თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმა მიმართვას ავრცელებს. პლატფორმის წევრი ორგანიზაციები მიმართავენ ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, ევროკომისიის ვიცე პრეზიდენტს, ქეთრინ ეშტონს და ევროკომისარს გაფართოებისა და სამეზობლო პოლიტიკის საკითხებში შტეფან ფულეს. „ამ წერილით გვინდა გთხოვოთ გააძლიეროთ თქვენი ძალისხმევა საქართველოში/რეგიონში რუსეთის ფედერაციის პოლიტიკის წინააღმდეგ დააწესოს ახალი, გადაულახავი „საზღვრები" და აღმართოს სხვადასხვა ფორმის ბარიკადები, მავთულხლართები, რკინაბეტონის კონსტრუქციები, კედლები, მიწათხრილები საქართველოს ტერიტორიაზე", ნათქვამია მიმართვაში. სრულად წყარო: eapnationalplatform.ge

მცხეთა–მთიანეთი.18-23 ივლისს სიქა-ს ორგანიზებით სამოქალაქო განათლებისა და პედაგოგთა გადამზადების პროგრამის ფარგლებში ბაზალეთში გაიმართა სამოქალაქო განათლების ბანაკის მეორე ნაკადი. ბანაკში მონაწილეობდნენ მოსწავლეები და პედაგოგები საქართველოს 11 რეგიონიდან - სულ 91 მონაწილე. ბანაკში მონაწილეები შეხვდნენ მოწვეულ სტუმრებს - გადაცემა ეტალონის წამყვანს გოჩა ტყეშელაშვილს, კალათბურთელ ანატოლი ბოისასა და მეცნიერებისა და განათლების მინისტრის მოადგილეს ალუდა გოგლიჩიძეს. სტუმრებმა ისაუბრეს განათლებისა და სამოქალაქო აქტიურობის მნიშვნელობაზე, ახალგაზრდების აქტიური მოქალაქეობრივი პოზიციის როლზე სათემო პრობლემების მოგვარებაში. სამოქალაქო განათლების ბანაკი პროგრამის ფარგლებში უკვე მესამე წელია იმართება, ამ პერიოდის განმავლობაში ბანაკში მონაწილეობა უკვე მიიღო 600-ზე მეტმა ახალგაზრდამ საქართველოს ყველა რეგიონიდან. ბანაკის მესამე ნაკადი დაგეგმილია 2013 წლის 26-31 ივლისს, რომელშიც მონაწილეობას მიიღებს კიდევ 92 მონაწილე - პროგრამის ფარგლებში შექმნილი სასკოლო სამოქალაქო კლუბების აქტიური წევრები. წყარო: ორგანიზაციის გვერდი სოციალურ ქსელში

გურია.სამოქალაქო საზოგადოების ინსტიტუტმა გამართა სამუშაო შეხვედრა ორგანიზაციების ფინანსურ მდგრადობის საკითხებზე ოზურგეთში. შეხვედრას გურიის რეგიონში მოქმედი არასამთავრობო ორგანიზაციების 18 წარმომადგენელი დაესწრო. ტრენინგების ციკლი მომზადებულია უცხოელ ექსპერთებთან კონსულტაციის შედეგად და მისი მიზანია ხელი შეუწყოს არასამთავრობო ორგანიზაციებს თანხების სხვადასხვა გზით მოძიებაში. სამუშაო შეხვედრები შედგება სამი სესიისგან: ფილანტროპია და მოხალისეობა, გრანტები და სახელმწიფო დაფინანსება, სოციალური მეწარმეობა. შეხვედრები უკვე გაიმართა გორში, ახალციხეში, თელავსა და ქუთაისში. სამოქალაქო საზოგადოების ინსტიტუტი არასამთავრობო ორგანიზაციების წარმომადგენლებთან სამუშაო შეხვედრების ციკლს ბათუმში დაასრულებს.

თბილისი. საერთაშორისო გამჭვირვალობა საქართველო მიესალმება ევროკავშირსა და საქართველოს შორის ღრმა და ყოვლისმომცველი თავისუფალი ვაჭრობის შესახებ შეთანხმების დადების თაობაზე მოლაპარაკებების დასრულებას. ორგანიზაცია იმედს გამოთქვამს, რომ „საქართველოს მთავრობა გააგრძელებს რეფორმებს შესაბამისი კანონმდებლობის დახვეწის კუთხით. მნიშვნელოვანია, რომ უახლოეს დროში დასრულდეს კონკურენციის შესახებ კანონმდებლობის რეფორმა, რეალურად ამოქმედდეს კონკურენციის სააგენტო და ბაზარზე უზრუნველყოფილი იყოს თავისუფალი კონკურენციის წესებისა და პრინციპების დაცვაზე ეფექტიანი სახელმწიფო ზედამხედველობა". სრულად  წყარო: ორგანიზაციის გვერდი სოციალურ ქსელში

სამეგრელო. 20-21 ივლისს ანაკლიაში „საერთაშორისო გამჭვირვალობა – საქართველოს" ზუდიდის ოფისის, ასოციაცია „ათინათისა" და „სამოქალაქო მონიტორინგისა და კვლევების ცენტრის" ერთობლივი პროექტის ფარგლებში ჩატარდა სემინარი – „ჩართულობა დემოკრატიული თვითმმართველობისათვის". სემინარზე მომხსენებლებმა და სტუმრებმა ადგილობრივი თვითმმართველობის ძირითადი საკითხები განიხილეს. შეხვედრაში მონაწილეობა ზუგდიდის მუნიციპალიტეტის გამგეობისა და საკრებულოს თანამშრომლებმა, სამეგრელო-ზემო სვანეთის სამხარეო ადმინისტრაციისა და ადგილობრივი მედიის წარმომადგენლებმა მიიღეს. ღონისძიების ფარგლებში, სემინარი ჩაატარეს „კავკასიის ეკონომიკური და სოციალური კვლევითი ინსტიტუტის" ექსპერტ-ანალიტიკოსებმა. პროექტი ხორციელდება „ევრაზიის თანამშრომლობის ფონდის მხარდაჭერით". წყარო:საერთაშორისო გამჭვირვალობა – საქართველოს გვერდი სოციალურ ქსელში

თბილისი.სამოქალაქო საზოგადოების ინსტიტუტი  საზოგადოებრივი ორგანიზაციების ფინანსისტებისა და იურისტებისთვის საგადასახადო კოდექსის თემაზე უფასო ტრენინგებს ატარებს. ორდღიან ტრენინგებს არასამთავრობო ორგანიზაციების 28 წარმომადგენელი ესწრება. ღონისძიება ფოკუსირებულია არასამთავრობო ორგანიზაციების დაბეგვრის საკითხებზე. ტრენინგს საგადასახადო სამართლის სპეციალისტი ირაკლი შავიშვილი უძღვება.  სამოქალაქო საზოგადოების ინსტიტუტი საზოგადოებრივი ორგანიზაციების ფინანსისტებისა და იურისტებისთვის ტრენინგებს 19–20 ივლისს, 6–7 და 9–10 აგვისტოსაც  ჩაატარებს. მსურველებმა დაადასტურეთ მონაწილეობა ელექტრონული ფოსტის მეშვეობით: irakli_mkheidze@civilin.org ღონისძიება ხორციელდება USAID-ის ფინანსური მხარდაჭერით, აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

თბილისი. ადამიანის უფლებათა სწავლებისა და მონიტორინგის ცენტრმა (EMC) დისკრიმინაციის ყველა ფორმის აღმოფხვრის შესახებ საქართველოს კანონის პროექტთან დაკავშირებით მოსაზრებები და შენიშვნები გამოაქვეყნა. „ადამიანის უფლებების სწავლებისა და მონიტორინგის ცენტრი (EMC) მიესალმება საქართველოს იუსტიციის სამინისტროს ინიციატივას ანტიდისკრიმინაციული კანონის მიღების თაობაზე და მიაჩნია, რომ სამართლებრივი დაცვის სპეციალური მექანიზმებისა და დისკრიმინაციის წინააღმდეგ ბრძოლის ეფექტური ინსტიტუტის ამოქმედება მნიშვნელოვნად შეუწყობს ხელს დისკრიმინაციის აღმოფხვრას", ნათქვამია ორგანიზაციის გვერდზე სოციალურ ქსელში სრულად  წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ ბლოგპოსტი გამოაქვეყნა თემაზე:  „უცხოელებისთვის მიწის შეძენის აკრძალვა: კონსტიტუციის დარღვევა და საინვესტიციო გარემოზე უარყოფითი გავლენა". „საერთაშორისო გამჭვირვალობა – საქართველო" აღიარებს მიწის რესურსების მართვასთან დაკავშირებული საკითხების მოგვარების აუცილებლობას, თუმცა, მიაჩნია, რომ ახლადშემოღებული შეზღუდვები არღვევს საკუთრების კონსტიტუციურ უფლებებს; ასევე, ქვეყნის ეკონომიკური განვითარების სერიოზულად შეფერხებაც შეუძლია", ნათქვამია ორგანიზაციის გვერდზე. ორგანიზაცია უახლოეს მომავალში აპირებს  შეზღუდვების გაუქმების მოთხოვნით სარჩელით მიმართოს საკონსტიტუციო სასამართლოს. სრულად წყარო: transparency.ge

თბილისი. ფონდმა „ღია საზოგადოება - საქართველომ" ინგლისურიდან ქართულად თარგმნა და გამოსცა „ადვოკატირების გზამკვლევი სამოქალაქო საზოგადოებისათვის: ევროკავშირში გადაწყვეტილებების მიღების პროცესი და ადვოკატირება".  პუბლიკაცია მომზადდა ღია საზოგადოების ფონდების ადგილობრივი მმართველობის და საჯარო სექტორის რეფორმის ინიციატივის ფარგლებში. პუბლიკაციაში აღწერილია ის ძირითადი საკითხები, რომელიც უკავშირდება ევროკავშირის ინსტიტუტების მუშაობას და მათ როლს გადაწყვეტილების მიღების პროცესში. მასში ასევე განხილულია საკანონმდებლო პროცედურები, საჯარო პოლიტიკის შემუშავების პროცესი, ადვოკატირების განხორციელების შესაძლებლობები და შესაძლო შედეგები. წარმოდგენილი პუბლიკაცია  დაეხმარება სამოქალაქო სექტორის წარმომადგენლებს ევროკავშირის ინსტიტუტებთან მუშაობის პროცესში. წყარო: osgf.ge

თბილისი. ორგანიზაცია „იდენტობამ" იურისტ ნინო ბოლქვაძესთან ინტერვიუ გამოაქვეყნა. ორგანზიაციის იურისტი პარლამენტის ადამიანთა უფლებების დაცვისა და სამოქალაქო ინტეგრაციის კომიტეტის 17 მაისის მოვლენების განხილვებს ესწრებოდა. ნინო ბოლქვაძესთან ინტერვიუ ორგანიზაციამ ვებ–გვერდზე განათავსა. სრულად წყარო: identoba.com

თბილისი. 17 ივლისს საქართველოს ახალგაზრდა კონსტიტუციონალისტთა ასოციაციის ინიციატივით გაიმართა მრგვალი მაგიდა – „ახალგაზრდები საკონსტიტუციო ცვლილებებისთვის". ღონისძიებაზე განიხილეს ინიცირებული საკონსტიტუციო ცვლილებები. ასოციაციის წარმომადგენლებმა დამსწრე საზოგადოებას შესთავაზეს ცვლილებების ალტერნატიული წინადადებები. სრულად წყარო: ორგანიზაციის გვერდი სოციალურ ქსელში

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის საზოგადოებრივი ორგანიზაციების განვითარების ქვეჯგუფის ინიციატივით მზადდება საქართველოს პარლამენტსა და საზოგადოებრივ ორგანიზაციებს შორის ურთიერთთანამშრომლობის მემორანდუმის გაფორმება. სამოქალაქო საზოგადოების ინსტიტუტის აღნიშნულ ინიციატივას, რომელიც გასული წლის შემოდგომაზე პარლამენტის წევრებისა და საზოგადოებრივი ორგანიზაციების შეხვედრაზე გამოითქვა, აქტიურად გამოეხმაურა პარლამენტის თავმჯდომარე. საზოგადოებრივი ორგანიზაციების წარმომადგენელთა ჯგუფმა (ვაჟა სალამაძე, ვაკო ნაცვლიშვილი, თინათინ ბოლქვაძე, ზაალ ანჯაფარიძე, დავით ლოსაბერიძე, კოტე კანდელაკი) შეიმუშავეს მემორანდუმის პროექტი, რომელიც წარედგინა პარლამენტის თავმჯდომარეს. პარალელურად ტექსტზე მუშაობა მიმდინარეობდა ეროვნული პლატფორმის ქვეჯგუფშიც. ერთობლივი მუშაობის შედეგად ტექსტი დაიხვეწა და შეჯერდა. 9 ივლისს გამართული ქვეჯგუფის შეხვედრაზე, ქვეჯგუფის წევრებმა მოიწონეს და კონსენსუსით მხარი დაუჭირეს მემორანდუმის ხელმოწერას. კონსულტაციები საქართველოს პარლამენტთან კვლავ გრძელდება. ინფორმაციას ამ პროცესის შესახებ მომავალშიც მოგაწვდით. გაეცანით მემორანდუმის ტექსტს და კონკრეტული კითხვებისა თუ საკითხების შესახებ დაუკავშირდით ქვეჯგუფის კოორდინატორს – ვაჟა სალამაძეს ელ–ფოსტით: vazha@civilin.org მემორანდუმი

თბილისი. ფონდი „ღია საზოგადოება - საქართველოს" სამოქალაქო საზოგადოების მხარდაჭერის პროგრამა ახორციელებს პროექტს, რომლის მიზანია ეთნიკურ უმცირესობათა არასამთავრობო ორგანიზაციების შესაძლებლობების განვითარება. პროექტის ფარგლებში ჩატარებული ტრენინგებისა და თემატური სემინარების მეშვეობით ორგანიზაციებს გადაეცემათ თეორიული ცოდნა და ის ძირითადი უნარ-ჩვევები, რაც აუცილებელია არასამთავრობო ორგანიზაციების ეფექტურად მართვის, ორგანიზაციული განვითარებისა და წარმატებული საქმიანობისათვის. უშუალოდ ტრენინგებს უძღვებიან ცვლილებისა და კონფლიქტის მართვის ცენტრი „პარტნიორები - საქართველოს" და საქართველოს სტრატეგიული კვლევისა და განვითარების ცენტრის წამომადგენლები. სემინარებში 25-ზე მეტი არასამთავრობო ორგანიზაციის 50-მდე წარმომადგენელი მონაწილეობს. პროგრამის პირველ ეტაპზე, 2013 წლის ივლისი-ოქტომბრის პერიოდში ჩატარდება ტრენინგები შემდეგ საკითხებზე: სტრატეგიული დაგეგმვა, სამოქალაქო ინტერესების დაცვა, სახსრების მოძიება და საპროექტო განაცხადის მომზადება. 2013 წლის 9-10 ივლისს თბილისში ეთნიკურ უცმირესობათა 13 არასამთავრობო ორგანიზაციის 17-მა თანამშრომელმა გაიარა ტრენინგი სტრატეგიული დაგეგმვის თემაზე. ორდღიანი ტრენინგის მიზანი იყო განევითარებინა მონაწილეებში არასამთავრობო ორგანიზაციაში სტრატეგიული დაგეგმვის პროცესის ორგანიზებისა და ჩატარებისთვის საჭირო ცოდნა და უნარები. ტრენინგის ეხებოდა შემდეგ თემებს: დაგეგმვის მნიშვნელობა; მისია და ხედვა; ინფორმაციის ტიპები, ინფორმაციის შეგროვების და ანალიზის მეთოდები; სტრატეგიული არჩევანი; გადაწყვეტილების მიღების მეთოდები; სტარტეგიული მიზნების ფორმულირება; პროგრამის ლოგიკა; პროგრამის და პროექტების ურთიერთმიმართება და დაგეგმვის პროცესის ორგანიზება. წყარო: osgf.ge

თბილისი. საერთაშორისო გამჭვირვალობა – საქართველომ „კომუნიკაციების ეროვნული კომისიის ხელმძღვანელობის იმპიჩმენტი – სავალდებულო პროცედურები" გამოაქვეყნა. ორგანიზაცია მიესალმება „პარლამენტის მიერ გამოძიების წარმოებას საქართველოს კომუნიკაციების ეროვნული კომისიის ყოფილი წევრისა და თავმჯდომარის ირაკლი ჩიქოვანის მხრიდან ინტერესთა კონფლიქტისა და სამსახურებრივი მოვალეობის შეუსრულებლობის ფაქტების შესახებ. ირაკლი ჩიქოვანი სამშაბათს, პარლამენტის მიერ იმპიჩმენტის პროცესის დაწყებამდე, კომისიის წევრის თანამდებობიდან გადადგა". სრულად  წყარო: transparency.ge

კახეთი. შაშიანის საზოგადოებრივ ცენტრში, 11 ივლისს, სოციალურ თემებზე მოკლემეტრაჟიანი ფილმების ჩვენება და დისკუსია გაიმარათა. დოკუმენტური ფილმების ჩვენება სახელმწიფო სერვისების განვითარების სააგენტოს პროექტის „ელექტრონული მმართველობის დანერგვა ადგილობრივ თვითმმართველობებში" ფარგლებში მოეწყო. ფილმის ჩვენება არასამთავრობო ორგანიზაციამ „Go Group Media" უზრუნველყო. აღნიშნული ინიციატივის მიზანს ადგილობრივ მოსახლეობაში სამოქალაქო კულტურის გაღრმავება და დისკუსიის უნარ-ჩვევების ჩამოყალიბების ხელშეწყობა წარმოადგენს. ღონისძიებაში მონაწილეობა მიიღეს შაშიანის სკოლის დამამთავრებელი კლასის მოსწავლეებმა, მუნიციპალიტეტის წარმომადგენლებმა და სხვა დაინტერესებულმა პირებმა. ღონისძიების ფარგლებში სამი დოკუმენტური ფილმი აჩვენეს, რომელსაც შედეგად დისკუსია მოჰყვა. დარბაზი აქტიურად ჩაერთო განხილვაში და მათთვის აქტუალურ თემებზე გაამახვილეს ყურადღება. დაინტერესების შემთხვევაში, ღონისძიების მონაწილეებს შესაძლებლობა მიეცემათ გაიარონ მოკლემეტრაჟიანი დოკუმენტური ფილმის გადაღების მოკლე კურსი და თავად გადაიღონ მოკლემეტრაჟანი ფილმი სოციალურ თემატიკაზე. დოკუმენტური ფილმების ჩვენება ყველა გახსნილ საზოგადოებრივ ცენტრშია დაგეგმილი. შემდეგი ღონისძიება 26 ივლისს მანგლისის საზოგადოებრივ ცენტრში გაიმართება. ღონისძიება პროექტის, სახელწოდებით „ელექტრონული მმართველობის დანერგვა ადგილობრივ თვითმმართველობებში" ფარგლებში იმართება, რომელსაც სახელმწიფო სერვისების განვითარების სააგენტო ევროკავშირის დაფინანსებით ახორციელბს. წყარო: სახელმწიფო სერვისების განვითარების სააგენტოს გვერდი სოციალურ ქსელში

თბილისი. ჰაინრიჰ ბიოლის ფონდში საჯარო დისკუსია გაიმართა. თემაზე – „პოლიტიკური მეხსიერების ლაბირინთები: სამართლიანობის აღდგენა თუ პოლიტიკური ანგარიშსწორება?"  დამსწრეებთან ერთად ოთარ კახიძე, ანა დოლიძე და დავით ბერძენიშვილი საუბრობდნენ. დისკუსიის ჩანაწერი   წყარო:ორგანიზაციის გვერდი სოციალურ ქსელში, livestream.com

თბილისი. საერთაშორისო გამჭვირვალობა – საქართველომ საპარლამენტო ამბების მორიგი აუდიო პოდკასტი გამოაქვეყნა. 15 ივლისის გამოშვების თემებია: ცვლილებები უნივერსიტეტების მართვასთან დაკავშირებულ კანონპროექტში, თბილისის სახელმწიფო უნივერსიტეტის რექტორის არჩევნები, პარლამენტის მიერ პრეზიდენტის ვეტოს დაძლევა, პრემიერმინისტრის უფლებამოსილებების გაფართოება, საარჩევნო საკითხების გარშემო შექმნილი ინტერფრაქციული ჯგუფის მუშაობა, დეპუტატებისთვის ეთიკის კოდექსის ამოქმედების საკითხი. საპარლამენტო ამბების პოდკასტი 15 ივლისი წყარო: transparency.ge

თბილისი. საერთაშორისო გამჭვირვალობა – საქართველო უმაღლესი განათლების შესახებ კანონში მეორე მოსმენით განხილვისას შეტანილ ცვლილებებს გამოეხმაურა. სოციალურ ქსელში ორგანიზაციის ვებგვერდზე ნათქვამია, რომ „პარლამენტმა მეორე მოსმენით განხილვისას ცვლილება შეიტანა იმ კანონპროექტში, რომლის მიხედვითაც რექტორის მოვალეობის შემსრულებლის დანიშვნის უფლებამოსილება პრემიერმინისტრს ენიჭებოდა. ახალი რედაქცია შემდეგნაირად ჩამოყალიბდა: „საქართველოს კანონმდებლობის შესაბამისად რექტორის უფლებამოსილების ვადამდე შეწყვეტის შემთხვევაში რექტორის მოვალეობის შემსრულებელს ირჩევს საარჩევნო კოლეგია, რომლის შემადგენლობაში შედის ყველა ის პირი, ვისაც უმაღლეს საგანმანათლებლო დაწესებულებაში უჭირავს აკადემიური ან სამეცნიერო თანამდებობა და ფლობს დოქტორის ან მასთან გათანაბრებულ აკდემიურ ხარისხს." ჩვენი ორგანიზაცია მიესალმება წარმოდგენილ ცვლილებას, თუმცა, მიგვაჩნია, რომ უმჯობესი იქნება, თუ რექტორის მოვალეობის შემსრულებლის შერჩევის მსგავსი წარმომადგენლობითი მოდელი თავად რექტორის არჩევაზეც გავრცელდება". წყარო: ორგანიზაციის გვერდი სოციალურ ქსელში

აჭარა. 13 ივლისს, ბათუმში, სასტუმრო „შერატონის" საკონფერენციო დარბაზში საკონსტიტუციო კომისიის წევრებმა ბათუმის მოსახლეობასთან საკონსტიტუციო ცვლილებების სამი პროექტის განიხილეს. ცვლილებების პირველი პროექტი საქართველოს პრეზიდენტის, პრემიერ–მინისტრის და პარლამენტის თავმჯდომარის თანამდებობის დაკავების უფლებას ეხება. მეორე ცვლილების პროექტი პარლამენტის მიერ მთავრობის შემადგენლობაში ცვლილებების შეტანაზე კონტროლს, ხოლო მესამე ცვლილება – კონსტიტუციაში ცვლილებების შესატანად საჭირო ქვორუმს. შეხვედრა 2 საათზე მეტ ხანს გაგრძელდა კითხვა–პასუხის რეჟიმში.

თბილისი. კოალიცია დამოუკიდებელი და გამჭვირვალე მართლმსაჯულებისთვის მოწმის დაკითხვის ახალი წესის ამოქმედების შესაძლო გადაწევის შესახებ განცხადებას აქვეყნებს. პარლმენტში საქართველოს მთავრობის მიერ ინიცირებული იქნა კანონპროექტი სისხლის სამართლის საპროცესო კოდექსში ცვლილებების შეტანის თაობაზე, რომლის მიხედვითაც მოქმედი სისხლის სამართლის პროცესით განსაზღვრული მოწმის დაკითვის ახალი პროცედურების ამოქმედების ვადა გადაიწევს 2014 წლის 1 დეკემბრამდე, ხოლო მანამდე იმოქმედებს 1998 წლის სისხლის სამართლის საპროცესო კოდექსით დადგენილი პროცედურები. „მოვუწოდებთ საქართველოს პარლამენტის წევრებს, არ გაიზიარონ ინიცირებული ცვლილება და ხელი შეუწყონ სისხლის სამართლის მართლმსაჯულების გაჯანსაღებას, პირველ რიგში, მხარეთა რეალური თანასწორობის უზრუნველყოფის გზით.  მოწმეთა სასამართლოში დაკითხვის ახალი წესის ამოქმედება კი სწორედ მხარეთა თანასწორობის შეუცვლელ წინაპირობას წარმოადგენს" – ნათქვამია განცხადებაში. სრულად წყარო: gyla.ge

თბილისი. საქართველოს დემოკრატიული ინიციატივა განცხადებას აქვეყნებს მიქაუტაძის საქმის საგამოძიებო ქვემდებარეობის შესახებ. საქართველოს დემოკრატიული ინიციატივა საქართველოს მთავარ პროკურორს მოუწოდებს, რომ მამუკა მიქაუტის საქმის გამოძიება პროკურატურამ აწარმოოს. „გამოძიების პროკურატურის მიერ წარმოება გაზრდის გამოძიების პროცესის მიუკერძოებლად წარმართვის შესაძლებლობას და აამაღლებს მისადმი საზოგადოებრივ ნდობას", ნათქვამია განცხადებაში. სრულად წყარო: gdi.ge

თბილისი. 11 ივლისს თბილისის მერიის ორგანიზებით არასამთავრობო ორგანიზაციების ფესტივალი გაიმართა. საგამოფენო ცენტრ ექსპო–ჯორჯიაში 100–მდე არასამთავრობო ორგანიზაციის გამოფენა მოეწყო, რომელზედაც თავიანთი საქმიანობა და აქტივობები წარმოაჩინეს. გამოფენის პარალელურად გაიმართა დისკუსიები თბილისის სტრატეგიაზე და მდინარე მტკვრის დაბრუნებაზე. ფესტივალის ფარგლებში არასამთავრობო ორგანიზაციები თბილისის მერიის სამსახურებსა და დონორებს შეხვდნენ და მათთვის საინტერესო საკითხებზე დისკუსია გამართეს.