ქვემო ქართლი. განათლების განვითარების და დასაქმების ცენტრის (EDEC) და სამოქალაქო ინტეგრაციის ფონდის (CIF) ორგანიზებით, ბოლნისში მოხალისეობის რეგიონული ფორუმი ჩატარდა. ფორუმი გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: STAR პროექტის გვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს კვლევას: მართლმსაჯულების რეფორმების 10 წელი: გამოწვევები და პერსპექტივები. კოალიციის ინფორმაციით, „ბოლო ათწლეულში გატარებული არაერთი რეფორმის მიუხედავად, ქართული სასამართლო კვლავ ფუნდამენტური გამოწვევების წინაშეა და ლეგიტიმაციისა და ნდობის მნიშვნელოვან კრიზისს განიცდის. მიუხედავად იმისა,  რეფორმების საწყისი ეტაპები დადებითად ფასდებოდა, 10 წლის თავზე,  მთლიანობაში, ეს პროცესი შესაძლოა შეფასდეს სასამართლოს ინსტიტუციური მოდერნიზაციის არასრულფასოვან მცდელობად, რომელმაც ვერ შეძლო ქართული კონტექსტისთვის მთავარ გამოწვევასთან – სასამართლო სისტემაში ძალაუფლების კონცენტრაციასა და არაფორმალურ გავლენებთან გამკლავება“. დოკუმენტი ხელმისაწვდომია ბმულზე... წყარო: gyla.ge

თბილისი. ორგანიზაცია „საფარის“ ინფორმაციით, ნინოწმინდის პანსიონის ყოფილ აღსაზრდელს საცხოვრებელი სახლი გადაეცემა. „ახალგაზრდა ქალი 20 წლისაა. მასთან მუშაობა „საფარმა” 2021 წელს, პანსიონის დატოვებიდან რამდენიმე თვეში დაიწყო. მას არ გააჩნდა საცხოვრებელი ადგილი, თავს მეგობართან აფარებდა. პანსიონატში ყოფნის დროს მას არ მისცემია შესაძლებლობა დაუფლებოდა დამოუკიდებლად ცხოვრებისათვის აუცილებელ უნარ-ჩვევებს, შესაბამისად მას ბევრი, თითქმის გადაუჭრელი სოციალური პრობლემებიც აწუხებდა”, – ამბობს იურისტი, ცირა ჯგერენაია. იურისტთან გასაუბრებისას მან ახსენა, რომ რამდენჯერმე იყო ნამყოფი მამისეულ სახლში, ქალაქ ქუთაისში. მამა 2007 წელს, 4 წლის ასაკში გარდაეცვალა. იურისტმა ცირა გჯერენაიამ მასთან გასაუბრების შემდეგ საქმის გამოკვლევა დაიწყო და აღმოაჩინა, რომ ქუთაისში, ახალგაზრდა ქალის ბაბუის საკუთრებაში მართლაც ფიქსირდებოდა საცხოვრებელი სახლი. ბაბუისა და მამის გარდაცვალების შემდეგ, სახლი უკანონოდ, არაერთი დარღვევის საფუძველზე ერთ-ერთმა მემკვიდრემ დაირეგისტრირა საკუთრებაში“. წაიკითხეთ საქმის დეტალები სრულად... წყარო: sapari.ge

თბილისი. საერთაშორისო გამჭვირვალობა - საქართველომ (TI Georgia) ჟურნალისტ დიანა ჯოჯუას საქმე პირველი ინსტანციის სასამართლოში წარმატებით დაასრულეს. ტელეკომპანია „რუსთავი 2“ დაზარალებულს კუთვნილ ხელფასს და კომპენსაციას გადაუხდის. სრულად... წყარო: ორგანიზაციის გვერდი სოციალურ ქსელში

კახეთი. სოციალური სამართლიანობის ცენტრი ეხმაურება ყვარელში განვითარებულ მოვლენებს. „იმ პირობებში, როდესაც საქართველო  განგრძობადი ოკუპაციის რეჟიმშია და იმავდროულად, ევროკავშირისგან კანდიდატის სტატუსის თაობაზე გადაწყვეტილების მოლოდინშია, ქვეყანაში რუსი მაღალჩინოსნის ოჯახის წევრების შემოშვება საფრთხეს უქმნის როგორც სამოქალაქო მშვიდობას, ასევე ეროვნულ ინტერესებსა და ქვეყნის ევროინტეგრაციის პერსპექტივას. არა ერთი კითხვა ჩნდება საზღვრის კონტროლის საკითხზეც. მაშინ, როდესაც შინაგან საქმეთა სამინისტრო არა ერთ კრიტიკულად განწყობილ აქტივისტს, ჟურნალისტს მეზობელი ქვეყნებიდან ამ კუთხით არსებული ბუნდოვანი ნორმების გამოყენებითა და უსაფრთხოების არგუმენტზე თვითნებური მითითებით, უარს ეუბნება საქართველოში შემოსვლაზე, ბუნდოვანია, როგორ შეიძლება საზღვარზე შსს-ს თანამშრომლებს არ დაეიდენტიფიცირებინათ დასანქცირებული რუსეთის მოქალაქეების შემოსვლა. ჩვენი აზრით, ეს გადაწყვეტილება, წარსულში სერგეი გავრილოვისა და ვლადიმერ პოზნერის საქართველოში შემოსვლის გადაწყვეტილებებთან და ამ ფონზე გაკეთებულ პოლიტიკურ განცხადებებთან ერთად, ამგვარი ფიგურების საქართველოში შემოსვლის საკითხზე პოლიტიკურ ლოიალობას უფრო აჩვენებს და შეუძლებელია მხოლოდ საზღვარზე შესაბამისი სამსახურების მუშაობის არაეფექტიანობით ავხსნათ“, ნათქვამია განცხადებაში. სრულად... წყარო: socialjustice.org.ge

23-24 მაისს გაიმართება საქართველოში ევროკავშირის სადამკვირვებლო მისიის (EUMM) მონიტორის აქსელ კორტენის მიერ გადაღებული ფოტოების გამოფენა, რომლებიც ასახავს მის სამუშაოს და საქართველოში მიღებულ შთაბეჭდილებებს. სრულად...

23 მაისს, ევროკავშირის მიერ მხარდაჭერილი პროექტის „სამოქალაქო საზოგადოების ინიციატივა“ ფარგლებში, განათლების განვითარების და დასაქმების ცენტრის (EDEC) და ქვემო ქართლის რეგიონული ჰაბის - „სამოქალაქო ინტაგრაციის ფონდის“ ორგანიზებით, ბოლნისის მუზეუმში, რეგიონული ფორუმი ,,სამოქალაქო საზოგადოება მოხალისეობის განვითარებისათვის” გაიმართება. სრულად...

23 მაისს, 12:30 საათზე, „პულმან თბილისში“ ავსტრიის განვითარების თანამშრომლობის (ADC) დაფინანსებით მიმდინარე პროექტის „ახალგაზრდული მეწარმეობა სოფლის განვითარებისთვის“ (RDYE) საგრანტო კონკურსის გამარჯვებულთა დაჯილდოების ცერემონია გაიმართა. მისამართი: ჭავჭავაძის გამზ. 37 მ

23 მაისს, 11:00 სათზე, „ადამიანის უფლებათა ცენტრი“ ადვოკატებთან - მიხეილ რამიშვილი, მია ზოიძე და გიორგი ფანცულაია ერთად პრესკონფერენციას გამართავს. მისამართი: თბილისი, გახოკიძის ქ.11ა

ამ წუთებში, „სოციალური სამართლიანობის ცენტრი“ პანელურ დისკუსიას თემაზე: „უფლება სათანადო საცხოვრისზე: სახელმწიფოს პოლიტიკა და პრაქტიკა“ გამართავს. თემა: სათანადო საცხოვრისის სახელმწიფო პოლიტიკისა და პრაქტიკის სისტემური გამოწვევებისა და ჩავარდნების იდენტიფიცირება. მისამართი: თბილისი, შოთა რუსთაველის გამზ.13 („თბილისი მარიოტი“)

თბილისი. საქართველოს ახალგაზრდა იურისტთა ასოციაცია (საია) აგრძელებს ზვიად მთავრიშვილის ოჯახის ინტერესების დაცვას, როგორც ეროვნულ, ასევე, - საერთაშორისო დონეზე. „საქმე ეხება 2019 წლის 15 აპრილს, კაჭრეთში მცხოვრები ზვიად მთავრიშვილის გარდაცვალებას, რომელსაც წინ უძღოდა 2019 წლის 22 მარტს ამ უკანასკნელის მიმართ სამართალდამცავთა მხრიდან სავარაუდო არასათანადო მოპყრობა. საიამ სტრასბურგის სასამართლოში გაგზავნილ წერილობით პოზიციაში კიდევ ერთხელ აღნიშნა, რომ ზვიად მთავრიშვილის საქმეზე სახელმწიფომ არა მხოლოდ დაარღვია საქმეზე ეფექტიანი და სრულყოფილი გამოძიების ჩატარების ვალდებულება, არამედ ზვიად მთავრიშვილის გარდაცვალება, სავარაუდოდ, სწორედ სახელმწიფოს მოხელეთა (პოლიციის თანამშრომელთა) ქმედებების პირდაპირ შედეგს წარმოადგენს, რაც საქმეში არსებული მტკიცებულებებით დასტურდება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო (TI Georgia) აქვეყნებს ბლოგპოსტს: პრემიერის მანიპულაციები რუსეთთან პირდაპირი ფრენების აღდგენის გასამართლებლად. “პრემიერ მინისტრი რუსეთთან პირდაპირი ფრენების აღდგენის გამო არსებულ პროტესტს ანტიდასავლური რიტორიკით გამოეხმაურა. თითქოს, ევროკავშირი საქართველოს რუსეთთან ეკონომიკური ურთიერთობების შეწყვეტისკენ მოუწოდებს, თავად კი ჩვეულებრივ აგრძელებს რუსეთთან ვაჭრობას. პრემიერ მინისტრი რიცხვებით მანიპულირების გზით ეცადა რეალობის დამალვას. სიმართლეა, რომ უკრაინაში ომის დაწყების შემდეგ ევროკავშირის რუსეთზე სავაჭრო დამოკიდებულება 3-ჯერ შემცირდა, საქართველოს რუსეთზე სავაჭრო დამოკიდებულება კი 1.5-ჯერ გაიზარდა”, ნათქვამიაა საერთაშორისო გამჭვირვალობა - საქართველოს განცხადებაში. სრულად... წყარო: transparency.ge

თბილისი. საქართველოს სახალხო დამცველი ლევან იოსელიანი გაეროს ქალთა ორგანიზაციის წარმომადგენელს საქართველოში კაორი იშიკავას შეხვდა. შეხვედრაზე განიხილეს საქართველოში გენდერული თანასწორობის საკითხები, ქალთა ეკონომიკური და უფლებრივი მდგომარეობა, ფემიციდი. შეხვედრაზე ასევე ისაუბრეს ორგანიზაციებს შორის პარტნიორობის გაძლიერებაზე. სრულად... წყარო: ombudsman.ge

სამცხე-ჯავახეთი. სოციალური სამართლიანობის ცენტრის თანამშრომლებმა ახალქალაქის მუნიციპალიტეტის სოფელ ტურცხის მოსახლეობას იურიდიული კონსულტაციები გაუწიეს. შეხვედრა ჩატარდა USAID სამართლის უზენაესობის პროგრამა მხარდაჭერით. „2014 წლის მოსახლეობის საყოველთაო აღწერის მიხედვით სოფელ  ტურცხში ცხოვრობს 759 ადამიანის  აქედან  მოსახლეობის 98.8% არის ეთნიკურად სომეხი. მოსახლეობისთვის გაწეული სამართლებრივი კონსულტაციის დროს გამოიკვეთა, რომ მათთვის ძირითად პრობლემას წარმოადგენს  საქართველოს მოქალაქეობის მიღების საკითხი... საქართველოს მოქალაქეობის არ ქონის გამო მოსახლეობა ვერ სარგებლობს სახელმწიფოს სოციალური და ჯანდაცვის სერვისებით და უსახსრობის გამო საჭიროების შემთხვევაშიც კი ხშირად ვერ მიმართავენ სამედიცინო დაწესებულებებს, ვერ იტარებენ სათანადო მკურნალობას“... სრულად... წყარო: ორგანიზაციის გვერდი სოციალურ ქსელში

აჭარა. ბათუმში მოხალისეობის რეგიონული ფორუმი გაიმართა. ფორუმი მიმდინარეობს ევროკავშირისა და კონრად ადენაუერის ფონდის მხარდაჭერით, პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

22 მაისს, 19:00 საათზე „იძულებით გადაადგილებულ ქალთა ასოციაცია „თანხმობა“ და ააიპ „დავიწყოთ ახლა“ რუსთავს ეწვევა და Bravo Art Academy-სთან წარმოგიდგენთ მორიგ სპექტაკლს თემაზე - პროფესიული განათლება. ამ აქტივობის მიზანია პროფესიული სასწავლებლების გარშემო არსებული მითებისა და სტერეოტიპების დამსხვრევა. სრულად...

22 მაისს, 11:30 საათზე, სასტუმრო „თბილისი მარიოტში“ გაიმართება კვლევის პრეზენტაცია - „ქალი კოორდინატორების გამოწვევები არჩევნებში“. კვლევას წარადგენენ საფარისა და ISFED-ის აღმასრულებელი დირექტორები - ბაია პატარაია, ნინო დოლიძე და მკვლევარი გიორგი ურჩუხიშვილი. მისამართი: თბილისი, შოთა რუსთაველის გამზ. #13

ხუთშაბათს, 25 მაისს, 11:00 საათზე, სამოქალაქო საზოგადოების ინსტიტუტი (CSI), გამართავს ონლაინ საკონსულტაციო შეხვედრას (Zoom პლატფორმის საშუალებით) საზოგადოებრივ ორგანიზაციებთან - „მეწარმეთა შესახებ“ კანონთან და დაკავშირებულ სამართლებრივ აქტებში 2022 წლის 1 იანვრიდან ამოქმედებული ცვლილებების გათვალისწინებით, არაკომერციულ იურიდიულ პირთა რეგისტრირებული მონაცემების ცვლილებისა და კანონმდებლობასთან შესაბამისობის მიღწევის საკითხის განხილვის მიზნით. შეხვედრა იმართება სსო მეტრის და "სამოქალაქო საზოგადოების ინიციატივების" პროექტების ფარგლებში და მისი მიზანია დამსწრეებისთვის ამ თემაზე ძირითადი ინფორმაციის მიწოდება, მათი კონსულტირება. შეხვედრა ასევე ითვალისწინებს როგორც პრეზენტაციის, ისე კითხვა–პასუხისა და დისკუსიის ფორმატს. შეხვედრაში მონაწილეობის მსურველებმა უნდა გაიარონ ონლაინ რეგისტრაცია – აღნიშნული ბმულის საშუალებით, არაუგვიანეს 24 მაისისა. მოცემული თემითა და სხვა, საზოგადოებრივი ორგანიზაციების, აქტივისტებისა და უფლებადამცველების საარსებო გარემოსთან დაკავშირებული თემებით დაინტერესების შემთხვევაში, შეგიძლიათ გაეცნოთ სსო მეტრის 2022 წლის ანგარიშს

თბილისი. სამოქალაქო საზოგადოების ორგანიზაციები აქციაზე დაკავების შემთხვევაში, მზად არიან უფასოდ გაგიწიონ იურიდიული დამხარება. საჭიროების შემთხვევაში, დარეკეთ ცხელ ხაზზე 577070563 სრულად... წყარო: ორგანიზაციის გვერდი სოციალურ ქსელში

საქართველოს რამდენიმე ქალაქში – რუსთავსა და ოზურგეთში, ევროპის საბჭოსა და შესაბამისი მუნიციპალიტეტების ორგანიზებით, მოქალაქეთა მონაწილეობის ახალი მექანიზმი – მოქალაქეთა ასამბლეის დანერგვა დაიწყო. რუსთავში მოქალაქეებმა ჭალის ტყის განვითარების რეკომენდაციები შეიმუშავეს, რომელსაც რუსთავის მუნიციპალიტეტს წარუდგენენ. ხოლო ოზურგეთში პარკირების სისტემის გაუმჯობესების მიმართულებით იმუშავეს ადგილობრივმა მაცხოვრებლებმა.  სამოქალაქო საზოგადოების ინსტიტუტის (CSI) წარმომადგენლები ჩართულნი იყვნენ სამუშაო პროცესში – მოდერაციას უწევდნენ შეხვედრას, რათა მოქალაქეების მიერ რეკომენდაციების შემუშავება და ინიციატივების კენჭისყრა ეფექტურად წარმართულიყო.  რა არის მოქალაქეთა ასამბლეა?  მოქალაქეთა ასამბლეა სათათბირო დემოკრატიის ფორმაა, რომელიც საშუალებას აძლევს მოქალაქეებს, შეისწავლონ და ასამბლეის წევრებთან ერთად განიხილონ კონკრეტული საკითხი და ადგილობრივ დონეზე გადაწყვეტილებების მიღების პროცესში ჩაერთონ.  ასამბლეის წევრები შემთხვევითობის პრინციპით, წინასწარ გაწერილი მეთოდოლოგიით შერჩეული მოქალაქეები არიან, რომლებიც ერთად ქმნიან მრავალფეროვან, დემოგრაფიულად წარმომადგენლობით ჯგუფს, ისეთი კრიტერიუმების მიხედვით, როგორიცაა, ასაკი, სქესი, განათლების დონე და საცხოვრებელი უბანი. წყარო: ევროპის საბჭოს ოფისი საქართველოში

ქვემო ქართლი. 22 მაისს, სოციალური სამართლიანობის ცენტრი USAID სამართლის უზენაესობის პროგრამის მხარდაჭერით, მარნეულის მუნიციპალიტეტის სოფელ ხულდარაში სამართლებრივი დახმარების შეხვედრას გამართავს. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტისა (IDFI) და საქართველოს უნივერსიტეტის (UG) თანამშრომლობით გრძელდება სასწავლო პროგრამა: “დეზინფორმაციისა და პროპაგანდის კვლევა: ისტორია, თეორიები და გაბათილების საშუალებები”. სრულად... წყარო: idfi.ge