰელსინკის ფონდი და ფონდი რაფტო, ნორვეგია.  სრულად წყარო: „კონსტიტუციის 42-ე მუხლის გვერდი სოციალურ ქსელში"

თბილისი. აღმოსავლეთ პარტნიორობის სამოქალაქო საზოგადოების ფორუმმა განცხადება გაავრცელა. „ფორუმის მმართველი კომიტეტი გამოხატავს შეშფოთებას 30 ნოემბრის დილით კიევში ევრომეიდანზე მიმდინარე საპროტესტო აქციის ახალგაზრდა მონაწილეებზე პოლიციის თავდასხმის გამო. ევროპის ისტორიაში პირველად, ხელისუფლებამ სასტიკად დაარბია მშვიდობიანი აქცია, რომელიც შეიკრიბა ქვეყნის ევროპული ინტეგრაციის მხარდასაჭერად. ამის ფონზე ქვეყანა კი კვლავ აცხადებს რომ ევროინტეგრაცია მისი სტრატეგიული მიზანია. ...შევახსენებთ უკრაინის ხელისუფლებას რომ მშვიდობიანი მომიტინგეების წინააღმდეგ ძალადობის გამოყენება მიუღებელია. მოვითხოვთ ადამიანებზე, მათ შორის ქალებსა და მოზარდებზე, თავდასხმისა და დაზიანების ყველა ფაქტის დაუყოვნებლივ გამოძიებას. მოვითხოვთ დაისაჯოს ყველა ის ჩინოვნიკი, რომელმაც მიიღო გადაწყვეტილება მომიტინგეების წინააღმდეგ ძალა გამოეყენებინათ კიევში. თავისუფალი შეკრების უფლება უნდა იყოს უზრუნველყოფილი უკრაინის კონსტიტუციისა და საერთაშორისო ვალდებულებების შესაბამისად", ნათქვამია განცხადებაში. სრულად წყარო:eapnationalplatform.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" ეხმაურება საზოგადოებაში მიმდინარე დისკუსიებს ადგილობრივი თვითმმართველობის რეფორმის განხორციელების საჭიროებებსა და რისკებთან დაკავშირებით. „აღნიშნული დისკუსია, ერთის მხრივ, 4 დეკემბერს, საქართველოს კათოლიკოს პატრიარქის მიერ გაკეთებულმა განცხადებამ გამოიწვია, რა დროსაც პატრიარქმა გამოხატა მოსაზრება, რომ რეფორმის განხორციელება საქართველოს დაშლისკენ მიიყვანს, რასაც ეკლესია არ შეეგუება და „ყველაფერს გააკეთებს იმისთვის, რომ ეს არ შესრულდეს". ვფიქრობთ, რომ მსგავსი აქცენტები საზოგადოებაში თვითმმართველობის რეფორმის არსისა და მისი შედეგების თაობაზე ნეგატიური აზრის ფორმირებასა და პროცესის მიმართ უნდობლობას იწვევს. ხაზგასმით აღვნიშნავთ, რომ ძლიერი თვითმმართველობა არის არა საფრთხე ქვეყნის ერთიანობისთვის, არამედ მეტი გარანტია დემოკრატიული და ეფექტური მმართველობისა, რადგან ძლიერი თვითმმართველობა, თავისი არსით, გულისხმობს არა ქვეყნის ტერიტორიული დანაწევრებას, არამედ მოქალაქეთათვის მეტი შესაძლებლობის მიცემას, მონაწილეობა მიიღონ ხელისუფლების განხორციელების პროცესში. ეფექტური დეცენტრალიზაციისა და თვითმმართველობის განვითარებისათვის...", ნათქვამია ორგანიზაციის განცხადებაში. ორგანიზაციის განცხადებაში აღნიშნულია, რომ სამართლიან არჩევნებს აქვს გარკვეული შენიშვნები და რეკომენდაციები აღნიშნული კანონპროექტის მიმართ, რომელსაც პარლამენტს კანონპროექტის განხილვის სტადიაზე წარუდგენს. სრულად წყარო: isfed.ge

თბილისი. ინფორმაციის თავისუფლების განვითარების ინსტიტუტმა ბიძინა ივანიშვილის ქონების შესახებ ინფორმაცია გაავრცელა. „საქართველოს პრემიერ-მინისტრად ბიძინა ივანიშვილის დანიშვნის შემდგომ 2012 წლის 25 დეკემბერს პრემიერ მინისტრის მიერ შევსებული იქნა დეკლარაცია, რომელიც საჯაროდ გამოქვეყნდა საჯარო სამსახურის ბიუროს ოფიციალურ ვებ-გვერდზე. პრემიერ მინისტრის დეკლარაციაში წარმოდგენილია როგორც ბიძინა ივანიშვილის, ასევე მისი მეუღლისა და შვილების სახელზე არსებული ქონება. დეკლარაციაში არ აისახა, მხოლოდ პრემიერ მინისტრის შვილის უტა ივანიშვილის საკუთრებაში არსებული ქონება, ვინაიდან საქართველოს კანონმდებლობით იმ პირის მონაცემები, რომელიც არ ცხოვრობს დეკლარანტთან ერთად, არ ექვემდებარება სავალდებულო გამოქვეყნებას", ნათქვამია გავრცელებულ განცხადებაში. სრულად წყარო: opendatablog.wordpress.com

თბილისი. ლიბერალიზმის სასწავლო ცენტრში ლევან გიგინეიშვილმა ლექცია :„განმანათლებლობა ევროპასა და საქართველოში" - წაიკითხა. მათთვის, ვინც ვერ შეძლო ლექციაზე დასწრება, ცენტრი შეხვედრის ვიდეო ჩანაწერს აქვეყნებს. ლექცია   წყარო:ორგანიზაციის გვერდი სოციალურ ქსელში

კახეთი. თელავის დემოკრატიული ჩართულობის ცენტრში შეზღუდული შესაძლებლობების მქონე პირთა დაცვის საერთაშორისო დღისადმი მიძღვნილი შეხვედრა-დისკუსია გაიმართა. შეხვედრას ესწრებოდნენ არასამთავრობო სექტორის, მედიისა და მშვიდობის კორპუსის წარმომადგენლები, ასევე, სტუდენტები და დაინტერესებული მოქალაქეები. კახეთის შეზღუდული შესაძლებლობების მქონე პირთა ინტეგრაციის ცენტრის ხელმძღვანელი, ლადო ჭინჭარაული: ,,დღეს გაიმართა მრგვალი მაგიდის დისკუსია თემაზე - შეზღუდული შესაძლებლობების მქონე პირთა საჭიროებები კახეთის რეგიონში და ადვოკატირების კამპანიის წარმოება შშმ პირთა უფლებებისათვის. შეხვედრაზე გვესწრებიან შშმ ბავშთა მშობელთა კავშირის „ლამპარი" წარმომადგენლები, გრემის სათემო ცენტრი, ფონდი „ახალი სიცოცხლე" და ადგილობრივი თვითმმართველობის წარმომადგენლები. დისკუსია ძალზე საინტერესო გამოვიდა".

თბილისი. 29 ნოემბერს, ფონდ „ღია საზოგადოება – საქართველოს" მხარდაჭერით კლუბი „ფრონტლაინ ჯორჯია" გაიხსნა.  კლუბი ღიაა  ყველა დაინტერესებული პირისთვის, მოეწყობა საჯარო შეხვედრები და დისკუსიები, შესაძლებელი იქნება საზოგადოებისთვის საინტერესო თემებზე არაფორმალურ გარემოში საუბარი.  ფრონტლაინ კლუბი იქნება ჟურნალისტების, ბლოგერების, არასამთავრობო ორგანიზაციების წარმომადგენლების და სამოქალაქო აქტივისტების თავშეყრის ადგილი. კლუბის მენეჯმენტს საქართველოს საზოგადოებრივ საქმეთა ინსტიტუტი განახორციელებს.  წყარო:osgf.ge

თბილისი. „ახალგაზრდა ადვოკატებმა" უკრაინაში მიმდინარე საპროტესტო აქციების შესახებ განცხადება გაავრცელა. ორგანიზაციის შეფასებით, „უკრაინის მთავრობამ ევროკავშირთან ასოცირების ხელშეკრულების პარაფირებაზე უარის თქმით, ქვეყანას ევროპისკენ მიმავალი გზა გადაუკეტა. „ახალგაზრდა ადვოკატები" მივესალმებით უკრაინელი ხალხის ევროპულ არჩევანს და სოლიდარობას ვუცხადებთ აღნიშნულ საკითხთან დაკავშირებით ქვეყანაში მიმდინარე საპროტესტო აქციებს".  „ახალგაზრდა ადვოკატები" თანადგომას უცხადებს კიევში მიმდინარე აქციის მონაწილეებს და მიესალმება უკრაინელი ხალხის ევროპისკენ მიმავალ გზაზე სვლისთვის ბრძოლას. სრულად წყარო: barristers.ge

კახეთი. ,,მედია ცენტრი კახეთის" ორგანიზებით, დოკუმენტური ფილმების საერთაშორისო საფესტივალო კინოჩვენება და ხალხური რეწვის ნამუშევრების გამოფენა-გაყიდვა გაიმართა.  ფესტივალის ფარგლებში გაიმართა ქართველი კინორეჟისორის ლევან კოღუაშვილის ფილმის - „ქალები საქართველოდან" - ჩვენება და ემიგრაციის შესახებ დისკუსია. ფესტივალის მიზანია, ხელი შუწყოს კულტურული სერვისების შექმნას, სამოქალაქო საზოგადოების მონაწილეობით მნიშვნელოვანი საკითხების განხილვა-დისკუსიას. სადისკუსიო კინოჩვენებას მხარდამჭერია ევროკავშირი, ჩეხური ორგანიზაცია „ადამიანი გაჭირვებაში" და საერთაშორისო დოკუნეტური ფილმების ფესტივალი „საკდოკ".

თბილისი. ინფორმაციის თავისუფლების განვითარების ინსტიტუტმა პრეზიდენტის ადმინისტრაციის სოციალური ქსელის გვერდის შესახებ ინფორმაცია გამოაქვეყნა. ორგანიზაცია დაინტერესდა „საქართველოს ახალი პრეზიდენტის, გიორგი მარგველაშვილის ინაუგურაციისა და პრეზიდენტის ადმინისტრაციის ვებ-გვერდის განახლების შემდეგ რა ცვლილებები მოხდა ქვეყნის პირველი პირის სოციალურ ქსელებთან მიმართებაში". სრულად წყარო: eparticipationge.wordpress.com

თბილისი. საერთაშორისო გამჭვირვალობა - საქართველოს ორგანიზებით 3-9 დეკემბერს ანტიკორუფციული კვირეული გაიმართება.  კვირეულის განრიგი წყარო: transparency.ge

თბილისი. ფონდი „ღია საზოგადოება – საქართველო" სოლიდარობას უცხადებს უკრაინის რენესანსის ფონდს და სამოქალაქო სექტორს მათ სწრაფვაში ევროპული ინტეგრაციისკენ. ორგანიზაციამ სპეციალური განცხადება გაავრცელა. განცხადება წყარო: osgf.ge

თბილისი. სამოქალაქო საზოგადოების ინსტიტუტი ჟურნალისტთა კონკურსისთვის ნამუშევრების მიღებას 15 დეკემბრამდე აგრძელებს.  კონკურსის შესახებ