თბილისი. ფონდ „ღია საზოგადოება - საქართველოს" ოფისში გაიმართა საბჭოთა წარსულის კვლევის ლაბორატორიის მიერ მომზადებული პუბლიკაციის „საბჭოთა წარსულის გააზრება - დისკუსიები 2011" და ფილმის „დიდი საბჭოთა ტერორი: ადამიანური ისტორიები" პრეზენტაცია.  პუბლიკაციაში „საბჭოთა წარსულის გააზრება - დისკუსიები 2011", იმ დისკუსიების ტექსტური ვერსიებია თავმოყრილი, რომლებსაც საბჭოთა წარსულის კვლევის ლაბორატორია ერთი წლის მანძილზე გოეთეს ინსტიტუტში მართავდა. დისკუსიების თემა საბჭოთა წარსულის გააზრება იყო და ბევრ მნიშვნელოვან საკითხს მოიცავდა - საბჭოთა მწერლობას, კინოს, არქიტექტურას, საბჭოთა და პოსტსაბჭოთა ნაციონალიზმს, სტალინურ რეპრესიებსა და დეპორტაციებს, აკრძალულ ლიტერატურას, დისიდენტების მოღვაწეობას, საბჭოთა კავშირის დაშლას, ლუსტრაციის პოლიტიკას და ა.შ. ფილმი „დიდი საბჭოთა ტერორი: ადამიანური ისტორიები" სტალინის მმართველობის პერიოდში რეპრესირებული ადამიანების და მათი ოჯახის წევრების ისტორიებს ასახავს. ფილმი თანმიმდევრულად მოგვითხრობს საქართველოში 1921-1956 წლებში განვითარებულ მოვლენებს და გვიჩვენებს იმ გავლენას, რომელიც ამ პროცესმა იქონია სხვადასხვა ოჯახზე და ადამიანზე. აღნიშნული პროექტის მიზანია ხელი შეუწყოს საბჭოთა ტოტალიტარული წარსულის შესწავლას საბჭოთა მემკვიდრეობის პოლიტიკური, სამართლებრივი და მორალური პასუხისმგებლობის გააზრებისათვის. წყარო: osgf.ge

სამცხე–ჯავახეთი. 5 თებერვალს, ,,სამოქალაქო განათლებისა და პედაგოგთა გადამზადების პროგრამის ფარგლებში" ახალციხის მუნიციპალიტეტის აწყურის  საჯარო სკოლის სამოქალაქო კლუბის წევრებს ჩაუტარდათ ტრენინგი  თემაზე: ,,მასობრივი გამოკითხვა". ტრენინგის მონაწილეები გაეცნენ მასობრივი გამოკითხვის ტიპებს  და აქტიურად ჩაერთვნენ ტრენინგის მსვლელობაში, ახალგაზრდებისათვის აღნიშნული თემატიკა საინტერესო იყო. ტრენინგის ორგანიზატორი იყო საზოგადოებრივი ორგანიზაცია ,,ახალციხის ახალგაზრდული ცენტრი".

6 იანვარს, 17:00 საათზე, საინიციატივო ჯგუფი „გადავარჩინოთ ბათუმის დინამო", გამართავს შეხვედრას საფეხბურთო გუნდის წინაშე არსებული პრობლემების, გამოწვევების და სამომავლო გეგმის შესახებ. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი

თბილისი. 31 იანვარს GIPA და კლუბ ფრონტლაინ ჯორჯიას ორგანიზებით გაიმართა დისკუსია – სოციალური ქსელები და ჟურნალისტური ეთიკის სტანდარტები. რა არის სოციალური ქსელები ჟურნალისტებისთვის - პერსონალური თუ საჯარო სივრცე? როგორ აღიქვამს აუდიტორია მათ პოსტებს ფეისბუქზე? სად გადის ზღვარი პირად შეხედულებებსა და რედაქციის პოზიციას შორის? როგორ ვიყოთ მოქნილები და ამავე დროს არ დავკარგოთ პასუხისმგებლობის გრძნობა? - ეს არის ის კითხვები, რაზეც 31 იანვარს პასუხის გაცემას ცდილობდნენ კლუბ „ფრონტლაინ ჯორჯიას” დისკუსიის მონაწილეები. სოციალურ ქსელებში ქცევის წესები არ შეუმუშავებიათ მონაწილეებს, რადგან ეს, მათი აზრით კიდევ მრავალი განხილვის თემაა. თუმცა შეთანხმდნენ, რომ სოციალურ ქსელებში ჟურნალისტის ქმედებამ არ უნდა იქონიოს გავლენა მისი და გამოცემის სანდოობასა და მიუკერძოებლობაზე. წყარო: media.ge ჩანაწერი – სოციალური ქსელები და ჟურნალისტური ეთიკის სტანდარტები წყარო: სამოქალაქო ინტერნეტ მაუწყებლობა ნაკადი.

სამეგრელო. 4 თებერვალს ჭარბტენიანი ტერიტორიების დაცვის მსოფლიო დღესთან დაკავშირებით USAID-ის პროგრამამ INRMW-საქართველომ მოაწყო გადამფრენ ფრინველებზე დაკვირვების და დარგოლვის საველე ექსპედიცია პალიასtომის ტბაზე, კოლხეთის ეროვნულ პარკში. მასში მონაწილეობა მიიღეს პროგრამის ფარგლებში დაარსებული ეკოკლუბების წევრებმა. ღონისძიება გახსნes ამერიკის შეერთებული შტატების საელჩოს მრჩეველმა ეკონომიკურ საკითხებში ჩარლზ ვეტერმა, USAID-ის გარემოს დაცვისა და ენერგეტიკის ოფისის დირექტორმა ჯილ კელიმ და INRMW პროგრამის წარმომადგენლებმა. ეკოკლუბების შემეცნებითი ექპედიცია ჩატარდა გარემოს დაცვისა და ბუნებრივი რესურსების სამინისტროს, დაცული ტერიტორიების სააგენტოს მხარდაჭერითა და ილიას სახელმწიფო უნივერსიტეტის ორნითოლოგების დახმარებით. ეს პირველი შემთხვევაა საქართველოში, როცა საჯარო სკოლის ბავშვებმა მონაწილეობა მიიღეს გადამფრენ ფრინველებზე დაკვირვებაში. ღონისძიების შედეგად ხობის და სენაკის 8 საჯარო სკოლის 24 მოსწავლემ მიიღო თეორიული ცოდნა და პრაქტიკული გამოცდილება აღნიშნულ საკითხებში. წყარო: cenn. org

7 თებერვალს, 17:00 საათზე გაიმართება ჟურნალისტური ეთიკის ქარტიის საბჭოს სხდომა. მისამართი: თბილისი, კალისტრატე ცინცაძის 7

7 თებერვალს, 17:00 საათზე „თავისუფალ ჟურნალისტთა სახლი“ მართავს დისკუსიას თემაზე: უსაფრთხო ინტერნეტის დღე. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი

7 თებერვალს, 18:00 საათზე  კავშირი „დიოსკურია" ჰაინრიჰ ბიოლის ფონდში გამართავს საჯარო დისკუსიას – „მოხალისეობა საქართველოში – პრობლემები და პერსპექტივები".მომხსენებლები: ნინო თოდუა (არასამთავრობო ორგანიზაცია „ჰელფინგ ჰენდის" მოხალისეთა კოორდინატორი), რუთა კასაბიანკა (მშვიდობის კორპუსის მოხალისე საქართველოში),  დავით მეტრეველი (სპორტისა და ახალგაზრდობის სამინისტროს პროგრამების სამმართველოს უფროსი). მისამართი: თბილისი, ზოვრეთის 28

თბილისი. საერთაშორისო გამჭვირვალობა – საქართველომ „მბრუნავი კარის" პრობლემების შესახებ კვლევის გამოქვეყნებას გეგმას, მანამდე კი პუბლიკაციას აქვეყნებს. ტერმინი „მბრუნავი კარი" გულისხმობს თანამდებობის პირთა მოძრაობას კერძო და საჯარო სექტორებს შორის. საქართველოში არაერთი პირი გადავიდა კერძო სექტორიდან მაღალ თანამდებობაზე, ან პირიქით. ამიტომ ორგანიზაცია მიიჩნევს, რომ „მბრუნავ კარს" მეტი ყურადღება უნდა დაეთმოს. იგი შეიძლება სასარგებლო იყოს გამოცდილების, ცოდნის, პრაქტიკის გაზიარების კუთხით, მაგრამ შეიძლება პრობლემადაც იქცეს, მაშინ როდესაც ინტერესთა გადაკვეთა წარმოიშვება. ამდენად ორგანიზაცია მნიშვნელოვნად მიიჩნევს „მბრუნავი კარის" მარეგულირებელი სათანადო ნორმების შემოღებას. სრულად წყარო: transparency.ge

ქვემო ქართლი. საგანმანათლებლო ინციიატივების ქართული ასოციაციის – სიქას მიერ შექმნილი კლუბი „უნარები პროფესიული წარმატებისთვის" იწვევს ლიდერობით და დებატებით დაინტერესებულ 17–25 წლის ახალგაზრდებს. კლუბში ტრენინგები თებერვალში დაიწყება და სამი თვის მანძილზე მსმენელები დაეუფლებიან დებატების უნარ–ჩვევების, არგუმენტირებულ მსჯელობას, წერის კულტურას, ანალიტიკურ აზროვნებას, კონფლიქტების მართვის ხელოვნებას და ა.შ. დაინტერესებულ ახალგაზრდებს დეტალური ინფორმაციის გაცნობა შეუძლიათ სოციალურ ქსელში ორგანიზაციის გვერდზე. წყარო: ორგანიზაციის გვერდი სოციალურ ქსელში

თბილისი. საიამ საქართველოს პარლამენტის საგაზაფხულო სესიის გახსნისას საკანონმდებლო ხელისუფლებასა და საზოგადოებას გასული სესიის თანმდევი პროცედურული ხარვეზები შეახსენა. ასოციაციამ პარლამენტს საკანონმდებლო პროცესის გამჭვირვალობისკენ და დაჩქარებული წესით კანონპროექტის აუცილებლობის შემთხვევაში განხილვისკენ მოუწოდა. „მნიშვნელოვანია, რომ საქართვლოს პარლამენტის მომავალი საქმიანობა სრულ შესაბამისობაში მოდიოდეს რეგლამენტთან. ამავდროულად, კანონმდებლობით უნდა იყოს უზრუნველყოფილი მაღალი სტანდარტები პარლამენტის ღიაობისა და მის საქმიანობაში სამოქალაქო საზოგადოების ჩართულობისათვის", – ნათქვამია ახალგაზრდა იურისტთა ვებგვერდზე. სრულად წყარო: gyla.ge

კახეთი.საზოგადოებრივი ორგანიზაციების „სამოქალაქო ინიციატივისა" და „ლელის" ერთობლივი ინიციატივით, სოფელ ლელიანში მცხოვრებ აბიტურიენტებს შესაძლებლობა მიეცათ ერთი დღე სტუდენტური ცხოვრებით ეცხოვრათ. 2 თებერვალს სამოქალაქო ინიციატივამ აბიტურიენტებს თბილისში უმასპინძლა და დღის პირველ ნახევარში ისინი ილიას უნივერსიტეტში ლექციებს დაესწრნენ, რათა უკეთ გარკვეულიყვნენ სწავლების ხარისხსა და სპეციალობების სპეციფიკაში. დღის მეორე ნახევარში აბიტურიენტები სამოქალაქო ინიციატივებისა და ფონდ „მომავლის ღიმილის" შეხვედრას დაესწრნენ, სადაც მონაწილეობა მიიღეს აქტივობების დაგეგმვაში. ინიციატივის ავტორები მიიიჩნევენ, რომ ასეთი ღონისძიებები ხელს შეუწყობს აბიტურიენტების მოტივაციის ზრდას და საზოგადოებრივ ცხოვრებაში მათ აქტიურ ჩართვას. წყარო: facebook.com/samokalakoiniciativa

თბილისი. ინფორმაციის თავისუფლების განვითარების ინსტიტუტმა 2012 წლის წინასაარჩევნო პერიოდში რეგიონებში განხორციელებული სპეციალური ტრანსფერების შესახებ ინფორმაცია გაავრცელა. 4 თებერვალს გამოქვეყნებულ კვლევაში წარმოდგენილია პრეზიდენტის, მთავრობის სარეზერვო და რეგიონებში განსახორციელებელი პროექტების ფონდების მიერ განხორციელებული გადარიცხვები. სრულად წყარო: opendatablog.wordpress.com

თბილისი. ევროკავშირის 3 წუთიანი ფილმების ფესტივალის გამარჯვებულები ევროკავშირის წარმომადგენლობამ  2 თებერვალს დააჯილდოვა. კონკურსში „ევროკავშირი ჩემს მეზობლად" სამმა მობილური ტელეფონებით გადაღებულმა მოკლემეტრაჟიანმა ფილმმა „ძალა ერთობაშია", „ემანსიპაცია" და „მეზობლები" გაიმარჯვა. ღონისძიება მოსწავლე ახალგაზრდობის სასახლეში გაიმართა. ფილმები წყარო: eu3min.ge/

თბილისი. 3 თებერვალს რუსთაველის მეტროსთან „International Spark Program"-ის საინიციატივო ჯგუფის ორგანიზებით განხორციელდა პროექტი ,,ერთად დავიცვათ გარემო”. პროექტის ფარგლებში ახალგაზრდებმა პლასტმასის ბოთლებისგან დიდი ბოთლი ააწყვეს. მათ ასევე გამართეს შეჯიბრი ,,კალათბოთლში”. მონაწილეები ბურთების ნაცვლად ბოთლებს აგდებდნენ კალათში. „„International Spark Program"-ის ფარგლებში გამართული აქცია გარემოს დაცვას ეძღვნება. ჩვენ გვინდა საზოგადოებას მოვუწოდოთ, არ დაყარონ ბოთლები, არ დააბინძურონ გარემო. პლასტმასის ბოთლების ჩაბარებითა და მათი გადამუშავებით გარემოსთვის მნიშვნელოვანი ზიანის თავიდან აცილებაა შესაძლებელი” - აღნიშნა ღონისძიების ერთ-ერთმა ორგანიზატორმა ელენე მინაშვილმა.  წყარო: freea.ge

სამეგრელო. 4 თებერვალს, საერთაშორისო გამჭვირვალობა - საქართველოს ზუგდიდის ოფისის წარმომადგენლებმა, საქართველოს პარლამენტის არჩევნების შემდეგ სამეგრელო-ზემო სვანეთის მხარეში გამოკვეთილი რამდენიმე ტენდენცია და საჯარო მოხელეებზე 2012 წელს გაცემული პრემიების და ხელფასების ანალიზი მედიას გააცნეს.  ორგანიზაციის მიერ წარმოდგენილ ანალიზში მოხვდა ზუგდიდის გამგებლის მოვალეობის შემსრულებლის საგანგებო თათბირი, სადაც მან ადმინისტრაციის თანამშრომლებს და გამგეობის სამსახურის ხელმძღვანელებს სამსახურიდან წასვლის შესახებ განცხადების დაწერა მოსთხოვა. ორგანიზაციის წარმომადგენლები განმარტავენ, რომ გამგეობის თანამშრომლებს განცხადებებში არ მიათითებინეს თარიღი. ისინი გამგეობაში დღესაც მუშაობენ და ხელს აწერენ ოფიციალურ დოკუმენტებს. „საჯარო სამსახურიდან დათხოვნის ტენდეცია და სტატისტიკა არის ისეთი, როგორიც მთელ ქვეყანაში. ვფიქრობ, რომ მსგავსი თემები უნდა იყო საჯარო განხილვის საგანი და თითოეულ ფაქტზე უნდა მოხდეს რეაგირება", – განაცხადა „საერთაშორის გამჭვირვალობა – საქართველოს" ზუგდიდის ოფისის კოორდინატორი მლხაზ ჭკადუამ.

5 თებერვალს, 12:00 საათზე, საიას თავმჯდომარე კახა კოჟორიძე საქართველოს პარლამენტის საგაზაფხულო სესიის გახსნასთან დაკავშირებით პრესკონფერენციას გამართავს. ასევე, შეაფასებს გასული სესიის განმავლობაში რეგლამენტით დადგენილი პროცედურების დაცვის პრაქტიკას. მისამართი: თბილისი, კახიძის  15 (ყოფილი კრილოვის ქუჩა)

5 თებერვალს, 17:00 საათზე საერთაშორისო გამჭვირვალობა – საქართველო" ინტერნეტის თავისუფლების თემაზე დისკუსიას გამართავს. მისამართი: თბილისი, თავისუფლების მოედანი 1, ევროპის სახლი

5 თებერვალს, 14:00 საათზე, კულტურულ ურთიერთობათა ცენტრი – კავკასიური სახლი და სამოქალაქო მოსმენების კავკასიური ცენტრი გიწვევთ შეხვედრების ციკლზე, რომელიც ეთმობა ქართულ–რუსული ურთიერთობების დარეგულირების საკითხებს. მისამართი: გალაკტიონ ტაბიძის ქუჩა #20  კულტურულ ურთიერთობათა ცენტრ -კვკასიური სახლი

აჭარა. 4 თებერვალს, „ბათუმის ახალგაზრდულმა ცენტრმა" კიბოსთან ბრძოლის მსოფლიო დღესთან დაკავშირებით ბათუმის ქუჩებში მსვლელობა მოაწყო.  6 მაისის პარკიდან  პრეს–კაფემდე მოზარდებმა სპეციალურად შექმნილი გულსაბნევები დაარიგეს. 2012 წლის ნოემბერში ასოცოაცია „თავისუფალ ჟურნალისტთა სახლის" ბაზაზე ჩამოყალიბდა „ბათუმის ახალგაზრდული ცენტრი". ღონისძიება გაიმართა „ეროვნული ინტეგრაციის გაძლიერება საქართველოში" პროექტის ფარგლებში, რომელსაც ახორციელებს საქართველოს გაეროს ასოციაცია, აშშ–ს საერთაშორისო განვითარების სააგენტოს (USAID) ფინანსური მხარდაჭერით.

5 თებერვალს, 11:00 საათზე ტფილისის ჰამქარი კულტურის სამინისტროს მხარდაჭერით გამართავს კონფერენციას „ურბანული მემკვიდრეობა: პრობლემები და პერსპექტივები". მისამართი, თბილისი, ვარდების რევოლუციის მოედანი 1, სასტუმრო „რედისონ ბლუ ივერია"

თბილისი.„საერთაშორისო გამჭვირვალობა – საქართველომ" საპარლამენტო ამბების მორიგი, ყოველკვირეული პოდკასტი გამოაქვეყნა. 4 თებერვლის გამოშვების თემებია „ქართული ოცნების" განცხადება საკონსტიტუციო ცვლილებებზე, პრეზიდენტის დაგეგმილი გამოსვლა პარლამენტში და სხვა კვირის საინტერესო თემები. პოდკასტს უძღვება: ლევან ნატროშვილი, „საერთაშორისო გამჭვირვალობა – საქართველოს" პროექტების ხელმძღვანელი და გიგი ჩიხლაძე, იურისტი. საპარლამენტო ამბების პოდკასტი: 4 თებერვალი წყარო: transparency.ge