თბილისი. „ტფილისის ჰამქარმა" ვაკის პარკში მიმდინარე მშენებლობასთან დაკავშირებით განცხადება გაავრცელა. „ქალაქზე მზრუნველთა გაერთიანება „ტფილისის ჰამქარი" უერთდება და სოლიდარობას უცხადებს ვაკის პარკში სასტუმროს მშენებლობის მოწინააღმდეგე მოქალაქეთა ჯგუფს. ...კერძო ინტერესებზე მორგებული საკანონმდებლო ცვლილებები, საზოგადოებრივი ინტერესების უგულვებელყოფა, ქალაქგანვითარების გრძელვადიანი ხედვის არარსებობა  შეუქცევად ზიანს აყენებს ჩვენს საარსებო გარემოს. ...მოვუწოდებთ ქალაქ თბილისის მერიას, გაითვალისწინოს მაღალი საზოგადოებრივი ინტერესი და შეაჩეროს მშენებლობის ნებართვა პარკის ტერიტორიაზე", ნათქვამია განცხადებაში. სრულად წყარო:ორგანიზაციის გვერდი სოციალურ ქსელში

აჭარა. თვითმმართველ ქალაქ ბათუმის საკრებულოსთან არსებულმა სამოქალაქო მრჩეველთა საბჭოს შემადგენლობის განახლება დაიწყო. სამოქალაქო მრჩეველთა საბჭო შედგება 19 წევრისაგან, ქალაქ ბათუმში მოქმედი საზოგადოებრივი ორგანიზაციების, ბიზნეს სექტორისა და მასმედიის ორ–ორი წარმომადგენლისაგან. იანვრის ბოლოს კონსულტაციები გაიმართება და შესაბამისი სექტორის წარმომადგენლები საბჭოს ორ–ორ წევრს აირჩევენ. საბჭოს დანარჩენ 13 წევრს წარმოადგენს ადგილობრივი მოქალაქეები ბათუმის 13-ვე ტერიტორიული ერთეულის მიხედვით („საზოგადოებრივი დარბაზის" თავმჯდომარეები). სამოქალაქო მრჩეველთა საბჭოს წევრობა არჩევითია და  1 წლის ვადით ირჩევენ.  დამატებითი ინფორმაციისათვის დაუკავშირდით: ნათია აფხაზავა. სამოქალაქო მრჩეველთა საბჭოს სპიკერი.  natia@civilin.org  საბჭოს ვებგვერდი: marte.ge სოციალურ ქსელში საბჭოს ვებგვერდი

აჭარა. საზოგადოებრივი მაუწყებლის აჭარის ტელევიზიასა და რადიოში გამოცხადებული კონკურსისა და საკადრო პოლიტიკის შესახებ აჭარაში მოქმედი საზოგადოებრივი ორგანიზაციები ერთობლივ განცხადებას ავრცელებენ. „...ნებისმიერი საკითხი, ფინანსური, ტექნიკური, საკადრო უნდა წყდებოდეს მრჩეველთა საბჭოს და დირექტორის მიერ არა მხოლოდ მათი სუბიექტური შეხედულებით, არამედ საზოგადოებრივი მაუწყებლის აჭარის ტელევიზიისა და რადიოს და ზოგადად, საზოგადოების ინტერესების გათვალისწინებითაც. მრჩეველთა საბჭომ და დირექტორმა უნდა უზრუნველყონ, რომ მათი საქმიანობა ყოველთვის იყოს კოორდინირებული და ეფექტური...", ნათქვამია 12 ორგანიზაციის მიერ გავრცელებულ განცხადებაში. განცხადება

აჭარა. თავისუფალ ჟურნალისტთა სახლმა ვიდეო გამოაქვეყნა, სადაც ბათუმის მაცხოვრებლები პატრირაქის ეპისტოლეს ეხმიანებიან. თემაზე „თავისუფალ ჟურნალისტთა სახლის" მოხალისეებმა იმუშავეს. ვიდეო მომზადდა პროექტის - „ახალგაზრდებში დემოკრატიული იდეების პიპულარიზაცია" - ფარგლებში, რომელიც ხორციელდება „დემოკრატიის მხარდამჭერი ნაციონალური ფონდის" (NED) მხარდაჭერით.  წყარო:ორგანიზაციის გვერდი სოციალურ ქსელში

აჭარა. 8 იანვარს, აჭარაში მოქმედი საზოგადოებრივი ორგანიზაციების წარმომადგენლები, საზოგადოებრივი მაუწყებლის აჭარის ტელევიზიისა და რადიოს დირექტორს შეხვდნენ. შეხვედრის მიზანი მაუწყებლის მიერ გამოცხადებულ კონკურსთან დაკავშირებით საზოგადოებაში არსებული კითხვები იყო. ასევე, საუბრის თემა იყო გამოცხადებული ვაკანტური 4 პოზიციის აუცილებლობის საკითხი და მასთან დაკავშირებული პრობლემები. არასამთავრობო ორგანიზაციები მიიჩნევენ, რომ საკონკურსო კრიტერიუმები სამართლებრივად უნდა დაიხვეწოს და კომისია დროულად დაკომპლექტდეს. აჭარის ტელელვიზიისა და რადიოს დირექტორის განცხადებით, საკონკურსო კომისიის წევრთა ვინაობა აპლიკანტებთან გასაუბრების წინა დღეს გახდება ცნობილი. მისივე ინფორმაციით, გასაუბრებაზე დასწრება ნებისმიერ მსურველს შეეძლება, რათა კონკურსის პროცესი გამჭვირვალედ წარიმართოს.

თბილისი. სამოქალაქო საზოგადოების წარმომადგენლები პარლამენტს მიმართავენ საზოგადოებრივი მაუწყებლის მეურვეთა საბჭოს დაკომპლექტების პროცესის შესახებ. „მოვუწოდებთ პარლამენტის წევრებს, რომ გაითვალისწინონ საზოგადოების მაღალი ინტერესი, მიაღწიონ რთულ, მაგრამ აუცილებელ შეთანხმებას, აირჩიონ მეურვეები დასახელებული 27 კანდიდატიდან და ხმა მისცენ საზოგადოებრივი მაუწყებლის ერთხელ და სამუდამოდ გათავისუფლებას პოლიტიკური კონტროლისაგან", ნათქვამია 7 იანვარს გავრცელებულ მიმართვაში, რომელსაც საზოგადოების წარმომადგენლები აწერენ ხელს. მიმართვა წყარო: სოციალურ ქსელში საზოგადოებრივი მაუწყელის რეფორმების მხარდამჭერი ჯგუფის ვებგვერდი

თბილისი. ლიბერალიზმის სასწავლო ცენტრში 2013 წლის ბოლო ლექცია გაიმართა თემაზე: „მედია და პოლიტიკა". ლექცია წაიკითხა ნათია კაპანაძემ. მათ, ვინც ვერ შეძლო ლექციაზე დასწრება ცენტრი საშუალებას აძლევს ჩანაწერი იხილოს. ლექცია: „მედია და პოლიტიკა" წყარო: ცენტრის გვერდი სოციალურ ქსელში

აჭარა. 26 დეკემბერს, ბათუმის „პრეს კაფეში" გაიმართა დისკუსია ტოლერანტობის საკითხებზე. დისკუსიას უძღვებოდნენ საქართველოს დემოკრატიული ინიციატივის იურისტი გიორგი მშვენიერაძე და თეოლოგი ბექა მინდიაშვილი. შეხვედრის მიზანი იყო საქართველოს რეგიონებში დისკუსიების გამართვა ისეთ საკითხებზე, როგორიცაა ტოლერანტობა, სეკულარიზმი, როგორც სახელმწიფოს მართვის განხორციელების პრინციპი. დისკუსიაზე შეაჯამეს 2013 წელს ტოლერანტობის კუთხით არსებული ვითარება, ისაუბრეს უმცირესობების უფლებებზე და მათი დაცვის მექანიზმებზე. შეხვედრას ესწრებოდნენ სტუდენტები, დამამთავრებელი კლასის მოსწავლეები, კულტურის სფეროს წარმომადგენლები, სამოქალაქო განათლების პედაგოგები, სამოქალაქო აქტივისტები და ჟურნალისტები. უახლოეს ხანში მსგავსი ტიპის შეხვედრები გაიმართება ზუგდიდში, თელავში და საქართველოს სხვა ქალაქებში. წყარო: gdi.ge

თბილისი. საერთაშორისო გამჭვირვალობა - საქართველო და საქართველოს ახალგაზრდა იურისტთა ასოციაცია საქართველოს პარლამენტში განვითარებულ მოვლენებს ეხმაურებიან. „26 დეკემბერს პარლამენტში მიმდინარე პლენარულ სხდომაზე, სადაც „სისხლის სამართლის საპროცესო კოდექსში" მოწმეთა დაკითხვის ახალი წესის ამოქმედების ორი წლით გადავადება განიხილებოდა, „საერთაშორისო გამჭვირვალობა – საქართველოსა" და „საქართველოს ახალგაზრდა იურისტთა ასოციაციის" წარმომადგენლებს არ მიეცათ შესაძლებლებლობა, ბანერების დემონსტრირების გზით დაეფიქსირებინათ საკუთარი უხმო პროტესტი მთავრობის ინიციატივასთან დაკავშირებით. პარლამენტის სხდომათა დარბაზში გამოფენილ ბანერებზე ეწერა: „ადამიანის უფლებები ორი წელი ვერ მოიცდის", „დაიცავით დაცვის უფლება" და „უთხარით უარი გადავადებას". ...მიუხედავად იმისა, რომ ჩვენი ორგანიზაციების წარმომადგენლების ქმედება პარლამენტის საქმიანობას არ აფერხებდა, მანდატურებმა თვითნებურად და უხეში ფორმებით ჩამოხსნეს პლაკატები და ჩვენი წარმომადგენლები აიძულეს დარბაზი დაეტოვებინათ", ნათქვამია გავრცელებულ განცხადებაში. სრულად წყარო: transparency.ge

თბილისი. კოალიციამ მედია ადვოკატირებისთვის განცხადება გაავრცელა. „კოალიცია გამოხატავს შეშფოთებას იმის გამო, რომ საზოგადოებრივი მაუწყებლის სამეთვალყურეო საბჭოს დაკომპლექტების პროცესი ჩიხში შევიდა. საპარლამენტო უმრავლესობასა და უმრავლესობის მიღმა დარჩენილ დეპუტაციას ჯერ კიდევ გუშინ უნდა წარედგინათ 6 კანდიდატი, ნაციონალურმა მოძრაობამ წარადგინა მხოლოდ ორი, უმრავლესობამ კი - ერთი. ...სრულიად გაუგებარია, რატომ ვერ შეძლეს დეპუტატებმა შესაბამისი რაოდენობის კანდიდატთა შერჩევა წარდგენილი სიიდან. ......მიგვაჩნია, რომ კანდიდატთა შესარჩევი საზოგადოებრივი კომისიის მუშაობა გამოირჩეოდა მიუკერძოებლობით, კომპეტენტურობითა და გამჭვირვალობის მაღალი სტანდარტით, რამაც გამოიწვია საზოგადოებრივი ნდობა და ინტერესი საზოგადოებრივი მაუწყებლის რეფორმის მიმართ", ნათქვამია განცხადებაში. სრულად წყარო: gyla.ge

იმერეთი. „საქართველოს ახალგაზრდა კონსტიტუციონალისტთა ასოციაციის" წევრებმა საქართველოს პარლამენტში კანონმდებლებთან სამუშაო შეხვედრები გამართეს. ორგანიზაციის წევრები განათლებისა და მეცნიერების კომიტეტის თავმჯდომარეს, დიასპორისა და კავკასიის საკითხთა კომიტეტის თავმჯდომარის პირველ მოადგილეს, რეგიონული პოლიტიკისა და თვითმმართველობის კომიტეტის თავმჯდომარის პირველ მოადგილეს, საპროცედურო საკითხთა და წესების კომიტეტის თავმჯდომარეს და პარლამენტის იურიდიულ საკითხთა კომიტეტის თავმჯდომარეს შეხვდნენ. შეხვედრებზე საუბარი შეეხო ორგანიზაციის ეგიდით განხორციელებულ პროექტებს და იმ რეკომენდაციებს, რომლებიც მომზადდა საკონსტიტუციო ცვლილებების, უმაღლესი განათლების სისტემის რეფორმის, სახელმწიფო სიმბოლიკის მარეგულირებელი ნორმების და სხვა საკითხებთან დაკავშირებით. ამასთან, გაიმართა მსჯელობა დღეს-დღეობით სახელმწიფოს წინაშე მდგარ გამოწვევებზე. წყარო:ორგანიზაციის გვერდი სოციალურ ქსელში

თბილისი. საქართველოს პარლამენტი პლენარულ სხდომაზე პირველი მოსმენით განიხილავს საქართველოს მთავრობის ინიციატივას გამოძიების ეტაპზე მოწმის დაკითხვის ახალი წესის ამოქმედების ვადის კიდევ ერთხელ გადაწევასთან დაკავშირებით. ამ საკითხზე საზოგადოებრივი ორგანიზაციები: საქართველოს ახალგაზრდა იურისტთა ასოციაცია, საერთაშორისო გამჭვირვალობა - საქართველო, საქართველოს დემოკრატიული ინიციატივა (GDI), ადამიანის უფლებების სწავლებისა და მონიტორინგის ცენტრი (EMC), სამართლიანი არჩევნებისა და დემოკრატიის საერთაშორისო საზოგადოება (ISFED), კონსტიტუციის 42-ე მუხლი განცხადებას ავრცელებენ. „...აღნიშნული ნორმის ამოქმედების გადავადებას უკვე პერმანენტულ ხასიათი მიეცა. მსგავსი მიდგომა კი ეჭვქვეშ აყენებს საქართველოს მთავრობის ნებას დაამკვიდროს ადამიანის უფლებების დაცვის აღიარებული სტანდარტები. ამასთან პრაქტიკა ლახავს კანონის უზენაესობის პრინციპს და საზოგადოებაში უსამართლობის შეგრძნებას ამკვიდრებს. ყოველივე ზემოთ აღნიშნულიდან გამომდინარე, მოვუწოდებთ საქართველოს პარლამენტს, მხარი არ დაუჭიროს მთავრობის ინიციატივას და არ გადაავადოს მოწმის დაკითხვის ახალი წესის მიღება, ასევე შეასრულოს საქართველოს კონსტიტუციით მინიჭებული როლი და თავად განსაზღვროს სახელმწიფოს პოლიტიკა ამ მეტად მნიშვნელოვან საკითხთან მიმართებაში", ნათქვამია განცხადებაში. სრულად წყარო: gyla.ge

თბილისი. ინფორმაციის თავისუფლების განვითარების ინსტიტუტმა მოსამართლეთა ანაზღაურების შესახებ ინფორმაცია გამოაქვეყნა. „2013 წლის 15 ოქტომბერს IDFI-იმ გამოაქვეყნა სტატია საქართველოს საერთო სასამართლოების მოსამართლეების ყოველთვიური ანაზღაურების შესახებ ... სტატიის გამოქვეყნების დროისთვის ჯერ კიდევ უცნობი იყო, თუ ზუსტად რა ოდენობით გაიზრდებოდა მოსამართლეების ხელფასები. დღეისთვის უკვე ცნობილია „საქართველოს საერთო სასამართლოების მოსამართლეთა შრომის ანაზღაურების შესახებ" საქართველოს კანონში შესატანი ცვლილებების შესახებ", ნათქვამია ორგანიზაციის ვებ-გვერდზე. სრულად წყარო: opendatablog.wordpress.com

თბილისი. საზოგადოებრივი ორგანიზაციები: საია, გამჭვირვალობა საქართველო, 42–ე მუხლი, ადვოკატთა ასოციაცია, ადამიანის უფლებების სწავლებისა და მონიტორინგის ცენტრი, „სიდა" განცხადებას ავრცელებენ. „გვსურს გამოვეხმაუროთ საქართველოს მთავარი პროკურორის გერმანიაში ნასამართლობის შესახებ გავრცელებულ ინფორმაციას. როგორც საზოგადოებისთვის ცნობილია, განცხადებაზე ხელმომწერი ორგანიზაციების ნაწილისთვის აღნიშნული ინფორმაცია არაოფიციალურად ცნობილი გახდა გახმაურებამდე და ვცდილობდით მისი ნამდვილობის ოფიციალურად გადამოწმებას, რათა ასეთ მნიშვნელოვან საკითხზე ინფორმაციის გადაუმოწმებლად გავრცელებას ზიანი არ მიეყენებინა სამართალდამცავი ორგანოს იმიჯსა და სანდოობისათვის. რადგან ინფორმაცია უკვე გასაჯაროვდა, უნდა გაირკვეს მისი ნამდვილობა და მოვუწოდებთ საქართველოს ხელისუფლებას დაუყოვნებლივ ოფიციალურად გადაამოწმოს აღნიშნული ინფორმაციის ნამდვილობა და გააცნოს საზოგადოებას", ნათქვამია განცხადებაში. სრულად წყარო: gyla.ge

თბილისი. 20 დეკემბერს ლიბერალიზმის სასწავლო ცენტრში გაიმართა ეკა აღდგომელაშვილის ლექცია: „ჰომოფობიური სიძულვილის ენა, აქტორები და ბენეფიტები". მათ ვინც ვერ შეძლო ლექციაზე დასწრება ცენტრი საშუალებას აძლევს იხილოს ლექციის ჩანაწერი. ლექცია: „ჰომოფობიური სიძულვილის ენა, აქტორები და ბენეფიტები"   წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ საპარლამენტო ამბების მორიგი აუდიო პოდკასტი განათავსა ვებსაიტზე. დაინტერესებულ პირებს შეუძლიათ გაეცნონ შემდეგ თემატიკას: მოწმეთა დაკითხვის ახალი წესი ისევ გადავადდება, მოსამართლეთა ხელფასები იზრდება, ავტოტრანსპორტით მოძრაობისას სიჩქარის გადაჭარბებისთვის დადგენილი ჯარიმები მცირდება, პარლამენტი რიგგარეშე სესიის ფორმატში მუშაობას აგრძელებს. საპარლამენტო ამბების პოდკასტი: 23 დეკემბერი წყარო: transparency.ge

თბილისი. 21 დეკემბერს, სტალინის დაბადების დღესთან დაკავშირებით, ინფორმაციის თავისუფლების განვითარების ინსტიტუტმა მოაწყო სიმბოლური აქცია 1937-38 წლების რეპრესიებს შეწირული ადამიანების გასახსენებლად. აქცია სპონტანურად დაიგეგმა და მის ფარგლებში რუსთაველზე, ყოფილი პარლამენტის შენობის წინ გამოიფინა 1937-38 წლებში რეპრესირებული ადამიანების ფოტოები, წერილები, რეაბილიტაციის ცნობები და სხვა მასალები. აქციაზე მისულმა მოქალაქეებმა სტალინის ხელმოწერით საქართველოში რეპრესირებული ადამიანების გვარები წაიკითხეს. სულ სტალინურ რეპრესიებს საქართველოში 3616 ადამიანი შეეწირა. ინფორმაციის თავისუფლების განვითარების ინსტიტუტმა პარტნიორებთან ერთად, პროექტის „სტალინური სიები საქართველოზე" ფარგლებში მოიპოვა რეპრესირებულთა ბიოგრაფიული ცნობები, ფოტოები, პირადი წერილები, მემუარები და სხვა მნიშვნელოვანი დოკუმენტები. უახლოეს მომავალში იგეგმება ამ მასალების წიგნად გამოცემა. წყარო: idfi.ge

თბილისი. კოალიციამ დამოუკიდებელი და გამჭვირვალე მართლმსაჯულებისთვის მოწმის დაკითხვის ახალი წესის ამოქმედების მორიგ გადავადებასთან დაკავშირებით განცხადება გაავრცელა. „კოალიციას მიაჩნია, რომ ინიცირებული ცვლილება უარყოფით გავლენას მოახდენს სისხლის სამართლის მართლმსაჯულების განვითარებაზე და მოუწოდებს კანონპროექტის ინიციატორებს გამოიწვიონ კანონპროექტი პარლამენტიდან", ნათქვამია განცხადებაში. სრულად წყარო: transparency.ge

თბილისი. საზოგადოებრივი ორგანიზაციები ივანე მერაბიშვილის მიერ 14 დეკემბერს გაკეთებულ განცხადების საფუძველზე გამოძიების დაწყების შესახებ განცხადებას ავრცელებენ. „...ვფიქრობთ, ნათელია, რომ უპირველეს ყოვლისა ხელისუფლების ინტერესებში უნდა შედიოდეს სიმართლის გარკვევა. თუ ი.მერაბიშვილი ამბობს ტყუილს, ამ ტყუილის დადგენა მარტივია. კითხვებს პასუხი ეფექტურმა და ობიექტურმა გამოძიებამ უნდა გასცეს. გამოძიების არდაწყება, გაჭიანურება, ვიდეო ჩანაწერების ნახვის შეუძლებლობის მომიზეზება ან მსგავსი უსაფუძვლო განმარტებები ზრდის ეჭვებს, რომ ი.მერაბიშვილის მიერ გავრცელებული ინფორმაცია არის მართალი. ზემოაღნიშნულიდან გამომდინარე, მოვუწოდებთ პროკურატურას და საქართველოს სასჯელაღსრულების, პრობაციისა და იურიდიული დახმარების სამინისტროს დაუყოვნებლივ დაიწყონ გამოძიება. ასევე მოვუწოდებთ ყველა თანამდებობის პირს, განუხრელად დაიცვან საქართველოს კანონმდებლობის მოთხოვნები და მისი საწინააღმდეგო განმარტებები არ გააკეთონ", ნათქვამია განცხადებაში, რომელსაც 12 საზოგადოებრივი ორგანიზაცია აწერს ხელს. სრულად წყარო: gyla.ge

თბილისი. სამოქალაქო საზოგადოების ინსტიტუტი საქართველოს პარლამენტში საზოგადოებრივი ორგანიზაციების მოხსენებების ვიდეოჩანაწერებს აქვეყნებს. 12 დეკემბერს, საქართველოს პარლამენტში 22-მა გამომსვლელმა გააკეთა მოხსენება.    ლევან ავალიშვილის მოხსენების ვიდეოჩანაწერი, ინფორმაციის თავისუფლების განვითარების ინსტიტუტი თემა: საქართველოში ინფორმაციის თავისუფლების საკანონმდებლო ცვლილებების პროექტი     ციალა ქათამაძის მოხსენების ვიდეოჩანაწერი, საზოგადოებრივი ორგანიზაცია "ბორჯღალი" თემა: ეკომიგრანტთა უფლებებისა და ინტერესების დაცვის ხელშეწყობა   ნინო კორძახიას მოხსენების ვიდეოჩანაწერი, საზოგადოებრივი ორგანიზაცია "ტფილისის ჰამქარი" თემა: "კულტურული მემკვიდრეობის შესახებ" კანონში დაგეგმილი ცვლილებები, პრობლემები და საფრთხეები ლია თოდუას მოხსენების ვიდეოჩანაწერი, საქართველოს სტრატეგიული კვლევების და განვითარების ცენტრი თემა: მომხმარებელთა უფლებების დაცვა საქართველოში დავით ლოსაბერიძე, ზაურ ხალილოვი, პაატა კლდიაშვილი – ვიდეოჩანაწერი, ადგილობრივი დემოკრატიის ქსელი, სამოქალაქო ინტეგრაციის ფონდი, ახალგაზრდა ეკონომისტთა ასოციაციის ქუთაისის ფილიალი თემა: თვითმმართველობის რეფორმა საქართველოში გელა თედეევის მოხსენების ვიდეოჩანაწერი, საზოგადოებრივი ორგანიზაცია "ლელი" თემა: სასოფლო–სამეურნეო დანიშნულების ნიადაგის პოლიეთილენით დაბინძურება მანანა ქოჩლაძის მოხსენების ვიდეოჩანაწერი, საზოგადოებრივი ორგანიზაცია "მწვანე ალტერნატივა" თემა: საქართველოში ჰიდროენერგეტიკული პროექტების განხორციელებასთან დაკავშირებული გამოწვევები შოთა ბუჩუკურის მოხსენების ვიდეოჩანაწერი, საზოგადოებრივი ორგანიზაცია "სტეფანწმინდა" თემა: მაღალმთიანი რეგიონების შესახებ კანონი კახა კოჟორიძის მოხსენების ვიდეოჩანაწერი, საქართველოს ახალგაზრდა იურისტთა ასოციაცია თემა: საკანონმდებლო წინადადება რეპრესირებული პირების შესახებ გუნა ბიბილეიშვილის მოხსენების ვიდეოჩანაწერი, კოალიცია "დამოუკიდებელი ცხოვრებისათვის" თემა: შეზღუდული შესაძლებლობების მქონე პირთა ჩართულობა არჩევნების პროცესში უჩა სეთურის მოხსენების ვიდეოჩანაწერი, კოალიცია "მედია ადვოკატირებისათვის", თემა: ციფრული საეთერო მაუწყებლობა საქართველოში პაატა ტურავას მოხსენების ვიდეოჩანაწერი, სამართლებრივი კვლევების ცენტრი თემა: ადმინისტრაციულ სამართალდარღვევათა სამართლის რეფორმის მხარდაჭერა საქართველოში ვახტანგ ზარქუას მოხსენების ვიდეოჩანაწერი, ენერგოეფექტურობის ფონდი თემა: საქართველოს ელექტროენერგეტიკული პოლიტიკის შესაბამისი ნორმატიული აქტების ანალიზი და სათანადო რეკომენდაციები ევროკავშირის ელექტროენერგეტიკულ პოლიტიკასთან ჰარმონიზაციის მიმართულებით ლინა ღვინიანიძის მოხსენების ვიდეოჩანაწერი, ადამიანის უფლებების სწავლებისა და მონიტორინგის ცენტრი თემა: უმცირესობების უფლებები ნონა ქობალიას მოხსენების ვიდეოჩანაწერი, შეზღუდული შესაძლებლობის მქონე ქალთა და შეზღუდული შესაძლებლობის მქონე ბავშვთა დედათა ასოციაცია "დეა" თემა: ახალგაზრდების ჩართულობა ადგილობრივი თვითმმართველობის საქმიანობაში ლაშა ზაალიშვილის მოხსენების ვიდეოჩანაწერი, ზიანის შემცირების ქსელი თემა: ნარკოვითარება საქართველოში ნინო ჩხობაძის მოხსენების ვიდეოჩანაწერი, საქართველოს მწვანეთა მოძრაობა/დედამიწის მეგობრები - საქართველო, თემა: ქალაქ თბილისში გარემოზე ზემოქმედების შეფასების პროცედურის აუცილებლობა სიმონ გაბრიჭიძის მოხსენების ვიდეოჩანაწერი, ველფეარ ფაუნდეიშენი თემა: საქართველოში უნივერსალური ჯანდაცვის სისტემის ჩამოყალიბების მთავარი გამოწვევები ლია მუხაშავრიას მოხსენების ვიდეოჩანაწერი, საზოგადოებრივი ორგანიზაცია "ადამიანის უფლებათა პრიორიტეტი" თემა: მართლმსაჯულების რეფორმა იზოლდა შენგელიას მოხსენების ვიდეოჩანაწერი, წამების მსხვერპლთა ფსიქო–სოციალური და სამედიცინო რეაბილიტაციის ცენტრის ქუთაისის ფილიალი თემა: სამედიცინო სერვისების ხელმისაწვდომობა ქუთაისის #2 სასჯელაღსრულების დაწესებულებაში კახა ურიადმყოფელის მოხსენების ვიდეოჩანაწერი, საერთაშორისო გამჭვირვალობა - საქართველო თემა: სახელმწიფო შესყიდვების საკანონმდებლო მოწესრიგება ალუდა გოგლიჩიძის მოხსენების ვიდეოჩანაწერი, შავი ზღვის რეგიონული მოსწავლე–ახალგაზრდობის ცენტრი თემა: ევროინტეგრაციის პროცესში ახალგაზრდების ჩართულობა და მათი როლის გაზრდა

თბილისი. ლიბერალიზმის სასწავლო ცენტრმა თოქშოუ „ლიბთაიმის" მორიგი გადაცემა გამოაქვეყნა. კონსტიტუციური მონარქიის თემაზე გადაცემაში წამყვანთან ერთად სტუმრები - დავით ზურაბიშვილი და კახა ქორიძე საუბრობენ. გადაცემა   წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაციებმა პეტიცია: „გადავარჩინოთ შეზღუდული შესაძლებლობის მქონე ადამიანები" - გაავრცელეს. „პეტიციის ხელმომწერი არასამთავრობო ორგანიზაციები და ადამიანები მოვითხოვთ, მთავრობამ შეასრულოს მასზე დაკისრებული ვალდებულებები: აღმოფხვრას დარღვევები და დისკრიმინაციული მოპყრობა შშმ პირების მიმართ; შექმნას მონიტორინგის სისტემა და შეისწავლოს ყველა ბავშვის მდგომარეობა, რომელიც იმყოფება სახელმწიფოს თუ საპატრიარქოსთან არსებულ ბავშვთა დაწესებულებებში, მიუხედავად ამ სახლების ადმინისტრაციულ-სამართლებრივი ფორმისა; ჩართოს შშმ პირები დეინსტიტუციონალიზაციის პროგრამაში". პეტიცია წყარო: www.change.org