აჭარა. შეზღუდულ შესაძლებლობის მქონე ქალთა ალიანსის დირექტორი, დეა ერემაშვილი ორგანიზაციის სახელით ვიდეომიმართვას ავრცელებს და მოუწოდებს პასუხისმგებელ პირებს არ მიიღონ კანონპროექტი „უცხოური გავლენის გამჭვირვალობის“ შესახებ. „თუ ეს კანონპროექტი ძალაში შევა და კანონის სახეს მიიღებს, შეზღუდული შესაძლებლობის მქონე ქალები ამ ქვეყანში უამრავი სერვისის გარეშე დარჩებიან. ჩვენ, აჭარის ჯანდაცვის სამინისტროსთან ერთად, არაერთხელ გვიმუშავია სხვადასხვა მომსახურების დანერგვის კუთხით. თუ ჩვენ აღარ ვიქნებით, ასეთი ინიციატივებიც შეწყდება. მივმართავთ კანონპროექტის ავტორებსა და მხარდამჭერებს - არ მიიღოთ ეს კანონპროექტი. არ დაუშვათ რომ საქართველოში, ძალიან ბევრი შშმ ქალი დარჩეს მხარდაჭერის, განათლების, სასიცოცხლო სერვისებისა თუ საზოგადოებრივ ცხოვრებაში მონაწილეობის მიღმა“, ნათქვამია განცხადებაში. წყარო: ორგანიზაციის გვერდი სოციალურ ქსელში

თბილისი. რუსეთის მიერ უკრაინაში ომის დაწყებიდან ერთი წელი გავიდა. სოციალური სამართლიანობის ცენტრი სოლიდარობას უცხადებს უკრაინელ ხალხს და უსამძიმრებს მძიმე ადამიანური დანაკარგის გამო. „გვწამს, რომ ეს სამართლიანი ბრძოლა დასაბამს მისცემს უკრაინის აღორძინებას, განვითარებას და გრძელვადიან მშვიდობას ევროპაში. ეს ომი ასევე, მძიმე დარტყმის ქვეშ აყენებს საქართველოს უსაფრთხოებას, ეკონომიკას და პოლიტიკას. ცვალებადი ევროპული უსაფრთხოების ფონზე, ბუნდოვანია საქართველოს ხელისუფლების მიერ გადადგმული დიპლომატიური თუ პოლიტიკური ნაბიჯები და შესაბამისად, ქვეყნის უსაფრთხოების პერსპექტივები. სტრატეგიულ პარტნიორებთან გაუმართლებელი უთანხმოებების, არაერთგვაროვანი საგარეო პოლიტიკური ორიენტირების და მზარდი ავტორიტარიზმის ფონზე, საქართველოს უსაფრთხოება უფრო და უფრო კარგავს ადგილს ევროპული უსაფრთხოების დღის წესრიგში და ქვეყანა სამწუხაროდ, დღითიდღე შორდება ევროკავშირში გაწევრიანების ახლადგაჩენილ შესაძლებლობას“, ნათქვამია სოციალური სამართლიანობის ცენტრის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. აშშ-ს ელჩი საქართველოში, კელი დეგნანი მედიასთან საუბარში შეეხო "უცხოური გავლენის გამჭვირვალობის შესახებ" კანონპროექტს. „ეს კანონპროექტი არ ეყრდნობა ამერიკულ კანონმდებლობას. კანონი [უცხოელი აგენტების რეგისტრაციის შესახებ, იგივე FARA], რომელიც აშშ-ში მოქმედებს, ეხება ლობისტებს, იურიდიულ ფირმებს, რომლებიც დაქირავებულნი არიან უცხო ქვეყნის მთავრობების მიერ, რათა მათ წარმოადგინონ ამ უცხო ქვეყანათა პოლიტიკური ინტერესი. შესაბამისად, ეს არის არა ამერიკული, არამედ რუსული კანონი, რომლის მიზანია სამოქალაქო ორგანიზაციების სტიგმატიზირება, გააჩუმოს განსხვავებული აზრი, შეხედულება და, ამავდროულად, ხელი შეუშალოს საქართველოს იმ მოქალაქეებს, რომლებიც ცდილობენ დაეხმარონ თავიანთ თანამოქალაქეებს“, – აღნიშნავს "ნეტგაზეთთან" საუბარში ამერიკის ელჩი. სრულად... წყარო: netgazeti.ge ფოტო: ნეტგაზეტი

თბილისი. შეზღუდული შესაძლებლობების მქონე პირთა ორგანიზაცია „ცვლილებები თანაბარი უფლებებისთვის“ მიმართავს „უცხოური გავლენის გამჭვირვალობის შესახებ“ კანონპროექტის ინიციატორებს, პოტენციურ მხარდამჭერებს და მოუწოდებს მთავრობას არ მიიღოს ეს კანონპროექტი. „მოგმართავთ კანონპროექტის ინიციატორებსა და პოტენციურ მხარდამჭერებს - არ მიიღოთ ეს კანონპროექტი. არ მოკლათ ათასობით ადამიანის ბედი, მომავალი და ცხოვრება. ამას, ვერასდროს გამოასწორებთ. იმ შემთხვევაში, თუკი ჩვენ საქმიანობას შევწყვეტთ, მხარდაჭერის, დახმარებისა და უამრავი სერვისის გარეშე დარჩებიან ის ადამიანები, რომლებიც ახლა სხვადასხვა დონორის მხრიდან გაცემული გრანტის საშუალებით, ჩვენი გავლით ახერხებენ სახლიდან გამოსვლას, ცხოვრების თავიდან დაწყებას, სამსახურის ძიებას, განათლების მიღებას და უბრალოდ - დამოუკიდებლად ცხოვრებას. ჩვენი საქმიანობის შეწყვეტა, ყველა ამ ადამიანისა და მათი ოჯახის წევრებისთვის მიყენებული უდიდესი დარტყმაა. დარტყმა, რომელმაც შესაძლოა რომ მათი ცხოვრება ისევ წარსულისკენ, ძალიან მძიმე ყოფისკენ წაიყვანოს“, ნათქვამია განცხადებაში. წყარო: ორგანიზაციის გვერდი სოციალურ ქსელში

თბილისი. არაკომერციული მედია „აი, ფაქტი“ გამომძიებელ ჟურნალისტთა გაერთიანებაა. ის 2016 წელს დაარსდა და მისი მიზანია საზოგადოებას მიაწოდოს ინფორმაცია ქვეყანაში მიმდინარე მნიშვნელოვანი მოვლენების შესახებ. მედია ორგანიზაციის პრინციპები ემყარება ფაქტების სიზუსტეს, გადამოწმებას, მიუკერძოებლობას, ბალანსის დაცვას.  „აი, ფაქტს“ ორი ოფისი აქვს, ერთი - თბილისში, მეორე კი ქუთაისში. ქუთაისში მოქმედი ოფისი ნიდერლანდების სამეფოს საელჩოს მხარდაჭერით გაიხსნა. მედია ორგანიზაციაში 7 გამომძიებელი ჟურნალისტია დასაქმებული.  „აი, ფაქტი“ საერთაშორისო დონორების და კერძო შემომწირველების დახმარებით არსებობს. ორგანიზაციის დახმარება თქვენც შეგიძლიათ - თქვენ მიერ გადარიცხული თანხა კი ისეთი მასალების შემქნას მოხმარდება, რომელიც ამხელს კორუფციას, უსამართლობას, უთანასწორობას... „აი, ფაქტი“ შეუერთდა დამოუკიდებელი მედია საშუალებების და საზოგადოებრივი ორგანიზაციების მიერ გავრცელებულ განცხადებას „უცხოური გავლენის გამჭვირვალობის“ კანონპროექტის შესახებ. „იმერეთის სოფლებში რომ ჩავდივართ, ხალხი თვალებში შემოგვციცინებს, უხარიათ რომ მათზე დავწერთ. მათთან ურთიერთობა ჩვენთვის ერთი დიდი თერაპიაა. გასაჭირსაც კი ჟღურტულით ამბობენ ამ მხარეში. ხშირად უთქვამთ, აქ მთავრობა არ მოსულა და თქვენ რა ქარმა გადმოგაგდოთო. ამ ხალხს იმედი ესახება, რომ ისინი ისევ ახსოვთ და მათი აზრი მნიშვნელოვანია. ხშირად პრობლემებიც მოგვიგვარებია მათთვის. განსაკუთრებით იმ შემთხვევაში, თუ ადგილობრივი ხელისუფლება ნამუსიანია და ესმის მედიასთან კომუნიკაციის მნიშვნელობა. ასეთი ცოტაა, მაგრამ არიან იმერეთში.   ჰოდა, ხვალ და ზეგ, უცხოური გავლენის აგენტების იარლიყს რომ მოგვაკრავს მთავრობა ამ ახალი, რუსული კანონით და მუშაობას აგვიკრძალავენ დამოუკიდებელ მედიასაშუალებებს, ვეღარავინ დაწერს ამ ალალ და კეთილ იმერლებზე ვეღარაფერს. ვერავინ თანაუგრძნობს მათ გასაჭირში. სამთავრობო მედიები მხოლოდ იმაზე დაწერენ, რაც გაკეთდა. რა არ კეთდება - ამაზე არავინ ისაუბრებს საჯაროდ. ასე მუშაობს პიარი.  მედიის საქმე მთავრობის ნაკლოვანებების გამოჩიჩქვნა და გამოფენაა. მედიის საქმე ყველა ნორმალურ ქვეყანაში ესაა და თუ ნორმალური ქვეყანა გვინდა ვიყოთ, ასეც უნდა ვქნათ“, ნათქვამია „აი, ფაქტის“ მიერ გავრცელებულ განცხადებაში. წყარო: „აი, ფაქტის“ ვებგვერდი და გვერდი სოციალურ ქსელში

თბილისი. დავით ხუხუამ შინაგან საქმეთა სამინისტროს სააპელაციოს სასამართლოში მოუგო. მის ინტერესებს არასამთავრობო ორგანიზაცია „პარტნიორობა ადამიანის უფლებებისთვის“ (PHR) იცავდა. ორგანიზაციის ცნობით, სასამართლომ თქვა, რომ 2016 წლის 15 ივნისს დავითს პოლიცია დისკრიმინაციულად მოექცა მაშინ, როდესაც მას ეტლში გადაჯდომისა და ფიზიკური მოთხოვნილების დაკმაყოფილების საშუალება არ მისცა. სრულად... საქმის დეტალები წაიკითხეთ „ნეტგაზეთის“ მიერ მომზადებულ მასალაში... წყარო: PHR-ის გვერდი სოციალურ ქსელში ფოტო: ნეტგაზეთი

საქართველოში ევროკავშირის ელჩმა, პაველ ჰერჩინსკიმ ვიდეომიმართვა გაავრცელა – უკრაინის წინააღმდეგ რუსეთის მიერ დაწყებული ომის ერთი წლის გასვლის შესახებ. „ ... უკრაინას თავს დაესხნენ, რადგან მას სურდა საკუთარი მომავალი თვითონ, და არა მოსკოვის მითითებით, განესაზღვრა.  ...ევროკავშირი კვლავ უდრეკად, ერთიანად და მტკიცედ უჭერს მხარს უკრაინას ყველა – ჰუმანიტარულ, ეკონომიკურ, პოლიტიკურ, დიპლომატიურ და სამხედრო – ფრონტზე.  ...ეს აგრესია არა მარტო სუვერენული ქვეყნის, უკრაინის წინააღმდეგაა მიმართული, არამედ მიმართულია დემოკრატიის წინააღმდეგ მთელ მსოფლიოში“. მიმართვის ტექსტი სრულად...  წყარო: ევროკავშირის წარმომადგენლობა

24 თებერვალს, 19:00 საათზე, საქართველოს სტრატეგიული ანალიზის ცენტრში ჩატარდება საჯარო ლექცია თემაზე - ქალების როლი მშვიდობასა და უსაფრთხოებაში. სრულად...

24 თებერვალს, 14:00 საათზე, საქართველოს ახალგაზრდა იურისტთა ასოციაცია გამართავს ონლაინ დისკუსიას თემაზე: „მოსამართლეთა გამოხატვის თავისუფლების ფარგლები“. სრულად...

24 თებერვალს, 13:00 საათზე, სასტუმრო RadissonBlu Iveria-ში, რონდელის ფონდი (GFSIS) უმასპინძლებს დისკუსიას თემაზე „რუსეთის სრულმასშტაბიანი შეჭრა უკრაინაში ერთი წლის შემდეგ: მშვიდობის ფორმულა“, სადაც მაღალი რანგის დიპლომატები და ექსპერტები იმსჯელებენ. მისამართი: თბილისი, პირველი რესპუბლიკის მოედანი #1

24 თებერვალს, ზუგდიდი მოლში, შეიძინე რაიმე ნივთი და დაეხმარე ზუგდიდთან დამეგობრებულ უკრაინულ ქალაქს. სრულად...

რონდელის ფონდის ევროპული კვლევების ცენტრის დირექტორი კახა გოგოლაშვილი, Movement EDU–ის პლატფორმაზე, საუბრობს კანონპროექტზე "უცხოური გავლენის აგენტების შესახებ". უსმინეთ და გაიგებთ პასუხებს შემდეგ კითხვებზე: ▪ რა არის კანონპროექტის მიზანი? ▪ რას ნიშნავს "გავლენის აგენტი" ▪ ვის შესაძლოა შეეხოს ეს კანონი? ▪ ქართული კანონპროექტი ამერიკული კანონის ანალოგია? ▪ საქართველოში რას გამოიწვევს კანონის მიღება?

თბილისი. სოციალური სამართლიანობის ცენტრის ინფორმაციით, თბილისის საქალაქო სასამართლომ უკანონოდ მიიჩნია გიორგი ჯამბურიას ეროვნული მუზეუმიდან გათავისუფლება. მის ინტერესებს სასამართლოში სოციალური სამართლიანობის ცენტრი იცავს. „გიორგი ერთ-ერთია კულტურის სექტორის იმ 70-მდე თანამშრომელს შორის, რომლებიც თეა წულუკიანის კულტურის მინისტრის პოზიციაზე დანიშვნის შემდეგ, მასობრივი საკადრო წმენდის მსხვერპლი გახდნენ“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. საერთაშორისო გამჭვირვალობა - საქართველო ახალციხელ მოსწავლეებს და მასწავლებლებს შეხვდა. დისკუსიის თემები იყო: რატომ უნდა გავხდეთ ევროკავშირის კანდიდატი ქვეყანა, რა სარგებლის მომტანია ეს ჩვენთვის, რა სახის დეზინფორმაცია და ანტიდასავლური პროპაგანდა ვრცელდება ამ თემის გარშემო. სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. USAID-ის სამოქალაქო საზოგადოების ჩართულობის პროგრამის ფარგლებში, საერთაშორისო ორგანიზაციებმა „არასამეწარმეო სამართლის საერთაშორისო ცენტრმა“ (ICNL) და „არასამეწარმეო სამართლის ევროპულმა ცენტრმა“ (ECNL) ჩაატარეს შედარებითი ანალიზი - რამდენად თავსებადია „უცხოური გავლენის გამჭვირვალობის შესახებ“ კანონპროექტი საერთაშორისო სამართალთან და ევროპულ სტანდარტებთან. ანალიზის ქართული ვერსია იხილეთ აქ... ანალიზის მოკლე ვერსია ინგლისურ ენაზე იხილეთ აქ... ანალიზის ვრცელი ვერსია... წყარო: ewmi-activism.org

თბილისი. საქართველოს ახალგაზრდა იურისტთა ასოციაციამ (საია) დაარსებიდან დღემდე, 1 მილიონზე მეტ ადამიან გაუწია უფასო იურიდიული კონსულტაცია და დახმარება. იხ. ბლოგპოსტები საია-ს წარმატებული საქმეების შესახებ... წყარო: ორგანიზაციის გვერდი სოციალურ ქსელში

23 თებერვალს, 19:00 საათზე, კომლის ორგანიზებით, ზუმში საინფორმაციო შეხვედრა გაიმართება იმ ახალი კანონის პროექტის შესახებ, რომელიც „პირდაპირ ემუქრება ქართულ სამოქალაქო სექტორს“. სრულად...

ამ წუთებში, „ღია საზოგადოების ფონდში“ „ღირსეული შრომის პლატფორმა“ „ფრიდრიხ ებერტის ფონდის“ ფინანსური მხარდაჭერით ორი მიმდინარე პროექტის პირველადი მიგნებების პრეზენტაციას გამართავს. მისამართი: თბილისი, თ. ჭოველიძის 10 (ღია საზოგადოების ფონდი).

თბილისი. 26 იანვარს თბილისის სააპელაციო სასამართლომ ძალაში დატოვა თბილისის საქალაქო სასამართლოს მიერ მიღებული გადაწყვეტილება ელისო ალანიას საქმეზე, რაც იმას ნიშნავს, რომ დავა სამსახურიდან უკანონოდ გათავისუფლებული ქალის გამარჯვებით დასრულდა. ელისო ალანიას ინტერესებს სასამართლოში პარტნიორობა ადამიანის უფლებებისთვის (PHR) იცავდა. დამსაქმებელს მოსარჩელისთვის, კომპენსაციის სახით, 1 წლის ხელფასის ჯამური ოდენობის, 6 000 ლარის გადახდა დაეკისრა. „როცა ყოველ ჯერზე ამ ისტორიას ვიხსენებ, ხელახლა მიკვდება ქმარი. განვიცდი იმ ემოციებს რაც მაშინ მქონდა. მე დამსახურებული თანამშრომელი ვიყავი და ვერ ვივიწყებ ამ შეურაცხყოფას, რაც მომაყენეს. ეს კლინიკა მეორე ოჯახივით იყო ჩემთვის“, - ელისო ალანია, სასამართლო პროცესზე. სრულად... წყარო: phr.ge

თბილისი. საბჭოთა რუსული ოკუპაციისა და პროპაგანდის ათწლეულებმა, საქართველოს ისტორიაში ჯერ-ჯერობით ერთადერთი კოალიციური მთავრობის პირველი თავმჯდომარის ბიოგრაფია, ჩვენი საზოგადოების მეხსიერებიდან თითქმის მთლიანად გააქრო. საბჭოთა წარსულის კვლევის ლაბორატორიამ ერთად მოუყარა თავი იმ ინფორმაციას, რომელიც ნოე რამიშვილს ეხება. სრულად... წყარო: საბჭოთა წარსული კვლევის ლაბორატორიის გვერდი სოციალურ ქსელში

თბილისი. სამოქალაქო მოძრაობა „მრავალეროვანი საქართველო“ პარლამენტში ინიცირებული კანონის პროექტს „უცხო გავლენების გამჭვირვალობის შესახებ“ ეხმიანება. „ჩვენთვის, ეთნიკურ უმცირესობათა საკითხებზე მომუშავე ქოლგა ორგანიზაციისთვის, რომელიც 56 სათემო ორგანიზაციას აერთიანებს, მსგავსი კანონის მიღება კატეგორიულად მიუღებელია. ეთნიკურ უმცირესობათა სათემო ორგანიზაციების დიდი უმრავლესობის საქმიანობა, რომელიც უპირატესად კულტურული ღონისძიებებით შემოიფარგლება, დიდწილად დამოკიდებულია სხვა ქვეყნების დაფინანსებაზე, რაც მათ კანონის მიღების შემთხვევაში უცხოური გავლენის აგენტებად აქცევს“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში